ᐱᖃᓐᓇᕇᒃᑖᕇᓚᐅᖅᐳᑦ, ᐃᓕᖁᓯᒥᖕᓂᒡᓗ ᑭᐴᑎᖃᑦᑕᐅᑎᑉᓗᑎᒃ ᐃᖅᑲᐅᒪᒐᒃᓴᖃᓕᖅᖢᑎᒡᓗ ᐱᓐᖑᐊᖅᑎᑦ ᑲᖏᖅᖠᓂᕐᒥᐅᑦ ᐊᐅᓪᓛᓚᐅᖅᑎᓪᓗᒋᑦ Etobicoke, Ont.ᒧᑦ ᓴᓂᐊᓂ ᑐᕌᓐᑐᑉ ᐅᑭᐅᖅᑕᖅᑐᒥᐅᑦ ᑭᐴᑎᖃᑦᑕᐅᑎᑎᓪᓗᒋᑦ ᑖᒃᑯᐊᓗ Mimico Canadiens Hockey Association−ᑯᖏᑦ.
ᐃᖏᕐᕋᔭᖕᓂᖏᓐᓄᑦ ᑎᖕᒥᓲᒃᑰᕈᑎᖏᑦ ᐊᑭᓕᖅᑐᖅᑕᐅᓚᐅᖅᖢᑎᒃ Experiences Canadaᑯᓐᓄᑦ, ᐱᓐᖑᐊᖅᑎᑦ ᑮᓇᐅᔭᓂᒃ ᐱᕈᖅᓴᐃᓚᐅᖅᖢᑎᒃ, ᐊᑭᓕᐅᑎᒃᓴᓂᒃ ᐊᑐᖅᑕᐅᔪᓂᒃ ᐊᑭᓕᐅᑕᐅᒋᐊᖃᖅᑐᓄᓪᓗ.
ᑐᕌᓐᑐᒦᓐᓂᕐᒥᖕᓂ ᐊᒃᑐᐱᕆ 6-ᒥᑦ 16-ᒧᑦ, ᑲᖏᖅᖠᓂᕐᒥᐅᑦ ᕼᐋᑭᖅᑎᖏᑦ ᑕᑯᔭᖅᑐᓚᐅᖅᐳᑦ NHL ᐱᓐᖑᐊᕐᔪᐊᖅᑎᓪᓗᒋᑦ ᑕᐃᑲᓂ Air Canada Centre−ᒥ ᐊᒻᒪ ᑖᒃᑯᐊ ᒥᐳᓖᕝᑯᑦ ᐊᔪᖏᓴᖅᑎᓪᓗᒋᑦ ᑕᐃᑲᓂ Mastercard Centreᒥ, ᑕᑯᔭᖅᑐᖅᑎᑕᐅᑉᓗᑎᒡᓗ ᑕᐃᑲᓂ, ᑲᑎᑦᓯᑉᓗᑎᒡᓗ ᕼᐋᑭᖅᑎᕐᔪᐊᑦ ᑲᑎᖓᔪᓂᒃ ᐊᒻᒪ ᑕᐅᑐᒋᐊᖅᑐᖅᓯᒪᓚᐅᖅᖢᑎᒡᓗ , Hockey Night in Canada, ᐊᒻᒪ ᑕᑯᔭᖅᑐᓚᐅᖅᖢᑎᒃ ᑕᑯᔭᒐᖃᕐᕕᖕᒥᒃ Royal Ontario Museum, CN Tower, Hockey Hall of Fame ᐊᒻᒪᓗ Niagara Falls.
ᐊᒃᑐᐱᕆ 12-ᒥ ᐊᒥᓲᑎᒋᔪᑦ 700 ᐅᖓᑖᓄᑦ 15-ᓂᑦ ᐊᔾᔨᒌᖏᑦᑐᓂᒃ ᐃᓕᓐᓂᐊᕐᕕᖕᓂᑦ ᑕᐃᑲᓂ Etobicokeᒥ ᐱᖃᑎᖃᓕᓚᐅᖅᐳᑦ ᑲᖏᖅᖠᓂᕐᒥᐅᓂᒃ ᐱᓐᖑᐊᖅᑎᓂᒃ ᒥᐊᓂᖅᓯᔨᖏᓐᓂᒡᓗ ᑲᑎᒪᔭᖅᑐᖅᖢᑎᒃ John English Middle Schoolᒥ, ᐅᖃᓪᓚᒃᑐᖃᓚᐅᖅᖢᓂᓗ ᐃᓐᖏᖅᑐᖃᖅᓗᓂᓗ ᑲᓇᑕᒥᐅᑕᒥᒃ ᐃᓄᒃ ᐃᓐᖏᖅᑎ ᓲᓴᓐ ᐊᒡᓘᒃᑲᒃ.
ᑐᖏᓕᖓᓂ ᑭᐴᑎᖃᑦᑕᐅᑎᓂᐊᖅᐳᑦ ᑖᒃᑯᐊ Mimico ᕼᐋᑭᖅᑎᖏᑦ, ᐊᖓᔪᖄᖏᓪᓗ ᐊᒻᒪ ᐃᓕᓐᓂᐊᖅᑎᑎᔨᖏᑦ ᑲᖏᖅᖠᓂᕐᒧᖓᐅᓂᐊᖅᐳᑦ ᐄᐳᕈ 27-ᖑᓕᖅᐸᑦ.
ᕆᑦᓱ ᕘᐲᒃ ᐸᓂᒥᓂᒃ ᐱᖃᑎᖃᓚᐅᖅᐳᖅ, ᔩᑕᓐ, ᑐᕌᓐᑐᓕᐊᖅᑎᓪᓗᒍ ᐅᖃᓚᐅᖅᐳᕐᓗ ᖁᕕᐊᓇᑦᓯᐊᓚᐅᕐᓂᖓᓄᑦ.
ᐅᖃᓚᐅᖅᖢᓂᓗ ᑲᖏᖅᖠᓂᕐᒥ ᐱᓐᖑᐊᖅᑎᓄᑦ ᖁᕕᐊᓇᓚᐅᕐᓂᖓᓄᑦ, ᐊᒻᒪ ᑐᐸᒃᐹᓪᓕᒍᑕᐅᓚᐅᖅᖢᓂᓗ ᐊᒥᓱᓄᑦ ᐊᔾᔨᐅᖏᑦᑐᒥ ᓄᓇᒥ.
“ᕼᐋᑭᕐᓂᕐᒧᑦ ᐃᖏᕐᕋᔭᒍᑕᐅᑐᐃᓐᓇᓚᐅᖏᑉᐳᖅ ᐃᓕᖁᓯᑐᖃᓕᕆᓂᕐᒧᑦ ᐱᔾᔪᑎᖃᓚᐅᕐᒪᑦ,” ᐅᖃᓚᐅᖅᐳᖅ ᕘᐲᒃ, ᐊᒻᒪ ᓄᑕᖃᑦ “ᐅᐱᑦᓯᐊᓚᐅᕐᒪᑕ” ᓄᓇᓕᕐᔪᐊᒦᓚᐅᕐᒪᑕ.
“ᓄᑕᖃᑦ ᖁᔭᓐᓇᒦᑦᓯᐊᓚᐅᖅᐳᑦ. ᑕᐃᒪᓐᓇ ᐊᑭᓕᐅᑎᖃᖃᑦᑕᓚᐅᖅᐳᑦ $20-ᓂᒃ ᐊᑭᓕᐅᑎᖃᖅᐸᒃᖢᑎᒃ ᑐᓂᓯᕙᒃᖢᑎᒡᓗ ᐊᖏᕐᕋᖃᖏᑦᑐᓄᑦ ᑐᕌᓐᑐᒥ,” ᐅᖃᓚᐅᖅᐳᖅ ᕘᐲᒃ.
“ᐅᐱᓐᓇᑦᓯᐊᓚᐅᖅᐳᖅ ᑕᑯᑉᓗᒋᑦ, ᐊᒻᒪ ᕼᐋᑭᕐᓂᖅ ᐊᒻᒪ ᐃᓄᐃᑦ ᑲᑎᖓᓂᖏᑦ ᐊᒻᒪ ᑕᐃᒪᓐᓇ ᐅᐱᓐᓇᑦᓯᐊᓚᐅᖅᐳᖅ.”
ᑲᐃᔪ ᑕᑦᑐᐃᓂ ᐃᕐᓂᓂᓗ, ᓕᐊᒻ ᐱᖃᑎᒌᓚᐅᖅᐳᒃ.
ᐅᖃᓚᐅᖅᖢᓂᓗ ᐊᒥᓱᓄᑦ ᓄᑕᖃᓄᑦ ᐅᐱᓐᓇᑦᓯᐊᓚᐅᖅᖢᓂᓗ ᑲᖏᖅᖠᓂᕐᒥᐅᓄᑦ.
“ᓄᑕᖃᑦ ᐊᔾᔨᒌᖏᑦᑐᓂᒃ ᑕᑯᖃᑦᑕᓚᐅᖅᐳᑦ ᐃᓅᓯᕆᔭᐅᔪᓂᒃ ᖃᑉᓗᓈᑦ ᓄᓇᖓᓂ,” ᐅᖃᓚᐅᖅᐳᖅ ᑕᑦᑐᐃᓂ.
“ᓄᑕᖃᑦ ᑕᒪᒃᑯᐊ ᑖᒻᓴᒧᐊᓚᐅᖅᓯᒪᒐᓗᐊᖅᖢᑎᒃ ᕙᓂᐹᖕᒧᓪᓗ, ᑕᐃᒪᓐᓇ ᐊᖏᔪᒧᑦ ᓄᓇᓕᕐᔪᐊᒧᐊᓚᐅᖅᓯᒪᖏᑦᖢᑎᒃ. ᑕᑯᔭᖅᑐᐃᓂᖅ ᕼᐋᑭᖅᑎᕐᔪᐊᓂᒃ ᐱᒻᒪᕆᐅᓚᐅᖅᐳᖅ,
ᐊᒻᒪ ᓄᑕᖃᑦ ᓇᖓᓚᐅᖅᐳᑦ ᐊᒥᓲᓚᐅᕐᓂᖏᓐᓄᑦ ᑕᒪᒃᑯᐊ ᐃᑎᖅᐸᓪᓕᐊᔪᑦ Air Canada Centre−ᒧᑦ. ᑕᒪᓐᓇ ᐊᑐᖅᑕᐅᑉᓗᓂ ᐃᓚᖏᓐᓄᑦ ᐊᒃᓱᕈᕐᓇᓚᐅᖅᐳᖅ ᓄᑕᖃᓄᑦ ᐱᓱᑐᐃᓐᓇᕐᓗᓂ ᐅᐸᒃᑕᐅᓐᓇᖏᒻᒪᑦ ᕼᐋᑭᕐᕕᒃ ᑕᐃᒪᓐᓇᑎᑑᖏᑦᖢᓂ ᑲᖏᖅᖠᓂᕐᒥᑎᑐᑦ.”
ᑕᑦᑐᐃᓂ ᐅᖃᓚᐅᖅᐳᖅ ᐊᒥᓱᑦ ᑲᖏᖅᖠᓂᕐᒥᐅᑕᐃᑦ ᓄᑕᖃᑦ ᕼᐋᑭᖅᑎᕐᔪᐊᑦ ᐃᖅᑲᐅᒪᔭᐅᕕᖓᓐᓄᐊᖅᖢᑎᒃ ᐅᐱᑦᓯᐊᓚᐅᖅᐳᑦ.
“ᖁᕕᐊᓱᑦᓯᐊᓚᐅᖅᖢᑎᒃ ᖃᓄᐃᓕᐅᕈᑎᒋᓂᐊᖅᑕᒥᓂᒃ, ᑭᓯᐊᓂ ᕼᐋᑭᕐᔪᐊᖅᑎᑦ ᐃᖅᑲᐅᒪᔭᐅᕕᖓᓂ ᐅᐱᒋᔭᐅᓛᖑᓚᐅᖅᐳᖅ ᐊᒥᓱᓄᑦ,” ᐅᖃᓚᐅᖅᐳᖅ. ᓄᑕᖃᑦ ᐅᐱᖃᑕᐅᓚᐅᖅᐳᑦ ᐃᑎᖅᑎᑦᓯᓇᓱᐊᕈᑎᒥᒃ, ᐃᑎᖅᑎᑦᓯᓇᓱᐊᖅᖢᑎᒃ ᕼᐋᑭᖅᑎᕐᔪᐊᓄᑦ ᒎᓕᒧᑦ, ᓄᖅᑲᖅᑎᑦᓯᓇᓱᐊᖅᖢᑎᒡᓗ ᑖᒃᑯᓂᖓ Nazem Kadri ᐊᒻᒪ Shea Weber.
“ᑕᒪᕐᒥᒃ ᓄᑕᖃᑦ ᑕᑯᒍᒪᓪᓚᕆᓚᐅᖅᐳᑦ ᑖᒃᑯᓂᖓ, ᒪᕐᕈᐃᖅᑕᒻᒪᕆᒃᖢᑎᒃ ᐃᓚᖏᑦ ᑕᐅᒋᐊᖅᑐᓚᐅᖅᖢᑎᒃ,” ᐅᖃᓚᐅᖅᐳᖅ ᑕᑦᑐᐃᓂ.
“ᑕᐃᑲᓃᓐᓂᑉᑎᓐᓂ, ᓄᑕᖃᑦ ᑲᖏᖅᖠᓂᕐᒥᐅᑕᐃᑦ ᐊᒻᒪ ᒥᒥᑯᒥᐅᑕᐃᑦ ᖁᕕᐊᓱᖃᑎᒌᑦᓯᐊᓚᐅᖅᐳᑦ, ᐊᒻᒪ ᒥᒥᑯᒥᐅᑕᐃᑦ ᑲᖏᖅᖠᓂᕐᒧᐊᕈᒪᑦᓯᐊᖅᐳᑦ.”
ᐋᑕᒻᑯᓐᓂ ᐃᓕᓐᓂᐊᖅᑎᑎᔨ ᕼᐋᑭᖅᑎᖏᓐᓄᑦ ᑮᑎ ᐱᐊᓪ ᑕᐃᒪᓐᓇᐃᓕᐅᖅᑎᑦᓯᒋᐊᓕᓚᐅᖅᐳᑦ ᐊᕐᕌᒎᓚᐅᖅᑐᒥ ᑕᐃᒪᓐᓇ ᐃᓚᖏᓐᓄᑦ ᓄᑕᖃᓄᑦ ᐊᑐᖅᑕᐅᓚᐅᖅᓯᒪᖏᑉᐳᖅ ᐃᓐᓇᕐᓄᓪᓗ ᐱᖃᑎᒋᔭᐅᓚᐅᖅᑐᓄᑦ.
“ᐃᓚᖏᑦ ᐃᓕᖁᓯᑐᖃᓕᕆᒍᑎᑦ ᐊᑐᖅᑕᐅᔪᓪᓗ ᐅᑉᓗᑕᒫᑦ ᐊᑐᖅᑕᐅᖃᑦᑕᓚᐅᖅᐳᑦ, ᐃᓕᑉᐹᓪᓕᕈᑎᖃᖅᑎᑕᐅᑉᓗᑎᒡᓗ ᐃᖕᒥᒃᑯᑦ,” ᐅᖃᓚᐅᖅᐳᖅ.
“ᕼᐋᑭᕐᓂᕐᒧᑦ ᐱᒋᐊᕈᑎᖃᓚᐅᖅᐳᒍᑦ ᑕᐃᒪᓐᓇ ᑭᐴᑎᖃᑦᑕᐅᑎᖃᑦᑕᕐᓂᕐᒥᒃ, ᑭᓯᐊᓂ ᐱᓐᖑᐊᕈᑎᕗᑦ ᕼᐋᑭᕈᑎᒋᓂᐊᖅᑕᕗᑦ ᐃᓱᒪᒋᔭᐅᓚᐅᖏᑉᐳᑦ ᐊᐅᓪᓚᖅᓯᒪᑎᓪᓗᑕ. ᓄᑕᖃᑦ ᐱᓐᖑᐊᖃᑎᖃᕈᒪᔪᑦ ᐱᖃᓐᓇᖅᑖᓵᒥᓂᒃ. ᖁᕕᐊᓱᖃᑎᒌᑦᓯᐊᑐᐃᓐᓇᖅᖢᑎᒃ.”
ᐱᐊᓪ ᐅᖃᓚᐅᖅᐳᖅ ᑲᖏᖅᖠᓂᕐᒥᐅᑦ ᐊᐅᓪᓚᖅᐸᓪᓕᐊᓂᐊᓕᖅᑎᓪᓗᒋᑦ ᖁᒡᕕᐅᑲᑕᒃᑐᖃᓚᐅᖅᐳᖅ.
ᐅᖃᓚᐅᖅᖢᓂᓗ ᑕᐃᒪᓐᓇ ᑲᖏᖅᖠᓂᕐᒥᐅᑦ ᐅᐱᓐᓇᖅᑐᓕᕆᒋᐊᖃᕐᓂᐊᖅᐳᑦ ᑎᑭᑕᐅᓯᒪᓕᖅᐸᑕ ᐄᐳᕈᖑᓂᐊᖅᑐᒥ.
“ᓄᓇᓕᖕᓂᑦ ᐃᑲᔪᖅᑕᐅᓚᐅᖏᒃᑲᓗᐊᖅᐳᖓ ᑕᐃᒪᓐᓇ ᐱᒋᐊᕈᑎᒋᑉᓗᒍ, ᑕᐃᒪ ᐃᓱᒫᓗᒍᑎᖃᓚᐅᖅᐳᖓ ᑐᕌᓐᑐᒥᐅᓂᒃ ᓄᑕᖃᓂᒃ ᑎᑭᑎᑦᓯᓂᕐᒥᒃ ᓄᓇᕗᒧᑦ ᐃᑲᔪᖅᑐᖅᑕᐅᖏᒃᑯᑉᑕᓗ ᑕᐃᒪᓐᓇᐃᓕᐅᕈᓐᓇᓚᐅᖏᓐᓇᑉᑕ,” ᐅᖃᓚᐅᖅᐳᖅ.
“ᑭᓯᐊᓂ ᓄᑕᖃᑦ ᑐᕌᓐᑐᒧᐊᖅᓯᒪᓕᖅᖢᑎᒃ, ᖃᓄᐃᓕᐅᕈᑎᖃᖃᑕᐅᓕᖅᖢᑎᒡᓗ, ᑕᒪᕐᒥᒃ ᐃᓄᐃᑦ ᑐᑭᓯᕙᓪᓕᐊᓕᓚᐅᖅᐳᑦ ᓄᑕᖃᒥᓂᒡᓗ ᐊᐅᓪᓚᖅᑎᑦᓯᖃᑕᐅᒍᒪᑉᓗᑎᒃ. ᖃᓄᐃᒋᖏᓐᓂᖅᓴᐅᓕᖅᐸᒃᑲ ᑲᖏᖅᖠᓂᕐᒧᐊᕐᓂᐊᖅᑎᓪᓗᒋᑦ, ᖃᐅᔨᒪᓂᖅᓴᐅᑉᓗᖓᓗ ᓄᓇᓕᖕᓂᒥᐅᑦ ᐃᑲᔪᕐᓂᐊᕐᒪᑕ ᓄᑕᖃᓂᒃ ᑎᑭᓯᒪᑎᓪᓗᒋᑦ ᐸᕐᓇᐃᖃᑕᐅᓗᑎᒃ ᖁᕕᐊᓱᒃᑎᑕᐅᖁᑉᓗᒋᑦ ᑐᕌᓐᑐᒥᐅᑦ ᕼᐋᑭᖅᑎᑦ.”