ᓄᓇᕗᑦ ᒐᕙᒪᒃᑯᖏᑦ ᓴᐅᓐᓂᕆᓂᕐᒧᑦ ᐊᕐᕌᒍᑕᒫᑦ ᑲᐱᔭᐅᒍᑕᐅᕙᒃᑐᒧᑦ ᑲᐱᔭᐅᒋᐊᖃᕐᓂᖏᓐᓄᑦ ᓄᕙᒡᔪᐊᕐᓇᖅ–19 ᐊᒻᒪᒃᑎᑕᐅᕙᓪᓕᐊᑐᐃᓐᓇᕐᓂᖓᓄᑦ ᑭᒃᑯᑐᐃᓐᓇᕐᓄᑦ
ᓴᐅᓐᓂᕆᓂᕐᒧᑦ ᑲᐱᔭᐅᖃᑦᑕᕐᓂᖅ ᐊᑐᖅᑕᐅᕙᓪᓕᐊᕗᖅ ᓄᓇᕗᒻᒥ ᐊᒻᒪ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖄᖓᑦ ᓘᒃᑖᖅ ᒪᐃᑯ ᐹᑐᓴᓐ ᐅᖃᓚᐅᖅᐳᖅ ᑲᐱᔭᐅᒋᐊᖃᕐᓂᖏᓐᓄᑦ ᑭᒃᑯᑐᐃᓐᓇᐃᑦ ᐱᓗᐊᖅᑐᒥᒃ ᓄᕙᕐᔪᐊᕐᓇᖅ –19 ᐋᓐᓂᐊᖅᑖᖃᑦᑕᖅᑎᓪᓗᒋᑦ, ᐅᖃᓚᐅᖅᖢᓂᓗ ᓴᐅᓐᓂᕆᓂᕐᒧᑦ ᑲᐱᔭᐅᓗᓂ
"ᓴᐳᒻᒥᔭᐅᓂᖅᓴᐅᒍᑕᐅᖕᒪᑦ ᑕᐃᒪᓐᓇ ᓴᐅᓐᓂᕆᑖᖅᑕᐃᓕᒪᓂᕐᒧᑦ."
ᐊᒃᑐᐱᕆ 21-ᒥ ᐅᖃᓚᐅᖅᐳᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᖓᔪᖄᖅ ᓄᓇᕗᒻᒥᐅᓄᑦ ᓄᕙᕐᔪᐊᕐᓇᖅ 19 ᑕᐃᒪᓐᓇ ᓴᐅᓐᓂᕈᑕᐅᖃᑦᑕᖅᑐᑐᖃᖅᑎᑐᑦ ᐃᒃᐱᖕᓇᕈᑎᖃᒐᓚᖕᓂᖓᓄᑦ "ᓴᐳᒻᒥᔭᐅᓂᖅᓴᐅᓗᑎᒃ ᓴᐅᓐᓂᕆᓂᕐᒧᑦ ᑕᐃᒪᓐᓇ ᓄᕙᒡᔪᐊᕐᓇᖅ–19 ᖃᐅᔨᓴᖅᑕᐅᓂᕐᓂ ᐃᓄᑑᒋᐊᖃᖏᓐᓂᖅᓴᐅᒐᔭᕐᓗᑎᑦ. ᐋᓐᓂᐊᖃᕐᓇᖏᑦᑐᓕᕆᔨᒃᑯᓪᓗ ᐊᒃᓱᕈᖏᓐᓂᖅᓴᐅᓂᐊᕐᒪᑕ, ᐱᓗᐊᖅᑐᒥᒃ ᓄᕙᒡᔪᐊᕐᓇᖅ–19 ᓄᓇᓕᖕᓄᐊᖅᑐᕕᓂᐅᒃᐸᑦ."
ᑕᒪᐃᓐᓂ ᐅᖁᒪᐃᓐᓂᕐᓂᐊᕐᕕᖕᒥ ᐋᓐᓂᐊᖅᑐᓕᕆᕕᖕᒥ ᐊᒻᒪ ᐃᖃᓗᖕᓂ ᐊᓯᖏᓐᓂ ᐅᖁᒪᐃᓐᓂᕐᓂᐊᕐᕕᑦ ᓄᓇᓕᖕᓂ ᐊᔾᔨᒌᙱᑦᑐᓂ ᑲᐱᓯᖃᑦᑕᕐᓂᐊᖅᐳᑦ, ᐊᖑᒻᒪᑎᖏᒃᑯᕕᑦ ᑖᒃᑯᓂᖓ ᐅᖄᓚᕕᒋᔪᓐᓇᖅᐸᑎᑦ ᑲᐱᔭᐅᕕᒃᓴᐃᑦ ᐋᖅᑭᒃᑕᐅᓂᐊᕐᒪᑦ.
ᒥᓂᔅᑕ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᔪᐊᔾ ᕼᐃᒃᔅ ᑲᑎᒪᔨᑐᐃᓐᓇᐅᓪᓗᓂ ᐅᖃᐅᓯᖃᓚᐅᖅᐳᖅ ᐊᒃᑐᐱᕆ 21–ᒥ ᑲᑎᒪᕐᔪᐊᖅᑎᓪᓗᒋᑦ ᒪᓕᒐᓕᐅᖅᑎᑦ ᓄᓇᕗᒻᒥ ᐱᒻᒪᕆᐅᓂᖓᓄᑦ ᓴᐅᓐᓂᕆᓂᕐᒧᑦ ᑲᐱᔭᐅᓂᖅ ᐃᓱᒪᒋᓪᓗᒍᓗ ᓄᕙᒡᔪᐊᕐᓇᖅ–19.
"ᐅᖃᖅᑏ, ᓄᓇᕗᒻᒥᐅᑦ ᐅᓗᕆᐊᓇᖅᑐᒦᑦᑕᐃᓕᑎᑕᐅᒋᐊᖃᕐᒪᑕ ᐋᓐᓂᐊᖅᑕᐃᓕᒪᑎᑕᐅᓗᑎᒡᓗ ᓴᐳᒻᒥᔭᐅᒍᑎᖃᑦᓯᐊᕐᓗᑎᒡᓗ ᓴᓗᒪᑦᓯᐊᕐᓗᑎᒡᓗ, ᐊᒡᒐᒥᖕᓂ ᐅᐊᓴᖃᑦᑕᕐᓗᑎᒡᓗ, ᐅᖓᓯᒃᑐᕆᐅᑎᖃᑦᑕᕐᓗᑎᒡᓗ ᐃᓅᖃᑎᒥᓂᑦ ᐊᖏᕐᕋᖅᓯᒪᖃᑦᑕᕐᓗᑎᒡᓗ ᐋᓐᓂᐊᓕᕌᖓᒥᒃ," ᐅᖃᓚᐅᖅᐳᖅ.
ᕼᐃᒃᔅ ᑕᒪᒃᑯᐊ ᐃᖕᒥᓂᒃ ᑲᒪᒋᑦᓯᐊᕈᓐᓇᖏᓐᓂᖅᓴᐃᑦ ᓴᓐᖐᓂᖅᓴᐃᓪᓗ ᐋᓐᓂᐊᕋᔪᒃᑐᑦ ᓴᐳᒻᒥᔭᐅᑦᓯᐊᕆᐊᖃᕐᒪᑕ ᑲᐱᔭᐅᓗᑎᒃ ᓄᕙᒃᓇᖅᑐᑐᖃᐅᔪᒧᑦ ᐃᓐᓇᑐᖃᐃᑦ ᑕᒪᒃᑯᐊ ᒪᒃᑯᒃᑐᓪᓗ ᓱᕈᓯᐅᓂᖅᓴᐃᑦ.
ᑕᒪᕐᒥᒃ ᕼᐃᒃᔅ ᐊᒻᒪ ᐹᑐᓴᓐ ᓴᐅᓐᓂᕆᓂᕐᒧᑦ ᑲᐱᔭᐅᓚᐅᖅᐳᑦ ᐋᓐᓂᐊᖅᑖᖅᑕᐃᓕᒪᒍᑎᒥᒃ ᐊᒃᑐᐱᕆ 21-ᒥ.
ᑐᑭᓯᒋᐊᒃᑲᓐᓂᕈᒪᔪᑦ ᓴᐅᓐᓂᕆᓂᕐᒧᑦ ᑲᐱᔭᐅᕕᒃᓴᐃᑦ ᐅᕝᕙᓘᓐᓃᑦ ᓄᓇᕗᑦ ᒐᕙᒪᒃᑯᖏᑦ ᑐᓴᖅᑎᑦᑎᒍᑎᖏᑦ ᓄᕙᒡᔪᐊᕐᓇᖅ –19 ᐱᔾᔪᑎᒋᓪᓗᒍ ᑕᑯᒋᐊᕐᓗᒋᑦ ᖃᕆᑕᐅᔭᒃᑯᑦ www.gov.nu.ca/health.