ᓄᓇᕗᒻᒥ ᒐᕙᒪᒃᑯᑦ ᖃᓱᓯᕙᓪᓕᐊᓂᐊᓕᖅᐳᑦ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᓂᐅᔪᓂ ᓄᓇᕗᒻᒥ ᐱᒋᐊᕐᓗᓂ ᐱᓇᓱᐊᕈᓯᐅᓂᐊᖅᑐᒥ.
ᐱᒋᐊᕐᓗᓂ ᔫᓂ 1−ᒥ, ᐸᐃᕆᕝᕖᑦ ᒪᑐᐃᖅᑕᐅᔪᓐᓇᖅᓯᓂᐊᓕᖅᐳᑦ ᐃᖏᕐᕋᓕᕐᓗᑎᒃ. ᓄᓇᕗᒻᒥ ᒥᕐᙳᐃᖅᓯᕐᕖᑦ ᐊᒻᒪ ᓄᓇᓕᖕᓂ ᓯᓚᒥ ᐱᙳᐊᕐᕕᐅᔪᑦ ᒪᑐᐃᖅᑕᐅᒃᑲᓐᓂᕐᓂᐊᓕᖅᐳᑦ, ᐅᖃᓚᐅᖅᐳᖅ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᖓᔪᖅᑳᖓ ᓘᒃᑖᖅ ᒪᐃᑯᓪ ᐹᑐᓴᓐ ᒪᐃ 25−ᒥ ᑐᓴᒐᒃᓴᓕᐊᖑᔪᒥ.
ᓄᓇᕗᒻᒥ ᒥᕐᙳᐃᖅᓯᕐᕖᑦ ᐊᒻᒪ ᓄᓇᓕᖕᓂ ᓯᓚᒥ ᐱᙳᐊᕐᕕᐅᔪᑦ ᒪᑐᐃᕈᓐᓇᕐᓂᐊᖅᐳᑦ “ᓄᓇᓕᖕᓂ ᖃᓄᐃᓐᓂᐅᔪᑦ ᐱᔪᓐᓇᖅᑎᑦᑎᒍᑎᒃ,” ᐅᖃᓚᐅᖅᐳᖅ ᐹᑐᓴᓐ .
ᐃᓄᓕᒫᓄᑦ ᒥᕐᙳᐃᖅᓯᕐᕕᓂ ᐃᒡᓗᖁᑎᖏᑦ ᒪᑐᓯᒪᐃᓐᓇᕐᓂᐊᖅᐳᑦ, ᐅᖃᓚᐅᖅᐳᖅ.
ᐅᓄᕐᓂᖓᓂ ᑭᒡᓕᐅᔪᖅ ᓯᓚᒥ ᑲᑎᓐᓂᐅᔪᓄᑦ ᐊᖏᒡᓕᒋᐊᖅᑕᐅᓂᐊᖅᐳᖅ 25−ᓄᑦ ᐃᓄᖕᓄᑦ. ᐅᓇ ᑐᑭᖃᖅᐳᖅ ᐃᓄᐃᑦ 25−ᓂ ᐊᔾᔨᒌᙱᑦᑐᓂ ᐃᔨᓗᖃᕐᕕᐅᔪᓄᑦ ᑲᑎᖃᑎᒌᒍᓐᓇᕐᓂᐊᖅᐳᑦ ᓯᓚᒥ. ᐊᑐᖁᔭᐅᓂᕐᔪᐊᖅᑕᖃᖅᐳᖅ ᐋᖅᑭᐅᒪᑎᑦᑎᓂᕐᒥ ᐃᒻᒥᖕᓄᑦ ᐅᖓᓯᒌᒋᐊᖃᕐᓂᐅᔪᒥ, ᐅᓂᒃᑳᓚᐅᖅᐳᖅ ᐹᑐᓴᓐ, ᐃᓚᒋᐊᖅᓯᓪᓗᓂ ᐅᓄᖅᓯᒋᐊᖅᑐᖅ ᐊᖏᓂᖓᓂ ᐱᔪᓐᓇᖅᑎᑦᑎᓇᔭᖅᐳᖅ “ᐃᓄᐃᑦ ᐱᕕᒃᓴᖃᖅᑎᑦᑎᕗᖅ ᐃᓅᖃᑎᒌᓂᒃ ᐃᓅᓯᖃᕐᓂᖅᓴᐅᒐᓛᖕᓂᖏᓐᓂ.”
ᐅᑯᐊ ᓇᓗᓇᐃᖅᑕᐅᓯᒪᔪᓂ ᖃᓄᐃᓕᖓᓂᐅᔪᑦ ᓂᕈᐊᖅᑕᐅᓯᒪᕗᑦ ᐱᔾᔪᑎᖃᖅᑐᒥ “ᐊᑦᑎᒃᑐᒥ ᐅᓗᕆᐊᓇᕐᓂᖓᓂ,” ᐅᖃᓚᐅᖅᐳᖅ ᐹᑐᓴᓐ.
ᐊᑐᓂ ᕼᐋᒻᓚᐅᔪᑦ ᓂᕈᐊᕈᓐᓇᖅᐳᑦ ᖃᓱᓯᕚᓪᓕᕆᐊᖅᓯᓂᕐᒧᑦ ᐅᑯᓂᖓ ᑭᒡᓕᖃᖅᑎᑕᐅᓂᐅᔪᓂ ᓄᓇᓕᖓᑕ ᐃᓗᐊᓂ.
ᐃᓚᖏᑦ ᐊᖓᔪᖅᑳᖑᔪᑦ “ᐃᒃᐱᒍᓱᒃᐳᑦ ᓈᒻᒪᙱᓐᓂᖓᓂ ᕿᑐᕐᙵᒥᓂᑦ ᐅᑎᖅᑎᕆᓂᕐᒥ ᐸᐃᕆᕝᕕᐅᔪᓄᑦ ᒫᓐᓇᐅᔪᒥ. ᐊᒻᒪ ᑕᒪᓐᓇ ᖃᓄᐃᙱᓚᖅ,” ᐅᖃᓚᐅᖅᐳᖅ.
“ᑕᒪᑦᑕ ᓇᖕᒥᓂᖅ ᐅᓗᕆᐊᓇᕐᓂᖓᓂ ᖃᐅᔨᓴᐃᓂᖃᕆᐊᖃᖅᐳᒍᑦ ᖄᒃᑲᓐᓂᐊᒍᑦ ᐅᑯᓄᖓ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᓂᐅᔪᓄᑦ.”
ᒫᔾᔨ 20,−ᒥ ᓄᓇᕗᒻᒥ ᒐᕙᒪᒃᑯᑦ ᐅᖃᐅᓯᖃᓚᐅᖅᐳᑦ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑐᐊᕕᕐᓇᕐᓂᖓᓂ ᐊᒻᒪ ᓴᖅᑭᑎᑦᑎᓚᐅᖅᐳᑦ ᐱᓕᕆᓂᐅᔪᓂ ᒥᒃᖠᒋᐊᖅᑎᑦᑎᓂᕐᒧᑦ ᐊᐃᑦᑐᐃᓂᐅᔪᓐᓇᖅᑐᓂ ᓄᕙᒡᔪᐊᕐᓇᖅ-19−ᒥ ᓄᓇᕗᒻᒥ. ᓇᒡᒐᔾᔭᐅᒥ ᑐᓴᒐᒃᓴᓕᐊᖑᔪᒥ, ᓄᓇᕗᒻᒥ ᒐᕙᒪᒃᑯᑦ ᓴᖅᑭᑎᑦᑎᓚᐅᖅᐳᑦ ᑎᑎᖅᑲᖁᑕᐅᔪᒥ ᑕᐃᔭᐅᔪᒥ ᓄᓇᕘᑉ ᐊᖅᑯᑎᖓᓂ, ᐸᕐᓇᐅᑕᐅᓪᓗᓂ ᖃᓱᕚᓪᓕᕐᓂᐅᔪᒥ ᐅᑯᓂᖓ ᑭᒡᓕᖃᖅᑎᑕᐅᓂᐅᔪᓂ.
“ᓈᒻᒪᒃᓯᕗᖅ ᓯᕗᒻᒧᑦ ᐃᖏᕐᕋᓂᕐᒧᑦ. ᐅᓇ ᑐᑭᖃᙱᓚᖅ ᐅᓇ ᐊᒥᓱᓄᑦ ᖃᓂᒻᒪᓐᓇᐅᔪᖅ ᐊᓂᒍᕐᓂᖓᓂ. ᐅᓇ ᑐᑭᖃᙱᓚᖅ ᐅᓗᕆᐊᓇᕐᓂᖓ ᖄᖏᖅᓯᒪᓕᕐᓂᖓᓂ,” ᐅᖃᓚᐅᖅᐳᖅ ᐹᑐᓴᓐ, ᐃᓚᒋᐊᖅᓯᓪᓗᓂ ᓄᓇᕗᒻᒥᐅᑦ ᐋᖅᑭᐅᒪᑎᑦᑏᓐᓇᕆᐊᖃᖅᐳᑦ ᓴᐳᔾᔨᓯᒪᓂᕐᒧᑦ ᐱᓕᕆᓂᐅᔪᓂ ᓲᕐᓗ ᐊᒡᒐᓂᑦ ᐅᐊᓴᐃᖏᓐᓇᕐᓂᕐᒥ ᐊᒻᒪ ᐊᖏᕐᕋᖅᓯᒪᓗᑎᒃ ᖃᓂᒪᒍᑎᒃ.
ᐱᓕᕆᓂᐅᔪᑦ ᑎᑎᕋᖅᓯᒪᔪᓂ ᓄᓇᕘᑉ ᐊᖅᑯᑎᖓᓂ ᐃᓕᓯᒪᓂᖃᖅᐳᑦ ᐱᖓ)ᓂ ᐅᓗᕆᐊᓇᕐᓂᐅᔪᓂ ᐊᕕᒃᓯᒪᓂᐅᔪᓂ: ᐊᑦᑎᒃᑐᖅ, ᕿᑎᖅᐸᓯᐊᓂ ᐊᒻᒪ ᖁᑦᑎᒃᑐᒥ. ᐅᓄᕆᐊᓇᕐᓂᖓᓂ ᑭᒡᓕᐅᔪᖅ ᖃᓄᐃᓕᐅᕐᓂᐅᔪᓄᑦ ᐊᓯᔾᔨᕈᓐᓇᖅᐳᖅ ᖃᖓᒃᑲᓐᓂᖅ ᑐᙵᕕᖃᖅᑐᒥ ᓄᑖᓂ ᐅᖃᐅᓯᒃᓴᓕᐊᓂ ᓄᕙᒡᔪᐊᕐᓇᖅ-19 ᒥᒃᓵᓄᑦ.
ᐊᑦᑎᒃᑐᒥ ᐅᓗᕆᐊᓇᕐᓂᖓᓂ ᐱᓕᕆᓂᐅᔪᑦ ᐃᓚᖃᖅᐳᑦ ᒪᑐᐃᖅᓯᓂᐅᔪᒥ ᐸᐃᕆᕝᕕᖕᓂ, ᒥᕐᙳᐃᖅᓯᕐᕕᖕᓂ, ᓯᓚᒥ ᐱᙳᐊᕐᕕᐅᔪᓄᑦ, ᐃᖅᑲᓇᐃᔭᕐᕕᖕᓂ, ᓂᐅᕕᕐᕕᓂᑦ ᐊᒻᒪ ᓯᓚᒥ ᐅᓪᓗᒃᑯᑦ ᑕᖕᒫᕐᕕᐅᔪᓄᑦ. ᐃᖃᐃᓕᓴᕐᕖᑦ ᐱᔪᓐᓇᖅᑎᑦᑎᔪᓂ ᐃᓄᑑᓗᑎᒃ ᐃᖃᐃᓕᓴᕐᓂᐅᔪᒥ ᐊᒻᒪ ᐳᐃᔾᔪᖃᕐᓂᕐᒥ, ᓄᓇᕘᑉ ᐃᓗᐊᓂ ᐊᐅᓪᓛᕐᓂᐅᔪᒥ ᓄᓇᓕᖕᓄᑦ, ᐳᓚᕋᕐᓂᕐᒥ ᑕᑯᓐᓇᒐᖃᕐᕕᖕᓄᑦ ᐊᒻᒪ ᑕᑯᒃᓴᐅᑎᑕᐅᓂᐅᔪᓂ, ᐅᐸᒃᓯᒪᓗᑎᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᔭᐅᓂᐅᔪᓂ ᐱᔨᑦᑎᕋᕐᓃᑦ ᐊᒻᒪ ᐊᖏᒡᓕᒋᐊᖅᑐᒥ ᐊᖏᓂᖓᓂ ᑭᒡᓕᐅᔪᓄᑦ ᐃᓄᖕᓄᑦ ᑲᑎᖃᑎᒌᒃᑐᓂ ᓯᓚᒥ; ᑕᒪᒃᑭᑦ ᐃᓗᐊᓃᑉᐳᑦ ᐅᕙᓂ ᐊᕕᒃᓯᒪᓂᐅᔪᒥ.
ᕿᑎᖅᐸᓯᐊᓂ ᐅᓗᕆᐊᓇᕐᓂᐅᔪᖅ ᐱᓕᕆᓂᐅᔪᑦ ᐃᓚᖃᖅᐳᑦ: ᓂᕆᓂᖅ ᓂᕆᕕᖕᓂ ᓇᑉᐸᓪᓗᐊᖓᓂ ᑕᑖᕐᓂᐅᔪᒥ ᐅᕝᕙᓘᓐᓃᑦ ᐃᓂᐅᔪᓂ ᐊᕕᒃᑐᖅᓯᒪᓂᐅᔪᓂ, ᐳᓚᕋᕐᓂᕐᒧᑦ ᐊᑯᓂᐅᔪᒥ ᐸᖅᑭᕝᕕᐅᔪᓄᑦ ᐃᓚᖃᖅᑐᒥ ᐳᓚᕋᕈᓐᓇᕐᓂᐅᔪᒥ ᐃᓄᑐᖃᕐᓂ ᐊᒻᒪᓗ ᑐᒃᓯᐊᕆᐊᕐᓂᐅᔪᓄᑦ ᐊᒻᒪ ᐱᓪᓚᕆᐅᔪᓄᑦ ᐃᓕᖅᑐᓯᒧᑦ ᖁᕕᐊᓱᒍᑕᐅᔪᓂ. ᐅᓇ ᐊᕕᒃᓯᒪᓂᐅᔪᖅ ᐃᓚᖃᕆᕗᖅ ᒪᑐᐃᕐᓂᖏᓐᓂ ᓄᔭᓕᕆᕝᕕᖕᓂ, ᑯᑭᓕᕆᕝᕕᖕᓂ, ᐃᓄᓕᒫᓄᑦ ᐆᓇᖅᑐᒥ ᐱᔫᕐᓂᐅᔪᒥ ᐊᒻᒪ ᐆᓇᖅᑐᓂ ᐅᕕᓂᖕᓂᐊᕐᕕᓂ, ᒪᒃᑯᒃᑐᒃᑯᕕᖕᓂ, ᑕᕐᕆᔭᕐᕕᓂᑦ, ᐃᖅᑲᖅᑐᐃᕕᖕᓂ, ᐃᓕᓐᓂᐊᕐᕕᓂᑦ ᐊᒻᒪ ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖕᓂ ᐃᓕᓐᓂᐊᕐᕕᓂᑦ.
ᐅᑯᐊ ᐃᓱᒪᒋᔭᐅᕗᑦ ᖁᑦᑎᒃᑐᒥ ᐅᓗᕆᐊᓇᕐᓂᖓᓂ ᐱᓕᕆᓂᐅᔪᓂ: ᐱᔪᓐᓇᖅᑎᑦᑎᔪᒥ ᐃᒡᓘᑉ ᐃᓗᐊᓂ ᓄᓇᓕᖕᓂ ᓂᕆᕕᒡᔪᐊᖅᑎᑦᑎᓂᐅᔪᓂ, ᐃᓘᑉ ᐃᓗᐊᓂ ᖁᙱᐊᕐᓂᐅᔪᓂ ᑎᑕᒃᑐᓂ, ᐃᒥᕐᕕᓂᑦ ᒪᑐᐃᖅᓯᓂᖅ ᐊᒻᒪ ᐃᒥᕐᕕᕋᓛᓂᑦ ᐊᒻᒪ ᐲᖅᓯᓂᖅ ᐊᖏᕐᕋᒥ ᐳᓚᕋᕐᓂᐅᔪᓂ ᑭᒡᓕᖃᖅᑎᑕᐅᓂᐅᔪᓂ.
ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᖓᔪᖅᑳᖓ ᖃᐅᔨᓴᐃᒃᑲᓐᓂᕐᓂᐊᖅᐳᖅ ᓄᓇᕘᑉ ᓄᕙᒡᔪᐊᕐᓇᖅ-19 ᖃᓄᐃᓕᖓᓕᕐᓂᖓᓂ ᐱᓇᓱᐊᕈᓰᑦ ᒪᕐᕉᒃ ᐊᓂᒍᑐᐊᕌᖓᑦ ᔫᓂ 1−ᒥ ᐱᒋᐊᕐᓗᒍ. ᐹᑐᓴᓐ ᖃᓱᒋᐊᖅᑎᑦᑎᓂᐊᖅᐳᖅ ᐱᓕᕆᓂᐅᔪᓂ, ᑎᒍᒥᐊᕐᓗᓂ ᐱᓕᕆᓂᐅᔪᑦ ᖄᒃᑲᓐᓂᐊᒍᑦ ᐱᓇᓱᐊᕈᓯᕐᓂ ᒪᕐᕉᖕᓂ ᐅᕝᕙᓘᓐᓃᑦ ᓱᑯᒋᐊᖅᑎᑦᑎᒃᑲᓐᓂᕐᓗᓂ ᐱᓕᕆᓂᐅᔪᒥ. ᓄᕙᒡᔪᐊᕐᓇᖅ-19 ᖃᓄᐃᓕᖓᓂᖓ ᐊᓯᔾᔨᖅᐸᓪᓕᐊᑎᓪᓗᒍ ᓄᓇᕗᒻᒥ ᐊᒻᒪ ᓄᑖᓂ ᐅᖃᐅᓯᒃᓴᓕᐊᓂ ᖁᐱᕐᕈᐃᑦ ᐊᐃᑦᑐᐃᓐᓇᖅᑐᒥ ᐊᑐᐃᓐᓇᕈᕈᑎᒃ, ᓄᑖᓂ ᐱᓕᕆᓂᐅᔪᓂ ᐊᑐᓕᖅᑎᑕᐅᑐᐃᓐᓇᕆᐊᖃᖅᐳᖅ ᒥᒃᖠᒋᐊᖅᑎᑦᑎᓂᕐᒧᑦ ᐅᓗᕆᐊᓇᕐᓂᖓᓂ ᐊᐃᑦᑐᐃᓂᕐᒥ ᑯᕉᓇ ᖁᐱᕐᕈᐃᑦ ᐊᐃᑦᑐᐃᓐᓇᖅᑐᒥ.
“ᓄᕙᒡᔪᐊᕐᓇᖅ-19 ᐊᒥᓱᓄᑦ ᖃᓂᒻᒪᓐᓇᐅᔪᖅ ᓴᖑᕙᓪᓕᐊᕗᖅ ᓱᒃᑲᔪᐊᓗᖕᒥ, ᐊᒻᒪ ᐱᓇᓱᐊᕈᓯᑕᒫᒥ ᓴᖅᑮᕗᖅ ᓄᑖᓂ ᐅᖃᐅᓯᒃᓴᓂ ᐋᖅᑭᒃᓱᐃᔪᒥ ᐸᕐᓇᒍᑎᑦᑎᓐᓂ ᐊᒻᒪᓗ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᓂᑦᑎᓐᓂ. ᓇᓚᐅᑦᑖᕐᓂᐅᔪᑦ ᐊᒻᒪ ᐃᓱᒪᓕᐊᖑᔪᑦ ᓴᓇᔭᐅᔪᓂ ᑐᙵᕕᓕᖕᒥ ᐅᓪᓗᒥᐅᔪᒥ ᑐᑭᓯᐅᒪᓂᖓᓐᓂ ᖁᐱᕐᕈᐃᑦ ᐊᐃᑦᑐᐃᓐᓇᖅᑐᒧᑦ ᐊᑐᕈᓐᓃᑐᐃᓐᓇᕆᐊᖃᖅᐳᖅ ᕿᓚᒥᒻᒪᕆᑯᓗᒃ. ᐆᒧᖓ ᐱᔾᔪᑕᐅᔪᒥ, ᓂᕈᐊᖅᓯᒪᕗᒍᑦ ᑐᕌᒐᕆᔭᐅᔪᒥ ᓴᖑᓴᕋᐃᑦᑐᒥ, ᐅᔾᔨᖅᓱᑦᑎᐊᕐᓂᕐᒥ, ᐊᒻᒪ ᓱᖏᐅᑎᔭᐅᓴᕋᐃᑦᑐᒥ ᓴᖑᕙᓪᓕᐊᖏᓐᓇᖅᑐᒥ ᖃᓄᐃᓕᖓᓂᐅᔪᒥ ᖃᓂᒋᔭᑦᑎᓐᓂ,” ᐅᓂᒃᑳᓚᐅᖅᐳᖅ ᐹᑐᓴᓐ.
ᐃᓚᒋᐊᖅᓯᓚᐅᖅᐳᖅ, ᒥᒃᖠᒋᐊᖅᑎᑦᑎᓂᕐᒧᑦ ᐅᓗᕆᐊᓇᕐᓂᖓᓂ ᓴᖅᑭᑎᑦᑎᓂᕐᒧᑦ ᓄᕙᒡᔪᐊᕐᓇᖅ-19−ᒥ ᓄᓇᕗᒻᒧᑦ, “ᐱᕐᔪᐊᖑᕗᖅ ᑭᒡᓕᖃᖅᑎᑦᑎᓂᕗᑦ ᐱᓕᕆᓂᕗᑦ ᑕᐃᒪᐃᓕᖓᐃᓐᓇᖅᐳᖅ.” ᑕᐃᒪᙵᓂ ᒫᔾᔨ 25−ᒥ, ᓄᓇᖃᖅᑎᑐᐊᖑᔪᑦ ᐊᒻᒪ ᐱᓪᓚᕆᐅᔪᒥ ᓴᓇᔨᐅᔪᑦ ᐱᔪᓐᓇᖅᑎᑕᐅᓯᒪᕗᑦ ᐃᓯᕈᓐᓇᕐᓂᕐᒧᑦ ᓄᓇᕗᒻᒧᑦ.
ᐅᖃᐅᓯᐅᓪᓗᓂ ᓄᓇᕘᑉ ᐊᖅᑯᑎᖓᓂ, ᐅᑯᐊ ᐊᐅᓪᓛᕐᓂᕐᒧᑦ ᑭᒡᓕᖃᖅᑎᑕᐅᓂᐅᔪᑦ ᓂᕆᐅᒋᔭᐅᕗᑦ ᑕᐃᒪᐃᓕᖓᐃᓐᓇᕐᓂᖓᓂ ᐃᓚᖓᒍᑦ ᐋᖅᑭᒃᓯᒪᓂᐅᔪᒥ ᑭᓯᐊᓂ ᐅᖃᐅᓯᒃᓴᖃᒃᑲᓐᓂᓕᕈᓂ ᐋᓐᓂᐊᓕᕇᒃᑯᑎᒥᒃ ᐊᒻᒪᓗ/ᐅᕝᕙᓘᓐᓃᑦ ᐊᑑᑎᖃᑦᑎᐊᖅᑐᒥ ᐃᓅᓕᓴᖅᑕᐅᓂᐅᔪᒥ ᓄᕙᒡᔪᐊᕐᓇᖅ-19−ᒧᑦ.
“ᑭᒡᓕᒋᔭᐅᔪᓄᑦ ᑭᒡᓕᖃᖅᑎᑕᐅᓂᐅᔪᓂ, ᐅᐸᒃᑕᐅᑦᑕᐃᓕᒪᓂᐅᔪᓂ ᑐᔪᕐᒥᕕᐅᔪᑦ, ᑭᖑᓪᓕᖅᐹᖑᖃᑕᐅᓂᐊᖅᐳᑦ ᑭᖑᓪᓕᖅᐹᖑᑐᐃᓐᓇᕆᐊᖃᖅᖢᓂ ᓴᒃᑯᑕᐅᓂᕐᒧᑦ,” ᐅᖃᓚᐅᖅᐳᖅ ᐹᑐᓴᓐ, ᐅᖃᖅᖢᓂ “ᐊᔪᕐᓇᙱᓛᖑᔪᖅ ᑭᒡᓕᐅᔪᒥ ᐆᒧᖓ ᐱᔪᓐᓇᑦᑎᐊᖅᑐᒥ ᐃᓅᓕᓴᖅᑕᐅᓂᖓᓂ ᐅᕝᕙᓘᓐᓃᑦ ᐋᓐᓂᐊᓕᕇᒃᑯᑎᑕᖃᕐᓂᖓᓂ.”