ᐊᒥᓱᑦ ᐊᕐᓇᓂ ᐊᐱᖅᓱᖅᑕᐅᔪᓄᑦ ᓄᑖᖑᔪᒥ ᐸᐅᒃᑑᑎᑦ ᐅᓂᒃᑳᓕᐊᖑᔪᒥ ᐅᖃᐅᓯᖃᓚᐅᖅᐳᑦ ᓈᒻᒪᒍᓱᖕᓂᖏᓐᓂ ᐅᔭᕋᖕᓂᐊᕐᓂᕐᒧᑦ ᐃᖅᑲᓇᐃᔮᕆᔭᒥᓂᑦ, ᑭᓯᐊᓂ ᐱᔪᒪᓂᖅᑕᖃᖅᐳᖅ ᓇᓕᒧᑦᑐᒥ ᐊᑭᓕᖅᓱᖅᑕᐅᓂᕐᒥ ᐊᒻᒪᓗ ᓴᐳᔾᔨᓯᒪᒃᑲᓐᓂᕐᓂᐅᔪᒥ ᖁᓄᔪᓐᓂᐊᕐᓂᕐᒧᑦ.
25-ᓂ ᒪᒃᐱᖅᑐᒐᓕᖕᒥ ᐅᓂᒃᑳᓕᐊᖅ ᐃᓱᓕᑦᑎᕗᖅ ᑕᓪᓕᒪᓂ ᖃᐃᖁᔨᓂᐅᔪᓂ ᖃᓄᐃᓕᐅᖁᔨᓂᕐᒧᑦ: ᐃᖅᑲᓇᐃᔭᖅᑎᑦᑎᒃᑲᓐᓂᕐᓂᕐᒥ ᐅᓄᕐᓂᖅᓴᓂ ᐃᓄᖕᓂ ᐊᕐᓇᓂ ᑲᒪᔨᐅᓂᕐᒧᑦ, ᐊᐅᓚᑦᑎᔨᐅᓂᕐᒧᑦ, ᐊᒻᒪ ᐃᖅᑲᓇᐃᔭᖅᑐᓕᕆᔨᒃᑯᓐᓂ ᐃᓂᐅᔪᓄᑦ; ᐋᖅᑭᒋᐊᖅᓯᓂᕐᒥ ᐊᑐᐊᒐᓂ ᐊᒻᒪᓗ ᐊᑐᖅᑕᐅᕙᒃᑐᓂ ᖁᓂᔪᓐᓂᐊᕐᓂᕐᒧᑦ ᐊᒻᒪ ᐋᓐᓂᖅᓯᕆᓂᐅᔪᒥ;
-ᑐᓂᓯᓂᕐᒥ ᐃᖅᑲᓇᐃᔭᖅᑎᓄᑦ ᐱᓕᒻᒪᒃᓴᐃᓂᐅᔪᒥ ᑕᒪᒃᑭᓂ ᐆᒻᒪᕆᒃᑐᒥ ᐊᒻᒪ ᐊᑑᑎᓕᖕᒥ; ᐱᐅᓯᒋᐊᖅᑎᑦᑎᓂᕐᒥ ᐃᓅᖃᑎᒌᖑᔪᒧᑦ, ᐃᓕᖅᑯᓯᒧᑦ ᐊᒻᒪ ᐃᓱᒪᒃᑯᑦ ᐃᑲᔪᖅᓱᐃᓂᐅᔪᒥ ᐱᔨᑦᑎᕋᕐᓂᐅᔪᒥ ᐃᖅᑲᓇᐃᔭᕐᕕᖕᒥ; ᓇᓗᓇᐃᖅᓯᓂᕐᒥ ᐱᕋᔭᒃᑐᓂ ᑎᒍᒥᐊᖅᑕᐅᓂᖏᓐᓂ ᐸᓯᔭᒃᓴᐅᓂᖏᓐᓂ ᐊᒻᒪᓗ ᓵᙵᓗᑎᒃ ᐱᓪᓚᕆᐅᔪᒥ ᖃᓄᐃᓕᐅᖅᑕᐅᓂᐅᔪᒥ, ᑕᒪᒃᑭᑦ ᐃᓗᐊᓂ ᑲᒻᐸᓂᐅᔪᒥ ᐊᒻᒪᓗ ᓄᓇᓕᖕᒥ.
ᖃᐅᔨᓴᖅᑕᐅᓂᐅᔪᒥ ᐅᑯᓂᖓ ᐊᑲᐅᙱᓕᐅᕈᑕᐅᔪᓄᑦ ᑐᙵᕕᖃᖅᐳᖅ ᐊᐱᖅᓱᖅᑕᐅᓂᐅᔪᓂ 29–ᓂ ᐃᓄᖕᓂ ᐊᕐᓇᓂ ᐊᕐᕕᐊᓂ, ᖃᒪᓂᑦᑐᐊᖅ, ᓴᓪᓗᐃᑦ (ᓄᓇᕕᒃ) ᐊᒻᒪᓗ ᐃᓅᕕᒃ (ᓄᓇᑦᓯᐊᖅ). ᐅᓄᕐᓂᖅᓴᐅᔪᒥ ᓇᑉᐸᓪᓗᐊᖓᓂ ᐊᐱᖅᓱᖅᑕᐅᔪᓄᑦ ᐊᕐᓇᓂ ᐅᖃᖅᐳᑦ ᐊᑐᖅᓯᒪᓂᖏᓐᓂ " ᑕᐃᒪᐃᒐᔪᒃᑐᒥ ᖃᓄᐃᓐᓂᐅᔪᓂ ᖁᓄᔪᓐᓂᐊᕐᓂᕐᒧᑦ ᐸᒡᕕᓵᕆᔭᐅᓂᖏᓐᓂ ᐊᒻᒪ ᐋᓐᓂᖅᓯᕆᓂᐅᔪᒥ ᐃᖅᑲᓇᐃᔭᕐᕕᖕᒥ," ᓲᕐᓗ ᐊᑲᐅᙱᑦᑐᓂ ᐃᔪᕆᓂᐅᔪᒥ, ᐱᔪᒪᔭᐅᙱᑦᑐᓂ ᐊᒃᑐᖅᑕᐅᓂᕐᒧᑦ ᐊᒻᒪ ᐃᓱᒪᒧᑦ ᐋᓐᓂᖅᓯᕆᓂᐅᔪᒥ–ᐃᓛᓐᓂᒃᑯᑦ ᑕᐃᒪᐃᒐᔪᖕᓂᖓᓂ ᐃᖅᑲᓇᐃᔭᕆᐊᕐᓂᓕᒫᖓᓐᓂ. ᓵᙵᓚᐅᖅᑎᓪᓗᒋᑦ ᐅᑯᓂᖓ ᐱᕋᔭᖕᓂᐅᔪᒥ ᖃᓄᐃᓐᓂᐅᔪᓂ, ᐃᓚᖏᑦ ᐊᕐᓇᐃᑦ ᐅᖃᓚᐅᖅᐳᖅ ᓄᖅᑲᓚᐅᖅᐳᑦ ᐃᖅᑲᓇᐃᔮᒥᓂᑦ, ᐃᓚᖏᑦ ᑕᐃᑲᓃᖏᓐᓇᖅᖢᑎᒃ ᑮᓇᐅᔾᔭᒃᓴᔭᕆᐊᖃᕐᒪᑕ ᐊᒻᒪᓗ ᓱᓕ ᐃᓚᖏᑦ ᓇᓗᓇᐃᖅᓯᓚᐅᖅᐳᑦ ᐊᑦᑕᓇᖅᑐᒦᙱᓐᓂᖅᓴᐅᔫᔮᓚᐅᖅᐳᑦ ᐱᕋᔭᒃᑐᖅ ᓴᓂᓕᖓᓂ ᐃᖅᑲᓇᐃᔭᕈᓐᓃᕈᑎᒃ.
"ᐊᕐᓇᐃᑦ ᐊᐱᖅᓱᖅᑕᐅᔪᑦ ᐅᖃᒃᑲᓐᓂᖅᐳᑦ ᖃᐃᖁᔨᓂᐅᔪᒥ ᐱᕙᓪᓕᐊᑎᑕᐅᓂᖓᓂ ᐆᒻᒪᕆᒃᑐᒥ ᐃᖅᑲᓇᐃᔭᕐᕕᐅᔪᒥ ᐊᑐᐊᒐᓂ ᑭᐅᔪᒥ ᐊᕐᓇᐅᓂᖓᓂ ᐊᖑᑕᐅᓂᖓᓂ- ᐊᒻᒪᓗ ᐃᓄᖕᓄᑦ-ᑐᕌᖓᔪᓂ ᐊᒃᑐᐃᓂᐅᔪᓂ ᐱᔾᔪᑎᖃᖅᑐᒥ ᐃᖅᑲᓇᐃᔭᕐᕕᖕᒥ ᖁᓄᔪᓐᓂᐊᕐᓂᐅᔪᒥ ᐊᒻᒪ ᐋᓐᓂᖅᓯᕆᓂᐅᔪᒥ," ᐅᓂᒃᑳᕆᓂᖅ ᐅᖃᖅᓯᒪᕗᖅ "ᓇᓗᓇᐃᖅᓯᒪᔪᓂ ᐊᑐᖅᑕᐅᖁᓇᔭᖅᑕᖏᓐᓂ ᐅᕙᙵᑦ ᖃᐅᔨᓴᖅᑕᐅᓂᐅᔪᒥ ᓇᓗᓇᐃᖅᓯᕗᖅ ᖃᔅᓯᒐᓚᖕᓂ ᐅᖃᑦᑎᐊᖅᓯᒪᔪᒥ ᐸᕐᓇᒍᑕᐅᔪᓂ ᓄᓇᓕᖕᓄᑦ, ᑲᒻᐸᓂᓄᑦ ᐊᒻᒪᓗ ᒐᕙᒪᐅᔪᓂ ᓯᕗᒻᒧᐊᕆᔭᐅᓂᐊᖅᑐᓄᑦ ... ᐊᕐᓇᐃᑦ ᐃᓚᐅᖃᑕᐅᓚᐅᖅᑐᓂ ᖃᐅᔨᓴᖅᑕᐅᓂᐅᔪᒥ ᓇᓗᓇᐃᖅᓯᓚᐅᖅᐳᑦ ᑕᑯᔪᒪᕗᑦ ᐃᓱᒪᓕᐅᕆᓂᐅᔪᒥ ᖃᓄᐃᓕᐅᕐᓂᐅᔪᒥ ᐱᓕᕆᐊᖑᔪᒥ ᐊᐅᓚᑕᐅᓂᐅᔪᓂ ᐅᑭᐅᖅᑕᖅᑐᒥ ᐱᐅᓯᒋᐊᖅᑎᑦᑎᓂᖏᓐᓂ ᐊᑐᖅᑕᐅᓂᑯᓂ ᐃᓄᖕᓂ ᐊᕐᓇᓂ ᐱᓕᕆᔪᓄᑦ ᐃᑲᔪᕈᑎᒃᓴᒥ ᐲᖅᓯᓂᐅᔪᒥ ᐱᓕᕆᓂᕐᔪᐊᖑᔪᒥ."
ᐸᐅᒃᑑᑎᒃᑯᑦ ᐅᓂᒃᑳᓕᐊᖓ ᐊᔭᐅᕆᕗᖅ ᐅᔭᕋᖕᓂᐊᕐᕕᖕᓂ ᑲᒻᐸᓂᓂ ᐱᙱᑎᑦᑎᖃᑦᑎᐊᕐᓂᖓᓂ ᐊᑐᐊᒐᕐᒥ ᑕᐃᒃᑯᓄᖓ ᐸᓯᔭᐅᔪᓄᑦ ᐸᒡᕕᓵᕆᓂᐅᔪᒥ ᐊᓂᑕᐅᓗᑎᒃ ᐊᒻᒪᓗ ᐅᓂᒃᑲᐅᓯᐅᓗᑎᒃ ᖃᓄᐃᓕᐅᕐᓂᖏᓐᓂ ᑲᓇᑕᒥ ᐸᓖᓯᒃᑯᓐᓄᑦ.
ᖃᐅᔨᓴᖅᑕᐅᓂᖅ ᓇᓂᓯᓚᐅᕆᕗᖅ ᐃᓄᐃᑦ ᐊᕐᓇᐃᑦ "ᐃᑲᔪᖅᓱᐃᒐᔪᖕᓂᖏᓐᓂ ᐃᓄᒋᐊᒃᑐᓂ ᐃᒡᓗᒥᐅᑕᐅᖃᑎᒥᓂᑦ" ᑮᓇᐅᔾᔭᒃᓴᓂᐅᔪᓂ ᐊᑦᑎᖕᓂᖅᓴᐅᔪᓂ ᐊᖑᑎᓂᑦ ᐊᒻᒪᓗ ᖃᓪᓗᓈᓂ ᐊᕐᓇᓂᑦ.
ᐸᐅᒃᑑᑎᑦ ᐃᒪᐃᖁᔨᓇᔭᖅᐳᖅ ᐃᖅᑲᓇᐃᔭᖅᑎᑦᑎᒃᑲᓐᓂᕐᓂᕐᒥ ᐅᓄᕐᓂᖅᓴᓂ ᐃᓄᖕᓂ ᐊᕐᓇᓂᑦ ᐃᓂᐅᔪᓂ ᓲᕐᓗ ᐃᖅᑲᓇᐃᔭᖅᑐᓕᕆᓂᕐᒥ, ᐊᐅᓚᑦᑎᓂᐅᔪᓂ ᐊᒻᒪᓗ ᑲᒪᔨᐅᔪᓂ ᐃᓂᐅᔪᓂᑦ. ᐃᒪᐃᖁᔨᓇᔭᕆᕗᑦ ᐱᐅᓯᒋᐊᖅᑎᑦᑎᓂᖓᓂ ᐃᓂᐅᔪᒥ ᐱᔨᑦᑎᕋᕐᓂᐅᔪᒥ ᓲᕐᓗ ᐸᐃᕆᕝᕕᖕᓂ ᑮᓇᐅᔭᓂᒃ ᑭᐳᒃᓯᓂᕐᒥ ᐃᓅᖃᑎᒌᖑᔪᓄᑦ ᐊᑲᐅᙱᓕᐅᕈᑕᐅᔪᓄᑦ ᐊᒻᒪᓗ ᑮᓇᐅᔾᔭᒃᓴᓂᕐᒧᑦ ᓈᒪᙱᓗᐊᕐᓂᐅᔪᒥ ᓵᙵᔭᐅᔪᓄᑦ ᐃᓚᖏᓐᓂ ᐃᓄᖕᓂ ᐊᕐᓇᓂ ᐃᑲᔪᕈᑎᒃᓴᒥ ᐱᓕᕆᓂᕐᔪᐊᖑᔪᒥ.
ᑭᓯᐊᓂ, ᐊᒥᓱᑦ ᐊᐱᖅᓱᖅᑕᐅᓂᐅᔪᒥ ᑭᐅᔨᐅᔪᑦ ᐅᖃᐅᓯᖃᓚᐅᖅᐳᑦ ᐃᒃᐱᒍᓱᖕᓂᐅᔪᒥ ᑎᑭᐅᑎᓯᒪᔪᓐᓇᕐᓂᖏᓐᓂ ᐃᖅᑲᓇᐃᔮᒥᓂᑦ ᐅᔭᕋᖕᓂᐊᕐᓂᕐᒧᑦ ᐱᓕᕆᓂᕐᔪᐊᖑᔪᒥ, ᐱᔪᓐᓇᖅᑎᑦᑎᔪᒥ ᐸᖅᑭᔪᓐᓇᕐᓂᖏᓐᓂ ᐃᓚᖏᓐᓄᑦ.
"ᐅᓂᒃᑳᕆᕗᑦ ᐊᔾᔨᒌᙱᕈᓘᔭᖅᑐᓂ ᐃᒃᐱᒍᓱᖕᓂᐅᔪᒥ ᐃᖅᑲᓇᐃᔭᖅᑎᓪᓗᒋᑦ, ᐱᓗᐊᖅᑐᒥ, ᖁᕕᐊᓱᖕᓂᕐᒥ, ᐅᐱᒍᓱᖕᓂᖏᓐᓂ, ᐊᒻᒪ ᐃᒃᐱᒍᓱᖕᓂᐅᔪᒥ ᓴᙱᓂᐅᔪᒥ ᐊᒻᒪ ᐊᑦᑕᓇᔾᔭᐃᖅᓯᒪᓂᖏᓐᓂ" ᐅᓂᒃᑳᓕᐊᖅ ᐅᖃᖅᐳᖅ.
ᑭᐅᓂᕐᒧᑦ ᐸᐅᒃᑑᑎᒃᑯᑦ ᐅᓂᒃᑳᓕᐊᖓᓂ, ᐊᒡᓂᑯ ᐄᒍᓪ, ᐊᖏᓛᖑᔪᒥ ᐅᔭᕋᖕᓂᐊᕐᓂᕐᒧᑦ ᑲᒻᐸᓂᐅᔪᒥ ᓄᓇᕗᒻᒥ, ᓇᒃᓯᐅᔾᔨᓚᐅᖅᐳᖅ ᓄᓇᕗᒻᒥ ᑐᓴᒐᒃᓴᓕᕆᔨᒃᑯᓐᓄᑦ ᐅᖃᐅᓯᒃᓴᓕᐊᒥ ᓇᓗᓇᐃᖅᓯᔪᒥ ᐊᒃᓱᕈᕐᓂᖏᓐᓂ ᑭᐅᓂᕐᒧᑦ ᐃᓚᖏᓐᓂ ᐊᑲᐅᙱᓕᐅᕈᑕᐅᔪᓂ ᓴᖅᑭᑕᐅᔪᓄᑦ. ᑲᒻᐸᓂᐅᔪᖅ ᐱᙱᑎᑦᑎᖃᑦᑎᐊᕐᓂᖓᓂ ᐊᑐᐊᒐᐅᔪᒥ ᐱᔾᔪᑎᖃᖅᑐᒥ ᐋᓐᓂᖅᓯᕆᓂᐅᔪᒥ, ᐸᒡᕕᓵᕆᓂᐅᔪᒥ ᐊᒻᒪ ᖁᓄᔪᓐᓂᐊᕐᓂᕐᒥ. ᐅᓇ ᐊᑐᐊᒐᖅ ᐊᐅᓚᑕᐅᓲᖑᕗᖅ ᐃᓂᖅᑎᕆᓂᐅᔪᒥ ᖃᓄᐃᓕᐅᕐᓂᐅᔪᓂ ᑐᕌᕈᓐᓇᖅᑐᒥ ᐊᓂᑕᐅᓂᖓᓂ, ᐅᖃᓚᐅᖅᐳᖅ.
ᐊᒡᓂᑯ ᐄᒍᓪ ᐊᑐᓕᓚᐅᖅᐳᖅ ᐊᔾᔨᒌᙱᕈᓘᔭᖅᑐᓄᑦ ᐊᒻᒪᓗ ᐃᓚᐅᑎᑦᑎᓂᐅᔪᒥ ᐊᑐᐊᒐᕐᒥ 2018–ᒥ ᐊᒻᒪᓗ ᐊᑐᓕᖅᑎᑦᑎᓚᐅᖅᐳᖅ ᒪᓕᒋᐊᓕᖕᒥ ᑐᙵᓇᕐᓂᐅᔪᒥ ᐃᖅᑲᓇᐃᔭᕐᕕᖕᒥ ᐱᓕᒻᒪᒃᓴᐃᓂᐅᔪᒥ "ᐋᖅᑭᒃᓯᓂᕐᒧᑦ ᑐᑭᓯᓇᑦᑎᐊᖅᑐᒥ ᓂᕆᐅᒋᔭᐅᓂᐅᔪᓂ" ᖃᓄᖅ ᑕᒪᒃᑭᑦ ᐃᖅᑲᓇᐃᔭᖅᑎᐅᔪᑦ ᐃᒻᒥᖕᓂ ᐱᓕᕆᔭᕆᐊᖃᕐᓂᖏᓐᓂ ᐃᖅᑲᓇᐃᔭᕐᕕᖕᒥ ᐊᒻᒪᓗ ᐃᖅᑲᓇᐃᔭᙱᑎᓪᓗᒋᑦ.
ᑕᒪᒃᑭᑦ ᐅᔭᕋᖕᓂᐊᖅᑎᐅᑉ ᐱᓕᕆᕝᕕᖏᑦ ᑲᑐᔾᔨᖃᑎᒌᖕᓂᕐᒧᑦ ᑲᑎᒪᔨᕋᓛᖑᔪᓂ "ᐊᔾᔨᒌᙱᕈᓘᔭᖅᑐᓂ ᑭᒡᒐᖅᑐᐃᓂᖃᖅᑐᒥ" ᐊᒻᒪᓗ ᐊᓯᖏᓐᓂ ᐱᓕᕆᔾᔪᑕᐅᔪᓂ ᐃᑲᔪᖅᓱᐃᓂᕐᒥ ᐱᐅᔪᒥ ᐃᖅᑲᓇᐃᔮᒧᑦ ᐊᕙᑎᐅᔪᒥ. ᐊᒡᓂᑯ ᐄᒍᓪ ᐅᖃᓚᐅᖅᐳᖅ. ᐱᑕᖃᕆᕗᖅ ᐃᓕᖅᑯᓯᕆᔭᒥ ᐊᓯᐊᓂᒃ ᐅᔾᔨᕈᓱᖕᓂᐅᔪᒥ ᐃᓚᖃᖅᐳᖅ ᓯᕗᓕᖅᑎᐅᓂᕐᒧᑦ ᐱᕙᓪᓕᐊᑎᑕᐅᓂᖓᓂ ᐱᓕᕆᐊᖑᔪᒥ "ᐃᑲᔪᕐᓂᕐᒧᑦ ᑲᒪᔨᐅᔪᓂ ᑐᕌᖅᑎᑦᑎᓂᖏᓐᓂ ᐃᓕᖅᑯᓯᒧᑦ ᐃᒃᐱᒍᓱᑦᑎᐊᕐᓂᐅᔪᒥ ᐱᓕᕆᓂᐅᔪᒥ." ᐅᓇᑦᑕᐅᖅ, ᐃᓚᖃᖅᐳᖅ ᖃᓄᐃᓕᐅᕐᓂᙳᐊᖑᔪᒥ ᑕᑯᒃᓴᐅᑎᑕᐅᔪᒥ ᐃᓕᓐᓂᐊᖅᑎᑦᑎᔪᒥ ᖃᓄᖅ ᑲᒪᒋᔭᕆᐊᖃᕐᓂᕐᒥ ᐃᖅᑲᓇᐃᔭᕐᕕᖕᒥ ᐸᒡᕕᓵᕆᓂᐅᔪᒥ.
ᐊᒻᒪᓗᑦᑕᐅᖅ, ᐃᖅᑲᓇᐃᔭᖅᑐᓕᕆᓂᕐᒧᑦ ᐃᓄᖕᒥ ᐱᓕᕆᔨᑕᖃᖅᐳᖅ ᐊᑐᓂ ᐃᖅᑲᓇᐃᔭᕐᕕᒋᔭᐅᔪᒥ ᐃᑲᔪᖅᓱᐃᓂᕐᒧᑦ ᐃᓄᖕᓂ ᐃᖅᑲᓇᐃᔭᖅᑎᓂ.
ᐱᔾᔪᑎᖃᖅᑐᒥ ᑮᓇᐅᔾᔭᒃᓴᓂᕐᒧᑦ ᐊᑭᖏᓐᓂ, ᐊᒡᓂᑯ ᐄᒍᓪ ᐅᖃᓚᐅᖅᐳᖅ ᐃᓄᐃᑦ ᐊᕐᓇᐃᑦ ᐊᑭᓕᖅᑕᐅᓂᑭᙱᓐᓂᖅᓴᐅᕗᑦ ᖃᓪᓗᓈᖑᔪᓂ ᓴᓇᖃᑎᒥᓂᑦ ᐊᖑᑎᓂᒡᓘᓐᓃᑦ.
ᐅᔾᔨᕆᔭᐅᓚᐅᕆᕗᖅ ᐊᕐᓇᐃᑦ ᐃᖅᑲᓇᐃᔭᖅᐳᑦ 16 ᐳᓴᓐᑎᖓᓂ ᐊᒡᓂᑯ ᐄᒍᓪᑯᑦ ᐃᖅᑲᓇᐃᔭᖅᑎᖁᑎᖏᓐᓂ 2019-ᒥ, ᖁᕝᕙᕆᐊᖅᑐᒥ 4 ᐳᓴᓐᑎᒥ 2009–ᒥ. ᐃᓄᐃᑦ ᐊᕐᓇᐃᑦ ᑭᒡᒐᖅᑐᐃᕗᑦ 8 ᐳᓴᓐᑎᖓᓂ ᑲᑎᓪᓗᒍ ᐃᖅᑲᓇᐃᔭᖅᑎᐅᔪᓄᑦ.
"ᐱᓕᕇᓐᓇᐅᔭᖅᐳᒍᑦ ᒥᒃᖠᒋᐊᖅᑎᑦᑎᓂᕐᒧᑦ ᐱᓕᕆᔾᔪᓯᐅᔪᒥ ᐊᒡᕕᐊᕈᑕᐅᔪᓂ ᐃᓚᐅᑎᑦᑎᓂᕐᒧᑦ ᐊᒻᒪᓗ ᐅᖓᕙᕆᐊᖅᓯᓂᐅᔪᒥ ᐊᕐᓇᓂ ᐅᔭᕋᖕᓂᐊᕐᓂᕐᒧᑦ ᐱᓕᕆᓂᕐᔪᐊᖑᔪᒥ ᑲᓇᑕᒥ, ᐱᓗᐊᖅᑐᒥ ᑕᐅᑐᒃᑕᑐᐊᖃᑲᐃᓐᓇᖅᑐᒥ ᓄᖑᑎᑦᑎᓂᕐᒥ ᐊᒡᕕᐊᕈᑕᐅᔪᓂ ᐊᒃᑐᐃᕙᒃᑐᓂ ᐃᓄᖕᓂ ᐊᕐᓇᓂᑦ ᐃᓂᒋᔭᑦᑎᓐᓂ ᓄᓇᕗᒻᒥ," ᑲᒻᐸᓂ ᑎᑎᕋᓚᐅᖅᐳᖅ.
