ᕿᓚᒥᐊᓗᒃ ᐅᑉᓗᒥᒧᑦ ᑎᑭᑉᐳᒍᑦ! ᐸᕐᓇᖕᓂᐊᓕᖅᐳᒍᑉ ᐊᖑᑎᐅᑉ ᓴᓇᓯᒪᔭᖓᓄᑦ: ᖁᕕᐊᓱᒡᕕᖕᒧᑦ, ᔨᓱᓯᐅᑉ ᐃᓅᓕᕐᕕᒃᓯᐅᕐᕕᖓᓄᑦ.
ᐃᓚᖏᑦ ᐃᓄᐃᑦ ᐅᖃᕋᔭᖅᐳᑦ ᐃᖅᑲᐃᑎᑕᐅᒋᐊᖃᕐᓂᖏᓐᓄᑦ (ᖃᐅᔨᒪᑎᑕᐅᒋᐊᖃᕐᓂᖏᓐᓄᑦ) ᑕᐃᒪᓐᓇ ᐱᐅᒐᔭᖏᒻᒪᑦ ᑭᓯᐊᓂ, ᐊᓯᐊᒍᑦ, ᐃᖅᑲᐃᑎᑕᐅᖃᑦᑕᖏᒃᑯᑦᑕ ᖃᐅᔨᒪᑎᑕᐅᒐᔭᖏᓐᓇᑦᑕ. ᐃᓱᒪᒐᒪ, ᑕᒪᓐᓇ ᐅᓂᒃᑳᑐᐃᓐᓇᐅᖏᓐᓂᖓᓄᑦ − ᑕᐃᑦᓱᒪᓂᑐᖃᖅᐱᒋᐊᖅᑕᐅᓚᐅᖅᓯᒪᖕᒪᑦ ᐃᓚᖏᓐᓄᑦ ᑎᒥᐅᔪᓄᑦ ᓄᖅᑲᖅᑎᑕᐅᓇᓱᐊᕋᓗᐊᖅᖢᓂ, ᐱᒻᒪᕆᐅᔪᒃᑯᑦ ᓱᓕ ᖁᕕᐊᓱᒍᑎᒋᕙᒃᐸᕗᑦ ᖁᕕᐊᓱᒡᕕᒃ.
ᑕᒪᒃᑯᐊ ᑭᒃᑯᑐᐃᓐᓇᐃᑦ ᑕᒪᕐᒥᒃ ᐃᓚᐅᑎᓐᓇᓱᐊᖅᖢᒋᑦ, ᐱᔾᔪᑎᖃᖅᑎᑕᐅᓇᓱᐊᖅᑎᑦᖢᒋᓪᓗ ᐊᒻᒪ ᐃᓚᒋᔭᐅᑎᑕᐅᓪᓗᑎᒡᓗ, ᑕᐃᒪᓐᓇ ᖁᕕᐊᓱᒡᕕᒃᓯᐅᑦᓯᐊᕐᓂᐊᖅᐳᑦ.
ᑕᐃᒪᓐᓇᓗ ᖁᕕᐊᓱᒡᕕᖕᒥ ᐃᓱᒪᒋᒋᐊᖃᖅᐸᕗᑦ ᐃᓅᖃᑎᕗᑦ ᐃᖕᒥᓂᒃ ᐱᔾᔪᑎᖃᓗᐊᖏᓪᓗᓂ ᐃᖢᐊᖅᑐᒦᑎᑕᐅᖁᓪᓗᒋᑦ ᐊᑲᐅᔪᒃᑰᖁᓪᓗᒋᓪᓗ ᐃᓄᐃᑦ ᐊᔪᒻᖅᓴᖅᑐᑦ, ᐅᕙᓘᓐᓃᑦ ᖃᐅᔨᒪᖁᓪᓗᒋᑦ ᐃᓱᒪᒋᔭᐅᓂᖏᓐᓄᑦ.
ᐃᓐᖑᑕᕗᑦ ᖃᐃᓚᐅᖅᐳᖅ ᑐᓴᕋᒥ ᐊᓈᓇᑦᓯᐊᖓᑦ ᐊᑲᐅᖏᓐᓂᖓᓄᑦ ᐊᒻᒪ, ᖁᓕᑦᑕᐅᔭᒥᓂᒃ ᓂᕕᖓᖅᓯᓪᓗᓂ ᐃᓯᕋᒥ, ᓂᐱᖁᖅᑐᑦᓯᐊᖅᖢᓂ ᐃᒪᓐᓇᐃᓕᓚᐅᖅᐳᖅ, “ᐊᓈᓇᑦᓯᐊᖅ ᖃᐃᔪᖓ ᓂᕐᕆᑎᓂᒃ ᐃᕐᒥᒋᐊᖅᑐᖅᖢᖓ!” ᐃᑲᔪᕆᐊᖅᑐᖅᑐᑯᓗᒃ ᐅᑭᐅᖃᑐᐃᓐᓇᖅᖢᓂ ᓯᑕᒪᓂᒃ.
ᐃᓐᓇᐅᓂᖅᓴᐅᔪᒍᑦ ᑕᐃᒪᓐᓇᐃᓕᐅᕆᐊᖃᕋᓗᐊᕐᒪᑕ. ᑕᑯᓐᓇᑐᐃᓐᓇᖏᓪᓗᑎᒃ ᐅᖃᓪᓚᑐᐃᓐᓇᖏᓪᓗᑎᒃ ᐃᑲᔪᕆᐊᓪᓚᕆᒋᐊᖃᖅᐳᑦ. ᑕᐃᒪᓐᓇ ᑐᓂᐅᖃᐃᓂᖅ ᑐᑭᖃᕐᒪᑦ. ᑕᐃᒪᓐᓇ ᖃᓄᑐᐃᓐᓇᖅ ᐱᓕᕆᖃᑕᐅᓗᑎᑦ ᐃᑲᔪᕈᓐᓇᖅᐳᑎᑦ, ᑮᓇᐅᔭᑎᒍᓪᓘᓐᓃᑦ ᐅᐸᒃᓯᒪᑐᐃᓐᓇᕐᓗᑎᓪᓘᓐᓃᑦ ᐳᓛᕐᓗᑎᑦ ᐅᖃᕈᒪᔪᖃᕐᓂᖅᐸᑦ ᐊᑲᐅᖏᓕᐅᕈᑎᖃᕐᓂᖅᐸᑦ ᐃᑲᔪᕐᓂᐊᕐᓗᒋᑦ ᐳᓛᖅᑎᖃᖁᓪᓗᒋᓪᓗ ᐃᓅᑑᖁᖏᓪᓗᒋᑦ.
ᐊᒻᒪᓗ ᐅᔾᔨᕐᓇᖃᑦᑕᖅᐳᖅ ᖁᕕᐊᓱᒡᕕᐅᓂᐊᓕᕌᖓᑦ ᑭᐱᖑᓇᕐᓂᖓᓄᑦ ᐊᒃᓱᕈᕐᓇᕐᓂᖓᓄᓪᓗ. ᑕᐃᒪᓐᓇ ᑕᒡᕙ ᒪᒃᑯᒃᑐᑦ ᐱᖃᑎᖃᕐᓂᖅᓴᐅᒋᐊᖃᖅᐳᑦ ᐃᓐᓇᑐᖃᓂᒃ ᖃᐅᔨᒪᖃᑦᑕᐅᑎᕙᓪᓕᐊᓕᕐᓗᑎᒡᓗ. ᐱᐅᓴᐃᓂᐊᕈᑦᑕ ᖁᕕᐊᓱᒡᕕᒃᓯᐅᑎᓂᒃ ᑐᓂᕐᕈᑎᒃᓴᒥᒡᓗ ᕿᓂᕈᕕᑦ, ᖃᐅᔨᒪᒋᐊᖃᖅᐸᕗᑦ ᑕᒪᒃᑯᐊ ᓱᓇᖃᖏᑦᑐᑦ ᐊᔪᖅᓴᖅᑐᑦ ᖁᔭᓐᓇᒦᕈᑎᒋᓗᒍᓗ ᖃᓄᐃᖏᓐᓇᑦᑕ (ᐱᖃᕐᓂᖅᓴᐅᓂᑦᑎᓐᓄᓪᓗ) ᓂᕿᒃᓴᓂᒃ ᐊᑐᖅᑕᐅᒋᐊᖃᓪᓚᕆᒃᑐᓂᒡᓗ.