ᐱᓇᓱᐊᕈᓯᖅ ᑲᒪᓇᑦᓯᐊᖅᐳᖅ ᖁᕕᐊᓇᕐᓂᐊᖅᖢᓂᓗ ᐃᓚᒋᔭᐅᔪᓄᑦ ᐊᕐᕕᐊᓂ ᑕᕐᕆᔭᐅᑎᓕᐅᖅᑎᑦ ᑲᑐᔾᔨᖃᑎᒌᒃᑯᖏᓐᓄᑦ.
ᕕᕗᐊᕆ 2016-ᒥ, ᒍᐊᑦ ᐱᓛᑦ ᐱᖃᑎᖃᓚᐅᖅᐳᖅ ᒪᕐᕉᖕᓂᒃ ᒪᒃᑯᒃᑐᓂᒃ ᑲᑐᔾᔨᖃᑎᒌᒃᑯᓐᓂᑦ, ᔩᒥ ᐅᑲᑦᓯᐊᒃ ᐊᒻᒪ ᓵᒥᐅ ᐸᐅᐸ, ᑯᐸᒃᓯᑎᒧᐊᓚᐅᖅᖢᑎᒃ.
ᒪᕐᕉᒃ ᒪᒃᑯᒃᑐᒃ ᐊᖑᑎᒃ ᑕᕐᕆᔭᐅᑎᓕᐅᓚᐅᖅᖢᑎᒃ ᐅᓂᒃᑳᖅᓯᒪᔪᓂᒃ ᐊᒃᓱᕈᖃᑦᑕᕐᓂᖏᑦ ᒪᒃᑯᒃᑐᑦ ᑯᐸᒃᓯᑎᒥ ᐅᑭᐅᖅᑕᖅᑐᒥᐅᑕᐃᓪᓗ, ᓄᓇᓕᖕᓂᒥᐅᑦ ᐊᕐᕕᐊᒥᐅᑦ ᑕᕐᕆᔭᐅᑎᓕᐅᕈᑕᐅᑉᓗᑎᒃ.
ᐱᓛᑦ ᑯᐸᒃᓯᑎᒦᖃᑕᐅᓚᐅᖅᖢᓂ ᐱᓇᓱᐊᕈᓯᑐᐃᓐᓇᕐᒥ ᐅᑎᓕᓚᐅᖅᖢᓂ ᐊᕐᕕᐊᓄᑦ, ᑯᐸᒃᓯᑎᒥᓚᐅᕐᒪᑕ ᐱᓇᓱᐊᕈᓯᒃᑲᓐᓂᕐᒥᒃ ᐱᓕᕆᐊᒥᓂᒃ ᐱᐊᓂᒐᓱᐊᖅᖢᑎᒃ ᐱᓕᕆᖃᑎᖃᖅᖢᑎᒃ Productions 4 éléments−ᑯᓐᓂᒃ.
ᐅᖃᓚᐅᖅᐳᖅ ᓴᓇᔭᐅᔪᑦ ᐊᑎᖃᖅᖢᓂ, ᒪᒃᑯᒃᑐᑦ, ᐃᑲᔪᖅᑕᐅᓚᐅᖅᐳᓪᓗ ᐊᖏᔪᒥᒃ ᑖᑉᓱᒧᖓ Vincent l'Hérault ᐱᓕᕆᔨ ArcticConnexion−ᑯᓐᓄᑦ.
“ᖃᐅᔨᒪᖏᑦᑐᖓ ᐅᓂᒃᑳᓂᐅᖅᑕᐅᓯᒪᔪᖅ ᑐᓂᔭᐅᓚᐅᕐᒪᖔᑦ ᑖᒃᑯᓄᖓ Winnipeg Aboriginal Film Festivalᑯᓐᓄᑦ, ᑭᓯᐊᓂ ᒪᕐᕉᒃ ᑲᑉᐸᓂᑦ ᐃᑲᔪᓚᐅᕐᒪᑕ ᑖᓐᓇ ᓴᓇᔭᐅᓂᖓᓄᑦ,” ᐅᖃᓚᐅᖅᐳᖅ ᐱᓛᑦ.
“ᐊᖏᖅᑕᐅᓚᐅᖅᖢᓂ ᖃᐅᔨᓴᖅᑕᐅᓂᐊᖅᓗᓂ ᑕᑯᒃᓴᐅᑎᑕᐅᓗᓂ ᑕᑯᒃᓴᐅᑎᑕᐅᓚᐅᖅᖢᓂᓗ 5ᒥ ᐅᓐᓄᒃᓴᒃᑯᑦ ᓴᓇᑦᑕᐃᓕᐊᕈᓯᐅᓚᐅᖅᑐᒥ, ᓄᕕᐱᕆ 25-ᖑᑎᓪᓗᒍ.
“ᐃᖢᐃᓪᓕᐅᕈᑎᖃᓚᐅᖅᐳᒍᑦ ᓯᓚᑦᓯᐊᖑᖃᑦᑕᓚᐅᖏᒻᒪᑦ ᑭᕙᓪᓕᕐᒥ ᐱᓇᓱᐊᕈᓯᒥ, ᑭᓯᐊᓂ ᑕᐅᓄᖓᕈᓐᓇᓚᐅᖅᐳᒍᑦ.”
ᐱᓛᑦ ᐅᖃᓚᐅᖅᖢᓂ ᓯᕗᓪᓕᖅᐸᐅᓚᐅᕐᒪᑦ ᑕᕐᕆᔭᐅᑎᓕᐅᕈᑦ ᐊᕐᕕᐊᓂ ᑲᑐᔾᔨᖃᑎᒌᒃᑯᓐᓄᑦ ᑕᐃᒪᓐᓇ ᐃᓕᑕᕆᔭᐅᒍᑕᐅᓚᐅᖅᑐᖅ ᓯᕗᓪᓕᖅᐸᐅᓪᓗᓂᓗ ᖃᓄᐃᓕᐅᕈᑎᖃᖅᑎᓪᓗᒋᑦ ᐃᓚᐅᑎᑕᐅᓚᐅᖅᖢᓂ.
“ᐃᓕᑕᕆᔭᐅᒍᓯᐊᖃᑦᑕᖅᓯᒪᕗᒍᑦ ᑕᒪᒃᑯᓂᖓ ᐃᓕᓐᓂᐊᕐᕕᖕᒥ ᓄᑕᕋᐅᖃᑎᓪᓗ ᐱᑦᓯᐊᖃᑦᑕᕆᐊᖃᕐᓂᕐᒧᑦ ᑕᕐᕆᔭᐅᑎᓕᐅᖅᖢᑕ ᐊᒻᒪ ᐅᔾᔨᖅᑐᑦᓯᐊᕆᐊᖃᕐᓂᕐᒧᓪᓗ ᑖᒃᑯᓄᖓ ᑕᕐᕆᔭᐅᑎᓕᐅᓚᐅᕋᑉᑕ ᐱᓕᕆᕕᖕᒥ ᓇᓪᓕᐅᒃᑯᒫᓕᕆᔨᒃᑯᑦ ᐱᔾᔪᑎᒋᑉᓗᒋᑦ ᑕᐃᒪᓐᓇ ᖃᐅᔨᒍᒪᓇᖃᑦᑕᖅᐳᖅ ᑕᕐᕆᔭᐅᑎᓕᐅᖅᑕᐃᑦ ᓵᓚᒃᓴᖃᑕᐅᓂᐊᕐᓂᖓᓄᑦ ᐊᓯᖏᓐᓂᑦ.”
ᐱᓛᑦ ᐅᖃᓚᐅᖅᖢᓂ ᐊᒥᓱᓄᑦ ᑕᑯᔭᐅᓚᐅᖅᖢᓂᓗ ᑕᕐᕆᔭᐅᑎᓕᐊᕆᔭᕗᑦ ᑐᑭᓯᕚᓪᓕᕈᑕᐅᓚᐅᖅᑐᒃᓴᐅᑉᓗᓂᓗ ᐃᓅᓯᖅ ᖃᓄᐃᑦᑑᓂᖓᓄᑦ ᐅᑭᐅᖅᑕᖅᑐᒥ ᒪᒃᑯᒃᑐᓄᑦ. ᐅᖃᓚᐅᖅᖢᓂᓗ ᐅᑲᑦᓯᐊᒃ ᐊᒻᒪ ᐸᐅᐸ ᖁᕕᐊᓱᓚᐅᖅᖢᑎᒃ ᑲᒪᓚᐅᖅᖢᑎᒡᓗ ᒪᒃᑯᒃᑐᑦ ᑕᕐᕆᔭᐅᑎᓕᐊᖓᑦ ᑕᑯᒃᓴᐅᑎᑕᐅᓚᐅᕐᒪᑦ ᑕᐅᓇᓂ.
“ᓱᓕ ᐃᓚᐅᕗᑦ ᐊᕐᕕᐊᓂ ᑕᕐᕆᔭᐅᑎᓕᐅᖅᑎᑦ ᑲᑐᔾᔨᖃᑎᒌᒃᑯᖏᓐᓄᑦ, ᑭᓯᐊᓂ ᐃᓐᓇᐅᓕᕐᒪᑕ ᐱᓕᕆᐊᖃᓕᖅᖢᑎᒃ ᐊᒻᒪ ᐱᒻᒪᕆᐅᔪᓂᒃ ᐱᓕᕆᐊᖃᖅᖢᑎᒃ,” ᐅᖃᓚᐅᖅᐳᖅ.
“ᔩᒥ (ᐅᑲᑦᓯᐊᒃ) ᓄᓕᐊᖅᑖᕐᓂᐊᓕᖅᖢᓂ ᐊᒻᒪ ᓵᒻ (ᐸᐅᐸ) ᐱᓕᕆᑉᓗᓂ ᒥᑐᐸᐃᒃ ᐅᔭᕋᒃᑕᕆᐊᖏᓐᓂ ᖃᒪᓂ'ᑐᐊᒥ, ᐱᓕᕆᐊᒃᓴᖃᒻᒪᕆᒃᐳᑦ ᑕᐃᑉᓱᒪᓂ ᐱᓕᕆᓚᐅᖅᓯᒪᑉᓗᑎᒃ ᑕᕐᕆᔭᐅᑎᓕᐅᕐᓂᕐᒧᑦ.
“ᑭᓯᐊᓂ ᑕᐃᒪᓐᓇ ᐱᓕᕆᒋᐅᖅᓴᑎᓚᐅᕋᑉᑎᒍ ᑕᕐᕆᔭᐅᑎᓕᐅᕐᓂᕐᒧᑦ ᐅᓂᒃᑳᓕᐅᕐᓂᕐᒧᓪᓗ. ᓂᕆᐅᒃᐳᖓ ᕙᓂᐹᖕᒥᑦ ᐅᑎᖁᑉᓗᒋᑦ ᖃᓄᑐᐃᓐᓇᖅ ᐃᓱᒪᒃᓴᖅᓯᖅᓯᒪᓗᑎᒃ ᑕᕐᕆᔭᐅᑎᓕᐅᖅᓯᒪᑉᓗᑎᒡᓗ...”
ᐱᓛᑦ ᐅᖃᓚᐅᖅᐳᖅ ᑕᑯᑉᓗᓂ ᐅᑲᑦᓯᐊᕐᒥᒃ ᐊᒻᒪ ᐸᐅᐸᒥᒃ ᐱᓕᕆᐊᖏᑦ ᐃᓕᑕᕆᔭᐅᑎᓪᓗᒋᑦ ᑐᑭᖃᖅᐳᖅ ᐱᑦᓯᐊᖅᓯᒪᓂᖏᓐᓄ ᐃᓕᓐᓂᐊᖅᑎᑦᖢᒋᑦ.
“ᓴᕆᒪᒋᕙᒃᑲ ᐃᓚᒋᔭᐅᖃᑕᐅᓯᒪᒐᒪ ... ᐃᓚᐅᑎᑕᐅᖃᑕᐅᑉᓗᑎᒃ ᔪᐊᑕᓐ ᑯᓐᓂᖕᒧᑦ, ᐃᓕᓐᓂᐊᖅᑎᓚᐅᖅᓯᒪᒐᑉᑯ ᑲᔪᓯᑦᓯᐊᖅᓯᒪᑉᓗᓂᓗ ᐊᒻᒪ ᐅᖃᐅᓯᕆᒐᔪᒃᖢᒍ ᐅᑭᐅᖅᑕᖅᑐᒥ ᐱᓕᕆᐊᕆᓯᒪᑉᓗᒍ,” ᐅᖃᓚᐅᖅᐳᖅ.
“ᑕᐃᒪᓐᓇ ᐆᒃᑑᑎᖃᖃᑦᑕᖅᐳᖓ ᐃᓕᓐᓂᐊᖅᑎᑦᓯᑦᓯᐊᕋᓗᐊᕐᒪᖔᕐᒪ, ᑲᔪᓯᑦᓯᐊᕐᓂᖏᑦ ᐃᓕᓐᓂᐊᖅᑎᑕᒃᑲ ᖃᐅᔨᓴᖅᖢᒋᑦ, ᑕᑯᑉᓗᒋᓪᓗ ᐃᓕᓐᓂᐊᖅᑎᓚᐅᖅᑕᒃᑲ ᐃᓕᑕᕆᔭᐅᑎᓪᓗᒋᑦ ᐃᓕᓐᓂᐊᕆᐊᕈᑎᒃᓴᖅᑖᖅᖢᑎᒃ ᑮᓇᐅᔭᓂᒃ ᑕᐃᒪᓐᓇ ᖃᐅᔨᓴᕈᑎᑦ ᖃᓄᐃᓕᐅᓚᐅᕐᓂᕐᒧᑦ.
“ᐊᒻᒪ ᖃᐅᔨᓐᓇᕈᑕᐅᑉᓗᑎᒃ ᑕᒪᒃᑯᐊ ᐱᓕᕆᖃᑎᒋᓯᒪᔭᒃᑲ ᐱᑦᓯᐊᕐᓂᖏᓐᓄᑦ ᑲᔪᓯᑦᓯᐊᖅᖢᑎᒃ ᑕᐃᒪᓐᓇ ᐱᑎᓪᓗᒋᑦ.”