ᑕᒪᒃᑯᐊ ᐅᖃᓕᒫᖃᑦᑕᖅᑐᓄᑦ ᐱᕙᓪᓕᐊᔪᓂᒃ, ᐅᒃᐱᕐᓇᖏᒻᒪᕆᒃᐳᖅ ᐱᓇᓱᐊᕈᓯᒃ ᒪᕐᕉᖏᑦᑐᓪᓘᓐᓃᑦ ᐊᓂᒍᖅᐸᑕ ᖁᕕᐊᓱᒡᕕᐅᓂᐊᓕᕐᒥᖕᒪᑦ.
ᑖᓐᓇ ᐃᓂᒃᓴᖅ ᑎᑎᕋᕐᕕᒋᓂᐊᖅᐸᕋ, ᑕᐃᒪᓐᓇᐃᓕᐅᖃᑦᑕᕋᒪᑎᑐᑦ ᐊᕐᕌᒍᑕᒫᑦ, ᑕᒪᒃᑯᓄᖓ ᐃᑲᔪᑦᓯᐊᖃᑦᑕᖅᑐᓄᑦ ᑭᕙᓪᓕᕐᒥ ᓂᐱᕗᒃᑯᑦ ᑭᕙᓪᓕᕐᒥ ᐱᕙᓪᓕᐊᔪᓕᕆᕕᐅᖃᑦᑕᖅᑎᓪᓗᒍ.
ᐅᑭᐅᓂ 19 ᐅᖓᑖᓄᑦ ᑲᖏᖅᖠᓂᕐᒥᐅᑕᐅᓕᖅᑎᓪᓗᖓ, ᖁᔭᓐᓇᒦᖃᑦᑕᖅᐸᑕ ᐃᓄᐃᑦ ᓯᓚᑖᓂᒥᐅᑕᐃᑦ ᑲᖏᖅᖠᓂᐅᑉ ᐊᔾᔨᖑᐊᓂᒃ ᖃᐃᑦᓯᕙᒃᑐᑦ ᐊᔾᔨᓕᐅᕆᕙᒃᑐᑦ, ᖃᓄᐃᓕᐅᕐᓂᖏᓐᓄᑦ ᑭᕙᓪᓕᕐᒥ ᖃᐅᔨᒪᑎᑦᓯᒍᒪᔪᑦ ᓄᓇᒥᖕᓂ ᐊᒻᒪ, ᐃᓛᓐᓂᒃᑯᑦ, ᐊᐱᖅᓱᖃᑦᑕᖅᖢᑎᒃ ᑭᑐᑐᐃᓐᓇᕐᓂᒃ ᐊᕐᕌᒍᓗᒃᑕᖅ.
ᐃᓚᖏᓪᓗ, ᐱᓕᕆᒍᔾᔨᖃᑦᑕᖅᐳᑦ ᑭᕙᓪᓕᕐᒥ ᒪᒃᑯᒃᑐᓄᑦ, ᐃᓱᒪᒋᔭᐅᓗᐊᕈᒪᖏᑦᖢᑎᒡᓗ ᖃᓄᐃᓕᐅᕐᓂᕐᒥᖕᓄᑦ, ᑭᓯᐊᓂ ᑭᐅᖏᓐᓇᖃᑦᑕᖅᐳᖅ ᐅᖃᓗᕕᐅᑉᓗᑎᒃ ᐊᐱᖅᓱᖅᑕᐅᑉᓗᑎᒡᓗ.
ᐃᓛᓐᓂᑯᑦ ᐃᖢᐊᖏᒃᑲᓗᐊᖅᑎᓪᓗᒍ ᐃᓚᖓᒍᑦ, ᐊᐱᖅᓱᖅᑕᐅᑉᓗᑎᒃ ᐅᓂᒃᑳᓕᐅᖃᑦᑕᖅᐳᑦ ᒪᒃᑯᒃᑐᑦ ᐱᓕᕆᐊᖏᓐᓂᒃ ᐱᓕᕆᐊᖃᖅᖢᑎᒃ ᐃᓕᓐᓂᐊᕐᕕᖕᒥᓘᓐᓃᑦ ᐊᒻᒪ ᐋᒃᑳᕈᓐᓇᖃᑦᑕᖏᑦᖢᑎᒡᓗ.
ᐅᖃᐅᓯᕆᒍᒪᑦᓯᐊᖅᐸᕋ ᓗᐃ ᕗᕋᐃᓐᓯᔅ ᖃᓄᐃᓕᐅᕈᑎᖃᖅᓯᒪᓂᖓ ᓇᐅᔮᓂ ᐊᐅᓚᑦᓯᑉᓗᓂ ᐅᓇᑕᖅᑐᒃᓴᖑᐊᓛᓂᒃ ᐊᒻᒪ ᒍᕇᑦ 9−ᒥ ᐃᓕᓐᓂᐊᖅᑎᑎᔨᐅᑉᓗᓂ ᑑᒑᓕᒃ ᐃᓕᓐᓂᐊᕐᕕᒡᔪᐊᖓᓂ.
ᕗᕋᐃᓐᓯᔅ ᖃᐅᔨᒪᑎᖃᑦᑕᕐᒪᑕ ᖃᓄᐃᓕᐅᖅᐸᓪᓕᐊᓂᖏᓐᓄᑦ ᐅᓇᑕᖅᑐᒃᓴᖑᐊᓛᑦ 3055 RCACC , ᐃᓕᓐᓂᐊᕐᕕᖕᒥᓗ ᖃᓄᐃᓕᐅᖅᐸᓪᓕᐊᔪᓂᒃ ᓴᓇᕙᓪᓕᐊᔭᖏᓐᓂᒡᓗ, ᐊᒻᒪ ᐃᓕᖁᓯᑐᖃᓂᒃ ᐱᖅᑯᓯᑐᖃᓂᒡᓗ ᖃᓄᐃᓕᐅᕈᑎᖃᖅᑎᓪᓗᒋᑦ ᐊᐅᓪᓛᖅᓯᒪᑎᑕᐅᖃᑦᑕᖅᑎᓪᓗᒋᓪᓗ ᐊᕐᕌᒍᒥᓗ ᖃᓄᐃᓕᐅᖅᐸᓪᓕᐊᓂᖏᓐᓄᑦ.
ᐅᖃᐅᓯᖃᓚᐅᖅᐳᖓ ᐅᓇᑕᖅᑐᒃᓴᖑᐊᓛᑦ ᓇᐅᔮᓂ 3055 ᐊᑦᓯᖅᑕᐅᓚᐅᕐᒪᑕ ᐱᐅᓛᖑᓪᓗᑎᒃ ᐊᔪᖏᑦᓯᐊᖅᖢᑎᒃ ᓄᓇᕗᒥ ᐅᓇᑕᖅᑐᒃᓴᖑᐊᓛᑦᓯᐊᕙᐅᓂᖏᓐᓄᑦ ᐊᒻᒪ ᐃᓚᓗᒃᑖᖓᓴᖏᑦ ᒫᓂᑑᐸᒥᐅᑦ ᐅᑭᐅᓄᑦ ᒪᕐᕉᓕᖅᑐᓄᑦ ᑕᐃᒪᓐᓇ ᐊᑦᓯᖅᑕᐅᓯᒪᓕᖅᖢᑎᒃ? ᖁᔭᓐᓇᒦᖅᐸᕗᑦ ᓗᐃᑦ.
ᐊᒻᒪ ᓇᐅᔮᓂ ᖁᔭᓐᓇᒦᕐᔪᐊᖅᐸᕋ ᑑᒑᓕᒃ ᐃᓕᓐᓂᐊᕐᕕᖓᓂ ᐊᖓᔪᖄᑉ ᑐᖏᓕᖓ ᔪᓕᐊ ᒪᒃᐴᓴᓐ ᐊᐱᖅᓱᖃᑦᑕᓚᐅᕐᒪᑦ, ᐊᔾᔨᖑᐊᓂᒡᓗ ᓇᒃᓯᐅᔾᔨᑉᓗᓂ ᑭᓇᒧᓪᓗ ᑐᑭᓯᒋᐊᕈᓐᓇᕋᔭᕐᒪᖔᕐᒪ, ᐊᒻᒪ ᐃᓕᓐᓂᐊᖅᑎᑦ ᖃᓄᐃᓕᐅᕐᓂᖏᓐᓄᓪᓗ ᐅᖃᐅᑎᖃᑦᑕᖅᖢᓂᖓ ᐃᓕᓐᓂᐊᕐᓇᒥ ᐊᕐᕌᒍᒥ. ᖁᔭᓐᓇᒦᒃ ᔪᓕᐊ.
ᑕᒡᕙᓂ ᓄᓇᑉᑎᓐᓂ, ᖁᔭᓐᓇᒦᕐᔪᐊᕈᒪᕙᕋ ᓄᕕᐊ ᖃᓗᔾᔭᒃ ᑲᒪᒋᔭᖃᖅᓯᒪᓕᕐᒪᑦ ᐃᓄᐃᑦ ᖃᓄᐃᓕᐅᖅᐸᓪᓕᐊᓂᖏᓐᓄᑦ ᓄᓇᑉᑎᓐᓂ ᑭᕙᓪᓕᕐᒥᓗ ᐊᕐᕌᒍᓗᒃᑖᖅ.
ᖃᓗᔾᔭᒃ ᖃᐅᔨᒪᑉᓗᓂ ᐊᑕᐅᑦᓯᒃᑯᑦ ᓇᓂᑐᐃᓐᓈᓃᒍᓐᓇᖏᓐᓇᒪ ᓄᖅᑲᓚᐅᐱᓪᓚᖃᑦᑕᕐᓗᖓᓗ ᖃᑯᑎᒃᑯᑦ, ᖁᔭᓐᓇᒦᖅᖢᒍᓗ ᐊᔾᔨᓕᐅᕆᖃᑦᑕᕐᒪᑦ ᑐᓴᖅᑎᖃᑦᑕᖅᖢᓂᖓᓗ ᐱᕙᓪᓕᐊᔪᒃᑯᑦ ᑐᓴᖅᑕᐅᒋᐊᖃᖅᑐᓂᒃ ᑕᐃᑉᓱᒪᓂᓗ ᓴᓪᓕᕐᒥᐅᑕᐅᑉᓗᓂ ᐅᑉᓗᒥᒧᑦ ᑎᑭᑦᖢᒍ. ᖁᔭᓐᓇᒦᒃ, ᓄᕕᐊᓪ.
ᐊᒥᓱᓪᓗ ᐃᓄᐃᑦ ᑭᕙᓪᓕᕐᒥᐅᑦ (ᖃᐅᔨᒪᕗᓯ ᑭᑑᖕᒪᖔᑉᓯ) ᐅᖃᓗᕕᒋᖃᑦᑕᖅᑕᒃᑲ, ᖃᕆᑕᐅᔭᒃᑯᓪᓗ ᑎᑎᕋᖃᑦᑕᐅᑎᖃᑎᒋᑉᓗᒋᑦ ᐊᒻᒪ ᐊᓯᐊᒍᑦ ᐃᑲᔪᖃᑦᑕᖅᖢᑎᒃ ᓇᓗᓇᐃᑉᓗᑎᒃ ᐊᔾᔨᖑᐊᑦ ᑭᑑᖕᒪᖔᑕ ᓄᓇᖏᓐᓂᖔᖅᑐᑦ, ᐊᒻᒪ ᐅᖃᐅᑎᔭᐅᕙᒃᖢᖓ ᑭᓇᒧᑦ ᐅᖃᓪᓚᒋᐊᖃᕐᒪᖔᕐᒪ ᑭᑐᑦ ᖃᓄᐃᓕᐅᕈᑎᖃᖅᑎᑦᓯᖕᒪᖔᑕ ᐱᐅᔪᓂᒃ ᓄᓇᓕᖕᓂ ᑭᕙᓪᓕᕐᒥ, ᑭᑐᓪᓗ ᑲᑎᒪᔨᐅᖃᑕᐅᓂᖏᓐᓄᑦ ᐊᔾᔨᒌᖏᑦᑐᓄᑦ ᑭᓇᒧᓪᓗ ᐊᐱᖅᓱᕆᐊᖃᕐᓂᒻᓄᑦ.
ᑕᐃᒪ ᑕᒻᒪᕋᔭᖅᐳᖓ ᐅᖃᐅᓯᕆᖃᑕᐅᖏᒃᑯᑉᑯ ᓯᐅᕋ ᐊᔭᕈᐊᒃ ᑲᖏᖅᖠᓂᕐᒥᐅᑕᖅ, ᒪᒃᑯᒃᑐᓂᒃ ᑭᑑᓂᖏᓐᓄᑦ ᐅᖃᐅᑎᖃᑦᑕᕐᒪᖓ ᐊᑎᖏᓐᓂᒃ ᒪᒃᑯᒃᑐᑦ ᑕᐃᒪᓐᓇ ᐊᒥᓱᒻᒪᕆᐅᔪᓂᒃ. ᖁᔭᓐᓇᒦᒃ ᓯᐅᕋ.
ᐊᒻᒪ, ᑭᖑᓪᓕᖅᐹᒃᑯᑦ, ᑖᒃᑯᐊᒃ ᑭᕙᓪᓕᕐᒥ ᐃᓕᓐᓂᐊᖅᑎᑎᔨᒃ ᐊᐅᓪᓚᕆᐊᖃᖏᑦᑐᑦ ᑭᓯᐊᓂ ᐊᐅᓪᓚᖃᑕᐅᓐᓂᕈᒪ, ᒍᐊᑦ ᐱᓛᑦ ᐊᕐᕕᐊᒥᐅᑕᖅ ᐊᒻᒪ ᒋᓕᓐ ᐳᕈᑯᐸᒃ ᐃᒡᓗᓕᒑᕐᔪᖕᒥ.
ᐱᓛᑦ ᐅᐱᒋᑦᓯᐊᖅᖢᒍ ᐱᓕᕆᐊᖃᖃᑦᑕᖅᓯᒪᓂᖓᓄᑦ ᑕᑯᓐᓇᒐᒃᓴᓂᒃ ᐊᔪᖏᓴᐃᓪᓗᓂ ᐊᒥᓱᓂᒃ ᒪᒃᑯᒃᑐᓂᒃ ᑕᒪᒃᑯᐊᓗ ᐱᓕᕆᖃᑎᑯᓗᖏᓪᓗ ᐊᒃᓱᕈᕐᓇᖅᑐᓂᒃ ᐊᔪᕐᓇᖅᑐᓂᒃ ᐱᓕᕆᐊᖃᖃᑦᑕᖅᖢᑎᒃ ᐃᓚᐅᑉᓗᓂᓗ ᐊᕐᕕᐊᓂ ᑕᕐᕆᔭᐅᑎᓕᐅᖅᑎᑦ ᑲᑐᔾᔨᖃᑎᒌᖏᓐᓂ ᐊᒻᒪ ᐊᔪᖏᓴᕐᓂᖅ ᓄᓇᕗᒥ, ᐅᖃᐅᑎᖃᑦᑕᖅᖢᓂᖓᓗ ᖃᓄᐃᓕᐅᖅᐸᓪᓕᐊᓂᖏᓐᓄᑦ ᒪᒃᑯᒃᑐᑦ ᑕᒪᒃᑯᓇᓂ ᐃᓚᐅᓂᖃᖅᖢᑎᒃ. ᖁᔭᓐᓇᒦᒃ, ᒍᐊᑦ.
ᐳᕈᑯᐸᐃᒃ ᖃᔭᖅᑐᖅᑎᑦᓯᖃᑦᑕᕐᓂᕐᒧᑦ ᐃᓕᓐᓂᐊᖅᑎᑦᓯᖃᑦᑕᖅᖢᓂ ᐱᓕᕆᐊᖃᖃᑦᑕᖅᐳᖅ ᐊᓯᖏᓐᓂᒡᓗ, ᐊᐱᖅᓱᖅᖢᒍᓗ ᐅᖃᐃᓐᓇᖅᐸᒃᖢᓂ.
ᑕᐃᒪᓐᓇ ᐊᓯᖏᑦᑎᑐᑦ ᐅᖃᐅᓯᕆᔭᒃᑲᑎᑐᑦ, ᐊᔾᔨᖑᐊᓂᒃ ᑐᑭᓯᒋᐊᕈᑎᒃᓴᓂᒡᓗ ᖃᐃᑦᓯᖃᑦᑕᖅᖢᓂ ᓄᓇᒥᓂᑦ. ᖁᔭᓐᓇᒦᒃ, ᒋᓕᓐ.
ᖁᔭᓐᓇᒦᕐᔪᐊᒃᐸᒃᑲᓗ ᑕᒪᕐᒥᒃ ᑭᕙᓪᓕᕐᒥᐅᑕᐃᑦ ᐊᒃᓱᕈᖏᓐᓂᖅᓴᐅᑎᑦᓯᖃᑦᑕᕐᒪᑕ ᐱᓕᕆᐊᒻᓂᒃ ᐱᕙᓪᓕᐊᔪᓄᑦ ᐃᓚᒋᔭᐅᖃᑕᐅᑦᓯᐊᖅᖢᑎᒃ ᐊᕐᕌᒍᒥ ᑕᒡᕙᓂ ᐊᑐᖅᑐᒥ. ᐅᕙᖓᑐᐊᖑᓗᖓ ᑕᒪᓐᓇ ᐱᓕᕆᐊᕆᔪᓐᓇᖏᓐᓇᑉᑯ!