Skip to content

ᐋᑐᕚᑉ ᓱᓕᓂᕋᖅᑕᖓᓂ ᑭᐅᓂᕐᒧᑦ ᐊᔾᔨᒌᙱᑎᑦᑎᓂᕐᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᓂᐅᔪᒥ ᓴᖅᑭᑎᑦᑎᕗᖅ ᐅᒃᐱᕈᓱᙱᓐᓂᐅᔪᒥ ᑲᓇᑕᐅᑉ ᒪᓕᒐᓕᐅᖅᑎᖏᓐᓄᑦ ᐃᓚᒋᔭᐅᔪᒧᑦ

Mumilaaq Qaqqaq FRONT

ᒐᕙᒪᑐᖃᒃᑯᑦ ᐊᖏᖅᓯᒪᓂᓕᐅᓚᐅᖅᐳᑦ ᔭᓄᐊᕆᐅᑉ ᓄᙳᐊᓂ ᓇᓗᓇᐃᖅᓯᓂᕐᒧᑦ ᐃᓄᐃᑦ, ᐊᒻᒪ ᐊᓯᖏᓐᓂ ᓄᓇᖃᖅᑳᖅᓯᒪᔪᓄᑦ ᐃᓄᐃᑦ, “ᐱᓂᖏᓐᓂ ᐱᐅᓂᖅᐹᖑᔪᒥ ᐃᓅᓕᓴᖅᑕᐅᓂᕐᒧᑦ ᐸᖅᑭᔭᐅᓂᖏᓐᓂ, ᑲᑉᐱᐊᓱᖕᓇᑎᒃ ᐊᔾᔨᒌᙱᑎᑕᐅᓂᕐᒥᒃ ᐊᒻᒪᓗ ᐱᑦᑎᐊᖅᑕᐅᙱᓐᓂᕐᒥ.”

ᓄᓇᕗᒻᒧᑦ ᑲᓇᑕᐅᑉ ᒪᓕᒐᓕᐅᖅᑎᖏᓐᓄᑦ ᐃᓚᒋᔭᐅᔪᒧᑦ ᒧᒥᓛᖅ ᖃᖅᑲᖅ ᐅᖃᓚᐅᖅᐳᖅ ᐱᑕᖃᙱᓗᐊᕐᓂᖓᓂ ᐃᓅᓕᓴᖅᑕᐅᓂᕐᒧᑦ ᐸᖅᑭᔭᐅᓂᖓᓂ ᐊᑐᐃᓐᓇᐅᔪᒥ ᓄᓇᕗᒻᒥ ᑕᑯᒃᓴᐅᑎᑦᑎᕗᖅ ᑲᓇᑕᒥ ᒐᕙᒪᒃᑯᑦ ᐃᒃᐱᒍᓱᙱᓐᓂᖃᕐᓂᖓᓂ ᐃᓄᖕᓂ.

“ᐃᓄᐃᑦ ᐊᒻᒪ ᐅᑭᐅᖅᑕᖅᑐᖅ ᐃᒃᐱᒋᔭᐅᙱᓚᑦ ᒐᕙᒪᑐᖃᒃᑯᓐᓄᑦ ᑕᐃᒪᓐᓇᑎᑐᑦ ᐊᓯᖏᓐᓂ ᓄᓇᓕᐅᔪᓂ, 100 ᐳᓴᓐᑎᒥ, ᐃᒻᒪᖄ ᑕᑯᓇᔭᖅᐳᒍᑦ ᓇᓕᒧᑦᑐᒥ ᐊᑐᐃᓐᓇᖃᕐᓂᕐᒥ,” ᖃᖅᑲᖅ ᐅᖃᓚᐅᖅᐳᖅ. “ᑕᐃᒪᓐᓇᓪᓚᕆᒃ ᑕᑯᓚᐅᖅᐳᒍᑦ ᐱᒋᐊᕐᓂᖓᓂ ᐱᓕᕆᖃᑎᒌᖕᓂᐅᔪᒥ ᐃᓄᖕᓂ ᐊᒻᒪ ᒐᕙᒪᑐᖃᒃᑯᓐᓂ. ᐱᑕᖃᙱᓗᐊᕐᓂᖓᓂ ᐃᒃᐱᒍᓱᑦᑎᐊᕐᓂᐅᔪᒥ.

“ᓯᕗᓪᓕᖅᐹᒥ, ᐱᓕᕆᐊᕆᔭᕆᐊᖃᖅᑕᖏᑦ ᐱᑕᖃᙱᓗᐊᕐᓂᖓᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᔭᐅᓂᐅᔪᒥ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ,” ᖃᖅᑲᖅ, ᑭᒡᒐᖅᑐᐃᔨᐅᔪᖅ NDP−ᑯᓐᓄᑦ, ᐅᖃᓚᐅᖅᐳᖅ ᓕᐳᕈᓪ ᒐᕙᒪᒃᑯᓐᓂ. “ᐱᔨᑦᑎᕋᕐᓂᐅᔪᒥ ᑐᓂᓯᔭᕆᐊᖃᖅᐳᓯ ᓯᕗᓪᓕᖅᐹᒥ, ᐊᒻᒪᓗ ᐅᖃᐅᓯᖃᖅᐸᓪᓕᐊᔪᓐᓇᖅᓯᓂᐊᖅᐳᒍᑦ ᐃᓅᖃᑎᒥᒃ ᐊᑭᕋᖅᑐᕐᓂᑦ ᐊᔾᔨᒌᙱᓐᓂᕐᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᓂᐅᔪᒥ.”

ᓄᓇᕗᒻᒥ ᑲᓇᑕᒥ ᒪᓕᒐᓕᐊᕆᔭᐅᔪᓂᒃ ᖃᐅᔨᓴᖅᑎ ᑕᓂᔅ ᐹᑐᓴᓐ ᐅᖃᐅᓯᖃᓚᐅᕆᕗᖅ ᐊᔾᔨᐸᓗᐊᓂ ᐃᓱᒪᒋᔭᒥᓂ ᑐᓂᓯᓂᐅᔪᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔨᑦᑎᕋᕐᓂᐅᔪᒥ, ᐅᕝᕙᓘᓐᓃᑦ ᐱᑕᖃᙱᓗᐊᕐᓂᖓᓂ.

“ᐅᖃᐱᓘᑎᓂᑦ ᐱᕙᒃᑕᓐᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᓂᐅᔪᒥ ᐱᔾᔪᑎᖃᖅᐳᖅ ᐊᑐᐃᓐᓇᖃᖅᑎᑕᐅᓂᕐᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᓂᐅᔪᒥ ᐱᓂᖅᓴᐅᔪᒥ ᐊᔾᔨᒌᙱᑎᑦᑎᓂᕐᒥ... ᐊᒥᒐᓗᐊᕐᓂᐅᕗᖅ ᐃᑲᔪᕈᑎᒃᓴᓂ ᐅᔾᔨᕐᓇᓗᐊᖅᑐᓂ ᐃᓂᐅᔪᓂ ᓲᕐᓗ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ,” ᐅᖃᓚᐅᖅᐳᖅ ᐹᑐᓴᓐ, ᑲᓐᓲᕕᑎᒃᑯᓐᓂ.

ᖃᖅᑲᖅ ᐅᖃᓚᐅᖅᐳᖅ ᑐᓴᓚᐅᕐᓂᖓᓂ ᖃᔅᓯᒐᓚᖕᓂ ᐅᖃᐱᓗᖕᓂᐅᔪᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᓂᐅᔪᒥ ᓄᓇᕗᒻᒥᐅᓂ 2020−ᒥ ᐃᒡᓗᓕᕆᓂᕐᒧᑦ ᐳᓚᕋᕆᐊᖅᓯᒪᑎᓪᓗᒍ ᓄᓇᕗᒻᒥ. ᐊᑕᐅᓯᖅ ᐆᒃᑑᑎᒋᓗᒍ ᐊᑯᓂᐅᔪᒥ ᐃᖅᑲᐅᒪᓂᕆᔭᖓᓂ ᒪᒃᑯᒃᑐᒥ ᐊᓈᓇᐅᔪᒥ ᕿᑎᕐᒥᐅᓂ ᑎᑎᖅᑲᒥ ᑐᓂᓯᓚᐅᖅᑐᒥ. ᖃᖅᑲᖅ ᐅᖃᓕᒫᓚᐅᖅᐸᖓ ᑐᔪᕐᒥᕕᖕᒥ ᐃᒡᓗᕈᓯᐊᓂ ᐅᓐᓄᖓᓂ. ᐊᓈᓇᐅᑉ ᐅᖃᐅᓯᖏᑦ ᓴᐱᓕᖅᓯᒪᓂᖓᓂ ᐊᒻᒪ ᐃᓱᒫᓗᖕᓂᖓᓂ ᓄᑕᕋᓛᒥᓂᑦ ᑎᑭᓚᐅᖅᐳᖅ ᐊᒥᓱᐃᖅᓱᖅᖢᓂ ᑕᑯᔭᐅᔪᒪᓚᐅᙱᓐᓂᖓᓂ ᓄᓇᓕᖕᓂ ᐋᓐᓂᐊᕕᖕᒥ ᓄᑕᕋᓛᖓ ᐳᕙᖏᓐᓂ ᓄᕙᖃᖅᐸᓪᓕᐊᒐᓗᐊᖅᑎᓪᓗᒍ.

“ᐃᒪᐃᓚᐅᖅᐳᖓ, ‘ᐅᐊ,” ᐅᖃᓚᐅᖅᐳᖅ ᖃᖅᑲᖅ. “ᖃᐅᔨᒪᓚᐅᖅᐳᖅ ᖃᓄᐃᓐᓂᖓᓂ. ᐊᑯᓂᐸᓗᐊᓗᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᓂᑖᕋᓱᐊᓚᐅᖅᐳᖅ. ᐊᒥᓱᐊᓗᖕᓂ ᐅᓂᒃᑳᖅᑕᖃᖅᐳᖅ ᑕᐃᒪᐃᑦᑐᓂ... (ᓲᕐᓗ) ᐅᐃᒐ ᑳᓐᓱᖃᓚᐅᖅᐳᖅ, ᖃᐅᔨᔭᐅᓵᓕᓚᐅᕈᓂ ᓇᓗᓇᐃᖅᑕᐅᔪᓐᓇᕋᔭᓚᐅᖅᑐᒃᓴᐅᕗᖅ ᐊᒻᒪ ᒫᓐᓇ ᐃᓅᓕᓴᖅᑕᐅᔪᓐᓇᙱᓚᖅ ᐊᖏᕐᕋᖓᓂ ᓄᓇᓕᖓᓂ. ᐃᕐᓂᕋ ᐃᑲᔪᕈᑎᒃᓴᖃᓚᐅᕈᓂ ᐊᒻᒪ ᐊᑐᐃᓐᓇᖃᕐᓗᓂ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ (ᐃᓅᓯᓕᕆᓂᕐᒥ), ᐃᒻᒥᓃᕋᔭᓚᐅᙱᓚᖃᐃ. ᐊᒥᓱᒻᒪᕆᐊᓗᖕᓂ ᐅᓂᒃᑳᖅᑕᖃᖅᑐᖅ.”

ᓄᓇᕗᒻᒥ ᑐᙵᕕᒃᑯᑦ (NTI) ᑐᓂᓯᓚᐅᖅᐳᑦ ᐅᖃᐅᓯᒃᓴᒥ ᓇᓗᓇᐃᖅᓯᔪᒥ ᓯᓕᖕᓂᖅᓴᐅᔪᒥ ᐃᓅᖃᑎᒌᖑᔪᓄᑦ ᖃᓄᐃᓐᓂᐅᔪᓂ ᐋᓐᓂᐊᖃᕐᓇᙱᑦᑐᓕᕆᓂᐅᔪᒥ ᐃᓄᖕᓂ ᓄᓇᕗᒻᒥ, ᓲᕐᓗ ᑮᓇᐅᔾᔭᒃᓴᓂᐅᔪᒥ, ᐃᓕᓐᓂᐊᕐᓂᖅ, ᓈᒻᒪᒃᑐᒥ ᐃᒡᓗᒃᓴᖃᕐᓂᐅᔪᒥ, ᐊᒃᓱᕈᕐᓇᖅᑐᒥ/ᐱᓂᕐᓗᔨᔪᐊᕐᓂᐅᔪᒥ ᐊᒻᒪᓗ ᓂᕿᒃᓴᖃᑦᑎᐊᙱᓐᓂᐅᔪᒥ. ᐃᓄᐃᑦ ᐃᓅᓯᖏᑦ ᓂᕆᐅᒋᔭᐅᓂᖓᓂ ᐊᕐᕌᒍᓄᑦ 10−ᓄᑦ ᓇᐃᓐᓂᖅᓴᐅᕗᖅ ᑲᓇᑕᒥᐅᑕᐅᒐᔪᒃᑐᓂ, ᐅᖃᐅᓯᐅᓪᓗᓂ ᑲᓇᑕᒥ ᑭᓪᓕᓯᓂᐊᖅᑎᒃᑯᓐᓂ.

"ᐃᓱᐊᓂ, ᑕᐃᒪᐃᖏᓐᓇᖅᑐᒥ ᐊᑑᑎᖃᙱᑎᑕᐅᓂᖓᓂ ᐃᓄᖕᓂ ᐊᒃᑐᐃᓲᖑᕗᖅ ᐋᓐᓂᐊᖃᕐᓇᙱᑦᑐᓕᕆᓂᑦᑎᓐᓂ ᐊᒻᒪᓗ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᓄᐃᓕᖓᓂᐅᔪᓄᑦ. ᐱᓕᕆᑎᓪᓗᑕ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᑲᐅᙱᓕᐅᕈᑕᐅᔪᓄᑦ ᐋᖅᑭᒃᓯᒪᓂᖓᓂ ᐃᓱᒪᓕᐅᕈᑕᐅᕙᒃᑐᓂ ᐃᓕᓴᕆᔭᐅᔭᕆᐊᖃᖅᐳᑦᑕᐅᖅ, ᐃᓗᓕᖓᓂ ᐊᑐᖅᑕᐅᕙᓚᐅᖅᑐᓂ ᐱᖅᑯᓯᕆᙱᑕᓄᑦ ᐱᐅᓯᖃᓕᖅᑎᑕᐅᓂᖅ ᐊᒻᒪᓗ ᖃᓄᐃᓐᓂᐅᔪᒥ ᑕᐃᒪᐃᖏᓐᓇᖅᑐᒥ ᐊᑑᑎᖃᙱᑎᑕᐅᓂᖓᓂ," ᓄᓇᕗᒻᒥ ᑐᙵᕕᒃᑯᑦ ᐅᖃᓚᐅᖅᐳᑦ.

‘ᓄᓇᖃᖅᑳᖅᓯᓚᒧᓄᑦ ᐃᓄᖕᓄᑦ ᐱᓕᕆᓂᖃᑦᑎᐊᙱᓐᓂᐅᔪᒥ’

ᔭᓄᐊᕆᒥ ᐅᖃᐅᓯᒃᓴᓕᐊᒥᓂᑦ, ᒐᕙᒪᑐᖃᒃᑯᑦ ᐅᖃᐅᓯᖃᓚᐅᖅᐳᑦ “ᓈᒻᒪᒃᑐᒥ ᑕᑯᒃᓴᐅᓂᖃᕐᓂᖓᓂ ᑲᓇᑕᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ-ᐸᖅᑭᓂᐅᔪᒥ ᐱᓕᕆᔾᔪᓯᐅᔪᑦ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᐱᓕᕆᓂᖃᑦᑎᐊᙱᓚᑦ.”

"ᐊᑯᓂᓗᐊᒻᒪᕆᐊᓗᖕᒥ, ᑲᓇᑕᐅᑉ ᐊᑐᖅᐸᓚᐅᖅᑕᖏᓐᓂ ᐱᖅᑯᓯᕆᙱᑕᓄᑦ ᐱᐅᓯᖃᓕᖅᑎᑕᐅᓂᕐᒥ ᐊᐅᓚᑎᑦᑎᓯᒪᕗᖅ ᐃᓅᖃᑎᒥᒃ ᐊᑭᕋᖅᑐᕐᓂᑦ ᐊᔾᔨᒌᙱᓐᓂᕐᒧᑦ ᐊᑐᖅᑕᐅᕙᖕᓂᐅᔪᒥ, ᐃᓕᖅᑯᓯᖃᕐᓂᖃᖅᑎᑦᑎᓪᓗᓂ ᐊᒻᒪ ᐊᑐᐊᒐᐃᑦ ᐊᑭᕋᖅᑐᖅᖢᓂ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ. ᐱᓕᕆᔾᔪᓯᐅᔪᒥ ᐃᓅᖃᑎᒥᒃ ᐊᑭᕋᖅᑐᕐᓂᑦ ᐊᔾᔨᒌᙱᓐᓂᕐᒧᑦ ᓱᓕ ᐃᓕᓯᒪᕐᔪᐊᖅᐳᖅ ᑲᓇᑕᐅᑉ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᓂᐅᔪᒥ ᐱᓕᕆᔾᔪᓯᐅᔪᓂ, ᐊᖏᔪᒻᒪᕆᐊᓗᖕᒥ ᐊᒃᑐᐃᓂᖃᖅᖢᓂ ᐊᓪᓚᓄᑦ, ᐃᓄᖕᓄᑦ ᐊᒻᒪ ᐊᓪᓚᖓᔪᓄᑦ ᓄᓇᓕᐅᔪᓄᑦ,” ᐅᖃᓕᒫᕐᓂᖃᖅᐳᖅ ᐅᖃᐅᓯᒃᓴᓕᐊᖑᔪᒥ ᑲᑐᔾᔭᐅᓪᓗᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᒥᓂᔅᑕᒧᑦ ᐹᑎ ᕼᐊᔾᑐ, ᑯᐃᓐᒧᑦ-ᓄᓇᖃᖅᑳᖅᓯᒪᔪᓄᑦ ᐱᓕᕆᓂᕐᒧᑦ ᒥᓂᔅᑕ ᑳᓚᐃᓐ ᐸᓂᑦ ᐊᒻᒪ ᐅᑭᐅᖅᑕᖅᑐᒥ ᐱᓕᕆᓂᕐᒧᑦ ᒥᓂᔅᑕ ᑖᓐ ᕚᓐᑎᐅᓪ. “ᐊᖏᐸᓗᒃᑐᒥ ᐊᓯᔾᔨᕐᓂᖃᙱᓪᓗᓂ, ᓄᓇᖃᖅᑳᖅᓯᒪᔪᑦ ᐃᓄᐃᑦ ᓵᙵᐃᓐᓇᕐᓂᐊᖅᐳᑦ ᓱᔪᐃᓐᓇᖅᑐᓂ ᐊᒻᒪ ᑕᐃᒪᐃᖏᓐᓇᖅᑐᓂ ᓇᓕᒧᑎᑕᐅᙱᓐᓂᐅᔪᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪ ᐃᓅᖃᑎᒌᖕᓂᕐᒧᑦ ᖃᓄᐃᓕᖓᓂᐅᔪᓂ ᓈᒻᒪᙱᓗᐊᖅᑐᓄᑦ ᐊᑐᐃᓐᓇᖃᕐᓂᕐᒥ ᓈᒻᒪᒃᑐᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔨᑦᑎᕋᕐᓂᐅᔪᒥ.”

ᒐᕙᒪᑐᖃᒃᑯᑦ ᐅᖃᐅᓯᖃᓚᐅᖅᐳᑦ ᑲᑎᒪᓂᐅᔪᓂ ᐆᒧᖓ ᐅᖃᐅᓯᐅᔪᒥ ᐱᓕᕆᐊᖑᓯᒪᕗᖅ ᓄᓇᖃᖅᑳᖅᓯᒪᔪᓄᑦ ᓯᕗᓕᐅᖅᑎᐅᔪᓄᑦ ᑲᓇᑕᓕᒫᒥ ᐊᒻᒪᓗ ᒥᓂᔅᑕᐃᑦ ᐊᖏᖅᓯᒪᓚᐅᖅᐳᑦ ᐅᖃᓪᓚᒃᑲᓐᓂᓛᕐᓂᖏᓐᓂ ᑕᒪᑐᒪᓂ ᐅᐱᕐᙶᖑᓂᐊᖅᑐᒥ ᐱᔾᔪᑎᖃᖅᑐᒥ ᖁᑦᑎᖕᓂᖅᓴᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᓕᓐᓂᐊᕐᓂᐅᔪᒥ, ᐃᓕᖅᑯᓯᒧᑦ ᐱᒻᒪᕆᐅᓂᖓᓂ ᐱᓕᒻᒪᒃᓴᐃᓂᕐᒧᑦ, ᓄᓇᖃᖅᑳᖅᓯᒪᔪᓄᑦ ᑐᕌᒐᕆᔭᐅᒧᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ, ᐊᒻᒪ ᐋᓐᓂᐊᕕᓕᐊᖅᑐᓄᑦ ᑲᒪᒋᔭᖃᑦᑎᐊᕐᓂᐅᔪᒥ. ᑎᑎᕋᖅᓯᒪᓂᐅᔪᒥ ᖃᔅᓯᒐᓚᖕᓂ ᐸᕐᓇᒃᑕᐅᓯᒪᔪᓂ ᐊᓯᔾᔨᕈᑎᒃᓴᓂ ᑎᑎᕋᖅᑕᐅᒋᐊᙵᖅᑕᐅᓯᒪᕗᑦ ᑭᐅᓂᕐᒧᑦ ᖄᖏᐅᑎᓯᒪᓗᐊᖅᑐᓄᑦ ᐊᑲᐅᙱᓕᐅᕈᑕᐅᔪᓄᑦ.

ᖃᖅᑲᖅ ᑎᒃᑯᐊᕆᓚᐅᖅᐳᖅ ᐊᓯᖏᓐᓂ ᒐᕙᒪᒃᑯᓐᓂ ᐱᓕᕆᔭᐅᓂᐊᕐᓂᕆᖅᑕᐅᓚᐅᖅᑐᓂ ᓱᓕ ᐱᒋᐊᖅᑕᐅᓚᐅᙱᑦᑐᓂ ᐊᑯᓂᐅᔪᒥ ᐱᓕᕆᔭᐅᓂᐊᕐᓂᕋᖅᑕᐅᓚᐅᖅᑎᓪᓗᒋᑦ, ᓲᕐᓗ ᑲᓇᑕᒥ ᖃᓄᐃᓕᐅᕐᓂᕐᒧᑦ ᐸᕐᓇᐅᑎᒥᒃ ᐊᓯᐅᖅᑲᔪᓄᑦ ᐊᒻᒪ ᐃᓄᐊᖅᑕᐅᔪᓄᑦ ᓄᓇᖃᖅᑳᖅᓯᒪᔪᓄᑦ ᐊᕐᓇᓄᑦ ᓂᕕᐊᖅᓵᓄᓪᓗ ᐊᒻᒪ ᑐᓂᓯᓂᕐᒥ ᓴᓗᒪᔪᒥ ᐃᒥᕐᒥ ᑕᒪᒃᑭᓄᑦ ᐊᓪᓚᓄᑦ ᓄᓇᓕᐅᔪᓄᑦ.

“ᑕᑯᓯᒪᕗᒍᑦ ᑕᐃᔅᓱᒪᓂᑐᖃᕐᒥ ᑭᓱᑐᐃᓐᓇᓂ ᐅᖃᐅᓯᐅᓂᐅᓂᖏᓐᓂ ᐊᒻᒪ ᐊᓱᐃᓛᒃ ᒪᓕᖕᓂᖓ ᒥᑭᓗᐊᕐᓂᖓᓂ ᐅᕝᕙᓘᓐᓃᑦ ᐊᔾᔨᒋᔪᓐᓃᑦᑎᐊᖅᖢᓂᐅᒃ, ᐅᕝᕙᓘᓐᓃᑦ ᖃᐅᔨᒋᐊᖅᑕᐅᒃᑲᓐᓂᓚᐅᖅᓯᒪᓇᓂ,” ᖃᖅᑲᖅ ᐅᖃᓚᐅᖅᐳᖅ.