ᑐᐊᕕᕐᓇᖅᑐᒧᑦ ᐅᖃᓗᒡᕕᐅᔪᓐᓇᖅᑐᒥ ᐱᔨᑦᑎᕋᖅᓯᒪᔪᒥ ᓄᓇᕗᒻᒥᐅᓄᑦ ᐊᕐᓇᓄᑦ ᐊᒻᒪ ᐃᓄᑐᖃᕐᓄᑦ ᐅᖃᓘᑎᒃᑯᑦ ᖃᔅᓯᒐᓚᖕᓂ ᐊᕐᕌᒍᓄᑦ ᐊᖏᒡᓕᒋᐊᖅᑎᑦᑎᓯᒪᕗᑦ ᐱᔨᑦᑎᕋᕐᓂᖓᓂ ᐃᓚᖃᕐᓂᕐᒧᑦ ᖃᕋᓴᐅᔭᑎᒍᑦ ᐃᓅᓯᓕᕆᓂᐅᔪᒥ.

ᐋᓐᓂᖅᓯᖅᑕᐅᕙᒃᑐᓄᑦ ᐊᕐᓇᓄᑦ ᐃᑲᔪᖅᑕᐅᓂᕐᒧᑦ ᐅᖃᓗᒡᕕᒃᓴᖅ, ᑐᙵᕕᖃᖅᑐᒥ ᐃᑐᐱᑰᒃ, ᐋᓐᑎᐊᕆᐅᒥ, ᐱᓚᐅᖅᐳᑦ 508–ᓂ ᐅᖃᓗᒡᕕᐅᓂᐅᔪᓂ ᓄᓇᕗᒻᒥᐅᑕᓂ 2019-20–ᒥ ᐊᒻᒪᓗ “ᖁᕝᕙᓯᒋᐊᖅᓯᒪᓂᖃᕐᔪᐊᖅᐳᖅ” ᐅᖃᓗᖕᓂᐅᔪᓄᑦ ᐊᕐᓇᓂ ᐊᒻᒪᓗ ᐃᓄᑐᖃᕐᓂ ᑕᐃᒪᙵᓂ ᐱᒋᐊᕐᓂᐅᔪᒥ ᓄᕙᒡᔪᐊᕐᓇᖅ-19 ᐊᒥᓱᓄᑦ ᖃᓂᒻᒪᓐᓇᐅᔪᒥ, ᐅᖃᐅᓯᐅᓪᓗᓂ ᐃᕚᓐ ᕼᐋᑎᖕ, ᐊᐅᓚᑦᑎᔨᐅᔪᖅ ᐃᑲᔪᕈᑎᒃᓴᒧᑦ ᐱᕙᓪᓕᐊᑎᑕᐅᓂᖓᓂ ᐃᑲᔪᖅᑕᐅᓂᕐᒧᑦ ᐅᖃᓗᒡᕕᒃᓴᒧᑦ.

ᐋᓐᓂᖅᓯᖅᑕᐅᕙᒃᑐᓄᑦ ᐊᕐᓇᓄᑦ ᐃᑲᔪᖅᑕᐅᓂᕐᒧᑦ ᐅᖃᓗᒡᕕᒃᓴᖅ ᐱᒋᐊᖅᑎᑦᑎᓚᐅᖅᐳᑦ ᖃᕋᓴᐅᔭᑎᒍᑦ ᐃᓅᓯᓕᕆᓂᕐᒥ ᐱᔨᑦᑎᕋᕐᓂᐅᔪᒥ ᓄᕕᐱᕆᒥ ᖄᒃᑲᓐᓂᐊᒍᑦ ᓂᕈᐊᒐᒃᓴᐅᓪᓗᓂ ᐊᑯᓂᐅᔪᒥ ᐅᖃᓘᑎᒃᑯᑦ ᑐᐊᕕᕐᓇᖅᑐᒥ ᐅᖃᓗᒡᕕᒃᓴᐅᕙᒃᑐᒥ.

ᐊᐃᑉᕆᓕᒥ, 35–ᓂ ᐅᖃᓗᒃᑐᖃᓚᐅᖅᐳᖅ ᐊᕐᓇᓂ ᑕᐅᑐᒃᖢᒍ 14–ᖑᓚᐅᖅᑐᓂ ᐊᐃᑉᕆᓕ 2019–ᒥ. ᐃᓄᑐᖃᕐᓂ, 29–ᖑᔪᓂ ᐅᖃᓗᒃᑐᖃᓚᐅᖅᐳᖅ ᐊᐃᑉᕆᓕᒥ ᑕᐅᑐᒃᖢᒍ ᐊᑕᐅᓯᑐᐊᖑᔪᒥ ᑕᐃᑲᓂᑦᑕᐃᓐᓇᖅ ᑕᖅᑭᐅᓚᐅᖅᑐᒥ ᐊᕐᕌᓂᐅᓚᐅᖅᑐᒥ.

ᖃᕋᓴᐅᔭᑎᒍᑦ ᓄᓇᕐᔪᐊᙳᖅᐸᓪᓕᐊᓂᐅᔪᒥ, ᐃᑲᔪᖅᑕᐅᓂᕐᒧᑦ ᐅᖃᓗᒡᕕᒃᓴᖅ ᐱᒋᐊᖅᑎᑦᑎᓚᐅᖅᐳᑦ ᐃᑭᐊᖅᑭᕕᖕᒥ-ᑐᙵᕕᓕᖕᒥ ᐃᓅᓯᓕᕆᓂᕐᒥ ᐱᔨᑦᑎᕋᕐᓂᐅᔪᒥ ᓄᕕᐱᕆᒥ. ᑭᒡᓕᖃᕐᓂᖃᖅᐳᖅ, ᑭᓯᐊᓂ. ᑕᐃᒃᑯᐊ ᐃᓴᒃᓯᒪᔪᓂ ᐃᑲᔪᖅᑕᐅᔪᒪᓂᕐᒧᑦ ᐅᖃᓘᑎᒃᑯᑦ ᐱᓕᕆᐊᖑᔪᓐᓇᖅᑎᓪᓗᒋᑦ ᐃᓄᒃᑎᑐᑦ ᐃᓄᐃᓐᓇᖅᑐᓪᓘᓐᓃᑦ, ᖃᕋᓴᐅᔭᒃᑯᑦ ᓂᕈᐊᒐᒃᓴᐅᔪᖅ ᐊᑐᐃᓐᓇᐅᑐᐃᓐᓇᖅᐳᖅ ᖃᓪᓗᓈᑎᑐᑦ. ᐊᒻᒪᓗᑦᑕᐅᖅ, ᐅᖃᓘᑎ ᐅᖃᓗᒡᕕᐅᔪᓐᓇᖅᑐᖅ ᐅᖃᓗᒡᕕᐅᔪᓐᓇᖅᐳᖅ ᐃᑲᕐᕋᓂ 24–ᓂ ᐅᓪᓗᑕᒫᒥ, ᐅᓪᓗᓂ 7–ᓂ ᐱᓇᓱᐊᕈᓯᐅᔪᒥ, ᑭᓯᐊᓂ ᐃᑭᐊᖅᑭᕕᖕᒥ-ᑐᙵᕕᓕᒃ ᐃᓅᓯᓕᕆᓂᕐᒧᑦ ᐊᐅᓚᓲᖑᕗᖅ ᓇᒡᒐᔾᔭᐅᒥ ᐅᓪᓗᑐᐃᓐᓇᕐᒧᑦ 11 ᐅᓪᓛᒃᑯᑦ 8–ᒧᐊᕋᓱᐊᕐᓂᖓᓂ ᐅᓐᓄᒃᑯᑦ

ᐊᓯᐊᓂ ᐱᔾᔪᑕᐅᔪᒥ ᐃᓚᖏᓐᓂ ᓄᓇᕗᒻᒥᐅᓂ ᐃᖅᑲᐅᒪᔭᕆᐊᖃᕋᔭᖅᑕᖓᓂ ᐋᓐᓂᖅᓯᕆᔨᖓ ᐊᑐᐃᓐᓇᖃᕈᓐᓇᕈᓂ ᖃᕋᓴᐅᔭᖓᓂ. ᖃᕋᓴᐅᔭᑎᒍᑦ ᖃᓄᐃᓕᐅᕐᓂᐅᔪᓂ ᓇᐅᑦᑎᖅᓱᖅᑕᐅᒍᓂ ᑭᓇᑐᐃᓐᓇᒧᑦ ᐅᓗᕆᐊᓇᖅᑎᑦᑎᔪᓐᓇᖅᑐᒥ ᐊᖏᕐᕋᐅᔪᒥ, ᐃᑲᔪᖅᑕᐅᓂᕐᒧᑦ ᐅᖃᓗᒡᕕᒃᓴᖅ ᐅᖃᐅᔾᔨᕗᑦ ᐅᖃᓘᒻᒥ ᐅᖃᓗᒡᕕᐅᔪᓐᓇᖅᑐᒥ ᐊᑐᖔᕐᓂᕐᒧᑦ. ᑭᓯᐊᓂ, ᑭᓇᑐᐃᓐᓇᐅᑉ ᑎᒥᒧᑦ ᐊᑦᑕᓇᕐᓂᖓ ᐅᓗᕆᐊᓇᖅᑐᒦᑲᐅᑎᒋᒍᓂ, ᐃᑲᔪᖅᑕᐅᓂᕐᒧᑦ ᐅᖃᓗᒡᕕᒃᓴᖅ ᐅᖃᓗᖁᔨᓇᔭᖅᐳᑦ ᑲᓇᑕᒥ ᐸᓖᓯᒃᑯᓐᓄᑦ ᑐᐊᕕᕐᓇᖅᑐᒥ ᐅᖃᓘᑎᖓᓐᓄᑦ.

ᐃᑲᔪᖅᑕᐅᓂᕐᒧᑦ ᐅᖃᓗᒡᕕᒃᓴᖅ ᑭᐅᓲᖑᕗᑦ ᑎᒥᒧᑦ ᐊᒻᒪ ᖁᓄᔪᓐᓂᐊᕐᓂᕐᒧᑦ ᐋᓐᓂᖅᓯᕆᓂᑐᐊᖑᙱᑦᑐᒥ, ᑭᓯᐊᓂᑦᑕᐅᖅ ᐅᖃᐅᓯᒃᑯᑦ, ᐃᓱᒪᒃᑯᑦ ᐊᒻᒪᓗ ᑮᓇᐅᔭᓄᑦ ᐋᓐᓂᖅᓯᕆᓂᐅᔪᓄᑦ ᐊᒻᒪᓗ ᐃᒃᓯᓐᓇᖅᑕᐅᓯᒪᓂᐅᔪᒥᑦᑕᐅᖅ. ᐅᖓᑖᓄᑦ ᑐᐊᕕᕐᓇᖅᑐᒧᑦ ᐃᓅᓯᓕᕆᓂᕐᒥ, ᐃᓱᒪᒧᑦ ᐃᑲᔪᖅᓱᐃᓂᐅᔪᒥ, ᐊᑦᑕᓇᔾᔭᐃᖅᓯᒪᓂᕐᒧᑦ ᐸᕐᓇᐃᓂᐅᔪᒥ ᐊᒻᒪᓗ ᑎᓕᐅᕈᑕᐅᓂᐅᔪᓄᑦ ᐊᓯᖏᓐᓄᑦ ᐃᑲᔪᖅᓱᐃᔨᐅᔪᓄᑦ ᐱᓕᕆᔨᐅᔪᓄᑦ ᐊᑐᐃᓐᓇᐅᑎᑕᐅᒋᕗᑦ.

ᑐᐊᕕᕐᓇᖅᑐᒧᑦ ᐅᖃᓗᒡᕕᐅᔪᓐᓇᖅᑐᖅ ᐊᑐᐃᓐᓇᐅᕗᑦ ᐅᕙᓂ 1-866-863-0511. ᖃᕋᓴᐅᔭᑎᒍᑦ ᐃᓅᓯᓕᕆᓂᕐᒥ ᓇᓂᔭᐅᔪᓐᓇᖅᐳᖅ ᐅᕙᓂ https://www.awhl.org/online-chat

ᐃᑲᔪᖅᑕᐅᓂᕐᒧᑦ ᐅᖃᓗᒡᕕᒃᓴᒧᑦ ᐃᖅᑲᓇᐃᔭᖅᑎᐅᔪᑦ ᑐᑭᓯᐅᒪᓇᓱᐊᓲᖑᕗᖅ ᖃᔅᓯᒐᓚᖕᓂ ᐱᔾᔪᑕᐅᔪᓂ ᐊᔭᐅᕆᔪᓂ ᐱᓕᕆᔾᔪᔾᔭᐅᕙᒃᑐᓂ ᐃᓅᓯᖏᓐᓂ, ᕼᐋᑎᖕ ᐅᖃᓚᐅᖅᐳᖅ.

“ᓲᕐᓗ, ᓄᓇᓕᐅᔫᑉ ᓯᓚᑖᓃᑉᐸ ᐊᒻᒪᓗ ᐃᖏᕐᕋᔾᔪᑎᖃᙱᓪᓗᓂ ᐊᒻᒪᓗ/ᐅᕝᕙᓘᓐᓃᑦ ᐊᑐᐃᓐᓇᖃᕐᓂᕐᒧᑦ ᐃᓚᖏᓐᓂ ᐃᑲᔪᕈᑎᒃᓴᐅᔪᓂ? ᕿᑐᕐᙵᖃᖅᐸ, ᐊᑐᐃᓐᓇᖃᖅᐸ ᓇᖕᒥᓂᖅ ᑮᓇᐅᔭᖏᓐᓂ? ᐅᖃᐅᓯᖅ ᐊᒡᕕᐊᕈᑕᐅᕙ ᑕᐃᔅᓱᒧᖓ? ᐃᓄᑐᖃᕐᒥ ᐅᖃᓗᒃᑐᖃᕈᓂ, ᐊᐅᓚᑦᑎᐊᕈᓐᓇᕐᓂᕐᒧᑦ ᐊᑲᐅᙱᓕᐅᕈᑎᖃᖅᐸ? ᐱᓕᕆᓂᖃᖅᐳᖅ ᐃᓱᒪᓕᐅᕋᓱᐊᕐᓂᕐᒥ ᖃᓄᖅ ᑕᒪᒃᑭᑦ ᐅᑯᐊ ᐱᔾᔪᑕᐅᔪᑦ ᑲᑎᙵᓗᑎᒃ ᐱᓕᕆᔪᓐᓇᕐᒪᖔᑕ ᐊᑐᐃᓐᓇᖃᖅᑎᑦᑎᒃᑲᓐᓂᕐᓂᕐᒧᑦ ᐱᔨᑦᑎᕋᕐᓂᐅᔪᓂ ᐅᕝᕙᓘᓐᓃᑦ ᐊᔪᕐᓇᙱᑎᑦᑎᒃᑲᓐᓂᕐᓂᐅᔪᒥ ᐊᕐᓇᒧᑦ/ᐃᓄᑐᖃᕐᒧᑦ,” ᐅᖃᓚᐅᖅᐳᖅ.

ᓇᓗᓇᐃᖅᓯᓂᖅ ᑐᓴᒐᒃᓴᐅᔪᓂ ᐅᖃᓪᓚᖕᓂᐅᔪᒃᑯᑦ ᐊᒻᒪᓗ ᖃᕋᓴᐅᔭᑎᒍᑦ ᐃᓅᓯᓕᕆᓂᐅᔪᒥ ᐅᖃᐅᓯᐅᔾᔮᙱᓚᑦ ᐊᓯᒧᑦ ᑭᓯᐊᓂ ᐱᓕᕆᔾᔪᔾᔭᐅᔪᖅ ᑕᐃᒪᐃᑦᑐᒪᒃᐸᑦ ᐊᑐᐃᓐᓇᖃᕐᓂᕐᒧᑦ ᕿᒫᕕᖕᒥ ᐊᓯᖓᓂᓘᓐᓃᑦ ᐃᑲᔪᖅᓯᖅᑕᐅᓂᕐᒧᑦ ᐱᔨᑦᑎᕋᕐᓂᐅᔪᒥ.

ᐋᓐᓂᖅᓯᖅᑕᐅᕙᒃᑐᓄᑦ ᐊᕐᓇᓄᑦ ᐃᑲᔪᖅᑕᐅᓂᕐᒧᑦ ᐅᖃᓗᒡᕕᒃᓴᖅ, ᐃᖅᑲᓇᐃᔭᖅᑎᖃᖅᑐᓂ 10–ᓂ ᐱᓕᒻᒪᒃᓴᖅᓯᒪᔪᓂ ᐃᓅᓯᓕᕆᔨᐅᔪᓂ ᐊᒻᒪᓗᑦᑕᐅᖅ ᐃᓇᖏᖅᓯᔨᐅᔪᓄᑦ ᑲᑎᙵᓂᐅᔪᓂ, ᐆᒪᑎᑕᐅᕗᑦ ᑮᓇᐅᔭᖃᖅᑎᑕᐅᓪᓗᑎᒃ ᐋᓐᑎᐊᕆᐅᒥ ᐊᕕᒃᑐᖅᓯᒪᔪᓂ ᒐᕙᒪᐅᔪᓂ, ᓄᓇᓕᐸᐅᔭᕐᒥ ᑐᕌᓐᑐᒥ ᐊᒻᒪᓗ ᑎᒥᖁᑕᐅᔪᓂ ᐊᒻᒪ ᑐᙵᕕᐅᔪᓂ ᑐᓂᔭᐅᓂᐅᕙᒃᑐᓄᑦ. ᐃᑲᔪᖅᑕᐅᓂᕐᒧᑦ ᐅᖃᓗᒡᕕᒃᓴᖅ ᐊᑐᐃᓐᓇᐅᑎᑦᑎᓕᓚᐅᖅᐳᑦ ᐃᑲᔪᖅᓱᐃᓂᕐᒥ ᐱᓕᕆᔪᔾᔭᐅᕙᒃᑐᓂ ᓄᓇᕗᒻᒥ 2014–ᒥ ᐱᓕᕆᓚᐅᖅᑎᓪᓗᒋᑦ ᐱᓕᒻᒪᒃᓴᐃᓂᕐᒧᑦ ᐃᓕᓐᓂᐊᕐᓂᐅᔪᓂ ᕿᒫᕝᕕᐅᔪᓂ ᐊᒻᒪᓗ ᓄᓇᓕᖕᓂ ᐱᓕᕆᐊᖑᔪᓄᑦ ᓄᓇᕗᒻᒥ, ᐱᓕᕆᖃᑎᖃᖅᖢᑎᒃ ᐃᓴᒃᓯᒪᒋᑦ ᐃᓅᓯᕐᒥ ᑲᑎᒪᔨᐅᔪᓄᑦ.

ᒫᓐᓇᓕᓴᐅᔪᓂ ᖃᐅᔨᓴᖅᑕᐅᓂᑯᓂ ᑎᑎᕋᖅᓯᒪᔪᓂ ᑭᓪᓕᓯᓂᐊᖅᑎᒃᑯᓐᓂ ᑲᓇᑕᒥ ᓇᓗᓇᐃᖅᓯᕗᑦ 46 ᐳᓴᓐᑎᒥ ᐊᖑᑎᓂᑦ ᐊᒻᒪ 42 ᐳᓴᓐᑎᒥ ᐊᕐᓇᓂᑦ ᓄᓇᕗᒻᒥ ᐅᓂᒃᑳᕆᔭᐅᓯᒪᕗᑦ ᐊᑐᕐᓂᖃᖃᑦᑕᕐᓂᖏᓐᓂ ᖁᓄᔪᓐᓂᐊᕐᓂᕐᒥ ᐅᕝᕙᓘᓐᓃᑦ ᑎᒥᒧᑦ ᐋᓐᓂᖅᓯᕆᓂᐅᔪᒥ ᑕᐃᒪᙵᓂ 15 ᐅᑭᐅᖃᓕᖅᑎᓪᓗᒋᑦ.

Leave a comment

Your email address will not be published. Required fields are marked *