ᖁᕕᐊᒋᔭᖃᖅᑐᖅ ᑎᑎᖅᑐᕋᐅᓯᕐᒥᒃ ᐊᔾᔨᖑᐊᓕᐅᕐᓂᕐᒥᓗ

ᑖᓂ ᐋᕐᓗᒃ ᐃᖅᑲᐅᒪᔪᕉᖅ ᐃᓕᓴᕐᕕᖕᒥ ᐃᒃᓯᕚᖅᖢᓂ ᓱᕈᓯᐅᓪᓗᓂ ᓱᓕ, ᐅᖃᐅᓯᐅᔫᒐᓗᐊᓂᒃ ᑐᓵᖏᓚᐅᖅᓯᒪᖕᒪᑦ ᑐᓵᑦᑎᐊᖏᒧᑦ ᑐᑭᓯᔪᓐᓇᖃᑦᑕᖏᓱᓂ ᐃᓕᓴᐅᑎᓂᒃ.

ᐊᓱᐃᓛᒃ ᐃᓕᓴᕐᕕᖕᒥ ᑎᑎᖅᑐᕋᖃᑦᑕᓕᖅᑐᕕᓂᖅ ᑕᒪᑐᒥᖓ ᐊᔪᖏᑕᒥᓂᒃ ᐱᓕᕆᖔᓕᖃᑦᑕᖅᖢᓂ, ᐆᒪᔪᓂᒃ ᐃᓕᓴᕈᑎᒥᓂᒃ ᐊᑐᖅᖢᓂ ᑎᑎᕋᐅᑎᒥᓂᒃᓗ ᐃᓕᓴᕐᕕᖕᒥᐊᑐᖔᖅᖢᓂ.
“ᐃᓕᓴᐃᔨ ᐃᒪᐃᓕᔪᕕᓂᖅ, ‘ᑕᐃᒪᐃᓕᐅᖔᕈᒪᕖᑦ?’ ᐊᖏᓚᐅᖅᓯᒪᔭᕋ, ‘ᐄ,’ ᑕᒪᐃᓐᓄᑦ ᖃᐅᔨᒪᔭᐅᓚᐅᕋᒪ ᑐᓵᑦᑎᐊᖏᓐᓂᓐᓂᒃ,” ᐋᕐᓗᒃ ᐅᓂᒃᑳᕆᓪᓗᓂ. ᐅᑭᐅᑦ 26 ᓈᓯᒪᓕᖅᐳᑦ ᒫᓐᓇᒧᑦ ᑎᑭᖢᒍ ᓇᖕᒥᓂᖅ ᐃᓅᔪᑎᒋᓕᖅᑕᖓ ᑎᑎᖅᑐᕋᖅᑎᐅᓪᓗᓂ, ᑎᑎᖅᑐᕋᖅᑕᒥᓂᒃ ᓂᐅᕕᐊᒃᓴᖃᖃᑦᑕᖅᖢᓂ.
“ᖃᐅᑕᒫᑦ ᑕᐃᒪᓐᓇ ᐱᓕᕇᓐᓇᐅᔭᖅᑐᖓ,” ᐅᖃᕆᓪᓗᓂ, ᐊᒥᓱᓄᑦ ᖃᐅᔨᒪᔭᐅᓕᕋᒪ ᐱᒃᑯᒥᒋᔭᐅᓕᕐᒪᑕ. “ᖃᖓᑐᐃᓐᓇᖅ ᑎᑭᑦᑐᖃᕌᖓᑦ ᑕᑯᕚᕈᒪᔪᓂᒃ ᑎᑎᖅᑐᕋᖅᓯᒪᔪᓂᒃ ᐊᑎᓐᓂᒃ ᑐᓂᔭᐅᕙᒃᖢᑎᒃ ᓯᓂᒃᑕᕐᕕᖕᒥ ᑐᔪᕐᒥᔪᑦ ᐃᓚᖏᑦ ᖃᐃᑎᑕᐅᕙᒃᖢᑎᒃ ᑕᑯᔭᖅᑐᖅᑐᖅ ᐅᕙᓐᓂᒃ ᑎᑎᖅᑐᒐᓐᓂᒃ ᑕᑯᓂᑰᒐᒥᒃ. ᐊᒥᓱᓄᑦ ᐃᒡᓗᓐᓄᑦ ᑕᑯᔭᖅᑐᖅᑕᐅᕙᓕᖅᑐᖓ.”
ᐋᕐᓘᑉ ᑎᑎᖅᑐᕋᖏᑦ ᐊᒥᓱᓂ ᓄᓇᕗᒥ ᑕᑯᒃᓴᐅᑎᑕᐅᕙᓕᕐᒪᑕ ᓇᓗᓇᐃᒃᑯᑕᓕᐅᓚᐅᕐᒪᒋᑦ ᖁᒻᒧᑦ ᑐᑭᖅᓯᒋᐊᖑᐊᖅᑐᒥᒃ ᓄᓇᕗᒥ ᓱᐴᖅᑐᖅᑕᐅᓕᒪᑎᑦᑎᔨᒃᑯᑦ ᑕᐃᓱᒪᓂ ᐊᒃᓱᕈᑕᐅᑎᓪᓗᒋᑦ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄᑦ, ᑕᒪᔭ ᑎᑎᕋᐅᔭᖅᖢᓂᒋᑦ ᓴᓇᓯᒪᔭᖏᑦ.
“ᓇᓗᓇᐃᒃᑯᑕᓕᐅᖅᓯᒪᔪᖓ ᒪᓕᒐᓐᓂᐊᖅᑎᓄᑦ ᓇᖕᒥᓂᖅ ᓴᓇᕕᖏᓐᓂ ᓇᓗᓇᐃᒃᑯᑕᒃᓴᓂᒃ ᐊᓯᖏᓐᓂᓗ ᒐᕙᒪᑎᒃᑯᑦ ᐱᓕᕆᕝᕕᖏᓐᓂ ᑎᑎᕋᕐᕕᒃᓴᖏᑦ ᖁᓛᒍᑦ ᓇᓗᓇᐃᒃᑯᑕᓕᐅᖅᓯᒪᓪᓗᒋᑦ,” ᐅᓂᒃᑳᕆᓪᓗᓂ ᐅᑭᐅᒃᑯᑦ ᐅᑭᐅᖅᑕᖅᑐᒥ ᐱᖑᐊᕕᒃᔪᐊᖓᑦ, ᑲᓇᑕᒥ ᒥᕐᖑᐃᖅᓯᕕᓕᕆᔨᒃᑯᑦ ᐊᒻᒪᓗ ᐅᕐᓱᖅᑑᒥᐅᖅ ᕼᐊᒪᓚᖓᑕ ᑎᑎᕋᕐᕕᓴᖏᓐᓂᒃ ᓇᓗᓇᐃᒃᑯᑕᓕᐅᖅᓯᒪᔪᖅ. ᓴᓇᓚᐅᖅᓯᒪᒋᓪᓗᓂᒎᖅ ᓵᒥ ᐱᖑᐊᕈᓯᕐᒥᒃ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᑲᑎᒪᔨᖏᓐᓄᑦ, ᐅᓂᒃᑳᕆᓪᓗᓂ.
ᑕᖅᑭᐅᓚᐅᖅᑐᓂ, ᐋᕐᓘᑉ ᑎᑎᖅᑐᕋᖓ ᓂᕈᐊᖅᑕᐅᓐᓂᕐᒪᑦ ᓇᓗᓇᐃᒃᑯᑕᖅᑖᕆᔭᐅᔪᒪᓪᓗᓂ ᕿᑎᕐᒥᐅᓂ ᓇᖕᒥᓂᖅ ᐱᓇᓱᐊᒐᖃᑦᑐᑦ ᑲᑐᔾᔨᖃᑎᒌᖓᓐᓄᑦ. ᑕᐃᒪᓐᓇᐃᒃᑲᔭᓚᐅᖏᑦᑐᖅ. ᐋᕐᓗᒃ ᑐᓴᕐᓂᖏᑉᐸᑦ ᓴᓚᒃᓴᖃᑦᑕᐅᑎᑦᑎᔪᓂᒃ ᐃᑲᕐᕋᑦ 30 ᑖᒃᑯᑑᓕᖅᑎᓪᓗᒋᑦ.
ᑐᐊᕕᖅᖢᓂ ᓴᓇᓴᐅᑎᒋᓇᓱᐊᓕᖅᑕᕕᓂᖓ, ᑭᓯᐊᓂᓕ ᓇᖕᒥᓂᖅ ᓈᒻᒪᒋᖏᒃᑲᓗᐊᖅᖢᓂᐅᒃ ᓱᓕ ᓴᓇᔭᓂ ᑎᑎᖅᑐᕋᖅᑕᓂ ᑐᓂᓕᖅᑕᕕᓂᐊ. “ᐊᒥᓱᐃᖅᖢᒍ ᑎᑎᖅᑐᕋᑲᑕᒋᐊᖃᓚᐅᖅᑕᕋ, ᐃᓱᒪᒋᔭᓐᓄᒃ ᐋᕿᑦᑎᐊᕋᓱᐊᖅᖢᒍ,” ᐅᖃᕆᓪᓗᓂ, ᐱᒋᐊᖄᓲᖑᒐᒥᒎᖅ ᑎᑎᖅᑐᕋᐅᑎᖃᖅᖢᓂ ᐸᐅᓕᖕᒥᒃ ᐊᓪᓚᐅᑎᒥᒃ ᐊᑐᖅᖢᓂ ᑕᐃᒪᓕ ᖃᖓᖑᑦ ᐃᔾᔪᐊᕐᓂᐊᕆᓪᓗᓂᐅᒃ ᐃᒪᓕᖕᒧᑦ ᑎᑎᕋᐅᑎᒧᑦ.
ᐊᓱᐃᓚᒃ ᐃᓱᒪᒋᔭᒥᓂᒃ ᐋᕿᒃᑲᒥ ᑕᓪᓕᒪᓂᒃ ᓄᕗᓕᒃᒥᒃ ᐅᓪᓗᕆᐊᓕᐅᖅᖢᓂ ᐃᓗᐊᓂ ᕿᑎᕐᒥᐅᑦ ᓄᓇᓕᖏᑕ ᓇᓗᓇᐃᒃᑯᑕᖏᑦ ᐃᓚᓕᐅᑎᓪᓗᒋᑦ ᑕᕝᕙᓂ ᑲᑐᔾᔨᖃᑎᒌᖓᓂ ᐃᓚᐅᖃᑕᐅᔪᑦ. ᐱᐅᓴᖅᖢᓂᐅᒃ ᐆᒪᔪᖑᐊᓂᒃ ᑎᑎᖅᑐᕋᖅᖢᓂ, ᓄᓇᓕᖏᓐᓄᑦ ᑕᐃᓱᒪᖔᓗᖕᓂᑦ ᓂᕿᒋᔭᐅᒪᑕ ᐃᓄᖕᓄᑦ.
ᐊᔪᖏᒻᒥᔪᖅᑕᐅᖅ ᐊᓯᖏᓐᓂᒃ ᓴᓇᐅᒐᐅᓯᕐᓂᒃ ᑎᑎᖅᑐᕋᖅᑎᑐᐃᓐᓇᐅᖏᑦᑐᖅ, ᓴᓇᖑᐊᖃᑦᑕᕐᒥᔪᖅ, ᐊᔾᔨᖑᐊᓕᐅᒥᓂᒃ ᐊᒥᐊᕆᕙᒃᖢᓂᓗ, ᐊᒻᒪᓗ ᐱᐅᓴᐅᑎᓂᒃ ᓴᓇᖑᐊᓚᐅᖅᐸᒃᑭᓪᓗᓂ ᒥᖅᓱᒻᒪᕆᓚᐅᖅᓯᒪᔪᕉᖅ ᐊᔾᔨᐅᖏᑦᑐᓂᒃ ᓴᓇᔪᒪᓕᕌᖓᒥ. ᑕᐃᓱᒪᓂᐅᑎᓪᓗᒍ ᐊᓈᓇᓂ ᑕᐸᓇᐃᖅᑎᑕᕕᓂᐊ ᕿᓯᖕᓂᒃ ᐳᐊᓗᓕᐅᓚᐅᖅᓯᒪᖕᒪᑦ ᐃᓕᓴᕐᕕᖕᒥᐅᑕᐅᓪᓗᓂ ᓱᓕ.
“ᑕᐃᓱᒪᓂᐅᑎᓪᓗᒍ ᑎᑭᑦᑐᖃᓚᐅᖅᓯᒪᖕᒪᑦ ᒪᕐᕉᖕᓂᒃ ᓄᓇᓕᑦᑎᓐᓄᑦ ᐳᓛᕆᐊᖅᑐᓂᒃ ᐳᐊᓗᖃᖏᑦᑐᓂᒃ. (ᐊᓇᓇᒪ) ᐅᖃᐅᑎᓚᐅᖅᓯᒪᖕᒪᒋᑦ, ‘ᑕᒪᑐᒪᓂᓴᐅᑎᒋ ᑕᒪᐃᓐᓄᑦ ᓴᓐᓇᑎᔪᓐᓇᖏᓐᓂᕋᖅᖢᓂᒋᑦ,’ ᐅᖃᐅᑎᓚᐅᖅᓯᒪᒐᒃᑯ ᐊᔪᖏᑕᓐᓂᒃ ‘ᐃᑲᔪᕋᓱᐊᕈᓐᓇᖅᑕᒋᑦ. ᑭᐅᓪᓗᓂᖓ “ᐊᔪᖏᓚᑏᑦ?” ᑭᐅᓪᓗᒍ ‘ᐊᖏᖅᖢᒍᓗ, ᒥᖅᓱᕈᓐᓇᕐᒥᔪᖓ ᓇᖕᒥᓂᖅ ᐃᓕᓴᖅᓯᒪᔪᖓ.” ᐅᖃᐅᑎᓪᓗᓂᐅᒃ ᐃᖅᑲᐅᒪᔭᖓ.
ᒫᓐᓇᕋᑖᕐᓕ, ᑎᑎᖅᑐᕋᐅᓯᕐᒥᒃ ᑭᓯᐊᓂ ᓴᓇᖃᑦᑕᓕᖅᑐᖅ, ᐊᔾᔨᖑᐊᓕᐅᕆᓪᓗᓂ ᐅᖃᓕᒫᒐᓂᒃ ᐅᕐᓱᖅᑑᒥ ᐃᓕᓴᐃᔨᒧᑦ ᐅᓂᒃᑳᓕᐊᖑᓯᒪᔪᓂᒃ ᕿᒥᕈᐊᒐᓕᐅᖃᑎᒋᓪᓗᓂᐅᒃ. ᐊᒥᓱᓂᒃᓗ ᐃᓕᓴᐃᖃᑦᑕᓕᖅᖢᓂ ᐅᔪᕈᒥᓂᒃ ᖃᖏᐊᒥᓂᒃᓗ ᐃᓕᓴᕐᕕᖕᒥᓗ ᐃᓕᓴᐃᒋᐊᖅᑐᖃᑦᑕᖅᖢᓂ ᓄᓇᓕᖓᓂ ᑐᖓᓕᕐᒥ ᐃᓕᓴᕐᕕᖕᒧᑦ, ᐅᖃᕆᓪᓗᓂ.