ᐱᓕᐴᓯ ᐊᕋᒍᑕᐃᓐᓇᖅ ᐋᖅᑭᒃᓯᓚᐅᖅᐳᖅ ᐃᓗᐊᕐᓂᐅᔪᒥ ᐃᒻᒥᓄᑦ ᓴᓂᑭᓗᐊᕐᒥ ᓂᐅᕕᕐᕕᕋᓛᖓᓂ, The Freezer, ᖄᖏᖅᓯᒪᓕᖅᑐᓂ ᐊᕐᕌᒍᓄᑦ ᐱᖓᓱᓄᑦ ᑭᓯᐊᓂ ᐊᕋᒍᑕᐃᓐᓇᖅ ᐅᖃᖅᐳᖅ ᒫᓐᓇ ᐅᓗᕆᐊᓇᖅᑐᒦᓕᖅᐳᖅ.
The Freezer ᓂᐅᕕᐊᒃᓴᖃᓚᐅᖅᐳᑦ ᑕᒪᕐᒥᒐᓚᒃ ᓂᐅᕕᐊᒃᓴᖏᓐᓂ – ᐃᒥᒐᐃᑦ ᐊᒻᒪ ᐅᖁᒻᒥᐊᒐᐃᑦ ᐱᐅᒋᔭᐅᓂᖅᐹᖑᓪᓗᑎᒃ – ᕿᑎᐊᓂ 7 ᐅᓐᓄᒃᑯᑦ ᐊᒻᒪ 11 ᐅᓐᓄᒃᑯᑦ, ᓂᐅᕕᖅᑎᒃᑯᑦ ᐊᒻᒪ ᒥᑎᖅ ᑯᐊᐸᒃᑯᑦ ᐅᓪᓗᒧᑦ ᒪᑐᓚᐅᖅᑎᓪᓗᒋᑦ.
ᑕᒪᓐᓴ ᐊᓯᔾᔨᓚᐅᖅᐳᖅ ᔭᓄᐊᕆᐅᑉ ᓄᙳᐊᓂ ᓂᐅᕕᖅᑎᒃᑯᑦ ᐅᖓᕙᕆᐊᖅᓯᒐᒥᒃ ᐃᑲᕐᕋᖏᓐᓂ 10 ᐅᓐᓄᒐᓱᐊᕐᓂᖓᓄᑦ ᓇᒡᒐᔾᔭᐅᒥ ᐅᓪᓗᑐᐃᓐᓇᕐᒧᑦ. ᑯᐊᐸᒃᑯᑦ ᒪᓕᓚᐅᖅᐳᑦ ᕿᓚᒻᒥᐅᔪᒥ.
ᒫᓐᓇ The Freezer−ᑯᑦ ᓂᐅᕕᖅᑕᐅᓂᖏᓐᓂ ᑲᑕᒃᓯᒪᕗᑦ 80 ᐳᓴᓐᑎᐸᓗᖕᒥ.
ᐊᕋᒍᑕᐃᓐᓇᖅ, ᓇᖕᒥᓂᖃᖅᑎᐅᔪᖅ ᓇᐅᓚᒃ ᓇᖕᒥᓂᕆᔭᐅᔪᒥ, ᓇᒃᓯᐅᔾᔨᓚᐅᖅᐳᖅ ᑎᑎᖅᑲᒥᒃ North West Company−ᑯᓐᓄᑦ ᐋᔩᖃᑎᖃᕐᓂᕐᒧᑦ ᖃᓄᖅ ᐊᓯᔾᔨᕐᓂᐅᔪᖅ ᐃᑲᕐᕋᓂ ᐊᒃᑐᐃᓂᖓᓂ ᓇᖕᒥᓂᕆᔭᖓᓐᓂ.
“ᐱᒋᐊᕐᓂᖓᓂ ᐃᑲᕐᕋᕗᑦ ᐋᖅᑭᒃᓯᒪᓚᐅᖅᐳᑦ ᐸᒡᕕᓵᕆᔾᔮᙱᓐᓇᑦᑕ ᐅᕝᕙᓘᓐᓃᑦ ᐊᑭᑦᑐᕋᐅᑎᙱᓪᓗᑕ ᓂᐅᕕᖅᑎᒃᑯᓐᓂ,” ᐊᕋᒍᑕᐃᓐᓇᖅ ᑎᑎᕋᓚᐅᖅᐳᖅ ᑎᑎᖅᑲᒥ ᐅᖃᐅᓯᐅᖃᑕᐅᓪᓗᓂ ᓄᓇᕗᒻᒥ ᑐᓴᒐᒃᓴᓕᕆᔨᒃᑯᓐᓄᑦ.
“ᒥᑭᓐᓂᖅᓴᒻᒪᕆᐅᓪᓗᑕ ᓇᖕᒥᓂᖃᖅᑎᐅᕗᒍᑦ ᐊᒻᒪ ᒥᑭᓐᓂᖅᓴᒻᒪᕆᖕᒥ ᐊᐅᓚᑦᑎᔾᔪᑕᐅᔪᓄᓐᓇᖅᑐᓄᑦ, ᐱᓗᐊᖅᑐᒥ ᒪᑐᐃᖓᑐᐃᓐᓇᓲᖑᓂᑦᑎᓐᓂ ᐃᑲᕐᕋᓄᑦ ᑎᓴᒪᓄᑦ ᖃᐅᑕᒫᒥ, ᑭᓯᐊᓂ ᐃᖏᕐᕋᐃᓐᓇᕈᓐᓇᙱᓚᒍᑦ ᓂᐅᕕᖅᑎᒃᑯᑦ ᐱᓇᓱᐊᕐᓂᐊᕈᑎᒃ ᑕᐃᒃᑯᓇᙵᑦ ᐃᑲᕐᕋᐅᔪᓂ ᐅᕙᑦᑎᓐᓂ ... ᐊᐱᕆᔭᕆᐊᖃᖅᐳᖓ, ᐊᖅᓵᖅᓯᓂᖃᕆᐊᖃᖅᐱᓯ ᐆᒥᖓ ᐱᕕᒃᓴᖃᕐᕕᒋᔭᑦᑎᓐᓂ ᒥᑭᑦᑐᒧᑦ ᐃᓄᖕᓄᑦ ᓇᖕᒥᓂᕆᔭᐅᔪᒥ ᐊᒻᒪᓗ ᑕᐃᒪᐃᑦᑕᕆᐊᖃᕈᔅᓯ, ᑭᓱᒥᒃ ᐅᖃᐅᓯᒃᓴᓕᐅᖅᐱᓯ ᑕᐃᒪᐃᓐᓂᕐᒧᑦ ᐊᒃᓱᕈᕐᓂᐅᔪᒥ? ᐊᖏᔪᒻᒪᕆᐊᓘᓪᓗᓯ ᐊᒻᒪ ᐱᓕᕆᑦᑎᐊᕈᓐᓇᖅᑐᒻᒪᕆᐊᓘᓪᓗᓯ ᓇᖕᒥᓂᖃᖅᑎᐅᓪᓗᓯ ᖃᑭᓂᖃᖅᖢᓯ ᓂᐅᕕᐊᒃᓴᖃᖅᐸᒃᖢᓯ ᐃᓄᖕᓄᑦ ᐃᓄᖕᓂ ᓄᓇᓕᐅᔪᓂ, ᐃᒃᐱᒍᓱᑦᑎᐊᓪᓗᐊᙱᓚᓯ ᐊᒻᒪᓗ ᐃᑲᔪᖅᓱᐃᓗᓯ ᐱᕈᖅᐸᓪᓕᐊᓂᐅᔪᓂ ᐃᓄᖕᓂ ᑮᓇᐅᔾᔭᒃᓴᓂᐅᔪᓂ ᐊᒻᒪᓗ ᐃᖏᕐᕋᓂᕆᔭᖓᓂ ᐊᒻᒪ ᐱᓕᕆᑦᑎᐊᖅᐸᓪᓕᐊᓂᖏᓐᓂ ᐃᓄᖕᓄᑦ ᐱᔪᓐᓇᖅᑎᑦᑎᔪᓄᑦ ᐱᓕᕆᑦᑎᐊᕐᓂᔅᓯᓐᓂ?
“ᑲᒻᐸᓂᕗᑦ ᐆᒪᐃᓐᓇᕈᓐᓇᙱᓚᖅ ᐊᑯᓂᐅᔪᒥ ᓂᐅᕕᖅᑎᒃᑯᑦ ᓄᑖᖑᔪᓂ ᐃᑲᕐᕋᖏᓐᓂ. ᒥᒃᖠᒋᐊᖅᑎᑦᑎᔭᕆᐊᖃᖅᓯᒪᕗᒍᑦ ᐱᓇᓱᐊᕈᓯᑕᒫᒥ ᐃᑲᕐᕋᑦᑎᓐᓂ, ᐊᑭᓖᙱᓐᓂᖃᖅᐸᒃᖢᑕ ᐊᑭᓕᐅᑎᓂᑦ ᐊᑭᓕᒃᓴᑦᑎᓐᓄᑦ, ᐊᒻᒪᓗ ᒪᑐᐃᕆᐊᖃᖅᐸᓕᓵᖅᖢᑕ ᓈᑦᑎᖑᔭᒃᑯᑦ. ᐅᓇ ᑲᒻᐸᓂᐅᑐᐃᓐᓇᐅᙱᑦᑐᖅ, ᐃᓚᖕᒪ ᑮᓴᐅᔾᔭᒃᓴᓂᕆᕙᖓ ᐊᒻᒪᓗ ᒥᐊᓂᖅᓯᓂᕆᕙᖓ.”
ᐊᕋᒍᑕᐃᓐᓇᖅ ᐃᓚᒋᐊᖅᓯᓚᐅᖅᐳᖅ ᑕᒪᒃᑭᑦ ᓂᐅᕕᕐᕕᐅᑉ ᐅᓪᓘᑉ ᐃᓚᐃᓐᓇᖓᓂ ᓂᐅᕕᖅᑎᖏᑦ – ᑎᑭᐅᑎᔪᓄᑦ 8-ᓄᑦ – ᐃᓅᕗᑦ ᐊᒻᒪ ᐊᐅᓚᑕᐅᓂᖓ ᖄᖏᐅᑎᕗᖅ ᐱᔭᕆᐊᖃᕐᓂᐅᔪᓂ ᐅᕘᓇ ᓄᓇᕗᒻᒥ ᓇᖕᒥᓂᖃᖅᑐᓂᒃ ᐃᑲᔫᓯᓂ ᐊᑐᐊᒐᐅᔪᒥ, ᓄᓇᕗᒻᒥ ᒐᕙᒪᒃᑯᑦ ᐊᑐᓲᕆᔭᖓᓐᓂ ᒪᓕᒐᒃᓴᐅᓪᓗᓂ ᓂᐅᕕᕐᓂᕐᒧᑦ ᐱᖁᑎᓄᑦ ᐊᒻᒪ ᐱᔨᑦᑎᕋᕐᓂᕐᒧᑦ ᐃᓄᖕᓂ−ᓇᖕᒥᓂᕆᔭᐅᔪᓂ ᓇᖕᒥᓂᐅᔪᓄᑦ.
ᒥᑎᖅ ᑯᐊᐸᒃᑯᑦ, ᑭᓯᐊᓂ, ᓴᖅᑭᔮᖅᐳᖅ ᓄᓇᕗᒻᒥ ᑐᙵᕕᒃᑯᑦ ᐃᓄᖕᓄᑦ ᐱᓕᕆᓂᐅᔪᓄᑦ ᑎᑎᕋᖅᑕᐅᓯᒪᓂᖓᓂ ᑎᑎᕋᖅᓯᒪᔪᓂ ᑐᖅᑯᖅᑕᐅᓯᒪᔪᓂ, ᓇᐅᓚᒃ ᐱᓕᕆᔨᐅᔪᓂ ᐱᑕᖃᕐᓇᓂ.
“ᒥᑎᖅ ᑯᐊᐸᒃᑯᑦ ᒥᑭᑦᑑᓪᓗᓂ ᓄᓇᓕᖕᓂ−ᓇᖕᒥᓂᕆᔭᐅᓪᓗᓂ ᓇᖕᒥᓂᐅᕗᖅᑕᐅᖅ,” ᐅᖃᓚᐅᖅᐳᖅ ᑐᐊᐃᓐ ᐅᐃᓪᓯᓐ, ᐊᖓᔪᖅᑳᑉ ᑐᒡᓕᐊ ᐱᓕᕆᖃᑎᒋᔭᐅᔪᓂ ᐱᓕᕆᓂᐅᔪᒥ ᐅᑭᐅᖅᑕᖅᑐᒥ ᑯᐊᐸᒃᑯᓐᓄᑦ. “ᓴᖅᑭᑎᑕᐅᓚᐅᖅᓯᒪᕗᖅ ᐊᒥᓱᒻᒪᕆᖕᓂ ᐊᕐᕌᒎᓕᖅᑐᓂ ᓴᓂᑭᓗᐊᕐᒥᐅᑕᓄᑦ ᑭᐅᓂᕐᒧᑦ ᐱᔭᕆᐊᖃᖅᑕᒥᓂᑦ. ᓄᓇᓕᖕᓂ−ᓇᖕᒥᓂᕆᔭᐅᔪᓂ ᑯᐊᐸᒃᑯᑦ ᐃᓚᒋᔭᖏᑦ ᐊᒻᒪᓗ ᐊᓯᖏᓐᓂ ᓄᓇᓕᖕᓂ ᐱᔭᕆᐊᖃᕈᑎᒃ ᓂᐅᕕᕐᕕᐅᔪᒥ ᐱᔨᑦᑎᕋᕐᓂᐅᔪᒥ ᑕᐃᑯᖓ 10 ᐅᓐᓄᒃᑯᑦ, ᑕᐃᒫᒃ ᐃᓱᒪᓕᐅᕆᓂᕆᕙᖓ.”
ᑎᐊᕆᓐ ᒪᐃᑦᒥᓐᑦ, ᑐᑭᒧᐊᒃᑎᑦᑎᔨ ᓂᐅᕕᐊᒃᓴᓄᑦ ᐊᒻᒪ ᐊᐅᓚᑕᐅᓂᐅᔪᓄᑦ North West Company−ᑯᓐᓂ, ᐅᖃᓚᐅᖅᐳᖅ ᓴᓂᑭᓗᐊᕐᓂ ᓂᐅᕕᖅᑎᒃᑯᑦ ᐅᖓᕙᕆᐊᖅᓯᓚᐅᖅᐳᑦ ᐃᑲᕐᕋᖏᓐᓂ “ᑭᐅᑦᑎᐊᒃᑲᓐᓂᕐᓂᐅᔪᒥ ᐱᔭᕆᐊᖃᕐᓂᐅᔪᓄᑦ ᓄᓇᓕᖕᓂ ᐱᔨᑦᑎᕋᖅᑕᑦᑎᓐᓄᑦ. ᐱᓗᐊᖅᑐᒥ, ᓇᓗᓇᐃᖅᓯᓂᕐᒥ ᒐᕙᒪᒃᑯᓐᓄᑦ ᓴᓇᔨᐅᔪᑦ, ᐃᓕᓴᐃᔩᑦ ᐊᒻᒪ ᐊᓯᖏᑦ ᐊᔪᕐᓇᕆᔭᖓᓐᓂ ᓂᐅᕕᕆᐊᕐᓂᕐᒧᑦ ᐅᓪᓗᒃᑯᑦ ᐊᑐᐃᓐᓇᖃᕈᓐᓇᕐᓂᖏᓐᓂ ᑕᒪᒃᑭᐅᒪᔪᒥ ᐊᔾᔨᒌᙱᕈᓘᔭᖅᑐᓂ ᓂᕿᓂᑦ ᐊᒻᒪ ᐃᒡᓗᒥᐅᑕᓄᑦ ᐱᖁᑎᓄᑦ. ᒪᑐᐃᖓᔪᓐᓇᙱᓐᓇᑦᑕ ᓈᑦᑎᖑᔭᒥ ᓴᓂᑭᓗᐊᕐᒥ, ᐅᒃᐱᕈᓱᒃᐳᒍᑦ ᐅᓐᓄᒃᑯᑦ ᐃᑲᕐᕋᐅᔪᑦ ᐱᒻᒪᕆᐅᕐᔪᐊᕐᓂᖓᓂ ᓂᕈᐊᒐᒃᓴᐅᓂᖓᓂ ᓂᐅᕕᕆᐊᖅᐸᒃᑐᖁᑎᑦᑎᓐᓄᑦ.”
ᒪᐃᑦᒥᓐᑦ ᐃᓚᒋᐊᖅᓯᓚᐅᖅᐳᖅ North West Company “ᐃᓱᒪᒋᔭᖃᓲᖑᓂᖏᓐᓂ ᓄᓇᓕᖕᓂ−ᓇᖕᒥᓂᕆᔭᐅᔪᓄᑦ ᒥᑭᑦᑐᓂ ᓇᖕᒥᓂᖃᖅᑎᐅᔪᓂ ᐊᒻᒪᓗ ᓯᕗᓪᓕᖅᐸᐅᓪᓗᑎᒃ ᓂᕈᐊᒐᕆᕙᕗᑦ ᐱᓕᕆᐊᓄᑦ ᐃᓄᖕᓄᑦ, ᐅᓯᔭᐅᔪᓄᑦ ᑲᒪᒋᔭᖃᕐᓂᕐᒥ ᐱᔨᑦᑎᕋᕐᓂᕐᒥ, ᐋᖅᑭᐅᒪᑎᑦᑎᓂᕐᒧᑦ ᐱᔨᑦᑎᕋᕐᓂᕐᒥ, ᐊᓯᖏᓪᓗ
ᓴᓂᑭᓗᐊᑉ ᓴᓂᐊᓂ, 15−ᑲᓐᓂᕐᓂ ᐊᓯᖏᓐᓂ North West Company−ᑯᓐᓄᑦ ᓂᐅᕕᕐᕕᓂ ᓄᓇᕗᒻᒥ ᐋᖅᑭᐅᒪᑎᑦᑎᕗᑦ ᐅᓐᓄᒃᑯᑦ ᐃᑲᕐᕋᓂ: ᐊᕐᕕᐊᑦ, ᖃᒪᓂᑦᑐᐊᖅ, ᐅᖅᓱᖅᑑᖅ, ᖁᕐᓗᖅᑐᖅ, ᐃᒃᐱᐊᕐᔪᒃ, ᑭᙵᐃᑦ, ᐃᒡᓗᓕᒑᕐᔪᒃ, ᓴᓪᓖᑦ, ᓴᓂᕋᔭᒃ, ᐃᒡᓗᓕᒃ, ᓇᐅᔮᑦ, ᐸᖕᓂᖅᑑᖅ, ᒥᑦᑎᒪᑕᓕᒃ, ᐃᖃᓗᐃᑦ ᐊᒻᒪ ᑲᖏᖅᖠᓂᖅ.