ᑖᒥ ᓵᑉ ᓱᓕ ᐅᒃᐱᕈᓱᑦᓯᐊᖏᑉᐳᖅ, ᐃᑭᒪᖃᑎᒋᓚᐅᖅᑕᖓᓗ ᐹᓂ ᑐᑐ, ᑎᖕᒥᓲᖅᑎᖓᓪᓗ ᓵᓐ ᒦᓕ, ᔭᓗᓇᐃᒥᐅᑕᖅ ᒫᓐᓇ, ᐋᓐᓂᓗᐊᓚᐅᖏᒻᒪᑕ, ᖃᓄᐃᓚᐅᖏᑦᖢᑎᒡᓗ, ᒦᓕᐅᑉ ᑎᖕᒥᓲᖓ Cessna 180 ᐃᒫᓄᑦ ᒥᒍᓐᓇᖅᑐᖅ ᑲᑕᓚᐅᕐᒪᑕ ᖃᖓᑦᑕᕋᓱᐊᖅᖢᑎᒃ ᐃᖃᓗᒃᓯᐅᕐᕕᖕᒥᑦ 100 ᒪᐃᔭᓂᒃ (185 ᑭᓛᒥᑕ) ᐱᖓᓐᓇᖓᓂᑦ ᑲᖏᖅᖠᓂᐅᑉ ᐊᐅᒐᓯ 26-ᒥ.
ᓵᑉ ᐅᑭᐅᓕᒃ 40-ᓂᒃ, ᓇᖕᒥᓂᖃᖃᑎᖃᖅᖢᓂ ᑲᒥᓗᑯᐊᒃ ᑕᓯᕐᒥ ᐃᖃᓗᒃᓯᐅᕐᕕᖕᒥᒃ ᓇᔭᖓᓗ, ᐱᓚᔾᔨ.
ᒦᓕ ᐊᒡᔭᖅᓯᓚᐅᖅᖢᓂ ᓵᑉᒥᒃ ᐊᒻᒪ ᑐᑐᒥᒃ, ᑕᒪᕐᒥᒃ ᑲᖏᖅᖠᓂᕐᒥᐅᑕᒃ, ᐃᖃᓗᒃᓯᐅᕐᕕᖕᒧᑦ, ᐊᒻᒪ ᑕᒪᕐᒥᒃ ᐊᐅᓪᓚᕆᐊᓕᓚᐅᖅᖢᑎᒃ ᑲᖏᖅᖠᓂᕐᒧᑦ ᑕᐃᒪᓐᓇ ᐱᕐᓗᐊᕿᓚᐅᖅᐳᑦ.
ᓵᑉ ᐃᒃᓯᕚᖅᖢᓂ ᑎᖕᒥᓲᖅᑎᐅᑉ ᒦᓕ ᓴᓂᐊᓂ.
ᐅᖃᓚᐅᖅᐳᖅ ᖃᓄᐃᖏᑦᓯᐊᖅᖢᑎᒃ ᑭᓯᐊᓂ ᑎᖕᒥᓲᖅ ᖃᖓᑦᑕᕆᐊᓕᕐᒪᑦ ᑕᓯᕐᒥᑦ.
“ᐃᒃᐱᒍᓱᒍᓐᓇᖏᓐᓇᒪ ᓱᓇᑐᐃᓐᓇᒥᒃ ᐱᐅᖏᑦᑐᒥᒃ ᐊᑐᕐᓂᐊᕐᓂᕐᒧᑦ ᖃᓄᒥᐊᕐᓘᓐᓃᑦ ᑕᐃᒪᓐᓇ,” ᐅᖃᓚᐅᖅᐳᖅ ᓵᑉ.
“ᑎᖕᒥᓲᖅ ᐃᖏᕐᕋᓕᖅᖢᓂ, ᖃᓄᐃᖏᑦᓯᐊᖅᑑᔮᖅᖢᑕ ᐊᐅᓚᕋᑉᑕ ᑐᓚᒃᑕᕐᕕᖕᒥᑦ, ᐅᖓᓯᒃᑐᒧᐊᖅᖢᑕᓗ ᑕᓯᕐᒥ ᖃᖓᑦᑕᑦᓯᐊᕈᓐᓇᕐᓂᐊᕋᑉᑕ.
“ᐊᓄᕆᓚᐅᖅᖢᓂ ᐊᐅᓪᓚᖅᑎᓕᕋᑉᑕ ᑐᓚᒃᑕᕐᕕᖕᒥᑦ, ᑭᓯᐊᓂ ᐊᓄᕆᔪᓐᓃᓚᐅᖅᖢᓂ ᐃᖏᕐᕋᓕᖅᖢᑕ, ᑎᖕᒥᓲᑉ ᐃᑯᒪᖏᓪᓗ ᖃᓄᐃᓕᐅᖅᐸᓗᒃᑑᔮᖅᖢᑎᒃ.
“ᑕᓯᕐᒥᑦ ᖃᖓᑦᑕᕋᑉᑕ, ᓴᓂᕋᖓᒍᑦ ᑕᑯᒋᐊᖅᖢᒍ − ᓯᕗᓂᐊ ᑕᑯᒃᓴᐅᖏᒻᒪᑦ ᖃᖓᑦᑕᕋᓱᐊᖅᖢᓂ − ᑕᑯᑉᓗᒍᓗ ᓄᓇ ᖃᒡᓕᕙᓪᓕᐊᔪᖅ.”
ᓵᑉ ᐅᖃᓚᐅᖅᐳᖅ ᑕᐃᒪᓐᓇ ᐱᐊᓚᔪᒻᒪᕆᐊᓘᑉᓗᓂ ᖃᓄᐃᓕᐅᓕᖅᖢᑕ.
ᐅᖃᓚᐅᖅᖢᓂᓗ ᑕᒡᕙ ᓱᓇᑐᐃᓐᓇᖅ ᖃᓄᐃᖏᑦᓯᐊᖅᖢᓂ, ᐊᒻᒪ ᑯᔾᔭᖓᓕᖅᖢᑕ.
“ᖃᓄᐃᓕᓂᑉᑎᓐᓄᑦ ᖃᐅᔨᓚᐅᖅᐳᖓ ᓴᓂᕋᖓ ᑕᑯᒋᐊᖅᖢᒍ.
“ᐃᖅᑲᐅᒪᖏᑦᑐᖓ ᓵᓐ ᐃᕆᐊᓪᓚᒃᑎᓪᓗᒍ ᑲᑕᓕᕐᓂᑉᑎᓐᓄᑦ.
“ᓂᐱᓕᒻᒪᕆᐊᓗᖕᒥᒡᓗ ᑐᓴᖅᖢᑕ ᑲᑕᒃᑲᑉᑕ, ᑭᓯᐊᓂ ᑕᐃᒪᓐᓇᐃᓕᓚᐅᖅᐳᒍ ᐱᐊᓚᔪᒻᒪᕆᐊᓗᒃᑯᑦ.”
ᓵᑉ ᐅᖃᓚᐅᖅᐳᖅ ᖃᓄᖅ ᐃᓱᒪᓚᐅᕐᒪᖔᕐᒥ ᐊᐅᓚᔨᖏᑉᐳᖅ ᑲᑕᓕᖅᖢᑎᒃ.
ᐅᖃᓚᐅᖅᖢᓂ ᖃᐅᔨᓕᖅᖢᓂ ᑯᔾᔭᖓᓂᕐᒥᓂᒃ, ᐃᖅᑲᐅᒪᕗᖅ ᓱᓇᓂᒃ ᐅᔾᔨᕈᓱᓚᐅᕐᓂᕐᒧᑦ.
“ᐃᓱᒪᒋᔭᑐᐊᕆᓚᐅᖅᐸᕋ ᐊᓂᒋᐊᖃᕋᒪ ᐃᑯᐊᓪᓚᒃᑐᖃᓚᐅᖏᓐᓂᐊᓂ, ᑕᑉᓰᖅᖢᖓ ᑲᑕᒃᖢᖓᓗ ᓄᓇᒧᑦ ᐊᓂᑉᓗᖓᓗ.
“ᑎᖕᒥᓲᖅ ᑲᐃᕙᑦᖢᒍ ᑕᑯᑉᓗᒍᓗ ᓵᓐ ᐅᒃᑯᐊᖓ ᓯᖁᒥᓯᒪᔪᖅ, ᑕᐃᒪ ᓴᓂᐊᓄᐊᖅᖢᖓ ᖃᐅᔨᒋᐊᖅᖢᖓᓗ ᖃᓄᐃᖏᒃᑲᓗᐊᕐᒪᖔᑕ ᐊᓂᒍᓐᓇᑦᓯᐊᕋᓗᐊᕐᒪᖔᑕ.
“ᖃᐅᔨᒪᑦᓯᐊᓚᐅᖅᑰᖏᑉᐳᖓ ᓯᕗᓪᓕᕐᒥ ᓂᐊᖅᑯᐊᓚᐅᕋᒪᐅᖅᑰᖅ − ᑲᓱᓚᐅᖅᑰᕋᒪ − ᑭᓯᐊᓂ ᖃᓄᐃᖏᓗᒃᑖᖅᖢᑕ, ᖃᐅᔨᓴᓚᐅᖅᖢᒍ ᑎᖕᒥᓲᖅ ᓯᖁᑉᑎᖅᓯᒪᔪᖅ ᓄᓇᒥ, ᐃᕿᖃᑦᑕᐅᑎᓕᖅᖢᑕᓗ.
“ᓵᓐ ᐅᖃᓚᐅᖅᐳᖅ ᐹᓂᒧᑦ ᐅᕙᒻᓄᓪᓗ ᒪᒥᐊᓐᓂᕋᖅᖢᓂ ᖃᑉᓰᖅᑕᖅᖢᓂᑭᐊᒃ, ᑭᓯᐊᓂ ᐅᖃᐅᑎᑐᐃᓐᓇᓚᐅᖅᐸᕋ ᖃᓄᐃᖏᓗᒃᑖᕋᑉᑕ ᑎᖕᒥᓲᕐᓗ ᐃᓇᖏᖅᑕᐅᔪᓐᓇᖅᖢᓂ, ᖃᓄᐃᖏᑦᑐᖅ.”
ᑐᑐ, ᐅᑭᐅᓕᒃ 69-ᓂᒃ, ᐊᕐᕌᒍᑕᒫᑦ ᐃᑲᔪᕆᐊᖅᐸᒃᖢᓂ ᓵᑉᒥᒃ ᐅᒃᑯᐃᖅᓯᑎᓪᓗᒍ ᐅᒃᑯᐊᖅᓯᑎᓪᓗᒍᓗ ᐃᖃᓗᒃᓯᐅᕐᕕᖓᑦ.
ᐅᖃᓚᐅᖅᖢᓂ ᑕᒪᒃᑯᐊ ᐳᓪᓚᐅᔭᐃᑦ ᐅᖅᓱᐃᑦ ᐃᑭᑉᐸᒃᓗᒋᑦ ᐊᐅᔭᒃᑯᑦ ᖃᐅᔨᓴᖅᖢᒋᓪᓗ ᓱᑉᓗᓕᖏᑦ, ᑕᒪᒃᑯᐊ ᓱᓇᓗᒃᑖᑦ ᖃᒥᑕᐅᒋᐊᖃᖅᑐᑦ ᖃᒥᑉᐸᒃᖢᒋᑦ ᑐᖅᑯᖅᑎᕆᑉᓗᑎᒡᓗ ᑕᐃᒪᓐᓇᐃᓕᐅᖅᐸᖕᒪᑕ.
“ᑕᐃᒪᓐᓇ ᖃᓄᐃᑦᑐᖃᖏᑦᓯᐊᖅᖢᓂ ᐅᑉᓗᖑᑎᓪᓗᒍ ᓵᓐ ᐅᑎᖅᖢᓂ ᐊᐃᒃᖠᖅᖢᓂ ᐅᕙᑉᑎᓐᓂᒃ, ᖃᓄᐃᖏᑦᓯᐊᖅᖢᑕᓗ ᐃᑭᐅᕋᐃᑉᓗᑕ ᐱᖁᑎᓂᒃ ᑎᖕᒥᓲᒧᑦ ᑲᖏᖅᖠᓂᕐᒧᑦ ᐅᑎᕐᓂᐊᓕᖅᖢᑕᓗ,” ᐅᖃᓚᐅᖅᐳᖅ ᑐᑐ.
“ᐃᖅᑯᐊᓃᑦᖢᖓ, ᑕᐃᒪᓐᓇᓗ ᖃᓄᐃᖏᑦᓯᐊᖅᖢᑕᓗ ᑲᖓᑦᑕᕆᐊᕐᓂᐊᓕᖅᖢᑕ ᖃᓄᐃᓕᑳᓪᓚᒃᖢᑕᓗ ᑕᐃᒪᓐᓇ ᕿᓚᒥᒻᒪᕆᐊᓗᒃ.
“ᖃᓄᐃᓕᑳᓪᓚᓚᐅᖅᖢᑕ ᓲᕐᓗ ᐊᓄᕆ ᓯᕿᓂᕐᓗ ᑕᐃᒪᓐᓇᐃᓕᑎᑦᓯᓚᐅᖅᖢᑎᒃ ᑖᒃᑯᐊᑐᐊᖅ, ᑕᐃᒪᓐᓇ ᓲᕐᓗ ᐊᑎᑉᑎᓐᓂ ᐃᒪᐃᕈᑎᑳᓪᓚᒃᖢᑕ.
“ᐊᓄᕆᔪᓐᓃᑳᓪᓚᒃᖢᓂ ᑲᖓᑦᑕᕆᐊᕐᓂᐊᓕᖅᑎᓪᓗᑕ ᐊᒻᒪ, ᑕᐃᒪᓐᓇ ᑕᒪᒃᑯᓄᖓ ᐃᒪᒃᑯᑦ ᒥᑉᐸᒃᑐᓄᑦ ᑎᖕᒥᓲᓄᑦ, ᐊᓄᕆᖃᖏᑎᓪᓗᒍ ᑲᖓᑦᑕᕋᓱᐊᖅᖢᓂ ᐱᐅᖏᑦᓯᐊᕐᒪᑦ ᖃᐅᔨᒪᓇᖏᒻᒪᑦ ᓄᓇᒥᒃ ᐃᒪᕐᒥᒡᓗ, ᓯᕿᓐᓂᓗᐊᖅᖢᓂᓗ ᓵᓐ ᐃᔨᖏᓐᓄᑦ.”
ᑐᑐ ᐅᖃᓚᐅᖅᐳᖅ ᖃᐅᔨᒪᓚᐅᖏᓐᓇᒥ ᑲᑕᖕᓂᐊᕐᓂᑉᑎᓐᓄᑦ.
ᐅᖃᓚᐅᖅᖢᓂᓗ ᖃᓄᐃᖏᑦᓯᐊᓚᐅᕐᒪᑕ ᑭᓯᐊᓂ ᐊᓄᕆᑕᖃᖏᓕᖅᖢᓂ ᐃᒪᖅᑕᖃᖏᓕᖅᖢᓂᓗ.
“ᑕᐃᒪᓐᓇᑦᓯᐊᖑᓚᐅᖅᐳᖅ, ᓵᓐᒧᑦ, ᑎᖕᒥᓲᑉ ᕿᖓᖓ ᑕᐃᒪᓐᓇ ᖁᒡᕙᕆᐊᖅᑎᓚᐅᕐᒪᒍ ᑲᑕᒋᐊᓕᖅᖢᑎᒃ.
“ᑖᒃᑯᐊ ᐃᒪᕐᒧᑦ ᒥᒍᑎᖏᑦ ᓱᕋᒃᑎᑦᓯᒪᓛᖑᓚᐅᖅᐳᑦ ᑕᐃᒪᓐᓇ ᑲᐃᕙᑎᑕᐅᑉᓗᑕᓗ ᓄᓇᒃᑯᑦ.
“ᑕᐃᒪᓐᓇ ᐱᐊᓚᔪᒻᒪᕆᐊᓗᖕᒥ ᑕᐃᒪᓐᓇᐃᓕᓚᐅᖅᐳᒍᑦ. ᐃᒃᐱᒍᓱᓚᐅᖏᑉᐳᖓ ᓱᓇᑐᐃᓐᓇᕐᒥᒃ ᑕᐃᒪᓐᓇ ᓂᐱᖃᓚᐅᖅᖢᓂ ᐸᐃᖕ ᐸᐃᖕ ᐱᐊᓂᒃᖢᓂᓗ.
“ᐅᔾᔨᕈᓱᓚᐅᖏᑉᐳᖓᓘᓐᓃᑦ ᑲᑕᖕᓂᐊᕐᓂᑉᑎᓐᓄᑦ ᐊᒻᒪ ᐅᔾᔨᕈᓱᓕᖅᖢᖓ ᑯᔾᔭᖓᑉᓗᑕ.”
ᑐᑐ ᐅᖃᓚᐅᖅᐳᖅ ᐊᓂᑉᓗᓂ ᑕᑯᑉᓗᓂᓗ ᑎᖕᒥᓲᒥᒃ, ᐊᒃᓱᓪᓘᓐᓃᑦ ᑕᒪᕐᒥᒃ ᖃᓄᐃᓚᐅᖏᒻᒪᑕ.
ᐅᖃᓚᐅᖅᖢᓂᓗ ᓚᑭᐅᓚᐅᕐᒪᑕ, ᑕᐃᒪᓐᓇᓗ ᓱᓕ ᑎᖕᒥᓲᒃᑰᖃᑦᑕᕐᓂᐊᕋᒥ.
“ᑕᐃᒪᓐᓇ ᑲᖓᑦᑕᕆᐊᓕᖅᑎᓪᓗᑕ ᑕᒪᒃᑯᐊ ᑕᐃᒪᓐᓇᐃᒋᐊᖃᖏᑦᑐᑦ ᑕᐃᒪᓐᓇᐃᓕᓚᐅᕐᓂᕐᒪᑕ.
“ᓵᓐ ᓄᑖᒥᒃ ᑎᖕᒥᓲᖃᓕᖅᐳᖅ, ᐅᖃᐅᑎᓚᐅᖅᖢᒍᓗ ᐃᓱᒫᓗᒋᐊᖃᖏᒻᒪᑦ ᐸᕐᓇᒃᓯᒪᑲᐅᑎᒋᒐᒪ.
“ᐊᐃᑦᑖᕈᓱᓚᐅᖅᐳᖓ ᑲᑕᓚᐅᖅᖢᑕ. ᓵᓐ ᑕᐃᒪᓐᓇᐃᒻᒪᑦ. ᐃᓱᒫᓗᖃᑦᑕᕐᒪᑦ ᐊᓯᒥᓂᒃ ᐃᓱᒫᓗᖏᑦᖢᓂ ᐃᖕᒥᓂᒃ.
“ᑕᐃᒪᓐᓇᐃᓐᓂᐊᖅᐸᑦ, ᑕᐃᒪᓐᓇᐃᓐᓂᐊᖅᐳᖅ − ᑎᖕᒥᓲᒃᑯᓪᓘᓐᓃᑦ ᓄᓇᒃᑰᕈᑎᒃᑯᓪᓘᓐᓃᑦ − ᐊᒻᒪ ᖃᐅᔨᓐᓇᕐᓂᐊᖏᑦᖢᓂᓗ ᑭᓯᐊᓂ ᐊᓂᒍᖅᐸᑦ.”