Skip to content

ᐱᔭᕆᐊᑐᔪᖅ ᐃᖕᒥᒃᑯᑦ ᐱᓕᕆᔪᒪᓂᖃᕐᓂᐊᕐᓗᓂ; ᒫᓐᓇᓕ ᐃᓄᐃᑦ ᐊᑉᖁᑎᓕᐅᕈᒪᓕᖅᑐᑦ ᑭᕙᓪᓕᐅᑉ ᓯᓚᑖᓄᑦ

ᓄᓇᕗᑦ ᐅᑉᓗᖓ ᒪᕐᕉᖕᓂᒃ ᑕᖅᑮᖕᓂᒃ ᐅᖓᓯᖕᓂᖃᖅᑎᓪᓗᒍ, ᑕᒡᕙᓂ ᐱᓇᓱᐊᕈᓯᕐᒥ ᓇᓪᓕᐅᓐᓂᖅᓯᐅᕐᓂᖃᖅᑐᒍᑦ ᐃᒻᒪᖄ ᐱᒻᒪᕆᐅᓂᖅᓴᒃᑯᑦ ᓄᓇᕗᒥ.
ᐊᐃᕆᓕ 1-ᒥ, ᐊᕙᑎᓂᒃ ᐅᑭᐅᓂᒃ ᓇᓪᓕᐅᓐᓂᖅᓯᐅᕐᓂᖃᕐᓂᐊᖅᑐᒍᑦ ᐃᓄᒃ ᓄᓇᕗᒥ ᓄᓇᖃᓕᓚᐅᖅᑎᓪᓗᒍ.
ᐊᕙᑎᑦ ᐅᑭᐅᑦ ᐱᐊᓂᒃᓯᒪᓕᖅᑐᑦ, ᕆᑦᓱᑦ ᑎᒃᑕᖅ ᐅᖃᐅᔾᔨᓚᐅᖅᑎᓪᓗᒍ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᓐᓄᑦ ᐅᔾᔨᕈᓱᓕᓚᐅᕐᓂᕐᒥᓂᒃ ᖃᓄᐃᑦᑐᖃᕐᓂᐊᕐᓂᖓᓄᑦ ᑕᐃᑲᓂ ᐅᓐᓅᔪᒥᒃ, ᑲᖏᖅᖠᓂᕐᒥᐅᑦ ᓯᑭᑑᖅᑐᕋᐅᖅᑎᓪᓗᒋᑦ ᒪᓕᑲᑕᒍᑎᑉᓗᑎᒃ ᖁᕕᐊᓲᑎᖃᕐᓂᕐᒧᑦ ᓄᓇᕗᑖᕐᓂᐊᓕᕐᓂᕐᒧᑦ ᖃᐅᒃᐸᑦ.
"ᐃᒃᐱᒍᓱᓕᓚᐅᖅᑐᖓ ᐅᓐᓄᒃ ᓇᖕᒥᓂᖅ ᐊᐅᓚᑦᑎᔪᓐᓇᖅᓯᑕᐃᓐᓇᕐᓂᐊᓕᕐᓂᑉᑎᓐᓄᑦ," ᑕᐃᒪᓐᓇ ᐅᖃᖅᖢᓂ ᑎᒃᑕᖅ.
"ᓇᖕᒥᓂᖅ ᓂᐱᖃᕐᓂᐊᓕᖅᑐᒍᑦ, ᐃᓄᖁᑎᑉᑕ ᓂᐱᖏᓐᓂᒃ."
ᐃᓕᖅᑯᓯᑐᖃᑎᒍᑦ ᐱᙳᐊᕐᓂᖃᓚᐅᖅᑐᑦ, ᓂᕆᕕᒡᔪᐊᖅᖢᑎᒃ ᐊᒻᒪᓗ ᓯᑭᑑᒃᑯᑦ ᓇᒃᑭᓴᐅᔾᔪᐊᖅᖢᑎᒃ ᓴᓪᓕᓂ. ᖃᐅᒪᔪᑯᓗᖕᓂᒡᓗ ᓯᓚᑐᐃᓐᓇᒃᑯᑦ ᖄᖅᑎᑦᑎᕙᒃᖢᑎᒃ ᐃᒡᓗᓕᒑᕐᔪᖕᒥ.
ᓇᐅᔮᓂ, ᓯᑭᑑᖅᑐᑦ ᒪᓕᒍᑎᓚᐅᖅᑐᑦ ᑕᒪᓐᓇ ᐱᒋᐊᕈᑎᒋᑉᓗᒍ ᖁᕕᐊᓱᖃᑎᒌᒃᑐᒃᑯᑦ.
ᑎᑭᕋᕐᔪᐊᕐᒥ ᖁᕕᐊᓱᖃᑎᒌᒃᖢᑎᒃ, ᐊᕐᕕᐊᓂ ᐊᐅᓚᖁᑎᒥᒃ ᓴᖅᑭᑎᑦᑎᓚᐅᖅᑐᑦ ᐊᒻᒪᓗ ᓂᕈᐊᖅᖠᖅᖢᑎᒃ ᐊᖑᒻᒥᒃ ᐊᕐᓇᕐᒥᒡᓗ ᓄᓇᕗᑦ ᐅᑉᓗᖓᓂᒃ ᐅᑉᓗᖃᖅᑎᑕᐅᔫᖕᓂᒃ. ᖃᒪᓂ'ᑐᐊᕐᒥ ᐱᙳᐊᖅᑎᑦᑎᓚᐅᖅᑐᑦ ᓄᑕᖅᑲᓂᒃ ᐊᒻᒪᓗ ᖃᐅᒪᔪᑯᓗᖕᓂᒃ ᓯᓚᑐᐃᓐᓇᒃᑯᑦ ᖄᖅᑎᑦᑎᕙᒃᖢᑎᒃ.
ᑕᐃᒪᓗ ᒪᒃᑯᒃᑐᖅ ᐋᓕᔅ ᐊᐃᖏᓪᓖᒃ ᐅᖃᐅᔾᔨᑉᓗᓂ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᓐᓄᑦ ᑖᒻᓇᒎᖅ ᐅᑉᓗᖅ ᐃᖅᑲᐅᒪᐃᓐᓇᖃᑦᑕᕐᓂᐊᓕᖅᑕᓂ.
"ᖁᕕᐊᓱᒃᑐᖓ ᓄᓇᒋᓕᕋᑉᑎᒍᑦ," ᑕᐃᒪᓐᓇ ᐅᖃᖅᖢᓂ.
ᑕᒪᑐᒪ ᐱᒻᒪᕆᐅᓂᖓ ᐊᖏᔪᒻᒪᕆᐊᓗᒃ, ᓄᓇᕗᒥᑐᐃᓐᓇᐅᙱᑦᑐᖅ ᑭᓯᐊᓂᓕ ᑲᓇᑕᓗᒃᑖᒥ.
ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᓕᐊᖅ ᐊᖏᓂᖅᐹᖑᔪᖅ ᓄᓇᑖᕈᑕᐅᓯᒪᔪᒃᑯᑦ ᐊᖏᕈᑎᓕᐊᖑᓯᒪᔪᓂᒃ ᓄᓇᕋᖅᑳᖅᓯᒪᔪᓄᑦ ᑲᓇᑕᒥ, ᐊᒥᓲᓂᖅᐹᖑᑉᓗᑎᒃ ᓄᓇᑖᖃᑕᐅᓯᒪᔪᑦ.
ᓄᓇᖃᖅᑳᖅᑐᑦ ᑲᓇᑕᒥ ᒪᑭᑉᐸᓪᓕᐊᓕᖅᑎᓪᓗᒋᑦ ᐊᒻᒪᓗ ᖃᓄᐃᓕᐅᕐᓂᐊᕐᓂᕋᓚᐅᖅᓯᒪᔪᓂᒃ ᐱᓕᕆᑎᑦᑎᓯᒪᓕᖅᑎᓪᓗᒋᑦ ᐊᒻᒪᓗ ᒐᕙᒪᑐᖃᒃᑯᑦ ᐱᓕᕆᐊᒃᓴᖏᓐᓂᒃ ᐱᓕᕆᑎᑦᑎᓯᒪᓕᖅᑎᓪᓗᒋᑦ, ᑕᒪᓐᓇ ᐃᓱᒪᒋᑉᓗᒍ ᓇᖕᒥᓂᖅ ᐊᐅᓚᑦᑎᔪᓐᓇᖅᓯᓂᖅ ᐱᒻᒪᕆᐅᒃᑲᓐᓂᓚᐅᖅᑐᖅ.
ᖃᑉᓯᑲᓪᓚᑦ ᐃᓄᐃᑦ – ᓲᕐᓗ ᔮᓐ ᐊᒪᕈᐊᓕᒃ, ᐃᐅᕆᒃ ᑕᒍᕐᓈᖅ, ᐲᑕ ᐃᑎᓐᓄᐊᖅ, ᔨᐱᑎ ᓄᙵᖅ ᐊᒻᒪᓗ ᐊᒥᓱᒃᑲᓐᓃᑦ – ᐱᓕᕆᕐᔪᐊᓚᐅᖅᓯᒪᔪᑦ ᐊᒥᓱᓂᒃ ᐅᑭᐅᓂᒃ ᐋᖅᑭᒃᓱᐃᕙᓪᓕᐊᑉᓗᑎᒃ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᒥᒃ.
ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᑦ ᐅᖃᖃᑎᖃᕈᓐᓇᓚᐅᙱᑎᓪᓗᒋᑦ ᐲᑕ ᐃᕐᓂᕐᒥᒃ ᑐᓴᒐᒃᓴᖅ ᓴᖅᑭᓐᓂᐊᓕᖅᑎᓪᓗᒍ, ᓄᓇᕗᒥ ᑐᒡᓕᕆᔭᐅᓚᐅᖅᑐᖅ ᑲᒥᓯᓇᐅᔪᓂᒃ, ᐲᑕ ᐃᕐᓂᖅ ᐅᖃᐅᔾᔨᓚᐅᖅᑐᖅ ᓄᓇᕗᒥ ᑐᓴᒐᒃᓴᓕᕆᔨᒃᑯᓐᓂᒃ ᐊᕙᑎᒡᒎᖅ ᐅᑭᐅᑦ ᖄᖏᓵᖅᑐᑦ ᑕᐅᑐᒃᑕᖏᑦ ᑲᔪᓯᓂᖃᑦᑎᐊᖅᓯᒪᓂᖏᓐᓄᑦ.
"ᐃᓕᓐᓂᐊᕌᓂᒃᓯᒪᔪᓕᒃ ᖁᓕᓂᒃ ᐊᒥᓱᒃᑲᓐᓂᕐᓂᒡᓗ ᐃᓄᖕᓂᒃ ᐃᖅᑲᖅᑐᐃᕝᕕᒃᑯᑦ ᒪᓕᒐᓕᕆᔨᐅᔪᓐᓇᖅᓯᔪᓂᒃ. ᐃᓕᓐᓂᐊᕌᓂᒃᓯᒪᔪᖃᓕᖅᑐᕐᓗ ᐊᒥᓱᒃᑲᓐᓂᕐᓂᒃ ᐋᓐᓂᐊᖃᕐᓇᙱᑦᑐᓕᕆᔨᓂᒃ ᐃᓄᖕᓂᒃ, ᓲᕐᓗ ᓇᔭᙳᐊᓂᒃ. ᐃᓕᓐᓂᐊᕌᓂᒃᓯᒪᔪᖃᓕᖅᖢᓂᓗ ᒪᒃᑯᒃᑐᑯᓗᖕᒥᒃ ᐃᓄᖕᒥᒃ ᐱᓚᒃᑐᐃᔨᒥᒃ ᐃᒡᓗᓕᒑᕐᔪᖕᒥᐅᑕᒃᓴᔭᒥᒃ," ᑕᐃᒪᓐᓇ ᐅᖃᖅᖢᓂ.
"ᑕᒪᓐᓇ ᐱᐊᓂᒃᓯᒪᔪᖅ ᐱᒻᒪᕆᐊᓗᒃ ᓄᓇᕗᑦ ᒫᓐᓇᓵᖑᓯᒪᔪᖅ ᓴᖅᑭᓚᐅᖅᑎᓪᓗᒍ."
ᓯᕗᒻᒧᑦ ᑕᐅᑐᖕᓂᖅ, ᖃᑉᓯᑲᓪᓚᑦ ᑭᕙᓪᓕᕐᒥᐅᑕᑦ ᑕᐃᓯᓚᐅᖅᑐᑦ ᐊᑕᐅᓯᕐᒥᒃ ᐱᓕᕆᐊᖑᖁᔭᒥᓂᒃ ᐱᐊᓂᒃᑕᐅᖁᔭᒥᓂᒃ ᐊᕙᑎᓂᒃ ᐅᑭᐅᓂᒃ ᖃᐃᔪᓂᒃ: ᐊᑉᖁᑎᓕᐅᖅᑕᐅᖁᔨᔪᑦ ᒪᓂᑑᐸᒥ ᑭᕙᓪᓕᕐᒧᑦ.
"ᑖᒻᓇ ᐊᑕᐅᓯᖅ ᐱᓕᕆᐊᒃᓴᖅ ᑐᕌᖅᑕᐅᓇᓱᒋᐊᓕᒃ," ᑕᐃᒪᓐᓇ ᐅᖃᖅᖢᓂ ᐅᓇᐃᓐᓄᒃ ᓗᕇᓐ ᖃᑉᓗᐃᑦᑐᖅ. "ᓂᕿᑦ ᐊᑭᑭᓪᓕᒋᐊᕋᔭᓪᓚᕆᒃᑐᑦ ᐊᒻᒪᓗ ᐊᑐᕆᐊᖃᖅᐸᒃᑕᖅᐳᑦ. ᒪᑐᐃᖓᑎᑦᑎᓇᔭᖅᑐᕐᓗ Hᐊᓚᑏᕆᐊᖅᑐᕈᒪᕙᒃᑐᓄᑦ ᑕᒫᓂᕐᒥᐅᑕᓄᑦ.
"Hᐊᓚᑏᕆᐊᖅᑐᕋᔪᙱᒻᒪᑕ ᐃᓄᐃᑦ ᑎᖕᒥᓲᒃᑰᕈᑎᒃᓴᑦ ᐊᑭᑐᓗᐊᖃᑦᑕᕐᓂᖏᓐᓄᑦ."
ᐊᓕᒃᔅ ᑐᓈᓛᖅ ᐃᓱᒪᒋᔭᖃᓚᐅᖅᖢᓂ ᐊᒃᑐᐊᔾᔪᑎᓂᖅ ᐅᑭᐅᒃᑯᑦ ᐊᑉᖁᑎᐅᔪᓐᓇᕐᒪᑦ.
ᐊᕐᕌᓂ, ᒐᕙᒪᑐᖃᒃᑯᑦ ᐋᒃᑳᓚᐅᕐᒪᑕ ᑐᒃᓯᕋᐅᑕᐅᓯᒪᔪᒥᒃ ᐱᕙᓪᓕᐊᑎᑦᑎᔪᒪᓂᕐᒧᑦ ᐊᑉᖁᑎᒃᓴᒥᒃ ᒪᓂᑑᐸᒥ ᑭᕙᓪᓕᕐᒧᑦ, ᑭᓯᐊᓂ ᑕᒪᓐᓇ ᐅᖃᖃᑎᒌᒍᑕᐅᙱᓐᓇᕐᒪᑦ ᐊᒥᓱᓂᒃ ᐅᑭᐅᓂᒃ ᐊᒻᒪᓗ ᑕᐃᒪᐅᔪᖅ ᓱᓕ ᐅᖃᐅᓯᐅᓂᖓ.