Skip to content

ᐱᖓᓱᑦ ᐱᓕᕆᐊᖑᔪᓂ ᑐᕌᖅᐸᓪᓕᐊᕗᑦ ᑲᓇᑕᓕᒫᒥ ᓵᓚᖃᕋᓱᐊᕐᓂᐅᔪᓄᑦ

ᐸᖅᑭᔨᐅᔪᖅ ᔭᓐ-ᕗᕌᓐᓱᐊ ᓚᑑᐅᕐ, ᓴᐅᒥᖕᒥ, ᐊᒻᒪ ᕿᑭᖅᑖᓗᖕᒥ ᑲᐅᔨᓴᕐᓂᕐᒧᑦ-ᑕᑯᒃᓴᐅᑎᑦᑎᓂᐅᔪᒥ ᓵᓚᒃᓴᖅᑏᑦ ᓖᓇ ᓴᐅᓐ, ᕉᓴᓕ ᑎᒪᐃᔪ. ᐊᓖᓴ ᓕᐳᑦ ᐊᒻᒪ ᐱᓇᓗᐱ ᐋᒻᔅᑐᕌᖕ ᖁᕕᐊᑉᐳᑦ ᖃᓄᐃᓐᓂᐊᕐᓂᖏᓐᓄᑦ – ᐱᓕᕆᐊᕆᔭᖏᑦ ᑭᒡᒐᖅᑐᐃᓂᐊᖅᐳᑦ ᐊᕕᒃᑐᖅᓯᒪᓂᐅᔪᒥ ᑲᓇᑕᓕᒫᒥ ᖃᐅᔨᓴᕐᓂᕐᒧᑦ ᑕᑯᒃᓴᐅᑎᑕᐅᓂᐅᔪᒥ ᒪᐃᒥ.

ᖁᔭᓐᓇᒦᒃ ᐃᖏᕐᕋᓂᐅᔪᒧᑦ ᓴᖅᑭᑎᑦᑎᒃᑲᓐᓂᕐᓂᐅᔪᒥ ᖃᐅᔨᓴᕐᓂᕐᒧᑦ ᑕᑯᒃᓴᐅᑎᑕᐅᓂᐅᔪᓂ ᐊᕕᒃᑐᖅᓯᒪᓂᐅᔪᓄᑦ, ᐱᖓᓱᑦ ᐃᓄᒃᓱᖕᒥ ᖁᑦᑎᒃᑐᒥ ᐃᓕᓐᓂᐊᕐᕕᖓᓂ ᐃᓕᓐᓂᐊᖅᑏᑦ ᑭᒡᒐᖅᑐᐃᓂᐊᖅᐳᑦ ᕿᑭᖅᑖᓗᖕᒥ ᑲᓇᑕᓕᒫᒥ ᖃᐅᔨᓴᕐᓂᕐᒧᑦ ᑕᑯᒃᓴᐅᑎᑕᐅᓂᐅᔪᒥ ᒪᐃᒥ, ᐱᕈᖅᑎᑦᑎᔪᓐᓇᕐᓂᐊᕈᑎᒃ $10,000-ᓂ.

ᑲᓇᑕᒥ ᑕᑯᒃᓴᐅᑎᑕᐅᓂᐅᔪᖅ ᐱᓕᕆᐊᖑᓂᐊᖅᐳᖅ ᕗᕋᑐᕆᒃᑎᓐ, ᓂᐅ ᐳᕋᓐᔅᐅᐃᒃᒥ ᒪᐃ 15-ᒥ 17-ᒧᑦ.

ᐃᓕᓴᐃᔨ ᓯᑏᕝ ᐸᓂ ᖃᐅᔨᓴᕐᓂᕐᒧᑦ ᑕᑯᒃᓴᐅᑎᑦᑎᓂᐅᔪᓂ ᐅᑎᖅᑎᑦᑎᓚᐅᖅᐳᖅ ᐃᓄᒃᓱᒃ ᖁᑦᑎᒃᑐᒧᑦ ᐃᓕᓐᓂᐊᕐᕕᖕᒧᑦ ᐊᕐᕌᒍᑦ ᑎᓴᒪᐅᓕᖅᑐᓂ ᐊᒻᒪ, ᐊᓯᖏᓐᓂ ᐃᑲᔪᖅᑕᐅᓪᓗᓂ ᓄᑖᖑᔪᒥ-ᓴᓇᔭᐅᓯᒪᔪᒥ ᕿᑭᖅᑖᓗᖕᒥ ᖃᐅᔨᓴᕐᓂᕐᒧᑦ ᑕᑯᒃᓴᐅᑎᑦᑎᓂᐅᔪᒥ ᑲᑐᔾᔨᖃᑎᒡᒋᖑᔪᓄᑦ, ᐱᒋᐊᓚᐅᖅᐳᑦ ᐊᕕᒃᑐᖅᓯᒪᓂᐅᔪᒥ ᑕᑯᒃᓴᐅᑎᑦᑎᓂᐅᔪᒥ. ᑲᖏᖅᖢᒑᐱᖕᒥᐅᑕᖅ ᐅᐊᐃᓐ ᕌᐱᓐᓯᓐ ᐊᒻᒪ ᕈᕼᐋᓐ ᕼᐋᓕᖕᔅᕗᑦ ᐊᒻᒪ ᐃᖃᓗᖕᓂ ᑖᕋ ᕚᓐᑎᕕᐅᕐ ᐊᒻᒪ ᕆᒃ ᐋᒻᔅᑐᕌᖕ ᐃᓚᒋᔭᐅᒋᕗᑦ ᑲᑐᔾᔨᖃᑎᒌᖑᔪᒥ.

" 35-ᓂ ᐱᓕᕆᐊᖑᔪᓂ ᐅᖓᑖᓂ ᖃᐅᔨᓴᖅᑕᐅᓚᐅᖅᐳᑦ ᓯᕗᓪᓕᖅᐹᖑᔪᒥ ᖃᐅᔨᓴᕐᓂᕐᒧᑦ ᑕᑯᒃᓴᐅᑎᑕᐅᓂᐅᔪᒥ ᐊᕐᕌᒍᑦ ᖁᓕᓂᑦ ᐅᖓᑖᓂ. ᓄᑕᖅᑲᐃᑦ ᐱᔪᒪᑦᑎᐊᓚᐅᖅᐳᑦ. ᑲᒪᓇᑦᑎᐊᓚᐅᖅᐳᖅ ᖄᖏᖅᓯᓪᓗᓂ ᐃᓕᓐᓂᐊᕐᕕᐊᕈᓯᕐᓂ ᐸᕐᓇᒃᐸᓪᓕᐊᑎᓪᓗᒋᑦ ᖃᓄᐃᓕᐅᕐᓂᐅᔪᒧᑦ," ᐅᖃᓚᐅᖅᐳᖅ ᕌᐱᓐᓯᓐ ᐊᕕᒃᑐᖅᓯᒪᓂᐅᔪᒧᑦ ᑕᑯᒃᓴᐅᑎᑕᐅᓂᐅᔪᒧᑦ ᕙᐃᔅᐳᒃᑯᑦ ᒪᒃᐱᖅᑐᒐᖓᓐᓂ.

"6-ᓂ ᐱᓕᕆᐊᖅᑕᖃᓚᐅᖅᐳᖅ, ᐱᖓᓱᑦ ᐃᖃᓗᖕᓂ ᐊᒻᒪ ᐱᖓᓱᑦ ᑲᖏᖅᖢᒑᐱᖕᒥ," ᐅᖃᓚᐅᖅᐳᖅ ᐸᓂ. "ᓂᕆᐅᒃᐳᒍᑦ ᐅᓄᖅᓯᒋᐊᓛᕐᓂᖓᓂ ᐅᓄᕐᓂᐅᔪᓂᑦ ᓱᒃᑲᓂᖅᓴᐅᔪᒥ. ᑭᓯᐊᓂ ᓯᕗᓪᓕᖅᐸᕆᓪᓗᑎᒍᑦ ᐊᕐᕌᒎᓚᐅᖅᐳᖅ. ᓯᕗᓪᓕᖅᐹᖑᓚᐅᖅᐳᖅ ᐊᕕᒃᑐᖅᓯᒪᓂᐅᔪᒥ ᑕᑯᒃᓴᐅᑎᑕᐅᓂᐅᔪᖅ ᐱᓕᕆᐊᖑᓂᖓᓂ ᑕᐃᒪᙵᓂ 2002-ᒥ."

ᖃᐅᔨᓴᖅᑎᐅᔪᓂ ᑐᓂᔭᐅᓚᐅᖅᐳᑦ ᐅᖃᓪᓚᓚᐅᖅᑕ ᖃᐅᔨᓴᕐᓂᕐᒥ, ᖃᐅᔨᓴᕐᓂᕐᒧᑦ ᑲᑐᔾᔨᖃᑎᒌᖑᔪᓄᑦ ᖃᐅᔨᓴᕐᓂᕐᒧᑦ ᐃᓴᒃᓯᒪᓂᖃᓲᓂᑦ ᒪᒃᑯᒃᑐᓄᑦ ᑲᓇᑕᓕᒫᒥ. ᐸᓂ ᐊᑐᓚᐅᖅᐳᖅ ᐆᒥᖓ ᐱᔨᑦᑎᕋᕐᓂᐅᔪᒥ ᑭᕙᓪᓕᕐᒥ ᐊᕕᒃᑐᖅᓯᒪᓂᐅᔪᒧᑦ ᐃᓚᐅᖃᑕᐅᖃᑦᑕᖅᑎᓪᓗᒍ ᖃᐅᔨᓴᕐᓂᕐᒧᑦ ᑕᑯᒃᓴᐅᑎᑕᐅᓂᐅᔪᓂ ᑕᐅᕙᓂ.

ᐱᖓᓱᓂ ᐃᖃᓗᖕᓂ ᐱᓕᕆᐊᖑᔪᑦ ᓵᓚᖃᓚᐅᖅᐳᑦ ᐱᖓᓱᓂ ᖁᑦᑎᓛᖑᔪᓂ ᐃᓂᐅᔪᓄᑦ: ᐊᓖᓴ ᓕᐳᑦ ᐱᓚᐅᖅᐳᖅ ᓯᕗᓪᓕᖅᐸᐅᔪᒥ ᐃᓂᐅᔪᒥ ᐱᓕᕆᓂᖃᖅᐸ ᐅᑯᓇᓂ ᐃᖃᓗᖕᓂ ᓯᓚᒥᒃ ᖃᐅᔨᓴᕐᓂᕐᒥᒃ ᖃᓄᐃᑉᐸᓚᐅᕐᓂᖓᓂ ᐊᒻᒪ ᑲᓇᑕᒥ CO2 ᐊᓂᐊᕙᓪᓕᐊᓂᐅᔪᓄᑦ, ᐱᓇᓗᐱ ᐋᒻᔅᑐᕌᖕ ᒪᕐᕈᒋᔭᐅᓚᐅᖅᐳᖅ ᑭᓱᖃᖅᐸ ᐃᒪᐃᑦ?, ᐊᒻᒪ ᓖᓇ ᓴᐅᓐ ᐊᒻᒪ ᐱᓕᕆᖃᑎᖓ ᕉᓴᓕ ᑎᒪᐃᔪ ᐱᖓᔪᒋᔭᐅᓚᐅᖅᐳᑦ ᐃᖃᓗᐃᑦ ᐃᒪᖓᓐᓂ.

ᑲᖏᖅᖢᒑᐱᖕᒥᐅᑕᖅ ᓂᑮᑕ ᕼᐊᐃᓐᓅ ᐱᓚᐅᖅᐳᖅ ᑎᐊᑦ ᕌᔾᔪᕐᔅ ᓄᑖᓂᒃ ᓴᖅᑭᑦᑎᓂᕐᒧᑦ ᐊᓯᔾᔨᕈᑕᐅᓂᐊᖅᑐᓄᑦ ᓵᓚᖃᐅᓯᐊᒥᒃ ᐱᓕᕆᐊᕆᔭᖓᓄᑦ ᓯᕿᓂᕐᒧᑦ ᐅᖃᓘᑎᕋᓛᒧᑦ ᓄᒃᑭᒃᓴᐅᑎᖓᓄᑦ.

ᐊᑐᓂ ᑲᓇᑕᒥᐅᑕᕐᒥ ᐊᕕᒃᑐᖅᓯᒪᓂᐅᔪᒥ ᓇᒃᓯᐅᔾᔨᑐᐃᓐᓇᕈᓐᓇᖅᐳᑦ ᐱᖓᓱᓂ ᐃᓚᐅᔪᒃᓴᐅᑕᐅᔪᓂ ᑐᙵᕕᖃᖅᑐᓂ ᖁᑦᑎᖕᓂᓕᖕᓄᑦ 7-ᒥ 12-ᒧᑦ ᐃᓕᓐᓂᐊᕐᕕᖏᑕ ᐅᓄᒋᐊᖕᓂᐅᔪᓄᑦ.

"ᐱᓕᕆᓚᐅᖅᐳᖓ ᐅᓪᓗᓂ-7-ᓂ ᐆᒃᑐᕋᐃᓂᐅᔪᓂ ᖃᐅᔨᓴᐃᓪᓗᖓ ᐃᒥᖅᑕᓕᒫᓐᓂᑦ ᐱᓇᓱᐊᕈᓯᐅᔪᒥ. ᖃᐅᔨᓴᓚᐅᖅᐳᖓ ᑎᓴᒪᓂ ᐃᓚᒋᔭᐅᔪᓄᑦᐆᑕᕐᓇᖅᑐᓂᒃ ᐆᒃᑐᕋᐅᑎᒥᒃ, ᓄᖑᓴᐃᔪᓐᓇᕐᓂᖓᓂ, ᐃᒥᑦᑎᐊᕙᙳᖅᑎᑦᑎᔾᔪᑎᒥᒃ ᐊᒻᒪ ᑎᓯᓂᖓᓂ," ᐅᖃᓚᐅᖅᐳᖅ ᐋᒻᔅᑐᕌᖕ.

"ᐱᓕᕆᓚᐅᖅᐸᕋ ᑐᑭᓯᐅᒪᒐᒪ ᐊᑦᑕᓇᙱᑦᑐᒥ ᐃᒪᕐᒥ ᐱᒻᒪᕆᐅᓂᖓᓂ ᐊᑦᑕᓇᙱᑦᑐᒧᑦ ᓄᓇᓕᐅᔪᒧᑦ. ᑕᑯᔪᒪᓚᐅᖅᐳᖓ ᐃᒪᕋ ᑭᐅᒪᓂᖓᓂ ᒐᕙᒪᒃᑯᓐᓄᑦ ᐊᑐᒐᒃᓴᓂ ᐋᖅᑭᒃᑕᐅᓯᒪᓂᖏᓐᓂ, ᐊᒻᒪ ᑭᒡᓕᐅᔪᑦ ᒪᓕᒃᑐᓂ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐊᒻᒪ ᐃᓂᖓᓂ."

ᐋᒻᔅᑐᕌᖕ ᓇᓂᓯᓚᐅᖅᐳᖅ ᐃᒪᓕᒫᑦ ᑭᐅᒪᓂᖏᓐᓂ ᒐᕙᒪᒃᑯᓐᓄᑦ ᐊᑐᒐᒃᓴᓂ ᐋᖅᑭᒃᑕᐅᓯᒪᓂᖏᓐᓂ.

"ᐳᐃᔾᔪᕋᕐᕕᓕᐊᓚᐅᖅᐳᖓ, ᐃᒡᓗᓐᓄᐊᓚᐅᖅᐳᖓ, ᐱᖃᓐᓇᕆᔭᒪ ᐃᒡᓗᖓᓄᑦ, ᐊᔾᔨᒌᙱᑦᑐᓄᑦ ᐃᓂᐅᔪᓄᑦ ᐃᓕᓐᓂᐊᕐᕕᖕᒥ. ᑕᒪᐃᑎᒍᑦ, ᐃᒪᖅᐳᑦ ᐊᓯᔾᔨᕐᓂᖃᓚᐅᙱᓚᑦ, ᐊᓯᔾᔨᕐᓂᖃᓚᐅᖅᐳᖅ, ᑭᓯᐊᓂ ᑕᐃᒪᐃᖏᓐᓇᒐᓚᓚᐅᖅᐳᖅ," ᐅᖃᓚᐅᖅᐳᖅ.

"ᑕᒪᓐᓇ ᑐᑭᖃᖅᐳᖅ ᐃᒪᕐᒧᑦ ᓴᓗᒻᒪᖅᓴᐃᕝᕕᕗᑦ ᐱᓕᕆᑦᑎᐊᖅᑐᒻᒪᕆᐅᕗᖅ."

ᓴᐅᓐ ᐊᒻᒪ ᑎᒪᐃᔪ, ᖃᐅᔨᔪᒪᓚᐅᖅᐳᑦ ᑎᓯᓂᖓᓂ ᑭᒡᓕᐅᔪᓄᑦ ᐃᖃᓗᖕᓂ ᐃᒪᖓᓐᓂ, ᐳᔪᕐᓗᒃ ᑭᒡᓕᐅᔪᓂ, ᐊᒻᒪᓗᑦᑕᐅᖅ ᓄᖑᓴᐃᔪᓐᓇᕐᓂᖓᓂ ᐊᒻᒪ ᐆᑕᕐᓇᕐᓂᖓᓗ. ᐃᒥᖅᑕᓚᐅᖅᐳᑦ Frobisher ᐃᒪᖓᓐᓂ, ᐃᒥᖅᑕᖅᖢᑎᒃ ᐃᒪᕐᒥ ᐊᖏᕐᕋᒥ, ᐃᒥᖅᑕᐅᒻᒥ ᐃᒪᕐᒥ, ᐊᒻᒪ ᐃᓕᓐᓂᐊᕐᕕᐅᑉ ᐃᒥᕐᕕᖏᓐᓂ.

"ᓇᓂᓯᓚᐅᖅᐳᒍᑦ ᑎᓯᓂᐅᔪᓂ ᑭᒡᓕᐅᔪᑦ ᖁᑦᑎᕐᔪᐊᓚᐅᖅᐳᑦ ᐃᒥᖅᑕᐅᒻᒧᑦ ᐃᒪᖓᓐᓂ ᐊᒻᒪ ᐃᓕᓐᓂᐊᕐᕕᐅᑉ ᐃᒥᕐᕕᖏᓐᓂᑦ. ᐃᓚᖏᑦ ᖃᐅᔨᓴᕐᓂᐅᔪᑦ ᐱᓕᕆᔪᓐᓇᓚᐅᙱᓚᑦ ᐃᓚᖏᓐᓄᑦ ᐃᒪᐅᔪᓄᑦ, ᐊᒻᒪ ᐅᒃᐱᕈᓱᒃᐳᖓ ᐱᔾᔪᑎᖃᕐᓂᖓᓂ ᐊᔾᔨᒌᙱᑦᑐᓄᑦ ᐃᓚᐅᕈᑎᒃᓴᓄᑦ ᐃᒪᐅᑉ ᐃᓗᐊᓃᑦᑐᓄᑦ ᑲᑎᖃᑎᒋᓚᐅᖅᑕᖏᓐᓂ, ᐱᑎᑦᑎᔪᒥᒃ ᓇᓗᓇᐃᖅᓯᓯᒪᙱᑦᑐᒥ," ᐅᖃᓚᐅᖅᐳᖅ ᓴᐅᓐ.

ᑎᓯᓂᖓ, ᐅᓂᒃᑳᖅᐳᖅ ᓴᐅᓐ, ᐱᔾᔪᑎᖃᖅᐳᖅ ᑎᒥᐅᑉ ᓴᐅᓂᓕᐅᕈᑎᖓᓂ ᐊᒻᒪ magnesium ᑭᒡᓕᐅᔪᓂ ᐃᒪᕐᒥ.

"ᑎᓯᕐᔪᐊᕈᓂ ᐃᒪᐅᓗᓂ ᐊᒻᒪ ᐆᓇᖅᓯᑎᒃᑯᕕᐅᒃ, ᓱᓪᓗᑯᑖᖕᓂ ᓯᒥᒃᓯᕐᔪᐊᕈᓐᓇᖅᐳᑦ ᐊᒻᒪ ᐃᒡᓗᒥᐅᑕᓄᑦ...ᐊᒻᒪ ᐊᑦᑎᒃᓯᒋᐊᖅᑎᑦᑎᓗᓂ ᐊᑑᑎᖃᑦᑎᐊᕐᓂᖏᓐᓂ ᐊᒻᒪ ᕿᓚᒻᒥᐅᓂᖅᓴᒥ ᓱᕋᖕᓂᐊᖅᐳᑦ," ᐅᖃᓚᐅᖅᐳᖅ ᓴᐅᓐ, ᖁᑦᑎᖕᓂᓕᖕᒥ 9-ᒥ ᐃᓕᓐᓂᐊᖅᑎᐅᔪᖅ.

ᔭᓐ-ᕗᕌᓐᓱᐊ ᓚᑑᐅᕐ, ᐊᑕᐅᓯᐅᓗᓂ ᒪᕐᕉᖕᓂ ᐃᓐᓇᐅᖃᑕᐅᓂᐊᖅᑐᓄᑦ ᒪᓕᖕᓂᐊᖅᑐᓂ ᐃᓕᓐᓂᐊᖅᑎᓂᑦ ᑲᓇᑕᒧᑦ ᑕᑯᒃᓴᐅᑎᑕᐅᓂᐅᔪᒥ, ᐅᓂᒃᑳᓚᐅᖅᐳᖅ ᓕᐳᑦ ᐱᓕᕆᐊᖓᓂ, ᕿᒥᕐᕈᓇᓚᐅᖅᑐᒥ ᖃᓄᖅ CO2 ᐊᓂᐊᕙᓪᓕᐊᓂᐅᔪᓄᑦ ᑲᓇᑕᒥ ᐊᒃᑐᐃᕙᖕᓂᖓᓂ ᓯᓚᒥᑦ ᓄᓇᕗᒻᒥ.

"ᐱᓕᕆᓂᖓᓂ, ᖃᐅᔨᓴᕐᓂᐅᓚᐅᖅᐳᖅ, ᐊᒻᒪ ᑲᑎᖅᓱᐃᓚᐅᖅᐳᖅ ᑎᑎᕋᖅᓯᒪᔪᓂ ᖃᐅᔨᓴᖅᑕᐅᓂᑯᓂ ᐊᒥᓱᓂ, ᐊᒥᓱᓄᑦ ᐊᕐᕌᒍᓄᑦ ᐊᒻᒪ ᖃᐅᔨᓴᕈᑎᒋᓪᓗᓂᒋᑦ, ᐊᒻᒪ ᐃᓱᓕᑦᑎᓂᖃᖅᖢᓂ ᐊᒃᑐᐃᓂᖃᕐᓂᖓᓂ," ᐅᖃᓚᐅᖅᐳᖅ.

ᐃᒪᖅ ᐱᓕᕆᓂᐅᓚᐅᖅᐳᖅ ᑕᒪᑐᒪᓂ ᐊᕐᕌᒎᔪᒥ ᑲᓇᑕᓕᒫᒧᑦ ᖃᐅᔨᓴᕐᓂᕐᒧᑦ ᑕᑯᒃᓴᐅᑎᑕᐅᓂᐅᔪᒥ. ᐃᖃᓗᐃᑦ ᐊᑐᕐᓂᖃᕐᓂᖓᓂ ᐃᒪᕐᒧᑦ ᐊᑲᐅᙱᓕᐅᕈᑕᐅᔪᓂᑦ ᓈᒻᒪᖅᑯᑎᓯᒪᑐᐃᓐᓇᖅᐳᖅ.

ᑮᓇᐅᔭᓕᐅᕋᓱᐊᕐᓂᕐᒧᑦ, GoFundMe ᒪᒃᐱᖅᑐᒐᕐᒥ ᐱᒋᐊᖅᑕᐅᔪᖃᓚᐅᖅᐳᖅ. ᒫᓐᓇᐅᔪᒥ, $10,000,-ᒧᑦ $1,100 -ᓂ ᐱᕈᖅᓴᐃᓯᒪᕗᑦ. ᐸᓂ ᐅᖃᓚᐅᖅᐳᖅ ᑮᓇᐅᔭᓂ ᑐᒃᓯᕋᑲᑕᖕᓂᐊᖅᐳᖅ ᑎᑭᑉᐸᓪᓕᐊᔪᓄᑦ ᐱᓇᓱᐊᕈᓯᐅᔪᓂᑦ.