ᐱᒋᐊᖅᖢᓂ ᔭᓄᐊᕆ 18,–ᒥ ᓄᓇᕗᒻᒥᐅᑦ ᖁᙱᐊᕈᓐᓇᕐᓂᐊᖅᐳᑦ ᑲᓇᑕᐅᑉ ᓯᕗᓪᓕᖅᐹᖓᓂ ᑕᒪᒃᑭᐅᒪᔪᒥ ᐃᓄᐃᑦ ᐅᖃᐅᓯᖓᓐᓂ ᑕᓚᕖᓴᒃᑯᑦ ᑕᑯᓐᓇᒐᒃᓴᖓᓂ, ᐅᕙᒍᑦ ᑕᓚᕖᓴ, ᓴᖅᑭᑎᑕᐅᔪᒥ ᓄᓇᕗᒻᒥ ᐃᒻᒥᒃᑰᖅᑐᒥ ᑕᓚᕖᓴᒃᑯᓐᓄᑦ (NITV) ᐊᒻᒪᓗ ᐃᓱᒪ ᑕᓚᕖᓴᒃᑯᓐᓄᑦ.
"ᐅᕙᓐᓄᑦ ᐅᕙᒍᑦ ᑕᓚᕖᓴ ᐱᔪᒪᓂᕆᓯᒪᔭᓐᓂ ᐱᓪᓚᕆᙳᖅᑎᑦᑎᕗᖅ – ᑕᑯᓂᕐᒧᑦ ᐃᓄᐃᑦ ᐃᓕᖅᑯᓯᖓᓐᓂ ᐊᒻᒪᓗ ᑐᓵᓗᓂ ᐅᖃᐅᓯᑦᑎᓐᓂ ᐅᓪᓗᓕᒫᒥ ᑕᓚᕖᓴᒃᑯᑦ," ᐅᖃᓚᐅᖅᐳᖅ ᓘᓯ ᑐᓗᒑᕐᔪᒃ, ᓄᓇᕗᒻᒥ ᐃᒻᒥᒃᑰᖅᑐᒥ ᑕᓚᕖᓴ ᐃᒃᓯᕙᐅᑕᕆᔭᐅᔪᖅ ᐊᒻᒪ ᐃᓱᒻᒥᖅᑐᐃᔨ ᐊᒻᒪᓗᑦᑕᐅᖅ ᑐᑭᒧᐊᒃᑎᑦᑎᔨ ᐃᓄᐃᑦ–ᐅᖃᐅᓯᖓᓐᓂ ᓱᕈᓯᕐᓄᑦ ᑕᕐᕆᔭᓕᐊᖓᓄᑦ, ᑏᐊ ᐊᒻᒪ ᐱᐅᔪᖅ.
"ᐃᓄᑐᖃᖅᐳᑦ ᐃᓅᔪᓐᓃᖅᐸᓪᓕᐊᑎᓪᓗᒋᑦ, ᐅᓇᑕᖅᐳᒍᑦ ᐃᓄᐃᑦ ᐃᓕᖅᑯᓯᖓᓐᓂ ᐊᒻᒪ ᐅᖃᐅᓯᖓᓐᓂ ᐆᒪᑎᓐᓇᓱᐊᖅᖢᒍ ᕿᑐᕐᙵᑦᑎᓐᓄᑦ ᐊᒻᒪ ᐃᕐᙳᑕᑦᑎᓐᓄᑦ. ᑕᓚᕖᓴ ᐃᓄᒃᑐᑦ ᐅᓪᓗᓕᒫᖅ ᖃᐅᑕᒫᑦ ᐱᓕᕆᓂᑦᑎᐊᕙᐅᕕᒡᔪᐊᖑᕗᖅ ᐆᒪᔪᒥ ᐅᖃᐅᓯᕐᒥ ᓯᕗᓂᒃᓴᒧᑦ ᐱᐅᓯᖃᑎᒌᖑᔪᓄᑦ."
ᓄᓇᖃᖅᑎᐅᔪᑦ ᓄᓇᕗᒻᒥ, ᓄᓇᑦᓯᐊᖅ, ᓅᕙᓐᓛᓐ ᐊᒻᒪ ᓛᐸᑐᐊᒥ ᐊᑭᓕᖅᓱᐃᕙᒃᑐᓂ Shaw Direct ᓇᑉᐸᖅᑎᑕᐅᓯᒪᔪᒧᑦ ᐅᕝᕙᓘᓐᓃᑦ ᐅᑭᐅᖅᑕᖅᑐᒥ ᑯᐊᐸᒃᑯᓐᓄᑦ ᑕᐅᑐᒍᓐᓇᕐᓂᐊᖅᐳᑦ ᑕᑯᓐᓇᒐᒃᓴᐅᔪᒥ ᓯᕗᓪᓕᖅᐸᐅᔪᒥ ᑕᑯᓐᓇᒐᒃᓴᖃᖅᑎᑕᐅᓂᐅᔪᒥ. ᒫᓐᓇᐅᔪᒥ–ᑕᑯᒃᓴᐅᑎᑕᐅᓯᒪᔪᒥ ᑕᑯᓐᓇᒐᖃᕐᕕᖓᓂ ᐊᑐᐃᓐᓇᐅᓂᐊᕆᕗᖅ 24/7 uvagut.tv–ᒥ ᔭᓄᐊᕆ 18–ᒥ.
ᐃᓄᐃᑦ ᑕᑯᓐᓇᕋᑦᓴᓕᕆᔨᒃᑯᑦ ᑕᑯᒃᓴᐅᔪᓐᓇᖅᐳᖅ ᐅᑯᓇᓂ ᖃᔅᓯᒧᐊᕐᓂᖓᓂ (EST):
- 6:30 ᐅᓪᓛᒃᑯᑦ ᑎᑭᓪᓗᒍ 8:30 ᐅᓪᓛᒃᑯᑦ.: ᑕᑯᒋᓇᐃ ᓱᕈᓯᕐᓄᑦ ᑕᑯᓐᓇᒐᒃᓴᑦ
- 1:30 ᐅᓐᓄᓴᒃᑯᑦ ᑎᑭᓪᓗᒍ 3:30 ᐅᓐᓄᓴᒃᑯᑦ: ᐃᓄᐃᑦ ᑕᑯᓐᓇᕋᑦᓴᓕᕆᔨᒃᑯᑦ Prime – ᐃᑦᑕᕐᓂᓴᐃᑦ ᐸᐸᑕᐅᓯᒪᔪᑦ, ᑕᑯᒋᓇᐃ
- 5:00 ᐅᓐᓄᓴᒃᑯᑦ ᑎᑭᓪᓗᒍ 6:00 ᐅᓐᓄᓴᒃᑯᑦ: ᑕᑯᒋᓇᐃ ᓱᕈᓯᕐᓄᑦ ᑕᑯᓐᓇᒐᒃᓴᑦ
- 8:00 ᐅᓐᓄᓴᒃᑯᑦ ᑎᑭᓪᓗᒍ 9:00 ᐅᓐᓄᓴᒃᑯᑦ: ᐃᓄᐃᑦ ᑕᑯᓐᓇᕋᑦᓴᓕᕆᔨᒃᑯᑦ Prime – ᐃᑦᑕᕐᓂᓴᐃᑦ ᐸᐸᑕᐅᓯᒪᔪᑦ ᐊᒻᒪ ᐊᓯᖏᓐᓂ ᐱᓕᕆᐊᖑᔪᓂ.
ᑖᒻᑉᓴᓐ ᐃᓚᒋᐊᖅᓯᓚᐅᖅᐳᖅ ᑐᓴᒐᒃᓴᓕᐊᖑᔪᒥ ᐃᓄᐃᑦ ᑕᑯᓐᓇᕋᑦᓴᓕᕆᔨᒃᑯᑦ Prime ᐃᓚᖃᕐᓂᐊᖅᐳᖅ ᓂᕈᐊᖅᑕᐅᓯᒪᔪᓂ ᐃᓄᐃᑦ ᑕᑯᓐᓇᕋᑦᓴᓕᕆᔨᒃᑯᑦ ᐅᓄᖅᑐᒻᒪᕆᐊᓗᖕᓂ ᐃᑦᑕᕐᓂᓴᐃᑦ ᐸᐸᑕᐅᓯᒪᔪᓂᑦ ᐅᓪᓗᖃᖅᑐᓂ 1970–ᖏᓐᓂ ᓄᙳᐊᓂ ᐊᒻᒪ ᐱᒋᐊᓕᓵᖅᑐᓄᑦ 1980–ᖏᓐᓂ.
"ᐅᒃᐱᕈᓱᒃᐳᖓ ᐃᓄᐃᑦ ᑕᑯᔪᓐᓇᓪᓗᐊᕐᓂᖏᓐᓂ ᐅᑯᓂᖓ ᐱᓕᕆᐊᖑᓂᐅᔪᓂ," ᐅᖃᓚᐅᖅᐳᖅ ᒪᓃᑦᑐᖅ ᑖᒻᑉᓴᓐ ᐃᓄᐃᑦ ᑕᑯᓐᓇᕋᑦᓴᓕᕆᔨᒃᑯᓐᓂ. "ᐱᔪᓐᓇᕐᓂᖃᖅᐳᑦ ᑐᓵᓂᕐᒧᑦ ᐃᓄᒃᑎᑐᒻᒥ ᐊᖏᕐᕋᖏᓐᓂ ᐊᒻᒪᓗ ᐃᓕᑦᑎᒃᑲᓐᓂᕐᓗᑎᒃ ᑭᖑᕚᖏᓐᓂ. ᑕᓚᕖᓴ ᐱᓕᕆᔾᔪᑕᐅᕗᖅ ᐊᖓᔪᖅᑳᑦ ᐊᒻᒪ ᐸᖅᑭᔨᐅᔪᑦ ᐊᑐᕈᓐᓇᖅᑕᖏᓐᓂ ᐃᑲᔪᕐᓂᕐᒧᑦ ᑐᓂᓯᓂᖏᓐᓂ ᐊᑐᖅᑕᐅᓂᑯᓂ ᐃᓚᒋᔭᑦᑎᓐᓂ ᕿᒪᐃᓚᐅᖅᑕᖏᓐᓂ. ᑕᑯᓂᕐᒥ ᐊᓈᓇᑦᑎᐊᖏᑦ ᐊᑖᑕᑦᑎᐊᖏᓐᓂ ᐊᒻᒪᓗ ᐊᒪᐅᖏᓐᓂ ᑕᓚᕖᓴᒃᑯᑦ ᐃᑲᔪᕐᓂᐊᖅᐳᖅ ᒪᒃᑯᒃᑐᖁᑎᑦᑎᓐᓂ ᑲᑎᖃᑎᖃᕐᓂᕐᒥ ᐃᓕᖅᑯᓯᖓᓐᓂ ᐊᒻᒪ ᐅᖃᐅᓯᖓᓐᓂ."
ᐱᓕᕆᐊᖑᓂᖃᕐᓂᐊᕆᕗᖅ ᐊᒻᒪᓗ ᑕᕐᕆᔭᓕᐊᓂ ᐊᔾᔨᒌᙱᑦᑐᓂ ᐊᓯᖏᓐᓂ ᑲᒻᐸᓂᐅᔪᓂ, ᐃᓱᒪᒃᑯᓐᓂ, ᐊᕐᓇᐃᑦ ᑕᕐᕆᔭᓕᐊᖏᓐᓂ, ᐊᖅᓯᖅ, ᑕᖅᑯᑦ ᓴᖅᑭᑎᑕᐅᓯᒪᔪᓄᑦ ᐊᒻᒪᓗ ᑭᓄᓪᓖᑦ.
ᑕᑯᒃᓴᐅᑎᑦᑎᓂᐊᕆᕗᑦ ᑕᕐᕆᔭᓕᐊᖑᔪᕕᓂᕐᓂ ᓲᕐᓗ ᐊᑕᓈᕐᔪᐊᑦ ᐅᕿᓚᔪᖅ ᐊᒻᒪᓗ ᓄᑖᖑᔪᓂ ᐱᓕᕆᐊᖑᔪᓂ ᓲᕐᓗ ᓯᓚᒃᑯᑦ ᒫᓐᓇᒥ ᑕᑯᒃᓴᐅᔪᒥ, ᓯᓈᓂ ᐊᒻᒪᓗ ᑐᙵᓇᕐᓂᖅ ᑕᑯᓐᓇᒐᒃᓴᓕᐊᖑᔪᒥ ᒫᓐᓇᐅᔪᒥ ᑕᑯᒃᓴᐅᔪᒥ ᓄᓇᓕᖕᓂ ᐊᒻᒪᓗ ᓄᓇᒥᑦ.
"ᐅᓇ ᖁᕕᐊᓇᖅᐳᖅ ᐱᓕᕆᓂᐅᔪᒥ ᓄᓇᕗᒻᒥᐅᓄᑦ, ᐱᓗᐊᖅᑐᒥ ᑕᐃᒃᑯᓄᖓ ᓯᕗᓪᓕᖅᐹᒥ ᐅᖃᐅᓯᖓ ᐅᓄᒃᑎᑑᖅᑐᒥ," ᐅᖃᓚᐅᖅᐳᖅ ᒥᐊᕆ ᓂᕐᓗᖓᔪᖅ, ᑎᒥᐅᔪᓄᑦ ᑎᑎᕋᖅᑎ ᐊᒻᒪ ᐊᖓᔪᖅᑳᑉ ᑐᖓᓕᖓ ᑎᒥᐅᔪᓄᑦ ᐱᔨᑦᑎᕋᕐᓂᐅᔪᒥ ᐅᑭᐅᖅᑕᖅᑐᒥ ᑯᐊᐸᒃᑯᓐᓂ. "ᐱᓕᕆᕐᔪᐊᖅᓯᒪᕗᑦ ᑕᒪᓐᓇ ᐱᔪᓐᓇᖅᑎᑕᐅᓂᖓᓄᑦ."
ᐅᕙᒍᑦ ᑕᓚᕖᓴ ᐊᑐᐃᓐᓇᐅᓕᖅᐳᖅ ᖁᙱᐊᕐᓂᕐᒧᑦ ᖃᕋᓴᐅᔭᑎᒍᑦ ᐅᕙᓂ uvagut.tv ᐅᕝᕙᓘᓐᓃᑦ isuma.tv.
ᔪᓚᐃ 2020–ᒥ, ᓄᓇᕗᒻᒥ ᑐᓴᒐᒃᓴᓕᕆᔨᒃᑯᑦ ᑐᓴᒐᒃᓴᓕᐅᖅᑎᐅᖃᑎᒋᔭᖓ ᑭᕙᓪᓕᖅ ᑐᓴᒐᒃᓴᓕᕆᔨᒃᑯᑦ ᐅᓂᒃᑳᕆᓚᐅᖅᐳᑦ ᐊᓯᖓᓐᓂ ᐃᓄᐃᑦ ᐅᖃᐅᓯᕐᒥ ᑕᑯᓐᓇᒐᒃᓴᐅᔪᒥ ᓱᓕ ᐱᓕᕆᐊᖑᕙᓪᓕᐊᓇᓱᐊᖅᑐᒥ, ᐃᓄᐃᑦ ᑕᓚᕖᓴ ᓱᓕ ᐅᑕᖅᑭᔪᒥ ᐊᖏᖅᑕᐅᓂᖓᓄᑦ ᑲᓇᑕᒥ ᓈᓚᐅᑎᒃᑯᑦ–ᑕᓚᕖᓴᒧᑦ ᐊᒻᒪ ᑐᓴᐅᒪᑎᑦᑎᔾᔪᑎᓂᑦ ᐱᓕᕆᐊᖃᖅᑎᑕᐅᓯᒪᔪᓂ.