ᖃᒪᓂᑦᑐᐊᕐᒥ ᓯᖓᐃᔪᓄᑦ ᓂᑭᑦᑎᐊᕙᓕᕆᓂᕐᒧᑦ ᐱᓕᕆᐊᖑᔪᒥ ᑲᒪᒋᔭᖃᓚᐅᖅᐳᑦ ᐃᒥᐊᓗᙳᐊᒥ ᐆᒃᑐᕋᕐᓂᕐᒥ ᑭᐳᒥᑦ ᓄᓇᓕᖕᓂ ᓂᐅᕕᕐᕕᖕᒥ ᓄᓇᕐᔪᐊᒧᑦ ᐃᒥᐊᓗᖕᒧᑦ ᐃᓪᓕᐊᑉ ᐊᒃᑐᖅᑕᐅᓯᒪᓂᖓᓄᑦ (FASD) ᐅᔾᔨᕈᓱᖕᓂᕐᒧᑦ ᐅᓪᓗᖓᓐᓂ ᖃᒪᓂᑦᑐᐊᕐᒥ ᓯᑎᐱᕆ 9−ᖑᑎᓪᓗᒍ.
ᖃᓄᐃᓐᓂᐅᔪᖅ ᐋᖅᕿᒃᓱᖅᑕᐅᓚᐅᖅᐳᖅ ᖃᒪᓂᑦᑐᐊᕐᒥ ᓯᖓᐃᔪᓄᑦ ᓂᑭᑦᑎᐊᕙᓕᕆᓂᕐᒧᑦ ᐱᓕᕆᐊᖑᔪᒥ ᑐᕌᖅᑎᑦᑎᖃᖅᖢᓂ ᐊᐅᓚᑦᑎᔨᐅᔪᒧᑦ ᓗᐊᕈᓪ ᕕᕉᒍᕐ, ᑮᓇᐅᔭᖃᖅᑎᑕᐅᓪᓗᑎᒃ ᓄᓇᕗᒻᒥ ᒐᕙᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ (ᓄᓇᓕᖕᓂ ᖃᓄᐃᒋᑦᑎᐊᕐᓂᖅ) ᐊᒻᒪ ᐱᓕᕆᐊᖑᓪᓗᓂ ᕼᐋᒻᓚᒃᑯᓐᓂ ᖃᒪᓂᑦᑐᐊᕐᒥ.
ᐋᓂ ᐊᓇᐅᑕᓕᒃ ᐊᒻᒪ ᑭᒻ ᓯᑉᒥᓐ ᒪᒪᖅᑐᓂ ᐃᒥᐊᓗᙳᐊᓂᒃ ᑐᓂᐅᖅᑲᐃᕗᑦ (ᐃᒥᐊᓗᖃᙱᑦᑐᒥ ᐃᒥᕐᒥ) ᐅᖃᐅᓯᒃᓴᖃᕐᕕᐅᔪᒥ ᑭᐳᒥᑦ.
photo courtesy Laurel Kreuger
ᐃᒥᐊᓗᙳᐊᖑᔪᒥ-ᐆᒃᑐᕋᕐᓂᖅ ᑭᐳᖓ ᑐᓂᓯᓂᖃᓚᐅᖅᐳᖅ ᐱᕕᒃᓴᖃᕐᓂᐅᔪᒥ ᐃᓚᒋᔭᐅᔪᓄᑦ ᓯᖓᐃᔪᓄᑦ ᓂᕿᑦᑎᐊᕙᓕᕆᓂᕐᒧᑦ ᐱᓕᕆᐊᖑᔪᒥ ᑐᓐᓂᖅᓴᕐᓯᓂᕐᒧᑦ ᐅᖃᐅᓯᒃᓴᓂ ᐊᓈᓇᒃᓴᐅᔪᓄᑦ, ᐊᒻᒪ ᐃᓄᓕᒫᓄᑦ, ᐱᒻᒪᕆᐅᓂᖓᓂ ᓯᖓᐃᔪᓄᑦ ᐊᕐᓇᓄᑦ ᐃᒥᐊᓗᖃᑦᑕᙱᓐᓂᖓᓐᓄᑦ ᐱᑎᑦᑎᑦᑕᐃᓕᒪᓂᕐᒧᑦ ᐃᒥᐊᓗᖕᒧᑦ ᐃᓪᓕᐊᑉ ᐊᒃᑐᖅᑕᐅᓯᒪᓂᖓᓄᑦ.
ᐃᒥᐊᓗᖕᒧᑦ ᐃᓪᓕᐊᑉ ᐊᒃᑐᖅᑕᐅᓯᒪᓂᖓᓄᑦ ᐱᑎᑕᐅᓲᖑᕗᖅ ᐊᓈᓇᐅᔪᖅ ᐃᒥᐊᓗᖃᑦᑕᖅᑎᓪᓗᒍ ᓯᖓᐃᑎᓪᓗᒍ. ᐅᔾᔨᕐᓇᕈᑕᐅᔪᑦ ᐃᓚᖃᖅᐳᑦ ᑎᒥᒃᑯᑦ ᐃᓅᑎᓪᓗᒍ ᐃᓕᖅᑯᓯᕐᓗᒃᑐᓂ, ᐱᕙᓪᓕᐊᑎᑕᐅᓂᖓᓄᑦ ᑭᖑᕙᕈᑕᐅᔪᓂᑦ, ᐃᓕᑦᑎᓂᕐᒧᑦ ᐊᔪᕈᑕᐅᔪᓂᑦ ᐊᒻᒪ ᐃᖅᑲᐅᒪᓂᕐᒧᑦ ᐊᑲᐅᙱᓕᐅᕈᑕᐅᔪᓂ.
ᑕᐃᒪᐃᑎᑦᑕᐃᓕᒪᓂᕐᒧᑦ, ᐊᕐᓇᐃᑦ ᐃᒥᐊᓗᖃᑦᑕᓪᓗᐊᙱᑉᐳᑦ ᓯᖓᐃᑎᓪᓗᒋᑦ, ᐅᖃᓚᐅᖅᐳᖅ ᑯᕉᒍᕐ.
“ᐱᒻᒪᕆᐅᕗᖅ ᓴᖅᑭᑎᑦᑎᓂᕐᒧᑦ ᐅᔾᔨᕈᓱᖕᓂᐅᔪᒥ ᐊᑲᐅᙱᓕᐅᕈᑕᐅᔪᒥ ᐊᒻᒪ ᑭᒃᑯᓕᒫᑦ ᐅᔾᔨᕈᓯᖕᓂᖏᓐᓂ, ᐱᓗᐊᖅᑐᒥ ᓯᖓᐃᔪᓄᑦ ᐊᕐᓇᓄᑦ ᐊᒻᒪ ᐃᓄᖕᓄᑦ ᖃᓂᒋᔭᖏᓐᓂᑦ, ᓲᕐᓗ ᐊᐃᑉᐸᖏᓐᓂ ᐊᒻᒪ ᐃᓚᒋᔭᒥᓂᑦ, ᐃᑲᔪᖅᓱᐃᔪᓐᓇᕋᔭᖅᑐᓂ ᐊᒃᓱᕈᕈᑎᒋᔭᒥᓄᑦ ᐃᒥᐊᓗᒃᑕᐃᓕᒪᓂᕐᒧᑦ ᓯᖓᐃᓂᖏᓐᓂ,” ᐅᖃᓚᐅᖅᐳᖅ ᑯᕉᒍᕐ.
“ᐱᓕᕆᐊᕆᔭᑦᑎᓐᓂ ᖃᐅᔨᔪᒪᔪᖅᑕᖃᐃᓐᓇᐅᔭᖅᑐᖅ ᐊᒻᒪ ᐊᒥᓱᐊᓗᖕᓂ ᐃᓄᖕᓂ ᖃᐃᓲᖑᕗᑦ ᒪᒪᑕᒋᐊᖅᑐᖅᖢᑎᒃ ᐃᒥᐊᓗᖃᙱᑦᑐᓂ ᐃᒥᐊᓗᙳᐊᓂᑦ ᑐᓂᐅᖅᑲᖅᐸᒃᑕᑦᑎᓐᓂ.
“ᐱᓕᕆᓲᖑᒋᕗᒍᑦ ᑕᒪᒃᑭᐅᒪᔪᒥ ᖃᓄᐃᓐᓂᐅᔪᒥ ᑕᐃᔭᐅᔪᒥ ᐃᒥᐊᓗᙳᐊᒥᒃ ᐹᑎᖃᕐᓂᐅᔪᒥ ᑖᔅᓱᒥᖓᑦᑕᐃᓐᓇᖅ ᐱᔾᔪᑕᐅᔪᒧᑦ.”
ᑯᕉᒍᕐ ᐅᖃᓚᐅᖅᐳᖅ ᐊᔪᕐᓇᖅᐳᖅ ᖃᐅᔨᒪᓂᕐᒧᑦ ᖃᓄᑎᒋ ᓇᓂᑐᐃᓐᓇᖅ ᓄᓇᓕᐅᔪᒥ ᖃᐅᔨᒪᖕᒪᖔᑕ, ᖃᐅᔨᒪᙱᒻᒪᖔᑕᓗ, ᐃᒥᐊᓗᖕᒧᑦ ᐃᓪᓕᐊᑉ ᐊᒃᑐᖅᑕᐅᓯᒪᓂᖓᓄᑦ ᐱᙱᑎᑕᐅᔪᓐᓇᕐᓂᖓᓂ.
ᐅᖃᓚᐅᖅᐳᖅ ᐅᔾᔨᕈᓱᖕᓂᖅ ᐱᐅᔫᕗᖅ ᓄᓇᓕᖕᓂ, ᑭᓯᐊᓂ ᐱᒻᒪᕆᐅᓪᓗᓂ ᐅᖃᐅᓯᒃᓴᐅᕗᖅ ᖃᒪᓂᑦᑐᐊᕐᒥ ᓯᖓᐃᔪᓄᑦ ᓂᑭᑦᑎᐊᕙᓕᕆᓂᕐᒧᑦ ᐱᓕᕆᐊᖑᔪᒥ ᐅᖃᐅᓯᕇᓐᓇᖃᑦᑕᕈᒪᕙᖓᑦ.