ᓇᖕᒥᓂᖃᖃᑕᐅᒐᓗᐊᖅᑎᓪᓗᒍ ᑐᓂᒃ ᑖᕐᓯᒥ, ᐹᓪ ᐳᕿᖅᓇᖅ ᓱᓕ ᐅᓐᓄᒃᑯᑦ ᐃᖅᑲᓇᐃᔭᓲᖑᕗᖅ ᐊᖁᖦᖢᓂ.
ᑕᐃᒪᐃᓕᑕᐃᓐᓇᙱᑦᑐᖅ. ᑖᒃᓯᒥ ᐊᖁᑉᐸᓚᐅᖅᐳᖅ ᐃᓪᓗᖓᓄᑦ, ᐋᓐᑐᕉ ᐳᐊᑕᒧᑦ, ᐊᕐᕌᒍᑦ 12-ᐸᓗᖕᓄᑦ ᖄᖏᖅᓯᒪᓕᖅᑐᒥ.
“ᐊᓕᐊᓇᐃᒋᑦᑎᐊᖅᑕᕋ ᐊᖁᖦᖢᓂ ᑖᒃᓯᒥ. ᐊᓕᐊᓇᐃᒋᑦᑎᐊᖅᑕᕋ ᐃᓄᖕᓂ ᐃᑭᒪᔪᓄᑦ ... ᑐᓵᓪᓗᓂ ᐅᓂᒃᑳᖅᑕᐅᔪᓂ ᐊᒻᒪ ᐃᒡᓚᖃᑎᖃᖅᖢᓂ,” ᐅᖃᓚᐅᖅᐳᖅ ᐳᕿᖅᓇᖅ, ᒐᕙᒪᒃᑯᓐᓂ ᐃᖅᑲᓇᐃᔮᖃᖅᖢᓂ ᐅᓪᓗᒃᑯᑦ.
ᐊᑐᖅᖢᓂ 2015 Ford F-150−ᒥ, ᐹᓪ ᐊᒻᒪ ᓄᓕᐊᖓ ᐋᐱ ᐃᓗᓪᓕᖅᓯᓚᐅᖅᐳᑦ ᐃᓚᑰᓂᐅᔪᒥ ᐊᒻᒪ ᓇᖕᒥᓂᖓᓐᓂ ᑖᒃᓯᒧᑦ ᑲᒻᐸᓂᑖᓚᐅᖅᐳᑦ ᑎᓯᐱᕆᒥ, ᐅᓇᐅᒐᓗᐊᖅᑎᓪᓗᒍ ᓄᕙᒡᔪᐊᕐᓇᖅ-19 ᐊᒥᓱᓂ ᖃᓂᒻᒪᓐᓇᐅᔪᒥ, ᖃᓄᐃᑦᑐᑐᐃᓐᓇᕐᓂ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑭᒡᓕᖃᖅᑎᑕᐅᓂᐅᔪᓂ ᐃᓕᓯᒪᑎᓪᓗᒋᑦ. ᑭᒡᓕᖃᖅᑎᑕᐅᓂᖃᕋᓗᐊᖅᑎᓪᓗᒍ, ᓈᒻᒪᒃᑐᒥ ᐱᔪᒪᓂᖃᖅᓯᒪᕗᖅ ᐱᔨᒃᑎᕋᕐᓂᖏᓐᓂ, ᐱᓗᐊᖅᑐᒥ ᐅᓪᓗᑐᐃᓐᓇᕐᒥ, ᓯᕙᑖᕐᕕᖕᒥ ᐊᒻᒪ ᖃᖓᑐᐃᓐᓇᖅ ᓂᒡᓚᓱᖕᓂᖓ ᑲᑕᒃᑎᓪᓗᒍ -40 C−ᒧᑦ ᐊᒻᒪ ᐊᑦᑎᖕᓂᖅᓴᒧᑦ.
“ᐊᐅᓚᑦᑎᐊᖅᑐᒻᒪᕆᐅᕗᖅ ... ᐊᒥᓱᓂ ᐱᐅᔪᓂ ᑐᓴᖅᐸᒃᐳᒍᑦ ᓄᓇᓕᖕᒥᐅᑕᓂ,” ᐹᓪ ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᐸᕐᓇᖕᓂᖏᓐᓂ ᐃᓚᒋᐊᖅᓯᓂᕐᒥ ᒪᕐᕈᖓᓂ ᑖᒃᓯᐅᓂᐊᖅᑐᒥ, ᑎᑭᓛᖅᑐᒥ ᐅᒥᐊᕐᔪᐊᒃᑯᑦ ᖃᖓᒃᑲᓐᓂᐅᔪᒥ ᑕᒪᑐᒪᓂ ᐊᕐᕌᒎᔪᒥ. “ᐱᔭᕆᐊᖃᕐᓂᖃᓪᓚᕆᓚᐅᖅᐳᖅ ... ᐱᓯᒪᔪᒪᔭᕋ ᐅᓇ ᑖᒃᓯᒥ ᓇᖕᒥᓂᖃᕐᓂᐅᔪᒥ ᐊᑯᓂᐊᓗᒃ.”
ᐊᖏᒡᓕᒋᐊᖅᓯᓯᒫᓂᒃᑐᑦ ᓇᖕᒥᓂᕆᔭᖓᓐᓂ ᐱᒋᐊᖅᑎᑦᑎᓪᓗᑎᒃ ᓄᓇᓯᐅᑎᓂ ᐊᑐᖅᑐᐊᕐᓂᕐᒥ ᑕᖅᑭᐅᑉ ᐱᒋᐊᕐᓂᐸᓗᐊᓂ. ᑖᓐᓇᑦᑕᐅᖅ, ᐹᓪ ᐅᖃᓚᐅᖅᐳᖅ ᓂᕆᐅᒃᐳᖅ ᐊᖏᒡᓕᒋᐊᕐᓂᐅᔪᒥ ᐱᔪᒪᓂᐅᔪᒥ ᓄᕙᒡᔪᐊᕐᓇᖅ ᐋᓐᓂᐊᓕᕇᒃᑯᑎᓂ ᐃᖏᕐᕋᕙᓪᓕᐊᓂᖓᓂ ᐊᒻᒪᓗ ᐱᓕᕆᓂᕐᓄᑦ ᐳᓚᕋᖅᑐᑦ ᐊᒻᒪ ᐳᓚᕋᖅᑎᐅᔪᓂ ᐅᑎᒃᑲᓐᓂᕈᑎᒃ ᓄᓇᓕᐅᔪᒧᑦ.
ᑐᓂᒃ ᑖᕐᓯ, ᐃᖏᕐᕋᓲᖑᔪᒥ 8 ᐅᓪᓛᒃᑯᑦ 11:30 ᐅᓐᓄᒐᓱᐊᕐᓂᖓᓄᑦ, ᒫᓐᓇᐅᔪᒥ ᐃᖅᑲᓇᐃᔭᖅᑎᑦᑎᕗᖅ ᒪᕐᕉᖕᓂ ᓄᓇᖃᖅᑎᐅᔪᓂ. ᑲᒻᐸᓂᐅᑉ ᐊᑎᖓ ᑐᙵᕕᖃᖅᐳᖅ ᐹᓪ ᐃᓄᒃᑎᑐᒻᒥ ᐊᑦᑎᖅᑕᐅᓯᒪᓂᖓᓂ.
ᐱᓕᕆᐊᒃᓴᐅᔪᒥ ᐱᒋᐊᖅᑎᑕᐅᓂᖓ “ᓇᓗᓇᐸᓗᓚᐅᖅᐳᖅ,” ᐹᓪ ᐅᖃᓚᐅᖅᐳᖅ, ᐅᖃᐅᓯᖃᖅᖢᓂ ᐸᐃᑉᐹᓕᕆᓂᖓᓂ ᐱᓂᕐᒧᑦ ᓇᖕᒥᓂᖃᕐᓂᕐᒧᑦ ᓚᐃᓴᓐᓯᒥ ᐊᒻᒪ ᓇᓪᓕᐅᒃᑯᒫᑖᕐᓂᕐᒥ, ᐃᓚᖃᖅᑐᒥ ᐊᓯᖏᓐᓂ ᐱᔭᕆᐊᓕᖕᓂ ᑎᑎᕋᕆᐊᖃᕐᓂᐅᔪᒥ.
ᒪᐃᔭ ᒪᐃᒐᓐ ᐳᐊᑕ ᐅᖃᓚᐅᖅᐳᖅ ᓄᓇᓖᑦ ᖁᕕᐊᓱᒃᐳᑦ ᐊᑐᐃᓐᓇᖃᒃᑲᓐᓂᓕᕐᓂᖏᓐᓂ ᑖᒃᓯᒥ ᐊᕐᕌᒍᓂ ᑎᓴᒪᓂ ᐱᖃᓚᐅᙱᑎᓪᓗᒋᑦ.
“ᐃᓄᐃᑦ ᐃᒃᐱᒍᓱᒃᐳᑦ ᓄᑖᒥ ᐃᓱᒪᖅᓱᕐᓂᐅᔪᒥ ᐊᑦᑕᓇᙱᑦᑐᒥ ᓄᓇᓕᖕᓄᐊᕈᓐᓇᕐᒪᑕ ᕿᓚᒻᒥᐅᔪᒥ. ᐃᓄᐃᑦ ᐃᓱᒫᓗᒍᓐᓃᖅᐳᑦ ᖃᖓᑕᓲᒃᑰᕐᓂᐊᕐᓂᖓᓂ ᑭᖑᕙᕐᓂᐊᕐᓂᖏᓐᓂ ᐊᒻᒪᓗ ᕿᓂᕋᓱᐊᕐᓂᕐᒧᑦ ᑐᔫᓯᐊᒥᓂᑦ ᐊᖏᕐᕋᐅᑎᓂᖏᓐᓂ ᒥᑦᑕᕐᕕᖕᒥ ᑎᑎᖅᑲᒃᑯᕕᖕᒥᓘᓐᓃᑦ,” ᐳᐊᑕ ᐅᖃᓚᐅᖅᐳᖅ. “ᓄᓇᓕᕗᑦ ᐱᕈᖅᐸᓪᓕᐊᕗᖅ ᐊᒻᒪᓗ ᐅᖓᓯᒌᒃᑑᑕᐅᓪᓗᑎᒃ. ᑖᒃᓯ ᐃᖏᕐᕋᓂᕐᒥ ᐊᔪᕐᓇᙱᑎᑦᑎᕐᔪᐊᖅᐳᖅ ᑕᐃᒃᑯᓄᖓ ᐊᒃᓱᕈᖅᐸᒃᑐᓂ ᐱᓱᒋᐊᒃᓴᖅ ᐊᒻᒪᓗ ᑕᐃᒃᑯᓄᖓ ᐊᓯᖓᓐᓂ ᐃᖏᕐᕋᔾᔪᑎᖃᙱᑦᑐᓄᑦ.”
ᐱᑕᖃᙱᒃᑲᓗᐊᖅᑎᓪᓗᒍ ᐱᖃᕐᓂᐅᔪᒥ ᓄᕙᒡᔪᐊᕐᓇᕐᒥ ᐅᖅᓱᖅᑑᒥ, ᑖᒃᓯᒧᑦ ᑲᒻᐸᓂᐅᔪᖅ ᓴᓗᒪᑎᑦᑎᓂᕐᒥ ᐃᓱᒪᒋᑦᑎᐊᖅᐸᖓ ᐊᒻᒪᓗ ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᖑᔪᑦ ᑐᓂᓯᐊᕐᔪᓚᐅᖅᐳᑦ ᑮᓇᐅᔭᓂ ᐃᑲᔪᕐᓂᕐᒧᑦ ᓂᐅᕕᕐᓂᕐᒥ ᓴᓗᒻᒪᖅᓴᐅᑎᓂ ᓱᓇᒃᑯᑖᓂ. ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᑐᓂᓯᓚᐅᕆᕗᑦ ᓄᕙᒡᔪᐊᕐᓇᕐᒧᑦ ᐃᑲᔪᖅᓱᐃᓂᕐᒥ ᑮᓇᐅᔭᓄᑦ, ᐹᓪ ᐅᖃᓚᐅᕆᕗᖅ.
ᐊᑕᐅᓯᖅ ᐊᒃᓱᕈᕈᑕᐅᔪᒥ ᐃᓚᖏᓐᓄᑦ ᐱᔪᒪᑐᐃᓐᓇᕆᐊᓕᖕᓄᑦ ᑖᒃᓯᒥ ᓇᖕᒥᓂᖃᖅᑎᐅᔪᒪᔪᓄᑦ ᐃᓄᑭᑦᑐᓂ ᓄᓇᓕᐅᔪᓂ ᐱᑕᖃᙱᓐᓂᖓᓂ ᓄᓇᓯᐅᑎᓄᑦ ᐊᐅᓚᐅᓯᕆᔨᒥ ᓄᓇᓯᐅᒻᒥ ᐊᖅᑯᑎᒦᖏᓐᓇᕈᓐᓇᕐᓂᖓᓂ. ᐅᖅᓱᖅᑑᒥ, CAP Enterprises ᐱᓕᕆᔪᓐᓇᖅᐳᑦ, ᐊᒻᒪᓗ ᑐᓂᒃ ᐊᐃᒃᓯᕈᑎ ᓄᓇᓯᐅᑎ ᑕᐃᑲᓂ ᐋᖅᑭᒃᑕᐅᓚᐅᖅᐳᖅ.
“ᖁᔭᓕᕐᔪᐊᖅᐸᕗᑦ ᑖᒃᓯᑦᑎᓐᓂ ᐊᖅᑯᒻᒦᖏᓐᓇᕈᓐᓇᕐᓂᖓᓂ,” ᐅᖃᓚᐅᖅᐳᖅ ᐹᓪ.
ᐱᒻᒪᕆᐅᕗᖅ ᐃᒻᒥᓄᑦ ᐊᒻᒪ ᐋᐱᒧᑦ ᓇᓂᓯᓂᕐᒥ ᐅᑎᖅᑎᕆᓂᕐᒧᑦ ᓄᓇᓕᐅᔪᒥ, ᐅᖃᓚᐅᖅᐳᖅ. ᑐᓂᓯᓚᐅᖅᐳᑦ ᕿᑐᑦᑐᒐᐅᔭᕐᒥ ᓂᕿᓂᑦ ᐃᓄᑐᖃᕐᓄᑦ ᖁᕕᐊᓱᒡᕕᐅᑎᓪᓗᒍ. ᓂᐅᕕᓚᐅᕆᕗᑦ ᑕᖕᒫᖅᑐᖅᓯᐅᑎᒥ ᕿᐱᖕᒥ ᓄᓇᓕᖕᒥᐅᑕᒧᑦ ᐊᖑᒻᒧᑦ ᐸᖅᓴᐃᔨᐅᖃᑕᐅᔅᓲᔭᖅᑐᒥ ᐊᑭᓕᖅᓱᖅᑕᐅᓇᓂ ᐃᑲᔪᖅᐸᒃᑐᒥ. ᑐᓂᓯᓚᐅᕆᕗᑦ ᐃᑭᐊᕐᒥᓕᖕᓂ ᐊᑭᓕᖅᓱᖅᑕᐅᓇᑎᒃ ᐃᑲᔪᖅᐸᒃᑐᓄᑦ ᓄᓇᓕᖕᓂ ᓈᓚᐅᑎᒃᑯᑦ ᐅᖃᓪᓚᒡᕕᐅᔪᒥ.
ᐹᓪ ᐸᕐᓇᒃᑭᕗᖅ ᑲᒪᒋᔭᖃᕐᓂᕐᒥ ᐅᖅᓱᖅᑑᒥ ᐃᓐᓇᕐᓄᑦ ᐊᖑᑎᓂ ᕼᐋᑭᒥ ᐱᙳᐊᖅᑎᐅᔪᓂ. ᓂᐅᕕᕈᔾᔨᔪᒪᕗᖅ ᐱᙳᐊᖅᑎᓂ ᑭᐊᑎᓂᑦ – ᐊᒻᒪᓗ ᐊᔾᔨᒋᐸᓗᖕᓂᐊᖅᐸᖏᑦ ᑕᐃᒃᑯᓄᖓ ᑐᕌᓐᑐ ᒪᐃᐳᓪ ᓖᕝᓂ, ᐱᐅᒋᓂᖅᐹᖏᓐᓂ ᑲᓇᑕᒥ ᕼᐋᑭᒧᑦ ᐱᙳᐊᖅᑎᐅᔪᓄᑦ.
“ᓄᓇᓕᖕᓂ−ᐃᓚᐅᖃᑕᐅᕐᔪᐊᖅᐳᖓ ᐊᒻᒪᓗ ᐊᓕᐊᓇᐃᒋᕙᕋ ᐃᓚᐅᖃᑕᐅᓂᕐᒥ ᓄᓇᓕᖕᓂ,” ᐅᖃᓚᐅᖅᐳᖅ.
