ᑕᐃᒪᓕᒎᖅ ᐊᑯᒃ ᐋᑦᔪᓐ ᐃᒃᓯᕚᖅᐳᖅ ᓂᕿᓕᐅᕐᕕᖓᑕ ᑭᐳᖓᓐᓂ ᐅᓐᓄᒃᑯᑦ, ᐃᖃᓪᓕᐊᕈᑎᒥᒃ ᐴᖑᔪᒥ ᑕᑖᖅᑐᒥ ᑲᓚᑲᐅᖅᑐᓂ ᓴᐸᖓᕐᓂ ᒪᑐᐃᖓᔪᓂ ᓴᓂᑦᑎᐊᖓᓂ.
ᐊᓕᐊᓇᐃᒋᕙᖓ ᐃᑲᕐᕋᓂ ᐊᓂᒍᐃᓂᕐᒧᑦ, ᐅᔭᒥᓕᐅᖅᖢᓂ ᓴᓇᓯᒪᔪᓂ ᓴᓇᑦᑎᐊᖅᓯᒪᔪᒻᒪᕆᖕᓂ ᓴᐸᖓᓕᕆᓂᕐᒥ.
ᑕᒪᑐᒪᓂ ᐊᕐᕌᒎᑉ ᐃᓚᖓᓐᓂ, ᑐᒃᓯᕋᕐᓂᖃᒃᑲᓐᓂᖅᐳᖅ ᑕᐃᒪᐃᒐᔪᖕᓂᐅᔪᒥ ᖁᕕᐊᓱᒡᕕᒃ ᖃᓂᒡᓕᕙᓪᓕᐊᑎᓪᓗᒍ. ᑐᓐᓂᖅᑯᓯᐊᒃᓴᒥ ᑎᑭᓴᖅᑐᖃᖅᐳᖅ ᐃᓄᖕᒥ ᐊᓛᔅᑲᒥ.
“ᐃᓐᔅᑎᒍᕌᒻᖃᖅᐳᖅ ᒪᒃᐱᖅᑐᒐᕐᒥ ᑕᑯᒃᓴᐅᑎᑦᑎᕙᒃᑐᒥ ᑕᒪᒃᑭᓂ ᓴᐸᖓᓕᕆᓂᖏᓐᓂ. ᐅᕙᓐᓄᑦ ᖃᐅᔨᒋᐊᓚᐅᖅᐳᖅ ᐃᓐᔅᑎᒍᕌᒻ ᒪᒃᐱᖅᑐᒐᓐᓂ,” ᐅᖃᖅᐳᖅ.
ᓯᕗᓪᓕᖅᐹᖑᙱᓚᖅ ᓴᓇᐅᒐᖏᑦ ᓄᓇᕐᔪᐊᓕᒫᒥ ᐅᔾᔨᕆᔭᐅᓯᒪᓂᖏᓐᓂ. ᐃᓚᖏᑦ ᐅᔭᒥᓕᐊᖏᑦ ᐊᑐᖅᑕᐅᓚᐅᖅᐳᑦ ᐊᓐᓄᕌᓂ ᑕᑯᒃᓴᐅᑎᑦᑎᔪᓂ ᐱᓱᒃᑎᓪᓗᒋᑦ ᐱᐊᕆᔅᒥ ᓄᓇᕗᒻᒥ ᐊᓐᓄᕌᓕᐅᖅᑎ ᕕᒃᑐᐊᕆᐊ ᑲᑯᑎᓐᓂᖅ ᑕᑯᒃᓴᐅᑎᑦᑎᓂᖃᖅᑎᓪᓗᒍ ᐅᐃᕖᓄᑦ ᐊᖓᔪᖅᑳᖃᕐᕕᖓᓂ 2019–ᒥ.
ᐅᔭᒥᖕᒥ ᐊᑯᓂᐅᑎᒋᒐᔪᒃᐳᖅ ᐋᑦᔪᓐᒥ ᒪᕐᕉᖕᓂ ᐱᖓᓱᓄᑦ ᐅᓐᓄᖕᓂ ᐱᔭᕇᖅᓯᓂᕐᒧᑦ, ᑐᕌᖓᑎᑦᑎᓪᓗᓂ ᐃᑲᕐᕋᓂ ᑎᓴᒪᓂ ᑕᓪᓕᒪᓄᑦ ᐅᓐᓄᑕᒫᒥ ᐱᓕᕆᐊᕆᔭᒥᓄᑦ.
ᐃᓕᑦᑎᓚᐅᖅᐳᖅ ᓴᐸᖓᓕᕆᓂᕐᒥ ᐃᒻᒥᓂᒃ. ᒎᒍᒃᑯᑦ ᓴᐸᖓᓂᒃ ᐅᔭᒥᓕᐅᕐᓂᕐᒥ ᐆᒃᑑᑕᐅᔪᓂ ᐊᕐᕌᒍᑦ ᐱᖓᓱᐸᓘᓕᖅᑐᓂ ᐊᒻᒪᓗ ᖃᐅᔨᓴᖅᖢᓂ ᖃᓄᖅ ᐱᓕᕆᐊᖑᕙᖕᓂᖓᓂ.
“ᐊᒻᒪᓗ ᑕᐃᑲᙵᑦ ᐱᒋᐊᓚᐅᖅᐳᖓ. ᐅᕙᓐᓂ ᐃᓕᑎᑦᑎᓚᐅᖅᐳᖓ ᓴᐸᖓᓕᕆᓂᕐᒧᑦ,” ᐅᖃᖅᐳᖅ. “ᐅᖃᖅᐳᖓ ᐃᓕᑦᑎᔪᒪᒍᕕᑦ ᓴᐸᖓᓕᕆᓂᕐᒧᑦ, ᓴᐸᖓᓕᕆᑐᐃᓐᓇᖅᐸᒡᓗᑎᑦ. ᐊᒥᓱᒻᒪᕆᐊᓗᖕᓂ ᓴᐸᖓᓕᕆᔨᑕᖃᖅᐳᖅ ᑕᖅᑳᓂ ᖃᐅᔨᒋᐊᕐᕕᒋᔪᓐᓇᖅᑕᕐᓂᑦ. ᐃᓐᔅᑎᒍᕌᒻ ᐱᓕᕆᕕᑦᑎᐊᕚᓘᕗᖅ ᕿᓂᕐᓂᕐᒧᑦ ᑲᔪᖏᖅᓴᐃᓂᐅᔪᒥ ... ᐊᒥᓱᒻᒪᕆᐊᓗᖕᓂ ᓴᓇᐅᒐᓕᕆᔨᑦᑎᐊᕙᒃᑕᖃᐅᖅᐳᖅ ᑕᖅᑳᓂ ᐃᓕᖕᓂ ᐃᑲᔪᕈᒪᑐᐃᓐᓇᖅᑐᓂ.”
ᐱᓕᕆᓂᐅᔪᖅ ᐃᓚᖃᖅᐳᖅ ᒪᓕᑦᑎᐊᕋᓱᐊᕐᓂᕐᒥ ᑲᓚᓕᖕᒥ ᒪᓕᒋᐊᓕᖕᒥ ᐊᒻᒪᓗ ᒥᖅᓱᕐᓂᕐᒥ ᐊᑕᐅᓯᕐᒥ ᒪᕐᕈᖕᓂᓪᓘᓐᓃᑦ ᓴᐸᖓᓂ ᐃᓂᒃᓴᖓᓄᑦ ᐊᑕᐅᑦᑎᒥᒃ.
“ᐅᔾᔨᖅᓱᑦᑎᐊᕆᐊᖃᖅᐳᑎᑦ ᐊᒻᒪᓗ ᑐᕌᖓᓂᖃᕐᓗᑎᑦ ᓇᓗᓕᔾᔮᙱᓐᓇᕕᑦ,” ᐅᖃᖅᐳᖅ. “ᓇᓗᓕᕈᒪᙱᓚᑎᑦ ᐊᒻᒪᓗ ᐃᓚᓯᓗᑎᑦ ᓴᐸᖓᒃᑲᓐᓂᕐᒥ ᐅᕝᕙᓘᓐᓃᑦ ᐊᔾᔨᒋᙱᑕᖓᓂ ᑲᓚᓕᖕᒥ ᓴᐸᖓᕐᒥ ᒥᖅᓱᖅᑎᓪᓗᑎᑦ.”
ᑭᓯᐊᓂ, ᑕᒻᒪᕈᕕᑦ, ᐅᑎᑐᐃᓐᓇᕈᓐᓇᖅᐳᑎᑦ ᐊᒻᒪᓗ ᐲᕐᓗᒍ.
ᓴᐸᖓᖏᑦ ᑎᑭᓲᖑᕗᑦ ᓂᐅᕕᕐᕕᐅᔪᓂ ᐃᐊᑦᒪᓐᑕᓐᒥ ᐊᒻᒪ ᐳᕆᑎᔅ ᑲᓚᒻᐱᐊᒥ. ᑎᑭᓲᖑᕗᑦ ᖃᔅᓯᕈᓘᔭᓂ ᐊᔾᔨᒌᙱᓐᓂᐅᔪᓂ, ᑭᓯᐊᓂ ᐱᐅᒋᓛᕆᔭᖏᑦ ᖃᓄᐃᑦᑑᓂᖏᓐᓂ ᐅᔭᒥᖕᓄᑦ ᐊᖕᒪᓗᖅᐳᑦ, ᐃᒪᐃᑦᑑᖔᙱᖦᖢᑎᒃ ᖃᔅᓯᒐᓚᖕᓂ–ᓴᓂᕋᓕᖕᓂ, ᐱᐅᓂᖅᓴᐅᔪᓂ ᓯᐅᑎᕈᑎᓄᑦ. ᐸᕐᓇᒃᐳᖅ ᐊᖏᒡᓕᒋᐊᖅᓯᓂᐊᕐᓂᖓᓂ ᐃᓚᒋᐊᕈᑕᐅᔪᓂ ᓴᓇᕙᒃᑕᖏᓐᓂ, ᕿᒥᕐᕈᐊᖅᖢᓂ ᓯᐅᑎᕈᑎᓂᒃ ᒪᓕᒐᒃᓴᓂ ᖃᕋᓴᐅᔭᑎᒍᑦ ᐊᒻᒪᓗ ᐃᓱᒪᒃᓴᖅᓯᐅᕆᒋᓪᓗᓂ ᑮᓄᑦ–ᐊᑦᑕᑕᕐᕕᖕᓄᑦᑕᐅᖅ.
ᑕᐃᒪᓐᓇᑎᑐᑦ ᑕᒪᕐᒥᒐᓚᖕᓂ ᓴᓇᐅᒐᓕᐊᖑᕙᒃᑯᓂ, ᐱᓕᕆᓂᖃᓗᐊᕐᓗᓂ ᐱᐅᔪᒥ ᐱᓕᕆᓂᐅᔪᒥ ᑕᖃᓇᕆᕗᖅ. ᐃᑲᕐᕋᒐᓵᓗᖕᓂ ᓴᐸᖓᓕᕆᒑᖓᑦ, ᑎᑭᖓ, ᑯᓪᓗᖓ ᐊᒻᒪᓗ ᑐᐃᖏᑦ ᐋᓐᓂᐊᓕᓲᖑᕗᑦ.
“ᑕᐃᑲᓂ ᑎᒥᒐ ᐅᕙᓐᓂ ᐅᖃᐅᔾᔨᕗᖅ ᓇᖏᖅᓯᔭᕆᐊᖃᕐᓂᓐᓂ ᐊᒻᒪᓗ ᐊᐅᓚᓗᖓ, ᓄᑭᒃᑲ ᐃᖏᕐᕋᑎᓪᓗᒋᑦ,” ᐅᖃᖅᐳᖅ.
ᓱᓕᒃᑲᓐᓂᖅ “ᐊᑲᐅᙱᓐᓂᐅᔪᒥ” ᑭᐱᙳᐃᔭᐅᑎᒋᔭᖓᓂ ᓴᐸᖓᕐᓂ ᑲᑕᒃᖢᑎᒃ ᐳᒡᔪᖏᓐᓂ, ᐱᐅᙱᓐᓂᖅᓴᒻᒪᕆᖕᒥᓪᓘᓐᓃᑦ.
“ᓴᐸᖓᕐᓂ ᓈᕕᑦᑎᓯᒪᕗᖓ ᓇᑕᓕᒫᒧᑦ ᖃᔅᓰᖅᓱᒐᓚᒃᖢᖓ,” ᐃᒡᓚᖅᐳᖅ. “ᐊᓕᐊᓇᐃᙱᑦᑐᐊᓗᒃ ᕿᓂᖅᖢᓂ ᓇᑎᕐᒥ, ᐹᕐᙳᖅᖢᓂ ᑎᓴᒪᓕᒫᓄᑦ ᓴᐸᖓᖅᓯᐅᖅᖢᓂ.”