ᑲᑎᒪᑲᑕᒍᑕᐅᓚᐅᕐᒪᑕ ᑲᓇᑕᐅᑉ ᐃᖓᓚᓯᒃᑯᓪᓗ ᒐᕙᒪᑎᖓᓄᑦ ᑭᒃᑯᓐᓄᑦ ᐱᖁᑎᑖᕆᔭᐅᓂᐊᕐᓂᖏᑦ ᕗᕌᖕᑭᓚᓐ ᐅᒥᐊᕐᔪᐊᕕᓂᖏᑦ ᐋᔩᖃᑎᒌᒃᑐᑦ ᐱᐊᓂᓚᐅᕐᒪᑕ ᑕᒪᐃᓐᓄᑦ ᐊᖏᖅᑕᐅᓪᓗᓂ ᑐᓂᔭᐅᓚᐅᕐᒪᑦ.
ᐃᖓᓚᓯᒃᑯᑦ ᒐᕙᒪᑎᖓᑦ ᑐᓴᖅᑎᑦᑎᓚᐅᖅᑐᑦ ᐱᓇᓱᐊᕈᓯᐅᓚᐅᖅᑐᒥ ᑐᓂᓯᓂᐊᕐᓂᕋᖅᖢᑎᒃ ᑕᒪᐃᓐᓂᒃ ᐱᖁᑎᖃᕈᑏᑦ ᑎᑎᕋᖅᑕᖏᓐᓂᒃ ᕗᕌᖕᑭᓚᓐ ᐅᒥᐊᕐᔪᐊᕕᓂᖏᓐᓂᒃ HMS Erebus ᐊᒻᒪᓗ HMS Terror, ᒫᓐᓇ Queen Maud Gulf ᐃᑭᖓᓃ ᑭᕕᓯᒪᔪᓂᒃ ᑲᓇᑕᒥ.
“ᐊᒃᓱᐊᓗᒃ ᖁᕕᐊᓱᓚᐅᖅᑐᖓ ᑐᓴᕋᒪ ᑲᓇᑕᒧᑦ ᑐᓂᔭᐅᓂᐊᕐᓂᖏᓐᓂᒃ,” ᐅᖃᓚᐅᖅᑐᖅ ᐅᕐᓱᖅᑑᒥᐅᑦ ᒥᔪᖓ ᔪᐊᓂ ᓴᓚᕆᓇᖅ. “ᐊᒃᓱᐊᓗᒃᓗ ᖁᕕᐊᓲᑎᒋᔭᕋ ᑕᒫᓂ ᕿᑭᖅᑕᑦᑕ ᖃᓂᒋᔭᖓᓃᒻᒪᑎᒃ.
ᕗᕌᖕᑭᓚᓐ ᒪᕐᕉᖕᓂᒃ ᐅᒥᐊᕐᔪᐊᖃᖅᓗᓂ ᐊᐅᓪᓚᕐᓂᕐᒪᑦ ᐃᖓᓚᓯᒃᑯᑦ ᓄᓇᖓᓂ 1845-ᒥ ᐅᑭᐅᖅᑕᖅᑐᒃᑯᑦ ᐃᑳᕐᕕᒃᓴᖅᓯᐅᖅᖢᓂ ᑭᓯᐊᓂᓕ ᐊᔪᓕᕐᓂᕐᒪᑕ ᓯᑯᐊᓗᖕᒥ ᐊᒻᒪᓗ ᑭᕕᓐᓂᖅᖢᑎᒃ ᑕᒫᓂ. ᑕᐃᒪ ᑕᑯᒋᐅᕈᒪᔪᓄᑦ ᐳᓚᕋᖅᑕᐅᖃᑦᑕᕐᓂᐊᓕᖅᑐᑦ ᐅᕐᓱᖅᑑᒥᐅᓄᑦ ᐱᒃᑯᒥᒋᔭᐅᓗᐊᖅᐳᑦ ᐅᓄᖅᓯᕙᓪᓕᐊᓕᕐᒪᑕ ᑕᒪᐅᖓ ᓂᐅᕈᖃᑦᑕᖅᑐᑦ.
“ᐊᒃᓱᐊᓗᒃ ᖁᕕᐊᒋᔭᕗᑦ, ᑕᑯᔭᖅᑐᖅᑐᓄᑦ ᑎᑭᑕᐅᖃᑦᑕᕐᓂᐊᓕᕋᑦᑕ” ᐅᖃᕆᓪᓗᓂ ᓴᓚᕆᓇ, ᓇᓗᓇᕈᓐᓃᕐᒪᑦ ᓄᓇᓕᑦᑎᓐᓂ ᐱᖅᑯᓯᑐᖃᕐᓄᑦ ᐳᓚᕋᕐᕕᒃ ᐊᖏᒡᓕᒋᐊᖅᑕᐅᓂᐊᓕᕐᒪᑦ ᒪᕐᕈᐊᖅᑎᕐᓗᓂ ᒪᑐᐃᑦᑕᐅᓂᐊᖅᑐᖅ 2020-ᒥ. ᑕᑯᒃᓴᐅᑎᑦᑎᕕᐅᓗᓂ ᕗᕌᖕᑭᓚᓐ ᐅᒥᐊᕐᔪᐊᖏᓐᓂᒃ ᐃᑦᑕᕐᓂᑕᓂᒃ. “ᕿᓚᓈᕆᔭᖃᕋᑦᑕ ᑕᒪᐅᖓ ᓂᐅᕈᖃᑦᑕᖅᑐᑦ ᐅᓄᖅᓯᕚᓪᓕᕐᓂᐊᓕᕐᒪᑕ ᐊᖏᒡᓕᒋᐊᖅᑕᐅᓂᐊᑦᑐᑦ ᐳᓚᕋᖃᑦᑕᖅᑐᓂᒃ ᑲᒪᔪᑏᑦ ᓄᓇᓕᑦᑎᓐᓂ.”
ᐊᒥᓱᓂᒃ ᓱᓕᒃᑲᓐᓂᖅ ᑕᑯᒥᓇᖅᑐᖅᑕᖃᐅᕋᑦᑕ ᓄᓇᑦᑎᓐᓂ ᑭᓯᐊᓂᓕ ᐊᒃᓱᕉᑎᖃᓂᐊᖅᑐᒍᑦ ᑕᒪᑐᒪᓂ ᕗᕌᖕᑭᓚᓐ ᐅᒥᐊᕐᔪᐊᕕᓂᖏᓐᓂᒃ ᑕᑯᔭᖅᑐᖅᑐᓂᒃ ᑭᖑᓂᖓᒍᑦ ᐊᖏᕈᑎᓕᐅᕈᑕᐅᓯᒪᓕᖅᐸᑕ ᒥᕐᖑᐃᖅᓯᕕᓕᕆᔨᒃᑯᑦ ᑲᓇᑕᒥ ᐊᒻᒪᓗ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖓᓐᓄᑦ, ᓴᓇᕆᓇ ᐅᓂᒃᑳᕆᓪᓗᓂ.
ᑐᓴᕐᓇᖅᑐᑎᒍᑦ ᐅᓂᒃᑲᖅᖢᑎᒃᑕᐅᖅ, ᒐᕙᒪᑎᑐᖃᒃᑯᑦ ᑲᓇᑕᒥ ᐊᖏᓚᐅᖅᑐᑦ ᐃᓄᐃᑦ ᑕᒫᓂᕐᒥᐅᑦ ᐊᑐᕐᓂᖃᓪᓗᑐᕐᒪᑕ ᓇᓂᓯᓚᐅᖅᑐᓂᒃ ᐃᑲᔪᖅᖢᑎᒃ ᐅᒥᐊᕐᔪᐊᕕᓂᕐᓂᒃ HMS Erebus-ᒥᒃ 2014-ᒥ ᐊᒻᒪᓗ HMS Terror-ᒥᒃ 2016-ᒥ.
“ᑲᓇᑕᐅᑉ ᒐᕙᒪᖓᓄᑦ ᐃᓕᑕᕆᔭᐅᓯᒪᓕᕐᒪᑕ ᐊᑐᕐᓂᖃᓪᓗᑐᖅᑐᒥᒃ ᐃᑲᔪᖅᑕᐅᓚᐅᕐᓂᖏᓐᓄᑦ ᐃᓄᖕᓄᑦ ᓄᓇᕗᒥᐅᓄᑦ ᕿᓂᖅᑎᓪᓗᒋᑦ ᑖᒃᑯᓂᖓ, ᓄᓇᕗᑦ ᒐᕙᒪᖓᓄᑦ ᐊᒻᒪᓗ ᑕᒪᐃᓐᓄᑦ ᑕᑎᒌᒃᖢᑎᒃ ᐃᑲᔪᖅᑎᐅᓚᐅᖅᑐᓄᑦ ᕿᓂᖅᑐᓂᒃ ᓇᓂᓯᔪᓂᒃᓗ ᐅᒥᐊᕐᔪᐊᕕᓂᕐᓂᒃ HMS Erebus ᐊᒻᒪᓗ HMS Terror-ᒥᒃ. ᐱᓗᐊᖑᐊᖅᑐᒥᒃ, ᓇᓂᓯᓇᔭᓚᐅᖏᒻᒪᑕ ᓄᓇᓕᖕᒥᐅᓄᑦ ᐃᑲᔪᖅᑕᐅᓚᐅᖏᑉᐸᑕ, ᑕᒫᓂᕐᒥᐅᑦ ᖃᐅᔨᒪᔭᑐᖃᖏᑦ ᒪᓕᒃᑕᐅᓪᓗᑎᒃ ᓇᓂᔭᐅᓚᐅᕐᒪᑕ ᐊᒻᒪᓗ ᒫᓐᓇ ᕿᓂᕈᑎᓂᒃ ᐊᑐᖅᖢᑎᒃ ᐃᒪᐅᑉ ᐃᖅᑲᖓᓂ ᓇᒦᓪᓗᑐᕆᐊᖏᓐᓂᒃ ᓇᓗᓇᐃᔭᐃᔪᑎᖃᖅᖢᑎᒃ ᑎᒃᑯᐊᕈᔾᔭᐅᓪᓗᑎᒃ ᐃᑲᔪᖃᑎᒌᒃᖢᑎᒃ ᕿᓂᓚᐅᕐᒪᑕ ᐃᓄᐃᑦ ᓄᓇᕗᒥᐅᑦ ᖃᐅᔨᒪᔭᖏᓐᓂᒃ.” ᑕᐃᒪᓐᓇ ᑎᑎᕋᖅᓯᒪᓚᐅᖅᑐᖅ ᐅᓂᒃᑳᖓᓂ.
ᕗᕆᑦ ᐲᑐᓯᓐ, ᑕᒪᑐᒪᓂᐅᓂᖓᓂ ᐃᒃᓯᕙᐅᑕᕆᔭᐅᔪᖅ ᕗᕌᖕᑭᓚᓐ ᐅᒥᐊᕐᔪᐊᖏᓐᓂᒃ ᕿᓂᖅᑏᑦ ᑲᑎᒪᔨᕋᓛᖓᓂ ᐅᖃᓚᐅᕐᒥᔪᖅ, “ᑖᒃᑯᐊ ᐃᖓᓚᓯᒃᑯᓐᓂᑦ ᑐᓂᐅᓯᐊᕗᑦ (ᕗᕌᖕᑭᓚᓐ ᐅᒥᐊᕐᔪᐊᕕᓂᖏᑦ) ᑕᒪᐃᓐᓄᑦ ᑕᒫᓂᕐᒥᐅᓄᑦ ᐱᖁᑎᒋᔭᐅᓂᐊᓕᕐᒪᑦ ᑕᐃᓱᒪᓂᐊᓗᒃ ᓯᕗᕚᑦᑎᓐᓄᑦ ᐊᑐᖅᑕᐅᓂᑯᑦ ᐃᓄᖕᓄᑦ ᑲᓇᑕᒥᐅᓄᓪᓗ, ᑎᑎᕋᖅᓯᒪᖕᒪᑦ ᓄᓇᕗᑦ ᐊᖏᕈᑎᐊᓂ ᓄᓇᖁᑎᖏᑕ ᐃᓗᐊᓃᑦᑐᑦ ᐱᖁᑎᒋᖕᒪᒋᑦ. ᕿᓚᓈᕆᔭᕗᑦ ᐊᖏᕈᑎᒃᑯᑦ ᐱᓇᓱᐊᖃᑎᒋᑦᑎᐊᕐᓂᐊᓕᕋᑦᑎᒍ ᑲᓇᑕᒥ ᒥᕐᒍᐃᖅᓯᕕᓕᕆᔨᒃᑯᑦ ᓯᕗᓂᕆᓂᐊᖅᑕᑦᑎᓐᓂ ᐳᓚᕋᖅᑐᓕᕆᔪᑎᓂᒃ ᐊᐅᓚᑦᑎᔨᐅᓗᑎᒃ ᐅᒥᐊᕐᔪᐊᕕᓂᕐᓂᒃ ᑕᑯᔭᖅᑐᖅᑐᑦ HMS Erebus ᐊᒻᒪᓗ HMS Terror-ᒥᒃ ᐃᑦᑕᕐᓂᑕᒃᑯᕕᖕᓂᒃ ᐃᑲᔪᖃᑎᒌᖕᓂᐊᕐᒪᑕ ᓴᐳᔾᔨᓯᒪᓇᓱᐊᕐᓗᑎᒃ ᑖᒃᑯᓂᖓ ᐃᑦᑕᕐᓂᑕᓂᒃ ᐅᓂᒃᑲᖏᓐᓂᒃᓗ ᑕᒫᓂ ᖃᓄᐃᑉᐸᓚᐅᕈᓯᕐᓂᒃ.”
ᑲᓇᑕᒥ ᒥᕐᖑᐃᖅᓯᕕᓕᕆᔨᒃᑯᑦ ᑕᒫᓂ ᐃᒪᐅᑉ ᐃᖅᑲᖓᓄᑦ ᐊᖅᑲᐅᒪᑎᑦᑎᖃᑦᑕᖅᓯᒪᓕᖅᑐᑦ ᐅᒥᐊᕐᔪᐊᕕᓂᕐᓂᒃ ᑕᑯᔭᖅᑐᖅᑐᓂᒃ ᑕᒪᑐᒪᓂ ᐅᑭᐅᑦᑎᓐᓂ ᐱᒋᐊᓕᖅᑎᓪᓗᒍ ᐊᒻᒪᓗ ᓱᓕᒃᑲᓐᓂᖅ ᑕᐃᒪᐃᓕᐅᖃᖅᑕᕐᓂᐊᖅᖢᑎᒃ ᖃᐅᔨᓴᖅᑏᑦ ᐅᑭᐅᖑᓂᐊᖅᑐᒥ.