ᐅᖃᐅᓯᐅᓪᓗᓂ ᑲᖑᓪᓕᖅᐹᖑᔪᒥ ᑲᑎᒪᕕᒡᔪᐊᕐᓂᐅᔪᒥ ᑲᑎᒪᔨᐅᔪᓄᑦ ᑲᓇᑕᒥ ᐅᓂᒃᑳᓕᐊᖓᓂ, ᐱᕕᒃᓴᖃᕐᓂᐅᔪᑦ ᑲᓱᒃᑐᖅᐳᑦ ᓄᓇᕗᒻᒥ ᐅᓄᕐᓂᖅᓴᐅᔪᒥ ᓇᒥᑐᐃᓐᓇᑦᑎᐊᖅ ᑲᓇᑕᒥ. ᓂᕆᐅᒃᑯᕕᑦ ᐊᓯᔾᔨᕐᓂᐅᔪᒥ, ᒫᓐᓇ ᑭᐅᔭᕆᐊᖃᕐᓇᖅᓯᕗᖅ.
ᐅᓂᒃᑳᓕᐊᖅ ᓇᓗᓇᐃᖅᓯᕗᖅ ᓄᓇᕗᑦ ᐱᕈᖅᐸᓪᓕᐊᓂᐊᓂᖓᓂ ᑕᐃᒪᐃᒐᔪᒃᑐᒥ 4.6 ᐳᓴᓐᑎᒥ ᐊᕐᕌᒍᑕᒫᒥ 2025−ᖑᕋᓱᖕᓂᖓᓂ, ᑕᒪᕐᒥᒐᓚᒃ ᐱᕈᕐᓂᐅᔪᖅ ᐊᐅᓚᑕᐅᓪᓗᓂ ᓄᑖᖑᔪᓂ ᒎᓗᒧᑦ ᐅᔭᕋᖕᓂᐊᕐᕕᖕᓄᑦ ᒪᑐᐃᖅᐸᓪᓕᐊᓂᐅᔪᓂ ᐱᓇᖕᓇᒥ ᓄᓇᕗᒻᒥ – ᐊᒡᓂᑯ ᐄᒍᓪᑯᑦ ᐃᖃᓗᒑᕐᔪᖓ ᐊᒻᒪ ᐊᒪᕈᖅ ᑭᕙᓪᓕᕐᒥ ᐊᒻᒪ ᓴᐲᓇᐅᑉ ᓴᓐᓂᖓᔫᑉ ᑰᖓᓂ ᕿᑎᕐᒥᐅᓂ.
ᐱᕕᒃᓴᖅᑕᖃᕐᔪᐊᖅᐳᖅ ᕿᑭᖅᑖᓗᒃ ᐊᕕᒃᓯᒪᓂᐅᔪᒥᑦᑕᐅᖅ, ᐹᕙᓐᓛᓐ ᐱᕈᖅᓴᐃᓐᓇᖅᑎᓪᓗᒍ, ᒫᓐᓇ ᓇᓗᓇᐃᖅᓯᓪᓗᓂ ᐲᖅᓯᔪᒪᓂᖓᓂ 6−ᖏᖅᓱᓪᓗᐊᖅᑐᒥ ᐊᖏᓂᖅᓴᐅᔪᒥ ᓴᕕᕋᔭᖕᒥ ᐱᔪᓐᓇᖅᑎᑕᐅᓂᖓᓂ ᒫᓐᓇᐅᔪᒥ. ᐃᓱᒪᓂᐅᔪᖅ ᐊᒃᓱᕈᕈᑎᖃᒃᑲᓐᓂᕆᕗᖅ, ᐊᒥᓱᓂ ᑭᐅᔭᐅᓯᒪᙱᑦᑐᓂ ᐊᐱᖅᑯᑎᑕᖃᙱᒻᒪᑦ ᐊᖏᕈᑕᐅᓇᓱᐊᖅᑐᒥ. ᑕᐃᒪᐃᒃᑯᓂ, ᑭᓯᐊᓂ, ᓴᖅᑭᑎᑦᑎᓇᔭᖅᐳᖅ ᖃᓄᐃᓕᐅᕐᓂᕐᔪᐊᖑᔪᓂ ᕿᑭᖅᑖᓗᖕᒥ.
ᓄᓇᕗᒻᒥᐅᑦᐃᖅᑲᓇᐃᔭᕈᒪᔪᑦ ᐸᕐᓇᒃᓯᒪᔭᕆᐊᖃᖅᐳᑦ, ᐊᒻᒪ ᑲᑎᒪᔨᕐᔪᐊᖑᔪᑦ ᐃᓱᒫᓗᒃᐳᑦ ᐸᕐᓇᒃᓯᒪᔾᔮᙱᓚᑦ. ᐅᒃᑐᐱᕆᒥ, ᐊᕐᕕᐊᓂ−ᑎᑭᕋᕐᔪᐊᒥ ᒪᓕᒐᓕᐅᖅᑎ ᔮᓐ ᒪᐃᓐ ᐅᖃᐅᓯᖃᓚᐅᖅᐳᖅ ᐃᓱᒫᓘᑎᖓᓐᓂ ᑭᕙᓪᓕᕐᒥ ᐅᔭᕋᖕᓂᐊᓂᕐᒧᑦ ᐱᓕᒻᒪᒃᓴᕐᓂᐅᔪᒥ ᑲᑐᔾᔨᖃᑎᒌᖑᔪᖅ ᓇᓕᐊᖕᓃᓐᓂᖓᓂ "ᓱᒃᑲᐃᒡᓕᒋᐊᖅᓯᒪᓂᕐᒧᑦ ᐅᕝᕙᓘᓐᓃᑦ ᓄᖅᑲᖅᑎᑦᑎᕆᕙᓪᓕᐊᓂᐅᔪᒥ" ᐋᖅᑭᒃᓯᒪᓂᐅᔪᒥ, ᐊᒻᒪᓗ ᑭᕙᓪᓕᖅ ᐅᓗᕆᐊᓇᖅᑐᒦᓐᓂᖓᓂ ᕿᒪᒃᑕᐅᓂᖓᓂ ᐅᒥᐊᖓᓂ. "ᕿᑎᕐᒥᐅᓂ, ᐱᓕᒻᒪᒃᓴᕐᓂᐅᔪᖅ ᐱᓕᕆᐊᖑᓲᖑᕗᖅ ᓄᓇᑦᓯᐊᕐᒥ ᐅᔭᕋᖕᓂᐊᕐᕕᖕᓄ ᐱᓕᒻᒪᒃᓴᐃᔨᐅᔪᓄᑦ ᑲᑐᔾᔨᖃᑎᒌᖑᔪᓂᑦ, ᑕᑖᑦᑎᐊᖅᓯᒪᓪᓗᑎᒃ ᒫᓐᓇ ᐊᒻᒪ ᑭᒡᓕᖃᖅᐳᖅ ᐅᓄᕐᓂᐅᔪᓂ ᓄᓇᕗᒻᒥᐅᓂ ᐱᓕᒻᒪᒃᓴᕈᓐᓇᕐᓂᖏᓐᓂ.
ᓯᕗᓕᖅᑎ ᔫ ᓴᕕᑲᑖᒃ ᐅᖃᐅᓯᖃᓚᐅᕆᕗᖅ ᐃᓱᒫᓘᑎᖓᓐᓂ, ᐅᖃᖅᖢᓂ "ᐅᑕᖅᑭᔪᓐᓇᙱᓚᒍᑦ ᐱᕚᓪᓕᕈᑎᖃᕈᒪᒍᑦᑕ ᐃᖅᑲᓇᐃᔮᓄᑦ ᑎᑭᑉᐸᓪᓕᐊᔪᓄᑦ."
ᑲᑎᒪᔨᕐᔪᐊᖑᔪᓄᑦ ᑲᑎᒪᔨᖏᑦ ᑲᓇᑕᒥ ᐅᖃᓚᐅᖅᐳᑦ ᓄᓇᕗᒻᒥᐅᑦ ᕿᒻᒪᑰᓂᐊᖅᑐᒃᓴᐅᕗᑦ ᐅᒥᐊᕐᒥ, ᐊᑐᕐᓗᑎᒃ ᒪᐃᓐ ᐅᖃᐅᓯᖓᓐᓂ, ᐅᖃᖅᑐᒥ ᐅᓂᒃᑳᓕᐊᒥ ᖃᓪᓗᓈᑦ ᓄᓇᖓᓂᙶᖅᑐᑦ ᑎᑭᑎᑕᐅᔭᖕᓂᖏᓐᓂ ᐱᓕᕆᓂᖏᓐᓂ ᐱᓕᕆᐊᒃᓴᓂ ᐱᕚᓪᓕᕈᑎᖃᓛᖑᓂᐊᖅᐳᑦ.
ᐊᐃᑦᑖᓗᖔ.
ᑕᒪᑐᒪᓂ ᐱᓇᓱᐊᕈᓯᐅᔪᒥᑐᐊᖅ, ᒐᕙᒪᑐᖃᒃᑯᑦ ᐊᖏᒡᓕᒋᐊᖅᓯᓚᐅᖅᐳᖅ ᑮᓇᐅᔭᖃᖅᑎᑦᑎᓂᖓᓂ ᐃᖅᑲᓇᐃᔮᓄᑦ ᐱᓕᒻᒪᒃᓴᕐᓂᐅᔪᓄᑦ ᓄᓇᕗᒻᒥ ᑭᓯᐊᓂ ᒐᕙᒪᒃᑯᓐᓂ ᑐᓴᒐᒃᓴᓕᐊᖓ ᐅᖃᐅᓯᖃᓚᐅᙱᓚᖅ ᐅᔭᕋᖕᓂᐊᕐᕕᖕᓂ ᐅᕝᕙᓘᓐᓃᑦ ᐱᓕᒻᒪᒃᓴᕆᐊᖃᕐᓂᐅᔪᓄᑦ ᐃᖅᑲᓇᐃᔭᕈᓐᓇᕐᓂᕐᒧᑦ ᐅᔭᕋᖕᓂᐊᕐᕕᖕᓂᑦ.
ᒐᕙᒪᑐᖃᒃᑯᓐᓂ ᑮᓇᐅᔭᐅᔫᒐᓗᐊᑦ ᑭᓯᐊᓂ ᐃᖏᕐᕋᓲᖑᕗᑦ ᓄᓇᕗᒻᒥ ᓯᕗᓪᓕᐅᔾᔭᐅᖁᔭᐅᔪᓄᑦ. ᐅᕙᑦᑎᓐᓄᑦ ᐅᖃᐅᔾᔨᕗᑦ ᓄᓇᕗᒻᒥ ᒐᕙᒪᒃᑯᑦ ᐸᕐᓇᐅᑎᖃᙱᓐᓂᖓᓐᓂ ᐊᖏᒡᓕᒋᐊᖅᑎᑦᑎᓂᕐᒧᑦ ᐃᖅᑲᓇᐃᔮᓄᑦ ᐸᕐᓇᒃᓯᒪᓂᐅᔪᓄᑦ ᓄᓇᕗᒻᒥᐅᓂ ᐃᖅᑲᓇᐃᔭᕈᒪᓇᔭᖅᑐᓄᑦ ᐅᔭᕋᖕᓂᐊᕐᕕᖕᓂᑦ. ᐱᕙᓪᓕᐊᔪᓕᕆᓂᕐᒧᑦ ᒥᓂᔅᑕᖓ ᑕᐃᕕᑦ ᐊᕿᐊᕈᖅ ᐅᖃᓚᐅᖅᐳᖅ ᓯᑎᐱᕆᒥ ᓄᓇᕗᒻᒥ ᐅᔭᕋᖕᓂᐊᕐᕕᖕᓄᑦ ᐱᓕᒻᒪᒃᓴᕐᓂᐅᔪᒥ ᐱᓕᕆᐊᖑᓂᐅᓇᔭᖅᑐᒥ ᐱᓕᕆᐊᖑᕙᓪᓕᐊᓂᖓᓂ ᑭᓯᐊᓂ ᓱᓕ ᐱᒋᐊᕐᓂᐊᕐᓂᖓᓄᑦ ᐸᕐᓇᒃᓯᒪᙱᓚᑦ.
ᑮᓇᐅᔭᓂᑦ ᐱᕈᖅᐸᓪᓕᐊᑎᑕᐅᔪᓂ ᑐᖅᑯᖅᑕᐅᓯᒪᔪᓂ ᐅᔭᕋᖕᓂᐊᕐᓂᕐᒧᑦ ᐱᓕᒻᒪᒃᓴᕐᓂᐅᔪᒥ ᐊᑕᐅᓯᐅᓪᓗᓂ ᐃᒪᐃᖁᔭᐅᓂᐅᖃᑕᐅᕗᖅ ᓄᓇᑦᓯᐊᕐᒥ ᐊᒻᒪ ᓄᓇᕗᒻᒥ ᑲᑐᔾᔨᖃᑎᒌᖑᔪᓄᑦ ᐅᔭᕋᖕᓂᐊᕐᕕᖕᓂ ᑭᐅᓂᖓᓂ ᐅᓂᒃᑳᓕᐊᖑᔪᒥ. ᐃᒪᐃᖁᔨᓇᔭᕆᕗᖅ: ᐱᔭᕇᖅᓯᒪᑦᑎᐊᖅᑐᓂ ᓄᓇᒥ ᐊᑐᖅᑕᐅᓂᕐᒧᑦ ᐸᕐᓇᐅᑎᓂᑦ; ᐅᖓᕙᕆᐊᖅᑕᐅᓂᖓᓂ Gray's Bay ᐊᖅᑯᑎᖓᓂ ᐊᒻᒪ ᑐᓚᒃᑕᕐᕕᖓᓐᓂ ᐱᓕᕆᐊᖑᔪᒧᑦ; ᐊᒻᒪ ᑮᓇᐅᔭᓂᑦ ᐱᕈᖅᐸᓪᓕᐊᑎᑕᐅᔪᓂ ᑐᖅᑯᖅᑕᐅᓯᒪᓗᓂ ᖃᐅᔨᓴᕐᓂᕐᒧᑦ ᑐᒃᑐᓂ ᓴᐳᔾᔭᐅᓯᒪᓂᖏᓐᓄᑦ ᐸᕐᓇᐅᑎᓄᑦ.
ᐅᑯᐊ ᑎᓴᒪᑦ ᖃᓄᐃᓕᐅᕐᓂᐅᔪᓄᑦ ᑐᓂᓯᔪᓐᓇᖅᐳᑦ ᑐᕌᖓᓂᖓᓂ ᑲᔪᓯᑎᑕᐅᔪᓐᓇᖅᑐᒥ ᐱᕈᖅᐸᓪᓕᐊᓂᐅᔪᒥ ᓄᓇᓄᒻᒥ, ᐊᒻᒪ ᐅᔭᕋᖕᓂᐊᕐᕕᖕᒥ ᐱᓕᒻᒪᒃᓴᕐᓂᐅᔪᑦ ᑐᓂᓯᔪᓐᓇᖅᑐᑐᐊᖑᕗᖅ ᐊᖏᓛᖑᔪᒥ ᐱᕚᓪᓕᕈᑎᓂᑦ ᓄᓇᕗᒻᒥᐅᑕᐅᒐᔪᒃᑐᓂ. ᐃᓄᖕᓂ ᐃᖅᑲᓇᐃᔭᖅᑎᑦᑎᓕᕐᓗᓂ.
ᑕᐃᒪᑐᖅ ᓄᓇᕗᒻᒥ ᒐᕙᒪᒃᑯᑦ ᐱᓕᕆᐊᒥᓂᑦ ᐋᖅᑭᒃᓱᐃᑦᑎᐊᕈᓐᓇᕐᓂᐊᖅᐳᑦ ᐆᒧᖓ ᐱᓕᕆᐊᖑᔪᒥ, ᐊᒻᒪ ᑎᑎᕋᖅᑕᐅᒋᐊᙵᕈᒻᒥ ᐸᕐᓇᐅᑎᒥᒃ ᐊᑐᕐᓂᐊᖅᑐᒥ ᐱᕕᒃᓴᖃᕐᓂᐅᔪᓂ ᑕᑯᒃᓴᐅᓂᐅᔪᓂᑦ.
ᑕᐃᒪᐃᙱᑉᐸᑦ ᓄᓇᕗᑦ ᑎᑭᐅᑎᔪᓐᓇᔾᔮᙱᓚᑦ ᐅᓂᒃᑳᓕᐊᑉ ᓇᓚᐅᑦᑖᕆᔭᒥᓂ ᑎᑭᑉᐸᓪᓕᐊᔪᒥ ᐃᖅᑲᓇᐃᔮᖃᐅᕐᓂᐅᓂᐊᖅᑐᒥ ᖁᑦᑎᒃᓯᒋᐊᕐᔪᐊᕐᓂᐅᓂᐊᖅᑐᒥ ᐱᕚᓪᓕᕈᑎᖃᙱᑐᐃᓐᓇᕆᐊᖃᖅᐳᖅ ᑕᐃᒃᑯᓄᖓ ᐱᔭᕆᐊᖃᓛᖑᔪᓄᑦ. ᑐᒃᓯᕋᕐᔪᐊᖅᐳᒍᑦ ᓯᕗᓕᖅᑎᒧᑦ ᓴᕕᑲᑖᕐᒧᑦ ᐊᒻᒪ ᒥᓂᔅᑕᐅᔪᓄᑦ ᑲᑎᒪᔨᐅᔪᓄᑦ ᐊᔭᐅᕆᒃᑲᓐᓂᖁᓪᓗᒋᑦ ᐆᒪᙵᑦ ᐱᓕᕆᐊᖑᓂᐅᔪᒥ ᐊᒻᒪ ᐃᓄᖕᓂ ᐃᖅᑲᓇᐃᔭᓕᕐᓗᑎᒃ ᓄᓇᕘᑉ ᐱᖃᕐᒧᐊᕐᓂᖓᓂ ᓄᓇᕗᒻᒦᖏᓐᓇᖁᓪᓗᒍ.