Skip to content

ᒪᓕᒐᓕᐅᖅᑎᑦ ᐊᔭᐅᕆᕗᑦ ᒥᓂᔅᑕᒥ ᓂᖃᐃᓱᕐᓂᕐᒧᑦ ᐊᓯᔾᔨᕐᓂᐅᔪᓄᑦ

Elisapee Sheutiapik front

ᒪᓕᒐᓕᐅᖅᑎᑦ ᒫᓐᓇᓕᓴᐅᔪᒥ ᐊᒥᖅᑳᓚᐅᖅᐳᑦ ᐊᔭᐅᕆᓂᕐᒥ ᐃᓄᓕᕆᔨᒃᑯᓐᓂ ᒥᓂᔅᑕᖓᓂ ᐃᓕᓴᐱ ᓯᐅᑎᐊᐱᖕᒥ ᐋᖅᑭᒋᐊᖅᓯᓂᐅᔪᓄᑦ ᓂᖃᐃᓱᕐᓂᕐᒧᑦ ᐱᓕᕆᐊᖑᔪᒧᑦ, ᐊᒻᒪ ᓇᓗᓇᐃᖅᓯᓚᐅᖅᐳᖅ ᐊᓯᔾᔨᕐᓂᐅᔪᓂ ᑐᕌᕐᓂᐊᖅᐳᑦ ᒪᓕᒃᑐᒥ ᓄᓇᕗᒻᒥ ᒐᕙᒪᒃᑯᓐᓄᒃ.

ᐊᒥᑦᑐᕐᒥ ᒪᓕᒐᓕᐅᖅᑎ ᔪᐃᓕ ᖃᐃᕐᓂᖅ ᐱᒋᐊᖅᑎᑦᑎᓚᐅᖅᐳᖅ ᒪᑐᐃᖅᓯᓂᕐᒥ ᖁᒃᑭᐊᓂᖓᓂ ᒪᓕᒐᓕᐅᖅᑎᒃᑯᑦ ᑲᑎᒪᕝᕕᖓᓂ ᒫᔾᔨ 16−ᒥ ᑎᒃᑯᐊᕆᓪᓗᓂ, ᐅᖃᐅᓯᐅᓪᓗᓂ ᓂᕿᒃᓴᖃᑦᑎᐊᕐᓂᕐᒧᑦ ᐅᑭᐅᖅᑕᖅᑐᒥ, ᐊᑭᖃᖅᐳᖅ $404−ᒥ ᐱᓇᓱᐊᕈᓯᑕᒫᒥ ᐃᓚᒌᖑᔪᓄᑦ ᓴᓂᕋᔭᖕᒥᐅᑕᐅᔪᓄᑦ ᓂᕆᓂᕐᒥ ᓂᕆᐅᓯᑦᑎᐊᖃᕐᓂᕐᒥ ᐊᒻᒪᓗ $422−ᒥ ᐱᓇᓱᐊᕈᓯᑕᒫᒥ ᐃᒡᓗᓕᖕᒥ. ᑭᓯᐊᓂ, ᓂᖃᐃᓱᕐᓂᖅ ᑐᓂᓯᑐᐃᓐᓇᓲᖑᕗᑦ $335−ᒥ ᐱᓇᓱᐊᕈᓯᑕᒫᒧᑦ.

“ᒥᓂᔅᑕ ᐅᓂᒃᑳᕆᔪᓐᓇᖅᐸ ᖃᓄᖅ ᐅᓇ ᐊᖏᓂᖓᓂ ᐃᓱᒪᒃᓴᖅᓯᐅᕆᔭᐅᕙᖕᓂᖓᓂ ᓈᒻᒪᖕᓂᐊᕐᓂᖓᓂ ᓇᓗᓇᐃᖅᓯᓂᕐᒧᑦ ᐃᓚᒌᖑᔪᑦ ᓈᒻᒪᒃᑐᒥ ᓂᕆᑎᑕᐅᓂᖏᓐᓄᑦ?” ᖃᐃᕐᓂᖅ ᐊᐱᕆᓚᐅᖅᐳᖅ, ᐅᖃᐅᓯᖃᖅᖢᓂ ᓂᖃᐃᓱᕐᓂᕐᒥ “ᑭᒡᓕᖃᖅᑎᑕᐅᓂᐅᔪᒥ ᐃᓱᒪᖅᓱᕐᓂᕐᒥ ᐊᑐᖅᑕᐅᕙᖕᓂᖓᓂ” ᐊᒻᒪᓗ ᐃᓚᒋᐊᖅᓯᓪᓗᓂ ᑐᓴᖅᓯᒪᓂᖓᓂ ᐃᓱᒫᓘᑕᐅᔪᓂ ᓂᖃᐃᓱᖅᑎᑦᑎᔨᓂ ᓂᓪᓕᕈᒪᒐᓗᐊᖅᑎᓪᓗᒋᑦ “ᐃᓱᒪᒐᓗᐊᕐᒥᖕᒪᑕ ᐃᓅᒐᓗᐊᒃᒪᑕᑦᑕᐅᖅ”.”

ᓯᐅᑎᐊᐱᒃ ᐅᖃᓚᐅᖅᐳᖅ ᓱᖏᐅᔾᔨᓂᑕᖃᖅᓯᒪᖕᒪᑦ ᓂᖃᐃᓱᕐᓂᕐᒧᑦ ᐱᒋᐊᖅᑕᐅᓪᓗᓂ ᑭᖑᓪᓕᐅᔪᓂ ᒐᕙᒪᐅᔪᓂ ᐊᒻᒪ ᐊᓯᔾᔨᖅᓯᒃᑲᓐᓂᖅᓯᒪᓪᓗᑎᒃ ᒫᓐᓇᐅᔪᒧᑦ ᐊᑐᖅᑕᐅᕙᒃᑐᒥ, ᓲᕐᓗ ᓴᖅᑭᑎᑦᑎᓂᐅᔪᒥ “ᓂᕿᓂᑦ ᐴᖅᓯᒪᔪᓂ ᑕᑯᒃᓴᐅᑎᑦᑎᒃᑲᓐᓂᕐᓂᕐᒧᑦ ᐊᑭᖓᓂ ᐆᒪᓇᓱᐊᕐᓂᕐᒥ ᓄᓇᕗᒻᒥ.” ᐊᖏᓂᖓ ᑐᓂᔭᐅᔪᖅ ᐊᑐᓂ ᐃᓄᖕᓄᑦ ᖁᕝᕙᕆᐊᖅᓯᒪᕗᖅ ᐊᒻᒪᓗ ᐱᔭᕆᐊᖃᕐᓂᖃᕈᓐᓃᖅᐳᖅ ᑕᑕᑎᕆᐊᓕᖕᓂ ᐊᑎᓕᐅᕆᓂᕐᒥ ᓂᖃᐃᓱᖅᐸᒃᑐᓂ ᕿᓂᕌᖓᒥᒃ ᐃᖅᑲᓇᐃᔮᒃᓴᒧᑦ, ᐃᓚᒋᐊᖅᓯᓚᐅᖅᐳᖅ.

ᖃᐃᕐᓂᖅ ᖃᐃᖁᔨᓂᖃᓕᓚᐅᖅᐳᖅ ᒐᕙᒪᒃᑯᓐᓂ ᖁᕝᕙᕆᐊᖅᓯᓂᖓᓂ ᐊᖏᓂᐅᔪᒥ ᓂᖃᐃᓱᖅᐹᒃᑐᓂ ᐱᔪᓐᓇᕐᓂᖏᓐᓂ ᑐᓂᕐᕈᓯᐊᖑᔪᒥ ᐃᓚᖏᓐᓄᑦ ᐊᓯᖏᓐᓄᓪᓘᓐᓃᑦ ᐲᖅᓯᕝᕕᐅᕙᙱᓪᓗᑎᒃ – ᒫᓐᓇᐅᔪᒥ ᐃᓱᖃᖅᑎᑕᐅᓪᓗᓂ $40−ᒥ ᑕᖅᑭᑕᒫᒧᑦ. ᐸᑦᑕᒃᑐᖅᑕᐅᓚᐅᖅᐳᖅ ᑲᑎᒪᔨᐅᖃᑎᒥᓂᑦ ᑕᐃᔅᓱᒧᖓ ᐊᑐᖁᓇᔭᖅᑕᖓᓂ.

ᓯᐅᑎᐊᐱᒃ ᑭᐅᓚᐅᖅᐳᖅ, “ᐊᒥᓱᓂ ᐃᓗᐊᓃᑦᑐᓂ ᓂᖃᐃᓱᕐᓂᕐᒧᑦ ᐱᖁᔭᖏᓐᓂ ᓄᑖᙳᕆᐊᖅᑎᑕᐅᔭᕆᐊᖃᖅᑐᓂ. ᐅᓇ ᐱᓕᕆᓂᖅ ᐃᖏᕐᕋᐃᓐᓇᖅᐳᖅ, ᓂᖃᐃᓱᕐᓂᕐᒥ ᐋᖅᑭᒋᐊᖅᑕᐅᓂᖓᓂ. ᐊᓯᔾᔨᕐᓂᐅᔪᑦ ᒥᑭᑦᑐᑯᓘᙱᓚᑦ ᐊᒻᒪᓗ ᑐᕌᖓᓂᖃᕐᓂᐊᖅᐳᖅ ᒪᓕᒃᑐᓄᑦ ᒐᕙᒪᐅᔪᓄᑦ.”

ᖃᐃᕐᓂᖅ, ᐅᔾᔨᕈᓱᓚᐅᖅᐳᖅ ᐅᓄᕐᓂᖅᓴᐅᔪᓂ 1,500−ᓂ ᓂᖃᐃᓱᖅᐸᒃᑐᓂ ᒪᕐᕉᖕᓂ ᓄᓇᓕᐅᔪᓂ ᑭᒡᒐᖅᑐᖅᐸᒃᑕᖏᓐᓂ 2019−ᒥ, ᐅᖃᓚᐅᖅᐳᖅ “ᓄᒫᓇᖅᐳᖅ”, ᐊᓯᔾᔨᕐᓂᐅᔪᑦ ᐅᑕᖅᑭᔭᕆᐊᖃᕐᓂᖏᓐᓂ ᐊᒻᒪᓗ ᑎᒃᑯᐊᕆᓪᓗᓂ “ᐃᖅᑲᓇᐃᔮᒃᓴᖃᑦᑎᐊᙱᓐᓂᖓᓂ” ᓴᓂᕋᔭᖕᒥ ᐊᒻᒪ ᐃᒡᓗᓕᖕᒥ.

“ᑕᐃᒪᐃᒻᒪᑦ, ᑭᖑᓪᓕᖅᐹᖑᓪᓗᓂ ᐱᕕᒃᓴᕆᓕᕌᖓᒥᐅᒃ, ᓂᖃᐃᓱᕋᓱᐊᓲᖑᕗᑦ. ᐋᒃᑳᖅᑕᐅᒐᒥ, ᓂᕆᐅᖕᓂᖓ ᑲᑕᓲᖑᕗᖅ; ᓴᐱᓕᓲᖑᕗᑦ,” ᐅᖃᓚᐅᖅᐳᖅ.

ᑲᖏᖅᖠᓂᖅ ᐅᐊᖕᓇᒥ-ᐃᒡᓗᓕᒑᕐᔪᖕᒥ ᒪᓕᒐᓕᐅᖅᑎ ᑳᑎ ᑕᐅᑐᙱ ᐳᓚᕋᒃᑲᓐᓂᓚᐅᖅᐳᖅ ᐊᑲᐅᙱᓕᐅᕈᑕᐅᔪᒥ ᐱᙴᒥ ᓵᓚᖃᐅᓯᐊᓂ ᐅᖓᑖᓄᑦ $40−ᒥ ᐱᑎᑦᑎᔪᒥ ᒥᒃᖠᒋᐊᖅᑎᑕᐅᓂᐅᔪᒥ ᐃᑲᔪᕐᓂᕐᒧᑦ ᓂᖃᐃᓱᖅᐸᒃᑐᓄᑦ, ᐅᖃᐅᓯᐅᓂᖅ ᓴᖅᑭᑎᓚᐅᖅᓯᒪᔭᖓᓂ ᒪᓕᒐᓕᐅᖅᑎᒃᑯᑦ ᑲᑎᒪᕝᕕᖓᓐᓂ ᖃᔅᓯᒐᓚᖕᓂ ᐊᕐᕌᒎᓕᖅᑐᓂ. ᐃᓄᐃᑦ ᐊᑐᒐᔪᒃᐳᑦ ᐱᙴᒥ ᓵᓚᖃᐅᓯᐊᒥᓂᒃ ᓂᕿᑖᒃᑲᓐᓂᕐᓂᕐᒧᑦ, ᓯᑭᑑᓂᒃ ᐃᒡᓗᒥᐅᑕᓂᒡᓘᓐᓃᑦ, ᑕᐅᑐᙱ ᐅᖃᓚᐅᖅᐳᖅ.

Breaker: ᐊᑲᐅᙱᓕᐅᕈᑎ 'ᓱᒃᑲᔪᒥ−ᐱᓕᕆᐊᖑᓪᓗᐊᖅᐳᖅ'

“ᒐᕙᒪᐅᓪᓗᑕ ᐱᓕᕆᐊᖃᓪᓗᐊᙱᓚᒍᑦ ᓄᓇᖃᖅᑎᐅᔪᓂ ᑲᒪᑦᑎᐊᕈᓐᓇᙱᑎᑐᑦ, ᖃᐅᔨᒪᒐᑦᑕ ᑕᒪᕐᒥᒐᓚᑦ ᐃᓄᐃᑦ ᐅᓪᓗᒥ, ᒫᓐᓇᐅᔪᒥ, ᓵᙵᓂᖃᕐᓂᖏᓐᓂ ᐊᒃᓱᕈᕐᓂᐅᔪᓂ ᐋᖅᑭᐅᒪᑎᑦᑎᓂᓱᐊᕐᓂᖏᓐᓂ ᑐᙵᕕᖃᑦᑎᐊᕐᓂᐅᔪᒥ,” ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᐊᑲᐅᙱᓕᐅᕈᑕᐅᔪᖅ “ᓱᒃᑲᔪᒥ−ᐱᓕᕆᐊᖑᓪᓗᐊᖅᐳᖅ.”

ᓯᐅᑎᐊᐱᒃ ᑭᐅᓚᐅᖅᐳᖅ ᐱᙴᒥ ᓵᓚᖃᐅᓯᐊᑦ ᐃᓚᒋᔭᐅᙱᓚᖅ ᓯᕗᓪᓕᐅᔾᔭᐅᑎᑕᐅᔪᓂ ᐃᓗᐊᓂ ᓂᖃᐃᓱᕐᓂᕐᒧᑦ ᐋᖅᑭᒋᐊᕈᑕᐅᓂᐅᔪᓄᑦ ᐊᒃᑐᐃᑐᐃᓐᓇᓲᖑᖕᒪᑦ “ᐅᓄᙱᑦᑐᑯᓗᖕᓂ” ᓂᖃᐃᓱᖅᐸᒃᑐᓂ.

ᐃᖃᓗᖕᓂ-ᒪᓂᕋᔭᖕᒥ ᒪᓕᒐᓕᐅᖅᑎ ᐋᑕᒻ ᐋᕆᐊᖅ ᓚᐃᑦᔅᑑᓐ ᐅᖃᕆᐊᓪᓚᓚᐅᖅᐳᖅ ᖃᐃᕐᓂᐅᑉ ᑕᑯᓯᒪᔭᖓᓐᓂ ᐊᒻᒪ ᐅᖃᓚᐅᖅᐳᖅ “ᐊᑲᐅᒃᓴᕐᓇᙱᕕᒡᔪᐊᖅᐳᖅ ... ᑐᑭᓯᓇᑦᑎᐊᖅᑐᒥ ᑭᐅᓂᖃᙱᑎᓪᓗᒍ.”

ᐊᐱᕆᓚᐅᖅᐳᖅ ᒥᓂᔅᑕᒧᑦ ᓂᖃᐃᓱᖅᐸᒃᑐᑦ ᐊᓯᐅᔨᕙᖕᓂᖏᓐᓂ ᐱᕚᓪᓕᕈᑎᓂᒃ ᐱᒑᖓᒥᒃ ᖃᕋᓴᐅᔭᑎᒍᑦ ᓇᒃᓯᐅᔾᔭᐅᓂᑯᓂ ᑮᓇᐅᔭᓂᒃ ᐃᓚᖏᓐᓂ ᐃᑲᔪᕐᓂᕐᒧᑦ ᓂᕿᑖᕐᓂᕐᒧᑦ.

ᓯᐅᑎᐊᐱᒃ ᑭᐅᓚᐅᙱᓚᖅ ᐊᐱᖅᑯᑕᐅᔪᒥ.

ᐅᖃᖔᓚᐅᖅᐳᖅ, “ᐱᓕᕆᕝᕕᒃ ‘ᐱᐅᒋᔭᐅᙱᓐᓂᐅᓪᓗᓂ’ ᐅᓪᓘᕗᖅ ᐃᓄᖕᓂ ᐱᓕᕆᓂᖃᕋᑦᑕ. ᐊᒃᓱᕈᕐᓇᖅᑐᒻᒪᕆᐊᓗᒃ ... ᐊᕐᕌᒍᓂ 8-ᓂ 6−ᓂ ᒥᓂᔅᑕᖃᖅᓯᒪᕗᒍᑦ. ᑕᐅᑐᙳᐊᕆᑦ ᐊᓯᔾᔨᕐᓂᖃᕋᓱᐊᕐᓗᓂ ᑕᐃᒪᐃᑦᑐᓂ ᐊᓯᔾᔨᕐᓂᖃᖅᑐᓂ.”

ᐋᕆᐊᖅ ᓚᐃᑦᔅᑑᓐ ᐊᔭᐅᕆᓚᐅᖅᐳᖅ ᒥᓂᔅᑕᒥ ᐃᓚᒋᐊᖅᓯᓂᖓᓂ ᐱᖁᔭᓂᑦ ᐱᔪᓐᓇᖅᑎᑦᑎᓂᕐᒧᑦ ᐊᑕᐅᓯᐊᖅᑐᒥ ᑮᓇᐅᔭᓂ ᑐᓂᓯᓂᐅᔪᒥ “ᐃᓗᐊᓂ ᐊᖏᓗᐊᙱᑦᑐᒥ ᑭᒡᓕᐅᔪᒧᑦ ᐲᖅᓯᕝᕕᐅᓇᔭᙱᓐᓂᖓᓂ” ᓂᖃᐃᓱᖅᐸᒃᑐᓄᑦ.

ᓯᐅᑎᐊᐱᒃ ᐱᐅᒃᓴᓚᐅᖅᐳᖅ ᑕᐃᒪᐃᖁᔭᐅᓂᐅᔪᒥ.

“ᖁᔭᒋᕙᒋᑦ. ᖁᔭᒋᕙᒋᑦ ᑐᓂᓯᒐᕕᑦ ᐋᖅᑭᒍᑕᐅᔪᓐᓇᕋᔪᖅᑐᒥ,” ᐅᖃᓚᐅᖅᐳᖅ. “ᐊᔪᕐᓇᙱᓚᖅ ᐊᐱᕆᓂᕐᒧᑦ. ᐊᓯᐊᖑᕗᖅ ᐋᖅᑭᒐ)ᖕᓂᕐᒥ, ᑕᐃᒫᒃ ᖁᔭᒋᕙᒋᑦ ᐅᖃᖅᑕᕐᓂᑦ, ᑐᑭᖃᑦᑎᐊᖅᐳᖅ. ᑕᐃᒫᒃ ᐱᓕᕆᖃᑎᖃᕐᓂᐊᖅᐳᖓ ᐱᓕᕆᕝᕕᓐᓂ ᑖᔅᓱᒧᖓ ᐱᓕᕆᖁᓇᔭᖅᑕᕐᓂᑦ.”

ᔮᓪ ᒪᐃᓐ, ᒪᓕᒐᓕᐅᖅᑎ ᐊᕐᕕᐊᑦ ᐅᐊᖕᓇᖓᓂ-ᑎᑭᕋᕐᔪᐊᒧᑦ, ᐊᐱᕆᓚᐅᖅᐳᖅ ᓯᐅᑎᐊᐱᖕᒧᑦ ᓄᑖᙳᕆᐊᖅᑎᑕᐅᓂᐅᔪᒥ ᓄᓇᕗᒻᒥ ᒐᕙᒪᒃᑯᓐᓂ ᕿᒥᕐᕈᔭᐅᓂᖓᓂ ᑭᒡᓕᒋᔭᐅᔪᓄᑦ ᑮᓇᐅᔭᓕᐊᕆᔭᐅᓂᐅᔪᓄᑦ, ᑐᕌᒐᕆᔭᐅᔪᒥ ᐃᑲᔪᖅᓱᐃᓯᒪᒐᔪᒃᑕᖓᓂ.

ᒥᓂᔅᑕ ᐅᖃᓚᐅᖅᐳᖅ ᐱᓕᕆᕝᕕᖓ ᐃᖅᑲᓇᐃᔮᖅᑎᑖᖅᐸᓪᓕᐊᓇᓱᐊᖅᐳᑦ ᐱᓕᕆᓂᕐᒥ ᑕᐃᔅᓱᒥᖓ ᖃᐅᔨᓴᐃᓂᐅᔪᒥ.