Skip to content

ᐊᑭᑭᓐᓂᖅᐹᖅ ᓄᓇᕗᒥ ᐃᓅᔪᑕᐅᔪᓐᓇᖏᒻᒪᑦ

ᑲᓇᑕᒥᐅᑦ ᐅᔾᔨᖅᓱᑦᑎᐊᓕᕐᒪᑕ ᐊᑭᑭᓐᓂᖅᐹᒥᒃ ᐊᑭᓕᐅᓯᐊᖑᔪᓐᓇᖅᑐᓂᒃ ᓴᓇᔨᓂᒃ ᐊᓐᑎᐅᕆᐅᒥ ᐃᐊᓪᐴᑕᒥᓗ, ᖄᖏᖅᓯᑲᐃᓐᓇᕐᒪᑕ ᓄᓇᕗᒥ ᐊᓯᖏᓐᓂᓗ ᑲᓇᑕᐅᑉ ᐊᕕᒃᑐᖅᓯᒪᕕᖏᓐᓂ ᓄᓇᓂ ᐊᑭᓕᐅᓯᐊᓄᑦ ᒪᓕᒐᐃᑦ ᐊᑭᑭᓐᓂᖅᐹᒥᒃ ᓴᓇᔨᓄᑦ ᐊᑭᓖᔪᑕᐅᔪᓐᓇᖅᑐᑦ.

ᑕᒪᑐᒪᓂ ᐅᑭᐅᖑᕋᑖᖅᑐᓂ ᖁᓕᓂ, ᓄᓇᕗᒥᐅᑦ ᐊᑭᓕᐅᓯᐊᖏᑦ ᖁᑦᑎᖕᓂᖅᐹᖑᓯᒪᖕᒪᑕ ᒫᓐᓇ ᐊᓐᑎᐅᕆᐅᒥ $14 ᐃᑲᕐᕋᑕᒫᑦ ᐊᒻᒪᓗ ᐃᐊᓪᐴᑕᒥ $13.60 ᐃᑲᕐᕋᑕᒫᑦ. ᓄᓇᓯᐊᒥᐅᑦ ᐱᖓᔪᒋᔭᐅᓪᓗᑎᒃ ᒪᓕᒃᑐᑦ $13.46, ᓄᓇᕗᒥᐅᓂᒃ ᖄᖏᖅᓯᓪᓗᑎᒃ $13 ᐃᑲᕐᕋᑕᒫᖅᑎᓪᓗᒋᑦ.

ᐊᓐᑎᐅᕆᐅᒥᐅᑦ ᐃᐊᓪᐴᑕᒥᐅᓪᓗ, ᑖᒃᑯᐊ ᓄᓇᓕᖏᑦ ᑲᓇᑕᒥ ᑮᓇᐅᔭᒃᓴᕐᕕᐅᓂᖅᐹᖑᖕᒪᑕ, ᓱᓕ ᖁᕝᕙᕆᐊᖅᑎᑎᔪᒪᖕᒪᑕ $15-ᒧᑦ. ᐃᐊᓪᐴᑕᒥᐅᑦ ᓯᕗᓪᓕᐅᓪᓗᑎᒃ ᐅᒃᑑᐸᒥ, ᑭᖑᓂᖓᓂ ᐊᓐᑎᐅᕆᐅᒥᐅᑦ ᔮᓐᓄᐊᕆᒥ ᒪᓕᖕᓂᐊᖅᑐᑦ. ᑖᓐᓇ ᖁᕝᕙᖅᑎᑕᐅᖕᒪᑦ ᐊᑭᑭᓐᓂᖅᐹᖑᓂᐊᓕᖅᖢᓂ ᑲᓇᑕᒥ ᐊᑭᓕᐅᓯᐊᖑᕙᒃᑐᓄᑦ ᒪᓕᒐᓂ ᐃᖅᑲᓇᐃᔭᖅᑏᑦ ᐊᖑᒻᒪᑎᑎᑕᐅᓇᓱᐊᖅᖢᑎᒃ ᐃᓅᔪᑏᑦ ᐊᑭᖏᓐᓂᒃ ᐊᑭᑦᑐᕆᐊᖅᐸᓪᓕᐊᖏᓐᓇᕐᒪᑕ ᓱᓕ.

ᒥᑭᓐᓂᖅᐹᒥᒃ ᐊᑭᓕᐅᓯᐊᖑᔪᓐᓇᖅᑐᑦ ᐱᔨᑦᓯᕋᖅᑎᑐᐃᓐᓇᓄᑦ ᑲᓇᑕᒥ ᐊᐅᑲᓪᓚᒋᔭᐅᓕᕐᒪᑕ ᑕᐃᒪᐃᓕᕐᓂᐊᖅᐸᑕ ᐱᔨᑦᓯᕋᖅᑎᐅᓪᓗᑎᒃ ᐃᖅᑲᓇᐃᔭᖅᑎᖃᓲᓄᑦ ᐊᓐᑎᐅᕆᐅᒥ, ᑖᒃᑯᐊ ᓄᓇᖓᑦ ᐃᓄᒋᐊᖕᓂᖅᐹᖑᖕᒪᑦ ᑲᓇᑕᒥ, ᐊᒻᒪᓗ ᐃᐊᓪᐴᑕᒥᐅᑦ, ᐊᑭᓕᐅᓯᐊᕐᓂᖅᐹᖑᖃᑦᑕᕋᓗᐊᕐᒪᑕ ᑲᓇᑕᓕᒫᒥ (ᑕᑯᒍᒃ: ᓄᓇᓯᐊᒥ GDP-ᖓᓕ ᖁᑦᑎᖕᓂᖅᓴᐅᖕᒪᑦ).

ᐊᑭᕋᖅᑑᑎᓕᕐᒪᑕ ᑲᓇᑕᒥ ᐊᕕᒃᑐᖅᓯᒪᔪᑦ ᒐᕙᒪᑎᖏᑦ ᓇᖕᒥᓂᖅ ᐱᓇᓱᐊᒐᖃᖅᑐᓄᑦ ᓴᓇᐅᒐᕐᒥᓂᑦ ᐊᒃᓱᕈᖅᖢᑎᒃ ᐃᓅᔪᑎᖃᕋᓱᐊᖅᑐᓄᑦ. Tim Hortons-ᑯᑦ ᓂᕆᕝᕕᖏᑦ, ᐱᓗᐊᖑᐊᖅᑐᒥᒃ, ᐊᑭᑦᑐᕆᐊᕈᑕᐅᔪᓄᑦ ᐃᒃᐱᖕᓇᓗᐊᖅᑕᐃᓕᒪᑎᑦᑎᓇᓱᐊᕐᒪᑕ ᓄᓇᓕᖕᒥᐅᓄᑦ ᐃᖅᑲᓇᐃᔭᖅᑎᒥᓄᑦ ᐊᑭᓕᖃᑦᑕᖅᑕᖏᑕ ᐃᓚᖏᓐᓂᒃ ᐲᔭᐃᓕᖅᖢᑎᒃ ᓴᓇᕕᖕᒥᓂ ᑐᓂᐅᓯᐊᕆᕙᒃᑕᖏᓐᓂᒃ ᐊᒻᒪᓗ ᑕᖃᐃᖅᓯᖅᖢᑎᒃ ᓄᖅᑲᖓᓚᐅᑲᖃᑦᑕᕈᓯᖏᑦ ᐊᑭᓕᖅᓱᖅᑕᐅᔪᒪᔪᓐᓃᖅᖢᑎᒃ.

Tim Hortons-ᑯᑦ ᑳᐱᑐᕐᕕᖏᓐᓂ ᓂᕆᕝᕕᖁᑎᖃᖅᑐᑦ ᐊᔪᖅᓴᖏᓐᓂᖅᓴᐅᓲᖑᒐᓗᐊᕐᒪᑕ ᓄᓇᓕᖕᓂ ᐊᖓᔪᖅᑳᒃᑯᕕᐊᓂᑦ ᐊᑭᓕᐅᓯᐊᖏᑦ ᐋᕿᒃᐸᒌᖅᑕᐅᓯᒪᓂᖏᓐᓄᑦ, ᒫᓐᓇ ᐊᖑᒪᑎᔪᓐᓇᐃᓪᓕᓂᕋᖅᑐᑦ ᐊᒻᒪᓗ ᓂᐅᕕᐊᒃᓴᒥᓂᒃ ᐊᑭᑦᑐᕆᐊᖅᓯᓗᑎᒃ ᑭᓯᐊᓂ ᐱᓂᐊᕐᓂᕋᓕᖅᑐᑦ ᐊᒻᒪᓗ ᐋᕿᒃᑕᐅᓯᒪᔪᓂᒃ ᒪᓕᔮᔪᓐᓂᕐᓂᕋᖅᑐᑦ ᐱᓕᕐᒪᑕ.

ᓱᕐᓗ ᒥᖕᓂᑐᐃᓐᓇᒧᑦ ᐱᔾᔪᑎᖃᖅᖢᑎᒃ ᐊᑭᑦᑐᕆᐊᖁᔨᖏᒻᒪᑕ ᐃᖅᑲᓇᐃᔭᖅᑎᒥᓄᑦ ᐊᑭᓕᐅᓯᐊᓂᒃ, ᐅᕝᕙᓘᓐᓃᑦ ᑳᐱᓂᒃ ᓂᐅᕕᐊᒃᓴᖏᓐᓂᒃ ᐊᑭᑦᑐᕆᐊᖅᓯᔪᒪᖏᓱᑎᒃ ᐊᓯᖏᓐᓂᒃᓗ ᑕᒧᓗᖕᓂᒃ ᓂᐅᕕᐊᒃᓴᕆᖃᑦᑕᖅᑕᖏᓐᓂᒃ ᒥᑭᔪᒥᒃ ᐊᑭᑦᑐᕆᐊᖅᓯᓗᑎᒃ ᑳᐱᑐᕐᕕᓂ ᐃᖅᑲᓇᐃᔭᖅᑎᒥᓄᑦ ᐊᑭᓕᐅᓯᐊᒃᓴᓂᒃ ᖁᕝᕙᖅᑎᑦᑎᔪᓐᓇᕋᓗᐊᕐᒪᑕ. ᑖᒃᑯᐊ ᓄᓇᓕᖕᓂ ᑳᐱᑐᕐᕕᖃᖅᑐᑦ ᐊᑭᑦᑐᕆᐊᖅᑎᑦᑎᓯᒪᓕᕐᒪᑕ ᓂᐅᕕᐊᒃᓴᒥᓂᒃ ᓄᓇᓕᖕᒥᐅᓄᑦ ᐃᑲᔪᖅᓴᖅᑕᐅᔪᓐᓇᕋᒥᒃ ᐊᑐᖅᑕᐅᖃᑦᑕᕐᓗᑎᒃ ᓱᓕ.

ᓄᓇᕗᒥᓕ, ᓇᖕᒥᓂᖅ ᐱᓇᓱᐊᒐᖃᖅᑐᑦ ᐊᑭᓕᐅᓯᐊᖑᔪᓐᓇᖅᑐᑦ ᒥᑭᓐᓂᖅᐹᒥ ᐅᖓᑖᓄᑦ ᐊᑭᓖᓲᖑᕙᒌᕐᒪᑕ ᐃᖅᑲᓇᐃᔭᖅᑎᖃᕈᒪᒧᑦ.

ᓄᓇᕗᒥᐅᑦ ᑕᐃᒫᑎᒋ ᐊᑭᓖᔪᓐᓇᖅᐸᑕ ᐃᓄᖁᑎᒥᓄᑦ, ᐊᒥᓱᑦ ᓇᖕᒥᓂᖃᖅᑐᑦ ᐃᖅᑲᓇᐃᔭᖅᑎᒥᓂᒃ ᑲᒪᑦᑎᐊᖅᑐᒃᓴᐅᕗᑦ ᒐᕙᒪᑎᒃᑯᓐᓂ ᕼᐊᒪᓚᓂᓗ ᐃᓕᓴᐃᔪᓐᓇᖅᑐᒃᓴᐅᒋᕗᑦ ᐃᖅᑲᓇᐃᔭᖅᑎᑖᖃᑦᑕᕐᓗᑎᒃᓗ ᐊᒃᓱᕈᕈᓐᓇᖅᑐᓂᒃ ᓴᓇᔨᓂᒃ ᐸᐸᑦᑎᓇᓱᐊᕐᓗᑎᒃ. ᐃᓕᓴᖅᓯᒪᓕᕌᖓᒥᒃ, ᐃᖅᑲᓇᐃᔭᖅᑏᑦ ᐃᓅᔪᑎᖃᑦᑎᐊᓕᕈᓐᓇᖃᑦᑕᕐᒪᑕ ᓴᓇᕕᖕᒥᓂᑦ ᐊᑭᓕᖅᓱᖅᑕᐅᑦᑎᐊᖅᖢᑎᒃ ᐊᒻᒪᓗ ᐃᖅᑲᓇᐃᔮᒥᓂ ᖁᕝᕙᖅᐸᓪᓕᐊᔪᓐᓇᖅᖢᑎᒃ.

ᑲᓇᑕᒥ ᒐᕙᒪᑎᒃᑯᓐᓂ ᐃᖅᑲᓇᐃᔭᖅᑏᑦ (PSAC) ᑲᑐᔾᔨᖃᖅᒋᖓᓂᒥᐅᑦ ᐅᖃᖅᓯᒪᔪᑦ ᐊᑭᑭᓐᓂᖅᐹᒥᒃ ᐊᑭᓕᐅᓯᐊᖃᑦᑕᖅᑐᑦ ᐊᑯᓂᐅᓂᖅᓴᖅ ᐃᖅᑲᓇᐃᔭᖃᒃᑕᕐᒪᑕ 40 ᐃᑲᕐᕋᑦ ᐅᖓᑖᓄᑦ ᐱᓇᓱᐊᕈᓯᓕᒫᒥ. ᐊᖑᒻᒪᑎᓇᓱᐊᖅᖢᑎᒃ ᐃᓅᔪᑎᒥ ᐊᑭᖏᓐᓄᑦ ᐊᑭᓕᐅᓯᐊᒥᓄᑦ ᓄᓇᓕᖕᓂ - ᓄᓇᖃᖅᑳᖅᑐᐃᑦ ᑲᓇᑕᒥᐅᖑᓕᕋᑖᖅᑐᓪᓗ, ᐱᓗᐊᖑᐊᖅᑐᒥᒃ ᑕᒪᒃᑯᓄᖓ ᐊᑐᖅᑕᐅᖔᖃᑦᑕᕐᒪᑕ.

ᑕᒪᒃᑯᓄᖓ ᐊᒃᓱᕈᖅᑐᓄᑦ ᒥᑭᓐᓂᖅᐹᖅ ᐊᑭᓕᐅᓯᐊᒃᓴᖅ ᐃᓅᔪᑎᒋᓇᓱᐊᖅᖢᒍ ᓈᒻᒪᖏᒻᒪᑦ, ᐃᒡᓗᐃᑦ ᐊᑐᖅᑐᐊᕈᑎᖏᑦ ᐊᑭᑐᔪᐊᓘᑎᓪᓗᒋᑦ. ᐃᖅᑲᓇᐃᔮᓂ ᐊᑭᓕᐅᓯᐊᒃᓴᑦ ᐊᖑᒻᒪᑎᓇᓱᐊᕆᐊᖃᕐᒪᑦ ᐃᓅᔪᑏᑦ ᐊᑭᖏᓐᓂᒃ ᐃᖅᑲᓇᐃᔮᒃᑯᒥᒋᔭᐅᓂᐊᖅᐸᑦ.

ᑕᐃᒪᐃᓐᓂᖓᓄᑦ, ᓄᓇᕗᒥ $13 ᐃᑲᕐᕋᑕᒫᑦ ᐊᑭᑭᓐᓂᖅᐹᒥ ᐊᑭᓕᐅᓯᐊᖑᔪᓐᓇᖅᑐᖅ ᒪᓕᒐᑐᐃᓐᓇᐅᖕᒪᑦ ᐊᑐᖅᑕᐅᖃᑦᑕᖏᒻᒪᑦ ᒫᓐᓇ ᑕᑯᒐᔪᐃᓐᓇᕐᒪᑦ ᐃᖅᑲᓇᐃᔭᖅᑎᖃᖅᑐᓂᒃ ᓱᓕᔪᒥᒃ ᑕᐃᒫᑎᒋ ᒥᑭᑎᒋᔪᒥᒃ ᐊᑭᓕᖅᓱᐃᔪᓂᒃ.

ᑕᒪᐃᑕ ᐃᖅᑲᓇᐃᔭᖅᑎᖃᖅᑐᑦ ᑕᐃᒫᑎᒋ ᐊᑭᓖᓲᖑᖏᒻᒪᑕ ᐃᖅᑲᓇᐃᔭᑎᖃᕈᓐᓇᕐᓂᐊᕈᑎᒃ, ᐊᒻᒪᓗ ᑕᐃᒫᑎᒋ ᐊᑭᓕᖅᓱᐃᔪᓄᑦ ᐃᖅᑲᓇᐃᔭᖅᑏᑦ ᐅᐸᓲᖑᖏᓱᑎᒃ ᐃᒡᓗᓂᒃ ᐊᑐᖅᑐᐊᖅᑐᑦ. ᐅᓐᓃᓘᓐᓃᑦ Tim Hortin-ᑯᑦ ᐃᖃᓗᖕᓂ ᑕᐃᒫᑎᒋ ᐊᑭᓖᓱᖑᖏᑦᑐᑦ.

ᓄᓇᕗᑦ ᒐᕙᒪᖓ ᓱᓕᔪᒥᒃ ᐋᕿᒃᓯᒋᐊᓕᒃᓕ ᐊᑭᑭᓐᓂᖅᐹᖅ ᒪᓕᒐᑎᒍᑦ ᐊᑭᓕᐅᓯᐊᖑᔪᓐᓇᖅᑐᖅ $20-ᒧᐊᕐᓗᒍ ᐃᑲᕐᕋᑕᒫᑦ. ᐃᖃᓗᖕᓂ ᐃᒡᓗᐃᑦ ᐊᑕᐅᓯᕐᒥᒃ ᐃᒡᓗᕈᓯᓖᑦ ᐊᑐᖅᑐᐊᖅᑕᐅᓪᓗᑎᒃ $2000-ᕌᓕᕐᒪᑕ ᑕᖅᑭᒥ, PSAC-ᑯᑦ ᐊᑭᑭᓐᓂᖅᐹᒥ ᐊᑭᓖᓂᐊᖅᐸᑕ $15 ᐃᖅᑲᓇᐃᔭᖅᑎᒥ ᐊᖏᕐᕋᖃᕈᑎᖏᓐᓄᑦ ᐊᑭᓖᔪᓐᓇᔮᖏᑦᑐᑦ ᐃᓅᔪᑏᓪᓗ ᐊᑭᖏᓐᓄᑦ ᐊᖑᒻᒪᑎᔪᓐᓇᔮᖏᑦᑐᑦ.

ᐅᖓᑖᓅᕐᓗᑎᒃ ᐊᑭᑭᓐᓂᖅᐹᑦ ᐊᑭᓕᐅᓯᐊᒍᔪᓐᓇᖅᑐᑦ ᐊᓯᖏᓐᓂ ᓄᓇᓂ ᐃᓅᔪᑎᓄᑦ ᐊᖑᒻᒪᑎᖏᒻᒥᖕᒪᑕ ᑲᓇᑕᒥ ᓄᓇᓕᐸᐅᔭᓂ ᐊᖏᕐᕋᖃᖅᑐᓂ, ᓄᓇᕗᒥ ᓯᕗᓪᓕᖅᐸᐅᓗᑎᒃ ᐱᒋᐊᖓᖅᑎᑦᑎᔪᓐᓇᖅᑐᑦ ᐃᓄᖁᑎᒥᓂᒃ ᐊᒃᓱᕉᑎᖃᕐᓂᕐᒥᓂᒃ ᑕᑯᒃᓴᐅᑎᑦᑎᓗᑎᒃ ᐃᖅᑲᓇᐃᔭᖅᑎᒥᓂᒃ ᑲᒪᑦᑎᐊᕐᓂᕐᒥᓂᒃ.

ᑕᒪᑐᒪᓂ ᐊᑭᓕᐅᓯᐊᑦ ᖁᕝᕙᖅᐹᓪᓕᕆᐊᖃᓕᖅᑐᑦ.