ᓄᓇᕗᒻᒥ ᒐᕙᒪᒃᑯᑦ (GN) ᐊᖏᖅᓯᒪᓂᖃᖅᐳᑦ ᓇᓗᓇᐃᖅᓯᓂᖏᓐᓂ ᑐᖁᓂᐅᔪᓂ ᓄᓇᕗᒻᒥᐅᓂ ᐃᓅᔪᓐᓃᓚᐅᖅᑐᓄᑦ ᓄᕙᒡᔪᐊᕐᓇᖅ-19–ᒧᑦ ᓄᓇᕘᑉ ᓯᓚᑖᓃᑎᓪᓗᒋᑦ.
ᓯᕗᓂᐊᓂ ᓄᓇᕗᒻᒥ ᒐᕙᒪᒃᑯᑦ ᓇᖏᕐᓂᕆᔭᖓᑦ ᓇᐃᓴᐃᓂᐅᔪᒥ ᑐᖁᓂᐅᔪᓂ ᓄᓇᕗᒻᒥᐅᓂ ᖃᓪ,ᓈᑦ ᓄᓇᖓᓐᓂ ᑲᓇᑕᒥ, ᐃᒪᐃᓚᐅᖅᐳᖅ "ᑐᖁᓂᐅᔪᑦ ᐅᓂᒃᑲᐅᓯᐅᓂᐊᖅᑐᒃᓴᐅᕗᑦ ᐅᑯᓇᓂ ᐱᔪᓐᓇᕐᓂᖃᕐᕕᐅᔪᓂᑦ" ᐅᖃᐅᓯᐅᓪᓗᓂ ᓯᕗᓕᖅᑎ ᓴᕕᑲᑖᖅ ᖄᖏᖅᓯᒪᔪᓂ ᓄᓇᕗᒻᒥ ᒐᕙᒪᒃᑯᑦ ᓄᕙᒡᔪᐊᕐᓇᕐᒧᑦ ᓄᑖᙳᖅᐸᓪᓕᐅᓂᐅᔪᓂ.
ᑭᓯᐊᓂ ᑲᓇᑕᐅᑉ ᐊᕕᒃᑐᖅᓯᒪᓂᖓᓂ ᒫᓂᑑᐸᒥ ᒫᓐᓇᐅᔪᒥ ᓇᖏᕐᓂᕆᔭᖓ ᑐᖁᓂᐅᔪᑦ "ᐅᓂᒃᑳᕆᔭᐅᓇᔭᕐᓂᖓᓂ ᐱᔪᓐᓇᕐᓂᖃᕐᕕᐅᔪᓂ ᓄᓇᖃᕐᕕᒋᔭᖓᓂ," ᐅᖃᐅᓯᐅᓪᓗᓂ ᑲᐃᓕ ᒪᑳᕗᕆ, ᐃᓄᓕᒫᓄᑦ ᐱᓕᕆᓂᐅᔪᒥ ᐱᓕᕆᔨᒻᒪᕆᒃ ᒫᓂᑑᐸᒥ ᒐᕙᒪᒃᑯᓐᓂ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᓄᓇᕗᒻᒥ ᑐᓴᒐᒃᓴᓕᕆᔨᒃᑯᓐᓄᑦ.
ᑕᐃᓐᓇ ᐊᓯᔾᔨᖅᓯᒪᓕᖅᐳᖅ ᔭᓄᐊᕆ 12–ᒥ ᐅᖃᐅᓯᐅᓪᓗᓂ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᖓᔪᖅᑳᖓ (CPHO) ᓘᒃᑖᖅ ᒪᐃᑯᓪ ᐹᑐᓴᓐᒧᑦ ᑲᑎᓪᓗᒋᑦ ᐅᓄᕐᓂᖏᑦ ᓄᓇᕗᒻᒥᐅᓂ ᐅᔾᔨᕆᔭᐅᓂᐊᕐᓂᖏᓐᓂ ᓄᓇᕗᒻᒥ ᒐᕙᒪᒃᑯᑦ ᐃᑭᐊᖅᑭᕕᖓᓂ.
"ᑐᑭᓯᓇᑦᑎᐊᕆᐊᖃᖅᐳᒍᑦ ᑭᓯᐊᓂ, ᐃᓚᖃᕐᓂᐊᕐᓂᖓᓂ ᐃᓄᖕᓂ ᑐᖁᓂᐅᔪᖅ ᑲᓱᕐᓂᖃᖅᑎᓪᓗᒍ ᐊᐃᑦᑐᐃᓂᐅᔪᒥ ᓄᓇᕗᒻᒥ ᐊᒻᒪᓗ ᐃᓄᖕᓄᑦ ᐱᓚᐅᖅᑐᓄᑦ ᖃᓪᓗᓈᑦ ᓄᓇᖓᓐᓂ ᐊᒻᒪ ᐃᓅᔪᓐᓃᓚᐅᖅᑐᒥ ᖃᓪᓗᓈᑦ ᓄᓇᖓᓐᓂ," ᐅᖃᓚᐅᖅᐳᖅ ᐹᑐᓴᓐ.
"ᐃᓚᖏᑦ ᐅᓂᒃᑲᐅᓯᐅᓯᒪᓪᓚᕆᒍᓐᓇᖅᐳᑦ ᐋᒃᑲᓘᓐᓃᑦ ᑲᓇᑕᒥ ᖃᐅᔨᓴᖅᑕᐅᓂᑯᓂ ᑎᑎᕋᖅᓯᒪᓂᐅᔪᓂ ᐋᖅᑭᒃᓯᒪᔪᒥ ᐱᒋᐊᕐᓂᖓᓂ ᓄᓇᕗᒻᒥ ᐅᕝᕙᓘᓐᓃᑦ ᐱᒋᐊᕐᓂᖓᓂ ᖃᓪᓗᓈᑦ ᓄᓇᖓᓐᓂ, ᑭᓇᑐᐃᓐᓇᐅᓂᐊᖅᐳᖅ ᓇᓗᓇᐃᖅᑕᐅᔪᒥ ᓄᓇᕗᒻᒥᐅᑕᐅᓂᖓᓂ ᐃᓱᒪᒋᓇᒍ ᖃᓄᖅ ᐅᖃᐅᓯᐅᓪᓚᕆᒃᓯᒪᓂᖓᓂ ᑭᓪᓕᓯᓂᐊᕐᓂᐅᔪᓂ."
ᑕᓪᓕᒪᓂ ᓄᓇᕗᒻᒥᐅᓂ ᐃᓅᔪᓐᓃᖅᓯᒪᕗᑦ ᓄᕙᒡᔪᐊᕐᓇᖅ-19–ᒥ, ᑭᓯᐊᓂ ᐊᑕᐅᓯᑐᐊᖑᔪᒥ ᑐᖁᓂᐅᔪᓂ ᓄᓇᕗᒻᒥᓪᓚᕆᐅᓚᐅᖅᐳᖅ, ᐊᕐᕕᐊᓂᑦ, ᐊᐃᑉᐸᖏᑦ ᑎᓴᒪᐃᑦ ᐃᓅᔪᓐᓃᓚᐅᖅᑎᓪᓗᒋᑦ ᖃᓪᓗᓈᑦ ᓄᓇᖓᓐᓂ.
ᐊᑕᐅᓯᐅᔪᒥ ᖃᓪᓗᓈᑦ ᓄᓇᖓᓐᓂ ᐃᓅᔪᓐᓃᕐᓂᐅᓚᐅᖅᑐᑦ ᓯᓚᑎᒃ ᖃᕝᕕᐅᓚᐅᖅᐳᖅ ᓴᓂᑭᓗᐊᕐᒥᐅᑕᖅ, ᐃᓅᔪᓐᓃᓚᐅᖅᑐᒥ ᐊᑲᐅᙱᓕᐅᕈᑕᐅᔪᓄᑦ ᐋᓐᓂᐊᕐᓇᒥ ᔭᓄᐊᕆ 2–ᒥ ᕿᓚᒻᒥᐅᔪᒥ ᐃᕐᓂᓚᐅᖅᑎᓪᓗᒍ ᐸᓂᖓᓂ.
"ᓇᓗᓇᐃᖅᓯᔪᒪᕗᒍᑦ ᑐᖁᓂᐅᔪᑦ ᓈᓴᖅᑕᐅᑦᑎᐊᖅᓯᒪᓂᖏᓐᓂ ᐃᒃᓯᓐᓇᐃᔾᔮᙱᓐᓇᑦᑕ ᑭᓇᑐᐃᓐᓇᒥᒃ ᐊᒻᒪᓗ ᒪᕐᕈᐃᖅᑕᐅᓗᑎᒃ ᓇᐃᓴᖅᑕᐅᙱᓐᓂᖏᓐᓂ. ᑕᒪᒃᑭᑦ ᑐᖁᓂᐅᔪᑦ ᐅᒡᒍᓇᖅᐳᑦ ᐊᒻᒪ ᓇᐃᓴᖅᑕᐅᓂᐊᖅᐳᑦ," ᓴᕕᑲᑖᖅ ᐅᖃᓚᐅᖅᐳᖅ.
ᑕᒪᕐᒥ ᐱᔪᓐᓇᕐᓂᖃᕐᓂᐅᔪᑦ ᑲᓇᑕᒥ ᒪᓕᓲᖑᕗᑦ ᑲᓇᑕᒥ ᒪᓕᒋᐊᖃᕐᓂᐅᔪᓂ ᓴᖅᑭᑎᑕᐅᓯᒪᔪᓂ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐱᓕᕆᔨᐅᔪᓂ ᑲᓇᑕᒥ ᐊᒻᒪᓗ ᖃᓄᖅ ᓅᑎᕆᓂᕐᒥ ᐊᒻᒪᓗ ᓇᐃᓴᐃᓂᕐᒥ ᐱᓕᕆᐊᖑᔪᓄᑦ ᖃᐅᔨᓴᖅᑕᐅᓂᑯᓂ ᑎᑎᕋᖅᓯᒪᓂᐅᔪᓂᑦ.