ᑲᑎᙵᓂᐅᔪᓂ ᖁᑦᑎᒃᑐᒥ ᐃᓕᓐᓂᐊᕐᕕᖓᓐᓂ ᐃᓕᓐᓂᐊᖅᑏᑦ ᖃᓂᑦᑐᒥ ᑕᑯᔪᓐᓇᓚᐅᖅᐳᑦ ᐱᒻᒪᕆᐅᔪᒥ ᓄᓇᕐᔪᐊᒥ ᖁᙱᐊᕐᕕᐅᔪᒥ ᓚᓐᑕᓐ, ᐃᖕᓕᓐᒥ, 50 ᒥᓂᑦᒥ ᕿᒥᕐᕈᓇᖕᓂᖃᖅᑎᓪᓗᒋᑦ ᐃᒡᓗᕐᔪᐊᒥ ᖃᕋᓴᐅᔭᑎᒍᑦ ᖁᙱᐊᖅᑎᑕᐅᓂᐅᔪᒥ ᔮᓐ ᐊᕐᓇᓗᒃᔪᐊᖅ ᖁᑦᑎᒃᑐᒥ ᐃᓕᓐᓂᐊᕐᕕᖓᓐᓂ (JAHS) ᐊᕐᕕᐊᓂᑦ ᒫᔾᔨ 16-ᖑᑎᓪᓗᒍ.
ᓯᕗᓪᓕᖅ ᓄᓇᕐᔪᐊᒥ ᖁᙱᐊᕐᕕᐅᔪᒥ ᐱᒻᒪᕆᙳᖅᑎᑕᐅᓚᐅᖅᐳᖅ ᐱᙳᐊᕐᓂᐅᔪᓄᑦ ᑎᑎᕋᖅᑎᐅᔪᒥ ᐊᒻᒪ ᐅᖃᐅᓯᕋᓛᓕᐅᖅᑎ ᐅᐃᓕᐊᒻ ᓴᐃᒃᔅᐱᐅᕐᒧᑦ. ᓴᓇᔭᐅᓚᐅᖅᓯᒪᕗᖅ 1599-ᒥ ᑲᒻᐸᓂᖓᓄᑦ, ᓗᐊᑦ ᓴᐃᒻᐳᓚᓐ ᐊᖑᑎᓄᑦ, ᐃᑭᑦᑐᒧᑦ ᓱᕋᑦᑎᖅᖢᓂ 1613-ᒥ, ᓴᓇᔭᐅᒃᑲᓐᓂᖅᖢᓂ ᑕᐃᑲᓂᑦᑕᐃᓐᓇᖅ ᐃᓂᐅᔪᒥ ᐊᒻᒪ ᐃᒍᑦᑎᖅᑕᐅᓪᓗᓂ 1644-ᒥ.
ᐃᓕᓐᓂᐊᖅᑎᑦ ᐳᓚᕋᓚᐅᖅᐳᑦ ᒫᓐᓇᓕᓴᐅᔪᒥ ᓴᖅᑭᑎᑕᐅᒃᑲᓐᓂᖅᓯᒪᔪᒥ ᖁᙱᐊᕐᕕᐊᔪᒥ ᑕᐃᔭᐅᔪᒥ ᓴᐃᒃᔅᐱᐅᕐ ᓄᓇᕐᔪᐊᖓ, ᓴᓇᔭᐅᓚᐅᖅᓯᒪᔪᒥ ᖃᓂᒋᐸᓗᒃᑕᖓᓂ ᓯᕗᓪᓕᐅᓚᐅᖅᑐᒥ ᐃᓂᒋᓚᐅᖅᑕᖓᓐᓂ. ᐃᓕᓴᕆᔭᐅᓯᒪᕗᖅ ᐊᔾᔨᐅᙱᓐᓂᖓᓂ ᓄᓇᕐᔪᐊᓕᒫᒥ ᐃᑲᔪᕈᑎᒃᓴᐅᓪᓗᓂ ᑐᕌᖓᓪᓗᓂ ᕿᓂᕐᓂᐅᔪᒧᑦ ᓴᐃᒃᔅᐱᐅᕐ ᐱᓕᕆᓂᖏᓐᓂ ᑲᑎᙵᓂᖃᖅᑎᑕᐅᓂᐅᔪᒥ ᖁᙱᐊᕐᓂᐅᔪᓂᑦ ᐊᒻᒪ ᐃᓕᓐᓂᐊᕐᓂᕐᒧᑦ.
ᔮᓐ ᐊᕐᓇᓗᒃᔪᐊᖅ ᖁᑦᑎᒃᑐᒥ ᐃᓕᓐᓂᐊᕐᕕᖓᓐᓂ ᐱᓪᓚᕆᙳᐊᖅᑐᐃᑦ ᐃᓕᓴᐃᔨᖓ ᒍᐊᑦ ᐱᓛᑦ ᐅᖃᓚᐅᖅᐳᖅ ᐅᖃᓘᓯᖃᓚᐅᖅᐳᑦ ᐱᓪᓚᕆᙳᐊᖅᑏᑦ ᑲᑎᙵᓂᐅᔪᓄᑦ ᐃᓕᓐᓂᐊᖅᑎᓄᑦ 1 ᐅᓐᓄᓴᒃᑯᑦ ᑲᑎᙵᓂᖃᖅᑎᑕᐅᓂᐅᔪᒥ ᖃᕋᓴᐅᔭᑎᒍᑦ ᓚᓐᑕᓐᒧᑦ. ᐱᙳᐊᖅᑎᐅᔪᑦ ᑲᑎᙵᓂᐅᔪᒥ ᓴᖅᑭᑎᑕᐅᓂᖓᓂ ᕉᒥᐅ ᐊᒻ ᔫᓕᐊᑦᒥ, ᖃᓪᓗᓈᑎᑐᑦ ᐃᓕᓐᓂᐊᕐᕕᐊᕈᓯᖓᓐᓂ ᐃᓕᓐᓂᐊᖅᑏᑦ, ᐃᓕᓐᓂᐊᖅᑐᓂ ᓴᐃᒃᔅᐱᐅᕐᒥ ᑕᒪᑐᒪᓂ ᐃᓕᓐᓂᐊᕐᓂᐅᔪᒥ, ᐊᒻᒪ ᐃᓕᓐᓂᐊᖅᑎᓂᑦ ᐱᓛᑦ ᐋᔩᖃᑎᒌᖕᓂᐅᔪᒧᑦ ᐃᓕᓐᓂᐊᕐᕕᐊᕈᓯᖓᓐᓂ ᖃᐃᖁᔭᐅᓚᐅᕆᕗᑦ ᐃᓚᐅᖃᑕᐅᓂᕐᒧᑦ.
“ᖃᐅᔨᓴᖅᓯᒪᒐᓚᒃᓯᒪᔪᒍᑦ ᖁᙱᐊᖅᑕᐅᓂᐅᔪᓂᑦ, ᐊᒻᒪᓗ ᐋᖅᑭᒃᓱᖅᓯᒪᓂᐅᔪᒥ ᑲᑎᙵᓂᖃᒐᓛᒃᑐᖓ ᐱᓕᕆᓂᕐᓄᑦ ᐸᐃᑉᐹᖑᔪᓂ ᐊᒻᒪᓗ ᖃᓄᐃᓕᐅᒐᒃᓴᓂᑦ ᐱᓕᕆᖃᑎᒋᓚᐅᖅᑕᓐᓂ ᐃᓕᓐᓂᐊᖅᑎᓄᑦ ᐃᓯᓪᓚᕆᓚᐅᙱᓐᓂᑦᑎᓐᓂ ᐊᒻᒪ ᖁᙱᐊᖅᖢᑎᒍᑦ ᐱᓕᕆᓂᐅᔪᒥᑦ,” ᐅᖃᓚᐅᖅᐳᖅ ᐱᓛᑦ. “ᐃᓕᓐᓂᐊᖅᑏᑦ ᑕᐃᒪᐃᓕᐅᖅᓯᒪᕐᔪᐊᖅᐳᑦ ᓯᕗᓂᐊᓂ ᐳᓚᕋᖅᓯᒪᓚᐅᖅᓯᒪᒐᑦᑕ ᖁᙱᐊᖅᑕᐅᓂᐅᔪᓂ ᑕᐃᒪᐃᑦᑐᑎᑐᑦ ᐊᑕᐅᓯᐊᖅᖢᑕ.”
ᑕᒪᑐᒥᖓ ᐃᓕᓐᓂᐊᖅᑏᑦ ᐃᓗᑐᓂᖅᓴᒥ ᕿᒥᕐᕈᓂᖃᓚᐅᖅᐳᑦ ᖁᙱᐊᕐᓂᐅᔪᓂᑦ. ᑕᑯᑎᑕᐅᓚᐅᖅᐳᑦ ᑎᑎᕋᕐᕕᖏᓐᓂ ᐊᒻᒪ ᐱᔭᕆᐅᖅᓴᕕᐅᔪᓂᑦ ᐃᓂᒋᔭᖓᓐᓂ. ᐊᓂᑎᑕᐅᓚᐅᖅᐳᑦ ᐹᖓᒍᑦ ᕿᒥᕐᕈᓂᕐᒧᑦ ᑰᒃ ᑕᐃᒻᔅᒧᑦ ᑕᑯᓂᕐᒧᑦ ᐃᒡᓗᕐᔪᐊᖓᓂ ᐃᔾᔪᕐᓇᐃᑦᑐᖅ ᐹᓪ ᑐᒃᓯᐊᕐᕕᒡᔪᐊᖓᓄᑦ ᖃᐅᒪᑎᓪᓗᒍ ᓚᓐᑕᓐ ᐅᓐᓄᐊᒃᑯᑦ ᓯᓚᖓᓐᓂ. ᑲᒪᓚᐅᕆᕗᑦ ᐃᖏᕐᕋᕈᓘᔭᕐᓂᖓᓂ ᓚᓐᑕᓐᒥ ᐊᖅᑯᑎᖏᓐᓂᑦ.
ᐱᓛᑦ ᐅᖃᓚᐅᖅᐳᖅ ᑲᒪᓇᓚᐅᖅᐳᖅ ᑕᐃᑲᓃᓚᐅᑲᖕᓂᕐᒧᑦ ᕿᓚᒻᒥᐅᔪᒥ; ᐅᔾᔨᕆᓂᕐᒧᑦ ᑕᐅᑐᖕᓂᖏᓐᓂ ᐆᒪᔪᒥ ᕿᒥᕐᕈᐊᕐᓂᐅᔪᒥ ᓚᓐᑕᓐᒥ ᐊᒻᒪᓗ ᐅᖃᓪᓚᒡᕕᐅᓪᓗᑎᒃ ᖁᙱᐊᕐᕕᐅᑉ ᓯᓚᑎᑦᑎᐊᖓᓂ. ᐊᕐᕕᐊᓂ ᑲᑎᙵᓂᐅᔪᑦ ᐃᓗᐊᒎᖅᑎᑕᐅᓚᐅᕆᕗᑦ ᐊᓯᖏᓐᓂ ᖁᙱᐊᕐᕕᐅᑉ ᑐᓄᐊᓂ ᐃᒡᓗᕈᓯᐅᔪᓄᑦ ᐊᒻᒪᓗ ᐊᔾᔨᒌᙱᕈᓘᔭᖅᑐᓄᑦ ᐃᓂᐅᔪᓄᑦ ᑕᑉᐸᐅᖓᓗ ᖁᙱᐊᕐᕕᐅᑉ ᐃᒃᓯᕙᐅᑕᕆᔭᐅᕙᒃᑐᓄᑦ, ᐅᖃᓚᐅᖅᐳᖅ.
“ᖃᔅᓯᒐᓚᐃᑦ ᓱᕈᓯᑦ ᖃᐅᔨᒃᑲᓐᓂᕈᒪᓚᐅᖅᐳᑦ ᖁᓕᖓᓐᓂ ᖁᙱᐊᕐᕕᐅᔪᒧᑦ ᑕᐃᔭᐅᔪᒧᑦ ᕿᓚᖓᓐᓂ ᐹᖃᕐᒪᑦ ᑕᑉᐹᓂ,” ᐅᖃᓚᐅᖅᐳᖅ ᐱᓛᑦ. “ᐃᓚᖏᓐᓂ ᖁᙱᐊᖅᑕᐅᓂᐅᔪᓂ, ᖃᐃᖁᔨᓂᖅᑕᖃᖅᐳᖅ ᒎᑎᒋᔭᐅᔪᒥ ᐊᖅᑲᖅᑎᕐᓂᕐᒧᑦ ᕿᓚᖕᒥᑦ, ᓄᓱᒃᓯᔾᔪᑎᖃᖅᐳᑦ ᐊᖅᑲᖅᑎᑦᑎᕙᓪᓕᐊᓲᒥᑦ ᐹᖑᔪᒥ ᑕᐅᓄᖓ . ᓇᓗᓇᙱᓚᖅ, ᐃᓚᑎᒍᑦ ᐃᓱᒪᓚᐅᖅᐳᒍᑦ ᖃᖓᑭᐊᖅ ᑕᐃᒪᐃᑦᑐᒐᓚᖕᒥᓴᖅᑭᔮᖅᑎᑉᐸᒃᑕᑦᑎᓐᓂ ᓴᖅᑭᑎᑦᑎᓛᕈᒪᓪᓗᑕ .”
ᐳᓚᕋᕐᓂᐅᔪᖅ ᐊᕐᕕᐊᓄᑦ ᐃᓕᓐᓂᐊᖅᑎᐅᔪᓄᑦ ᐱᔪᓐᓇᖅᑎᑕᐅᓚᐅᖅᐳᖅ ᐊᒃᓱᕈᕐᓂᐅᔪᓄᑦ ᓄᓇᕐᔪᐊᕐᒧᐊᖅᑎᑦᑎᓂᐅᔪᒥ ᑲᑐᔾᔨᓪᓗᑎᒃ ᓄᓇᕗᒻᒥ ᒐᕙᒪᒃᑯᓐᓂ, ᑲᑎᙵᑎᑦᑎᓂᐅᔪᒥ ᐅᑭᐅᖅᑕᖅᑐᒥ ᐊᒻᒪ ᓯᔅᑯ ᑲᓇᑕᒥ.
ᓄᓇᕐᔪᐊᕐᒧᐊᖅᑎᑦᑎᓂᐅᔪᒥ ᐊᑐᐃᓐᓇᖃᖅᑎᑦᑎᕗᑦ ᐅᖃᓪᓚᖕᓂᐅᔪᓂ ᐊᒻᒪ ᐳᓚᕋᕐᓂᐅᔪᓂᑦ ᑐᓂᔭᐅᓂᐅᔪᓂᑦ ᐊᔾᔨᒌᙱᕈᓘᔭᖅᑐᓂ ᐱᓕᕆᔨᒻᒪᕆᐅᔪᓄᑦ ᐃᓂᐅᔪᓂᑦ ᓄᓇᕐᔪᐊᓕᒫᒥᑦ, ᐅᕘᓇᓗᒃᑖᖅ ᖃᕋᓴᐅᔭᑎᒍᑦ ᑲᓱᕐᓂᐅᔪᓄᑦ. ᐱᓛᑦ ᐅᖃᓚᐅᖅᐳᖅ ᐊᑐᐃᓐᓇᖃᖅᑎᑦᑏᓐᓇᕐᓂᐊᖅᐳᖅ ᐅᑯᐊ ᖃᕋᓴᐅᔭᑎᒍᑦ ᐳᓚᕋᕐᓂᐅᔪᓂ ᐃᓕᓐᓂᐊᖅᑎᖏᓐᓄᑦ.
“ᐊᑕᐅᓯᐅᕗᖅ, ᐱᓗᐊᖅᑐᒥ ᐅᖃᖃᑎᖃᖅᑎᓪᓗᒋᑦ ᓄᓇᖃᖅᑳᖅᓯᒪᔪᒥ ᖁᙱᐊᖅᑕᐅᓲᒥ ᑕᑯᓯᒪᔪᒥ ᐱᓕᕆᔪᓐᓇᑦᑎᐊᖅᓯᒪᓂᐅᔪᒥ ᐃᖅᑲᓇᐃᔮᕆᔪᒪᔭᒥᓂᑦ, ᐊᒻᒪ ᐅᖃᓪᓛᕐᔪᓛᖅᑐᖅ ᐃᓕᓐᓂᐊᖅᑎᖏᓐᓄᑦ ᐃᖏᕐᕋᓯᒪᓂᕆᔭᖓᓐᓂ, ᐅᓂᒃᑲᐅᑎᓗᒋᑦ ᖃᓄᖅ ᐱᓕᕆᓂᕆᔭᖓᓐᓂ ᐊᒻᒪᓗ ᑐᓂᓗᒋᑦ ᐃᑲᔪᕈᑎᒃᓴᐅᔪᓂ ᐊᒻᒪ ᐅᖃᐅᔾᔨᓂᕐᓂ ᐃᓱᒪᑐᐃᓐᓇᕆᐊᓕᖕᓄᑦ ᑕᐃᒪᐃᑦᑐᑦᑕᐃᓐᓇᕐᒥ ᐱᓕᕆᓂᖃᕈᒪᔪᓄᑦ,” ᐅᖃᓚᐅᖅᐳᖅ.