ᐳᐃᒍᕐᓇᕐᓂᐊᖏᑦᑐᒥᒃ ᐊᑐᓚᐅᖅᐳᖅ ᖁᕕᐊᓱᑦᓯᐊᖅᖢᓂᓗ ᒪᐃᒃ ᓲᑕᐃᔅ ᓯᐱᐊᑦᓯᒥᒃ ᐊᑕᐅᓯᓕᖕᒥᒃ ᐊᒧᓯᓚᐅᕐᒪᑦ ᑲᖏᖅᖠᓂᕐᒥ ᔭᓐᓄᐊᕆ 5-ᒥ ᐊᒻᒪ ᐊᖏᔪᒻᒪᕆᖕᒥᒃ ᑮᓇᐅᔭᓂᒃ ᓵᓚᒃᓴᐅᑎᖃᓚᐅᖅᖢᓂ ᑕᐃᒪᓐᓇ ᐱᕈᖅᐸᓪᓕᐊᑎᑦᓯᖃᑦᑕᖅᖢᑎᒃ ᑮᓇᐅᔭᓂᒃ ᓇᓚᐅᑦᓵᓚᐅᖅᑎᓪᓗᒋᑦ Chase the Ace ᐱᕈᖅᓴᐃᓇᓱᐊᖅᖢᑎᒃ ᑮᓇᐅᔭᓂᒃ.
ᑕᒪᓐᓇ ᓇᓚᐅᑦᓵᖅᑎᑦᓯᓂᖅ ᐱᓕᕆᐊᕆᔭᐅᓚᐅᖅᐳᖅ ᕼᐊᒻᓚᒃᑯᓐᓂ ᐊᑭᓕᖅᑐᖅᑕᐅᖏᑦᖢᑎᒃ ᖃᑉᑎᕆᔨᒃᑯᓐᓄᑦ ᐱᓐᖑᐊᖅᑐᓕᕆᔨᒃᑯᓐᓄᓪᓗ.
ᐊᒧᓯᓚᐅᖅᖢᓂ ᓯᐱᐊᑦᓯᒥᒃ ᐱᔭᐅᓇᓱᐊᖅᑐᒥᒃ ᓵᓚᒃᓴᐅᑎᖃᖅᖢᓂᓗ ᑮᓇᐅᔭᓂᒃ $82,870−ᓂᒃ ᓲᑕᐃᔅ, ᐅᒃᐱᕈᓱᓚᐅᖏᑦᖢᓂᓗ ᖃᓄᐃᓚᐅᕐᒪᖔᕐᒥ.
ᓲᑕᐃᔅ ᐅᖃᓚᐅᖅᐳᖅ ᓂᐅᕕᖃᑦᑕᓚᐅᕋᒥ ᓇᓚᐅᑦᓵᕈᑎᓂᒃ ᑕᐃᒪᖓᓂᑦ ᐱᒋᐊᖓᖅᑎᑦᓯᓚᐅᖅᑎᓪᓗᒋᑦ ᓇᓚᐅᑦᓵᕈᑎᑦ ᐱᒋᐊᓕᖅᑎᓪᓗᒋᑦ.
ᐅᖃᓚᐅᖅᐳᖅ ᐱᓇᓱᐊᕈᓯᑕᒫᑦ ᖃᐅᔨᓴᐅᑎᒥᒃ ᑕᑯᒋᐊᖃᑦᑕᓚᐅᖅᐳᖅ ᑕᒡᕙᓂ 6:15-ᒧᖓᕌᖓᑦ ᐅᓐᓄᓴᒃᑯᑦ ᐊᒧᔭᐅᖏᒻᒥᒐᒥ, ᑭᓯᐊᓂ ᑕᒪᓐᓇ ᐊᓯᔾᔨᓚᐅᖅᐳᖅ ᔭᓐᓄᐊᕆ 5-ᖑᓕᕐᒪᑦ.
“ᐅᖃᓘᑎᕗᑦ ᓯᕙᓂᓚᐅᕐᒪᑦ 5:30−ᒥ ᐅᓐᓄᓴᒃᑯᑦ ᐅᖃᓪᓚᕕᒋᑉᓗᒍ ᓄᓕᐊᕋ, ᒪᓂᑲ, ᑐᓴᖅᖢᖓᓗ: “ᔨᐊ? ᑕᐃᒪᓐᓇᑦᓯᐊᖅ! ᔨᐊ ᔨᐊ. ᖃᐃᓕᖅᐳᖓ,'” ᐅᖃᓚᐅᖅᐳᖅ ᓲᑕᐃᔅ.
“ᐱᓐᖑᐊᕐᕕᖕᒧᖓᐅᓕᖅᖢᑕ ᑐᐊᕕᖅᖢᑕ ᐃᓄᖕᓄᑦ ᑲᑎᖓᑎᖃᕆᐊᖅᑐᖅᖢᑕ, ᑐᓵᓂᓗᒃᖢᖓᓗ ᖃᓄᐃᓕᐅᕆᐊᖃᕐᓂᖏᓐᓄᑦ ᑐᓴᖅᓴᐅᑦᓯᐊᖏᑦᖢᓂᓗ. ᖁᕕᐊᓇᑦᓯᐊᓚᐅᖅᐳᖅ.”
ᓲᑕᐃᔅ ᐅᖃᓚᐅᖅᐳᖅ ᐱᓐᖑᐊᖅᑐᓕᕆᓂᕐᒧᑦ ᑐᑭᒧᐊᒃᑎᑎᔨ ᖃᓄᐃᓕᐅᕆᐊᖃᕐᓂᖓᓄᑦ ᐅᖃᓪᓚᒃᖢᓂ ᖃᑉᓯᓂᒡᓗ ᓵᓚᒃᓴᕋᔭᕐᓂᖓᓄᑦ ᑮᓇᐅᔭᓂᒃ, ᓱᓕ ᓵᓚᒃᓴᕐᓂᐊᖏᓐᓇᓱᒋᑉᓗᓂ 12 ᑲᓴᐅᓚᐅᕐᒪᑕ ᐸᑦᑕᐃᑦ ᓱᓕ, ᑭᓯᐊᓂ ᑮᓇᐅᔭᕐᔪᐊᓂᒃ ᓵᓚᒃᓴᒐᒃᓴᖃᓚᐅᖅᐳᖅ ᑖᑉᓱᒥᖓᓗ ᓯᐱᐊᑦᓯᒥᒃ ᐊᑕᐅᓯᓕᖕᒥᒃ ᐊᒧᓯᒋᐊᖃᖅᖢᓂ.
ᐅᖃᓚᐅᖅᐳᖅ ᖃᓄᐃᓕᐅᖏᓕᖅᖢᓂ ᒧᓂᑲᒥ ᕿᓂᖅᖢᓂ ᐃᓚᐅᖁᑉᓗᓂᐅᒃ ᐊᒧᓯᑎᓪᓗᒍ ᐸᒃᑕᖕᒥᒃ.
“ᐃᓱᒪᓚᐅᕋᒪ − ᒧᓂᑲ ᖃᐃᓕᕐᒪᑦ ᐊᒧᓯᒋᐊᖃᓕᖅᖢᓂᓗ ᐸᒃᑕᖕᒥᒃ − ᓄᓕᐊᕋ ᐊᒧᓯᑎᒐᔭᕋᑉᑯ, ᑭᓯᐊᓂ ᐃᓱᒪᒃᓴᖅᓯᐅᒃᑲᓐᓂᓕᖅᖢᖓ, ᐊᒧᖏᑉᐸᒍ ᓯᐱᐊᑦᓯ ᐊᑕᐅᓯᓕᒃ ᐃᖕᒥᓂᒃ ᐱᔾᔪᑎᒋᔭᐅᓇᓱᒋᑐᐃᓐᓇᕆᐊᖃᕐᓂᖓᓄᑦ.
“ᐅᖃᓪᓚᒃᑐᖃᓚᐅᖏᑉᐳᖅ ᐅᕙᒻᓄᑦ ᑕᐃᒪᓐᓇᐃᓕᐅᖅᑎᓪᓗᒋᑦ, ᑕᐃᒪᓐᓇ ᐃᖕᒥᓂᒃ ᐊᒧᓯᓕᓚᐅᖅᐳᖓ. ᑕᐃᒪᓐᓇ ᐅᒃᐱᕈᓱᓚᐅᖏᑉᐳᖓ ᑭᓯᐊᓂ ᑕᒪᕐᒥᒃ ᖃᓄᐃᒋᐊᖃᕐᒪᑕ ᓇᓚᐅᑦᑐᖃᕆᐊᖃᕐᒪᓪᓗ.”
ᓲᑕᐃᔅ ᐅᖃᓚᐅᖅᐳᖅ ᑕᐃᒪᖓᓂᑦ ᐊᒧᓯᓚᐅᖅᖢᓂ ᓯᐱᐊᑦᓯᒥᒃ ᐊᑕᐅᓯᓕᖕᒥᒃ, ᐃᓄᐃᑦ ᑲᖏᖅᖠᓂᕐᒥ ᑖᓐᓇ ᐊᒧᔭᖓ ᑎᒍᔭᐅᓇᔭᓚᐅᕐᓂᖓᓄᑦ 7−ᒋᔭᐅᓚᐅᕐᒪᑦ ᐃᓕᔭᐅᓯᒪᑉᓗᓂ ᐊᓪᓕᕋᐅᔭᒥ, ᑭᓯᐊᓂ ᑕᐃᒪᓐᓇ ᐃᓱᒪᓚᐅᖏᑉᐳᖅ ᑖᓐᓇᐅᓂᐊᕐᓂᖓᓄᑦ.
ᐅᖃᓚᐅᖅᐳᖅ ᐸᑦᑕᕐᒥᒃ ᐊᒧᓯᒋᐊᖃᓕᕋᒥ ᐊᒧᓯᑐᐃᓐᓇᓚᐅᖅᐳᖅ.
“ᐃᖅᑲᐅᒪᓚᐅᖅᐳᖓ ᑕᐃᑉᓱᒪᓂ ᐃᓕᓐᓂᐊᕆᐊᖃᑦᑕᖅᖢᖓ ᑕᐃᒪᓐᓇ ᑭᖑᓪᓕᖅᐹᖅᓯᐅᖅᑐᓂᒃ ᐸᕐᓇᐅᑎᖃᓕᕋᒪ ᖃᐅᔨᓴᖅᑕᐅᔪᒃᓴᓂᒃ ᐊᔪᖏᓐᓂᕋᓂᒃ ᐱᓇᓱᐊᖅᖢᖓ,” ᐅᖃᓚᐅᖅᐳᖅ.
“ᐱᖓᓱᓂᒃ ᑎᑎᕋᕆᐊᖃᓚᐅᕋᒪ ᓯᑕᒪᓂᒃ ᐊᐱᖁᑎᖃᖅᑐᓂᒃ ᑕᐃᒪᓐᓇ ᐸᒃᑕᐃᑦ ᐃᓕᔭᐅᓯᒪᑉᓗᑎᒃ ᓂᕈᐊᕆᐊᖃᖅᖢᑎᒃ ᐊᐱᖁᑎᓂᒃ ᐊᒧᔭᐅᔪᒃᓴᓂᒃ ᑭᐅᔭᐅᒋᐊᖃᖅᑐᓂᒃ, ᑕᒪᒃᑯᐊ ᐊᒧᔭᒃᑲ ᐊᑐᕆᐊᖃᖅᖢᒋᑦ.”
ᓲᑕᐃᔅ ᐅᖃᓚᐅᖅᐳᖅ ᐱᓐᖒᖃᑦᑕᖅᑎᐅᖏᓐᓇᒥ, ᑭᓯᐊᓂ ᓂᐅᕕᖃᑦᑕᖅᐳᑦ ᓇᓚᐅᑦᓵᕈᑎᒃᓴᓂᒃ ᐊᖏᔪᒥᒃ ᑮᓇᐅᔭᓂᒃ ᓇᓚᐅᑦᓵᕈᑎᖃᖅᑐᓂᒃ.
ᐅᖃᓚᐅᖅᖢᓂᓗ ᖁᕕᐊᓱᒃᖢᓂᓗ ᑮᓇᐅᔭᒃ ᐱᕈᖅᓴᖅᑕᐅᓇᓱᐊᖅᑐᑦ ᐃᑲᔪᕈᑎᒃᓴᐅᓂᐊᕐᓂᖏᓐᓄᑦ, ᑕᐃᒪᓐᓇ ᑭᑐᒥᐊᖅᑎᑐᑦᑕᐅᖅ ᓂᐅᕕᖃᑦᑕᖅᖢᓂ ᐊᒧᔭᒃᓴᓂᒃ ᓇᓚᐅᑦᓵᕈᑎᒃᓴᓂᒃ ᑕᐃᒪᓐᓇ ᑮᓇᐅᔭᕐᔪᐊᓂᒃ ᓇᓚᐅᑦᓯᒍᒪᑉᓗᓂ.
“ᐅᑎᖅᑎᑦᓯᒍᒪᒐᒪ ᓄᓇᓕᖕᒧᑦ ᓵᓚᒃᓴᐅᑎᓐᓂᖔᖅᑐᓂᑦ, ᑕᐃᒪ ᓂᐅᕕᕐᓂᐊᖅᐳᖓ ᐃᖃᓪᓕᐊᕐᓇᐅᓕᖅᐸᑦ ᓵᓚᒃᓴᐅᑎᒃᓴᐅᓂᐊᖅᑐᒥᒃ,” ᐅᖃᓚᐅᖅᐳᖅ.
“ᖃᐅᔨᒪᖏᑦᑐᖓ ᓱᓇᐅᓂᐊᕐᒪᖔᑦ, ᐱᐅᓂᐊᖅᑐᖅ ᑭᓯᐊᓂ.
“ᐃᓄᐃᑦ ᓄᓇᓕᖕᓂᒥᐅᑦ ᐱᑦᓯᐊᖏᓐᓇᕐᒪᑕ ᑕᐃᒪᖓᓂᑦ ᓵᓚᒃᓴᓚᐅᖅᑎᓪᓗᖓ, ᐊᒻᒪ Facebookᑯᑦ ᑕᑕᓯᒪᖃᑦᑕᓕᖅᐳᖅ ᐅᑉᓗᓄᑦ ᐊᒥᓱᓄᑦ ᑕᒪᒃᑯᐊ ᖁᕕᐊᓱᒃᑎᑎᔪᑦ ᐅᕙᒻᓂᒃ ᓵᓚᒃᓴᐅᑎᖃᓚᐅᕐᓂᒻᓄᑦ. ᖁᕕᐊᓱᒃᐳᖓᓗ ᑎᑎᕋᕐᕕᐅᓗᐊᖃᑦᑕᖏᓕᕋᒪ ᖃᓄᐃᓕᐅᕆᐊᒃᓴᖅ ᐱᔭᕆᐊᑐᓗᐊᕐᒪᑦ ᐊᖑᒪᑎᒍᓐᓇᖏᓐᓇᒪᓗ.”
ᓲᑕᐃᔅ ᐅᖃᓚᐅᖅᐳᖅ ᑐᓴᖅᑎᑎᔪᖃᓚᐅᕐᖢᓂᓗ ᓵᓚᒃᓴᐅᑎᖃᕐᓂᖓᓄᑦ ᐃᓕᓐᓂᐊᕐᕕᒡᔪᐊᒧᑦ ᐃᓕᓐᓂᐊᕆᐊᕐᕕᒋᓚᐅᖅᓯᒪᔭᖓᓄᑦ. ᐅᖃᓚᐅᖅᖢᓂᓗ ᐅᖓᓯᒃᑐᒥᐅᑕᓄᓪᓘᓐᓃᑦ ᑐᓴᖅᑎᑎᖃᑦᑕᓕᕐᒪᑕ ᐅᑉᓗᒥ ᑕᒪᒃᑯᐊ ᖃᕆᑕᐅᔭᒃᑯᑦ ᐱᓕᕆᐊᕆᔭᐅᔪᓐᓇᖅᓯᖕᒪᑕ.
“ᑮᓇᐅᔭᑦ ᐊᑐᖅᑕᐅᓂᐊᖅᐳᖅ, ᒧᓂᑲᓗ ᐃᓱᒪᓯᒪᒐᒻᓄᑦ ᑕᒪᒃᑯᓂᖓ ᐱᒍᒪᔭᑉᑎᓐᓂᒃ, ᐅᖃᐅᓯᕆᓯᒪᑉᓗᒋᓪᓗ, ᓂᕿᓕᐅᕐᕕᑉᑎᓐᓂ ᐊᒧᔭᖅᑐᖅᑖᕐᓂᐊᖅᐳᒍᑦ ᓄᑖᓂᒃ, ᐱᕈᖅᓴᐃᕕᒃ ᓯᓚᒥ ᒥᑭᔫᒐᓗᐊᕐᓗᓂ ᐊᒻᒪ ᐃᒡᓗᐊᓛᖅᐳᑦ ᐊᐅᓪᓛᖅᓯᒪᕕᒃᐳᑦ.” ᐅᖃᓚᐅᖅᐳᖅ.
“ᑮᓇᐅᔭᖅᑕᖃᒃᑲᓐᓂᕆᐊᖃᕐᒪᑦ ᐱᒍᒪᔭᑉᑎᓐᓂᒃ, ᖃᓄᐃᓕᐅᕈᒪᖕᒪᖔᑉᑕ ᐃᓱᒪᓕᐅᕈᑎᖃᒃᑲᓐᓂᕐᓂᐊᖅᐳᒍᑦ ᑐᐊᕕᕐᓂᐊᖏᑉᐳᒍᓪᓗ.
“ᑮᓇᐅᔭᕐᔪᐊᖑᒻᒪᑕ ᖁᔭᓐᓇᒦᖅᖢᑕᓗ ᓵᓚᒃᓴᐅᑎᖃᓚᐅᕋᑉᑕ, ᑕᐃᒪᓐᓇᑎᒋᕐᔪᐊᒻᒪᕆᒃ ᑮᓇᐅᔭᒃᑖᕐᓂᐊᕋᓱᒋᓚᐅᖏᓐᓇᒪ. ᖃᐅᔨᒪᑉᓗᖓᓗ ᐃᓐᓇᐅᓕᖅᑐᑦ ᓄᑕᕋᒃᑕᒃᑲ ᐱᑖᖅᑎᑕᐅᒍᒪᓂᐊᖅᑐᒃᓴᐅᕗᑦ ᓇᓪᓕᐅᕐᓂᖅᓯᐅᕈᑎᑖᒐᒃᓴᒥᖕᓂᒃ.”