Skip to content

ᐊᕐᓇᐃᑦ ᑐᕌᖅᑎᑦᑎᔪᑦ ᐃᓂᐅᔪᒥ ᓄᓇᕗᒻᒥ

ᐊᕐᓇᐃᑦ ᐱᓪᓚᕆᐅᔪᒥ ᐊᑐᕐᓂᖃᐅᑎᖃᖅᐳᑦ ᐱᕙᓪᓕᐊᑎᑦᑎᓂᕐᒧᑦ ᓄᓇᕗᒻᒥ. ᓄᓇᕘᑉ ᐃᓅᓂᕆᓪᓚᕆᓚᐅᕐᓂᖓᓂ ᒫᓐᓇᒧᑦ ᑎᑭᖦᖢᒍ, ᖄᖏᖅᓯᒪᓕᖅᑐᓂ ᐊᕐᕌᒍᓄᑦ 20–ᓄᑦ ᑕᑖᖅᐳᖅ ᐅᖃᐅᓯᕆᔪᒥᓇᑦᑎᐊᖅᑐᓂ ᐊᕐᓇᓂ ᓱᕋᑦᑎᕆᓚᐅᖅᑐᓂ ᐋᖅᑭᒃᑕᐅᓯᒪᓂᖓᓂ ᐊᒻᒪ ᓵᓚᖃᖅᖢᑎᒃ ᖄᖏᐅᑎᔭᒃᓴᐅᙱᑦᑐᓂ ᑎᑭᐅᑎᓂᕐᒧᑦ ᖁᑦᑎᒃᑐᒥ ᑭᒡᓕᐅᔪᒥ ᑎᑭᐅᑎᔪᓐᓇᕐᓂᐅᔪᒥ.

ᐊᕐᕌᒎᔪᒥ ᐊᖑᑎᓄᑦ ᐊᕐᓇᓄᑦ ᐊᑐᕐᓂᖃᐅᑎᖏᓐᓂ ᐱᑕᖃᕈᓐᓃᖅᐸᓪᓕᐊᑎᓪᓗᒋᑦ, ᐊᕐᓇᐃᑦ ᓇᖏᖅᓯᕙᓪᓕᐊᕗᑦ ᑐᓂᓯᔨᑐᐃᓐᓇᐅᔪᓐᓃᓐᓂᕐᒧᑦ, ᑭᓯᐊᓂ ᓯᕗᓕᐅᖅᑎᐅᓪᓗᑎᒃ ᒫᓐᓇᐅᓕᖅᑐᒥ ᐃᓅᖃᑎᒌᖕᓂᐅᔪᒥ. ᒫᓐᓇᓕᓴᖅ ᑎᑎᕋᖅᑕᐅᓚᐅᖅᑐᒥ ᓴᖅᑭᑎᑦᑎᓚᐅᖅᐳᑦ ᖃᐅᔨᓴᖅᑕᐅᓂᑯᓂ ᑎᑎᕋᖅᓯᒪᔪᓂ ᐱᓕᕆᓂᕐᓄᑦ ᓇᐃᓴᖅᑕᐅᓯᒪᔪᓄᑦ ᓄᓇᕗᒻᒥ ᑕᑯᒃᓴᐅᑎᑦᑎᕗᖅ ᑕᒪᕐᒥᒃ ᒐᕙᒪᒃᑯᓐᓂ ᐃᖅᑲᓇᐃᔮᖃᖅᑐᓂ ᐊᕐᓇᐃᑦ, 65 ᐳᓴᓐᑎᖏᑦ ᐊᕐᓇᐅᕗᑦ.

ᓄᓇᕗᒻᒥᐅᑦ ᓂᕈᐊᓚᐅᕆᕗᑦ ᒧᒥᓛᖅ ᖃᖅᑲᕐᒥ, ᑭᒡᒐᖅᑐᐃᑦᑎᐊᖅᑐᒥ ᒪᓕᒃᑐᓂ ᐱᐅᓯᖃᑎᒌᖑᔪᓂ ᖁᕝᕙᖅᐸᓪᓕᐊᔪᓄᑦ ᑎᑭᑉᐸᓪᓕᐊᔪᓄᓪᓗ ᐃᓄᖕᓂ, ᐃᓚᒋᔭᐅᓂᕐᒧᑦ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᑕᑯᒃᓴᐅᑎᑦᑎᔪᒥ ᐱᔪᒪᓂᐅᔪᒥ ᐃᑲᔪᖅᓱᐃᓂᕐᒥ ᓄᑖᓂ ᐃᓱᒪᒋᔭᐅᓂᐅᔪᓂ ᐊᑦᑕᑕᖅᓯᒪᙱᑦᑐᓄᑦ ᐊᖑᑕᐅᓂᖓᓂ ᐊᕐᓇᐅᓂᖓᓂ–ᑐᙵᕕᖃᖅᑐᓂ ᐃᓱᒪᒋᔭᐅᓂᐅᔪᓄᑦ.

ᑭᓯᐊᓂ ᓯᕗᓪᓕᖅᐹᕆᔭᐅᙱᓚᖅ ᐊᕐᓇᒥᒃ ᐊᐅᓚᓂᖃᕐᓂᐅᔪᒥ ᓄᓇᕗᒻᒥ. ᓄᓇᕗᒻᒥ ᒪᕐᕈᖓᓂ ᓯᕗᓕᖅᑎᖓ, ᐄᕙ ᐋᕆᐊᖅ, ᑕᓪᓕᒪᒋᔭᐅᑐᐃᓐᓇᖅᖢᓂ ᐊᕐᓇᐅᓚᐅᖅᐳᖅ ᓂᕈᐊᖅᑕᐅᓂᕐᒧᑦ ᐃᓂᐅᔪᒥ ᓯᕗᓕᖅᑎᒧᑦ ᑲᓇᑕᓕᒫᒥ. ᐅᓪᓗᒥ ᐃᖅᑲᓇᐃᔭᖅᐳᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᓄᑦ ᐋᔩᖃᑎᒌᒃᑎᐅᓪᓗᓂ ᐃᓗᐃᑦᑑᔪᓄᑦ.

ᐊᕐᓇᐃᑦ ᓄᓇᕗᒻᒥ ᐱᓯᒪᑦᑎᒋᕗᑦ ᖁᑦᑎᒃᑐᓂ ᐃᓂᐅᔪᓂ ᓇᖕᒥᓂᕆᔭᐅᔪᓄᑦ ᐱᓕᕆᓂᕐᔪᐊᖑᔪᓂ ᐃᓂᐅᔪᓂ ᓲᕐᓗ ᐹᕙᓐᓛᓐ ᓴᕕᕋᔭᒃᓴᒧᑦ ᐅᔭᕋᖕᓂᐊᕐᕕᖓᓂ ᐅᓪᓗ ᕼᐋᓐᓯᓐ ᐊᖓᔪᖅᑳᑉ ᑐᖏᓕᕆᓪᓗᓂᐅᒃ ᐊᒻᒪ ᐊᓗᑭ ᑰᑦᑎᖅ ᐊᖓᔪᖅᑳᖑᓪᓗᓂ ᓄᓇᕗᒻᒥ ᑐᙵᕕᒃᑯᓐᓄᑦ ᐊᑦᑎᖅᓯᓪᓗᓂ ᖃᔅᓯᐊᕐᔪᖕᓂ.

ᒫᓐᓇᓕᓴᓂ ᐊᕐᕌᒎᔪᓂ ᑲᓇᑕᐅᑉ ᓯᕗᓪᓕᖅᐹᕆᔭᖓᓂ ᐃᓅᓪᓗᓂ ᐆᒻᒪᑎᓄᑦ ᐱᓚᒃᑐᐃᔨᐅᔪᒥ, ᑖᓇ ᒪᐃ ᑭᒻᒪᓕᐊᕐᔪᒃ ᖃᐅᔨᒪᔭᐅᕐᔪᐊᓕᓚᐅᖅᐳᖅ ᑎᑭᐅᑎᓂᖓᓄᑦ ᖃᔅᓯᐊᕐᔪᑐᐃᓐᓇᓂ ᑲᓇᑕᒥᐅᑕᓂ ᐱᔪᓐᓇᕐᓂᖓᓂ ᐃᖅᑲᓇᐃᔮᕆᔭᒥᓄᑦ ᐱᓪᓗᓂ Indspire ᓵᓚᖃᐅᓯᐊᒥᒃ.

ᐅᖓᑖᓄᑦ ᐃᖅᑲᓇᐃᔮᕆᔭᐅᔪᓄᑦ ᑎᑭᐅᑎᔪᓐᓇᖅᑕᐅᓯᒪᔪᓂ, ᐊᕐᓇᐃᑦ ᓄᓇᕗᒻᒥ ᐱᓕᕆᖃᑕᐅᓯᒪᕗᑦ ᐱᒻᒪᕆᐅᔪᒥ ᐊᑐᕐᓂᖃᐅᑎᒥᒃ ᐸᐸᑦᑎᓂᕐᒥ ᐃᓄᐃᑦ ᐅᖃᐅᓯᖓᓐᓂ ᐊᒻᒪ ᐱᖅᑯᓯᑐᖃᕐᓂ ᐆᒪᑎᑦᑎᓪᓗᑎᒃ.

ᒫᓐᓇᓕᓴᒥ ᖁᕐᓗᖅᑐᖅ ᐊᓯᐅᔨᓚᐅᖅᐳᑦ ᐊᑯᓂᐅᓛᒥᒃ ᐆᒪᔪᕕᓂᕐᓂ ᐃᓄᑐᖃᕐᓂ, ᔫᓐ ᑭᓕᖏᖕᐴᒡᒥ, ᓇᒡᓕᒋᔭᐅᓪᓗᓂ ᐃᖅᑲᐅᒪᔭᐅᔪᒥ ᐊᓕᐊᓇᐃᒋᔭᖃᑦᑎᐊᕐᓂᖓᓂ ᐱᖅᑯᓯᑐᖃᑦᑎᓐᓂ.

"ᐊᓯᐅᔨᓵᖅᐳᒍᑦ ᐊᓐᓂᕐᓇᖅᑐᒥ ᐱᓐᓇᕆᔭᐅᓂᐅᔪᒥ ᐅᖃᐅᓯᕐᓂ ᐸᖅᑭᔨᐅᔪᒥᑦ, ᖃᐅᔨᒪᓂᕐᒧᑦ ᑎᒍᒥᐊᖅᑎᐅᔪᒥ," ᐅᖃᓚᐅᖅᐳᖅ ᐱᖃᓐᓇᕆᔭᖓ ᐃᐊᑦᓇ ᐃᓚᐃᔭᔅ (ᐆᒪᙵᑦ 'ᑲᒪᓇᕐᔪᐊᓚᐅᖅᐳᖅ'; ᐃᓚᒌᑦ ᐊᒻᒪ ᐱᖃᓐᓇᕆᔭᐅᔪᑦ ᐃᖅᑲᐅᒪᓂᖃᖅᐳᑦ ᔫᓐ ᐅᑲᓕᒃ ᑭᓕᖏᖕᐴᒡᒥ, ᐆᒪᓚᐅᖅᑐᒥ ᐊᕐᕌᒍᓄᑦ 105–ᓄᑦ, ᓄᓇᕗᒻᒥ ᑐᓴᒐᒃᓴᓕᕆᔨᒃᑯᑦ ᔭᓄᐊᕆ 20–ᒥ ᑎᑎᕋᖅᑕᐅᓂᑯᒥ).

ᒫᓂᑲ ᐃᑦᑐᒃᓵᕐᔪᐊᑦ ᐃᖅᑲᓇᐃᔭᖅᓯᒪᕗᖅ ᐊᕐᕌᒍᑦ 50 ᐅᖓᑖᓄᑦ ᐸᐸᑦᑏᓐᓇᕐᓂᕐᒧᑦ ᐃᓄᒃᑎᑐᒻᒥ ᓄᓇᕗᓕᒫᒥ, ᐱᓪᓗᓂ 2019–ᒥ ᓄᓇᕗᒻᒥ ᑲᑎᒪᔨᖏᑦᑕ ᑲᑐᔾᔨᖃᑎᒌᖏᑦ ᐅᖃᓕᒫᕈᓐᓇᕐᓂᕐᒧᑦ ᑎᑎᕋᕈᓐᓇᕐᓂᕐᒧᑦ ᑐᓐᓂᖅᑯᓯᐊᖓᓐᓂ ᐊᒻᒪ ᐱᓕᕆᓲᖑᕗᖅ ᐊᑕᐅᓯᒃᑲᓐᓂᐅᓪᓗᓂ ᐆᒃᑑᑎᐅᔪᒥ ᖁᑦᑎᒃᑐᒥ ᐊᔭᐅᕆᓯᒪᓂᐅᔪᓂ ᐃᓕᖅᑯᓯᒧᑦ–ᑕᐅᑐᒃᑕᑐᐊᖃᑲᐃᓐᓇᖅᑐᓂ ᐊᕐᓇᓂ ᓄᓇᕗᒻᒥ.

ᐃᓚᖏᑦ ᓄᓇᕗᒻᒥ ᖃᐅᔨᒪᔭᐅᓛᖑᔪᓂ ᓴᓇᐅᒐᓕᕆᔨᐅᔪᓂ ᐊᕐᓇᐅᒋᕗᑦ ᐋᓂ ᐳᑐᒍᖅ ᐊᒻᒪ ᕿᓐᓄᐊᔪᐊᖅ ᐋᓯᕙᒃ, ᐃᓕᓯᓪᓗᑎᒃ ᐃᓄᐃᑦ ᓴᓇᐅᒐᓕᕆᔨᐅᔪᓂ ᓄᓇᙳᐊᒧᑦ ᓴᓇᙳᐊᒐᒃᓴᒧᑦ ᐊᒥᐊᕆᓂᐅᔪᒥ ᐊᒻᒪ ᑎᑎᕋᐅᔭᕐᓂᖏᓐᓂ ᐱᓕᕆᐊᕆᓂᑯᖏᓐᓂᑦ.

ᐃᓱᒪᒋᓇᒍ ᖁᑦᑎᒃᓯᕙᓪᓕᐊᖏᓐᓇᖅᑐᒥ ᑎᑎᕋᖅᓯᒪᓂᐅᔪᓂ ᐊᕐᓇᓂᑦ ᑎᑭᐅᑎᓯᒪᔭᖏᓐᓂ ᐱᓕᕆᑦᑎᐊᕈᓐᓇᕐᓂᖏᓐᓂ ᐊᒻᒪ ᐱᓪᓗᑎᒃ ᐃᒃᐱᒋᔭᐅᑦᑎᐊᕐᓂᖏᓐᓂ ᐃᓅᓯᖏᓐᓂ, ᓱᓕ ᐊᖏᔪᐊᓗᖕᓂ ᐊᒡᕕᐊᕈᑎᑕᖃᖅᐳᖅ ᐃᓕᓯᒪᔪᓂ ᓄᓇᕗᒻᒥ ᓄᖅᑲᖅᑎᑦᑎᕙᒃᑐᓂ ᐊᕐᓇᓂᑦ ᐊᒻᒪ ᓂᕕᐊᖅᓯᐊᓂ ᑎᑭᐅᑎᔪᓐᓇᕐᓂᖏᓐᓂ ᑕᒪᒃᑭᐅᒪᔪᒥ ᐱᔪᓐᓇᕐᓂᕆᔭᖏᓐᓂ, ᐱᓗᐊᖅᑐᒥ ᐊᖑᑕᐅᓂᕐᒧᑦ ᐊᕐᓇᐅᓂᕐᒧᑦ–ᑐᙵᕕᓕᖕᓂ ᐋᓐᓂᖅᓯᕆᓂᐅᔪᒥ.

ᒫᓐᓇᓕᓴᐅᓛᖑᔪᓂ ᐊᑐᐃᓐᓇᐅᔪᓂ ᓇᐃᓴᖅᑕᐅᓯᒪᔪᓄᑦ ᑕᑯᒃᓴᐅᑎᑦᑎᕗᖅ ᐊᕐᓇᐃᑦ 64 ᐳᓴᓐᑎᐅᔪᑦ ᐱᕋᔭᒃᑕᐅᕙᒃᑐᓂ ᐸᓖᓯᒃᑯᓐᓂ ᐅᓂᒃᑳᓕᐊᖑᔪᓄᑦ ᐋᓐᓂᖅᓯᕆᓂᐅᔪᒥ ᐱᕋᔭᖕᓂᐅᔪᓂ, 95 ᐳᓴᓐᑎᖓᓂ ᐱᕋᔭᒃᑕᐅᓯᒪᔪᓂ ᐸᓖᓯᒃᑯᓐᓄᑦ ᐅᓂᒃᑳᓕᐊᖑᔪᓂ ᖁᓄᔪᓐᓂᐊᖅᑕᐅᓂᕐᒧᑦ ᐋᓐᓂᖅᓯᕆᔭᐅᓂᐅᔪᓄᑦ ᐊᒻᒪ ᓄᓇᕗᒻᒥ ᑕᒪᒃᑭᐅᒪᔪᒥ ᐅᓄᕐᓂᐅᔪᒥ 2,180 ᐊᑐᓂ 100,000–ᓂ ᐃᓄᖕᓄᑦ ᐸᓖᓯᒃᑯᓐᓄᑦ–ᐅᓂᒃᑳᕆᔭᐅᓯᒪᔪᓄᑦ ᐃᓚᒌᖑᔪᓄᑦ ᐋᓐᓂᖅᓯᕆᓂᐅᔪᓂ.

ᑭᖑᓪᓕᖅᐹᖑᔪᖅ ᓇᐃᓴᖅᑕᐅᓯᒪᔪᓂ ᐃᓕᓯᕗᖅ ᓄᓇᕗᒻᒥ 12 –ᖏᖅᓱᕐᓗᒍ ᐅᖓᑖᓂ ᑲᓇᑕᒥ ᐅᓄᕐᓂᐅᔪᒥ ᑕᐃᒪᐃᑦᑐᓄᑦ ᐱᕋᔭᖕᓂᐅᔪᓄᑦ. ᐅᑯᐊ ᓇᐃᓴᐅᑏᑦ ᐊᑭᕋᖅᑐᖅᑕᐅᔪᓐᓇᙱᓚᑦ ᐊᒻᒪ ᐃᓱᒪᒋᔭᖃᕈᓰᑦ ᐊᒻᒪ ᐃᓕᖅᑯᓯᖃᕐᕕᐅᔪᑦ ᐊᓯᔾᔨᕆᐊᖃᖅᐳᑦ ᓄᓇᕗᒻᒥ ᐊᒻᒪ ᑲᓇᑕ ᐃᓗᐃᑦᑑᓗᓂ, ᐃᖏᕐᕋᕙᓪᓕᐊᔪᒪᒍᑎᒃ ᐃᓅᖃᑎᒌᖑᓗᑎᒃ. ᐅᓇ ᑐᑭᖃᖅᐳᖅ ᐋᖅᑭᒃᑕᐅᓯᒪᓂᐅᔪᓄᑦ ᐊᓯᔾᔨᕐᓂᐅᔪᓂ ᖃᓄᖅ ᐅᓇ ᐊᑲᐅᙱᓕᐅᕈᑕᐅᔪᖅ ᐱᓕᕆᐊᖑᕙᖕᓂᖓᓂ ᐊᒻᒪ ᐃᑲᔪᖅᓱᐃᓂᕐᒥ ᑕᐃᒃᑯᓄᖓ ᐊᒃᑐᖅᑕᐅᓯᒪᔪᓄᑦ.

ᐊᕐᓇᐃᑦ ᓄᓇᕗᒻᒥᐅᑦ ᑕᑯᒃᓴᐅᑎᑦᑎᓯᒪᕗᑦ ᓄᓇᕐᔪᐊᒥ ᐱᓕᕆᔪᓐᓇᕐᓂᖏᓐᓂ ᑕᐃᒫᒃ ᐊᒥᐊᒃᑰᔪᑎᒍᑦ ᑕᑯᒃᓴᐅᑎᑦᑎᔭᕆᐊᖃᖅᐳᒍᑦ ᐃᒃᐱᒍᓱᑦᑎᐊᕐᓂᐅᔪᒥ ᐊᒻᒪ ᐊᔭᐅᕆᓗᑕ ᐱᔪᓐᓇᕐᓂᕆᔭᖏᓐᓂᑦ ᐊᒻᒪ ᐱᕈᖅᓴᐃᓗᑕ ᐃᓚᐅᑎᑦᑎᒃᑲᓐᓂᕐᓂᐅᔪᒥ ᐊᒻᒪ ᐱᔪᓐᓇᖅᑎᑕᐅᓂᕐᒥ ᓯᕗᓂᒃᓴᐅᔪᒥ ᑕᒪᒃᑭᓄᑦ.