ᐱᒋᐊᓚᐅᖅᑐᒥ ᐱᐅᑦᑎᐊᖅᑐᒥ ᐊᕐᕌᒎᑉ-ᓗᙳᐊᓂ ᑎᑎᕋᕐᓂᕐᒧᑦ ᐱᓕᕆᐊᒃᓴᕆᔭᐅᔪᒧᑦ ᖁᑦᑎᖕᓂᓕᖕᓄᑦ 9-ᓄᑦ ᖃᓪᓗᓈᑎᑐᑦ ᐃᓕᓐᓂᐊᖅᑎᓄᑦ ᔮᓐ ᐊᕐᓇᓗᒃᔪᐊᖅ ᖁᑦᑎᒃᑐᒥ ᐃᓕᓐᓂᐊᕐᕕᖓᓐᓂ ᐊᕐᕕᐊᓂ ᐱᐅᓂᖅᓴᒻᒪᕆᐅᔪᓐᓇᖅᓯᕗᖅ ᐅᖃᓕᒫᒐᓕᐊᖑᓗᓂ ᐱᓕᕆᓂᐅᔪᒥ ᐅᓂᒃᑳᖅᑐᐊᑐᖃᕐᓂ ᑕᐃᔭᐅᔪᒥ, ᖃᓄᖅ ᐊᕿᒡᒋᖅ ᖃᖓᑕᔪᓐᓇᖅᓯᓚᐅᖅᐸ?
“ᐅᑯᐊ ᐅᓂᒃᑳᖅᑐᐊᑦ ᐅᖃᐅᓯᖃᖅᐳᑦ ᒪᒃᑯᒃᑑᔪᓂ ᒫᓐᓇᐅᔪᒥ ᐊᒻᒪᓗ ᑐᑭᓯᐅᒪᓂᖏᓐᓂ ᐱᓐᓇᕆᔭᐅᔪᓂ ᐊᒻᒪ ᐱᖅᑯᓯᑐᖃᕐᓂᑦ ᐃᓚᒋᔭᐅᔪᓂ ᐃᓅᓂᖏᓐᓂ ᐃᓕᖅᑯᓯᖓᓐᓂ,” ᐅᖃᓚᐅᖅᐳᖅ ᐃᓕᓴᐃᔨᖓᑦ ᕕᒃᑐᐊᕆᐊ ᐸᓛᔅᑭᑦ. “ᖁᕕᐊᒋᓯᒪᕙᕋ ᐊᒻᒪ ᐅᐱᒋᓪᓗᒍ ᐅᖃᓕᒫᕐᓂᕐᒧᑦ ᑎᑎᕋᕐᓂᖏᓐᓂ ᐊᒻᒪ ᐋᖅᑭᑦᑎᐊᕆᐊᖅᖢᒋᑦ ᐅᖃᐅᓯᖏᓐᓂ ᐊᒻᒪ ᐅᓂᒃᑳᓕᐊᖏᓐᓂ.”
ᐃᓕᓐᓂᐊᖅᑏᑦ ᐊᖅᑯᑎᖓ ᐅᖃᓕᒫᒐᓕᐅᕐᓂᕐᒧᑦ ᐱᒋᐊᓚᐅᖅᐳᖅ ᑐᓂᔭᐅᒐᒥ ᐱᓕᕆᐊᒃᓴᒥᓂᑦ ᓴᓇᓂᕐᒧᑦ ᓇᖕᒥᓂᕐᒥᓂ ᓯᕗᓪᓕᖅᐹᖑᔪᓂ ᐅᓂᒃᑳᓕᐊᓂ ᑕᖅᑭᒐᓴᓂ ᑎᑎᕋᐃᕙᓚᐅᖅᑎᓪᓗᒋᑦ ᐅᖃᓕᒫᒐᕋᓛᓂ ᐊᒻᒪ ᐅᖃᓕᒫᖅᐸᒃᖢᑎᒃ ᖃᓄᐃᑦᑐᑐᐃᓐᓇᕐᓂ ᑎᑎᕋᐅᓯᐅᓯᒪᔪᓂ, ᐅᖃᓕᒫᒐᓂᑦ, ᓇᐃᑦᑐᓂ ᐅᓂᒃᑲᖅᑐᐊᓂ ᐊᒻᒪ ᐅᖃᓕᒫᒐᓪᓚᕆᐅᔪᓂ.
ᐃᓕᓐᓂᐊᖅᑎᑦ ᐅᐸᓚᐅᖅᐳᑦ ᕿᑎᖅᖠᖅ ᕿᑎᖅᐸᓯᐊᓂ ᐃᓕᓐᓂᐊᕐᕕᖕᒧᑦ ᐳᓚᕋᕆᐊᖅᑐᖅᖢᑎᒃ ᖁᑦᑎᖕᓂᓕᖕᓂ 8-ᓂ ᒫᒋ ᒪᓂᒃ ᐃᓕᓐᓂᐊᕐᕕᐊᕈᓯᖓᓐᓄᑦ ᐅᖃᓕᒫᕆᐊᖅᑐᖅᖢᑎᒃ ᐅᓂᒃᑳᖅᑐᐊᒥᓂᑦ ᒪᐃ 24-ᖑᑎᓪᓗᒍ, ᑲᑎᖅᓱᐃᓚᐅᖅᑎᓪᓗᒍ ᐱᔭᕇᖅᓯᒪᔪᓂ ᐅᓂᒃᑳᖅᑐᐊᓂ ᑎᑎᕋᐅᔭᖃᕐᓂᐅᔪᒧᑦ ᐅᖃᓕᒫᒐᕐᒧᑦ.
“ᓂᐱᖃᓚᐅᙱᓚᑦ ᒫᒋᐅᑉ ᐃᓕᓐᓂᐊᕐᕕᐊᕈᓯᖓᓐᓂ ᐃᓕᓐᓂᐊᖅᑏᑦ ᐱᓚᐅᖅᑎᓪᓗᒋᑦ ᓯᕗᓪᓕᐅᔪᓂ ᐊᔾᔨᖏᓐᓂ ᐅᓂᒃᑳᖅᑐᐊᖏᓐᓂ,” ᐅᖃᓚᐅᖅᐳᖅ ᐸᓛᔅᑭᑦ. “ᑕᑯᑎᑦᑎᖃᑦᑕᐅᑎᓕᖅᖢᑎᒃ ᐅᓂᒃᑳᖅᑐᐊᖏᓐᓂ ᐃᒻᒥᖕᓄᑦ. ᓂᐱᑭᑦᑐᒥ ᖁᕕᐊᓱᖕᓂᖅᑕᖃᓚᐅᖅᐳᖅ ᑕᒪᕐᒥᒃ ᐅᖃᓕᒫᖃᑎᖃᖅᑎᓪᓗᒋᑦ. ᑲᒪᓇᕐᔪᐊᓚᐅᖅᑐᖅ.”
ᖁᑦᑎᒃᑐᒥ ᐃᓕᓐᓂᐊᕐᕕᖕᒥ ᐃᓕᓴᐃᔨᓄᑦ ᐊᖓᔪᖅᑳᖓ ᕉᒥᐅ ᕗᐊᓐᓇᐃ ᐊᒻᒪ ᐸᓛᔅᑭᑦ ᐋᖅᑭᒃᓯᓚᐅᖅᐳᑦ ᑐᕌᒐᒃᓴᓂ ᐃᓕᓐᓂᐊᖅᑎᓂᑦ ᐅᖃᓕᒫᕐᓂᕐᒧᑦ ᐊᒻᒪ ᑎᑎᕋᕐᓗᑎᒃ ᖄᖏᖅᓯᒪᓕᖅᑐᒥ ᕕᕈᐊᕆᒥ ᐸᕐᓇᐃᓪᓗᑎᒃ ᐃᓕᓐᓂᐊᖅᑎᓂᑦ ᑎᑎᕋᕐᓂᐊᕐᓂᖏᓐᓄᑦ ᐅᓂᒃᑳᖅᑐᐊᒥᓂᑦ.
ᐸᓛᔅᑭᑦ ᐅᖃᓚᐅᖅᐳᖅ ᐊᑐᓂ ᐃᓕᓐᓂᐊᖅᑎ ᐱᓚᐅᖅᐳᑦ ᑎᑎᕋᕐᓂᕐᒧᑦ ᐱᓕᕆᐊᕆᔭᕆᐊᖃᖅᑕᒥᓂᑦ ᐊᒻᒪᓗ ᖃᐅᑕᒫᒥ ᑎᑎᕋᕐᓂᕐᒧᑦ ᑲᑎᖅᓱᖅᑕᐅᓂᐅᔪᒥ, ᐃᓕᓐᓂᐊᕐᓂᖃᖅᖢᑎᒃ ᒪᓕᒐᐅᔪᓄᑦ ᐅᖃᐅᓯᕐᓄᑦ, ᓇᓚᐅᑦᑐᒥ ᑎᑎᕋᕐᓂᕐᒧᑦ ᐊᒻᒪ ᓇᓗᓇᐃᒃᑯᑕᓂᑦ ᐋᖅᑭᒃᓱᐃᓂᐅᔪᓄᑦ ᑎᑎᕋᕐᓂᕐᒧᑦ ᖃᖓᒃᑲᓐᓂᐅᓪᓗᓂ.
ᐅᖃᓚᐅᖅᐳᖅ ᑎᑎᕋᖃᑦᑕᓚᐅᖅᐳᑦ ᑲᑎᖅᓱᐃᕕᖓᓐᓄᑦ 10 ᒥᓂᑦᓄᑦ ᖃᐅᑕᒫᒥ.
“ᑎᑎᕋᐅᓯᖃᓚᐅᖅᐳᑦ ᖃᓄᖅ ᓄᑖᒥ ᓄᑲᖅᑖᒥ ᓇᒃᓴᓚᐅᕐᓂᖓᓂ ᖁᕕᐊᓱᖕᓂᐅᔪᒥ ᐃᓅᓯᖏᓐᓄᑦ, ᓯᕙᑖᕐᕕᖕᒥ ᐅᓐᓄᐊᒃᑯᑦ ᒧᒥᕐᓂᐅᔪᓂ, ᕼᐋᑭᒧᑦ ᐱᙳᐊᕐᓃᑦ, ᐃᖅᑲᓇᐃᔭᕐᓂᕐᒧᑦ ᐱᓇᓱᐊᕈᓯᐅᑉ ᓄᙳᐊᓂ ᐊᒻᒪ ᐱᓱᔪᖕᓂᕐᒧᑦ ᓄᓇᓕᖕᓂ ᐱᖅᑲᓐᓇᕆᔭᒥᓂ ᐱᖃᑎᖃᖅᖢᑎᒃ,” ᐅᖃᓚᐅᖅᐳᖅ. “ᑎᑎᕋᐅᓯᖃᓚᐅᖅᐳᑦ ᐊᖏᕐᕋᖅᓯᒪᓚᐅᕐᓂᖏᓐᓂ ᐅᓪᓗᓕᒫᒥ ᐱᖅᓯᖅᑎᓪᓗᒍ, ᓯᑭᑑᖅᖢᑎᒃ ᑐᖑᔪᖅᑐᒥ ᓯᓚᖃᖅᑎᓪᓗᒋᑦ ᐅᓐᓄᓴᒃᑯᑦ. ᑎᑎᕋᐅᓯᖃᓚᐅᖅᐳᑦ ᐊᖑᓇᓱᖕᓂᕐᒥ ᓄᓇᒥ ᑐᒃᑐᓄᑦ ᐊᒻᒪ ᑎᕆᒐᓂᐊᓄᑦ, ᐅᐱᕐᙶᒥ ᐃᖃᓗᒐᓱᖕᓂᕐᒥ ᓵᓚᖃᕋᓱᐊᕐᓂᐅᔪᒥ ᐊᒻᒪ ᑕᕆᐅᕐᒥ ᓯᑯᐃᕐᓂᖓᓂ ᑲᖏᖅᓱᐊᓗᖕᒥ ᐋᒍᔅᑎᒥ.”
“ᑎᑭᐅᑎᖕᒪᑦ ᑎᑎᕋᕐᓂᕐᒧᑦ ᐅᓂᒃᑲᖅᑐᐊᒥᓂ, ᐸᕐᓇᒃᓯᒪᓕᓚᐅᖅᐳᑦ,” ᐅᖃᓚᐅᖅᐳᖅ.
ᒪᓕᖕᓂᐅᔪᖅ ᐅᖃᓕᒫᒐᕐᒧᑦ ᐅᓂᒃᑳᖅᑐᐊᓂ, ᖃᓄᖅ ᐊᕿᒡᒋᖅ ᖃᖓᑕᔪᓐᓇᖅᓯᓚᐅᖅᐸ? ᐅᓂᒃᑲᖅᑐᐊᓂ ᐃᓄᒃᑎᑑᓕᖅᑎᑕᐅᓗᑎᒃ ᑐᕌᖓᓂᖃᕐᓗᓂ ᓯᕗᓂᒃᓴᒧᑦ ᐅᖃᓕᒫᒐᓕᐊᖑᓂᐊᕐᓂᖓᓄᑦ.
ᐸᓛᔅᑭᑦ ᐅᖃᓚᐅᖅᐳᖅ ᐊᒥᓱᑦ ᐃᓕᓐᓂᐊᖅᑎᑦ ᐅᖃᓕᒫᕈᒪᓚᐅᖅᐳᑦ ᐅᓂᒃᑳᖅᑐᐊᒥᓂ ᖁᑦᑎᖕᓂᓕᖕᓄᑦ 8-ᓄᑦ ᐃᓕᓴᐃᔨᒋᓚᐅᖅᑕᒥᓄᑦ, ᒫᒋ ᒪᓂᖕᒧᑦ, ᑕᐃᑲᓂ ᐅᖃᓕᒫᖃᑎᒌᖕᓂᕐᒧᑦ ᐱᖃᓐᓇᕆᔭᕐᓄᑦ ᐅᓪᓛᖓᓐᓂ ᕿᑎᖅᖠᖅ ᕿᑎᖅᐸᓯᐊᓂ ᐃᓕᓐᓂᐊᕐᕕᖕᒥ.
ᐅᖃᓚᐅᖅᐳᖅ ᐱᓗᐊᖅᑐᒥ ᐱᒻᒪᕆᐅᓚᐅᖅᐳᖅ ᒪᓂᖕᒧᑦ, ᐊᒻᒪ ᖁᕕᐊᒋᓚᐅᖅᐸᖏᑦ ᐃᓕᓐᓂᐊᖅᑎᐅᔪᑦ ᑎᑎᕋᐃᓂᖏᓐᓂ ᐅᓂᒃᑳᖅᑐᐊᑦᑎᐊᕚᓗᖕᓂ.
ᐅᐱᒋᔭᐅᓪᓗᑎᒃ ᐊᒃᓱᕈᖅᖢᑎᒃ ᐱᓕᕆᓂᖏᓐᓂ, ᐃᓕᓐᓂᐊᖅᑎ ᑖᓄᑦ ᐸᐃᑯᕐ-ᔅᐸᓐᔅ ᐱᓚᐅᖅᐳᖅ ᑐᕌᓐᑐ ᕌᑉᑐᔅ ᐅᕕᓂᕈᖓᓐᓂ ᓯᕗᓪᓕᖅᐸᐅᓪᓗᓂ ᐅᓂᒃᑳᓕᐅᕐᓂᖓᓂ, ᖃᓄᐃᒻᒪᑦ ᕿᓚᒃ ᑐᖑᔪᖅᐸ ᐅᓪᓗᒃᑯᑦ? ᓂᐱᖃᖅᖢᓂ ᐅᖃᓕᒫᖅᑕᐅᓪᓗᓂ ᑲᑎᙵᓂᐅᔪᓄᑦ, ᑖᓄᑦ ᓱᓗᒃ ᐱᓚᐅᖅᐳᖅ ᑲᓇᑕᒥ ᕼᐋᑭᖅᑎᐅᔪᓄᑦ ᑲᒪᓇᖅᓯᒪᔪᓄᑦ ᓂᐱᑎᒐᕐᓂ ᑲᑎᖅᓱᖅᑕᐅᓯᒪᔪᒥ ᒪᕐᕈᒋᔭᐅᓂᖓᓄᑦ ᐅᓂᒃᑲᖅᑐᐊᒥᓂᑦ, ᐊᖑᑎ ᐱᖓᓱᓂ ᓱᓇᒐᓕᖕᓂ ᐊᒻᒪ ᐃᔨᕋᖅ, ᐅᖃᓚᐅᖅᐳᖅ ᐸᓛᔅᑭᑦ.