ᓇᐅᔮᓂ ᐊᕐᕌᒍᑕᒫᒃᑯᑦ ᖁᕕᐊᓱᖕᓇᐅᓕᕌᖓᑦ ᖁᕕᐊᓱᒡᕕᒃᓯᐅᕐᓂᖅ ᐃᒃᐱᖕᓇᑦᑎᐊᓲᖅ, ᓄᓇᖅᑲᑎᒌᖕᓂᖅ ᐃᒃᐱᖕᓇᖅᖢᓂ, ᐃᓚᒌᒃᑐᓪᓗ ᑲᑎᕈᓘᔭᕈᓐᓇᖃᑦᑕᖅᖢᑎᒃ, ᐃᓚᓐᓇᕇᒃᑐᑦ ᐃᒡᓚᖃᑎᒌᒃᐸᒃᖢᑎᒃ ᓯᓚᓕᕇᒃᑐᓪᓗ ᐊᒻᒪᓗ ᖁᕕᐊᓲᑎᖃᖅᖢᑎᒃ ᐃᓅᓯᕐᒥᒃ, ᑕᐃᒪᓐᓇ ᐅᖃᖅᖢᓂ ᓄᓇᓕᐅᑉ Hᐊᒻᓚᖓᓂᒃ ᐊᖓᔪᖅᑳᖅ ᐱᓇᓱᐊᕈᓯᐅᓚᐅᖅᑐᒥ.
Photo courtesy hamlet of Naujaat
ᐊᒻᒪᓗ, ᓵᓚᒃᓴᖃᑦᑕᖅᖢᓂ ᖃᑉᓰᑲᓪᓚᒃᖢᓂ 8 ᐅᑉᓗᑦ ᐃᓗᐊᓂ ᐱᙳᐊᖁᓘᔭᖃᑦᑕᖅᑎᓪᓗᒋᑦ ᖃᓄᐃᓕᐅᖅᑎᑕᐅᕈᓘᔭᖃᑦᑕᖅᑎᓪᓗᒋᑦ, ᐅᕝᕙᓘᓐᓃᑦ ᐊᒧᔭᐅᒍᕕᑦ ᓯᕗᓪᓕᖅᐹᒥ ᐅᑉᓗᕐᒥ ᓄᑖᒥ ᐅᑭᐅᒥ ᓵᓚᒃᓴᒐᒃᓴᑦᑎᐊᕚᓗᖕᒥ, ᑕᒪᓐᓇ ᖁᕕᐊᓱᒍᑎᒃᓴᒃᑲᓐᓂᒻᒪᕆᐊᓗᒃ.
ᕌᑉ Hᐃᑦᓕ ᐅᖃᖅᖢᓂ ᖁᕕᐊᓱᖕᓇᒥ ᖃᓄᐃᓕᐅᕈᑕᐅᓚᐅᖅᑐᑦ ᑲᑎᒪᔨᓄᑦ ᐅᖃᖃᑎᒌᒍᑕᐅᓚᐅᖅᑐᑦ Hᐊᒻᓚᒃᑯᑦ ᑲᑎᒪᔨᖏᑦ ᑲᑎᒪᓚᐅᖅᑎᓪᓗᒋᑦ ᐱᓇᓱᐊᕈᓯᐅᓵᖅᑐᒥ, ᐊᖏᖃᑎᒌᒃᖢᑎᒃ ᑲᔪᓯᓂᖃᑦᑎᐊᓚᐅᕐᓂᖏᓐᓄᑦ ᐊᒻᒪᓗ ᓄᓇᖅᑲᑎᒌᖕᓄᑦ ᖁᕕᐊᒋᔭᐅᑦᑎᐊᓚᐅᕐᓂᖏᓐᓄᑦ. ᐅᖃᖅᖢᓂᓗ Hᐊᒻᓚᒃᑯᑦ ᐅᖃᐅᑎᔭᐅᖃᑦᑕᓚᐅᕐᓂᖏᓐᓄᑦ ᐊᓕᐊᓇᐃᒍᓱᑦᑎᐊᓚᐅᖅᑐᓂᒃ. ᑕᐃᒪᓐᓇ ᐅᖃᖅᖢᓂ.
"ᓯᕗᓕᖅᐹᒥ ᐅᑉᓗᕐᒥ ᓄᑖᒥ ᐅᑭᐅᒥ ᓯᓚ ᐱᐅᓗᐊᓚᐅᙱᑦᑐᖅ, ᒪᑐᓯᔭᕆᐊᖃᓕᓚᐅᖅᑎᓪᓗᒋᑦ ᑭᓯᐊᓂ ᖁᕕᐊᓱᖕᓂᖃᑦᑎᐊᓚᐅᕐᒥᔪᑦ" ᑕᐃᒪᓐᓇ Hᐃᑦᓕ ᐅᖃᖅᖢᓂ.
"ᓯᓚᑐᐃᓐᓇᒃᑯᑦ ᖃᐅᒻᒪᒃᑎᑦᑎᖃᑦᑕᖅᑎᓪᓗᒋᑦ ᑲᔪᓯᓂᖃᑦᑎᐊᓚᐅᖅᑐᖅ, ᐊᒻᒪᓗ ᐃᓄᐃᑦ ᐊᓕᐊᓇᐃᒍᓱᑦᑎᐊᓲᑦ ᐊᒧᓯᓂᐊᓕᕌᖓᑕ ᑎᖕᒥᓲᒃᑰᕈᑎᒃᓴᓂᒃ, ᑕᓚᕕᓴᓂᒡᓗ ᒪᕐᕉᖕᓂᒃ ᓄᑖᓂᒃ ᐊᒻᒪᓗ ᐊᓯᖏᓐᓂᒃ ᓵᓚᒃᓴᖅᑕᐅᔪᒪᑦᑎᐊᖅᑐᓂᒃ.
"ᓄᓇᖅᑲᑎᒌᖕᓂᒃ ᐅᑉᓗᕈᒥᑕᖅᑎᑦᑎᓚᐅᖅᑐᒍᑦ ᑎᓯᐱᕆ 22-ᒥ, ᐊᒻᒪᓗ ᕿᑎᒋᐊᖅᖢᑎᒃ ᑎᓯᐱᕆ 24-ᒥ.
"ᖁᕕᐊᓱᖕᓇᒥ ᐅᑉᓗᕐᒥ ᐃᒃᓯᕋᕐᔪᐊᕐᒥᐅᑕᑦ ᕿᑎᒃᑎᑦᑎᓚᐅᖅᑐᑦ ᐊᒻᒪᓗ ᓄᓇᖅᑲᑎᒌᖕᓂᒃ ᓂᕆᕕᒡᔪᐊᖅᑎᑦᑎᑎᓪᓗᑎᒃ ᐊᒻᒪᓗ, ᑕᐃᑉᑯᐊ ᐱᐊᓂᖕᒪᑕ Hᐊᒻᓚᒃᑯᑦ ᐱᓕᕆᒋᐊᓕᖅᖢᑎᒃ ᐅᑭᐅᑉ ᓄᙳᐊᓄᑦ."
Hᐃᑦᓕ ᐅᖃᖅᖢᓂ Hᐊᒻᓚᒃᑯᑦ ᐊᑐᓚᐅᕐᓂᖏᓐᓄᑦ $20,000 ᖃᓂᒋᔭᖓᓂᒃ ᓵᓚᒃᓴᒐᒃᓴᓄᑦ ᑕᒡᕙᓂ ᐅᑭᐅᒥ, ᐊᒻᒪᓗ $3,000-ᓂᒃ $4,000-ᓄᑦ ᓂᕆᕕᒡᔪᐊᖅᑐᓄᑦ ᐊᒻᒪᓗ ᐊᓯᖏᓐᓄᑦ ᓂᐅᕕᐊᖑᔭᕆᐊᓕᖕᓄᑦ.
ᐅᖃᖅᖢᓂᓗ ᐃᓐᓇᐃᒡᒎᖅ ᑲᑎᖃᑦᑕᕐᒥᔪᑦ ᐅᑭᐅᑕᒫᑦ ᐋᓐᓂᐊᕐᕕᖕᒥ, ᑕᒪᓐᓇ ᖁᕕᐊᒋᔭᐅᑦᑎᐊᓲᖅ ᐅᑉᓗᒥᒧᑦ ᑎᑭᖦᖢᒍ ᐃᓐᓇᑐᖃᕐᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓴᓇᔨᖏᓐᓄᓪᓗ.
"Hᐊᒻᓚᒃᑯᑦ ᓯᓚᑐᐃᓐᓇᒃᑯᑦ ᖃᐅᒻᒪᒃᑎᑦᑎᖃᑦᑕᕐᒥᔪᑦ. ᑯᐊᐸᒃᑯᑦ ᑎᑭᓴᐃᓲᑦ ᖃᐅᒻᒪᒃᑕᖅᑐᓂᒃ ᐅᑭᐅᖅ ᐱᒋᐊᓕᓵᕐᓚᒃᑎᓪᓗᒍ ᐊᒻᒪᓗ ᐸᐸᑐᖅᑕᐅᕙᒃᖢᑎᒃ ᖃᐃᑕᐅᔭᕆᐊᖃᓕᕌᖓᑕ ᖃᐃᑕᐅᕙᒃᖢᑎᒃ.
"ᑕᒪᓐᓇ ᐃᓚᒌᖕᓄᑦ ᖃᐅᒻᒪᒃᑎᑦᑎᖃᑦᑕᕐᓂᖅ ᑐᕌᖓᑎᑕᐅᓲᖅ ᐊᒻᒪᓗ ᑲᔾᔮᕐᓇᖅᑐᒻᒪᕆᐊᓘᓲᖅ ᖁᕕᐊᒋᔭᐅᑦᑎᐊᖅᐸᒃᖢᓂ ᓄᓇᖅᑲᑎᒌᖕᓄᑦ.
"ᐃᒪᓐᓇᐃᒐᔪᒃᑐᑦ, ᐊᕐᕌᒍᑕᒫᒃᑯᑦ, ᒪᒃᑯᒃᑐᑦ ᒥᐊᓂᖅᓯᒐᔪᒃᑐᑦ ᐊᒻᒪᓗ - ᓯᐊᕐᕆᔮᕐᕕᒃ ᒪᑐᓯᒪᒐᔪᒃᑎᓪᓗᒍ ᖁᕕᐊᓱᖕᓇᒥ - ᓯᐊᕐᕆᔮᕐᕕᖕᒥ ᐱᓕᕆᔨᕗᑦ ᐃᑲᔪᖅᐸᒃᑐᑦ ᐃᑲᔪᕐᔪᐊᓲᑦ.
"ᐊᑭᓕᖅᑐᖅᑕᐅᙱᖦᖢᑎᒃ ᐊᒥᓱᑦ ᐃᑲᔪᓲᑦ ᕿᑎᒐᒃᓴᐃᑦ ᑲᔪᓯᑦᑎᐊᖁᑉᓗᒋᑦ, ᑭᓯᐊᓂ ᑕᒪᕐᒥᖅᑲᔭᑦ ᖃᓄᐃᓕᐅᕈᑕᐅᕙᒃᑐᑦ ᑲᒪᒋᔭᐅᓲᑦ Hᐊᒻᓚᒃᑯᓐᓄᑦ."