Skip to content

ᖃᐅᔨᒪᑦᓯᐊᖅᑐᖅ ᐃᓕᖁᓯᑐᖃᓂᒃ

ᐊᒃᓱᕈᕐᓇᖅᐸᒃᐳᖅ ᐊᑕᐅᓯᕐᒧᑦ ᐱᓕᕆᐊᕆᔭᐅᑉᓗᑎᒃ ᑕᒪᒃᑯᐊ ᐱᓕᕆᐊᕆᔭᐅᒋᐊᖃᖅᑐᑦ.

ᐃᓕᖁᓯᓕᕆᓂᕐᒧᑦ ᓴᓇᖃᑦᑕᕐᓂᕐᒧᓪᓗ ᐃᓕᓐᓂᐊᖅᑎᑎᔨ ᓚᐃᒪᑭ ᒪᓕᑭ ᑑᒑᓕᒃ ᐃᓕᓐᓂᐊᕐᕕᒡᔪᐊᖓᓂ ᐃᓕᓐᓂᐊᖅᑎᑦ ᐃᑲᔪᖅᑕᖏᑦ ᖃᔭᕆᐊᒥᑦ ᓂᐅᕋᖅᑎᑦᖢᒋᑦ ᓇᐅᔮᓂ ᐊᐅᓪᓛᖅᓯᒪᑎᑦᓯᑉᓗᓂ ᑕᖅᑭᐅᓚᐅᖅᑐᒥ. ᒪᑭᓕ ᐃᓕᓐᓂᐊᕐᕕᖕᒥ ᐊᖓᔪᖄᒧᑦ ᐊᐳᕆ ᐴᑦ ᐃᑲᔪᖅᑐᒻᒪᕆᐅᖃᑦᑕᖅᐳᖅ ᐃᓕᓐᓂᐊᕐᕕᖕᒥ ᐃᓕᖁᓯᑐᖃᓕᕆᓂᕐᒧᑦ ᐱᓕᕆᐊᕆᔭᐅᕙᒃᑐᓂᒃ. photo courtesy of Julia MacPherson

ᑑᒑᓕᒃ ᐃᓕᓐᓂᐊᕐᕕᒡᔪᐊᖓᓂ − ᐊᒻᒪ ᐃᓕᓐᓂᐊᕐᕕᒡᔪᐊᒥ ᐃᓕᓐᓂᐊᖅᑎᑕᐅᖃᑦᑕᓚᐅᖅᐳᑦ ᑐᓴᕐᕕᒃ ᐃᓕᓐᓂᐊᕐᕕᑐᐊᖑᑎᓪᓗᒍ ᓇᐅᔮᓂ − ᐱᕈᖅᐸᓪᓕᐊᑎᑦᓯᓯᒪᓪᓗᑎᒡᓗ ᐃᓕᖁᓯᑐᖃᓂᒃ ᐃᓕᓐᓂᐊᖅᑎᑎᓂᕐᒧᑦ. ᐃᓕᓐᓂᐊᕐᕕᖕᒥ ᐊᖓᔪᖄᖅ ᐋᐳᕆ ᐴᑦ ᐅᐱᑦᓯᐊᖅᐳᖅ ᐃᓕᓐᓂᐊᖅᑎᑎᓯᒥᒃ ᑕᐃᒪᓐᓇ ᐅᐱᒋᔭᐅᔪᒥᒃ ᐱᓕᕆᐊᖃᕐᓂᖓᓄᑦ.

ᓚᐃᒥᑭ ᒪᓕᑭ ᐱᓕᕆᔨᐅᓕᖅᐳᖅ ᐃᓕᓐᓂᐊᕐᕕᖕᓂ ᒪᕐᕉᖕᓂ ᐅᑭᐅᑦ ᖁᓕᑦ ᐅᖓᑖᓄᑦ, ᐃᓕᖁᓯᑐᖃᓕᕆᓂᕐᒧᑦ ᐱᖅᑯᓯᑐᖃᓕᕆᓂᕐᒧᓪᓗ ᓴᓇᓂᕐᒧᓪᓗ ᐃᓕᓐᓂᐊᖅᑎᑎᔨᐅᓯᒪᓕᖅᖢᓂ ᐅᑭᐅᓄᑦ 7 −ᓄᑦ.

ᐴᑦ ᐅᖃᓚᐅᖅᐳᖅ, ᐃᓕᓐᓂᐊᕐᕕᖕᒥ ᐊᖓᔪᖄᖑᑉᓗᓂ, ᖁᕕᐊᒋᔭᖃᑦᓯᐊᖅᐳᖅ ᒪᓕᑭᐅᑉ ᐃᓕᓐᓂᐊᖅᑎᑎᒍᑎᒋᖃᑦᑕᖅᑕᖏᓐᓂᒃ.

“ᓚᐃᒪᑭ ᖃᐅᔨᒪᑦᓯᐊᕐᒪᑦ ᑕᒪᐃᓐᓂᒃ ᑕᐃᑉᓱᒪᓂᑐᒥᐅᓂᒃ ᖃᐅᔨᒪᔭᑐᖃᓂᒃ ᐃᓕᖁᓯᓂᒃ ᐱᖅᑯᓯᓂᒡᓗ ᖃᐅᔨᒪᑦᓯᐊᖅᖢᓂ,” ᐅᖃᓚᐅᖅᐳᖅ ᐴᑦ.

“ᓴᓇᓂᕐᒧᑦ ᐃᓕᓐᓂᐊᖅᑎᑎᓯᕗᑦ, ᐱᖅᑯᓯᑐᖃᓂᒃ ᐊᑐᖅᖢᓂ ᐃᓕᖁᓯᑐᖃᓂᒃ ᐃᓕᓐᓂᐊᖅᑎᑦᓯᖃᑦᑕᖅᑐᖅ ᖃᒧᓯᐅᕐᓂᕐᒥᒃ, ᑕᖁᐊᒃᓴᖃᕐᕕᖕᓂᒃ, ᓴᒃᑯᓂᒡᓗ ᓇᑦᓯᖅᓯᐅᕈᑎᓂᒃ, ᐳᐊᕐᕆᑎᑐᖃᓂᒃ ᐅᓗᓂᒃ, ᐊᒻᒪ ᓄᓇᒧᑦ ᐊᐅᓪᓛᖅᓯᑦᓯᖃᑦᑕᖅᖢᓂ ᐃᓕᓐᓂᐊᖅᑎᑦᓯᑉᓗᓂ. ᐸᕐᓇᐅᑎᖃᖃᑦᑕᖅᖢᓂ ᓄᓇᒥ ᐃᓕᓐᓂᐊᕈᑕᐅᓂᐊᖅᑐᓂᒃ ᓄᑕᖃᓄᑦ ᑕᖕᒫᕐᕕᓕᐅᕐᓂᕐᒥᒃ, ᐃᖃᓗᓕᕆᓂᖅ ᑐᒃᑐᓕᕆᓂᖅ, ᐊᒻᒪ ᐊᒥᓱᓂᒃ ᖃᓄᑐᐃᓐᓇᖅ ᐱᖅᑯᓯᑐᖃᓂᒃ ᐊᔪᖏᓴᖃᑦᑕᖅᖢᒋᑦ. ᓄᑕᖃᓄᑦ ᖁᕕᐊᒋᔭᐅᑦᓯᐊᖅᐳᖅ ᐱᐅᒋᔭᐅᑦᓯᐊᖅᖢᓂᓗ ᐱᓕᕆᔨᓄᑦ.”

ᐴᑦ ᐅᖃᓚᐅᖅᐳᖅ ᑕᐃᒪ ᖃᖓᑐᐃᓐᓇᖅ ᐊᓯᐅᓐᓂᕈᓂ ᓄᓇᒥ ᓯᓚᑦᓯᐊᖑᖏᓪᓗᓂᓗ, ᐱᖃᑎᖃᕈᒪᒐᔭᖅᐳᖅ ᐊᑕᐅᓯᕐᒥᒃ.

“ᖃᐅᔨᒪᑦᓯᐊᕐᒪᑦ ᓄᓇᒥ ᐊᓐᓇᐅᒪᓂᕐᒥᒃ, ᖃᐅᔨᒪᑉᓗᓂᓗ ᖃᓄᐃᓕᐅᕈᓐᓇᕐᓂᖓᓄᑦ ᓯᓚᖓᓂᒡᓗ,” ᐅᖃᓚᐅᖅᐳᖅ. “ᑕᐃᒪ ᑭᖑᓪᓕᖅᐹᒥ ᐊᐅᓪᓚᖃᑕᐅᓚᐅᕋᒪ ᓄᓇᒧᑦ, ᓇᐅᔮᓂᑦ ᐊᐅᓪᓚᖅᖢᑕ ᐱᖅᓯᖅᑎᓪᓗᒍ ᐊᐅᓪᓛᖅᖢᑕ 70 ᒪᐃᔭᒧᑦ ᐅᖓᓯᖕᓂᖃᖅᑐᒧᑦ ᑕᒡᕗᖓ ᓄᖅᑲᕐᕕᒋᓂᐊᖅᑕᑉᑎᓐᓄᑦ ᑕᖕᒫᕐᕕᒋᓂᐊᖅᑕᑉᑎᓐᓄᐊᖅᖢᓂᑎᒍᑦ ᑐᐱᕐᕕᒋᓚᐅᖅᑕᑉᑎᓐᓄᑦ ᐱᓇᓱᐊᕈᓯᐅᓚᐅᖅᑐᒥ.”

ᑕᒪᒃᑯᐊ ᖁᕕᐊᒋᔭᐅᔪᑦ ᖁᕕᐊᒋᔭᐅᖏᑦᑐᓪᓗ, ᖃᓄᖅ ᐃᓕᖁᓯᖃᕐᓂᖏᑦ, ᖃᓄᐃᓕᐅᖃᑦᑕᕐᓂᖏᑦ ᐊᒻᒪ ᓂᕆᐅᒋᔭᖃᕐᓂᖏᑦ ᒪᒃᑯᒃᑐᑦ ᐃᓅᓱᒃᑐᑦ ᐊᓯᔾᔨᖅᐸᒃᐳᑦ ᐱᕈᖅᐸᓪᓕᐊᓂᑉᑎᓐᓂ.

ᑭᓯᐊᓂ, ᒪᓕᑭ ᖁᑦᓯᒃᑐᒥᒃ ᐃᓂᖃᖅᑎᑕᐅᖏᓐᓇᖅᐳᖅ ᐊᒥᓱᓄᑦ ᐃᓕᓐᓂᐊᖅᑎᓄᑦ ᓇᐅᔮᓂ ᐅᑭᐅᑦ ᖁᓕᑦ ᐅᖓᑖᓄᑦ.

ᐅᖃᓚᐅᖅᖢᓂ ᒪᓕᑭ ᐱᑦᓯᖃᑦᑕᕐᒪᑦ ᐅᐱᑦᓯᐊᖅᖢᓂᓗ ᐃᓕᓐᓂᐊᖅᑎᓂᒃ ᐱᓕᕆᖃᑎᒋᕙᒃᖢᓂᒋᓪᓗ ᐃᓕᓐᓂᐊᖅᑕᒥᖕᓂᒃ ᑭᓯᐊᓂ ᐃᓕᑦᓯᒃᐸᑕ.

“ᓄᑕᖃᑦ ᖁᕕᐊᒋᔭᖃᑦᓯᐊᕐᒪᑕ ᓄᓇᒥ ᐊᐅᓪᓛᖅᓯᒪᓂᕐᒥᒃ ᖃᐅᔨᒪᑉᓗᑎᒡᓗ ᒪᐃᒥᑭᐅᑉ ᐱᖁᔭᖏᓐᓂᒃ ᐱᒋᐊᖃᕐᓂᕐᒥᖕᓂᒃ. ᐊᒥᓱᑦ ᓄᑕᖃᑦ, ᐅᐱᓗᐊᒧᑦ, ᐱᓕᕆᐊᖃᕈᒪᖕᒪᑕ ᐱᖁᔭᖏᓐᓂᒃ,” ᐅᖃᓚᐅᖅᐳᖅ. “ᐃᓕᓐᓂᐊᖅᑎᑦ ᖃᓄᐃᓕᐅᖏᑦᓯᐊᖃᑦᑕᖅᐳᑦ ᐅᖃᐱᓗᖃᑦᑕᖏᑦᖢᑎᒡᓗ ᓚᐃᒥᑭ ᐃᓕᓐᓂᐊᖅᑎᑎᓯᓕᕌᖓᑦ ᓄᓇᒥ ᐊᔾᔨᒌᖏᑦᑐᓂᒃ ᑕᐃᒪᓐᓇᓗ ᐱᓕᕆᐊᕆᕙᒃᖢᒋᑦ ᓴᓇᓂᕐᒧᑦ ᐃᓕᓐᓂᐊᕐᕕᖓᓂ.”

ᐴᑦ ᐅᖃᓚᐅᖅᖢᓂ ᒪᓕᑭ ᐱᓕᕆᐊᖃᐃᓐᓇᖃᑦᑕᕐᒪᑦ ᐃᓕᓐᓂᐊᖅᑎᑦ ᐊᑐᕆᐊᖃᖅᑕᖏᓐᓂᒃ ᐃᓕᓐᓂᐊᕆᐊᖃᖅᑕᖏᓐᓂᒃ−− ᐃᓚᒌᑦ ᖃᒧᑎᖃᖏᑉᐸᑕ, ᓲᕐᓗ ᐆᒃᑑᑎᒋᓗᒍ, ᐃᑲᔪᕐᓂᐊᖅᐳᖅ ᓴᓇᖃᑎᒋᓗᒋᑦ ᐃᓕᓐᓂᐊᖅᑎᑦ.

“ᑕᐃᒪᓐᓇ ᐃᓅᖃᑎᒌᖕᓂᕐᒧᑦ ᐱᔾᔪᑎᖃᖅᑐᓂᒃ ᐃᓕᓐᓂᐊᖃᑕᐅᖃᑦᑕᕐᒪᑕᓗ ᐃᓕᖁᓯᑐᖃᓂᒃ ᐅᖃᐅᓯᑐᖃᓂᒃ, ᓚᐃᒥᑭᑕᖃᖏᑉᐸᑦ, ᑕᐃᒪᓐᓇ ᐃᓕᓐᓂᐊᖅᑎᑦᓯᔪᓐᓇᖃᑦᑕᕋᔭᖏᑉᐳᒍᑦ. ᖃᐅᔨᒪᑦᓯᐊᕐᒪᑦ ᐃᓄᖕᓂᒃ ᑕᒫᓂᒥᐅᑕᐅᕙᓚᐅᖅᑐᓂᒃ, ᐊᔪᖏᑦᓯᐊᖅᖢᓂᓗ ᓴᓇᖁᑎᑐᖃᓂᒃ ᓴᓇᓂᕐᒥᒃ ᓄᓇᒥᓗ ᐊᐅᓪᓛᖅᓯᒪᓂᕐᒥᒃ, ᑕᐃᒪᓐᓇ ᑕᒪᐃᓐᓂᒃ ᖃᐅᔨᒪᑉᓗᓂ ᑕᐃᒪᓐᓇᐃᒐᔪᖏᑦᖢᓂᓗ ᐊᓯᖏᓐᓂ,” ᐅᖃᓚᐅᖅᐳᖅ ᐴᑦ.

 

“ᐊᒥᓱᑦ ᐃᓕᖁᓯᓕᕆᓂᕐᒧᑦ ᐃᓕᓐᓂᐊᕈᑕᐅᔪᑦ ᐃᓕᓐᓂᐊᖅᑎᓄᑦ ᓄᑕᖃᓄᑦ ᑕᒪᒃᑯᐊ ᐃᓕᓐᓂᐊᖅᑎᑦᓯᒃᑲᓐᓂᕈᑎᒃᓴᑦ − ᑕᐃᑉᓱᒪᓂᑐᖃᓕᕆᓂᖅ ᐅᖃᐅᓯᑐᖃᐃᑦ ᑕᐃᑉᓱᒪᓂ ᐱᕙᓪᓕᐊᑎᑕᐅᓂᖏᑦ − ᑕᒪᒃᑯᐊᓗᒃᑖᖅ ᐃᓕᓐᓂᐊᖅᑎᑦᓯᒍᑎᒋᖃᑦᑕᖅᐸᖏᑦ.”

ᐅᖃᓚᐅᖅᐳᖅ ᓇᐅᔮᑦ ᐅᖃᐅᓯᕐᓂᒃ ᐃᓕᓐᓂᐊᖅᑎᑦᓯᔨᖃᑦᓯᐊᕐᒪᑕ ᐃᓕᓐᓂᐊᕐᕕᐊᓛᓂ ᐃᓕᓐᓂᐊᖅᑎᑎᔪᓂᒃ ᐅᖃᐅᓯᕐᓂᒃ ᐅᖃᐅᓯᖅᑕᓂᒡᓗ ᐃᓕᖁᓯᑐᖃᓂᒡᓗ, ᑭᓯᐊᓂ, ᑑᒑᓕᒃ ᐃᓕᓐᓂᐊᕐᕕᒡᔪᐊᖓᓂ, ᒪᓕᑭ ᓯᕗᓕᖅᑎᒋᔭᐅᕗᖅ ᐅᖃᐅᓯᓕᕆᓂᕐᒧᑦ, ᐃᓕᖁᓯᑐᖃᓕᕆᓂᕐᒧᑦ ᐱᖅᑯᓯᑐᖃᓕᕆᓂᕐᒧᑦ ᓄᓇᒥ ᐊᐅᓪᓛᖅᓯᒪᓂᕐᒧᓪᓗ

“ᐱᑕᖃᖏᑉᐸᑦ, ᑕᒪᓐᓇ ᐃᓕᖁᓯᓕᕆᓂᕐᒧᑦ ᐃᓕᓐᓂᐊᖅᑎᑎᔪᑎᖃᕋᔭᖏᑉᐳᑦ,” ᐅᖃᓚᐅᖅᐳᖅ ᐴᑦ. “ᐅᐱᑦᓯᐊᖅᖢᓂ ᐃᓕᓐᓂᐊᖅᑎᑦᓯᖃᑦᑕᕐᒪᑦ ᑕᐃᒪ ᐱᑦᓯᐊᖅᐸᑕ ᓄᑕᖃᑦ, ᐅᐱᑦᖢᑎᒃ ᐱᓕᕆᐊᕆᔭᒥᓂᒃ ᐅᐱᖃᑦᑕᖃᑕᐅᕗᖅ ᐃᓕᓐᓂᐊᖅᑎᑎᔨᖓᑦ ᐃᑲᔪᓚᐅᕋᒥ ᐃᓕᓐᓂᐊᖅᑎᑦᓯᑉᓗᓂ.”