ᓄᒃᑎᕆᓂᖅ ᑕᐃᑉᓱᒪᓂᑐᖃᖅ ᐊᑐᖅᑕᐅᖃᑦᑕᖅᑐᑐᖃᐅᓕᖅᑐᖅ ᐃᓐᓇᑐᖃᐃᑦ ᐅᑉᓛᕈᒥᑕᖅᑎᑕᐅᓂᖏᑦ ᕿᑎᐊᓂ ᕼᐊᓕᑏᕐᓇᐅᓚᐅᖅᑐᑦ ᔭᓐᓄᐊᕆ ᐱᒋᐊᓕᓵᕐᓂᖓᓄᑦ ᖁᕕᐊᒋᔭᐅᓚᐅᖅᐳᖅ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓄᑦ ᑲᖏᖅᖠᓂᕐᒥ ᑕᒡᕙᓂ ᑕᖅᑭᒥ ᐊᑐᖅᑐᒥ.
ᑐᑭᒧᐊᒃᑎᑎᔨᖓᑦ ᒋᑉ ᖃᕐᓕᒃ ᐅᖃᓚᐅᖅᐳᖅ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᖏᑦ ᐸᕐᓇᒃᓯᒪᓚᐅᕋᓗᐊᕐᒪᑕ ᐅᑉᓛᕈᒥᑕᖅᑎᑦᓯᓂᕐᒧᑦ ᑎᓴᐱᕆ ᐱᒋᐊᓕᓵᖅᑎᓪᓗᒍ ᑕᐃᒪᖓᓂ ᑕᐃᒪᓐᓇᐃᖃᑦᑕᕐᒪᑕ, ᑭᓯᐊᓂ ᐋᓐᓂᐊᖅᑐᖃᓚᐅᕐᓂᖓᓄᑦ ᐱᓕᕆᔨᓂᒃ ᑐᖁᔪᖃᓚᐅᕐᓂᖓᓄᓪᓗ ᓄᓇᓕᖕᒥ, ᑭᖑᕙᕆᐊᖅᑕᐅᓚᐅᕐᒪᑦ ᐊᑯᓂᑲᓪᓚᒃ.
ᐅᖃᓚᐅᖅᖢᓂᓗ ᖃᐅᔨᒋᐊᓚᐅᖅᖢᓂ ᖃᓄᐃᓕᐅᕋᔭᕐᓂᖏᓐᓄᑦ ᐊᔾᔨᒌᖏᑦᑐᑦ ᕼᐊᓕᑏᕐᓇᐃᑦ ᐱᔾᔪᑎᒋᑉᓗᒋᑦ ᖃᓄᐃᓕᐅᕈᑎᒃᓴᐃᑦ ᑎᓴᐱᕆᒥ ᐱᓐᖑᐊᖅᑎᑕᐅᓚᐅᕐᒪᑕ, ᖃᑉᓯᑲᓪᓚᐃᑦ ᑎᒥᐅᒧᑦ ᐅᑉᓛᕈᒥᑕᖅᑎᑦᓯᒍᒪᓚᐅᕐᒪᑕ ᐃᓐᓇᑐᖃᓂᒃ, ᑕᐃᒪ ᐋᖅᑭᒋᐊᖅᑕᐅᒃᑲᓐᓂᓚᐅᖅᐳᖅ ᓄᑖᒧᑦ ᐊᕐᕌᒍᒧᑦ ᔭᓐᓄᐊᕆ 4-ᒧᑦ.
“ᐱᓕᕆᔨᖃᓚᐅᖅᐳᒍᑦ 25−ᓂᒃ ᐃᑲᔪᖅᑐᓂᒃ ᐃᓐᓇᑐᖃᓂᒃ ᐅᑉᓛᕈᒥᑕᖅᑎᑕᐅᓂᖏᓐᓄᑦ, ᑕᒡᕙᓂ ᑎᑎᕋᕐᕕᑉᑎᓐᓂ, ᑕᐃᒪᓐᓇ ᐊᑐᖃᑦᑕᓕᖅᖢᑎᒍ ᐅᑭᐅᓄᑦ ᐱᖓᓲᓯᒪᓕᖅᑐᓄᑦ,” ᐅᖃᓚᐅᖅᐳᖅ ᖃᕐᓕᒃ.
“ᓂᓐᓂᐅᓚᐅᕋᓗᐊᖅᖢᑕ, ᑭᓯᐊᓂ ᖃᓄᐃᓚᐅᖏᑉᐳᖅ ᐊᓂᒍᓚᐅᖅᐳᖅ 6 −ᓂᒃ ᐊᓪᓕᕋᐅᔭᓂᒃ ᐃᓕᓯᑉᓗᑕ ᑲᑎᑦᖢᒋᑦ ᐃᒃᓯᕙᐅᑕᖃᖅᖢᑎᒃ 60−ᓂᒃ ᑕᒪᕐᒥᒃ ᑕᑕᓚᐅᖅᐳᑦ ᐃᓐᓇᑐᖃᐃᑦ ᐅᑕᕿᖃᑦᑕᖅᖢᑎᒃ ᐃᒃᓯᕚᕐᓂᐊᖅᖢᑎᒃ.
“ᑕᐃᒪ 100-ᖑᔪᒃᓴᐅᔪᓂᒃ ᐃᓄᒃᑕᖃᓚᐅᖅᐳᖅ ᑎᑎᕋᕐᕕᑉᑎᓐᓂ ᐅᑉᓛᕈᒥᑕᖅᑎᑦᓯᑎᓪᓗᑕ.”
ᐅᑉᓛᕈᒥᑕᖅᑕᖏᑦ, ᐲᑭᓐ, ᓵᓯᔾᔨᔅ, ᒪᓐᓂᑦ, ᐸᑕᐃᑐᐃᑦ, ᐹᒃᑭᒃ, ᐃᒥᒐᑦ, ᑳᐱ ᐊᒻᒪ ᑏ.
ᖃᕐᓕᒃ ᐅᖃᓚᐅᖅᐳᖅ ᐃᓐᓇᑐᖃᐃᑦ ᖁᔭᓐᓇᒦᖃᑦᑕᖅᐳᑦ ᓂᕆᑎᑕᐅᓂᖏᓐᓄᑦ ᐃᓐᓇᑐᖃᐃᑦ ᐊᔾᔨᐅᖏᑦᑐᒥᒃ.
ᐅᖃᓚᐅᖅᐳᖅ ᓂᕆᑎᓪᓗᒋᑦ, ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᖏᑦ ᑕᓚᕕᓴᓂᒃ ᐋᖅᑭᒃᓯᓯᒪᑉᓗᑎᒃ ᓄᑕᐅᖏᑦᑐᓂᒃ ᑕᑯᒃᓴᐅᑎᑦᓯᑉᓗᑎᒃ ᑕᐃᑉᓱᒪᓂᑐᖃᒥᐅᓂᒃ.
“ᑲᖏᖅᖠᓂᖅ ᐃᓄᖃᓕᖅᐸᓪᓕᐊᓕᓵᖅᑎᓪᓗᒍ, ᐅᔭᕋᒃᑕᕆᐊᑦ ᑕᐃᑲᓃᑎᓪᓗᒋᑦ, ᐊᒻᒪ ᑕᐃᑉᓱᒪᓂᑐᖃᒥᐅᓂᒃ ᑕᕐᕆᔭᖅᑎᑕᐅᑉᓗᑎᒃ ᖁᕕᐊᒋᔭᐅᓚᐅᖅᖢᑎᒡᓗ ᐃᓐᓇᑐᖃᓄᑦ,” ᐅᖃᓚᐅᖅᐳᖅ.
“ᓴᒃᑯ ᑮᓇᐅᔭᓂᒃ ᐱᕈᖅᓴᐃᔨᑦ ᐊᒻᒪ M&T ᐃᑲᔪᓚᐅᖅᖢᑎᒃ ᐅᑉᓛᕈᒥᑕᕈᑎᓂᒃ, ᐊᑭᓕᖅᑐᖅᑕᐅᖏᑦᖢᑎᒡᓗ ᐃᑲᔪᖅᑐᑦ ᐸᓯᒃᑯᑦ ᐊᒡᔭᖅᑐᐃᔪᑦ ᐊᐃᒃᖠᖅᑐᓪᓗ ᑕᒡᕙᓂ ᐊᕐᕌᒍᒥ ᐊᑐᖅᑐᒥ, ᖁᕕᐊᓱᑦᓯᐊᓚᐅᖅᐳᑦ ᕼᐊᓕᑏᕐᓇᐅᑎᓪᓗᒍ ᖃᓄᐃᓕᐅᖅᑎᑕᐅᓂᕐᒧᑦ, ᑕᐃᒪᓐᓇ ᖁᕕᐊᒋᔭᐅᖏᓐᓇᖃᑦᑕᕐᓂᐊᖅᑐᒃᓴᐅᕗᖅ ᐊᑐᖅᑕᐅᓂᐊᖅᑐᖅ.”