ᓄᓇᕗᒥ ᐱᕙᓪᓕᐊᑎᑦᑎᓂᕐᒧᑦ ᑯᐊᐳᕇᓴᒃᑯᑦ ᓂᐅᕕᕐᕕᖏᑦ ᐃᕙᓗ ᑲᖏᖅᖠᓂᕐᒥ ᐊᒻᒪᓗ ᔨᐊᓯ ᐅᓈᖅ ᖃᒪᓂ’ᑐᐊᕐᒥ ᐱᐊᓂᒃᓯᓯᒪᓕᖅᑑᒃ ᑐᒡᓕᐊᓂ ᐅᑭᐅᒥ ᓴᓇᙳᐊᖅᑕᐅᓯᒪᔪᓂᒃ ᓇᒃᓴᖃᑦᑕᖅᖢᑎᒃ ᑕᓯᕐᔪᐊᕐᒧᑦ ᑲᖏᖅᖠᓂᐅᑉ ᖃᓂᒋᔭᖓᓄᑦ ᐅᔭᕋᖕᓂᐊᕐᕕᖕᒧᑦ ᐊᒻᒪᓗ ᐊᐳᖅᑎᓐᓈᖅᑐᒧᑦ ᖃᒪᓂ’ᑐᐊᑉ ᖃᓂᒋᔭᖓᓄᑦ.
ᐱᕙᓪᓕᐊᑎᑦᑎᓂᕐᒧᑦ ᑯᐊᐳᕇᓴᐅᑉ ᐊᖓᔪᖅᑳᖓ ᑮᓇᐅᔭᓕᕆᓂᕐᒧᑦ ᐊᐅᓚᑦᑎᓂᕐᒧᓪᓗ ᐱᕐᓇᑎ ᑐᑕᓐᓄᐊᖅ ᐅᖃᖅᖢᓂ ᐃᕙᓗᒃᑯᑦ ᐊᒥᓱᒻᒪᕆᐊᓗᖕᓂᒃ ᓴᓇᔭᐅᓯᒪᔪᓂᒃ ᓂᐅᕕᐊᒃᓴᐅᕙᒃᑐᓂᒃ ᓂᐅᕕᕐᕕᖓᓂᒃ ᑲᖏᖅᖠᓂᕐᒥ, ᐃᓚᐅᖃᑕᐅᑉᓗᒋᑦ ᖃᑉᓗᓈᑦ ᓄᓇᖏᓐᓂᙶᖅᑐᑦ ᑭᓯᐊᓂ ᖁᕝᕙᖅᑎᕆᓂᖅᓴᐅᑉᓗᑎᒃ ᓄᓇᕗᒥᙶᖅᑐᓂᒃ ᓲᕐᓗ ᐊᐅᓚᖁᑎᓂᒃ, ᐃᒥᕈᑎᓂᒃ, ᐃᕐᒧᓯᓂᒃ, ᓄᓇᒃᑰᕈᑎᓄᑦ ᓚᐃᓴᓐᓯᓂᒃ ᐊᒻᒪᓗ ᐱᐅᓴᐅᑎᓂᒃ ᓯᐅᑎᕈᑎᓂᒃ, ᒥᑭᓕᕋᕈᑎᓂᒃ, ᐅᔭᒥᖕᓂᒡᓗ ᐊᓯᖏᓐᓄᑦ ᑲᒻᐸᓂᐅᔪᓄᑦ ᖃᐃᑕᐅᓯᒪᔪᓂᒃ, ᐅᖅᑯᕐᒥᐅᑦ ᓂᐅᕕᕐᕕᖓᓄᑦ ᐸᓐᓂᖅᑑᒥ.
ᐅᖃᖅᖢᓂ ᓂᐅᕕᐊᖑᖃᑦᑕᓚᐅᖅᑐᒡᒎᖅ ᕿᓯᖕᓄᑦ ᑭᒋᐊᕐᓄᓪᓗ ᓴᓇᓯᒪᔪᑦ ᐳᐊᓗᐃᑦ, ᑲᒥᓪᓛᖅᓯᐅᑏᓪᓗ ᑕᓗᖅ ᓴᓇᙳᐊᖅᑎᖏᓐᓂᙶᖅᑐᑦ ᑕᓗᕐᔪᐊᕐᒥ ᐊᒻᒪᓗ ᓴᓇᙳᐊᒐᑦ.
“ᖁᕕᐊᒋᔭᐅᓂᖅᐹᖑᖃᑦᑕᓚᐅᖅᑐᑦ ᑕᓯᕐᔪᐊᕐᒥ ᐃᒥᕈᑏᑦ ᓄᓇᕗᑦ ᐊᐅᓚᖁᑎᖓᓂᒃ ᑕᖅᓴᓖᑦ,” ᑕᐃᒪᓐᓇ ᐅᖃᖅᖢᓂ ᑐᑕᓐᓄᐊᖅ.
“ᐊᖑᑎᑦ ᐅᔭᕋᒃᑕᕆᐊᓕᒃ ᐱᐅᒃᓴᑦᑎᐊᓚᐅᖅᑐᑦ ᐃᒥᕈᑎᓂᒃ. ᑕᐃᑲᓂᑦᑕᐃᓐᓇᕐᓗ, ᓂᐅᕕᑲᑕᒃᖢᑎᒃ ᓱᓇᑐᐃᓐᓇᕐᓂᒃ ᓄᓇᕗᑦ ᐊᐅᓚᖁᑎᖓᓂᒃ ᑕᖅᓴᓕᖕᓂᒃ ᐅᕝᕙᓘᓐᓃᑦ ᑕᖅᓴᖏᓐᓂᒃ ᑕᖅᓯᖅᑐᖅᓯᒪᔪᓂᒃ.
“ᐃᓄᓪᓚᑦᑖᖑᙱᑦᑐᑦ ᓴᓇᔨᐅᔪᑦ ᓂᐅᕕᕐᓂᖅᓴᐅᓚᐅᕋᓗᐊᖅᑎᓪᓗᒋᑦ ᐊᑭᓗᖕᓂᖅᓴᓂᒃ, ᑕᐃᒪᐃᑉᐸᒃᑐᒍᑦᑕᐅᖅ ᖃᑉᓗᓈᑦ ᓄᓇᖓᓄᙵᐅᔭᕌᖓᑉᑕ ᐊᒻᒪᓗ ᐳᕆᓐᔅ ᐃᑦᕗᑦ ᐊᐃᓚᓐᒥᐅᑦ ᓴᓇᕙᒃᑕᖏᓐᓂᒃ ᓂᐅᕕᑲᑕᒑᖓᑉᑕ ᐅᕝᕙᓘᓐᓃᑦ ᓱᓇᑐᐃᓐᓇᑦᑎᐊᓂᒃ.
“ᐃᓚᖏᑦ ᓂᐅᕕᑲᑕᓚᐅᖅᑐᑦ ᕿᓯᖕᓂᒃ ᑭᒋᐊᓂᒡᓗ ᓴᓇᓯᒪᔪᓂᒃ ᐳᐊᓗᖕᓂᒃ, ᐊᒻᒪᓗ ᑕᓗᖅ ᓴᓇᙳᐊᕐᕕᐅᑉ ᓴᓇᓯᒪᔭᖏᓐᓂᒃ ᑲᒥᓪᓛᖅᓯᐅᑎᓂᒃ. ᓂᐅᕕᐊᖑᔪᑦ $7,000-ᒧᑦ ᑎᑭᓯᒪᖃᑦᑕᓚᐅᖅᑐᑦ ᐊᑐᓂ ᓂᐅᕕᖅᑎᑦᑎᔭᖅᑐᖅᓯᒪᑎᓪᓗᑕ, ᑲᑎᖦᖢᒋᑦ ᓯᑕᒪᓂᒃ ᐃᑲᕐᕋᓂᒃ ᓂᐅᕕᐊᒃᓴᖃᕐᓂᖅ.”
ᐱᕙᓪᓕᐊᑎᑦᑎᓂᕐᒧᑦ ᑯᐊᐳᕇᓴᒃᑯᑦ ᐅᖃᐅᔾᔨᒋᐊᖅᑎᖓ ᐃᓕᖅᑯᓯᑐᖃᓕᕆᓂᕐᒧᑦ ᒍᕋᑎ ᖃᑯᖅᑎᓐᓂᖅ ᐅᖃᖅᖢᓂ ᐃᕙᓗᒃᑯᒡᒎᖅ ᓇᓂᓯᓯᒪᓕᖅᑐᑦ ᐅᒃᑯᓯᒃᓴᓂᒃ ᓴᓇᙳᐊᖅᓯᒪᔪᓂᒃ, ᐱᐅᓴᐅᑎᓂᒃ ᓯᐅᑎᕈᑎᓂᒃ, ᒥᑭᓕᕋᕈᑎᓂᒃ ᐅᔭᒥᖕᓂᒡᓗ ᐊᒻᒪᓗ ᓇᓴᕐᓂᒃ ᐸᓐᓂᖅᑑᕐᒥᙶᖅᑐᓂᒃ ᖁᕕᐊᒋᔭᐅᑦᑎᐊᖃᑦᑕᖅᑐᓂᒃ.
ᐅᖃᖅᖢᓂ ᐊᑐᓂᒎᖅ ᐱᕙᓪᓕᐊᑎᑦᑎᓂᕐᒧᑦ ᑯᐊᐳᕇᓴᒃᑯᑦ ᓇᖕᒥᓂᖁᑎᒋᔭᖏᑦ ᑲᒻᐸᓂᐅᔪᑦ ᐊᑐᓂ ᖁᕕᐊᒋᔭᐅᑦᑎᐊᖅᑐᓂᒃ ᐱᑕᖃᖃᑦᑕᓚᐅᖅᑐᑦ ᑕᓯᕐᔪᐊᕐᒥ ᐅᔭᕋᖕᓂᐊᕐᕕᖕᒥ ᓂᐅᕕᑲᑕᒃᑎᓪᓗᒋᑦ.
“ᐊᒡᓂᒍ ᐃᒍ ᐅᔭᕋᖕᓂᐊᖅᑐᓕᕆᔨᒃᑯᑦ ᑕᒪᑐᒥᙵ ᐱᒋᐊᖅᑎᑦᑎᓚᐅᖅᑐᑦ ᐅᕙᑉᑎᓐᓄᑦ ᐅᖃᓗᒃᖢᑎᒃ ᑕᓯᕐᔪᐊᓕᐊᖁᔨᑉᓗᑎᒃ ᖁᕕᐊᓱᒡᕕᐅᑉ ᑐᖔᓂ - ᒪᕐᕈᐃᖅᑕᖅᖢᑕ ᑕᐅᕗᙵᐅᓚᐅᖅᑐᒍᑦ ᑎᓯᐱᕆ 5-ᒥ ᐊᒻᒪᓗ 19-ᒥ - ᓂᐅᕕᐊᒃᓴᖃᕆᐊᖅᑐᖅᖢᑕ,” ᑕᐃᒪᓐᓇ ᐅᖃᖅᖢᓂ ᖃᑯᖅᑐᓐᓂᖅ.
“ᐃᑲᔪᖅᑐᐃᖃᑦᑕᕐᒥᔪᑦ ᐅᕙᑉᑎᓐᓂᒃ ᓂᐅᕕᖅᐸᒃᖢᑎᒃ ᐃᓗᐃᑦᑐᓂᒃ ᑲᑎᑕᐅᓯᒪᔪᓂᒃ ᓴᓇᙳᐊᖑᔪᓂᒃ ᖁᑦᑎᒃᑐᒃᑯᑦ ᐊᐅᓚᑦᑎᔨᖏᓐᓄᑦ, ᐊᒻᒪᓗ ᑕᑯᐃᓐᓇᖃᑦᑕᖅᑐᒍᑦ ᖃᑉᓗᓈᑦ ᓄᓇᖓᓂᙶᖅᑐᓂᒃ ᓴᓇᔨᖏᓐᓂᒃ ᐃᕙᓗᒥ ᑲᖏᖅᖠᓂᕐᒦᓕᕌᖓᑕ.
“ᐊᒡᓂᒍ ᐃᒍᒃᑯᑦ ᐅᔭᕋᖕᓂᐊᖅᑐᓕᕆᔨᒃᑯᑦ ᐃᑲᔪᖅᑐᐃᑦᑎᐊᓲᑦ ᐅᔭᕋᖕᓂᐊᕐᕕᓕᐊᕌᖓᑉᑕ ᐊᒻᒪᓗ ᓴᓇᖃᑎᑦᑎᐊᕚᓗᐃᑦ ᑕᐃᒪᙵᓂ ᓴᓇᖃᑎᒋᓕᓚᐅᕋᑉᑎᒍᑦ ᐅᑉᓗᒥᒧᑦ.
“ᑕᓯᕐᔪᐊᓕᐊᒃᑲᓐᓂᖃᑦᑕᕆᐊᖃᖅᑐᒍᑦ, ᖁᕕᐊᓱᒡᕕᖕᒥᑐᐃᓐᓇᐅᙱᑦᑐᖅ, ᑕᐃᒪᑐᖅ ᑕᐃᒪᐃᓕᐅᕈᓐᓇᖅᓯᒃᑲᓐᓂᕐᓂᐊᖅᐳᒍᑦ ᕿᓚᒻᒥᐅᔪᒥ ᓯᕗᓂᒃᓴᒥ.”
ᑕᐃᕕᑎ ᕗᐊᑦ ᔨᐊᓯ ᐅᓈᖅ ᓴᓇᙳᐊᕐᕕᖕᒥᙶᖅᑐᖅ ᖃᒪᓂ’ᑐᐊᕐᒥ ᐅᖃᖅᖢᓂ ᐊᒡᓂᒍ ᐃᒍᒃᑯᒡᒎᖅ ᐃᖕᒥᓂᒃ ᑲᒪᑦᑎᐊᔪᔪᐊᓗᐃᑦ ᐊᐳᖅᑎᓐᓈᖅᑐᓕᐊᕌᖓᑕ, ᓂᕆᑎᑦᑎᑦᑎᖏᓐᓇᖅᐸᒃᖢᑎᒡᓗ ᓂᕆᕝᕕᖓᓂ.
ᐅᖃᖅᖢᓂ ᓴᓇᔨᖏᒡᒎᖅ ᑐᙵᓇᖅᑐᐊᓗᐃᑦ ᐊᒻᒪᓗ ᐃᑲᔪᒃᑳᓗᐃᑦ, ᓇᓗᓇᐃᔭᐃᕙᒃᖢᑎᒃ ᓇᓕᐊᒃ ᓴᓇᔨᖓ ᐃᖕᒥᓂᒃ ᑲᒪᓂᐊᕐᒪᖔᑦ ᐃᑲᔪᕐᓂᐊᕐᒪᖔᑕᓗ ᓱᓇᒥᒃ ᐱᔭᕆᐊᖃᕈᑎᒃ.