Skip to content

ᓯᕗᓕᖅᑎᐅᑉ ᓯᕗᓪᓕᐅᔾᔭᐅᖁᔭᖏᑦ ᓄᓇᕗᒻᒥ-ᐃᓗᐊᓂ ᒪᒥᓴᕐᕕᖕᒥ, ᐃᓄᑐᖃᕐᓄᑦ ᐸᖅᑭᔭᐅᓂᖏᓐᓂ, ᐃᒡᓗᖃᖅᑎᑦᑎᓂᕐᒧᑦ

ᓯᕗᓕᖅᑎ ᔫ ᓴᕕᑲᑖᖅ ᐅᖃᖅᐳᖅ ᐅᖃᖅᓯᒪᐃᓐᓇᐅᔭᖅᑐᖅ ᓄᓇᕗᑦ ᐱᖓᓱᓂ ᐱᓪᓚᕆᐅᔪᓂ ᐱᔭᕆᐊᖃᕐᓂᖃᖅᐳᖅ: ᓄᓇᕗᒻᒥ ᐸᓂᖅᓰᕕᒃᓴᒥ ᒪᒥᓴᕐᕕᖕᒥ, ᓄᓇᕗᒻᒥ ᐃᓄᑐᖃᒃᑯᕕᖕᒥ ᐊᒻᒪ ᑮᓇᐅᔭᒃᑲᓐᓂᕐᓂ ᐃᒡᓗᒃᓴᒃᓴᓄᑦ.

ᓄᓇᕗᒻᒥ ᓯᕗᓕᖅᑎ ᔫ ᓴᕕᑲᑖᖅ, ᐅᕙᓂ ᑕᑯᒃᓴᐅᔪᖅ ᒪᓕᒐᓕᐅᕐᕕᐅᑉ ᓯᕗᓂᐊᓂ ᐃᖃᓗᖕᓂ, ᐅᖃᓚᐅᖅᐳᖅ ᒪᓕᒃᑐᒥ ᐅᐃᒪᓇᒐᓚᒃᑐᒥ ᑕᖅᑭᐅᔪᓂ 2018−ᒥ, "ᐅᕙᓃᑉᐳᖅ ᑐᕌᖅᑎᑦᑎᑦᑎᐊᕐᓂᕐᒧᑦ ᐅᒥᐊᕐᔪᐊᖓᓂ ᑐᕌᖓᓂᑦᑎᐊᕙᐅᔪᒧᑦ ᐃᖏᕐᕋᓂᖃᑦᑎᐊᖅᑐᒥ ᐊᖅᑯᑎᖓᓂ ᑎᑭᐅᑎᔪᓐᓇᕐᓂᐊᕋᑦᑎᒍᑦ ᐱᓕᕆᐊᒃᓴᕗᑦ ᐊᒻᒪ ᑐᓂᓯᓗᑎᒃ ᓄᓇᕗᒻᒥᐅᓂ ᐱᔭᕆᐊᖃᑦᑎᐊᖅᑕᒥᓂᑦ."

ᑭᓯᐊᓂ, ᑎᓯᐱᕆ 14−ᒥ ᐊᐱᖅᓱᖅᑕᐅᓂᐅᔪᒥ, ᓴᕕᑲᑖᖅ ᓯᕗᓪᓕᖅᐹᒥ ᑭᐅᓂᖃᓚᐅᖅᐳᖅ ᐅᐃᒻᒪᕈᑕᐅᓂᐅᔪᓂ ᒪᓕᒐᓕᐅᕐᕕᖕᒥ ᕿᑎᐊᓂ ᐅᒃᑐᐱᕆ 2017−ᒥ ᓂᕈᐊᕐᓂᐅᓚᐅᖅᑐᒥ ᐊᒻᒪ ᒫᓐᓇᒧᑦ, ᐃᓚᖃᖅᖢᓂ ᐹᓪ ᖁᐊᓴᐅᑉ ᐊᓂᑕᐅᓂᖓᓂ ᓯᕗᓕᖅᑎᐅᓂᖓᓄᑦ ᐊᒻᒪ ᐹᑦ ᐊᕐᓇᒃᑲᐅᖅ ᓄᖅᑲᕐᓂᖓᓂ ᒥᓂᔅᑕᐃᑦ ᑲᑎᒪᔨᕐᔪᐊᒃᑯᖏᓐᓂ ᐱᓕᕆᐊᒃᓴᒥᓂᑦ ᐊᖅᓵᖅᑕᐅᓚᐅᖅᑎᓪᓗᒍ.
"ᐊᒃᓱᕉᓴᒐᓛᖕᓂᖃᓚᐅᖅᐳᒍᑦ ᕿᓚᒻᒥᐅᔪᒥ ᑭᓯᐊᓂ, ᐃᓱᒫᓗᖕᓇᙱᓚᖅ, ᐅᕙᓃᑉᐳᒍᑦ ᐱᓕᕆᐊᒃᓴᑦᑎᓐᓂ ᐱᓕᕆᓂᕐᒧᑦ. ᐊᒥᓱᐊᓗᖕᓂ ᐊᑲᐅᙱᓕᐅᕈᑎᖃᖅᐳᒍᑦ ᑲᒪᒋᔭᕆᐊᖃᖅᑕᑦᑎᓐᓂ. ᐊᐃᑦᑖᖑᒐᓗᐊᖅ, ᓴᓂᕌᓂ ᐊᑲᐅᙱᓕᐅᕈᑎᓂᑦ ᑎᑭᑦᑐᖃᓲᖑᕗᖅ ᐊᒻᒪ ᓴᓂᕐᕙᐃᒐᓚᒃᖢᓂ ᐅᕙᑦᑎᓐᓂ," ᐅᖃᓚᐅᖅᐳᖅ ᓴᕕᑲᑖᖅ.
"ᐅᕙᓃᑉᐳᖅ ᑐᕌᖅᑎᑦᑎᑦᑎᐊᕐᓂᕐᒧᑦ ᐅᒥᐊᕐᔪᐊᖓᓂ ᑐᕌᖓᓂᑦᑎᐊᕙᐅᔪᒧᑦ ᐃᖏᕐᕋᓂᖃᑦᑎᐊᖅᑐᒥ ᐊᖅᑯᑎᖓᓂ ᑎᑭᐅᑎᔪᓐᓇᕐᓂᐊᕋᑦᑎᒍᑦ ᐱᓕᕆᐊᒃᓴᕗᑦ ᐊᒻᒪ ᑐᓂᓯᓗᑎᒃ ᓄᓇᕗᒻᒥᐅᓂ ᐱᔭᕆᐊᖃᑦᑎᐊᖅᑕᒥᓂᑦ. ᑕᒪᑦᑕ ᒪᓕᒐᓕᐅᖅᑎᐅᔪᒍᑦ ᕿᒪᐃᔪᒪᕗᒍᑦ ᓄᓇᕗᒻᒥ ᐱᐅᓂᖅᓴᐅᓕᕐᓗᓂ ᑎᑭᓚᐅᖅᑎᓪᓗᑕ."
ᓴᕕᑲᑖᖅ ᐅᖃᓚᐅᖅᐳᖅ ᐅᖃᓪᓚᒃᐸᓪᓕᐊᓂᖃᓕᖅᐳᑦ ᑕᒪᒃᑭᓄᑦ ᐃᓄᑐᖃᒃᑯᕕᒃᓴᒧᑦ ᐊᒻᒪ ᐱᕐᕈᓗᐊᕿᕐᔪᐊᕐᓂᑯᓂ ᐊᒻᒪ ᐸᓂᖅᓰᕕᒃᓴᒥ ᒪᒥᓴᕐᕕᒃᓴᒥ ᓄᓇᕗᒻᒧᑦ.
"ᐱᓕᕆᓇᓱᐊᖅᐳᒍᑦ ᐃᓄᑐᖃᕐᓄᑦ ᐸᖅᑭᔭᐅᕕᒃᓴᖃᕐᓂᖓᓂ ᓄᓇᕘᑉ ᐃᓗᐊᓂ, ᓱᓕ. ᑭᓯᐊᓂ, ᓄᓇᕗᒻᒥᐅᑦ ᖃᐅᔨᒪᓪᓗᐊᖅᐳᑦ ᐊᒻᒪ ᑐᑭᓯᐅᒪᓗᑎᒃ ᐋᔩᑲᑎᒌᖕᓂᑦᑎᓐᓂ ᒐᕙᒪᑐᖃᒃᑯᓐᓂ. ᑮᓇᐅᔭᖃᙱᑐᐃᓐᓇᖅᐳᒍᑦ ᒪᑭᑎᑦᑎᓇᓱᐊᕆᐊᒃᓴᖅ ᐊᒻᒪ ᐱᔭᕇᕐᓗᒍ, ᐊᒻᒪ ᓇᖕᒥᓂᖅ ᐱᓕᕆᓗᑎᒍᑦ," ᐅᖃᓚᐅᖅᐳᖅ.
ᓯᕗᓕᖅᑎ ᐅᖃᓚᐅᖅᐳᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐋᔩᖃᑎᒌᖃᑎᖃᖅᐳᑦ ᒐᕙᒪᑐᖃᒃᑯᓐᓂ ᑮᓇᐅᔭᖃᖅᑎᑦᑎᓂᕐᒧᑦ ᐱᕐᕈᓗᐊᕿᕐᔪᐊᕐᓂᑯᓂ ᐊᒻᒪ ᐸᓂᖅᓰᕕᒃᓴᒥ ᒪᒥᓴᕐᕕᒃᓴᒥ.
"ᑐᕌᒐᕆᓇᓱᐊᖅᑕᖓ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑕᐃᒪᙵᓂ ᓱᐴᖅᑐᒐᖅ ᓱᓐᓂᐅᑎᓐᓇᖅᑐᖅ ᒪᓕᒐᒥ ᓱᕋᐃᓂᐅᔪᓐᓃᕐᒪᑦ ᒫᓐᓇ. ᒐᕙᒪᑐᖃᒃᑯᑦ ᒪᓕᒐᒥ ᓱᕋᐃᓂᐅᔪᓐᓃᖅᑎᒻᒪᔾᔪᒃ, ᑕᐃᒪᐃᓐᓂᖓᓄᑦ ᐅᕙᑦᑎᓐᓂ ᑮᓇᐅᔭᖃᖅᑎᑦᑎᓪᓗᐊᖅᐳᑦ ᑲᒪᒋᔭᖃᕐᓂᕐᒧᑦ ᐱᐅᙱᑦᑐᓂ ᖃᓄᐃᓐᓂᐅᔪᓄᑦ ᓴᖅᑭᑦᑐᓐᓇᖅᑐᓂ ᓱᐴᖅᑐᒐᕐᓂ ᓱᓐᓂᕈᑕᐅᓲᓄᑦ ᒪᓕᒐᒥ ᓱᕋᐃᓂᐅᔪᓐᓃᕐᓂᖓᓄᑦ," ᐅᖃᓚᐅᖅᐳᖅ.
"ᐅᖃᐱᓛᖃᑦᑕᖅᓯᒪᕗᑦ, ᑭᓯᐊᓂ ᓱᓕ ᐱᓪᓚᕆᐅᔪᒥ ᐱᓯᒪᙱᓚᒍᑦ."
ᐊᓱᐃᓛᒃ, ᓄᓇᕗᑦ ᑮᓇᐅᔭᖅᑖᕆᐊᖃᐃᓐᓇᖅᐳᑦ ᐃᒡᓗᒃᓴᖃᖅᑎᑕᐅᓂᕐᒧᑦ.
"ᐃᒡᓗᒃᓴᖃᒃᑲᓐᓂᕆᐊᖃᖅᐳᒍᑦ ᐃᓄᒋᐊᓗᐊᕐᓂᐅᔪᓄᑦ, ᓂᕿᒃᓴᖃᑦᑎᐊᙱᓐᓂᐅᔪᒥ ᐊᒻᒪᓗ ᑕᒪᒃᑭᓂ ᐊᓯᖏᓐᓂ ᐋᓐᓂᐊᕈᑕᐅᔪᓄᑦ ᐃᓚᐅᖃᑕᐅᓲᒥ ᐸᖕᒥᐅᓗᐊᕐᓂᐅᔪᓂ ᐃᒡᓗᒥᑦ. ᐊᑕᐅᓯᕐᒥᓪᓘᓐᓃᑦ ᐱᐅᓂᖅᑕᖃᙱᓚᖅ ᐸᖕᒥᐅᓗᐊᖅᑐᒥ ᐃᒡᓗᒥᑦ. ᐋᓐᓂᐊᖃᕐᓇᕐᓂᕐᒧᑦ ᐊᑲᐅᙱᓕᐅᕈᑕᐅᕗᑦ, ᐅᖁᖕᒧᑦ ᐊᑲᐅᙱᓕᐅᕈᑕᐅᕗᑦ, ᐅᐸᖃᑦᑕᙱᓐᓂᕐᓄᑦ ᐊᑲᐅᙱᓕᐅᕈᑕᐅᕗᑦ, ᐃᓇᒌᓄᑦ ᐋᓐᓂᖅᓯᕆᓂᕐᒧᑦ ᐊᑲᐅᙱᓕᐅᕈᑕᐅᕗᑦ. ᐊᑲᐅᙱᓕᐅᕈᑕᐅᔪᑦ ᑕᐅᕗᖓ ᑕᐅᕗᖓᓂᐅᕗᖅ," ᐅᖃᓚᐅᖅᐳᖅ ᓴᕕᑲᑖᖅ.
ᑕᒪᑐᒪᓂ ᐊᕐᕌᒎᔪᒥ, ᐃᖅᑲᓇᐃᔭᖅᑎᖁᓕᕆᔨᒃᑯᑦ ᓇᖕᒥᓂᖅ ᐱᓕᕆᕝᕕᒃᑖᕐᓂᐊᖅᐳᑦ. ᓴᕕᑲᑖᖅ ᐅᖃᓚᐅᖅᐳᖅ ᐱᔭᐅᔭᕆᐊᖃᕐᔪᐊᖅᐳᖅ.
ᓄᑖᖅ ᐱᓕᕆᕝᕕᐅᔪᖅ "ᐆᒻᒪᕆᒃᑐᒥ" ᐃᓄᖕᓂ ᐃᖅᑲᓇᐃᔮᖃᕐᓂᕐᒧᑦ ᐊᕕᒃᑐᖅᓯᒪᓂᖃᕐᓂᐊᖅᐳᖅ. ᓴᕕᑲᑖᖅ ᐅᖃᓚᐅᖅᐳᖅ ᐊᑐᓂ ᐱᓕᕆᕝᕕᐅᔪᖅ ᐃᓄᖕᓄᑦ ᐃᖅᑲᓇᐃᔮᖃᕐᓂᕐᒧᑦ ᐸᕐᓇᐅᑎᖃᖅᐳᑦ.
ᐅᖃᐅᓯᖃᕐᓂᕐᒥ ᐃᓄᖕᓄᑦ ᐃᖅᑲᓇᐃᔮᖃᕐᓂᕐᒧᑦ ᐃᖏᕐᕋᐃᓐᓇᖅᑐᒥ ᐊᒻᒪ ᐊᓯᔾᔨᖅᑕᐃᓐᓇᐅᔭᖅᑐᒥ ᖃᓄᐃᓕᖓᓂᐅᔪᒥ, ᓴᕕᑲᑖᖅ ᐃᓚᒋᐊᖅᓯᓚᐅᖅᐳᖅ ᐅᓄᙱᑦᑐᒻᒪᕆᑯᓗᖕᓂ ᐃᓕᓐᓂᐊᖅᓯᒪᑦᑎᐊᖅᑐᓂ, ᐱᔪᓐᓇᑦᑎᐊᖅᑐᓂ, ᐱᓕᒻᒪᒃᓴᖅᓯᒪᑦᑎᐊᖅᑐᓂ ᐃᓄᒃᑕᖃᖅᐳᖅ.
"ᑕᐃᒫᒃ ᐱᓕᕆᔭᕆᐊᖃᖅᐳᒍᑦ ᐊᖏᒡᓕᒋᐊᖅᓯᓂᕐᒧᑦ ᑕᐃᒃᑯᓂᖓ ᑲᑎᙵᓂᐅᔪᓄᑦ ᐊᑐᐃᓐᓇᐅᔪᓂ, ᓄᓇᕗᒻᒥ ᒐᕙᒪᒃᑯᑐᐃᓐᓇᐅᙱᑦᑐᓄᑦ. ᒐᕙᒪᑐᖃᒃᑯᑦ, ᐅᔭᕋᖕᓂᐊᕐᕕᖕᓄᑦ, ᐃᓄᖕᓄᑦ ᑲᑐᔾᔨᖃᑎᒌᖑᔪᓄᑦ, ᓇᖕᒥᓂᕆᔭᐅᔪᓄᑦ – ᑕᒪᒃᑭᑦ ᐱᔪᒪᔪᐃᓐᓇᐅᕗᑦ," ᐅᖃᓚᐅᖅᐳᖅ.
"ᖃᓄᓕᒫᑦᑎᐊᖅ ᐱᓕᕆᕗᒍᑦ ᐃᓄᖕᓄᑦ ᐃᖅᑲᓇᐃᔮᖃᕐᓂᕐᒧᑦ ᖁᕝᕙᕆᐊᖅᑎᑦᑎᓂᕐᒧᑦ. ᑭᓯᐊᓂ ᐃᓄᐃᑦ ᐃᑲᔪᕆᐊᖃᕆᕗᑦᑕᐅᖅ. ᐃᓕᓐᓂᐊᕐᕆᐊᖃᖅᐳᑦ. ᐱᓕᒻᒪᒃᓴᓂᖃᕈᒪᔭᕆᐊᖃᖅᐳᑦ. ᐅᖃᐅᑎᕙᒋᑦ, ᐃᓕᓐᓂᐊᖅᓯᒪᑦᑎᐊᕈᕕᑦ, ᐱᓕᒻᒪᒃᓴᖅᓯᒪᑦᑎᐊᕐᓗᑎᑦ ᐃᓅᓗᑎᑦ, ᐃᖅᑲᓇᐃᔮᖃᙱᑦᑑᓚᐅᖅᓯᒪᔾᔮᙱᓚᑎᑦ. ᐱᔪᒪᓂᖃᕐᔪᐊᖅᓯᒪᕗᖅ ᑕᒪᑐᒥᖓ ᑕᐃᑲᓂ," ᐅᖃᓚᐅᖅᐳᖅ.
ᓯᕗᒻᒧᑦ ᓵᙵᓪᓗᓂ ᑕᒪᑐᒫᓂᐅᓛᖅᑐᒥ ᐊᕐᕌᒍᒃᑯᓂ, ᓴᕕᑲᑖᖅ ᐅᖃᖅᐳᖅ ᐅᖃᐅᓯᖃᓛᕈᒪᕗᖅ ᐱᔪᓐᓇᑦᑎᐊᖅᓯᒪᔪᒥ ᐋᔩᖃᑎᒌᖕᓂᐅᔪᒥ ᒐᕙᒪᑐᖃᒃᑯᓐᓂ ᐱᔭᕆᐊᖃᕐᔪᐊᖅᑐᒧᑦ ᐱᓕᕆᕝᕕᒃᓴᓄᑦ ᐃᓄᑐᖃᕐᓂᕐᓄᑦ ᐸᖅᑭᔭᐅᓂᖏᓐᓄᑦ ᐊᒻᒪ ᐱᕐᕈᓗᐊᕿᕐᔪᐊᕐᓂᑯᓄᑦ ᐊᒻᒪ ᐅᐃᕆᓯᒪᓂᕐᓄᑦ ᒪᒥᓴᕐᓂᐅᔪᓄᑦ.
"ᐅᖃᕐᓗᓂ, ‘ᑮᓇᐅᔭᓂ ᑎᑭᑉᐸᓪᓕᐊᔪᖃᓕᖅᑐᖅ ᒫᓐᓇ, ᐅᑎᒨᕈᓐᓇᐃᓪᓕᕗᒍᑦ.' ᐊᕐᕌᒎᑉ ᐃᓗᐊᓂ ᐱᓕᕆᔪᓐᓇᕋᔭᙱᑉᐳᒍᑦ, ᒫᓐᓇ ᑮᓇᐅᔭᖅᑖᕋᓗᐊᕈᑦᑕ. ᑭᓯᐊᓂ ᐅᖃᕈᒪᕗᖓ ᐅᑯᐊ ᐱᓕᕆᐊᒃᓴᐅᔪᑦ ᐱᒋᐊᖅᓯᒪᓕᖅᐳᑦ, ᐃᒡᓗᕐᔪᐊᒥ ᐅᕙᓂ ᐃᓕᔭᐅᔪᖃᓕᖅᑐᖅ, ᑐᙵᕕᒃᓴᖃᓕᖅᑐᖅ. ᐊᒻᒪ ᒐᕙᒪᑐᖃᒃᑯᑦ ᐅᕙᑦᑎᓐᓄᑦ ᑮᓇᐅᔭᓂ ᑐᓂᓯᓯᒪᓕᖅᐳᑦ ᓴᓇᒃᑲᓐᓂᕐᓂᕐᒧᑦ ᐃᒡᓗᒃᓴᒃᑲᓐᓂᕐᓂ."
ᐃᓚᒋᐊᖅᓯᕗᖅ ᐱᔪᒪᓇᔭᒃᑲᓐᓂᕐᓂᖓᓂ 2019−ᒧᑦ:
"ᐊᑕᐅᓯᖅ ᓱᓕᑦᑎᐊᖅᑐᒥ ᐅᖃᕋᔭᖅᐳᑎᑦ ᐊᔪᕐᓇᙱᑦᑐᓐᓇᕐᓂᖓᓂ ᑕᒪᒃᑭᑦ 22−ᖑᔪᑦ ᒪᓕᒐᓕᐅᖅᑎᐅᔪᑦ ᖁᕕᐊᓱᒃᑎᓪᓗᒋᑦ ᐊᒻᒪ ᐱᓕᕆᖃᑎᒌᑦᑎᐊᕐᓗᑎᒃ."