ᒪᒃᑖᖅ, ᐃᖃᓗᒃᐱᒃ ᐊᒻᒪ ᐃᖃᓗᑦ ᐃᓚᒋᔭᐅᓚᐅᖅᐳᑦ ᐊᒥᓱᓂ ᖁᕕᐊᓲᓯᐊᒃᓴᓂ ᐅᑭᐅᖅᑕᖅᑐᒥ ᐊᔪᖅᓴᖅᑐᓄᑦ ᓂᕿᑖᕐᕕᒃ ᑐᓂᐅᖅᑲᐃᓚᐅᕐᓂᖏᓐᓂ ᐊᓯᐊᒎᖅᑐᒥ ᓂᑭᓂᒃ ᑐᓐᓂᖅᓴᕐᓂᐅᔪᒥ ᐅᓪᓗᖓᓂ ᓄᕕᐱᕆ 28–ᒥ
ᖄᒃᑲᓐᓂᐊᒍᑦ ᓂᕿᓂᒃ ᑐᓐᓂᖅᓴᐃᓂᕆᕙᒃᑕᒥᓂ, ᓄᕕᐱᕆ 28–ᒥ ᐅᑭᐅᖅᑕᖅᑐᒥ ᐊᔪᖅᓴᖅᑐᓄᑦ ᓂᕿᑖᕐᕕᒃ ᐃᖃᓗᖕᓂ ᖁᕕᐊᓲᓯᐊᒃᓴᓂᒃᓯᓚᐅᖅᐳᑦ ᑐᓂᔭᒃᓴᒥᓂᑦ ᓄᓇᓕᖕᓄᑦ.
ᐅᑭᐅᖅᑕᖅᑐᒥ ᐊᔪᖅᓴᖅᑐᓄᑦ ᓂᕿᑖᕐᕕᒃ ᐃᖃᓗᖕᓂ ᐱᒋᐊᖅᑎᑕᐅᓚᐅᖅᐳᑦ ᓯᑎᐱᕆ 28, 2018–ᒥ ᐊᒻᒪᓗ ᑕᐃᒪᙵᓂ ᐃᑲᔪᖅᓯᒪᕗᑦ ᓂᕆᑎᑦᑎᓂᕐᒥ, ᐃᑲᔪᖅᖢᑎᒃ ᑭᐅᓂᕐᒥ ᓂᕿᒃᓴᖃᑦᑎᐊᙱᓐᓂᐅᔪᒥ ᓄᓇᕗᒻᒥ ᐊᖓᔪᖅᑳᖃᕐᕕᖓᓂ.
"ᐃᓱᒪᓚᐅᖅᐳᒍᑦ ᓂᕿᒃᓴᖃᑦᑎᐊᙱᓐᓂᐅᔪᒥ ᐅᕙᓂ ᓄᓇᕗᒻᒥ, ᐃᓱᒪᓚᐅᖅᐳᒍᑦ ᐃᓄᐃᑦ ᓯᓂᒋᐊᖅᑐᓪᓗᐊᙱᓐᓂᖏᓐᓂ ᓂᕆᔭᒃᓴᖃᙱᓪᓗᑎᒃ," ᐅᖃᓚᐅᖅᐳᖅ ᒧᕼᐋᒥᑦ ᐅᐊᓂ, ᐊᖓᔪᖅᑳᑉ ᑐᒡᓕᖓ ᐃᔅᓛᒥᒃ ᑲᑐᔾᔨᖃᑎᒌᖑᔪᓄᑦ ᓄᓇᕗᒻᒥ ᐊᒻᒪᓗ ᑕᒪᐃᑎᒍᑦ ᐊᐅᓚᑦᑎᔨᐅᔪᒥ ᐅᑭᐅᖅᑕᖅᑐᒥ ᐊᔪᖅᓴᖅᑐᓄᑦ ᓂᕿᑖᕐᕕᖕᒥ.
ᑲᑐᔾᔨᖃᑎᒌᒃᖢᑎᒃ ᒧᔅᓚᒻ ᖃᓄᐃᙱᑦᑎᐊᕐᓂᐅᔪᒥ ᑲᓇᑕᒥ, ᐅᑭᐅᖅᑕᖅᑐᒥ ᐊᔪᖅᓴᖅᑐᓄᑦ ᓂᕿᑖᕐᕕᒃ ᑕᑯᓯᒪᒋᕗᑦ ᐊᖏᐸᓗᒃᑐᒥ ᐃᓄᖕᓂ ᑐᒃᓯᕋᖅᑐᒥ ᖁᕝᕙᕆᐊᒃᑲᓐᓂᕐᓂᐅᔪᒥ ᐊᔪᖅᓴᖅᑐᓄᑦ ᓂᕿᑖᕐᕕᖕᒥ.
"ᐱᒋᐊᓚᐅᖅᐳᒍᑦ ᐆᒥᖓ ᐊᔪᖅᓴᖅᑐᓄᑦ ᓂᕿᑖᕐᕕᖕᒥ ᑲᑐᔾᔨᖃᑎᒌᒃᖢᑕ ᒧᔅᓚᒻ ᖃᓄᐃᙱᑦᑎᐊᕐᓂᐅᔪᒥ ᑲᓇᑕᒥ ᑐᕌᓐᑐᒥ," ᐅᖃᓚᐅᖅᐳᖅ ᐅᐊᓂ. "ᐅᓇ ᐱᓕᕆᐊᒃᓴᕆᖕᒪᔾᔪᒃ, ᐊᖏᖃᑎᒌᒃᐳᒍᑦ ᐊᒻᒪ ᑲᑐᔾᔨᖃᑎᒌᒃᐳᒍᑦ ᑕᐃᒃᑯᓂᖓ."
ᒧᔅᓚᒻ ᖃᓄᐃᙱᑦᑎᐊᕐᓂᐅᔪᒥ ᑲᓇᑕᒥ ᒪᑐᐃᖅᓯᓚᐅᖅᐳᑦ ᓯᕗᓪᓕᖅᐹᖓᓂ ᐅᑭᐅᖅᑕᖅᑐᒥ ᐊᔪᖅᓴᖅᑐᓄᑦ ᓂᕿᑖᕐᕕᖕᒥ ᐃᓅᕕᒃ, ᓄᓇᑦᓯᐊᕐᒥ, ᐱᒋᐊᓚᐅᖅᑐᒥ ᒪᐃ 2015–ᒥ.
ᓂᕿᒃᓴᐃᑦ ᐅᒥᐊᕐᔪᐊᒃᑰᓲᖑᕗᑦ ᐊᕐᕌᒍᑕᒫᒥ ᒧᔅᓚᒻ ᖃᓄᐃᙱᑦᑎᐊᕐᓂᐅᔪᒥ ᑲᓇᑕᒥ ᐊᒻᒪᓗ ᐅᑭᐅᖅᑕᖅᑐᒥ ᐊᔪᖅᓴᖅᑐᓄᑦ ᓂᕿᑖᕐᕕᒃ ᐃᑲᔪᓲᖑᕗᑦ ᑐᓐᓂᖅᓴᐃᓂᕐᒥ ᓂᕿᓂᑦ ᒪᕐᕈᖓᓂ ᓯᕙᑖᕐᕕᑕᒫᒥ.
ᓯᕙᑖᕐᕕᖓᓂ ᓄᕕᐱᕆ 28–ᒥ ᐊᓯᐊᒎᖅᖢᓂ ᐅᓪᓘᓚᐅᖅᐳᖅ ᐊᔪᖅᓴᖅᑐᓄᑦ ᓂᕿᑖᕐᕕᖕᒧᑦ ᑐᓂᐅᖅᑲᐃᓚᐅᕐᒪᑕ ᖁᕕᐊᓲᑎᒃᓴᓂ ᐃᑲᔪᕐᓂᕐᒧᑦ ᖁᕕᐊᓱᒍᑎᖃᕐᓂᕐᒧᑦ ᖁᕕᐊᓱᒡᕕᖕᒥ.
"ᐅᓪᓗᒥ ᑐᓐᓂᖅᓴᖅᑕᐅᓂᐅᔪᖅ ᑐᓂᐅᖅᑲᐃᕗᒍᑦ ᖁᕕᐊᓱᒡᕕᖕᒧᑦ ᖁᕕᐊᓲᑎᒃᓴᓂ ᖁᕕᐊᓱᒡᕕᒃ ᑎᑭᑉᐸᓪᓕᐊᓕᕐᒪᑦ," ᐅᖃᓚᐅᖅᐳᖅ ᐅᐊᓂ.
ᖁᕕᐊᓲᑎᒃᓴᖅᑕᖃᓚᐅᖅᐳᖅ ᐊᖑᑎᓄᑦ ᐊᒻᒪ ᐊᕐᓇᓄᑦ, ᐊᒻᒪᓗᑦᑕᐅᖅ ᓇᖕᒪᒐᕐᓂ ᐃᓕᓐᓂᐊᖅᑎᓄᑦ ᐱᒋᐊᓕᓵᖅᑐᓂ ᖁᑦᑎᖕᓂᓕᖕᓄᑦ 8–ᒧᑦ.
ᒪᒃᑖᑦ, ᐱᕈᖅᑐᕕᓂᕐᓂ, ᐃᖃᓗᒃᐱᑦ ᐊᒻᒪ ᐃᖃᓗᑦ ᑐᓂᐅᖅᑲᖅᑕᐅᓚᐅᕆᕗᑦ ᑕᐃᑲᓂ ᐅᓪᓘᔪᒥ, ᐅᐸᒐᔪᒃᑐᓂ ᐊᔪᖅᓴᖅᑐᓄᑦ ᓂᕿᑖᕐᕕᓕᐊᓲᓄᑦ ᖁᕕᐊᓱᓚᐅᖅᑐᓂ ᑕᑯᔭᕆᐊᒃᓴᖅ.
"ᖁᕕᐊᓱᕐᔪᐊᓚᐅᖅᐳᑦ ᐱᓂᖏᓐᓂ ᐅᑯᓂᖓ ᖁᕕᐊᓲᓯᐊᖑᔪᓂ."
ᓂᕿᓂᒃ ᑐᓐᓂᖅᓴᐃᓂᐅᔪᒥ ᐅᓪᓗᖏᓐᓂ ᐅᑭᐅᖅᑕᖅᑐᒥ ᐊᔪᖅᓴᖅᑐᓄᑦ ᓂᕿᑖᕐᕕᖕᒧᑦ ᐃᖃᓗᖕᓂ ᐱᓕᕆᐊᖑᕙᒃᐳᖅ ᓯᕙᑖᕐᕕᖕᒥ ᐱᓇᓱᐊᕈᓰᑦ ᒪᕐᕉᒃ ᐊᓂᒍᕌᖓᑦ, ᐊᐃᑉᐸᖓ ᑐᓐᓂᖅᓴᕐᕕᐅᓂᐊᖅᑐᒥ ᑎᑭᑉᐸᓪᓕᐊᑎᓪᓗᒍ ᑎᓯᐱᕆ 12–ᒥ.
ᐅᐸᒍᓐᓇᖅᑐᖃᙱᒃᑯᓂ ᑕᐃᑲᓂ ᐅᓪᓘᔪᓂ ᐊᒻᒪᓗ ᓱᓕ ᓂᕿᑖᕆᐊᖃᕐᓗᑎᒃ, ᓱᓕ ᐃᑲᔪᕈᒪᑐᐃᓐᓇᖅᐳᑦ ᐃᓄᖕᓂ.
"ᑭᓇᑐᐃᓐᓇᖅ ᓂᕿᑖᕆᐊᖃᕈᑎᒃ, ᐅᓪᓗᕆᙱᑕᖓᓂ ᓲᕐᓗ ᑭᓇᑐᐃᓐᓇᖅ ᐊᔪᖅᓴᖅᑐᓄᑦ ᓂᕿᑖᕐᕕᓕᐊᕈᓐᓇᓚᐅᙱᒃᑯᑎᒃ ᐊᔪᖅᓴᖅᑐᓄᑦ ᓂᕿᑖᕐᕕᖕᒧᑦ, ᐅᕙᑦᑎᓐᓄᑦ ᐅᖃᓗᒍᓐᓇᖅᐳᑦ ᐊᒻᒪ ᑐᓂᔪᓐᓇᖅᑕᕗᑦ ᓂᕿᓂᑦ, ᑐᓐᓂᖅᓴᐃᓂᕐᒥ ᐅᓪᓗᕆᙱᒃᑲᓗᐊᕈᓂᐅᒃ ᖃᓄᐃᙱᑦᑎᐊᖅᐳᖅ, ᓯᓂᒋᐊᖅᑐᖁᔨᙱᓐᓇᑦᑕ ᑳᒡᓗᑎᒃ," ᐅᖃᓚᐅᖅᐳᖅ ᐅᐊᓂ.
"ᑭᓇᑐᐃᓐᓇᑦᑎᐊᖅ ᑐᙵᓱᒃᑎᑕᐅᕗᑦ, ᐃᓱᒪᒋᓇᒍ ᖃᓄᐃᑦᑑᓂᖏᓐᓂ ᐃᓅᒐᓗᐊᖅᐸᑕ, ᖃᓪᓗᓈᑦ ᖃᓄᑐᐃᓐᓇᖅ, ᐊᕕᒃᑐᖅᓯᒪᓂᐅᔪᒥ ᑲᑐᔾᔨᖃᑎᒌᖑᔪᓄᑦ, ᑮᓇᐅᔾᔭᒃᓴᓂᖃᕐᓂᖏᓐᓄᑦ ᓇᓗᓇᐃᖅᓯᒪᓂᐅᔪᓄᑦ, ᑐᒃᓯᐊᕐᕕᐅᑉ ᐊᓯᐊᒎᖅᑐᒥ, ᖃᓄᐃᙱᑦᑎᐊᖅᐳᖅ."