ᒍᕇᑦ 9-ᒥ ᐃᓕᓐᓂᐊᖅᑎᑦ ᑑᒑᓕᒃ ᐃᓕᓐᓂᐊᕐᕕᒡᔪᐊᖓᓂ ᐊᖏᔪᒧᑦ ᐃᓕᓐᓂᐊᕐᕕᒋᓂᐊᖅᑕᒥᓄᑦ ᑎᑭᓚᐅᖅᐳᑦ ᒪᕐᕈᐃᖅᑕᖅᖢᑎᒃ ᐊᕐᕌᒍᒥ ᓄᓇᒧᑦ ᐊᐅᓪᓛᖅᑎᑕᐅᕙᒃᖢᑎᒃ ᑕᐃᒪᓐᓇᐃᓕᐅᓚᐅᖅᖢᑎᒡᓗ ᐊᒃᑐᐱᕆ 27-ᖑᑎᓪᓗᒍ ᓇᐅᔮᓂ.
ᐃᓕᓐᓂᐊᖅᑎᑦ ᖃᕆᐊᕐᒧᐊᓚᐅᖅᐳᑦ ᐃᓕᓐᓂᐊᖅᑎᑎᔨᖓᓪᓗ, ᓗᐃᑦ ᕗᕋᐃᓐᓯᔅ, ᐊᒻᒪ ᖃᐅᔨᒪᑎᖓᑦ, ᓗᐊᕆᐊᑦ ᑭᖓᔭᒃ, ᐊᖑᓇᓱᐊᕆᐊᖅᖢᑎᒃ ᐃᖃᓪᓕᐊᕆᐊᖅᖢᑎᒡᓗ, ᐊᒻᒪ ᓄᓇᒦᒋᐊᖅᑐᖅᖢᑎᒃ ᐃᓕᓐᓂᐊᕆᐊᖅᖢᑎᒡᓗ.
ᕗᕋᐃᓐᓯᔅ ᐅᖃᓚᐅᖅᐳᖅ ᑕᐃᒪᓐᓇ ᐃᓕᓐᓂᐊᖅᑎᑦ ᐊᐅᓪᓛᖅᑎᑕᐅᑉᓗᑎᒃ ᐃᓕᓐᓂᐊᕈᑎᒥᖕᓂᒃ ᐃᓕᓐᓂᐊᕐᕕᐅᑉ ᐃᓗᐊᓂ ᓄᖅᑲᖅᑎᑦᓯᓚᐅᐱᓪᓚᒃᖢᑎᒃ ᐱᐊᓂᑐᐊᕋᒥᒃ ᖃᐅᔨᓴᕈᑎᓂᒃ ᓯᕗᓪᓕᕐᓂᒃ ᐃᓕᓐᓂᐊᖅᐸᓪᓕᐊᓂᕆᔭᖏᓐᓂᒃ.
“ᐃᓕᓐᓂᐊᖅᑎᑕᒃᑲ ᐊᕐᕌᒍᑉ ᕿᑎᐊᓂ ᐱᐊᓂᓚᐅᕐᒪᑕ, ᑎᑎᕋᖅᑎᑕᐅᑉᓗᑎᒃ ᖃᐅᔨᓴᖅᑕᐅᑉᓗᑎᒃ ᑕᓪᓕᒪᓂᒃ ᐃᓕᓐᓂᐊᕈᑎᓂᒃ ᐃᓕᓐᓂᐊᖅᑎᖃᑦᑕᖅᑕᒻᓂᒃ, ᑕᐃᒪᓐᓇ ᖁᕕᐊᓇᓚᐅᖅᐳᑦ ᑕᖃᐃᖅᓯᖃᑕᐅᒋᐊᒃᓴᖅ, ᐊᒻᒪ ᐃᓕᓐᓂᐊᖃᑕᐅᓗᓂᓗ ᓄᓇᒥ ᐊᔪᖏᓴᕐᓂᕐᒥᒃ,” ᐅᖃᓚᐅᖅᐳᖅ ᕗᕋᐃᓐᓯᔅ.
“ᐃᓕᓐᓂᐊᖅᑎᑦ ᓄᓇᒧᑦ ᐊᐅᓪᓛᖅᓯᒪᓂᕐᒥᒃ ᖁᕕᐊᒋᔭᖃᐃᓐᓇᖅᐸᖕᒪᑕ ᐊᑐᓂᓗ ᐊᔾᔨᒌᖏᑦᖢᑎᒃ.”
ᒥᓚᓂ ᑲᐅᓇᒃ, ᐅᑭᐅᓕᒃ 14-ᓂᒃ, ᐅᖃᓚᐅᖅᐳᖅ ᖁᕕᐊᒋᔭᖃᕐᓂᕋᖅᖢᓂ ᐊᐅᓪᓛᖅᓯᒪᖃᑕᐅᒋᐊᒃᓴᖅ ᐃᖃᓪᓕᐊᖃᑦᑕᕋᒥ.
“ᐃᖃᓪᓕᐊᕈᒪᒃᑲᐅᕗᖓ ᐊᔾᔨᒌᖏᑦᑐᓂᒃ ᐃᖃᓗᖕᓂᒃ ᐃᖃᓗᒐᓱᐊᖅᐸᒃᖢᖓ, ᐊᔪᖏᓕᕈᒪᑉᓗᖓᓗ ᐃᖃᓪᓕᐊᕐᓂᕐᒥᒃ,” ᐅᖃᓚᐅᖅᐳᖅ ᑲᐅᓇᒃ.
“ᖁᕕᐊᒋᒐᑉᑯ ᓄᓇᒦᓐᓂᖅ, ᖃᓄᐃᓕᐅᖏᒃᑲᓗᐊᕈᑉᑕᓘᓐᓃᑦ, ᑭᓯᐊᓂ, ᑐᒃᑐᓯᐅᕈᒪᒃᑲᐅᕗᖓ.
“ᖁᕕᐊᒋᒐᑉᑯ ᐃᓕᓐᓂᐊᕐᓂᖅ ᓄᓇᒥ ᐃᓕᓐᓂᐊᕐᕕᐅᑉ ᐃᓗᐊᑕ ᓴᓂᐊᓂ.”
ᓴᐱᓇ ᐃᔾᔨᕋᐅᖅ, ᐅᑭᐅᓕᒃ 13-ᓂᒃ, ᐅᖃᓚᐅᖅᐳᖅ ᒪᑦᓯᑕᐅᑎᒃᑯᑦ ᐃᖃᓗᒃᓯᐅᕈᓐᓇᖅᓯᓚᐅᕋᒥ ᑭᖑᓪᓕᕐᒥ ᓄᓇᒧᑦ ᐊᐅᓪᓛᖅᓯᒪᓚᐅᖅᑎᓪᓗᒋᑦ, ᖃᓄᐃᓚᐅᖏᑦᖢᓂᓗ, ᑭᓯᐊᓂ ᑯᕕᐊᒋᔭᖃᑦᓯᐊᖅᖢᓂ ᐊᔾᔨᐅᖏᑦᑐᒥᒃ ᖃᓄᐃᓕᔪᖃᕌᖓᑦ ᓄᓇᒥ.
“ᑭᖑᓪᓕᕐᒥ ᐊᐅᓪᓛᖅᓯᒪᑎᓪᓗᑕ ᑐᒃᑐᒋᐅᖅᑐᖃᓚᐅᕐᒪᑦ ᐃᓚᐅᑎᓪᓗᖓ ᐊᐅᓪᓛᖅᓯᒪᖃᑕᐅᓂᕐᒧᑦ,” ᐅᖃᓚᐅᖅᐳᖅ ᐃᔾᔨᕋᐅᖅ.
“ᐊᔾᔨᐅᖏᑦᑑᖃᑦᑕᕐᒪᑦ ᖃᓄᐃᑦᑐᖃᕌᖓᑦ ᓂᕆᐅᖕᓇᖏᑦᑐᒥᒃ.
“ᑕᒪᓐᓇ ᐊᔾᔨᐅᖏᑦᑑᓚᐅᖅᐳᖅ ᓇᑕᓂᐅ ᑯᐸᒃ ᑐᒃᑐᒋᐅᓚᐅᕐᒪᑦ.
“ᐃᖅᑲᐅᒪᒐᒃᓴᑦᓯᐊᕙᐅᔪᖅ ᐅᕙᒻᓄᑦ ᐊᐅᓪᓛᖅᓯᒪᑎᓪᓗᑕ ᖃᔭᕆᐊᒃᑯᑦ ᐊᐅᔭᐅᓚᐅᖅᑐᒥ ᕿᓇᓗᒐᒃᓯᓚᐅᕋᑉᑕ.”
ᑲᐅᓇᒃ ᐊᖏᓚᐅᖅᐳᖅ ᑯᐸᒃ ᑐᒃᑐᒋᐅᓚᐅᕐᓂᖓᓄᑦ ᐅᐱᓐᓇᓚᐅᕐᓂᖓᓄᑦ.
ᐅᖃᓚᐅᖅᖢᓂᓗ ᖁᕕᐊᓇᖃᑦᑕᕐᓂᖓᓄᑦ ᓄᓇᒥ ᖃᐅᔨᒪᑉᓗᓂ ᐅᓗᕆᐊᓇᖏᑦᑐᒦᓐᓂᕐᒧᑦ.
“ᐃᖢᕐᕆᔮᖃᑦᑕᖅᐳᖓ ᐃᓕᖁᓯᑐᖃᓕᕆᓂᕐᒧᑦ ᐃᓕᓐᓂᐊᖅᑎᑎᕗᑦ ᖃᐅᔨᒪᑎᕗᓪᓗ ᐱᖃᑎᒋᒑᖓᑉᑎᒍ,” ᐅᖃᓚᐅᖅᐳᖅ ᑲᐅᓇᒃ.
“ᖁᕕᐊᒋᑉᓗᒋᓪᓗ ᑕᐃᒪᓐᓇ ᐊᐅᓪᓛᖅᓯᒪᑎᑕᐅᖃᑦᑕᕋᑉᑕ ᐊᕐᕌᒍᒥ ᒪᕐᕈᐃᖅᑕᖅᖢᑕ ᐃᓕᓐᓂᐊᕐᕕᐅᑉ ᐃᓗᐊᓂᑦ ᐊᓂᑎᑕᐅᓯᒪᓚᐅᐱᓪᓚᒃᖢᓂ.
“ᐃᖅᑲᐅᒪᒐᒃᓴᑦᓯᐊᕙᐅᓛᖅ ᐊᐅᓪᓛᖅᓯᒪᑎᓪᓗᑕ ᐊᕐᕌᓂ ᒪᕐᕉᓕᖓᔪᑦ ᐃᓕᓐᓂᐊᕐᕕᖕᒥᑦ ᐊᑕᐅᑦᓯᒃᑯᑦ ᐊᐅᓪᓚᖅᓯᒪᓚᐅᕐᒪᑕ ᑕᒪᓐᓇ ᖁᕕᐊᓇᕐᓂᖅᓴᐅᓚᐅᖅᐳᖅ.”