ᖃᖓᑕᓲᒃᑯᑦ ᐊᐅᓪᓛᕐᓂᐅᔪᓂ ᑭᒡᓕᑲᖅᑎᑦᑎᒃᑲᓐᓂᐅᔭᖅᑐᓂ ᓄᓇᕗᒻᒥ ᐊᑐᓕᖅᑎᑕᐅᕗᑦ ᖃᔅᓯᒐᓚᖕᓄᑦ ᐱᔾᔪᑕᐅᔪᓄᑦ ᐃᓚᖃᖅᑐᒥ ᐊᖏᒡᓕᒋᐊᖅᑐᓄᑦ ᐃᓱᒫᓘᑕᐅᔪᓄᑦ ᓄᕙᒡᔪᐊᕐᓇᖅ-19–ᒥ ᐊᐃᑦᑐᐃᓂᐅᔪᒥ ᖃᓪᓗᓈᑦ ᓄᓇᖓᓐᓂ ᑲᓇᑕᒥ.
"ᑲᓇᑕᓕᒫᒥ ᒫᓐᓇ ᐊᑲᐅᙱᓕᐅᕈᑕᐅᕗᖅ ᓄᓇᓕᖕᓂ ᐊᐃᑦᑐᐃᓂᐅᔪᓂᑦ," ᐅᖃᓚᐅᖅᐳᖅ ᓯᕗᓕᖅᑎ ᔫ ᓴᕕᑲᑖᖅ, ᐃᓚᒋᐊᖅᓯᓪᓗᓂ "ᑭᖑᓪᓕᖅᐹᑦᑎᐊᖑᓪᓗᓂ ᐱᔪᒪᙱᑉᐸᕗᑦ ᐅᕙᓂ ᓄᓇᕗᒻᒥ."
"ᖃᐅᔨᒪᕗᒍᑦ ᐅᓗᕆᐊᓇᕐᓂᖃᕐᓂᖓᓂ ᐃᓄᖕᓂ ᓴᖅᑭᔮᕐᕕᐅᓂᖏᓐᓂ ᖃᓪᓗᓈᑦ ᓄᓇᖓᓐᓃᑦᑐᓄᑦ," ᐅᖃᓚᐅᖅᐳᖅ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓᑕ ᓘᒃᑖᖅ ᒪᐃᑯᓪ ᐹᑐᓴᓐ, ᑐᓴᒐᒃᓴᓕᐅᕐᓂᐅᔪᒥ ᐊᐃᑉᐹᓂ.
ᓴᓂᐊᓂ ᒥᒃᖠᒋᐊᖅᑎᑦᑎᓇᓱᐊᕐᓂᐅᔪᒥ ᐅᓗᕆᐊᓇᕐᓂᖓᓂ ᓴᖅᑭᔮᕐᕕᐅᓂᕐᒥ ᐊᒻᒪ ᐊᐃᑦᑐᐃᓂᖓᓂ ᓄᕙᒡᔪᐊᕐᓇᖅ-19,–ᒥ ᖃᖓᑕᓲᒃᑯᑦ ᐊᐅᓪᓛᕐᓂᐅᔪᓂ ᓄᖅᑲᖅᑎᑕᐅᓯᒪᓂᖓᓂ ᑐᕌᖓᓇᓱᐊᖅᐳᖅ ᐃᑲᔪᕐᓂᕐᒧᑦ ᓄᓇᕘᑉ ᐋᓐᓂᐊᕕᖏᓐᓂ.
"ᐋᓐᓂᐊᕕᕗᑦ ᐊᒃᓱᕉᓴᓗᐊᖅᐳᑦ ᐱᓪᓚᕆᐅᔪᓂ ᐃᓱᒫᓘᑕᐅᔪᓂ ᐃᓄᖕᓂ ᓄᓇᓕᖕᓂ, ᐃᓱᒪᔪᓂ ᓴᖅᑭᔮᕐᕕᐅᓚᐅᕐᓂᖏᓐᓂ ᖃᓪᓗᓈᑦ ᓄᓇᖓᓐᓃᓚᐅᖅᑎᓪᓗᒋᑦ," ᐅᓂᒃᑳᓚᐅᖅᐳᖅ ᓘᒃᑖᖅ.
ᐊᒻᒪᓗ, "ᐃᓱᒪᑦᑎᐊᕐᓂᐅᔪᒥ ᐱᔾᔪᑕᐅᔪᓂ ᐅᔾᔨᕈᓱᒃᐸᓪᓕᐊᓂᑦᑎᓐᓂ ᐃᒻᒥᖕᓂᒃ-ᐃᓯᖅᓯᒪᑎᑦᑎᓂᕐᒧᑦ ᒪᓕᒃᑕᐅᑦᑎᐊᙱᓐᓂᖓᓂ ᐊᒥᓱᓄᑦ ᐃᓄᖕᓄᑦ," ᐅᖃᓚᐅᖅᐳᖅ ᐹᑐᓴᓐ.
ᓇᓗᓕᖅᓯᒪᓂᖃᕐᔪᐊᕐᒪᑦ ᐃᒻᒥᖕᓂᒃ-ᐃᓯᖅᓯᒪᑎᑦᑎᓂᕐᒧᑦ.
ᐃᓚᖏᑦ ᐃᓄᐃᑦ ᐃᒻᒥᖕᓂᒃ-ᐃᓯᖅᓯᒪᐃᓐᓇᕈᓐᓇᕋᔭᙱᓐᓂᖏᓐᓂ.
ᐃᒻᒥᖕᓂᒃ-ᐃᓯᖅᓯᒪᑎᑦᑎᔪᑦ ᐃᓄᐃᑦ ᖃᖓᑕᓲᒃᑰᖃᑎᖃᓚᐅᖅᐳᑦ ᖃᖓᑕᓲᓄᑦ ᐃᒻᒥᖕᓂᒃ-ᐃᓯᖅᓯᒪᑎᑦᑎᓚᐅᙱᑦᑐᓂᑦ. ᐅᓇ ᓱᕙᓕᑭᐊᖑᕗᖅ ᐱᔾᔪᑎᖓᓐᓂ ᐃᒻᒥᓂᒃ–ᐃᓯᖅᓯᒪᑎᑦᑎᓂᐅᔪᒥ, ᐅᓂᒃᑳᓚᐅᖅᐳᖅ ᓄᓇᕘᑉ ᖁᑦᑎᓛᖓᓂ ᓘᒃᑖᖑᔪᖅ
"ᐃᓱᒪᓚᐅᖅᐳᒍᑦ ᐱᐅᓂᖅᐹᖑᓂᖓᓂ ᐃᓯᖅᓯᒪᐃᓐᓇᕐᓂᕐᒧᑦ ᐊᑕᐅᓯᕐᒥ ᐃᓂᐅᔪᒥ, ᑕᒪᒃᑭᑦ ᐃᓗᐊᓃᑦᑐᓂ ᐃᓯᖅᓯᒪᔭᕆᐊᖃᕐᓂᐅᔪᒥ ᐊᓂᒎᑎᖃᑎᒌᒍᓐᓇᕐᓂᖏᓐᓂ, ᐅᖃᓚᐅᖅᐳᖅ ᐹᑐᓴᓐ. ᑕᒪᓐᓇ ᐱᔪᓐᓇᖅᑎᑦᑎᓇᔭᖅᐳᖅ ᐃᓄᖕᓂ ᐊᐅᓪᓛᕈᓐᓇᕐᓂᖏᓐᓂ ᐊᑦᑕᓇᙱᑦᑐᒥ ᑲᑎᙵᓗᑎᒃ ᑕᒪᕐᒥᒃ ᐊᓂᒎᑎᓯᒪᓇᔭᕐᒪᑕ ᐃᒻᒥᖕᓂᒃ-ᐃᓯᖅᓯᒪᑎᑦᑎᓂᕐᒧᑦ ᓴᖅᑭᔮᕐᕕᐅᓚᐅᖅᑎᓪᓗᒋᑦ.
ᐱᒋᐊᕐᓗᓂ ᒫᔾᔨ 24–ᒥ 11:59 ᐅᓐᓄᒃᑯᑦ, ᑕᒪᕐᒥᒃ ᓄᓇᕗᒻᒥᐅᑕᑦ ᖄᖏᐅᔾᔨᔭᕆᐊᖃᕐᓂᐊᖅᐳᑦ ᒪᓕᒋᐊᓕᖕᒥ ᐅᓪᓗᓂ–14-ᓂ ᐃᓯᖅᓯᒪᐃᓐᓇᕆᐊᖃᕐᓂᐅᔪᒥ ᖃᓪᓗᓈᑦ ᓄᓇᖓᓐᓂ ᐃᓯᓚᐅᖅᑳᕋᑎᒃ ᓄᓇᕗᒻᒧᑦ. ᐃᒻᒥᓂᒃ–ᐃᓯᖅᓯᒪᐃᓐᓇᕈᓐᓇᕐᓂᐊᖅᐳᑦ ᐋᑐᕚᒥ, ᐅᐃᓂᐸᐃᒡ, ᐃᐊᑦᒪᓐᑕᓐ ᐅᕝᕙᓘᓐᓃᑦ ᔭᓗᓇᐃᕝᒥ.
ᐱᓕᕆᔨᕐᔪᐊᖑᔪᓄᑦ ᓴᓇᔨᐅᔪᑦ, ᐅᑎᕈᒪᔪᓂ ᓄᓇᕗᒻᒧᑦ, ᑐᒃᓯᕋᕆᐊᖃᖅᐳᑦ ᐃᓚᐅᑎᑕᐅᙱᓐᓂᐅᔪᒥ ᐊᖏᖅᑕᐅᓯᒪᓗᓂ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓᑕ.
ᐹᑐᓴᓐ ᐅᓂᒃᑳᓚᐅᖅᐳᖅ, ᐱᓕᕆᔨᕐᔪᐊᖑᔪᓄᑦ ᓴᓇᔨᐅᔪᑦ ᐃᓅᕗᑦ ᐃᓚᐅᖃᑕᐅᔪᓂ ᑐᓂᓯᕙᒃᑐᓂ "ᐱᓪᓚᕆᐅᔪᓂ ᐊᐅᓚᓂᐅᔪᓂ ᐃᓅᖃᑎᒌᖕᓂᕐᒧᑦ," ᓲᕐᓗ: ᓂᕿᓄᑦ, ᐆᒻᒪᖅᑯᑎᓄᑦ ᐊᒻᒪ ᐃᒪᕐᒧᑦ.
ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐸᖅᑭᔨᐅᔪᑦ, ᐃᓱᒪᒋᔭᐅᔪᓂ ᐱᓕᕆᔨᕐᔪᐊᖑᔪᓄᑦ ᓴᓇᔨᐅᓂᖏᓐᓂ, ᐊᑐᕆᐊᖃᖅᑎᑕᐅᕗᑦ ᑮᓇᑉᐸᖕᓂᑦ ᐅᓪᓗᓄᑦ 14–ᓄᑦ ᐃᖅᑲᓇᐃᔭᖅᑎᓪᓗᒋᑦ. ᐃᖅᑲᓇᐃᔭᙱᑦᑎᓪᓗᒋᑦ, ᐊᐱᕆᔭᐅᕗᑦ ᐃᒻᒥᖕᓂ–ᐃᓯᖅᓯᒪᐃᓐᓇᕐᓂᕐᒧᑦ. ᖃᐅᑕᒫᒥ ᖃᐅᔨᒋᐊᖃᑦᑕᕆᐊᖃᖅᐳᑦ ᓇᓗᓇᐃᖅᓯᓂᕐᒥ ᖁᐱᕐᕈᓂ ᐊᐃᑦᑐᐃᓐᓇᖅᑐᒥ ᐋᓐᓂᐊᕈᑎᖃᙱᓐᓂᖓᓐᓂ.
ᑎᑎᕋᖅᓯᒪᓂᐅᔪᑦ ᐱᓕᕆᔨᕐᔪᐊᖑᔪᓄᑦ ᓴᓇᔨᐅᔪᓄᑦ ᓱᓕ ᐋᖅᑭᒃᓱᖅᑕᐅᕙᓪᓕᐊᕗᑦ. ᒫᓐᓇᐅᔪᒥ, ᖃᖓᑕᓲᓂ ᐱᓕᕆᔨᐅᔪᓂ, ᑐᐊᕕᕐᓇᖅᑐᒧᑦ ᐋᓐᓂᐊᖅᑐᓄᑦ ᖃᖓᑕᓲᒥ ᐃᖅᑲᓇᐃᔭᓲᑦ, ᐆᒻᒪᖅᑯᑎᖃᕐᕕᖕᒥ ᐊᐅᓚᐅᓯᕆᔩᑦ ᐊᒻᒪ ᐃᓄᐃᑦ ᐃᓚᒋᔭᐅᔪᓂ ᐋᖅᑭᒃᓯᓂᕐᒧᑦ ᐋᔩᖃᑎᒌᖕᓂᐅᔪᒥ ᐱᓕᕆᔾᔪᓯᐅᔪᓂ ᑎᑎᕋᖅᑕᐅᓯᒪᓃᖃᑕᐅᕗᑦ.
ᐃᓄᑐᐃᓐᓇᐃᑦ ᐃᓕᓯᔪᓐᓇᖅᐳᑦ ᑐᕐᓯᕋᐅᑎᒥᒃ ᐃᓱᒪᒋᔭᐅᔪᒪᓂᕐᒧᑦ ᐱᓕᕆᔨᕐᔪᐊᖑᔪᓄᑦ ᓴᓇᔨᐅᓂᖓᓄᑦ. ᖃᐅᔨᒋᐊᕐᓗᒍ CPHOTravelRequests@gov.nu.ca ᑐᓴᒐᒃᓴᒃᑲᓐᓂᕐᓄᑦ.