ᖁᕕᐊᓱᒍᑕᐅᔪᓂᑦ ᑲᑎᙵᓂᐅᔪᓂᑦ ᐊᒻᒪᓗ ᐊᓐᓄᕌᖏᑦ
ᑭᕙᓪᓕᖅ
ᖃᔅᓯᒐᓚᖕᓂ ᖁᕕᐊᓱᒍᑕᐅᔪᓂᑦ ᑲᑎᙵᓂᐅᔪᖃᓚᐅᖅᐳᖅ ᐃᓕᓐᓂᐊᕐᕕᓂᑦ ᐊᕕᒃᑐᖅᓯᒪᓂᐅᔪᒥ ᑐᓂᓯᓂᕐᒧᑦ ᑭᕙᓪᓕᕐᒥᐅᓂ ᐱᙳᐊᖅᑎᐅᔪᓂᑦ ᓵᓚᖃᕋᓱᐊᖅᑐᓂ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᙳᐊᕐᓂᐅᔪᓂ (AWG) ᕼᐊᐃ ᕆᕗᕐᒥ ᐊᒻᒪ ᕗᐊᑦ ᓯᒥᑦᒥ, ᓄᓇᑦᓯᐊᕐᒥ, ᐃᖅᑲᐅᒪᓇᕐᓂᐊᖅᑐᒧᑦ ᐊᐅᓪᓚᖅᑎᑕᐅᓂᖏᓐᓄᑦ.
ᑕᒪᑐᒪᓂ ᐱᓇᓱᐊᕈᓯᐅᓚᐅᖅᑐᒥ ᑕᑯᓂᖃᓚᐅᖅᐳᑦ ᓴᖅᑭᑎᑕᐅᓂᖏᓐᓂ ᓄᑖᖑᔪᓂ ᑲᑎᙵᓂᐅᔪᓄᑦ ᓄᓇᕗᒻᒥ ᑲᓚᖏᓐᓂᑦ ᐊᑐᖅᑕᐅᓂᐊᖅᑐᓂ ᐱᙳᐊᕐᓂᐅᔪᓄᑦ.
ᑭᐊᑎᖏᑦ ᐊᑭᓕᖅᓱᖅᑕᐅᓚᐅᖅᐳᑦ ᕼᐋᑭ ᓄᓇᕗᒻᒥ, ᐴᕆᔭᖏᑦ ᐊᑭᓕᖅᑕᐅᓪᓗᑎᒃ ᑰᑎ ᑏᓐᒧᑦ ᑳᓇᑐᕆᐅᓪ-ᑯᓐᓂ ᐊᒻᒪᓗ ᑎᓯᔪᓂ ᓇᓴᖏᓐᓂ ᐊᒻᒪ ᐊᒡᒑᖏᓐᓂ ᕼᐃᐊᕆ ᕙᓚᕈᑎᒧᑦ ᕿᑭᖅᑖᓗᒃ ᑲᑐᔾᔨᖃᑎᒌᖑᔪᓄᑦ ᐱᓕᕆᐊᒃᓴᐅᔪᓄᑦ.
ᐃᓄᑐᖃᖅ ᐱᒃᑯᒋᔭᐅᓂᖓ
ᖃᒪᓂᑦᑐᐊᖅ
ᑯᐃᓐᒥ ᐅᔭᒥᖓᓐᓄᑦ ᐊᑭᓕᖅᓱᖅᑕᐅᓇᑎᒃ ᐃᑲᔪᓲᓄᑦ ᑐᓂᔭᐅᓚᐅᖅᐳᖅ ᖃᒪᓂᑦᑐᐊᒥᐅᑕᒧᑦ ᐅᐃᓂ ᐅᕕᖓᔮᕐᒧᑦ ᓄᓇᕗᒻᒥ ᑲᒥᓴᓇᖓ ᓇᓕ ᑯᓱᒐᐅᑉ ᐳᓚᕋᕐᓂᖓᓂ ᓄᓇᓕᐅᔪᒧᑦ ᒫᔾᔨ 1-ᖑᑎᓪᓗᒍ.
ᑯᐃᑉ ᑭᒡᒐᖅᑐᖅᑎᖓ ᑲᓇᑕᒥ-ᑐᓂᔭᐅᓂᖓᓂ ᐅᔭᒥᐅᔪᖅ ᑐᓂᔭᐅᓚᐅᖅᐳᖅ ᐅᕕᖓᔮᒧᑦ, ᐃᒃᐱᒋᔭᐅᑦᑎᐊᖅᑐᒧᑦ ᐅᖃᐅᓯᕐᒧᑦ ᐅᖃᖅᑎᒻᒪᕆᐅᔪᒧᑦ, ᐱᓕᕆᓂᖓᓄᑦ ᐱᕙᓪᓕᐊᑎᑦᑎᓂᖓᓂ ᑐᕼᐋᓪᕉᖅᑐᑦ, ᓯᕗᕚᑦᑕ ᓂᐱᖏᓐᓂᑦ, ᐱᓕᕆᖃᑎᒌᒃᑐᒥ ᑕᑯᓴᐅᑎᑦᑎᓂᐅᔪᒥ ᐃᓄᐃᑦ ᐃᙱᐅᓯᖏᓐᓂᑦ, ᐅᓂᒃᑲᖅᑐᐊᓂᑦ ᐊᒻᒪ ᐊᔾᔨᙳᐊᓂᑦ ᑕᑯᒃᓴᐅᑎᑕᐅᓪᓗᑎᒃ ᐃᓄᐃᑦ ᐃᑦᓴᕐᓂᖃᕐᕕᖓᓐᓂ ᖃᒪᓂᑦᑐᐊᕐᒥ.
ᑯᓱᒐᖅ ᑐᓂᓯᓚᐅᖅᐳᖅ 18-ᑲᓐᓂᕐᓂ ᐅᔭᒥᖕᓂᑦ ᐊᑭᓕᖅᓱᖅᑕᐅᓇᑎᒃ ᐃᑲᔪᖃᑦᑕᕐᓂᕐᒧᑦ ᐱᓕᕆᓂᐅᔪᓂᑦ, ᐊᓐᓂᕐᓇᐃᑦᑐᕆᔾᔪᓯᐊᓂᑦ ᐊᒻᒪᓗ ᓄᓇᓕᖕᓂ ᐱᔨᑦᑎᕋᕐᓂᐅᔪᓄᑦ ᖃᒪᓂᑦᑐᐊᕐᒥᐅᓄᑦ ᐳᓚᕋᖅᑎᓪᓗᒍ ᓄᓇᓕᐅᔪᒧᑦ.
ᓇᓗᓇᐃᖅᑕᐅᓯᒪᓂᖓᓄᑦ ᖃᐅᒪᓂᖓ
ᐊᕐᕕᐊᑦ
ᑲᓇᑕᒥ ᓇᓗᓇᐃᖅᑕᐅᓯᒪᓂᖓᓄᑦ ᖃᐅᒪᓚᐅᖅᐳᖅ ᐊᕐᕕᐊᓄᑦ ᐱᓇᓱᐊᕈᓯᐅᓚᐅᖅᑐᒥ ᖁᔭᓐᓇᒦᒃ ᑎᑎᕋᖅᑕᐅᓯᒪᓂᐅᔪᒧᑦ ᑕᑯᒃᓴᐅᑎᑕᐅᔪᒥ ᓄᓇᓕᐅᔪᒥ. ᑎᑎᕋᖅᑕᐅᓯᒪᓂᐅᔪᖅ ᑕᑯᒃᓴᐅᑎᑕᐅᔪᒥ, ᑕᐃᔭᐅᔪᒥ ᒧᒥᖅᐸᓪᓕᐊᓂᐅᔪᖅ ᖃᐅᒪᓂᕐᒧᑦ, ᐱᓚᐅᖅᐳᖅ ᑭᑦᕋ ᑲᕼᐋᓇ ᐊᒻᒪ ᐃᐊᑦ ᐆᒥ ᑲᓇᑕᒥ ᑕᕐᕆᔭᓕᐊᖑᔪᒥ ᑐᓐᓂᖅᑯᓯᐊᖑᔪᒥ ᐊᔾᔨᓕᐅᕆᑦᑎᐊᓛᖑᓂᐅᔪᒥ ᑐᓴᒐᒃᓴᓕᐊᓄᑦ ᐅᖃᐅᓯᒃᓴᓄᓪᓘᓐᓃᑦ ᐱᓕᕆᐊᖑᔪᒧᑦ, ᑲᑎᙵᓂᐅᔪᓂᑦ, ᐃᓚᖓᓐᓂᓪᓘᓐᓃᑦ.
ᑎᑎᕋᖅᑕᐅᓯᒪᓂᐅᔪᒥ ᑕᑯᒃᓴᐅᑎᑦᑎᓂᐅᔪᒥ ᕿᒥᕐᕈᕗᖅ ᖃᓄᖅ ᓄᓇᓕᐅᔪᖅ ᐱᓐᓇᕆᔭᖃᕐᓂᖓᓂ ᒪᒥᓴᕐᓂᐅᔪᒥ ᖃᔅᓯᒐᓚᖕᓂ ᐃᒻᒥᓃᖅᑐᖃᓚᐅᖅᑎᓪᓗᒍ. ᑕᐅᑐᒃᑕᑐᐊᖃᑲᐃᓐᓇᖅᐳᖅ ᐊᕐᕕᐊᑉ ᐊᕐᕌᒍᑕᒫᒥ ᓯᓚᒥ ᑲᑕᐅᔭᕐᓄᑦ ᒧᒥᕐᓂᕐᒧᑦ ᓵᓚᖃᕋᓱᐊᕐᓂᐅᔪᒥ ᐊᒻᒪᓗ ᖃᓄᖅ ᐃᑲᔪᓲᖑᓂᖏᓐᓂ ᐊᒃᑐᖅᑕᐅᓯᒪᔪᓄᑦ ᐃᒻᒥᓃᕐᓂᕐᒧᑦ ᒪᒥᓴᕐᓂᖏᓐᓂ.
ᑲᕼᐊᓇ ᐊᒻᒪ ᐆ ᑲᓇᑕᒥ ᑎᑎᕋᖅᑎᐅᖃᑕᐅᕗᑦ ᐊᒻᒪ ᖁᙱᐊᖅᑕᐅᕙᒃᑐᓄᑦ ᐅᓂᒃᑲᖅᑎᐅᕗᑦ ᐱᓕᕆᓂᖓᑦ ᓴᖅᑭᓯᒪᔪᓂ ᓂᐅ ᔪᐊᒃ ᑕᐃᒻᔅᒥ, ᑲᓇᑕᒥ ᓄᓇᓕᕆᓂᐅᔪᓂ (National Geographic) ᐊᒻᒪ CBC-ᑯᓐᓂ.
ᐊᕐᕕᐊᓂ ᑕᕐᕆᔭᓕᐅᖅᑎᐅᔪᑦ ᐊᓕᐊᓇᐃᒍᓱᖕᓂᖃᒐᓛᓚᐅᖅᐳᑦ ᓇᓗᓇᐃᖅᑕᐅᓯᒪᓂᐅᔪᒥ ᐅᖃᐅᓯᐅᑎᓪᓗᒍ ᓱᕈᓯᕐᓄᑦ ᑕᐃᒪ ᐅᖃᓕᒫᒐᕋᓛᖑᔪᒥ, ᖃᕋᓴᐅᔭᒃᑰᕈᑎᓕᖕᒥ ᓄᓇᕐᔪᐊᒥ, ᐅᓂᒃᑲᖅᑐᐊᖑᔪᒥ ᔮᓐ ᐊᕐᓇᓗᒃᔪᐊᖅ ᖁᙱᐊᖅᑕᐅᕙᒃᑐᓂ, ᖃᐅᒪᕐᔪᐊᖅᑐᑦ ᐃᑯᒪᑦ ᐊᒻᒪᓗ ᑐᖑᔪᖅᑐᓂ ᐱᓕᕆᓂᐅᔪᓂᑦ, ᑎᑎᕋᖅᑕᐅᔪᒥ ᑮᑦ ᔭ. ᑳᓕᐅᕐᒧᑦ ᐅᖃᓕᒫᒐᒃᓴᙳᖅᑎᑕᐅᑎᓪᓗᒍ ᓅᕙᓐᓛᓐᒥ ᑕᖅᑭᑦ ᐱᖓᓱᓄᑦ ᑎᑎᕋᖅᑕᐅᓂᐅᕙᒃᑐᓂᑦ.
ᐱᙳᐊᓕᕐᓕᑦ
ᖃᒪᓂᑦᑐᐊᖅ/ᐊᕐᕕᐊᑦ
ᐊᕐᕕᐊᓂ ᐃᓐᓇᕐᓄᑦ ᐊᖑᑎᓂᑦ ᕼᐋᑭᖅᑎᐅᔪᑦ ᐊᐅᓪᓛᓚᐅᖅᐳᑦ ᖃᒪᓂᑦᑐᐊᕐᒧᑦ ᓵᓚᖃᕋᓱᐊᕆᐊᖅᑐᖅᖢᑎᒃ ᕿᑭᖅᑕᖏᑕ ᐃᕐᙳᒥᖓᓐᓄᑦ ᕼᐋᑭᕐᓂᕐᒧᑦ ᓵᓚᖃᕋᓱᐊᕐᓂᐅᔪᒥ ᐱᓇᓱᐊᕈᓯᐅᓚᐅᖅᑐᒥ. ᓵᓚᖃᕋᓱᐊᕐᓂᐅᔪᖅ ᑕᑯᒃᓴᐅᑎᑦᑎᓚᐅᖅᐳᖅ ᑕᓪᓕᒪᓂ ᓄᓇᓕᖕᓂ ᐱᙳᐊᖅᑎᐅᔪᓂᑦ ᖄᖓᒍᓪᓗ ᐊᕐᕕᐊᓂ ᐱᙳᐊᖅᑎᐅᔪᓄᑦ.
ᑭᖑᓪᓕᖅᐹᖑᔪᓂ ᖃᓄᐃᓕᖓᓂᐅᔪᓂ ᖃᐅᔨᒪᔭᐅᓚᐅᙱᓚᑦ ᑐᓴᒐᒃᓴᓕᐊᓂ ᐱᔭᕇᖅᓯᒪᔭᕆᐊᖃᕐᓂᖓᓐᓂ.