Skip to content

ᐱᔭᐅᔪᒪᓂᐅᔪᒥ ᓱᓕᓕᖅᑎᑦᑎᓚᐅᖅᐳᖅ

ᓴᓪᓕᑦ ᓂᓪᓕᐊᕈᓘᔭᓚᐅᖅᐳᑦ ᐱᓇᓱᐊᕈᓯᐅᓚᐅᖅᑐᒥ ᑲᑎᙵᓂᐅᔪᓂ ᑕᓪᓕᒪᓂ ᐊᖑᓇᓱᒃᑎᓂᑦ ᑐᑰᑦᑎᓚᐅᖅᑎᓪᓗᒋᑦ 27-ᓂ ᐃᓯᒐᓪᓗᐊᓂ ᑕᑭᓂᓕᖕᒥ ᐊᕐᕕᖕᒥ.

ᐱᔭᐅᔪᒪᓂᐅᔪᒥ ᓱᓕᓕᖅᑎᑦᑎᓚᐅᖅᐳᖅ,” ᐅᖃᓚᐅᖅᐳᖅ ᐃᐊᕆᓐ ᐃᒥᒃᑕᐅᑦ, ᐊᐅᓚᑦᑎᓚᐅᖅᑐᒥ ᐊᖑᓇᓱᖕᓂᐅᔪᒥ.

20 ᒥᓂᑦᓂ ᐊᒃᓱᕈᖅᖢᑎᒃ, ᑕᓪᓕᒪᐅᔪᑦ ᐊᖑᓇᓱᒃᑏᑦ ᓯᒡᔭᒧᐊᕈᔾᔨᓚᐅᖅᐳᑦ 27-ᓪ ᐃᓯᒐᓪᓗᐊᓂ ᑕᑭᓂᓕᖕᒥ ᐊᕐᕕᖕᒥ.

ᐃᒥᒃᑕᐅᑦ ᐊᒻᒪ ᑲᑎᙵᓂᕆᔭᖏᑦ ᒍᕋᒡ ᓂᖏᐅᑦᓯᐊᖅ, ᑖᓯ ᓇᑯᓛᒃ, ᒨ ᓴᕕᐊᕐᔪᒃ ᐊᒻᒪ ᔅᐸᓐᓱᕐ ᓴᕕᐊᕐᔪᒃ ᐱᓕᕆᓯᒪᓚᐅᖅᐳᑦ ᐅᐱᕐᙶᓕᒫᒥ ᐱᓇᓱᐊᕐᓂᕐᒧᑦ ᐊᑕᐅᓯᕐᒥ ᐊᖏᔪᒻᒪᕆᐊᓗᖕᒥ ᐆᒪᔪᒥᑦ.

ᐃᒥᒃᑕᐅᑦ ᐅᖃᓚᐅᖅᐳᖅ ᑲᑎᓪᓗᒍ 9-ᓂ ᐅᑎᖅᑕᕐᓂᖃᓚᐅᖅᐳᑦ Ruin ᓄᕗᐊᓄᑦ, ᐱᖅᑯᓯᑐᖃᖅᑎᒍᑦ ᑲᑎᖅᓱᐃᕕᐅᔪᖅ ᐊᕐᕕᓂᑦ ᓇᓂᔭᐅᕙᖕᓂᖏᓐᓂ ᐅᐱᕐᙶᒃᑯᑦ, ᓇᓂᓯᔪᓐᓇᑕᐃᓐᓇᓚᐅᕐᓂᖏᓐᓂ ᓈᒻᒪᑦᑎᐊᖅᑐᒥ ᖃᓄᐃᓐᓂᐅᔪᓄᑦ ᐱᓂᖏᓐᓄᑦ.

ᐊᐅᓪᓛᑐᐊᕌᖓᑦᑕ, ᑕᑯᕙᒃᖢᑕ ᐊᕐᕕᓂᑦ ᐊᒻᒪ ᐱᓇᓱᐊᖅᐸᒃᖢᑕ. ᐃᓕᑦᑎᓂᐅᓪᓗᓂ ᐊᑐᕐᓂᐅᓚᐅᖅᐳᖅ,” ᐅᖃᓚᐅᖅᐳᖅ ᐃᒥᒃᑕᐅᑦ.

8-ᖑᔪᓂ ᐱᓕᕆᑦᑎᐊᙱᓐᓂᐅᔪᓂ ᕿᓂᖅᓴᕐᓂᐅᔪᓄᑦ ᐊᐅᓪᓛᕐᓂᕐᓂ ᐊᒻᒪ ᑲᖑᕋᓱᐊᕐᓂᐅᔪᒥ ᑎᑭᑉᐸᓪᓕᐊᓪᓗᓂ, ᑲᑎᙵᓂᐅᔪᑦ ᐃᓱᒪᓕᐅᕆᓚᐅᖅᐳᑦ ᓄᖅᑲᖓᓚᐅᑲᖕᓂᖏᓐᓂ ᐃᓚᒥᓐᓂ ᐊᐅᓪᓛᖅᓯᒪᖃᑎᖃᕐᓂᕐᒧᑦ ᓄᓇᒥ. ᑭᓯᐊᓂ, ᔫᓂᐅᑉ ᓄᙳᐊᓂ ᓯᑯᐃᖅᐸᓪᓕᐊᓕᓚᐅᖅᐳᖅ ᓯᒡᔭᒧᑦ ᖃᓂᓐᓂᖅᓴᐅᔪᒧᑦ, ᑐᓂᓯᓪᓗᓂ ᐱᕕᒃᓴᖃᕐᓂᐅᔪᒥ.

ᐃᓱᒪᓚᐅᖅᐳᒍᑦ ᐊᕐᕕᒃ ᐃᒃᑲᓐᓂᖓᓄᐊᕐᓂᐊᕐᓂᖓᓐᓂ ᕿᑭᖅᑕᒥ ᐊᒻᒪ ᐊᓱᐃᓛᒃ ᑕᐃᒪᐃᓚᐅᖅᐳᖅ,” ᐅᖃᓚᐅᖅᐳᖅ ᐃᒥᒃᑕᐅᑦ.

ᐊᖑᑏᑦ ᐃᑲᕐᕋᓄᑦ ᒪᕐᕉᖕᓄᑦ Ruin ᓄᕗᐊᓄᐊᕐᓂᕐᒧᑦ. ᑕᐃᑯᙵᕐᒪᑕ, ᐃᒥᒃᑕᐅᑦ ᑲᑎᖃᑎᖃᓚᐅᖅᐳᖅ ᓂᖏᐅᑦᓯᐊᕐᒥ ᐊᑕᐅᓯᕐᒥ 18-ᓂ ᐃᓯᒐᓪᓗᐊᒥ ᑕᑭᓂᓕᖕᒥ ᓴᕕᕋᔭᖕᒧᑦ ᐅᒥᐊᕐᒧᑦ ᐊᐃᑉᐸᖏᑦ ᐱᖓᓲᔪᑦ ᐊᓯᐊᓄᐊᖅᖢᑎ.

ᐊᑯᓂᐅᓗᐊᙱᑦᑐᒥ ᑕᑯᓚᐅᖅᐳᑦ ᐊᕐᕕᖕᒥ. ᕿᓂᓐᓂᖓᓂ ᓈᒻᒪᒃᓯᖕᒪᑕ, ᓂᖏᐅᑦᓯᐊᖅ ᑲᐱᒋᐊᖅᓯᓚᐅᖅᐳᖅ ᐅᓈᕐᒧᑦ ᐃᓗᐊᓄᕐᔪᐊᖅ ᒪᒃᑕᖓᓄᑦ ᓯᕗᓪᓕᖅᐹᖓᓂ ᐱᓇᓱᐊᕐᓂᐅᔪᒥ.

ᑖᓯ ᐊᖁᑎᐅᓚᐅᖅᐳᖅ ᐊᓯᐊᓂ ᐅᒥᐊᕐᒥ, ᐅᖃᐅᑎᓪᓗᒍ ᖃᓂᒡᓕᒃᑲᓐᓂᕆᐊᕋᓱᐊᖁᓪᓗᒍ ᑲᐱᒋᐊᒃᑲᓐᓂᕐᓂᕐᒧᑦ ᐅᓈᕐᒧᑦ. ᐊᕐᕕᒃ ᖃᓂᒡᓕᔭᐅᓕᕐᒪᑦ – ᐆᒻᒪᕆᒃᑑᓚᐅᖅᐳᖅ – ᓴᖑᕕᐅᓪᓗᑎᒃ ᐊᒻᒪ ᐅᐸᒃᑐᓕᖅᖢᓂ ᐅᒥᐊᕐᒧᖔᖅ. ᑕᐃᒪᐃᓐᓂᖓᓂ ᐃᒋᖦᖢᓂᐅᒃ ᐅᓈᖅ ᐊᒻᒪ ᑲᐱᓪᓗᓂᐅᒃ ᐊᒻᒪ ᐊᕐᕕᒃ ᖄᖅᑯᑦᑎᒐᓚᓚᐅᖅᐳᖅ ᐅᒥᐊᕐᒧᑦ,” ᐅᓂᒃᑳᓚᐅᖅᐳᖅ ᐃᒥᒃᑕᐅᑦ. “ᑖᓯ ᓱᒃᑲᓴᕆᐊᓪᓚᒃᖢᓂ ᐊᒻᒪ ᓈᒻᒪᖅᑯᑦᑎᐊᖅᑐᒥ ᕿᒪᐃᓚᐅᖅᐳᖅ. ᐊᓂᖅᓴ ᑭᙳᒃᑕᐅᓚᐅᙱᓚᑦ.”

ᐅᓈᒧᑦ ᑲᐱᔭᐅᓯᒪᓕᕋᓗᐊᕋᒥ, ᐊᕐᕕᒃ ᓱᓕ ᐅᓇᑕᐃᓐᓇᓚᐅᖅᐳᖅ ᑕᐃᒫᒃ ᐃᒥᒃᑕᐅᑦ ᑎᓕᐅᕆᓪᓗᓂ ᐊᖑᑎᓂᑦ ᖁᑭᖅᓴᕐᓂᕐᒧᑦ ᐊᕐᕕᖕᒥ ᖁᑭᐅᑎᒥᓄᑦ. ᖁᑭᖅᑕᐅᓪᓗᓂ ᖃᔅᓯᐊᕐᔪᐸᓗᖕᓂ ᐊᒻᒪ ᓱᒃᑲᐃᒡᓕᒋᐊᓚᐅᖅᐳᖅ. 20 ᒥᓂᑦᐸᓗᖕᓂ ᐅᓇᑕᕐᓂᖓᓂ ᐊᖑᓇᓱᖕᓂᖅ ᐃᓱᓕᑕᐃᓐᓇᖅᑰᔨᓚᐅᖅᐳᖅ. ᑭᓯᐊᓂ ᐊᖑᑏᑦ ᑎᒍᓯᖕᒪᑕ ᐊᒃᖢᓈᓂ ᓄᓱᒃᑕᐅᓂᐊᕐᓂᕐᒧᑦ ᖃᒧᑎᖓᓐᓄᑦ, ᐊᕐᕕᒃ ᐊᐅᓚᔾᔭᓚᐅᖅᐳᖅ.

ᐊᐱᕆᓪᓗᒍ ᒍᕋᒡ ᐅᒥᐊᕐᒥ ᐅᑎᒧᑦ ᐃᖏᕐᕋᓯᖁᓪᓗᒍ ᐊᒻᒪ ᑎᒍᓪᓗᒍ ᐅᓈᖅ ᐊᒻᒪ ᑲᐱᓪᓗᒍ ᑕᓕᕈᖓᑕ ᑐᓄᐊᒍᑦ,” ᐅᖃᓚᐅᖅᐳᖅ ᐃᒥᒃᑕᐅᑦ. “ᐴᕋᒥ ᐊᒻᒪ ᐆᒻᒪᑎᖓᓄᐊᖅᖢᓂ ᐊᒻᒪ ᐊᓱᐃᓛᒃ ᐳᒃᑕᓗᐊᑐᐃᓐᓇᓕᖅᖢᓂ.”

ᐊᕐᕕᒃ ᓄᓱᒃᑕᐅᒐᒥ ᓯᒡᔭᒧᑦ, ᐊᖑᑎᑦ ᖃᐃᖁᔨᓪᓗᑎᒃ ᓄᓇᓕᖕᒥᐅᓂ ᐃᑲᔪᕈᐊᖅᑐᖁᔨᓪᓗᑎᒃ ᓴᓇᒃᓴᖅᑕᐅᔭᖅᑐᕐᓗᓂ. ᖃᔅᓯᐊᕐᔪᖕᓂ ᐃᑲᕐᕋᓂ 50-ᓂ ᐃᓄᖕᓂ ᓴᓇᒃᓴᓚᐅᖅᐳᑦ ᐊᕐᕕᖕᒥ ᐊᒻᒪ ᑲᑎᖅᓱᐃᓪᓗᑎᒃ ᓂᕿᖓᓐᓂ, ᐅᖅᓱᖓᓂ ᐊᒻᒪ ᒪᒃᑕᖓᓂ, ᑕᒪᕐᒥᑦ ᑐᓂᐅᖅᑲᖅᑕᐅᓪᓗᑎᒃ ᓄᓇᓕᖕᒥ.

ᐊᒥᐊᒃᑯᑐᐊᖑᓚᐅᖅᑐᖅ ᓂᐊᖁᖓᑕ ᓴᐅᓂᖓ. ᕿᒪᑐᐃᓐᓇᓚᐅᖅᑕᕗᑦ ᓯᒡᔭᒥ ᑭᖑᒃᐸᓄᑦ ᓂᕆᔭᐅᓂᐊᕐᒪᑦ.”