Skip to content

ᐱᓕᕆᐊᖃᖅᑐᑦ ᐃᓅᓯᖃᕐᓂᕐᒥᒃ

ᑎᑎᕋᐅᔭᖅᖢᑎᒃ ᓵᓚᒃᓴᐅᑎᖃᑦᑕᐅᑎᔪᑦ ᐊᒥᓲᓂᖃᓚᐅᖅᐳᑦ 150-ᓂᒃ ᐃᓕᓐᓂᐊᖅᑎᓂᒃ ᐃᓵᒃᓯᒪᓂᖅ ᐃᓅᓯᕐᒧᑦ ᐅᑉᓗᖃᖅᑎᑕᐅᑎᓪᓗᒍ ᖃᓄᐃᓕᐅᖅᑎᑕᐅᑎᓪᓗᒋᑦ ᑲᖏᖅᖠᓂᕐᒥ.

ᒍᕇᑦ 5-ᒥ ᐃᓕᓐᓂᐊᖅᑐᑦ ᐃᓅᓯᕐᒧᑦ ᐃᓵᒃᓯᒪᓂᕐᒥᒃ ᑎᑎᕋᐅᔭᖅᑎᑕᐅᑎᓪᓗᒋᑦ ᓵᓚᒃᓴᓚᐅᖅᑐᑦ ᑲᖏᖅᖠᓂᕐᒥ ᓴᐃᒪᓐ ᐊᓚᐃᑦᑐᒃ ᐃᓕᓐᓂᐊᕐᕕᖓᓂᑦ ᐅᑯᐊ, ᓴᐅᒥᐊᓂᑦ, ᓕᓕ ᐊᓘᖅ, ᐃᓕᓴᐱ ᐱᓱᒃ, ᕕᔅᑎᐊ ᓇᑦᓯᒃ, ᑎᓖᓐ ᕗᕆᑦᓚᓐ, ᒪᑲᓐᓯ ᖃᓗᔾᔭᒃ ᐊᒻᒪ ᓴᐃᔅ ᑕᓕᕈᓕᒃ. photo courtesy of Sam Tutanuak

ᑮᓇᐅᔭᑎᒍᑦ ᑕᒪᓐᓇ ᐃᑲᔪᖅᑕᐅᓂᖃᓚᐅᖅᖢᓂ ᓄᓇᕗᒥ ᐃᓅᓯᕐᒧᑦ ᐃᓵᒃᓯᒪᓂᖅ ᑲᑎᒪᔨᖏᓐᓄᑦ ᐊᒻᒪ ᐊᐅᓚᑕᐅᑉᓗᓂ ᑲᒪᒋᔭᐅᑉᓗᓂᓗ ᑲᖏᖅᖠᓂᕐᒥ ᐳᓛᕐᕕᒃ ᖃᑉᓗᑯᓐᓄᑦ.

ᑎᑎᕋᐅᔭᖅᑎᑕᐅᓂᐅᑉ ᓴᓂᐊᒍᑦ, ᐊᒥᓱᒻᒪᕆᐅᑉᓗᑎᒃ ᐊᖕᒪᓗᑉᓗᑎᒃ ᑕᓯᐅᖃᑦᑕᐅᑎᑉᓗᑎᒃ ᐊᕙᓗᓕᐅᓚᐅᖅᖢᑎᒃ ᑲᖏᖅᖠᓂᕐᒥ ᐃᓕᓐᓂᐊᖅᑎᑦ, ᐱᓱᒍᑎᖃᖅᖢᑎᒡᓗ ᐃᓅᓯᕐᒧᑦ ᐃᓵᒃᓯᒪᒋᐊᖃᕐᓂᕐᒧᑦ ᖃᐅᔨᕚᓪᓕᕈᑕᐅᖁᑉᓗᒋᑦ ᑐᓴᖅᑎᑕᐅᖁᑉᓗᒋᑦ ᐊᒻᒪ ᐊᖏᔪᒥᒃ ᓯᓚᒥ ᓂᕆᑎᑕᐅᓕᖅᖢᑎᒃ ᐊᓇᐅᓕᒑᕐᕕᖕᒥ.

ᐅᐃᕆᔭᐅᓯᒪᐅᑎᓂᒃ ᐱᓕᕆᔨ ᐃᒡᒍᕆᑦ ᓘ ᐅᖃᓚᐅᖅᐳᖅ ᑎᑎᕋᐅᔭᖅᑎᑕᐅᔪᑦ ᐃᓕᓐᓂᐊᖅᑎᑦ ᐊᑐᓂ ᑲᖏᖅᖠᓂᕐᒥᑦ ᐱᖓᓱᓂᑦ ᐃᓕᓐᓂᐊᕐᕕᖕᒥ ᐃᓚᐅᓚᐅᖅᐳᑦ: ᓕᐅ ᐅᓴᒃ ᐃᓕᓐᓂᐊᕐᕕᐊᓛᖓ, ᓴᐃᒪᓐ ᐊᓚᐃᑦᑐᒃ ᐃᓕᓐᓂᐊᕐᕕᖓ ᐊᒻᒪ ᒫᓂ ᐅᓗᔪᒃ ᐃᓕᓐᓂᐊᕐᕕᖓ, ᓵᓚᒃᓴᖅᑐᖃᓚᐅᖅᖢᓂ ᐊᑐᓂ ᐃᓕᓐᓂᐊᕐᕕᖕᓂᑦ.

“ᐃᓕᓐᓂᐊᖅᑎᑦ ᑎᑎᕋᐅᔭᖅᑎᑕᐅᓚᐅᖅᑐᑦ ᐅᖃᐅᑎᔭᐅᓚᐅᖅᐳᑦ ᑎᑎᕋᐅᔭᖁᔭᐅᑉᓗᑎᒃ ᒥᖑᐊᖅᓯᒪᔪᓂᒃ, ᓱᓇᒥᒃ ᖁᕕᐊᒋᔭᖃᕐᒪᖔᕐᒥᒃ ᐃᓅᓯᕐᒥᖕᓂ ᖃᓄᕐᓗ ᐃᓵᒃᓯᒪᓂᖅ ᐃᓅᓯᕐᒧᑦ ᑐᑭᖃᖅᑎᒻᒪᖔᒍ,” ᐅᖃᓚᐅᖅᐳᖅ ᓘ.

“ᖁᕕᐊᓱᑦᓯᐊᓚᐅᖅᐳᖓ ᐊᒥᓲᓚᐅᕐᓂᖏᓐᓄᑦ ᑎᑎᕋᐅᔭᖅᑕᐅᔪᑦ ᓵᓚᒃᓴᐅᑎᖃᑦᑕᐅᑎᖃᑕᐅᔪᓪᓗ ᐊᒻᒪ ᓄᑕᖃᑦ ᐊᔪᑦᓯᐊᓚᐅᖅᖢᑎᒃ ᖃᓄᖅ ᐃᓱᒪᒋᔭᒥᖕᓂᒃ ᑎᑎᕋᐅᔭᕐᓂᕐᒥᒃ, ᖃᓄᕐᓗ ᐃᓵᒃᓯᒪᓂᖃᕐᓂᖅ ᐃᓅᓯᕐᒧᑦ ᑐᑭᖃᕐᓂᖓᓄᑦ.

“ᑕᓪᓕᒪᓂᒃ ᓵᓚᒃᓴᖅᑐᖃᓚᐅᖅᐳᖅ ᒫᓂ ᐅᓗᔪᒃ ᐃᓕᓐᓂᐊᕐᕕᖓᓂ, 12 ᓴᐃᒪᓐ ᐊᓚᐃᑦᑐᑦ ᐃᓕᓐᓂᐊᕐᕕᖓᓂᑦ (ᒪᕐᕉᒃ ᐊᑐᓂ ᐃᓕᓐᓂᐊᕐᕕᖕᓄᑦ ᐊᕕᒃᑐᖅᓯᒪᔪᓄᑦ) ᐊᑕᐅᓯᖅ ᑕᒪᒃᑯᓄᖓ ᐊᑐᓂ ᐃᓕᓐᓂᐊᖅᑎᓄᑦ ᐃᓚᐅᓚᐅᖅᑐᓄᑦ ᓕᐅ ᐅᓴᒃ ᐃᓕᓐᓂᐊᕐᕕᐊᓛᖓᓂ.”

ᓘ ᐅᖃᓚᐅᖅᖢᓂ ᑕᐃᒪᓐᓇ ᓵᓚᒃᓴᐅᑎᖃᖅᑎᑕᐅᓚᐅᖅᐳᑦ ᐃᖅᑲᐅᒪᖁᔭᐅᑉᓗᑎᒃ ᑕᒪᕐᒥᒡᓗ ᐃᓄᐃᑦ ᐃᖅᑲᐅᒪᖁᑉᓗᒋᑦ ᑕᑯᒃᐸᑕ ᑎᑎᕋᐅᔭᖅᓯᒪᔪᓂᒃ ᐃᓅᓯᖅ ᐃᑉᓕᕐᓇᕐᓂᖓᓄᑦ.

ᐅᖃᓚᐅᖅᖢᓂᓗ ᐃᑲᔪᕐᓂᖃᕆᑉᓗᓂᓗ ᐃᖅᑲᐃᑎᑕᐅᖁᑉᓗᒋᑦ ᐃᓄᐃᑦ ᑕᒪᕐᒥᒃ, ᓄᓇᓕᐅᑉᓗᑎᒃ, ᐃᑲᔪᖅᑎᒌᒋᐊᖃᕐᒪᑕ.

“ ᑕᐃᒪᓐᓇ ᐃᓚᒌᖏᒃᑲᓗᐊᖅᑎᓪᓗᑕ ᖃᓄᑐᐃᓐᓇᖅ ᐊᐅᖃᑎᒌᖏᑦᖢᑕᓗ, ᐃᓚᒌᒃᐳᒍᑦ ᓄᓇᓕᖕᓂᒥᐅᖃᑎᒌᒃᖢᑕ,” ᐅᖃᓚᐅᖅᐳᖅ.

“ᑲᒪᒋᖃᑦᑕᐅᑎᒋᐊᖃᖅᐳᒍᑦ ᐃᓕᓐᓂᐊᕐᕕᖕᒥ ᐊᖏᕐᕋᑉᑎᓐᓂ ᐱᓕᕆᕕᑉᑎᓐᓂ ᐊᒻᒪ ᓯᓚᑎᒥᐅᑕᕗᑦ ᐃᑲᔪᖃᑦᑕᕐᓗᒋᑦ ᓄᓇᑉᑎᓐᓂᓗᒃᑖᖅ.

“ᓄᑕᖃᑦ ᖁᕕᐊᓱᑦᓯᐊᓚᐅᖅᐳᑦ ᐅᖃᓪᓚᖃᑎᒋᔭᐅᔪᓐᓇᕆᐊᒃᓴᖅ ᐃᓅᓯᖅ ᐊᒃᓱᕈᕐᓇᓕᕌᖓᑦ, ᐊᓂᒍᕈᑎᒍᓐᓇᖅᐳᒍᑦ ᐃᑲᔪᖅᑎᒌᒡᓗᑕ.”