ᓲᓴᓐ ᐊᒡᓘᒃᑲᖅ ᖁᕝᕕᐅᖅᑎᑦᑎᓚᐅᖅᐳᖅ ᐊᒥᓱᓄᑦ, ᐃᓚᖃᖅᑐᒥ ᑲᒥᓴᓇᐅᔪᒥ ᖃᔮᖅ ᕌᐱᓐᓯᓐᒧᑦ, ᑐᓂᓯᑎᓪᓗᒍ ᑭᖑᓪᓕᖅᐹᖑᔪᒥ ᐅᓂᒃᑲᐅᓯᐅᔪᓄᑦ ᑲᓇᑕᒥ ᓱᓕᔪᓂᒃ ᖃᐅᔨᓇᓱᐊᕐᓂᕐᒧᑦ ᐊᓯᐅᖅᑲᔪᓄᑦ ᐊᒻᒪ ᐃᓄᐊᖅᑕᐅᓯᒪᔪᓄᑦ ᓄᓇᖃᖅᑳᖅᓯᒪᔪᓄᑦ ᐊᕐᓇᓄᑦ ᓂᕕᐊᖅᓵᓄᓪᓗ ᓄᖅᑲᓚᐅᖅᑎᓪᓗᒍ ᑲᖏᖅᖠᓂᕐᒧᑦ ᐱᓇᓱᐊᕈᓯᐅᓚᐅᖅᑐᒥ.
ᓱᓕᔪᓂᒃ ᖃᐅᔨᓇᓱᐊᕐᓂᕐᒧᑦ ᑐᓵᓚᐅᖅᐳᑦ ᖁᓕᓂᑦ ᐃᓄᖕᓂᑦ ᐅᓪᓗᓂ ᐱᖓᓱᓂᑦ ᓯᓂᒃᑕᕐᕕᒃ ᑐᔪᕐᒥᕕᖓᓐᓂ ᕕᕈᐊᕆ 20-22−ᒧᑦ.
ᑐᓴᐅᒪᓇᒐᓚᒃᓯᓚᐅᖅᐳᖅ ᑲᖏᖅᖠᓂᕐᒥ ᐊᒡᓘᒃᑲᖅ ᐸᕐᓇᒃᐸᓪᓕᐊᓂᖓᓂ ᐃᓄᓕᒫᓄᑦ ᐊᑦᑎᖅᓯᓂᐊᕐᓂᖓᓂ ᐃᓄᖕᒥ ᐃᒻᒥᓄᑦ ᖁᓄᔪᓐᓂᐊᖅᐸᓚᐅᖅᑐᒥᑦ ᓱᕈᓯᐅᑎᓪᓗᒍ ᓯᕗᓪᓕᖅᐹᑦᑎᐊᒥ ᐅᓂᒃᑲᐅᓯᐅᔪᓄᑦ.
ᐊᒥᓱᓂ ᖃᓄᐃᓐᓂᐅᔪᓂ, ᐃᒻᒥᓂᒃ−ᑭᓇᐅᓂᖓᓂ ᐅᖃᐅᓯᖃᕐᓂᖓᓂ ᓱᓕᔪᓂᒃ ᖃᐅᔨᓇᓱᐊᕐᓂᕐᒧᑦ ᑲᑎᒪᔨᐅᔪᓄᑦ, "ᓲᓴᓐ ᐊᒡᓘᒃᑲᐅᕗᖓ," ᐋᖅᑭᒃᓯᓚᐅᖅᐳᖅ ᓂᐱᑭᒃᑲᓗᐊᖅᖢᓂ, ᑭᓯᐊᓂ ᓴᙱᓪᓗᓂ ᓂᐱᖃᖅᑐᒥ ᐅᓂᒃᑲᐅᓯᐅᔪᒧᑦ ᑎᑭᓐᓂᐊᖅᑐᒧᑦ. ᑕᒪᓐᓇ, ᐃᓅᔪᒧᑦ ᐊᒃᓱᕈᕐᔪᐊᖅᓯᒪᔪᒥ ᖃᐅᒪᓂᖓᓂ ᓴᖅᑭᔮᖅᑎᑦᑎᓇᓱᐊᕐᓂᕐᒧᑦ ᓄᓇᕐᔪᐊᒧᑦ ᑕᑯᔭᐅᓂᕐᒧᑦ, ᑕᐃᒪᙵᓕᒫᖅ ᐊᒃᓱᕉᓴᒃᖢᓂ ᑎᑭᐅᑎᓇᓱᐊᕐᓂᕐᒧᑦ ᐅᓇᑕᖅᑕᐅᓪᓗᓂ ᐊᓯᐅᔨᓂᖓᓄᑦ ᓄᑕᕋᐅᔾᔪᓯᖓᓐᓂ 8−ᓂ ᐅᑭᐅᖃᖅᑎᓪᓗᒍ ᓱᕈᓯᐅᓪᓗᓂ, ᐊᒻᒪᓗ ᓱᓕᒃᑲᓐᓂᖅ, ᒪᓕᒐᓕᕆᓂᕐᒧᑦ ᐱᓕᕆᔾᔪᓯᐅᔪᒥ ᐊᑯᓂᐅᓂᖅᓴᐅᔪᒥ ᐃᖅᑲᖅᑐᐃᓂᖃᕋᓱᐊᕐᓂᖏᓐᓄᑦ ᐊᖑᒻᒥ ᐱᓕᕆᔪᕕᓂᕐᒥᑦ ᐊᑯᓂᐅᓂᖓᓂ ᐃᓱᒪᒃᓴᖅᓯᐅᕆᓂᐅᔪᒥ ᑎᒍᔭᐅᓂᖓᓄᑦ ᖁᓄᔪᕐᓂᐊᕐᓂᖏᓐᓄᑦ ᐱᓕᕆᐊᕆᕙᒃᑕᒥᓄᑦ.
ᓄᓇᕐᔪᐊᒥ ᓂᐱᓕᐅᕆᔨᐅᔪᖅ ᐃᙱᖅᑎ ᑭᐅᓱᙳᓚᐅᖅᐳᖅ ᐊᒻᒪ ᐃᒻᒥᓂᒃ ᑕᑯᒃᓴᐅᑎᑦᑎᓪᓗᓂ ᐅᖃᓪᓚᒃᑎᓪᓗᒍ. ᐅᖃᐅᓯᖃᒐᔪᓚᐅᖅᐳᖅ ᐸᖅᑭᓂᐅᔪᓂ ᐊᒻᒪ ᐃᓱᒫᓘᑎᒥᓂᑦ ᐊᓯᖏᓐᓄᑦ ᓱᕈᓯᕐᓄᑦ ᐅᒃᐱᕆᔭᖓᓐᓂ ᐱᕋᔭᒃᑕᐅᓂᑰᓇᓱᒋᓪᓗᓂᒋᑦ ᑕᐃᔅᓱᒥᑦᑕᐃᓐᓇᖅ ᐊᖑᒻᒧᑦ ᐱᔾᔪᑎᓪᓗᐊᑕᕆᓪᓗᓂᐅᒃ ᐅᖃᐅᓯᖃᕐᓂᖓᓄᑦ ᑕᒪᑐᒪᙵᑦ, ᐅᖃᐅᑎᓪᓗᓂᒋᑦ ᓱᓕᔪᓂᒃ ᖃᐅᔨᓇᓱᐊᕐᓂᕐᒧᑦ ᑖᓐᓇ ᐃᒡᓗᕈᓯᖅ ᑕᑖᕈᓐᓇᖅᐳᖅ ᐱᕋᔭᒃᑕᐅᓂᑰᔪᓂ ᐃᒻᒥᓂᒃ ᖁᓄᔪᕐᓂᐊᖅᓯᕙᓚᐅᖅᑐᒧᑐᐊᖅ.
ᐱᒋᐊᕐᓂᖓᓂ ᐊᒡᓘᒃᑲᐅᑉ ᐅᓂᒃᑲᐅᓯᐅᔪᓄᑦ ᓂᐱᑭᖦᖢᓂ ᐅᖃᓪᓚᖕᓂᐅᓚᐅᖅᐳᖅ ᐊᒻᒪᓗ ᓇᓗᓇᐃᖅᑕᐅᒃᑲᓐᓂᖅᐸᒃᖢᓂ ᖁᕝᕕᐅᖅᑐᒥ ᐅᓗᐊᖓᒍᑦ. ᑭᓯᐊᓂ ᑕᑯᔪᓐᓇᕋᔭᓚᐅᙱᑦᑐᑎᑦ ᓴᙱᓂᐅᔪᒥ, ᑲᑉᐱᐊᓱᙱᓐᓂᐅᔪᒥ ᐊᒻᒪ ᐊᒃᓱᕈᕐᓂᐅᔪᒥ ᑐᑭᓯᓇᓛᖑᔪᒥ ᐊᖅᑯᓵᓚᐅᖅᑐᒥ ᐊᒡᓘᒃᑲᐅᑉ ᑮᓇᖓᓂ ᓯᕗᒻᒧᑦ ᐃᔨᒋᑦᑎᐊᖅᖢᓂ, ᓲᕐᓗ ᖁᓄᔪᕐᓂᐊᖅᐸᓚᐅᖅᑐᖅ ᓵᙵᓪᓗᓂᐅᒃ, ᐊᒻᒪ ᐅᖃᖅᖢᓂ:
"ᓄᐊᒪᓐ ᕗᐊᑦ, ᓵᓚᒃᓴᙱᑦᑐᑎᑦ. ᒫᓐᓇᐅᙱᑦᑐᖅ, ᖃᖓᑐᐃᓐᓇᐅᙱᑦᑐᖅ. ᒫᓐᓇ ᓄᓇᓕᐅᔪᖅ ᖃᐅᔨᒪᓕᖅᐳᖅ ᖃᓄᐃᓕᐅᕐᓂᕆᓚᐅᖅᑕᕐᓂᑦ."
ᐊᒡᓘᒃᑲᖅ, 51, ᐃᖅᑲᐃᓚᐅᖅᐳᖅ ᐱᒋᐊᕐᓂᖓᓂ ᐃᓅᓯᓕᒫᖓᓐᓂ ᓯᓐᓇᒃᑐᕐᓘᑕᐅᔪᒥ. ᐸᐃᕆᓪᓗᓂ ᓱᕈᓯᐅᑎᓪᓗᒍ ᐊᖓᔪᒌᒃ ᐅᖃᓘᑎ ᓯᕙᓂᕐᒪᑦ ᐊᒻᒪ ᕗᐊᑦ, ᐸᖃᓐᓇᕆᔭᐅᔪᑦ ᐃᓚᖏᓐᓂᑦ ᑕᐃᔅᓱᒪᓂ ᐃᒡᓗᖃᓚᐅᖅᑐᒥ ᐊᖅᑯᑎᐅᑉ ᐊᑭᓪᓗᐊᖓᓂ ᐃᒡᓗᖓᓐᓂᑦ ᑲᖏᖅᖠᓂᕐᒥ, ᐊᖏᕐᕋᖓᓄᑦ ᖃᐃᖁᔨᓚᐅᖅᐳᖅ ᑐᓂᓯᓂᐊᕐᓂᕋᖅᖢᓂ ᖁᕕᐊᓲᑎᓂᒃ ᐊᖓᔪᖅᑳᖏᓐᓄᑦ.
ᐃᓯᕋᒥ, ᑐᕌᖅᑎᑕᐅᓪᓗᓂ ᐃᒡᓗᕈᓯᕐᒧᑦ, ᐅᖃᐅᔾᔭᐅᒐᒥ ᖁᕕᐊᓲᓯᐊᖑᔪᑦ ᐃᓗᐊᓃᓐᓂᖓᓐᓂ. ᐃᒡᓗᕈᓯᕐᒧᐊᕐᒪᑕ, ᐹ ᑮᖕᓂᖓ ᓂᐱᐅᓚᐅᖅᐳᖅ ᓱᓕ ᒫᓐᓇᒧᑦ ᑲᑉᐱᓲᑎᒋᓲᕆᕙᖓ ᒫᓐᓇᒧᑦ ᑎᑭᖦᖢᓂ.
ᐊᒡᓘᒃᑲᖅ ᐅᖃᓚᐅᖅᐳᖅ ᑭᖑᕙᕆᐊᕈᑕᐅᔪᓄᑦ, ᐊᕐᕌᒍᓕᒫᐸᓗᖕᒥ ᐃᖅᑲᖅᑐᖅᑕᐅᓂᖃᓕᑕᐃᓐᓇᓚᐅᖅᐳᖅ, ᐊᒻᒪᓗ ᐅᓂᒃᑲᐅᓯᐅᔪᓄᑦ ᐊᒡᓘᒃᑲᕐᒧᑦ ᐊᓯᖏᓐᓂᓪᓗ, ᕗᐊᑦ ᐃᖅᑲᖅᑐᖅᑕᐅᓚᐅᖅᐳᖅ ᑕᖅᑭᓄᑦ 18 ᑎᒍᔭᐅᓯᒪᓂᐅᔪᒧᑦ, ᐊᓄᓪᓚᒃᓯᖅᖢᓂ ᑕᖅᑭᓄᑦ 6−ᓄᑦ.
ᐃᓱᓕᑦᑎᓚᐅᖅᐳᖅ ᐅᓂᒃᑲᐅᓯᐅᔪᓄᑦ ᑎᒃᑯᐊᖅᑎᕆᓪᓗᓂ ᖃᔅᓯᒐᓚᖕᓂ ᐊᑲᐅᙱᓕᐅᕈᑕᐅᔪᓂᑦ ᐊᒻᒪ ᓴᓇᓪᓗᓂ ᖃᔅᓯᒐᓚᖕᓂ ᐊᑐᖁᔭᐅᓇᔭᖅᑕᒥᓂᑦ ᓱᓕᔪᓂᒃ ᖃᐅᔨᓇᓱᐊᕐᓂᕐᒧᑦ ᑲᑎᒪᔨᐅᔪᓄᑦ.
"ᖃᔅᓯᐊᕐᔪᖕᓂ ᐊᑐᓕᖁᔭᐅᑎᑦᑎᖁᔨᓇᔭᖅᐳᖓ ᐊᒻᒪᓗ ᓯᕗᓪᓕᐅᔪᖅ ᐃᓕᖅᑯᓯᒧᑦ−ᑐᕌᖓᔪᒥ ᐅᕝᕙᓘᓐᓃᑦ ᐊᑑᑎᓕᖕᒥ ᐃᑲᔪᖅᓱᐃᓂᕐᒧᑦ ᐱᓕᕆᔾᔪᓯᐅᔪᒥ ᐱᕋᔭᒃᑕᐅᓂᑯᓄᑦ," ᐅᖃᓚᐅᖅᐳᖅ ᐊᒡᓘᒃᑲᖅ.
"ᐱᐅᔪᒻᒪᕆᐊᓗᖕᒥ ᒪᒥᓴᕐᕕᖃᖅᐳᒍᑦ ᐅᕙᓂ, ᐊᒻᒪᓗ ᑲᒪᓇᖅᑐᐊᓗᖕᒥ ᐱᓕᕆᓂᖃᖅᐳᑦ ᐊᓄᓪᓚᒃᓯᖅᑐᓄᑦ, ᑭᓯᐊᓂ ᑭᓱᑕᖃᕐᓇᓂ ᐱᕋᔭᒃᑕᐅᕙᒃᑐᓄᑦ. ᓇᒧᙵᐅᓲᖑᕙᓪᓕ ᐃᑲᔪᖅᓯᖅᑕᐅᓂᕐᓄᑦ ᐱᓕᕆᐊᖑᔪᓂ?
"ᐊᑐᓂ ᐋᓐᓂᖅᓯᕆᔨᐅᔪᒧᑦ, ᑕᓪᓕᒪᓪᓗᐊᓂ ᐱᕋᔭᒃᑕᐅᔪᖃᖅᓯᒪᓲᖑᕗᖅ. ᑮᓇᐅᔭᓂ ᑐᖅᑯᐃᔭᕆᐊᖃᓕᖅᐳᒍᑦ ᐊᔾᔨᐸᓗᐊᓂ ᐃᒡᓗᕐᔪᐊᓂᑦ ᐱᓕᕆᐊᓂᖃᕐᓗᑎᒃ ᐊᒻᒪᓗ ᐱᓕᕆᔨᒻᒪᕆᐅᔪᓄᑦ ᐃᑲᔪᖅᑕᐅᓂᕐᒥ ᐱᕋᔭᒃᑕᐅᓯᒪᔪᓄᑦ.
"ᒪᒥᓴᕐᕕᖃᒃᑲᓐᓂᕆᐊᖃᖅᑐᒍᑦ. ᐊᑐᓂ ᐊᕕᒃᑐᖅᓯᒪᓂᐅᔪᑦ ᐱᖃᓪᓗᐊᖅᐳᑦ. ᑭᓯᐊᓂ, ᐱᔭᕆᐊᖃᕆᕗᒍᑦ ᐱᕋᔭᒃᑕᐅᕙᒃᑐᓄᑦᑕᐅᖅ.”
ᐊᒡᓘᒃᑲᖅ ᐅᖃᓚᐅᕆᕗᖅ ᐊᖏᕐᔪᐊᖅᑐᒥ ᐊᓯᔾᔨᖅᑕᐅᔭᕆᐊᖃᕐᓂᐅᔪᒥ ᐃᖅᑲᖅᑐᒐᒃᓴᒥ ᖃᐅᔨᓴᖅᑕᐅᕙᖕᓂᖓᓂ.
ᐅᖃᓚᐅᖅᐳᖅ ᐃᓄᐃᑦ ᐃᓅᓯᖃᖅᐳᑦ ᑲᒪᓇᖅᑐᐊᓗᖕᒥ ᐊᒻᒪ ᐊᔾᔨᐅᙱᑦᑐᐊᓗᖕᒥ ᐊᕙᑎᐅᔪᒥ ᓄᓇᕗᒻᒥ, ᑭᓯᐊᓂ ᐃᓅᓯᖅ ᐅᕙᓂ ᐊᔾᔨᐅᙱᓚᖅ, ᐱᓗᐊᖅᑐᒥ ᐃᓄᐃᑦ ᐱᓕᕆᖃᑎᒌᖕᓂᖏᓐᓂᑦ ᐱᕋᔭᐅᔪᒧᑦ ᐊᒻᒪᓗ ᐱᕋᔭᒃᑕᐅᓯᒪᔪᓄᑦ .
"ᖃᓄᖅ ᐊᐴᑎᓲᖑᓂᑦᑎᓐᓂ ᖃᐅᔨᓴᕐᓂᐅᔪᓂᑦ ᐊᒻᒪ ᐅᖃᐅᓯᒃᓴᓂᑦ ᑲᑎᖅᓱᐃᓂᕐᓄᑦ ᐃᓄᖕᓄᑦ ᓄᓇᓕᖕᓄᑦ ᐊᑑᑎᖃᕆᐊᖃᖅᐳᖅ. ᐱᖃᕆᐊᖃᕆᕗᒍᑦ, ᐃᓚᒋᔭᐅᓗᓂ ᖃᐅᔨᓴᕐᓂᐅᔪᒥ ᐱᓕᕆᓂᐅᔪᒥ, ᐅᖃᐅᔾᔨᔨᐅᔪᓂ ᑲᑎᙵᓂᐅᔪᒥ ᓄᓇᓕᖕᓂ ᑐᓂᓯᓂᕐᒧᑦ ᓈᒻᒪᒃᑐᒥ ᐃᓚᒌᓄᑦ ᖃᓄᐃᑉᐸᓚᐅᕐᓂᖏᓐᓂ. ᖃᐅᔨᒪᓂᕐᒥ ᐃᓚᒌᖑᔪᓂᑦ ᐃᑲᔪᕐᓂᖃᖅᐳᖅ.
"ᐅᖃᓪᓚᒍᑎᖃᖅᑎᓪᓗᑕ ᐃᓱᒪᒋᔪᓐᓃᖃᑎᒌᖕᓂᕐᒥᑦ, ᐊᒻᒪᓗ ᖃᐅᔨᒪᓪᓗᑕ ᐊᒥᓱᐊᓗᖕᓂ ᑲᑎᙵᓂᐅᖃᑕᐅᔪᓂ ᐱᕋᔭᒃᑕᐅᖃᑦᑕᖅᓯᒪᔪᓂ ᐊᒻᒪ ᐋᓂᖅᓯᕆᔨᐅᔪᓄᑦ, ᑕᐃᒪᐃᕐᔪᐊᖅᐳᖅ, ᐃᓚᓪᓚᕆᒧᑦ ᓄᓕᐊᕐᓂᖅ, ᐊᒻᒪᓗ ᐊᒥᓱᐊᓗᖕᓂ ᐋᓐᓂᖅᓯᕆᔨᐅᔪᓂᑦ, ᐃᒻᒥᖕᓂᑦᑕᐅᖅ, ᐱᕋᔭᒃᑕᐅᓂᑰᒋᕗᑦ ᖃᓄᐃᑦᑐᑐᐃᓐᓈᓗᖕᓂ ᐋᓐᓂᖅᓯᕆᓂᐅᔪᓄᑦ.
"ᐋᖅᑭᒃᓱᐃᔭᕆᐊᖃᖅᐳᒍᑦ ᐊᑯᓂᐅᓂᐅᔪᒥ – ᖃᐅᔨᒪᙱᓚᖓ ᖃᓄᖅ ᑕᐃᔭᐅᓂᖓᓂ – ᐋᓐᓂᖅᓯᕆᔨᐅᔪᖅ ᑕᑯᒃᓴᐅᑎᑦᑎᒍᓂ ᐱᔪᒪᓂᕐᒥ ᒪᒥᓴᕐᓂᕐᒧᑦ ᐊᒻᒪᓗ, ᐊᔪᕐᓇᕋᓗᐊᖅᑎᓪᓗᒍ ᐅᖃᕆᐊᒃᓴᖅ, ᑐᓂᓯᔭᕆᐊᖃᕐᓂᐊᖅᐳᒍᑦ ᐱᕕᒃᓴᖃᖅᑎᑦᑎᓂᐅᔪᒥ ᐃᒻᒥᖕᓂᒃ ᐱᕕᒃᓴᖃᕐᓂᐊᕐᒪᑕ ᒪᒥᓴᕐᓂᕐᒧᑦ ᐊᒻᒪᓗ ᐅᒃᑯᐊᖅᓯᓂᖃᕈᓐᓇᕐᓗᑎᒃ.
"ᑭᓯᐊᓂ, ᑕᒪᓐᓇ ᐅᖃᖅᖢᒍ, ᓱᕈᓯᓂᑦ ᐱᓕᕆᐊᖃᓲᑦ ᒪᒥᓴᓲᖑᙱᓚᑦ. ᐊᓯᔾᔨᖅᐸᙱᑦᑐᑦ. ᕿᓂᖅᓴᖅᑎᐊᓗᐃᑦ ᕿᓂᖅᓴᖅᑎᐅᙱᓐᓇᐅᔭᕐᓂᐊᖅᐳᑦ. ᑐᑭᓯᓇᑦᑎᐊᖅᑐᒥ ᓇᓗᓇᐃᒃᑯᑕᖅᑕᖃᕆᐊᖃᖅᐳᖅ ᑕᐃᒃᑯᓄᖓ ᐱᔪᒪᓂᖃᖅᑐᒥ ᒪᒥᓴᕐᓂᕐᒧᑦ ᐊᒻᒪᓗ ᑕᐃᒃᑯᓄᖓ ᖃᐅᔨᒪᔭᑦᑎᓐᓂ ᑕᐃᒪᐃᔾᔮᙱᑦᑐᓄᑦ."