ᒐᕙᒪᑐᖃᒃᑯᑦ ᐊᕐᕌᒍᒐᓴᓂ ᐊᒃᑐᖅᓯᑦᑕᐃᓕᒪᓯᒪᕗᑦ ᓯᓚᕐᔪᐊᑉ ᓄᓇᐅᔪᓂ ᑲᑐᔾᔨᖃᑎᒌᖏᑦᑕ ᑐᑭᑖᕈᑕᐅᓂᖅ ᐱᔪᓐᓇᕐᓂᕆᔭᖏᓐᓂ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ (UNDRIP).
ᓄᑖᒥᒃ ᐱᖁᔭᒃᓴᒥ ᐊᑐᓕᖅᑎᑦᑎᓂᕐᒥ ᑐᑭᑖᕈᑕᐅᓂᕐᒥ ᐱᓕᕆᕙᓪᓕᐊᑎᓪᓗᒍ ᑲᓇᑕᐅᑉ ᒪᓕᒐᓕᐅᖅᑎᖏᑎᒍᑦ, ᓄᓇᕘᑉ ᒪᓕᒐᓕᐅᖅᑎᖏᑦ ᐅᖃᐅᓯᖃᖅᐳᑦ ᐅᒃᐱᕈᓱᓗᐊᕌᓗᙱᓐᓂᖏᓐᓂ, ᐃᓄᐃᑦ ᑕᐱᕇᑦ ᑲᓇᑕᒥ (ITK) ᓈᒻᒪᒃᓯᒪᓂᖃᕋᓗᐊᖅᑎᓪᓗᒋᑦ ᐱᖁᔭᒃᓴᒥ, ᖃᓄᐃᓕᖓᓂᖃᕐᓗᓂ.
ᒫᔾᔨ 31−ᒥ ᑲᑎᒪᔨᓄᑦ ᑲᑎᒪᓂᖓᓂ, ᐃᓄᐃᑦ ᑕᐱᕇᑦ ᑲᓇᑕᒥ ᐱᖁᔨᕗᖔᕈᑎᓕᐅᓚᐅᖅᐳᑦ ᐃᑲᔪᖅᓱᐃᓪᓗᑎᒃ ᐱᖁᔭᒃᓴᖅ C-15−ᒥ ᑭᓯᐊᓂ ᖃᐃᖁᔨᓂᖃᖅᖢᑎᒃ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᐱᔪᓐᓇᕐᓂᕆᔭᖏᓐᓄᑦ ᑎᓕᔭᐅᓯᒪᔪᓂ, ᐃᓄᖕᓂ ᑭᒡᒐᖅᑐᐃᔨᖃᕋᔭᖅᑐᓂ.
ᒧᒥᓛᖅ ᖃᖅᑲᖅ, ᓄᓇᕘᑉ ᐃᓚᒋᔭᐅᔪᒥ ᑲᓇᑕᐅᑉ ᒪᓕᒐᓕᐅᖅᑎᖏᑦ, ᐅᖃᓚᐅᖅᐳᖅ ᐃᓱᒪᕗᖅ ᑲᓇᑕᒥ ᒐᕙᒪᒃᑯᑦ “ᑲᑉᐱᐊᓱᖕᓂᖏᓐᓂ” ᐊᑐᓕᖅᑎᑦᑎᓪᓚᕆᖕᓂᕐᒧᑦ ᓯᓚᕐᔪᐊᑉ ᓄᓇᐅᔪᓂ ᑲᑐᔾᔨᖃᑎᒌᖏᑦ ᑐᑭᑖᕈᑕᐅᓂᖅ ᓄᓇᖃᖅᑳᖅᓯᒪᔪᓄᑦ ᐱᔪᓐᓇᕐᓂᕆᔭᖏᓐᓂ.
“ᐱᔪᓐᓇᕐᓂᖃᖅᐳᖅ ᓱᕋᑦᑎᕆᓂᖓᓂ ᐊᓪᓚᓄᑦ ᒪᓕᒐᕐᒥ ᐊᒻᒪᓗ ᐃᓚᒋᔭᐅᓂᐅᔪᓂ ᓄᓇᑖᕋᓱᐊᕐᓂᕐᒧᑦ ᐊᖏᕈᑕᐅᔪᓂ ᓄᓇᖃᖅᑳᖅᓯᒪᔪᓄᑦ ᐃᓄᐃᑦ ᑎᑭᐅᑎᔪᓐᓇᕋᔭᕐᓂᖏᓐᓂ ᐃᓄᖕᓄᑦ ᐱᔪᓐᓇᕐᓂᕆᔭᖏᓐᓂ,” ᐅᖃᓚᐅᖅᐳᖅ. “ᐊᑭᖃᕐᓂᐊᖅᐳᖅ (ᒐᕙᒪᑐᖃᒃᑯᓐᓂ) ᑮᓇᐅᔭᑲᓪᓛᓗᖕᓂ ᐱᓯᒫᓂᒃᑕᑦᑎᓐᓂ
ᖃᖅᑲᖅ ᑎᒃᑯᐊᕆᓚᐅᖅᐳᖅ ᐅᓇ ᒪᕐᕈᒋᓪᓗᓂᐅᒃ ᐱᓕᕆᓇᓱᐊᕐᓂᐅᔪᒥ ᒐᕙᒪᒃᑯᓐᓂ ᐊᑐᓕᖅᑎᑦᑎᓇᓱᐊᕐᓂᕐᒧᑦ ᓯᓚᕐᔪᐊᑉ ᓄᓇᐅᔪᓂ ᑲᑐᔾᔨᖃᑎᒌᖏᑦᑕ ᑐᑭᑖᕈᑕᐅᓂᕐᒥ. ᑭᖑᓪᓕᖅᐹᖅ ᐱᓇᓱᐊᖅᑕᐅᓂᐅᔪᖅ ᐱᓕᕆᐊᕆᔭᐅᔪᓐᓃᑐᐃᓐᓇᓚᐅᖅᐳᖅ ᑲᓇᑕᒥ ᒪᓕᒐᓕᐊᕆᔭᐅᔪᓂᒃ ᖃᐅᔨᓴᖅᑏᑦ ᑲᑎᙵᓂᐅᔪᓂ ᑲᓇᑕᒥ ᒪᓕᒐᓕᐊᕆᔭᐅᔪᓂᒃ ᖃᐅᔨᓴᖅᑎᓂᑦ ᐱᑎᑦᑎᑦᑕᐃᓕᒪᑎᑦᑎᓚᐅᖅᑎᓪᓗᒋᑦ ᑎᑭᐅᑎᓂᕐᒥ ᑭᖑᓪᓕᖅᐹᒥ ᓂᕈᐊᖅᑕᐅᓂᖓᓂ ᔫᓂ 2019−ᒥ.
“(ᓄᓇᕗᒻᒥ ᑲᓇᑕᒥ ᒪᓕᒐᓕᐊᕆᔭᐅᔪᓂᒃ ᖃᐅᔨᓴᖅᑎ ᑕᓂᔅ ᐹᑐᓴᓐ) ᐊᔪᙱᓐᓂᖃᓚᐅᖅᐳᖅ ᐊᓂᒍᐃᑎᑦᑎᓂᕐᒥ ᑖᔅᓱᒥᖓ ᐊᒻᒪ ᑕᐃᒪᐃᓚᐅᙱᓚᖅ. ᓂᕈᐊᖅᑎᖏᑦ 84−ᓂ 85 ᐳᓴᓐᑎᐅᕗᑦ ᐃᓅᓪᓗᑎᒃ. ᐅᒃᐱᕈᓱᙱᓚᖅ ᐱᔪᓐᓇᕐᓂᖃᕐᓂᖏᓐᓂ ᐃᒻᒥᒃᑯᑦ−ᐃᓱᒪᓕᐅᕆᔪᓐᓇᕐᓂᕐᒥ?” ᖃᖅᑲᖅ ᐊᐱᕆᓚᐅᖅᐳᖅ. “ᐊᐱᖅᓱᕆᐊᖃᓪᓚᕆᖅᑰᓕᖅᐳᒍᑦ ᖃᓄᐃᒻᒪᑦ ᐅᕙᓃᑉᐱᑕ, ᒫᓐᓇ.”
ᐹᑐᓴᓐ ᐅᖃᓚᐅᖅᐳᖅ ᐊᑑᑎᓕᖕᓂ ᐊᐱᖅᑯᑕᐅᔪᑦ ᑲᒪᒋᔭᖃᑦᑎᐊᖅᑐᒥ ᒪᓕᒐᓕᐅᖅᑎᐅᔪᒥ ᐊᐱᕆᓪᓗᐊᖅᑕᖓᓂ ᐅᑯᐊᖑᕗᑦ: “ᖃᓄᖅ ᐅᓇ ᒪᓕᒐᓕᐅᕐᕕᒃ ᐱᑎᑦᑎᓂᐊᖅᐸ ᑕᑯᒃᓴᐅᓂᒃᑯᑦ ᐊᓯᔾᔨᕐᓂᐅᔪᒥ ᖃᓄᐃᓕᖓᓂᐅᔪᒥ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᑲᓇᑕᒥ... ᖃᓄᖅ ᑐᑭᓕᐅᕆᓂᐊᖅᐸ ᐊᓯᔾᔨᕐᓂᓪᓚᕆᐅᔪᒥ ᐊᒻᒪᓗ ᖃᓄᐃᓕᐅᕐᓂᓪᓚᕆᐅᔪᒥ?”
ᑎᒃᑯᐊᕆᓚᐅᖅᐳᖅ ᓕᐳᕈᒃᑯᓐᓂ ᐃᖅᑲᖅᑐᐃᔨᓕᕆᔨᒃᑯᑦ ᒥᓂᔅᑕᒋᓚᐅᖅᓯᒪᔭᖓ ᔫᑎ ᐅᐃᓪᓯᓐ-ᕋᐃᐴᓪᑦ ᐃᑲᔪᖅᓱᐃᓚᐅᙱᓚᖅᐊᑐᓕᖅᑎᑕᐅᓂᖓᓂ ᓯᓚᕐᔪᐊᑉ ᓄᓇᐅᔪᓂ ᑲᑐᔾᔨᖃᑎᒌᖏᑦᑕ ᑐᑭᑖᕈᑕᐅᓂᖅ ᐱᔪᓐᓇᕐᓂᕆᔭᖏᓐᓂ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ.
“ᐊᔪᕐᓇᙱᓐᓂᖅᓴᐅᔪᓂ ᐋᖅᑭᒍᑎᒃᓴᓂ ᓲᕐᓗ ᐊᑐᓕᖅᑎᑦᑎᓂᕐᒥ ᓯᓚᕐᔪᐊᑉ ᓄᓇᐅᔪᓂ ᑲᑐᔾᔨᖃᑎᒌᖏᑦs ᑐᑭᑖᕈᑕᐅᓂᕐᒥ ᑲᓇᑕᒥ ᒪᓕᒐᙳᕐᓂᖓᓂ ᐱᓕᕆᔭᒃᓴᐅᙱᓚᖅ ᐊᒻᒪᓗ, ᐃᒃᐱᒍᓱᑦᑎᐊᕐᓂᐅᔪᒥ, ᑲᑎᒪᔨᕐᔪᐊᓄᑦ ᐅᓚᕕᓴᕈᑕᐅᓪᓗᓂ ᐱᓕᕆᓂᕐᒧᑦ ᐊᒃᓱᕈᕐᓇᖅᑐᒥ ᐱᓕᕆᓂᐅᔪᒥ ᐱᔭᕆᐊᖃᕋᔭᖅᑐᒥ ᐊᑐᓕᖅᑎᑦᑎᓪᓚᕆᖕᓂᕐᒧᑦ ᐊᖏᕐᕋᒥ ᓄᓇᓕᖕᓂ,” ᐅᐃᓪᓯᓐ-ᕋᐃᐴᓪᑦ ᐅᖃᓚᐅᖅᐳᖅ ᔪᓚᐃ 2016−ᒥ.
ᕋᐃᑦᓱᓪ ᕌᐸᐳᐊᑦ, ᑐᓴᒐᒃᓴᓕᕆᓂᕐᒧᑦ ᑎᑎᕋᖅᑎᖓ ᐃᖅᑲᖅᑐᐃᔨᓕᕆᔨᒃᑯᑦ ᒥᓂᔅᑕᖓᓄᑦ ᑕᐃᕕᑦ ᓚᒥᑎᒧᑦ, ᐅᖃᓚᐅᖅᐳᖅ ᓕᐳᕈᒃᑯᑦ ᐃᑲᔪᖅᓱᐃᓚᐅᖅᐳᑦ NDP−ᑯᑦ ᑲᓇᑕᐅᑉ ᒪᓕᒐᓕᐅᖅᑎᖏᑕ ᐃᓚᒋᔭᐅᓚᐅᖅᑐᒥ ᕉᒥᐅ ᓵᒐᓈᔅ ᐃᒻᒥᒃᑰᖅᑐᓄᑦ ᐃᓚᒋᔭᐅᔪᓄᑦ ᐱᖁᔭᒃᓴᖓᓂ ᐱᓕᕆᒃᑲᓐᓂᕐᓂᕐᒧᑦ ᓯᓚᕐᔪᐊᑉ ᓄᓇᐅᔪᓂ ᑲᑐᔾᔨᖃᑎᒌᖏᑦᑕ ᑐᑭᑖᕈᑕᐅᓂᖅ ᐱᔪᓐᓇᕐᓂᕆᔭᖏᓐᓂ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ 2016−ᒥ. ᐸᓯᒃᓯᓚᐅᖅᐳᖅ ᖃᓄᐃᓕᖓᓂᖓᓂ ᑲᓐᓲᕕᑎᒃᑯᑦ ᑲᓇᑕᒥ ᒪᓕᒐᓕᐊᕆᔭᐅᔪᓂᒃ ᖃᐅᔨᓴᖅᑎᓄᑦ.
“ᑕᐃᔅᓱᒪᓂᐅᓚᐅᖅᑐᒥ ᑕᐃᒪᐃᓐᓂᕆᓚᐅᖅᑕᖓᓂ ᑕᐃᒪᐃᒃᑲᓐᓂᖅᑎᑦᑎᔭᕆᐊᖃᙱᑉᐳᒍᑦ. ᐃᐊᕆᓐ ᐅ’ᑑᓪ Conservative Party−ᑯᓐᓂ ᐃᑲᔪᖅᓱᐃᙱᓚᖅ ᓯᓚᕐᔪᐊᑉ ᓄᓇᐅᔪᓂ ᑲᑐᔾᔨᖃᑎᒌᖏᑦᑕ ᑐᑭᑖᕈᑕᐅᓂᖅ ᐱᔪᓐᓇᕐᓂᕆᔭᖏᓐᓂ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ, ᐊᒻᒪᓗ ᑕᑯᓯᒫᓂᒃᐳᒍᑦ ᐸᕐᓇᒍᑎᒃᓴᖏᓐᓂ ᓱᒃᑲᐃᒡᓕᐊᖅᓯᓂᖏᓐᓂ ᐃᖏᕐᕋᓂᕆᔭᐅᔪᒥ ᐊᒻᒪᓗ ᑭᖑᕙᕆᐊᖅᑎᑦᑎᓂᖏᓐᓂ ᐱᓪᓚᕆᐅᔪᒥ ᓂᕈᐊᕐᓂᐅᔪᓂ ᐱᖁᔭᒃᓴᓄᑦ ᐊᖏᕈᑎᒋᙱᑕᖏᓐᓂ,” ᕌᐸᐳᐊᑦ ᐅᖃᓚᐅᖅᐳᖅ. “ᐅᓄᙱᓐᓂᖅᓴᐅᓪᓗᑕ ᒐᕙᒪᐅᓪᓗᑕ, ᐱᔭᕆᐊᖃᖅᐳᒍᑦ ᐱᓕᕆᖃᑎᖃᕐᓂᐅᔪᒥ ᐊᓯᖏᓐᓂ ᑲᑎᒪᔨᕐᔪᐊᖑᔪᓂ ᐹᑎᓂᑦ ᓇᓗᓇᐃᖅᓯᓂᕐᒥ ᐅᓇ ᐱᓪᓚᕆᐅᔪᒥ ᐱᖁᔭᒃᓴᒥ ᐃᖏᕐᕋᐃᓐᓇᕈᓐᓇᕐᓂᖓᓂ ᑕᐅᕘᓇ ᑲᓇᑕᐅᑉ ᒪᓕᒐᓕᐅᖅᑎᖏᑕ ᐃᖏᕐᕋᓂᕆᔭᖓᓐᓂ ᐊᒻᒪᓗ ᑎᑭᐅᑎᓗᓂ ᑯᐃᓐᒧᑦ ᐊᖏᖅᑕᐅᓂᖓᓄᑦ.
ᑲᓇᑕᒥ ᒪᓕᒐᓕᐊᕆᔭᐅᔪᓂᒃ ᖃᐅᔨᓴᖅᑎᓄᑦ ᒪᐃ 28, 2019−ᒥ, ᑲᓇᑕᒥ ᒪᓕᒐᓕᐊᕆᔭᐅᔪᓂᒃ ᖃᐅᔨᓴᖅᑎ ᒨᕆ ᓯᓐᑭᓕᐊᕐ, ᑭᐅᓂᕐᒧᑦ ᐹᑐᓴᓐᒧᑦ, ᐅᖃᓚᐅᖅᐳᖅ ᐊᑐᓕᖅᑎᑕᐅᓂᖓ ᓯᓚᕐᔪᐊᑉ ᓄᓇᐅᔪᓂ ᑲᑐᔾᔨᖃᑎᒌᖏᑦᑕ ᑐᑭᑖᕈᑕᐅᓂᖅ ᐱᔪᓐᓇᕐᓂᕆᔭᖏᓐᓂ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᐊᒃᑐᐃᓂᖃᕋᔭᖅᐳᖅ ᒐᕙᒪᑐᖃᒃᑯᓐᓂ, ᑲᓇᑕᐅᑉ ᐊᕕᒃᑐᖅᓯᒪᓂᖓᓂ, ᓄᓇᓕᖕᓂ ᐊᒻᒪᓗ ᓄᓇᖃᖅᑳᖅᓯᒪᔪᓄᑦ ᑭᒡᓕᐅᔪᓄᑦ ᒐᕙᒪᐅᔪᓂ.
“ᐊᑐᓂ ᐱᓕᕆᓂᐅᔪᒥ, ᐊᑐᓂ ᐱᑕᖃᕐᓂᐅᔪᓄᑦ ᐃᓱᒪᒃᓴᖅᓯᐅᕆᔭᕆᐊᖃᕋᖅᐳᑦ ᐊᖏᓂᖓᓂ ᐊᓯᔾᔨᕈᑎᖃᕐᓂᐊᕐᓂᖓᓂ ᐃᓗᐊᓂ ᒪᓕᒐᑎᒍᑦ ᒐᕙᒪᐅᔪᓄᑦ ᒪᓕᑦᑎᐊᕋᓗᐊᕐᒪᖔᑦ ᑐᙵᕕᒋᔭᐅᔪᓂ ᐅᖃᖅᓯᒪᑦᑎᐊᕐᓂᖏᓐᓂ ᐃᓗᐊᓂ ᑐᑭᑖᕈᑕᐅᓂᕐᒥ,” ᓯᓐᑭᓕᐊᕐ ᐅᖃᓚᐅᖅᐳᖅ.
ᐱᖁᔭᒃᓴᖅ C-15 ᐅᕗᓃᓚᐅᖅᐳᑦ ᑲᑎᒪᔨᕋᓛᖑᐃᓐᓇᖅᑐᓂ ᓄᓇᖃᖅᑳᖅᓯᒪᔪᓄᑦ ᐊᒻᒪ ᐅᑭᐅᖅᑕᖅᑐᒥ ᐱᓕᕆᓂᐅᔪᓄᑦ ᕿᒥᕐᕈᔭᐅᓂᕐᒧᑦ ᕕᕈᐊᕆᐅᑉ ᓄᙳᐊᓂ.
ᓯᕗᓪᓕᖅᐹᖅ ᓯᓚᕐᔪᐊᑉ ᓄᓇᐅᔪᓂ ᑲᑐᔾᔨᖃᑎᒌᖏᑦ ᑐᑭᑖᕈᑕᐅᓂᖅ ᐱᔪᓐᓇᕐᓂᕆᔭᖏᓐᓂ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᐊᑐᓕᖅᑎᑕᐅᓚᐅᖅᐳᖅ ᓯᓚᕐᔪᐊᑉ ᓄᓇᐅᔪᓂ ᑲᑐᔾᔨᖃᑎᒌᖏᓐᓄᑦ ᓯᑎᐱᕆ 2007−ᒥ.
ᑭᖑᓪᓕᖅᐹᒥ ᐅᓂᒃᑳᓕᐊᖓᓂ ᑎᓯᐱᕆ 2015−ᒥ, ᑲᓇᑕᐅᑉ ᓱᓕᔪᒥ ᐊᒻᒪ ᓴᐃᒻᒪᖃᑎᒌᖕᓂᕐᒧᑦ ᑎᓕᔭᐅᓯᒪᔪᑦ ᐊᔭᐅᕆᓚᐅᖅᐳᑦ ᒐᕙᒪᑐᖃᒃᑯᓐᓂ ᐊᑐᓕᖅᑎᑦᑎᓂᖏᓐᓂ ᑐᑭᑖᕈᑕᐅᓂᖅ ᐱᔪᓐᓇᕐᓂᕆᔭᖏᓐᓂ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ.