ᔮᓐ ᒦᓐ ᓵᓚᒃᓴᓚᐅᖅᐳᖅ ᓂᕈᐊᖅᑕᐅᑉᓗᓂ ᐊᕐᕕᐊᑦ ᐅᐊᖕᓇᖓᓂ/ᑎᑭᕋᕐᔪᐊᕐᒥᓗ ᓂᕈᐊᖅᑕᐅᕐᔪᐊᑦᓯᐊᖅᖢᓂ, 408-ᓄᑦ ᓂᕈᐊᖅᑕᐅᑉᓗᓂ ᒪᓕᒐᓕᐅᖅᑎᐅᓚᐅᖅᑐᖅ ᔪᐊᔾ ᑯᒃᓱᒃ ᓂᕈᐊᖅᑕᐅᑉᓗᓂ 115-ᓄᑦ.
ᒦᓐ, ᐅᑭᐅᓕᒃ 37-ᓂᒃ, ᐃᖃᓗᖕᓄᖓᐅᓂᐊᖅᐳᖅ ᑭᒡᒐᖅᑐᐃᓂᐊᖅᖢᓂ ᒪᓕᒐᓕᐅᖅᑎᐅᕕᒋᔭᒥᓂᒃ ᓯᕗᓪᓕᖅᐹᒥ, ᐅᖃᓚᐅᖅᖢᓂᓗ ᓂᕈᐊᖅᑕᐅᔪᓂᒃ ᖁᕕᐊᒋᔭᖃᕋᒥ ᒪᓕᒐᓕᐅᖅᑎᖑᖅᑎᑕᖃᑕᐅᔪᓂᒃ ᓄᓇᕗᒥ ᐅᑭᐅᓄᑦ ᓯᑕᒪᐅᓂᐊᖅᑐᓄᑦ.
ᒦᓐ ᐅᖃᓚᐅᖅᐳᖅ ᒪᕐᕉᖕᓂᒃ ᓄᑕᕋᖃᖅᖢᓂ, ᓄᓕᐊᓂᓗ (ᓕᓐ) ᐃᓱᒪᒃᓴᖅᓯᐅᕆᐊᖃᓚᐅᕐᒪᑎᒃ ᐊᑯᓂ ᖃᓄᖅ ᑐᑭᖃᕐᓂᐊᕐᒪᖔᑦ ᐃᓚᒌᓄᑦ ᓂᕈᐊᖅᑕᐅᓇᓱᐊᖃᑕᐅᒃᐸᑦ ᒪᓕᒐᓕᐅᖅᑎᖑᕐᓂᕐᒧᑦ ᐊᒻᒪ ᓵᓚᒃᓴᕐᓗᓂᓗ ᓂᕈᐊᖅᑕᐅᕕᒋᓇᓱᐊᖅᑕᒥᓂ.
ᐅᖃᓚᐅᖅᐳᖅ, ᑭᖑᓂᒍᑦ, ᐃᑲᔪᖅᑐᖅᑕᐅᑦᓯᐊᓚᐅᕋᒥ ᐃᓚᒥᓄᑦ.
“ᐊᒥᓱᓄᑦ ᐃᓄᖕᓄᑦ ᑲᔪᖏᖅᓴᖅᑕᐅᖃᑦᑕᓚᐅᖅᐳᖓ ᓂᕈᐊᖅᑕᐅᓇᓱᐊᖃᑕᐅᖁᔭᐅᑉᓗᖓ ᐅᑭᐅᖑᓯᒪᓕᖅᑐᓂ ᐊᒻᒪ ᐋᖅᑭᒃᓱᐃᕙᓪᓕᐊᒍᒪᑉᓗᖓ ᐃᑲᔪᕐᓗᒋᓪᓗ ᐃᓄᐃᑦ, ᑕᐃᒪᓐᓇ ᐱᓕᕆᐊᒃᓴᑦᓯᐊᕆᓂᐊᖅᐸᕋ ᐃᑲᔪᕋᓱᐊᕐᓗᒋᑦ ᐃᓄᐃᑦ ᐅᒃᐱᕆᔭᐅᓯᒪᒐᒪ ᑕᐃᒪᓐᓇ ᐱᓕᕆᓂᓗᖕᓂᐊᖅᐳᖓ,” ᐅᖃᓚᐅᖅᐳᖅ ᒦᓐ.
“ᐱᓕᕆᐊᕆᒍᒪᕙᕋ ᐅᕙᒻᓄᑦ ᐱᔭᕆᐊᑐᓂᐊᕐᒪᑦ, ᖃᐅᔨᒪᑉᓗᖓᓗ ᐊᔪᖏᓐᓇᒪ ᐱᓕᕆᐊᖃᕐᓂᕐᒧᑦ ᑕᐃᒪᓐᓇ.
“ᓯᕗᓪᓕᖅᐹᒥ ᐱᓕᕆᐊᖃᕈᒪᑉᓗᖓ ᐃᒃᓯᕚᓕᕈᒪ ᐱᓕᕆᖃᑎᒋᓗᒋᑦ ᐊᔾᔨᒌᖏᑦᑐᑦ ᑎᒥᑦ ᑲᑐᔾᔨᖃᑎᒌᓪᓗ ᐱᓕᕆᓯᒪᑉᓗᖓᓗ ᓄᓇᕗᑦ ᒐᕙᒪᒃᑯᖏᓐᓄᑦ ᓄᓇᓕᖕᓂ ᒐᕙᒪᓄᑦ, ᐊᒻᒪ ᐱᓕᕆᓯᒪᑉᓗᖓ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓄᑦ.”
ᒦᓐ ᐅᒃᐱᒍᓱᒃᐳᖅ ᑕᐃᒪᓐᓇ ᐃᓱᒪᒃᓴᖃᕐᓗᓂ ᐱᓐᖑᖅᑎᑦᓯᔪᓐᓇᕐᒪᑦ ᐱᓕᕆᐊᕆᓗᓂᐅᒃ, ᑕᒪᓐᓇ ᐊᔪᖏᓐᓇᓱᒋᑉᓗᓂᐅᒡᓗ ᓄᓇᕗᑦ ᒐᕙᒪᒃᑯᖏᓐᓄᑦ ᐱᓕᕆᐊᕆᔭᐅᒐᒃᓴᖅ.
ᐅᖃᓚᐅᖅᖢᓂᓗ ᓯᕗᓪᓕᖅᐸᐅᑎᑕᐅᒋᐊᖃᖅᑐᑦ ᐊᖏᔪᑦ ᐋᓐᓂᐊᖃᕐᓇᖏᑦᑐᓕᕆᓂᖅ, ᐱᓕᕆᐊᒃᓴᐃᑦ ᐊᒻᒪ ᐃᓕᓐᓂᐊᖅᑐᓕᕆᓂᖅ ᑕᐃᒪᓐᓇ ᐱᔫᒥᓴᐅᑎᖃᖃᑦᑕᓚᐅᕋᒥ ᓂᕈᐊᖅᑕᐅᓇᓱᐊᖅᖢᓂ.
“ᐋᓐᓂᐊᖅᑐᓕᕆᔭᐅᓂᖅ ᓯᕗᓪᓕᖅᐸᐅᑦᓯᐊᖅᐳᖅ,” ᐅᖃᓚᐅᖅᐳᖅ ᒦᓐ, “ᓂᕈᐊᖅᑎᓂᖔᕐᒪᑦ − ᐃᓄᐃᑦ ᐅᖃᓪᓚᖃᑎᒋᓚᐅᖅᑕᒃᑲ ᓂᕈᐊᖅᑕᐅᓇᓱᐊᖃᑕᐅᒍᒪᑎᓪᓗᖓ − ᑕᐃᒪ ᐱᓕᕆᐊᖃᓪᓚᕆᒍᒪᓂᐊᖅᐳᖓ ᑐᐊᕕᕐᓇᖅᑐᒃᑯᑦ ᑐᑭᓯᓇᓱᐊᕐᓗᒋᑦ ᐱᔾᔪᑎᒋᔭᐅᔪᑦ ᐊᕐᕕᐊᓂ ᐊᒻᒪ ᑎᑭᕋᕐᔪᐊᒥ, ᐋᖅᑭᒃᓱᖅᑕᐅᑎᒐᓱᐊᕐᓗᒋᓪᓗ.”
“ᑕᒪᓐᓇ ᑐᐊᕕᕐᓇᕐᒪᑦ ᐅᑕᕿᒋᐊᖃᖏᒻᒪᑦ, ᐃᓄᐃᑦ ᐋᓐᓂᐊᓕᖃᑦᑕᕐᒪᑕ ᐅᑉᓗᑕᒫᑦ, ᑕᒪᓐᓇ ᐱᒋᐊᕈᑎᒋᓯᒪᒐᑉᑯ ᖃᐅᔨᒪᑉᓗᒍ ᐋᓐᓂᐊᖅᑐᓕᕆᔭᓂᐅᑉ ᒥᒃᓵᓄᑦ.”
ᒦᓐ ᓄᖅᑲᕐᓂᐊᖅᐳᖅ ᐊᖓᔪᖄᖑᓂᕐᒥᓂᒃ ᑭᕙᓪᓕᕐᒥ ᓇᖕᒥᓂᖅ ᐱᓕᕆᕕᓕᑦ ᑲᑎᒪᔨᖏᓐᓂᑦ ᒪᓕᒐᓕᐅᖅᑎᐅᓕᕋᒥ. ᑮᓇᐅᔭᓕᕆᔨᐅᑉᓗᓂᓗ ᓄᓇᕗᑦ ᐱᕙᓪᓕᐊᔪᓕᕆᔨᒃᑯᑦ ᑯᐊᐳᕇᓴᒃᑯᑦ ᑲᑎᒪᔨᖏᓐᓄᑦ ᐱᓕᕆᖃᑕᐅᓯᒪᑉᓗᓂᓗ ᐊᖏᔪᒥᒃ ᐋᖅᑭᒃᓱᐃᖃᑕᐅᓂᕐᒧᑦ ᐊᕐᕕᐊᓂ ᐃᓄᒻᒪᕇᑦ ᑎᑕᒃᑎᑦᓯᓂᕐᒧᑦ ᖃᓄᐃᓕᐅᖅᑎᑦᓯᔨᖏᓐᓄᑦ ᐊᐅᒐᓯᐅᓚᐅᖅᑐᒥ.
ᒦᓐ ᐅᖃᓚᐅᖅᐳᖅ ᒪᓕᒐᓕᐅᖅᑎᑦ ᓇᓪᓕᐊᑐᐃᓐᓇᖅ ᓯᕗᓕᖅᑎᖑᕈᒪᓇᔭᖅᐳᖅ, ᑕᐃᒪᓐᓇ ᐱᔪᓐᓇᕐᓂᖃᕈᓂ. ᑭᓯᐊᓂ ᐅᖃᓚᐅᖅᖢᓂᓕ, ᐱᓕᕆᑦᓯᐊᕐᓂᖅᓴᐅᔪᓐᓇᕐᓂᕋᖅᖢᓂ ᒪᓕᒐᓕᐅᖅᑎᑐᐃᓐᓇᐅᓗᓂ ᓈᒻᒪᑦᓯᐊᑦᓯᐊᖅᖢᓂᓗ ᑕᐃᒪᓐᓇᐃᓕᐅᕈᓂ ᒫᓐᓇ.
“ᒪᓕᒐᓕᐅᖅᑎᑦ ᐱᓕᕆᐊᖃᖃᑦᑕᕐᒪᑕ ᐱᒻᒪᕆᐅᔪᓂᒃ ᒐᕙᒪᒃᑯᑦ ᖃᓄᐃᓕᐅᖁᔭᐅᓂᖏᓐᓄᑦ,” ᐅᖃᓚᐅᖅᐳᖅ. “ᐱᓕᕆᐊᕆᑦᓯᐊᕈᒪᕙᕋ ᑕᐃᒪᓐᓇ ᓵᑕᐅᔪᒃᓴᐅᑦᓯᐊᖁᑉᓗᒋᑦ ᒐᕙᒪᒃᑯᑦ, ᐱᒻᒪᕆᐅᔪᓂᒃ ᐊᒃᓱᕈᕐᓇᖅᑐᓂᒡᓗ ᐊᐱᕆᖃᑦᑕᕐᓗᖓ, ᐱᔾᔪᑎᒋᓯᒪᔭᒃᑲ ᒪᓕᒡᓗᒋᑦ ᖃᓄᐃᓕᐅᕆᐊᕈᑎᒋᓗᒋᑦ ᐋᖅᑭᒃᓱᐃᓇᓱᐊᕐᓗᖓᓗ ᐃᖢᐊᖏᔾᔪᑕᐅᔪᓂᒃ.
“ᑐᓴᓚᐅᖅᐳᖓᓗ ᓂᕈᐊᖅᑎᑦ ᐃᖢᐊᖏᔾᔪᑎᖃᓚᐅᕐᓂᖏᓐᓄᑦ ᖃᓄᖅ ᒥᓂᔅᑕᖑᖅᑐᑦ ᓂᕈᐊᖅᑎᒥᖕᓂᒃ ᑭᒡᒐᖅᑐᐃᖃᑦᑕᕐᓂᖏᑦ ᖃᓄᖅ. ᐅᖃᐅᓯᕆᔭᐅᓗᐊᖅᓯᒪᖏᑦᑐᑦ, ᑭᓯᐊᓂ, ᑐᑭᓯᐅᒪᔪᑦ ᑕᒪᒃᑯᐊ ᖃᐅᔨᒪᖕᒪᑕ, ᑲᔪᖏᖅᓴᐃᓚᐅᖅᖢᑎᒡᓗ ᒥᓂᔅᑕᖑᕋᓱᐊᖅᑕᐃᓕᖁᔭᐅᑉᓗᖓ ᐱᓕᕆᐊᖃᕐᓗᖓ ᐋᖅᑭᒃᓱᕋᓱᖕᓂᐊᕐᓂᕋᓚᐅᖅᑕᒻᓂᒃ.”
ᒦᓐ ᐅᖃᓚᐅᖅᐳᖅ ᓂᕈᐊᓚᐅᖅᑎᓪᓗᒋᑦ ᐃᓄᖕᓂᒃ ᓂᕈᐊᓚᐅᕐᒪᑕ ᐱᓕᕆᓕᓂᑯᓂᒃ ᐊᒻᒪ ᐊᔾᔨᒌᖏᑦᑐᓂᒃ ᐱᓕᕆᐊᖃᕈᒪᔪᓂᒃ.
ᐅᖃᓚᐅᖅᖢᓂᓗ ᖁᕕᐊᓱᑦᓯᐊᓚᐅᕋᒥ ᐊᕐᓇᐃᑦ ᐊᒥᓲᓂᖅᓴᐃᑦ ᓂᕈᐊᖅᑕᐅᓚᐅᕐᒪᑕ.
“ᖃᐅᔨᒪᖏᑦᑐᖓ ᖃᓄᖅ ᑕᒪᓐᓇ ᐊᔾᔨᒋᔭᐅᑎᒋᓚᐅᕐᒪᖔᑦ ᐊᓯᖏᓐᓄᑦ ᓂᕈᐊᕐᓇᐅᓚᐅᖅᑐᓄᑦ,” ᒦᓐ ᐅᖃᓚᐅᖅᐳᖅ, “ᐱᓕᕆᐊᖃᓗᐊᓚᐅᕋᒪ ᓇᖕᒥᓂᖅ ᓂᕈᐊᖅᑕᐅᕕᒻᓂ ᐱᓕᕆᐊᒃᓴᓂᒃ ᖃᓄᐃᓕᐅᕈᑕᐅᖁᔭᐅᔪᓂᒃ ᑕᖅᑭᐅᓚᐅᖅᑐᓂ.”
“ᐊᒃᓱᕈᓚᐅᖅᐳᒍᑦ ᓂᕈᐊᖅᑎᑦ ᑐᓴᖅᑎᑕᐅᖁᑉᓗᒋᑦ ᓴᕆᒪᓱᒃᐳᖓᓗ ᐱᓕᕆᖃᑎᕗᑦ ᐋᖅᑭᒃᓱᐃᑦᓯᐊᖅᓯᒪᓚᐅᕐᒪᑕ ᐱᓕᕆᖃᑎᒌᑦᓯᐊᓚᐅᕐᒪᑕ, ᐊᑭᓕᖅᑐᒐᐅᖏᑦᖢᑎᒃ ᐱᓕᕆᔨᖃᖅᖢᑎᒡᓗ ᓇᑭᑐᐃᓐᓇᖅ ᐅᐱᓐᓇᓚᐅᖅᐳᖅ ᑕᒪᓐᓇ ᑕᒪᐃᓐᓂ ᐊᕐᕕᐊᓂ ᑎᑭᕋᕐᔪᐊᒥᓗ.
“ᐊᒻᒪ ᐱᐅᒋᐊᒃᑲᓐᓂᕈᑎᒋᔭᖓ, ᑭᓇᒥᐊᖅ ᓵᓚᒃᓴᓚᐅᕋᓗᐊᖅᐸᑦ, ᓂᕈᐊᕆᐊᖅᑐᖅᑐᑦ ᐊᒥᓱᒻᒪᕆᐅᓚᐅᖅᐳᑦ. ᖁᕕᐊᓇᓚᐅᖅᐳᖅ ᑕᐃᒪᓐᓇᑎᒋ ᐃᓄᖕᓂᒃ ᑕᑯᑉᓗᓂ ᓂᕈᐊᕆᐊᖅᑐᖃᑕᐅᔪᓂᒃ.”
ᑖᒃᑯᐊ ᓯᕗᓪᓕᐅᕗᑦ ᑎᑎᕋᖅᑕᐅᓯᒪᓂᐊᖅᑐᓂ ᐱᔾᔪᑎᖃᖅᑐᑦ ᐊᑐᓂ 6−ᓂ ᑭᕙᓪᓕᐅᑉ ᐃᓗᐊᓂ ᒪᓕᒐᓕᐅᖅᑎᓂᒃ.