Skip to content

ᓄᓇᕗᒥᐅᑦ ᑕᑯᒃᓴᐅᑎᑕᐅᔪᑦ The Terror-ᒥ

ᐃᖃᓗᖕᒥᐅᖅ ᐃᔾᔪᐊᖅᑎ ᔮᓂ ᐃᓴᓗᒃ ᑎᑭᓯᒪᓚᐅᕐᒪᑦ ᐋᑐᕚᒧᑦ ᐱᖑᐊᖅᑎᒃᓴᓂᒃ ᐆᒃᑐᕋᑲᑕᒃᑎᓪᓗᒋᑦ ᒫᔨ 26-ᒥ ᐃᒡᓗᕈᓯᕐᒥᓂ ᑐᔪᕐᒥᕕᖕᒥ ᑎᓕᕖᓴᒃᑯᑦ ᑕᐅᑐᓚᐅᖅᑐᖅ ᑕᑯᒃᓴᐅᑎᑕᐅᑎᓪᓗᒍ The Terror, ᐅᑭᐅᑦ 172 ᓈᓯᒪᓕᖅᑎᓪᓗᒋᑦ ᓲ ᔮᓐ ᕗᕌᖕᑭᓚᓐ ᐅᒥᐊᕐᔪᐊᖏᑦ ᐊᔪᓕᓚᐅᕐᓂᑎᓪᓗᒋᑦ ᐅᑭᐅᖅᑕᖅᑐᒥᐅᑦ ᐃᑭᐊᓂ ᓯᑯᒥ.

ᓃᕝ ᓂᐃᓪᓴᓐ ᐃᔾᔪᐊᖅᓯᓂᐊᖅᑐᖅ ᐊᕐᓇᖑᐊᖑᓗᓂ ᑕᒫᓂᕐᒥᐅᖅ ᐃᓄᒃ ᐊᖓᒃᑰᑉ ᐸᓂᖓ ᐊᒻᒪᓗ ᐱᓯᑎᖑᐊᖑᓗᓂ, ᑕᕐᕆᔭᐅᓯᐊᖑᔪᒥ/ᑲᑉᐱᐊᓇᖅᑐᖑᐊᖑᓗᓂ ᓯᕗᓪᓕᖅᐹᒥ ᑕᑯᒃᓴᐅᑎᑕᐅᓂᐊᕐᒪᑦ ᑕᐃᔭᐅᓗᓂ The Terror, ᑎᓕᕖᓴᒃᑯᑦ AMC-ᑯᑦ ᒫᔨ 26-ᒥ.

ᐃᓴᓗᒃ, ᐃᔾᔪᐊᖅᓯᔨᐅᓗᓂ ᐱᖑᐊᕐᓂᐊᕐᒪᑕ ᓇᑦᑎᓕᖕᒥᐅᖑᐊᖑᓗᓂ ᐊᖑᓇᓱᒃᑎ ᑕᑯᔪᕕᓂᖅ ᑖᒃᑯᓂᖓ ᐅᒥᐅᕐᔪᐊᒥᐅᑕᕐᓂᒃ, ᓯᕗᓪᓕᖅᐹᖑᓗᓂ ᑕᕐᕆᔭᐅᑎᒥ.

“ᐊᒃᓱᐊᓗᒃ ᖁᕕᐊᓇᓚᐅᖅᑐᖅ. ᐊᒻᒪᓗ ᓴᓇᓯᒪᑦᑎᐊᖅᖢᓂ ᐊᐅᓚᔫᓕᐊᕆᔭᐅᓚᐅᕐᒪᑦ ᑖᓐᓇ ᑕᕐᕆᔭᐅᑎ ᑕᒪᕐᒥᓕᒫᖅ ᓴᓇᑦᑎᐊᖅᓯᒪᔪᖅ,” ᐅᖃᕆᓪᓗᓂ. “ᖄᖏᖅᓯᔪᖅ ᕿᓚᓈᕆᓚᐅᖅᑕᑦᑎᓐᓂᒃ.”

ᑕᑯᒃᓴᐅᑎᑕᐅᓂᐊᖅᑐᑦ ᐅᓂᒃᑳᖅᓯᒪᔪᑦ ᑖᒃᑯᓂᐊ ᐊᒥᐊᓕᒃᑲᓂ AMC-ᑯᑦ, ᖁᓕᓂᒃ ᐃᖃᕐᕋᓂᒃ ᓈᓯᓪᓗᑎᒃ ᑕᑯᒃᓴᐅᑎᑕᐅᓂᐊᖅᑐᑦ. ᐃᓴᓗᒃ ᑕᑯᒃᓴᐅᖃᑦᑕᓚᖓᔪᖅ ᓯᕗᓪᓕᖅᐹᒥ ᐱᖓᓱᐃᖅᓱᕐᓗᓂ, ᐅᓂᒃᑳᖅᓯᒪᓚᐅᖅᑐᖅ ᑕᐃᒪᓐᓇ ᖃᕆᑕᐅᔭᑎᒍᑦ ᑐᕌᕐᕕᖓᓂ IMDB-ᑯᑦ. ᐅᓇᓗ ᐊᐸᔭᑕ ᑰᑦᑎᖅ, ᓄᓇᕗᒥᐅᖅᑕᐅᖅ ᐃᔾᔪᐊᖅᓯᔨ, ᐊᖓᒃᑯᖑᐊᖑᓂᐊᖅᑐᖅ ᑕᑯᒃᓴᐅᓂᐊᕐᒥᔪᖅ ᐱᖓᓱᐃᖅᓱᕐᓗᓂ. ᐃᖃᓗᖕᒥᐅᖅ ᕕᓂ ᖃᕆᑕᖅ ᑕᑯᒃᓴᐅᓂᐊᕐᒥᔪᖅ ᐃᓄᖑᐊᖑᓗᓂ ᑯᕕᔪᕐᒥᒃ ᐊᑎᖃᖅᑐᖅ, ᐊᑕᐅᓯᐊᕐᓗᓂ ᑕᑯᒃᓴᐅᓂᐊᕐᒥᔪᖅ.

ᐃᓛᒃ ᑖᓐᓇ ᐃᓴᓗᒃ ᑕᕝᕙᓂ ᑕᕐᕆᔭᐅᑎᒥ ᐃᓚᓕᐅᑎᓯᒪᒻᒪᕆᒃᑐᕐᓕ The Terror-ᒥ, ᓇᖕᒥᓂᖅ ᖃᐅᔨᒪᑦᑎᐊᖅᑐᖅ ᐊᔾᔨᓕᐅᖅᑕᐅᕕᒋᓚᐅᖅᑕᒥᓂᒃ. ᑭᓯᐊᓂᓕ ᐊᓯᖏᓐᓂ ᐊᐅᓚᔫᓕᐅᖅᑕᐅᔪᓂ ᐃᓚᐅᓚᐅᖏᒻᒪᑦ ᓴᓇᔭᐅᑎᓪᓗᒍ.

“ᐱᖑᐊᖅᑎᐅᒐᓗᐊᖅᖢᖓ ᐊᔾᔨᓕᐅᖅᑕᐅᓪᓗᖓ ᓴᓇᔭᐅᔪᓯᖓᓂᒃ ᑕᑯᑎᑕᐅᓚᐅᖏᑦᑐᖓ ᑭᓯᐊᓂ ᐱᐊᓂᒃᑕᐅᑦᑎᐊᖅᐸᑦ,” ᐅᖃᕆᓪᓗᓂ. “ᑕᑯᒃᓴᐅᓕᖅᐸᑦ ᑭᓯᐊᓂ ᑎᓕᕖᓴᒃᑯᑦ, ᑕᑯᓂᐊᖅᑐᒍᑦ ᐊᒃᓱᐊᓗᒃ ᐱᔭᕆᑐᖕᒪᑦ ᓴᓇᓪᓗᒍ… ᕿᓚᓈᖅᑐᖓ ᑕᐃᒪ ᑕᑯᒋᐅᕐᓂᐊᕐᒥᒐᒃᑯ.”

ᐊᔾᔨᓕᐅᖅᑕᐅᒋᐊᖅᑐᓚᐅᖅᑐᑦ ᑕᕆᐅᕌᓘᑉ ᐊᑭᐊᓂ ᐊᔾᔨᓕᐅᕆᕝᕕᖕᒥ ᐴᑕᐱᔅᑦ, ᕼᐊᖑᕆᒥ, ᓄᕕᐱᕆ 2016-ᒥ. ᑕᐃᑯᖓᐅᔭᐅᓪᓗᑎᒃ ᐱᖑᐊᖅᑎᐅᓂᐊᖅᑐᑦ ᐊᔾᔨᓕᐅᖅᑕᐅᖃᑦᑕᓚᐅᖅᑐᑦ ᔫᕈᑉᒥ, ᑯᕉᓯᐊᒥ, ᒪᐃ 2017-ᒥ ᑲᔪᓯᓚᐅᖅᑐᑦ.

ᓯᕗᓂᖓᓂ ᐃᓚᐅᔪᒪᔪᑦ ᐊᔾᔨᓕᐅᕆᐊᖃᓚᐅᖅᑐᑦ ᐊᔾᔨᓕᐅᖅᑎᓄᑦ ᐊᔾᔨᓕᐅᕈᒥᓇᕐᒪᖔᑕ ᕿᒥᕈᔭᐅᑎᓪᓗᒋᑦ - ᓇᖕᒥᓂᖅ ᓴᓇᔪᕕᓂᖅ ᐊᔾᔨᓕᐅᖅᖢᓂ ᐱᒋᐊᖃᕐᓂᕋᖅᑕᐅᒐᒥ ᐱᖑᐊᖃᑎᒥᓄᑦ ᓃᕝ ᓂᐃᓪᓴᓐᒧᑦ, ᑖᓐᓇᓕ ᐊᑯᑭᑦᑐᒥᐅᖑᓪᓗᓂ ᐱᖑᐊᖅᑎ ᐅᓂᒃᑳᓂᒃ ᐃᔾᔪᐊᖅᓯᔨᐅᓪᓗᓂ ᐊᑐᕐᓂᖃᓪᓗᑐᖅᑐᒥᒃ ᐃᓚᐅᖃᑕᐅᔪᖅ The Terror-ᒥ - ᑖᓐᓇᑦᑕᐅᖅ ᐃᓴᓗᒃ ᐅᒥᐊᕐᔪᐊᒃᑯᑦ ᐃᓚᐅᓐᓂᕐᒪᑦ ᐃᑳᖅᓯᔪᒥ ᐅᑭᐅᖅᑕᖅᑐᒥᐅᑦ ᑕᕆᐅᖓᓂᒃ 2016-ᒥ.

“ᓇᖕᒥᓂᖅ ᑕᑯᔭᖅᑐᓚᐅᖅᑕᒃᑲ ᐃᓗᕕᖏᑦ ᑕᒪᐃᑕᓗ ᐊᔪᓕᖅᓯᒪᕕᕕᓂᖏᑦ, ᐃᓕᓴᖅᑕᐅᓚᐅᖅᖢᖓᓗ ᑕᐃᒃᑯᓂᖓ ᖃᐅᔨᒪᔪᓂᑦ ᐅᒥᐊᕐᔪᐊᑦ ᐅᐸᒃᑕᕕᓂᖏᓐᓂᒃ. ᐅᓂᒃᑳᖅ ᐊᔾᔨᓕᐅᖅᑕᐅᑎᓪᓗᒍᓕ ᓯᒃᑲᖓᔫᔮᓚᐅᖅᑐᖅ ᑕᒫᓃᓚᐅᖏᒻᒪᑕ,” ᐅᖃᕆᓪᓗᓂ, ᐅᕙᓐᓄᑦ ᐊᑕᐅᑦᑎᒃᑯᑦ ᐱᖑᐊᖅᑎᐅᓚᐅᕋᒪ Stratford Theatre-ᒥ ᐊᓐᑎᐅᕆᐅᒥ ᕗᕌᖕᑭᓚᓐ ᐅᒥᐊᕐᔪᐊᖏᓐᓂᒃ ᐅᓂᒃᑳᖅ ᐱᖑᐊᖅᑎᓄᑦ ᐃᔾᔪᐊᖅᑕᐅᑎᓪᓗᒋᑦ ᑕᕐᕆᔭᕐᕕᖕᒥ ᑕᑯᕋᓐᓈᖅᑎᑦᑎᓚᐅᕐᒥᖕᒪᑕ.”

ᐊᐱᕆᔭᐅᒋᓪᓗᓂ ᑭᖑᓪᓕᕐᒥ ᐅᑭᐅᒥ ᑕᒪᓐᓇ ᑎᓕᕖᓴᒃᑯᑦ ᑕᕐᕆᔭᐅᑎ ᑲᔪᓯᑎᑕᐅᓂᐊᕐᒪᖔᑦ The Terror-ᒥᒃ ᐅᓂᒃᑳᖅᑐᐊᖅ, ᐃᓴᓗᒃ ᓇᓗᓂᕋᓚᐅᖅᑐᖅ.

“ᖃᓄᖅ ᐃᓱᓕᓐᓂᐊᕐᒪᖔᑦ ᑕᕐᕆᔭᐅᑎᓂ ᑐᓴᖅᑎᑕᐅᓯᒪᖏᒃᑲᓗᐊᖅᑐᖓ ᑭᓯᐊᓂᓕ ᐅᓂᒃᑳᖓᓂ ᑕᒪᐃᑕ ᑖᒃᑯᐊ ᐃᔾᔪᐊᖅᑕᕗᑦ ᑐᖁᔪᐃᓐᓇᐅᓐᓂᕐᒪᑕ,” ᐅᖃᖑᐊᕆᓪᓗᓂ.

ᐃᓴᓗᒃ ᐱᔭᒃᓴᖃᐅᓗᐊᒧᑦ ᑕᒪᑐᒪᓂ ᐊᓯᖏᓐᓄᑦ ᐃᓱᒪᒋᔭᐅᔪᓂᒃ ᖃᐅᔨᓴᕋᓱᐊᖅᓯᒪᖏᑦᑐᕉᖅ The Terror-ᒥ ᑕᕐᕆᔭᐅᑎᐊᓂᒃ ᑕᐅᑐᒃᓯᒪᔪᓂᑦ, ᑭᓯᐊᓂᓕ ᑐᓴᖅᑎᑕᐅᓯᒪᓕᖅᑐᖅ ᐃᓚᓐᓈᖏᓐᓂᑦ ᖃᑕᖑᑎᖏᓐᓂᓪᓗ, ᐅᖃᕆᓪᓗᓂ.

“ᖃᕆᑕᐅᔭᑎᒍᑦ ᑐᓴᖅᑎᑕᐅᖃᑦᑕᖅᑐᖓ ᐃᓚᓐᓈᓐᓂᑦ ᐊᒃᓱᐊᓗᒃ ᐅᐱᒍᓱᖕᓂᕋᖅᖢᑎᒃ ᑕᕐᕆᔭᐅᑎᓕᐅᖅᑐᓂ ᐃᓚᐅᓚᐅᕋᒪ ᐊᒻᒪᓗ ᐅᒃᐱᕐᓇᒻᒪᕆᓚᐅᖅᑐᖓᒎᖅ ᐊᒻᒪᓗ ᖁᕕᐊᓱᓚᐅᕐᓂᕋᖅᖢᑎᒃ ᑕᑯᕋᓐᓈᖅᖢᑎᒃ ᑖᓱᒥᖓ ᑕᕐᕆᔭᐅᑎᒥᒃ, ᐊᑐᖅᑕᐅᔪᕕᓂᕐᓂᒃ ᐅᓂᒃᑳᖅᑐᒥᒃ ᑐᓴᕈᒥᓇᖅᑐᓂᒃ,” ᐅᖃᕆᓪᓗᓂ.

ᐃᓚᐅᖃᑕᐅᓚᐅᖅᑐᓄᑦ ᑕᑯᔭᐅᔪᒪᓪᓗᑐᖅᑐᖅ ᓇᓗᓇᖏᑦᑐᖅ ᑕᕐᕆᔭᐅᑎ ᑖᓐᓇ ᑕᑯᒃᓴᐅᑎᑕᐅᖄᖅᑎᓪᓗᒍ ᒫᔨ 26-ᒥ ᐅᑯᓄᖓᓗᐊᖑᐊᖅ ᑕᑯᔭᐅᔪᒪᓚᐅᖅᑐᖅ ᐅᕐᓱᖅᑑᒥᐅᓄᑦ ᓵᒥ ᖁᕕᒃᒧᑦ, ᖃᐅᔨᒪᓐᓂᕐᒪᑦ ᓇᓂᓯᓪᓗᓂᓗ ᓇᒥ ᑭᕕᓯᒪᒋᐊᖓᓂᒃ ᕗᕌᖕᑭᓚᓐ ᐅᒥᐊᕐᔪᐊᖓᑕ ᐊᐃᑉᐸᖓ HMS Terror. ᓯᕗᓪᓕᖅᐹᒥ ᑕᑯᔭᐅᔪᕕᓂᖅ 2016-ᒥ ᐅᕐᓱᖅᑑᒥᐅᑦ ᕿᑭᖅᑕᖓᑕ ᑲᓇᖕᓇᖔᖓᓂ, ᓇᓂᔭᐅᓚᐅᕐᒪᑦ ᐊᕐᕌᒍᑎᓪᓗᒍ ᑭᖑᓂᖓᓂ ᐃᐅᕋᐱᔅ ᓇᓂᔭᐅᓯᒪᓕᖅᑎᓪᓗᒍ ᐅᒥᐊᕐᔪᐊᖓ Queen Maud Gulf-ᒥ.

“ᖁᕕᐊᓇᓚᐅᖅᑐᖅ ᑕᕐᕆᔭᐅᑎ ᑕᐅᑐᒃᖢᒍ ᓯᕗᓪᓕᖅᐹᒥ,” ᐅᓂᒃᑳᖅᖢᓂ ᖁᕕᒃ The Terror ᑕᕐᕆᔭᐅᑎᓕᐊᕆᔭᐅᓂᖓᓂᒃ, ᑭᓯᐊᓂᓕ ᐃᓱᒪᓇᓚᐅᖅᑐᕉᖅ ᓯᕗᓂᖓᓂ ᐅᖓᓯᖕᓂᖅᓴᒥ ᐱᒋᐊᖓᕐᕕᖃᕐᓂᖅᐸᑕ ᐅᓂᒃᑳᕐᓗᑎᒃ ᐱᒃᑯᒥᓇᕋᔭᓚᐅᕐᒪᑦ ᓱᖕᒪᑦ ᕗᕌᖕᑭᓚᓐ ᐅᒥᐊᖅᑐᕈᒪᓚᐅᕈᓯᖓ ᐃᓚᓕᐅᑎᔭᐅᓗᓂ. “ᑕᒪᐃᑕ ᐅᓂᒃᑳᓂ ᐃᓚᓕᐅᑎᔭᐅᓂᐊᖅᐸᑕ ᑖᕙᖓᑦ ᐱᒋᐊᕐᕕᖃᖅᑐᒃᓴᐅᔪᑦ ᐃᓱᒪᓚᐅᖅᑐᖓ, ᑕᒪᐃᓐᓂᒃ ᐅᓂᒃᑳᖅᓯᒪᓗᓂ ᑕᐅᑐᒃᓗᒍ ᐱᒃᑯᒥᓇᕐᓂᖅᓴᐅᓇᔭᖅᑐᖅ.”

ᕗᕌᖕᑭᓚᓐ ᐅᒥᐊᕐᔪᐊᕕᓂᖏᑦ, ᐃᑳᖅᓯᓇᓱᐊᓚᐅᕐᒪᑕ ᐅᑭᐅᖅᑕᖅᑐᒥᐅᑦ ᐃᑭᖓᒎᕐᓗᑎᒃ ᑖᕗᖓ ᑐᓄᐊᓄᑦ ᐅᒥᐊᕐᔪᐊᑦ ᑖᒃᑯᐊ ᐊᐅᓪᓚᖅᑐᕕᓃᑦ ᐱᒋᐊᕐᕕᖃᖅᖢᑎᒃ ᐃᖓᓚᓯᒃᑯᑦ ᓄᓇᖓᓂᒃ 1845-ᒥ ᐊᔪᓕᓚᐅᕐᓂᕐᒪᑕ ᓯᑯᒥ ᒫᓐᓇ ᐃᖃᓗᒃᑑᑦᑎᐊᒥᐅᑦ ᕿᑭᖅᑕᖓᑕ ᖃᓂᒋᔭᖓᓃᓕᖅᖢᑎᒃ ᑕᒪᑐᒪᓂᓴᐃᓐᓇᖅ ᐅᑭᐅᒥ ᑕᒫᓂ ᐅᑭᐅᖅᓰᔪᕕᓃᑦ. ᐃᕗᐊᓄᑦ ᐊᖕᒪᖅᑕᐅᓐᓂᕐᒪᑦ ᑕᒫᓂ ᑭᕕᓐᓂᖅᖢᓂ. ᑕᒪᐃᑕ 129 ᐅᒥᐊᖅᑐᖅᑏᑦ ᑐᖁᓚᐅᖏᓐᓂᕐᒥᓂ ᐃᓚᖏᑦ ᐊᑯᓂ ᐅᑭᐅᓂᒃ ᐃᓅᓐᓂᕐᒪᑕ ᐱᕐᓕᓚᐅᖏᓐᓂᕐᒥᓂ ᐊᒃᓱᕈᖅᑐᐊᓘᓪᓗᑎᒃ ᐃᒃᑮᕌᓗᖕᒥ ᐃᓄᔪᓐᓃᓚᐅᖏᓐᓂᕐᒥᓂ.