Skip to content

ᒎᓗᑎᑖᖅᑎᑕᐅᔪᑦ

ᑲᑎᑦᖢᒋᑦ 9 ᑭᕙᓪᓕᕐᒥ ᐅᓇᑕᖅᑐᒃᓴᖑᐊᓛᑦ, ᑕᓪᓕᒪᑦ ᓇᐅᔮᓂᑦ ᓯᑕᒪᑦ ᑲᖏᖅᖠᓂᕐᒥᑦ, ᐃᓚᐅᓚᐅᖅᐳᑦ ᐃᓕᓐᓂᐊᖅᑎᑕᐅᑉᓗᑎᒃ ᒍᓗᑎᑖᖅᑎᑕᐅᓇᓱᐊᖅᖢᑎᒃ ᒫᓂᑑᐸᒥ ᑕᖅᑭᐅᓚᐅᖅᑐᒥ.

ᔫᓇ ᐊᓚᓂᐊᖅ ᓇᐅᔮᒥᐅᑕᖅ, ᑐᓄᐊᓂ, ᐊᒻᒪ ᓯᐅᕆᓐ ᐸᐅᓗᓯ ᐃᒃᐱᐊᕐᔪᖕᒥᐅᑕᖅ ᐃᓕᓐᓂᐊᖅᑎᑕᐅᒧᑦ ᐃᖏᕐᕋᓂᕐᒥᒃ ᐃᒪᒃᑯᑦ ᐃᓕᓐᓂᐊᖅᑎᑕᐅᑎᓪᓗᒋᑦ ᐅᑉᓗᕆᐊᖅᑖᖅᑎᑕᐅᓂᕐᒧᑦ ᒍᓗᑎᒥᒃ ᒫᓂᑑᐸᒥ ᑕᖅᑭᐅᓚᐅᖅᑐᒥ. photo courtesy of Lloyd Francis

ᐃᓕᓐᓂᐊᖃᑕᐅᓚᐅᖅᑐᑦ ᓴᐅᔮᓂᑦ, ᓵᔾᔭᓐ ᐆᓂ ᐅᓇᒃᓴᔭᒃ, ᓵᔾᔭᓐ ᕌᓐ ᓯᕙᓂᒃᑐᒃ, ᓵᔾᔭᓐ ᓘ ᑯᐸᒃ, ᒫᔅᑐ ᑯᐊᐳᕈ ᔫᓇ ᐊᓚᓂᐊᖅ ᐊᒻᒪ ᒫᔅᑐ ᑯᐊᐳᕈ ᐳᓃᔅ ᑲᐅᓐᓇᒃ, ᑲᖏᖅᖠᓂᕐᒥᐅᑦ ᑭᒡᒐᖅᑐᖅᑕᐅᓚᐅᖅᖢᑎᒃ ᓵᔾᔭᓐ ᓚᒃᓯ ᐊᓇᕈᐊᒃ, ᓵᔾᔭᓐ ᔩᓐ−ᒧᕇ ᐊᐅᒃᑲᐅᑦ, ᒫᔅᑐ ᑯᐊᐳᕈ ᑕᐃᕇᔅ ᓴᒻᒧᖅᑐᖅ ᐊᒻᒪ ᓵᔾᔭᓐ ᐱᓚᑲᑉᓯ ᑕᑎ.

ᑭᕙᓪᓕᕐᒥ ᐅᓇᑕᖅᑐᒃᓴᖑᐊᓛᑦ ᐃᒃᐱᐊᕐᔪᖕᒥᑦ ᐃᓚᓕᐅᑎᔭᐅᓚᐅᕐᒪᑕ ᐊᒻᒪ 7  Morris, Man−ᒥᑦ.

ᓇᐅᔮᓂ ᐅᓇᑕᖅᑐᒃᓴᖑᐊᓛᖅ ᓰᕝ ᕗᐊᕋᓐ ᐋᕕᓱ ᑎᐅᕋᓐᔅ ᒪᑉᓴᓛᒃ ᐱᓕᕆᔨᐅᖃᑕᐅᑉᓗᓂ ᐃᓚᐅᓚᐅᖅᐳᖅ, ᓯᕗᓕᖅᑎᒃᓴᐅᓂᕐᒧᑦ ᐃᓕᓐᓂᐊᒃᑲᓐᓂᓚᐅᖅᖢᓂ ᐊᐅᓚᑦᓯᔨᐅᓂᕐᒧᓪᓗ ᐊᔪᖏᓴᖅᖢᓂ.

ᑖᒃᑯᐊ ᐅᓇᑕᖅᑐᒃᓴᖑᐊᓛᑦ 3055 RCACC ᓇᐅᔮᓂ ᑲᒪᔨᖓᑦ ᑲᑉᑎᓐ ᓗᐃᑦ ᕗᕋᓐᓯᔅ ᐅᖃᓚᐅᖅᐳᖅ ᑕᐃᒪᓐᓇ ᒎᓗᑎᑖᖅᑎᑕᐅᓇᓱᐊᖅᐸᒃᐳᑦ ᑕᐃᒪᓐᓇ ᓯᕗᓕᒃᑎᐅᓂᕐᒧᑦ ᐃᓕᓐᓂᐊᖅᑎᑕᐅᑉᓗᑎᒃ.

ᐅᖃᓚᐅᖅᖢᓂᓗ ᑕᐃᒪᓐᓇ ᐊᑐᓂ ᐅᓇᑕᖅᑐᒃᓴᖑᐊᓛᑦ ᓯᕗᓕᖅᑎᒋᔭᐅᖃᑦᑕᖅᖢᑎᒃ ᐅᑉᓗᑉ ᐃᓚᖓᓂ.

“ᓯᓚᒥᒃ ᐃᖢᐃᖏᔾᔪᑎᖃᓚᐅᖅᐳᒍᑦ, ᒪᖁᖃᑦᑕᓚᐅᕐᒪᑦ, ᐱᒍᒪᔭᖅᐳᑦ ᐃᓚᖏᑦ ᐱᓕᕆᐊᕆᔪᓐᓇᓚᐅᖏᑉᐸᕗᑦ, ᐃᓕᓐᓂᐊᒃᑲᓐᓂᕈᓐᓇᓚᐅᖅᖢᑕ ᖃᔭᕆᐊᖅᑐᕐᓂᕐᒧᑦ, ᐊᒻᒪ ᐱᐊᓂᓚᐅᖅᖢᑕ ᐅᖓᓯᒃᑎᒋᔪᒧᑦ 10 ᑭᓛᒥᑕᓂᒃ ᐱᓱᒃᑎᑕᐅᑉᓗᑕ Mantario Hiking Trail ᐱᓱᒡᕕᒃᑯᑦ ᓄᓇᒥ ᑕᐃᑲᓂ  Whiteshell Provincial Park, ᑕᐃᑲᓂ ᒫᓂᑑᐸ−ᐋᓐᑎᐅᕆᔪᓗ ᑭᒡᓕᖓᓂ,” ᐅᖃᓚᐅᖅᐳᖅ ᕗᕋᐃᓐᓯᔅ.

“ᐅᓇᑕᖅᑐᒃᓴᖑᐊᓛᑦ ᐊᕕᒃᑐᖅᓯᒪᓚᐅᖅᖢᑎᒃ ᒪᕐᕈᐃᓕᖓᑉᓗᑎᒃ ᖁᓕᐅᑉᓗᑎᒃ ᐊᑐᓂ. ᐊᑐᓂ ᐅᓇᑕᖅᑐᒃᓴᖑᐊᓛᑦ ᐃᑲᕋᒧᑦ ᒪᕐᕉᖕᓄᓪᓘᓐᓃᑦ ᑲᒪᔨᐅᑎᑕᐅᖃᑦᑕᓚᐅᖅᖢᑎᒃ ᑕᐃᒪᓐᓇ ᑐᐱᕐᓂᐊᖅᑎᓪᓗᒋᑦ ᑐᐲᔭᕐᓂᐊᖅᑎᓪᓗᒋᓪᓗ, ᐅᑉᓗᕈᒥᑕᓕᐅᕐᓂᐊᖅᑎᓪᓗᒋᑦ ᐅᓐᓄᒍᒥᑕᓕᐅᕐᓂᐊᖅᑎᓪᓗᒋᓪᓗ ᑕᐃᒪᓐᓇ ᓂᕿᒃᓴᕆᔭᐅᔪᑦ ᐊᑐᖅᑕᐅᑉᓗᑎᒃ ᐊᒻᒪ ᓱᐴᔫᓂᒃ ᐃᒐᒍᑎᖃᖅᖢᑎᒃ.

“ᐅᓇᑕᖅᑐᒃᓴᖑᐊᓛᑦ ᓄᓇᖑᐊᓂᒃ ᑕᒻᒪᕇᒃᑯᑎᓂᒡᓗ ᐊᑐᖃᑦᑕᓚᐅᖅᐳᑦ ᐱᓱᖕᓂᕐᒥᖕᓂ, ᑕᐃᒪᓐᓇ ᐊᑐᖅᑕᐅᑦᓯᐊᕈᓐᓇᖅᖢᓂᓗ ᐅᓇᑕᖅᑐᒃᓴᖑᐊᓛᓄᑦ ᑕᒻᒪᕇᒃᑯᑎᓂᒃ ᐊᑐᓚᐅᖅᓯᒪᖏᒃᑲᓗᐊᖅᖢᑎᒃ ᐱᔪᓐᓇᖏᒻᒪᑕ ᐅᑭᐅᖅᑕᖅᑐᒥᑕᐅᓗᐊᕐᓂᑉᑎᓐᓄᑦ.

“ᑕᒪᐃᑎᒍᑦ ᐱᓇᓱᐊᕈᓯᐅᑉ ᓄᖑᐊᓂ ᖁᕕᐊᓇᓚᐅᖅᐳᖅ, ᐅᑉᓗᓗᒃᑖᖅ ᒪᖁᓚᐅᕋᓗᐊᖅᑎᓪᓗᒍ ᐅᑉᓗᒥ ᐊᑕᐅᓯᕐᒥ.”
ᕗᕋᐃᓐᓯᔅ ᐅᖃᓚᐅᖅᐳᖅ ᒎᓗᑎᑖᕋᓱᐊᕐᓂᖅ ᐃᓕᓐᓂᐊᕐᓗᓂ ᐊᓂᒎᑕᐅᕙᒃᐳᖅ ᐃᓚᖏᓪᓗ ᐊᓂᒎᑎᖃᑦᑕᖏᒃᑲᓗᐊᖅᖢᑎᒃ ᐊᑐᖅᑕᐅᖃᑦᑕᖅᖢᓂᓗ ᑕᒪᓐᓇ ᐃᓕᓐᓂᐊᕈᑦ ᐅᑭᐅᑦ ᓯᑕᒪᑦ ᐅᓇᑕᖅᑐᒃᓴᖑᐊᓛᖑᓕᖅᑐᓄᑦ.

ᐅᖃᓚᐅᖅᖢᓂᓗ ᐅᓇᑕᖅᑐᒃᓴᖑᐊᓛᑦ ᐊᓂᒍᐃᒋᐊᖃᕐᒪᑕ ᒎᓗᑎᑖᕋᓱᐊᕐᓂᕐᒧᑦ ᐃᓕᓐᓂᐊᕈᑎᒥᖕᓂᒃ ᐊᓯᖓᓄᑦ ᖁᑦᓯᖕᓂᖅᓴᒧᑦ ᐃᓕᓐᓂᐊᕐᓂᐊᕐᓗᑎᒃ.

“ᑕᒪᕐᒥᓗᒃᑖᖅ ᐊᓂᒍᐃᖃᑦᑕᖅᐳᑦ, ᐊᒃᓱᕈᑐᐊᖅᐸᑕ, ᐊᒻᒪ, ᑕᓯᐅᖅᑕᐅᒋᐊᖃᖅᐸᑕ ᐊᓂᒍᐃᓇᓱᐊᖅᑎᓪᓗᒋᑦ, ᐃᑲᔪᖅᑎᒃᓴᖃᖅᐳᑦ, ᐅᕙᖓᓘᓐᓃᑦ, ᐱᓕᕆᔨᑦ ᐊᓯᖏᓪᓘᓐᓃᑦ ᑕᐃᑲᓂ ᐃᓕᓐᓂᐊᕐᕕᖓᓂ, ᐱᓕᕆᔨᖏᓪᓘᓐᓃᑦ ᐅᓇᑕᖅᑐᒃᓴᖑᐊᓛᖑᖃᑕᐅᑉᓗᑎᒃ.

“ᑕᒪᕐᒥᒃ ᐅᓇᑕᖅᑐᒃᓴᖑᐊᓛᑦ ᐃᓚᐅᓚᐅᖅᑐᑦ ᐃᓕᓐᓂᐊᕐᓂᕐᒧᑦ ᒎᓗᑎᑖᕋᓱᐊᕐᓂᕐᒧᑦ ᐊᓂᒍᐃᓚᐅᖅᐳᑦ.

“ᓇᐅᔮᓂ ᐅᓇᑕᖅᑐᒃᓴᖑᐊᓛᑦ ᖁᕕᐊᓱᑦᓯᐊᓚᐅᖅᐳᑦ ᐃᓕᓐᓂᐊᖃᑕᐅᓂᕐᒧᑦ, ᐊᒻᒪᓗ, ᒪᖁᖃᑦᑕᓚᐅᕐᓂᖓᓄᑦ ᐃᖢᐃᓪᓕᐅᓚᐅᕋᓗᐊᖅᖢᑎᒃ, ᐅᐱᓚᐅᖅᐳᖓ ᖃᓄᑐᐃᓐᓇᖅ ᐊᓂᒍᐃᔪᓐᓇᓚᐅᕐᒪᑕ ᐅᖃᐱᓗᒃᑐᖃᓚᐅᖏᑦᖢᓂᓗ ᒪᖁᖕᓂᖓᓄᑦ.

“ᑕᒪᕐᒥᒃ ᐃᓕᑉᐹᓪᓕᓚᐅᖅᐳᑦ ᐃᓕᓐᓂᐊᖅᑎᑕᐅᑎᓪᓗᒋᑦ ᐊᒻᒪ ᖁᕕᐊᓱᓚᐅᖅᖢᑎᒃ.”