ᓛᑯᓗᒃ ᕕᓕᐊᒻᓴᓐ ᐸᑐᕆᐅᑉ ᐊᑎᖓ ᖃᐅᔨᒪᔭᐅᓕᑲᐅᑎᒋᓚᐅᖅᐳᖅ ᐊᒻᒪ, ᖃᐅᔨᒪᑦᓯᐊᖅᐸᕗᑦ ᖃᓄᐃᓕᐅᕈᓐᓇᕐᓂᖓᓄᑦ.
ᓛᑯᓗᒃ ᐃᓐᖏᐅᓯᐅᖕᒪᑦ ᐊᖃᐅᓯᐅᓪᓗᓂ. ᑲᓛᖡᑦ ᓄᓇᖓᓐᓂᒥᐅᑕᒥᒃ ᐊᓈᓇᖃᖅᖢᓂ ᑕᖅᑭᓂᒃ 6-ᓂᒃ ᓇᔾᔨᑎᓪᓗᒍ ᐅᐃᑖᓚᐅᖅᓯᒪᕗᖅ ᕕᓕᐊᒻᓴᓐ ᐸᑐᕆᐅᑉ ᐊᑖᑕᖓᓂᒃ ᐊᑯᑭᑦᑐᒥ. ᖃᓪᓗᓈᖑᓪᓗᓂ ᐃᓄᒃᑎᑐᑦ ᐅᖃᕈᓐᓇᖅᖢᓂ, ᖃᐅᔨᒪᓇᓂᓗ ᐊᑯᑭᑦᑐᒥᐅᑦ ᐅᖃᐅᓯᖏᓐᓂᒃ, ᐃᓐᖏᐅᓯᖏᓐᓂᒃ ᖃᓄᐃᓕᐅᕈᓯᖏᓐᓂᒡᓗ ᑲᑎᑎᑕᐅᑎᓪᓗᒋᑦ.
"ᑲᑎᑎᑕᐅᑎᓪᓗᒋᑦ ᐊᖃᐅᓯᕐᒥᒃ ᐃᓐᖏᕆᐊᓕᓚᐅᖅᓯᒪᕗᖅ... ᑕᒪᐃᓐᓄᑦ ᐃᓄᖕᓄᑦ ᑐᓴᕐᓂᕆᔭᐅᓕᓚᐅᖅᐳᖅ ᑕᐃᒪᓐᓇ ᑕᒡᕙ ᖁᕕᐊᓱᒃᑎᓪᓗᒋᑦ ᑲᑎᑎᑕᐅᒐᒥᒃ ᐊᑦᓯᖅᑕᐅᒋᐊᓕᓚᐅᖅᐳᖓ ᓯᖓᐃᒋᔭᐅᓪᓗᖓ ᐊᓈᓇᓐᓄᑦ ᓛᑯᓗᖕᒥᒃ, ᐊᖑᑕᐅᒍᒪ ᐊᕐᓇᐅᒐᓗᐊᕈᒪᓘᓐᓃᑦ," ᕕᓕᐊᒻᓴᓐ ᐸᑐᕆ ᐅᖃᓚᐅᖅᐳᖅ, ᐃᒡᓚᖅᖢᓂ ᖁᕕᐊᓱᒃᖢᓂ ᐅᓂᒃᑳᖅᖢᓂ. "ᐊᒥᓱᑦ ᐃᓄᐃᑦ ᑕᐃᒪᓐᓇ ᐃᓐᖏᖅᐸᒃᐳᖅ ᐃᓐᖏᐅᓯᕐᒥᒃ ᐅᕙᓐᓂᒃ ᑕᑯᒑᖓᒥᒃ."
ᕕᓕᐊᒻᓴᓪ ᐸᑐᕆ ᐱᕈᓚᐅᖅᓯᒪᕗᖅ ᐱᕈᖅᓴᓪᓗᓂᓗ ᓵᔅᑲᑑᓐᒥ – "ᐃᓂᒃᓴᕆᔭᐅᓗᐊᖏᑦᖢᓂ ᓴᓐᖏᔪᒥᒃ ᐊᑯᑭᑦᑐᒥᐅᓄᑦ," ᐅᖃᓚᐅᖅᐳᖅ.
ᐊᓈᓇᖓ ᐊᒻᒪ ᐊᓯᐊ ᐊᑯᑭᑦᑐᒥᐅᑕᖅ ᐊᕐᓇᖅ ᐃᓕᓐᓂᐊᖅᑎᑎᓚᐅᖅᓯᒪᕗᑦ ᑮᓇᑉᐸᒃᓯᒪᓪᓗᓂ ᒧᒥᕈᓐᓇᕐᓂᕐᒧᑦ ᐅᑭᐅᖃᖅᑎᓪᓗᒍ 13-ᓂᒃ.
"ᑕᐃᒪᓐᓇ ᐱᕈᖅᓴᓪᓗᖓ ᐊᑐᖅᓯᒪᕙᕋ," ᐅᖃᓚᐅᖅᐳᖅ ᒧᒥᕐᓂᕐᒥᒃ ᐱᔾᔪᑎᖃᖅᖢᓂ, ᕿᕐᓂᖅᑕᐅᓪᓗᓂ ᑮᓇᖓ ᐊᒥᐊᖅᓯᒪᖃᑦᑕᖅᖢᓂ, ᐊᐅᓚᖃᑦᑕᖅᖢᓂᓗ ᒧᒥᕐᓂᕐᒧᑦ ᐊᐅᓚᒍᓯᕐᓂᒃ, ᐊᓯᒥᓂᒃ ᐱᖃᑎᖃᖅᖢᓂ' "ᐃᓂᒋᔭᐅᔪᓄᐊᑲᑕᖅᖢᓂ."
ᓯᓚᑦᑐᖅᓴᕐᕕᒡᔪᐊᒥ, ᕕᓕᐊᒻᓴᓐ ᐹᑐᕆ ᐃᓕᓐᓂᐊᓚᐅᖅᐳᖅ ᐃᓕᖁᓯᑐᖃᓕᕆᓂᕐᒧᑦ ᐃᓱᒪᒍᑎᒃᓴᓂᒃ ᒐᕙᒪᓕᕆᓂᕐᒧᓪᓗ ᑭᓯᐊᓂ ᖃᓄᐃᓕᐅᖃᑦᑕᓚᐅᖅᐳᖅ ᑎᑎᕋᖅᖢᓂ ᖃᓄᐃᓕᐅᕈᑎᖃᖅᖢᓂᓗ.
ᐃᓕᓐᓂᐊᖅᖢᑎᒃ, ᐅᐃᓂᓗ, ᑭᐊᒍᕆᒥᐅᑕᖅ ᐅᐃᖓ, ᐸᕐᓇᒃᓯᒪᒍᑎᖃᓚᐅᕐᒪᑎᒃ ᐅᑭᐅᖅᑕᖅᑐᒧᑦ ᓄᒃᑎᕈᒪᓪᓗᑎᒃ. ᓄᒃᑎᓚᐅᖅᐳᖅ 2005-ᖑᑎᓪᓗᒍ.
"ᐱᒻᒪᕆᐅᑎᒃᑲᒃᑯᑦ ᐃᓄᖕᓂᒃ ᐱᓕᕆᖃᑎᖃᕆᐊᖃᕋᒪ ᐃᓄᖕᓂᒡᓗ ᐱᓕᕆᖃᑎᖃᕐᓗᖓ," ᐅᖃᓚᐅᖅᐳᖅ. "ᐃᖃᓗᖕᓂ, ᐱᖃᓐᓇᖃᕋᑉᑕ ᑕᐃᒪᓐᓇ ᖃᓄᐃᓕᐅᕐᓂᕐᒧᑦ ᑕᑯᓐᓇᒐᒃᓴᐅᓂᕐᒧᑦ ᐱᓕᕆᐊᖃᖅᖢᑎᒃ ᐊᑯᓂᐅᓕᖅᑐᖅ."
ᐊᕐᕌᒍᖃᖅᑐᖅ 38-ᓂᒃ ᑕᐃᒪᓐᓇ ᖃᓄᐃᓕᐅᖃᑦᑕᖅᐳᖅ ᐊᕐᓇᐅᓂᕐᒥᓄᑦ ᑕᑯᑎᑦᓯᓇᓱᐊᖅᖢᓂ.
"ᐃᓅᓯᖃᕋᑦᑕ, ᑕᒪᐃᑎᒍᑦ ᒐᕙᒪᒃᑯᓐᓄᑦ ᐊᐅᓚᑕᐅᓪᓗᑕ ᐊᒻᒪ ᐋᖅᑭᐅᒪᑎᑕᐅᓪᓗᑕ, ᑕᐃᒪᓐᓇ ᐊᕐᓇᐃᑦ ᓂᐱᖃᖅᑕᐃᓕᑎᑕᐅᓂᖅᓴᐅᓪᓗᑎᒃ ᓴᓐᖐᓐᓂᖅᓴᐅᑎᑕᐅᒐᓱᐊᖅᖢᑎᒡᓗ. ᖃᐅᔨᒪᕗᖓ ᒪᒥᓴᕆᐊᖃᕋᑦᑕ ᐃᓱᒪᒋᔭᐅᑦᓯᐊᕐᓗᑕᓗ ᐊᔪᖏᓐᓂᑦᑎᓐᓂᒃ ᑕᐃᒪᓐᓇ ᐊᕐᓇᐃᑦ ᐊᔪᖏᑎᑕᐅᖃᑕᐅᒃᐸᑕ," ᐅᖃᓚᐅᖅᐳᖅ.
ᓴᖅᑭᔮᖅᑎᑎᓂᖅ ᐃᓄᐃᑦ ᐃᓕᖁᓯᑐᖃᖏᓐᓂᒃ ᐱᖅᑯᓯᑐᖃᖏᓐᓂᒡᓗ, ᐃᖕᒥᒃᑯᒃ ᑲᑐᔾᔨᓗᑎᒡᓗ, ᐱᓕᕆᐊᕆᒍᒪᒐᒥᐅᒃ.
"ᓴᓐᖏᔪᒻᒪᕆᐅᔪᒥᒃ ᐃᓕᖁᓯᖃᕋᓗᐊᖅᑎᓪᓗᑕ ᐊᒻᒪ ᐅᖃᐅᓯᖃᕋᓗᐊᖅᑎᓪᓗᑕᓗ (ᐅᕙᒍᑦ) ᐃᖕᒥᒃᑯᑦ ᖃᓄᐃᓕᐅᕈᓐᓇᕐᓂᑦᑎᓐᓄᑦ ᐅᖃᕈᓐᓇᖅᐳᒍᑦ. ᑕᐃᒪᓐᓇᐃᒃᑲᑦᑕ ᐃᓅᓪᓗᑕ, ᐅᖃᓚᐅᖅᐳᖅ. "ᐃᓕᖁᓯᕗᑦ ᐱᖅᑯᓯᕗᑦ ᒪᓕᒃᖢᒋᑦ ᐱᔪᓐᓇᖅᑎᑦᓯᒐᑦᑕ ᑭᒃᑰᓂᑦᑎᓐᓂᒃ. "ᐃᓕᖁᓯᕗᑦ ᑕᐃᒪᓐᓇ ᐊᑐᖅᑕᐅᖁᔭᐅᖕᒪᑕ ᐃᓄᖕᓄᑦ, ᑕᐃᒪᓐᓇᓗ ᑕᒪᓐᓇ ᖁᕕᐊᒋᓪᓗᒍ."
ᕕᓕᐊᒻ ᐸᑐᕆ ᖃᓄᐃᓕᐅᕈᑎᒥᓂᒃ ᑕᑯᒃᓴᐅᑎᑎᓇᓱᐊᖃᑦᑕᖅᐳᖅ ᐱᕙᓪᓕᐊᔪᑎᒍᑦ ᐊᔪᖏᓐᓂᒃᑯᓪᓗ: ᑎᑎᕋᖅᖢᓂ, ᒧᒥᖅᖢᓂ, ᑎᑕᒃᖢᓂ, ᖃᓄᐃᓕᐅᖅᖢᓂ ᑕᑯᓐᓇᒐᒃᓴᐅᓪᓗᓂ ᐊᒻᒪ ᖃᓄᐃᓕᐅᕈᑎᖃᖅᖢᓂ ᐊᓯᖓᑕ ᖃᓄᐃᓕᐅᕈᓯᖏᓐᓂᒃ.
"ᐊᔪᖏᓐᓂᐊᕐᓗᓂ, ᐊᔾᔨᒌᖏᑦᑐᓂᒃ ᐊᑐᕐᓂᐊᕐᓗᓂᓗ, ᑐᑭᖃᖅᐳᖅ ᓄᑖᓂᒃ ᐃᓱᒪᖃᕈᓐᓇᕋᑦᑕ ᐱᕙᓪᓕᐊᓗᑎᒡᓗ ᑲᑐᔾᔨᓗᑕ," ᐅᖃᓚᐅᖅᐳᖅ.
ᑕᐃᒪᓐᓇ ᐱᓕᕆᐊᖃᖃᑦᑕᖅᖢᓂ ᓂᕈᐊᖅᑕᐅᓚᐅᖅᐳᖅ ᓵᓚᒃᓴᐅᑎᖃᖅᖢᓂ ᕿᓐᓄᐊᔪᐊᖅ ᐋᓯᕙᐅᑉ ᐃᖅᑲᐅᒪᔭᐅᓂᖓᓄᑦ ᓵᓚᒃᓴᐅᑎᒥᒃ ᔫᓐᖑᓚᐅᖅᑐᒥ.
ᕕᓕᐊᒻᓴᓐ ᐸᑐᕆ ᐊᓯᒥᓂᒃ ᑕᐃᒪᐃᓕᐅᖃᑦᑕᖁᔨᓪᓗᓂ, ᑲᑐᔾᔨᖃᑎᒌᒃᖢᓂ ᐱᓕᕆᓂᕐᒧᑦ ᓱᓕ ᐃᓱᒪᖃᖅᐳᖅ. ᑖᒃᑯᐊ ᑮᓇᐅᔭᑦ ᓵᓚᒃᓴᐅᑎᒋᓚᐅᖅᑕᓂ $10,000 ᐊᑐᖅᑕᐅᓂᐊᖅᐳᑦ ᐃᑯᒪᖃᕐᓂᕐᒧᑦ ᓄᑖᓂᒃ ᑕᑯᒃᓴᐅᑎᑎᓪᓗᓂ.
"ᑕᐃᒪᓐᓇ ᖃᓄᐃᓕᐅᕈᓐᓇᕐᓂᑦᑎᓐᓄᑦ ᐃᑯᒪᖃᕐᓗᓂ ᐱᓕᕆᐊᖃᕐᓂᐊᖅᐳᒍᑦ – ᑲᓚᖃᕐᓗᓂ, ᖃᓄᐃᑦᑑᓗᓂᓗ – ᑕᐃᒪᓐᓇ ᐊᑐᕐᓗᑕ ᑕᒪᒃᑯᓂᖓ ᖃᕆᑕᐅᔭᕋᓛᓂᒃ. ᑕᐃᒪᓐᓇ ᐊᔾᔨᐅᖏᑦᑑᓂᐊᖏᑦᑐᖅ ᑭᓯᐊᓂ ᐊᑲᐅᓯᕚᓪᓕᕈᑕᐅᓂᐊᖅᐳᖅ ᖃᓄᐃᓕᐅᕈᑎᒋᖃᑦᑕᖅᑕᑦᑎᓐᓄᑦ," ᐅᖃᓚᐅᖅᐳᖅ.