ᑭᕙᓪᓕᕐᒥᐅᕐ ᐃᑲᔪᒃᑲᐅᑎᓪᓗᒋᑦ, ᐃᑲᔪᖅᓯᒪᓪᓚᕆᖕᒥᔪᑦ ᑐᓴᕐᕕᒃ ᐃᓕᓐᓂᐊᕐᕕᐊᓛᕐᒥᐅᑕᑦ ᐊᒻᒪᓗ ᑐᒑᓕᒃ ᐃᓕᓐᓂᐊᕐᕕᒡᔪᐊᕐᒥᐅᑕᑦ ᓇᐅᔮᓂ, ᐊᒻᒪᓗ ᕕᒃᑐ ᓴᒻᒧᖅᑐᖅ ᐃᓕᓐᓂᐊᕐᕕᖕᒥᐅᑕᑦ ᐃᒡᓗᓕᒑᕐᔪᖕᒥ, ᑮᓇᐅᔭᓕᐅᕐᓂᖃᓚᐅᖅᑐᑦ $3,000 ᐅᖓᑖᓂ ᐋᓐᓂᐊᖅᑖᖅᐸᒃᑐᑦ ᐋᖅᑭᒃᑕᐅᔪᓐᓇᐃᓪᓕᔪᓂᒃ ᖃᐅᔨᓴᖅᑕᐅᔾᔪᑎᒃᓴᖏᓐᓄᑦ ᑎᐅᕆ ᕚᒃᔅ ᐃᖅᑲᐅᒪᔭᐅᑉᓗᓂ ᐅᓪᓚᖕᓂᖃᓚᐅᖅᑎᓪᓗᒋᑦ ᒪᕐᕉᖕᓂᒃ ᓄᓇᓖᖕᓂᒃ.
ᓇᐅᔮᓂ ᐃᓕᓐᓂᐊᖅᑐᑦ ᐅᓪᓚᓚᐅᖅᑐᑦ ᓯᑎᐱᕆ 7-ᒥ, ᐃᒡᓗᓕᒑᕐᔪᖕᒥᐅᑦ ᐃᓕᓐᓂᐊᖅᑐᖁᑎᖏᑦ ᐅᓪᓚᓚᐅᖅᖢᑎᒃ ᓯᑎᐱᕆ 14-ᒥ. ᐊᑐᓂ ᓄᓇᓖᒃ ᑮᓇᐅᔭᓕᐅᓚᐅᖅᑑᒃ $1,500 ᐅᖓᑖᓂ.
ᕕᒃᑐ ᓴᒻᒧᖅᑐᕐᒥ ᐃᓕᓐᓂᐊᖅᑎᑦᑎᔨ ᒋᓕᓐ ᐳᕋᑯᐸᐃᖕᒃ ᐅᖃᓚᐅᖅᑐᖅ ᐃᒡᓗᓕᒑᕐᔪᖕᒥᒎᖅ ᐅᓪᓚᒃᑐᑦ ᓇᐃᓐᓂᖅᓴᒃᑯᑦ ᐅᓪᓚᓚᐅᖅᑐᑦ ᓇᓄᖃᕐᓂᕋᖅᑕᐅᓂᖓᓄᑦ ᑭᓯᐊᓂ ᐅᓪᓚᒋᐊᖅᑐᖅᓯᒪᔪᑦ 110-ᖑᓚᐅᖅᑐᑦ ᐅᖓᑖᓂᓘᓐᓃᑦ, ᐃᓕᓐᓂᐊᖅᑐᑦ ᐃᓕᓐᓂᐊᓕᓵᖅᑐᓂᒃ ᐃᓕᓐᓂᐊᕐᓂᓕᖕᓄᑦ 12-ᒧᑦ ᐃᓚᐅᖃᑕᐅᓚᐅᖅᑐᑦ, ᐊᒻᒪᓗ ᐃᒻᒪᖄ ᐊᕙᑎᑦ ᐊᓯᖏᑦ ᓄᓇᖅᑲᑎᒋᔭᐅᔪᑦ.
ᐅᖃᖅᖢᓂ ᑕᒪᕐᒥᒎᖅ ᖁᕕᐊᓱᑦᑎᐊᓚᐅᖅᑐᑦ ᐅᖃᖃᑎᒌᒃᖢᑎᒃ ᐊᒻᒪᓗ ᐅᓲᔮᖅᑐᖅᑐᖅᖢᑎᒃ ᐃᒥᒐᒃᓴᖅᑐᖅᖢᑎᒡᓗ ᐅᓪᓛᓂᒃᑲᒥᒃ.
"ᐳᑭᖅᑕᓖᑦ, ᐳᑭᖅᑕᓕᙳᐊᑦ ᐊᒻᒪᓗ ᐆᒪᔪᓕᕆᔨᒃᑯᑦ ᖃᐅᔨᓴᖅᑎᐅᓚᐅᖅᑐᑦ ᐅᓪᓚᒃᑎᓪᓗᒋᑦ, ᐊᒻᒪᓗ ᐱᖓᓱᑦ ᐃᓕᓐᓂᐊᖅᑎᑦᑎᔩᑦ ᖃᐅᔨᓴᖅᑎᐅᓚᐅᕐᒥᔪᑦ ᓄᖅᑲᖅᑕᕐᕕᖕᓂᒃ ᐅᓪᓚᒡᕕᐅᔪᒃᑯᑦ<" ᑕᐃᒪᓐᓇ ᐅᖃᖅᖢᓂ ᐳᕋᑯᐸᐃᖕᒃ.
"ᑮᓇᐅᔾᔭᒃᓴᓚᐅᖅᑐᒍᑦ $1,523.75-ᒥᒃ, ᓯᐳᓚ ᓴᒻᒧᖅᑐᖅ ᑮᓇᐅᔾᔭᒃᓴᕐᓂᖅᐹᖑᑉᓗᓂ $286.45-ᒥᒃ."
ᐳᕋᑯᐸᐃᖕᒃ ᐅᖃᖅᖢᓂ ᕕᒃᑐ ᓴᒻᒧᖅᑐᖅ ᐃᓕᓐᓂᐊᕐᕕᖕᒥᐅᑕᑦ ᐊᕐᕌᒍᑕᒫᒃᑯᒡᒎᖅ ᐃᓕᓐᓂᐊᖅᑐᓂᒃ ᖃᐅᔨᒪᑎᑦᑎᓇᓱᓲᑦ ᑭᓇᐅᓚᐅᕐᒪᖔᑦ ᑎᐅᕆ ᕚᒃᔅ ᐊᒻᒪᓗ ᓱᓇᓂᒃ ᐱᕚᓪᓕᖅᑎᑦᑎᓚᐅᕐᒪᖔᑦ.
ᐅᖃᖅᖢᓂ ᓄᑕᖅᑲᑦ ᐃᒡᓗᓕᒑᕐᔪᖕᒥ ᓂᐅᕕᖃᑦᑕᓚᐅᕐᒪᑕ ᓂᐱᙵᑖᓂᒃ ᖃᐃᑕᐅᓯᒪᔪᓂᒃ ᑎᐅᕆ ᕚᒃᔅ ᑲᑐᔾᔨᖃᑎᒌᒃᑯᖏᓐᓄᑦ. ᑎᑎᕋᕈᓐᓇᖅᖢᑎᒃ ᑭᓇᒥᒃ ᐅᓪᓚᒍᔾᔨᖕᒪᖔᑕ ᓂᐱᙵᑖᒃᑯᑦ (ᐅᓪᓚᒍᑎᔭᕋ __) ᐊᒻᒪᓗ ᓂᐱᑎᖦᖢᒍ ᔭᐸᒥᓄᑦ ᐅᓪᓚᒋᐊᖅᑳᖅᑎᓐᓇᒋᑦ.
photo courtesy Julia MacPherson
"ᐊᑖᑕᒐ ᐃᓅᔪᓐᓃᓚᐅᖅᓯᒪᖕᒪᑦ ᐋᓐᓂᐊᖅᑖᖅᓯᒪᑉᓗᓂ ᐋᖅᑭᒃᑕᐅᔪᓐᓇᐃᓪᓕᓯᒪᔪᒃᑯᑦ, ᑕᐃᒪᐃᒻᒪᑦ ᓄᑕᕋᒃᑲ ᑎᑎᕋᓚᐅᖅᑐᑦ ᐅᓪᓚᒍᔾᔨᓂᕋᖅᖢᑎᒃ ᐊᑖᑕᑦᑎᐊᒥᓂᒃ." ᑕᐃᒪᓐᓇ ᐅᖃᖅᖢᓂ ᐳᕋᑯᐸᖕᒃ.
ᓇᐅᔮᓂ ᐅᓪᓚᒃᑐᑦ ᐸᕐᓇᒍᔾᔭᐅᓚᐅᖅᑐᑦ ᑐᒑᓕᒃ ᐃᓕᓐᓂᐊᕐᕕᒡᔪᐊᕐᒥ ᐃᖃᐃᓕᓴᐃᓂᕐᒧᑦ ᐃᓕᓐᓂᐊᖅᑎᑦᑎᔨᒧᑦ ᒋᐅᕆ ᒥᓇᐅᑕᒧᑦ, ᐊᒻᒪᓗ ᑐᓴᕐᕕᒃ ᐃᓕᓐᓂᐊᕐᕕᐅᓛᑉ ᐊᖓᔪᖅᑳᖓᑕ ᑐᖏᓕᕆᔭᖓᓄᑦ ᔪᓖᓐ ᐃᑦᕿᓕᖕᒧᑦ.
ᓇᐅᔮᕐᒥᐅᑦ ᐃᓕᓐᓂᐊᖅᑐᖁᑎᖏᑦ ᑲᑎᓚᐅᖅᑐᑦ ᑐᓴᕐᕕᒃ ᐃᓕᓐᓂᐊᕐᕕᖕᒥ ᐅᑉᓗᕈᒥᑖᓂᒃᑲᒥᒃ ᓯᑎᐱᕆ 7-ᒥ ᐱᒋᐊᕐᕕᒋᓂᐊᖅᑕᖓᓂᒃ, ᐊᒻᒪᓗ ᐅᓪᓚᒃᖢᑎᒃ ᐃᒥᖅᑕᕐᕕᖕᒧᑦ ᐅᑎᒧᓪᓗ ᐃᓕᓐᓂᐊᕐᕕᖕᒧᑦ.
ᐅᑎᕋᒥᒃ ᐃᓕᓐᓂᐊᖅᑐᑦ ᐃᓕᓐᓂᐊᕐᕕᖕᒧᑦ ᓂᕆᑎᑕᐅᓚᐅᖅᑐᑦ ᓯᓚᒥ, ᐃᒥᒐᒃᓴᖅᑐᖅᖢᑎᒡᓗ, ᒪᒪᖅᑐᓂᒡᓗ ᓂᐅᕕᐊᒃᓴᖃᖅᖢᓂ ᐊᒻᒪᓗ 50/50-ᒥᒃ ᑮᓇᐅᔭᓕᐊᒃᑯᑦ ᐊᒧᓯᔪᖃᖅᖢᓂ.
ᑐᒑᓕᒃ ᐃᓕᓐᓂᐊᕐᕕᐅᑉ ᐃᓱᒪᑕᖓᑕ ᑐᖏᓕᖓ ᔪᓕᐊ ᒪᒃᕘᓴᓐ ᐅᖃᓚᐅᖅᑐᖅ ᒥᓇᐅᑕ ᐊᒻᒪᓗ ᐃᑦᕿᓕᒃ ᐱᓕᕆᖃᑎᒌᒃᑎᓪᓗᒋᒎᖅ ᐸᕐᓇᐃᓂᕐᒧᑦ ᑕᒪᑐᒥᙵ ᐱᓕᕆᑦᑎᐊᖅᑐᐊᓘᓚᐅᖅᑑᒃ, ᐊᒻᒪᓗ ᐊᓕᐊᓇᐃᓚᐅᕐᓂᕋᖅᖢᒍ ᑕᑯᑉᓗᓂ ᐃᓕᓐᓂᐊᖅᑐᓂᒃ ᑕᒪᐃᓐᓂᒃ ᐃᓕᓐᓂᐊᕐᕕᖕᓂᒃ ᐅᓪᓚᖃᑎᒌᒃᑐᓂᒃ. ᐅᖃᖅᖢᓂᓗ ᑎᐅᕆ ᕚᒃᔅᒎᖅ ᐃᖅᑲᐅᒪᔭᐅᑦᑎᐊᖅᑐᖅ ᓇᐅᔮᕐᒥᐅᑦ ᐃᓕᓐᓂᐊᖅᑐᖁᑎᖏᓐᓄᑦ, ᐊᒻᒪᓗ ᑑᒑᓕᖕᒥ ᐃᓕᓐᓂᐊᖅᑐᑦ ᐱᓕᕆᓪᓚᕆᓲᑦ ᐃᖅᑲᐅᒪᔭᐅᖁᑉᓗᒍ ᖃᐅᔨᒪᔭᐅᓪᓚᕆᓚᐅᖅᑐᖅ.
"ᐱᔫᒥᓇᑦᑎᐊᓲᖅ ᓄᑕᖅᑲᑦ ᐊᐱᖅᓱᒃᑲᑯᓘᖕᒪᑕ," ᑕᐃᒪᓐᓇ ᐅᖃᖅᖢᓂ ᒪᒃᕘᓴᓐ.
"ᐊᐱᕆᓲᑦ ᓱᓕ ᓱᖕᒪᑦ ᑎᐅᕆ ᕚᒃᔅ ᐃᖢᐊᖅᓴᐃᔨᓄᑦ ᐋᖅᑭᒃᑕᐅᔪᓐᓇᓚᐅᙱᓚᖅ? ᓱᖕᒪᑦ ᑕᐃᒪᐃᑦᑐᒥᒃ ᓂᐅᑖᖅᑎᑕᐅᔭᕆᐊᖃᓚᐅᖅᐸ? ᐱᒻᒪᕆᐊᓘᓚᐅᕐᓂᖓ ᐊᔪᙱᑦᑐᕐᔪᐊᒻᒪᕆᐊᓘᓚᐅᕐᓂᖓ ᖃᐅᔨᒪᔭᐅᔪᖅ ᓄᑕᖅᑲᓄᑦ ᐊᒻᒪᓗ ᓄᑕᖅᑲᑦ ᑎᐅᕆᕚᒃ ᐅᑉᓗᖓᓂᒃ ᐱᒻᒪᕆᐅᑎᑦᑎᔪᑦ."