ᐃᓕᓐᓂᐊᖅᑎᑦ ᑑᒑᓕᒃ ᐃᓕᓐᓂᐊᕐᕕᒡᔪᐊᖓᓂ ᖁᕕᐊᓲᓯᐊᖅᑖᖅᑎᑕᐅᓚᐅᖅᐳᑦ ᖁᕕᐊᓱᒡᕕᐅᑉ ᓯᕗᓂᐊᓂ ᑕᒪᕐᒥᒃ ᐱᑎᑕᐅᓚᐅᕐᒪᑕ ᑲᒫᓗᐃᑦ ᐴᖏᓐᓂᒃ ᐴᖅᓯᒪᔪᓂᒃ ᖁᕕᐊᓲᓯᐊᓂᑦ ᑕᐅᓇᖓᑦ Sydney, N.S.ᒥᑦ ᑎᓴᐱᕆ 13−ᒥ ᓇᐅᔮᓂ.
ᑑᒑᓕᒃ ᐃᓕᓐᓂᐊᕐᕕᒡᔪᐊᖓᓐᓂᑦ ᐊᖓᔪᖄᑉ ᑐᖏᓕᖓ ᔪᓕᐊ ᒪᒃᐴᓴᓐ ᐅᖃᓚᐅᖅᐳᖅ ᐊᓈᓇᖓ, ᓯᐅᕆ, ᐊᒻᒪ ᐃᒃᓯᕋᕐᔪᐊᓂ ᑐᒃᓯᐊᕐᕕᐅᑉ ᐊᕐᓇᐃᑦ ᑲᑎᒪᔨᖏᑦ ᐃᓕᓐᓂᐊᕐᕕᖕᒧᑦ ᖁᕕᐊᓲᓯᐊᖅᑖᖅᑎᑦᓯᓚᐅᖅᐳᑦ ᐊᐅᔭᐅᓚᐅᖅᑐᒥ ᑕᒪᓐᓇ ᐅᐱᖔᒥᓗ ᐱᓕᕆᐊᕆᔭᐅᓚᐅᖅᖢᓂ.
ᐅᖃᓚᐅᖅᖢᓂᓗ ᑲᑎᑦᓯᓚᐅᕐᒪᑕ 170 ᐅᖓᑖᓄᑦ ᐴᖅᓯᒪᔪᓂᒃ ᑲᒫᓗᐃᑦ ᐴᖏᓐᓄᑦ ᖁᕕᐊᓲᓯᐊᒃᓴᓂᒃ ᑕᒪᒃᑯᐊ ᓄᔭᕐᓄᑦ ᐃᕐᒥᐅᑎᑦ, ᐱᐊᒃᑐᖅᓯᐅᑎᑦ ᓄᔭᕐᓄᑦ, ᑎᒥᒧᑦ ᐃᕐᒥᐅᑎᑦ, ᓄᔭᖅᓯᐅᑎᑦ, ᐃᓪᓚᐃᒍᑎᓪᓗ, ᖃᐅᔨᓴᐅᑎᑦ, ᓇᓴᐃᑦ, ᐊᒡᒑᑦ, ᓇᓴᖅᓯᐅᑦ, ᐱᐅᓴᐅᑎᑦ, ᐱᐅᓴᐅᑎᑦ ᐊᓯᖏᑦ, ᐊᒻᒪ ᐱᓐᖑᐊᕈᑎᒃᓴᐃᑦ ᐃᓕᓐᓂᐊᖅᑎᓄᑦ ᒍᕇᑦ 7-ᒥᑦ 12-ᒧᑦ.
ᑖᒃᑯᐊ ᖁᕕᐊᓲᓯᐊᒃᓴᐃᑦ ᑕᑖᖅᑐᑦ 11 ᐊᖏᔫᑉᓗᑎᒃ ᐴᕆᔭᐅᑉᓗᑎᒃ, Air Canada−ᑯᑎᒍᑦ ᐅᓯᔭᐅᓚᐅᖅᖢᑎᒃ ᕙᓂᐹᖕᒧᑦ, ᑕᐃᑲᓂ ᐅᓯᔭᐅᓕᖅᖢᑎᒃ ᑳᒻᒥᐊᒃᑯᓐᓄᑦ ᐊᒡᔭᖅᑕᐅᑉᓗᑎᒃ ᓇᐅᔮᓄᑦ.
“ᖁᕕᐊᓱᒡᕕᐅᑎᓪᓗᒍ ᐊᒃᓱᕈᕐᓇᕈᓐᓇᖅᐳᑦ ᐃᓕᓐᓂᐊᖅᑎᓄᑦ ᐃᓕᓐᓂᐊᕐᕕᒃ − ᑐᓐᖓᓇᖅᖢᓂ ᐅᖁᖅᖢᓂᓗ ᓂᕿᖃᖅᖢᓂᓗ, ᐃᑲᔪᖅᑕᐅᕕᐅᑉᓗᓂᓗ ᐃᓗᐊᖅᖢᓂᓗ − ᐅᒃᑯᐊᖅᓯᒪᔭᐅᖃᑦᑕᕐᒪᑦ ᖁᕕᐊᓱᒡᕕᖕᒥ ᐱᓇᓱᐊᕈᓯᓄᑦ ᒪᕐᕉᖕᓄᑦ ᐊᕝᕙᕐᒧᓪᓗ,” ᐅᖃᓚᐅᖅᐳᖅ ᒪᒃᐴᓴᓐ.
“ᐃᓚᖏᑦ ᐃᓕᓐᓂᐊᖅᑎᑦ ᖁᕕᐊᓲᓯᐊᖃᑦᑕᖏᒻᒪᑕ ᖁᕕᐊᓱᒡᕕᖕᒥ, ᐱᒻᒪᕆᐅᖃᑦᑕᖅᐳᖅ ᐅᕙᑉᑎᓐᓄᑦ ᑖᒃᑯᐊ Edmonton Lions Club−ᑯᑦ ᑐᓂᓯᖃᑦᑕᖅᓯᒪᓕᕐᒪᑕ ᖁᕕᐊᓲᓯᐊᒃᓴᓂᒃ ᐊᕐᕌᒍᓄᑦ ᐊᒥᓲᓕᖅᑐᓄᑦ, ᐊᒻᒪ ᐃᓚᖏᑦ ᖁᕕᐊᓲᓯᐊᒃᓴᐃᑦ ᐊᕐᕌᒍᒥ ᐊᑐᖅᑐᒥ ᐱᔭᐅᓚᐅᖅᖢᑎᒃ Northern Neighbours ᐃᑲᔪᖅᑎᖏᓐᓂᑦ.
“ᐊᓈᓇᒐᓗ ᐅᖃᐅᓯᕆᓚᐅᕋᑉᑎᒍ ᑕᒪᓐᓇ ᐅᖃᓚᐅᖅᖢᑎᒡᓗ ᑐᒃᓯᐊᕐᕕᖕᒥᐅᑕᐃᑦ ᐃᑲᔪᕈᒪᑉᓗᑎᒃ ᐃᓕᓐᓂᐊᕐᕕᖕᒥᒃ ᖁᕕᐊᓱᒡᕕᐅᑎᓪᓗᒍ, ᑕᐃᒪ ᐊᓈᓇᒐᓗ ᐃᑲᔪᓕᓚᐅᖅᒍᒃ ᖁᕕᐊᓲᓯᐊᒐᓛᓂᒃ ᐱᑉᓗᑕ ᓇᒃᓯᐅᑎᑉᓗᒋᓪᓗ ᐃᓕᓐᓂᐊᕐᕕᖕᒧᑦ, ᑕᐃᒪᓐᓇ ᐱᒋᐊᖅᑎᑦᓯᓕᓚᐅᖅᐳᑦ ᑕᒪᑐᒥᖓ ᖁᕕᐊᓲᓯᐊᖅᑖᖅᑎᑦᓯᖃᑦᑕᕐᓂᕐᒧᑦ.”
ᒪᒃᐴᓴᓐ ᐅᖃᓚᐅᖅᐳᖅ ᑕᒪᕐᒥᒃ ᐃᓂᒃᓴᕆᔭᐅᔪᓐᓇᖅᑐᑦ ᐃᓂᒋᔭᐅᓕᓚᐅᖅᐳᑦ ᒪᒃᐴᓴᓐ ᐊᓈᓇᒃᑯᖏᓐᓂ ᑲᒫᓗᐃᑦ ᐴᒃᓴᖏᓐᓂᒃ ᑕᑖᖅᖢᓂ ᐃᒡᓗᖓᑦ ᖁᕕᐊᓲᓯᐊᒃᓴᓂᒃ.
“ᐱᑕᖃᓚᐅᖅᐳᖅ 172-ᓂᒃ ᐴᖅᓯᒪᔪᒧᓂᒃ ᓇᒃᓯᐅᑎᔭᐅᓂᐊᖅᑐᓂᒃ ᑕᒡᕙᖓ ᓇᐅᔮᓄᑦ, ᐊᒻᒪ ᑕᒪᕐᒥᒃ ᐃᓕᓐᓂᐊᖅᑎᑦ ᒍᕇᑦ 7-ᒥᑦ 12-ᒧᑦ ᐱᑎᑕᐅᑉᓗᑎᒃ, ᐊᒻᒪ ᓴᓗᒻᒪᖅᓴᐃᔨ ᐊᒻᒪ ᑎᑎᕋᖅᑎᕗᑦ, ᐃᓕᓐᓂᐊᖅᑐᓕᕆᓂᕐᒧᑦ ᑲᑎᒪᔨᑦ ᓄᓇᓕᖕᓂ ᑎᑎᕋᖅᑎᖓᑦ ᐊᒻᒪ ᐃᓕᓐᓂᐊᖅᑎᓂᒃ ᐃᑲᔪᖅᑎ ᐃᓕᓐᓂᐊᖅᑎᑎᔨᓂᒃ,” ᐅᖃᓚᐅᖅᐳᖅ.
“ᐃᓕᓐᓂᐊᖅᑎᑦ ᐊᒥᓲᓂᖅᓴᐃᑦ ᖁᕕᐊᓲᓯᐊᒥᖕᓂᒃ ᐱᓚᐅᖏᑉᐳᑦ ᑭᓯᐊᓂ ᑎᓴᐱᕆ 13-ᖑᓕᕐᒪᑦ, ᐃᒡᓚᖃᑦᑕᓚᐅᖅᖢᑎᒡᓗ ᐃᓚᖏᑦ ᐊᖑᑎᑦ ᖁᕕᐊᓱᓚᐅᕐᒪᑕ ᑖᓐᓇᐅᖏᑦᑐᒥᒃ ᑎᒍᓯᑉᓗᑎᒃ, ᑕᐃᒪᓐᓇ ᒪᑐᐃᖅᓯᑉᓗᑎᒃ ᓇᓂᓯᓚᐅᕐᒪᑕ ᖃᓂᖅᓯᐅᑎᓂᒃ ᐊᐅᐸᓗᒃᓯᓕᐅᑎᓂᒃ ᐊᒻᒪ ᑯᑭᒃᓯᐅᑎᓂᒃ.
“ᑕᐃᒪᓐᓇ ᑭᐴᑎᑐᐃᓐᓇᖅᖢᒋᑦ ᖃᓄᐃᓚᐅᖏᑉᐳᖅ ᖃᓄᐃᓚᐅᖏᑉᐳᓪᓗ.
“ᖁᕕᐊᓲᓯᐊᒃᓴᐃᑦ ᐱᔭᐅᓚᐅᖅᐳᑦ ᐃᓕᓐᓂᐊᖅᑎᓄᑦ ᐃᓕᓐᓂᐊᖅᑎᑦ ᖁᕕᐊᓱᓚᐅᖅᖢᑎᒡᓗ ᐊᒻᒪ ᖁᒡᕕᐅᓚᐅᖅᖢᑎᒃ ᑕᒪᕐᒥᒃ ᖁᖓᖃᑦᑕᓕᖅᖢᑎᒡᓗ ᖁᕕᐊᓱᒃᖢᑎᒡᓗ ᑕᒪᐃᓐᓄᑦ.”