Skip to content

ᓄᓇᕗᒻᒥ ᑐᓴᒐᒃᓴᓕᕆᔨᒃᑯᑦ ᓱᒃᑲᔪᒥᒃ ᐃᓕᓐᓂᐊᕐᓂᖃᖅᐳᖅ ᓄᑖᓂᒃ ᓯᐊᒻᒪᖅᑎᑦᑎᔨᐅᔪᓄᑦ

ᑲᐃᓯ ᓚᓵᑦ ᐋᖅᑭᒃᓱᐃᔨᐅᕗᖅ ᓄᓇᕗᒻᒥ ᑐᓴᒐᒃᓴᓕᕆᔨᒃᑯᓐᓄᑦ ᐊᒻᒪ ᐃᓚᐅᖃᑕᐅᔪᒥ ᕙᐃᔅᐳᒃᑯᑦ ᐅᖃᓕᒫᖅᑎᓄᑦ ᐱᕙᓪᓕᐊᑎᑕᐅᓂᖓᓂ ᓱᒃᑲᒃᑎᒋᐊᖅᑎᑦᑎᓂᐅᔪᒥ ᐱᓕᕆᐊᖑᔪᒥ.

ᓄᓇᕗᒻᒥ ᑐᓴᒐᒃᓴᓕᕆᔨᒃᑯᑦ ᐋᖅᑭᒃᓱᐃᔨᖓ ᑲᐃᓯ ᓚᓵᑦ, ᓴᐅᒥᖕᒥ, ᐊᒻᒪ ᓄᓇᕗᒻᒥ ᑐᓴᒐᒃᓴᓕᕆᔨᒃᑯᑦ ᓴᖅᑭᑎᑦᑎᔨᐅᔪᒥᒃ/ᐊᐅᓚᑦᑎᔨᒻᒪᕆᒃ ᐳᕉᔅ ᕚᓪᐱ ᐅᖃᐅᓯᖃᖅᐳᑦ ᐃᓱᒪᓕᐊᖑᔪᓂ ᕙᐃᔅᐳᒃᑯᑦ ᐅᖃᓕᒫᖅᑎᓄᑦ ᐱᕙᓪᓕᐊᑎᑕᐅᓂᖓᓂ ᓱᒃᑲᒃᑎᒋᐊᖅᑎᑦᑎᓂᐅᔪᒥ ᑐᕌᓐᑐᒥ ᒪᐃ 28-ᖑᑎᓪᓗᒍ.

ᑐᓴᖅᓯᒪᔪᒃᓴᐅᕗᑎᑦ ᐅᓇ ᐊᒃᓱᕈᕐᓇᖅᖢᓂ ᐱᓕᕆᓂᕐᒦᓐᓂᕐᒧᑦ ᑐᓴᒐᒃᓴᓕᐊᓄᑦ. ᐃᓱᒪᒋᓇᒍ ᖃᐅᔨᓴᕐᓂᐅᔪᓂ ᑕᑯᒃᓴᐅᑎᑦᑎᔪᒥ ᑲᓇᑕᒥᐅᑕᑦ ᓱᓕ ᐅᖃᓕᒫᖅᐸᖕᓂᖏᓐᓂ ᑎᑎᕋᖅᓯᒪᔪᓂ ᑐᓴᒐᒃᓴᓕᐊᖑᔪᓂ, ᑎᑎᕋᖅᓯᒪᔪᓂ ᖁᕝᕙᖅᓴᐃᓂᐅᔪᒥ ᑲᑕᒃᓯᒪᕗᖅ ᑲᓇᑕᓕᒫᒥ. ᐊᒥᓱᐃᑦ ᐅᑯᓂᖓ ᖁᕝᕙᖅᓴᐃᓂᐅᔪᓄᑦ ᑮᓇᐅᔭᒥᓂᑦ ᐊᑐᖅᐳᑦ ᐊᒥᐊᓕᑲᒥ ᓄᑖᙳᖅᐸᓪᓕᐅᓂᐅᔪᓂ ᐱᔨᕆᔨᕐᔪᐊᖑᔪᓄᑦ ᕙᐃᔅᐳᒃ ᐊᒻᒪ ᒎᒍᖔᒥᑦ.

ᐅᕙᓂ ᓄᓇᕗᒻᒥ ᑐᓴᒐᒃᓴᓕᕆᔨᒃᑯᓐᓂ, ᐅᐱᑉᐳᒍᑦ ᑐᓴᒐᒃᓴᓕᕆᔨᒋᔭᐅᓂᑦᑎᓐᓂ ᐊᕐᕌᒍᓄᑦ 70 ᐅᖓᑖᓄᑦ, ᐊᒻᒪᓗ ᐱᓕᕆᕗᒍᑦ ᓴᓇᓂᕐᒧᑦ ᐊᓯᔾᔨᕈᑕᐅᔪᓂ ᐱᔭᕆᐊᓕᖕᓂ ᐱᔨᑦᑎᕋᐃᓐᓇᕐᓂᕐᒧᑦ ᐊᕐᕌᒍᒃᑲᓐᓂᕐᓄᑦ 70-ᓄᑦ. ᐱᔪᒪᓂᕐᔪᐊᖑᓪᓗᓂ ᑐᕌᒐᒃᓴᐅᕗᖅ ᐃᓱᒪᒋᔭᖃᖅᖢᓂ ᖃᓄᐃᓕᖓᓂᖓᓂ ᐱᓕᕆᓂᕆᔭᑦᑎᓐᓂ.

ᓇᓂᓯᒋᔨᕆᓚᐅᖅᓯᒪᔭᑦᑎᓐᓂ ᔮᒃ ᓯᒡᕚᓪᑕᓯᓐ ᐊᑐᓪᓕᖅᑎᓵᓕᔨᐅᓚᐅᖅᑎᓪᓗᒍ ᖃᕋᓴᐅᔭᒃᑰᕆᓂᕐᒥ, ᓴᖅᑭᑎᑦᑎᓪᓗᓂ ᓯᕗᓪᓕᖅᐹᒥ ᖃᕋᓴᐅᔭᒃᑯᑦ ᑐᑭᓯᒋᐊᖅᑕᕐᕕᖓᓂ 1995-ᒥ, ᑭᖑᕙᐸᓗᒃᐳᒍᑦ ᐅᖃᓘᑎᕋᓛᑎᒍᑦ ᐊᒻᒪ ᐃᓅᖃᑎᒌᖕᓄᑦ ᓯᐊᒻᒪᖅᑎᑦᑎᓂᐅᔪᒥ ᐱᓕᕆᐊᖑᓂᐅᔪᒧᑦ. ᐊᙳᑎᓇᓱᐊᖅᓯᒪᕗᒍᑦ, ᐊᒻᒪ ᐊᔾᔨᓄᑦ ᓵᓚᖃᕋᓱᐊᕐᓂᐅᔪᑦ ᐅᕙᑦᑎᓐᓂ ᐃᑲᔪᖅᐳᑦ ᓱᒃᑲᒃᑎᒋᐊᖅᑎᑦᑎᓇᓱᐊᕐᓂᕐᒧᑦ. ᑕᑯᓪᓗᓂ ᕙᐃᔅᐳᒃᑯᑎᓐᓂ ᑕᑯᒃᓴᐅᓂᑦᑎᓐᓂ ᐱᕈᖅᐸᓪᓕᐊᓂᖓᓂ, ᐅᓂᒃᑳᓕᐅᖅᑎᕗᑦ ᖁᕕᐊᑉᐳᑦ ᓯᕗᓪᓕᖅᐸᐅᓂᖏᓐᓂ ᑐᓂᓯᓂᕐᒧᑦ ᑐᓴᒐᒃᓴᓕᐊᖑᔪᓂ ᓂᕆᐅᒋᔭᔅᓯᓐᓂ ᑕᑯᓂᕐᒧᑦ ᐅᕙᑦᑎᓐᓂ.

ᐊᒻᒪ ᓱᓕ, ᓲᕐᓗ ᒪᕐᕉᖕᓂ ᓯᕗᒻᒧᑦ ᐱᓱᒃᑳᖓᑦᑕ, ᐊᔭᒃᑕᐅᕗᒍᑦ ᐊᑕᐅᓯᕐᒧ ᐱᓱᖕᓂᕐᒥ ᐅᑎᒧᑦ – ᕙᐃᔅᐳᒃᑯᑦ ᖃᐅᔨᓴᖅᑕᐅᓂᑯᖏᓐᓂ ᑕᑯᒃᓴᐅᑎᑦᑎᕗᑦ ᐊᑭᑦᑐᕋᐅᑎᓂᑦᑎᓐᓂ ᐊᓯᖏᓐᓂ ᐅᑭᐅᖅᑕᖅᑐᒥ ᓯᐊᒻᒪᖅᑎᑦᑎᔨᐅᔪᓄᑦ ᖃᕋᓴᐅᔭᒃᑰᖅᑐᓄᑦ ᐅᓇ ᑐᑭᓕᐅᕆᕙᙱᓚᖅ ᐱᕈᖅᐹᓪᓕᕐᓂᐅᔪᒥ ᖁᕝᕙᖅᓴᐃᓂᐅᔪᒧᑦ.

ᐊᑕᐅᓯᐅᖃᑕᐅᒐᓗᐊᖅᑎᓪᓗᑕ ᐃᓕᓴᕆᔭᐅᓛᖑᓂᐅᔪᒥ ᑐᓴᒐᒃᓴᓕᕆᓂᕐᒧᑦ ᑲᑐᔾᔨᖃᑎᒌᖑᓂᑦᑎᓐᓂ ᑲᓇᑕᒥ, ᓴᖅᑭᑎᑦᑏᓐᓇᖅᑐᒥ ᓵᓚᖃᕋᓱᐊᕐᓂᐅᔪᒥ-ᓵᓚᖃᖅᑐᓂ ᐅᓂᒃᑳᓕᐊᓂ ᐊᒻᒪ ᑎᑎᕋᖅᓯᒪᔪᓄᑦ ᑐᓴᒐᒃᓴᓕᕆᔨᐅᔪᓄᑦ, ᓄᓇᓕᑦᑎᓐᓂ ᐱᑕᖃᖅᐳᖅ ᐅᕙᑦᑎᓐᓂ ᖀᒥᒍᓱᒃᑐᓂ, ᐊᒻᒪᓗ ᐃᓚᖏᑦ ᖃᐅᔨᒪᙱᑦᑎᐊᖅᑐᓂ ᑭᓇᐅᓂᑦᑎᓐᓂ.

ᑕᑯᔪᓐᓇᖅᐳᒍᑦ, ᐅᖃᐅᓯᐅᓪᓗᓂ ᕙᐃᔅᐳᒃᑯᑦ ᐊᒻᒪ ᒎᒍᓪ ᖃᐅᔨᓴᖅᑕᐅᓯᒪᔪᓄᑦ, ᐊᒥᓱᓂ ᐃᓄᖕᓂ ᐅᖃᓕᒫᓲᖑᔪᓂ ᐱᓕᕆᐊᕆᔭᑦᑎᓐᓂ ᐊᒻᒪ ᐅᑎᓲᖑᕗᑦ ᐅᖃᓕᒫᒃᑲᓐᓂᕈᒪᔪᓄᑦ. ᑕᒻᒪᙱᖦᖢᑕ ᐃᓚᖏᓐᓂ ᐱᓕᕆᓂᖃᖅᐳᖑᑦ.

ᑕᐃᒪᓐᓇᑎᒋ, ᐱᓕᕆᐊᒃᓴᖃᖅᐳᒍᑦ ᐱᔨᑦᑎᑦᑎᐊᒃᑲᓐᓂᕐᓂᕐᒧᑦ ᐅᖃᓕᒫᖅᑎᑦᑎᓐᓄᑦ, ᑭᓯᐊᓂ ᓇᒧᙵᖅᓯᓲᖑᕗᒍᑦ ᐊᒃᓱᕈᕐᓂᑦᑎᓐᓂ? ᑕᐅᑐᙱᓐᓂᕐᒥ ᐃᓂᖃᕆᕗᒍᑦ. ᖃᐅᔨᒪᕗᒍᑦ ᐃᓚᖓᒍᑦ ᐃᑲᔪᖅᑕᐅᓂᖃᕆᐊᖃᕐᓂᑦᑎᓐᓂ.

ᓄᓇᕗᒻᒥ ᑐᓴᒐᒃᓴᓕᕆᔨᒃᑯᑦ ᐋᖅᑭᒃᓱᐃᔨᖓ ᑲᐃᓯ ᓚᓵᑦ, ᒪᕐᕈᖓᓂ ᓴᐅᒥᖕᒥ, ᐃᓚᐅᖃᑕᐅᕗᖅ New York Times ᐋᖅᑭᒃᓱᐃᔨᒻᒪᕆ ᖃᕋᓴᐅᔭᑎᒍᑦ ᐊᒻᒪ ᐅᖃᓕᒫᖅᑎᓄᑦ ᐅᖃᓪᓚᖕᓂᐅᔪᒥ ᐅᒃᐱᕆᔭᐅᓂᖏᓐᓄᑦ ᑐᓴᒐᒃᓴᓕᐊᓄᑦ ᑎᑎᕋᐃᓂᐅᕙᒃᑐᓄᑦ ᕙᐃᔅᐳᒃᑯᑦ ᐅᖃᓕᒫᖅᑎᓄᑦ ᐱᕙᓪᓕᐊᑎᑕᐅᓂᖓᓂ ᓱᒃᑲᒃᑎᒋᐊᖅᑎᑦᑎᓂᐅᔪᒥ ᑐᕌᓐᑐᒥ ᒪᐃ 29-ᖑᑎᓪᓗᒍ.

ᑭᓯᐊᓂ ᐄᔭᒐᐅᕗᖅ ᐊᔪᕐᓇᖅᑐᒥ ᐄᔭᕆᐊᒃᓴᖅ ᑲᒻᐸᓂᐅᔪᖅ ᓂᕆᔪᒥᒃ ᐅᓪᓗᕈᒻᒥᑕᕐᓂ ᐊᑐᐃᓐᓇᖃᖅᑎᑦᑎᓂᖓᓂ ᑕᐃᔅᓱᒥᖓ ᐃᑲᔪᕐᓂᐅᔪᒥ. ᕙᐃᔅᐳᒃ ᓱᓕᓂᕋᖅᓯᒪᕗᑦ ᐃᒻᒥᒃᑰᖅᑐᒥ ᑮᓇᐅᔭᓕᐅᕋᓱᐊᙱᑦᑐᓂ ᑲᓇᑕᒥ ᑐᓴᒐᒃᓴᓕᐊᓄᑦ ᑎᑎᕋᐃᓂᐅᔪᓂ ᑐᙵᕕᖓ $2.5 ᒥᓕᐊᓐᓂ ᐱᕚᓪᓕᖅᑎᑦᑎᓂᐊᖅᑐᓂ 15-ᓂ ᑲᓇᑕᒥ ᑐᓴᒐᒃᓴᓕᐊᓄᑦ ᑎᑎᕋᐃᕙᒃᑐᓂ ᑎᒥᖁᑕᐅᔪᓂᑦ. 15-ᖑᔪᓂ ᐅᐸᒃᑕᐅᔪᓄᑦ ᐃᓚᐅᖃᑕᐅᓂᕐᒧᑦ ᕙᐃᔅᐳᒃᑯᑦ ᑲᓇᑕᒥ ᐅᖃᓕᒫᖅᑎᓄᑦ ᐱᕙᓪᓕᐊᑎᑕᐅᓂᖓᓂ ᓱᒃᑲᒃᑎᒋᐊᖅᑎᑦᑎᓂᐅᔪᒥ, 11 ᐊᑎᓕᐅᖃᑕᐅᓚᐅᖅᐳᑦ, ᐃᓚᖃᖅᑐᒥ ᓄᓇᕗᒻᒥ ᑐᓴᒐᒃᓴᓕᕆᔨᒃᑯᑦ.

ᓱᒃᑲᒃᑎᒋᐊᖅᑎᑦᑎᓂᐅᔪᖅ ᐱᕕᒃᓴᖃᕐᓂᐅᕗᖅ ᓴᖅᑭᑎᑦᑎᔨᐅᔪᓄᑦ ᐃᓕᑦᑎᓂᕐᒥ ᖃᓄᖅ ᑕᐅᑐᒃᑕᑐᐊᖃᑲᐃᓐᓇᕈᓐᓇᕐᓂᕐᒧᑦ ᖁᙱᐊᖅᑎᐅᔪᓄᑦᐃᓕᔅᓯᓐᓄᑦ, ᐅᖃᓕᒫᖅᑎᕗᑦᐊᒻᒪ ᐱᕈᖅᓴᐃᓗᑕ ᓇᖕᒥᓂᖃᕐᓂᕐᒧᑦ ᐆᒃᑐᕋᐅᑎᐅᔪᒥᑦ. ᐊᔪᕆᖅᓱᖅᑕᐅᓪᓗᑕ ᖁᑦᑎᓛᖑᔪᓂ ᑐᓴᒐᒃᓴᓕᕆᔨᐅᔪᓂ ᑎᑎᕋᐃᕙᒃᑐᓄᑦ ᐊᒻᒪ ᓂᐅᕕᐊᒃᓴᖃᖅᑎᐅᔪᓄᑦ ᖃᐅᔨᒪᔨᒻᒪᕆᐅᔪᓂᑦ –New York Times, Washington Post, ᐊᒻᒪ ᐊᓯᖏᓐᓂᐊᑐᓕᖅᑎᑦᑎᓂᐊᖅᐳᒍᑦ ᐃᓱᒪᒋᔭᐅᓯᒪᔪᒥ ᐃᓱᒪᒋᔭᑦᑎᓐᓂ ᐊᔭᐅᕆᓂᐊᖅᑐᒥ ᓇᖕᒥᓂᕆᔭᑦᑎᓐᓂ ᓯᕗᒻᒧᐊᖅᑎᑕᐅᓂᖓᓄᑦ, ᐃᑲᔪᖅᓯᖅᑕᐅᓗᓂ $75,000-ᓂ ᑮᓇᐅᔭᓂᑦ ᕙᐃᔅᐳᒃᑯᑦ ᓴᓇᓂᕐᒧᑦ ᐃᓱᒪᓕᐊᖑᔪᒥ ᐱᓪᓚᕆᙳᖅᑎᑕᐅᓂᖓᓂ.

ᐄᓚᐅᖅᐸᕗᑦ ᐄᔨᒐᕐᒥ, ᐊᒻᒪᓗ ᑲᑎᙵᓂᕆᔭᕗᑦ ᓴᖅᑭᑎᑦᑎᔨᐅᔪᒥᒃ/ᐊᐅᓚᑦᑎᔨᒻᒪᕆᒃ ᐳᕉᔅ ᕚᓪᐱ, ᐊᐅᓚᑦᑎᔨᐅᔪᖅ ᐋᖅᑭᒃᓱᐃᔨᖓ ᒥᓯᐅᓪ ᑕᐃᓗᕐ, ᖃᕋᓴᐅᔭᑎᒍᑦ ᓂᐅᕕᐊᒃᓴᖃᕐᓂᕐᒧᑦ ᑐᑭᒧᐊᒃᑎᑦᑎᔨᕗᑦ ᒐᐃᑉ ᐸᐅᓕᔅ, ᐊᒻᒪ ᓄᓇᕗᒻᒥ ᑐᓴᒐᒃᓴᓕᕆᔨᒃᑯᑦ ᐋᖅᑭᒃᓱᐃᔨᖓ ᑲᐃᓯ ᓚᓵᑦ – ᐊᐅᓪᓛᓚᐅᖅᐳᑦ ᕙᐃᔅᐳᒃᑯᑦ ᑲᓇᑕᐅᑉ ᑐᕌᓐᑐᒥ ᐊᖓᔪᖅᑳᖃᕐᕕᖓᓄᑦ ᒪᐃ 27-ᒥ 29-ᒧᑦ ᐅᓪᓗᓄᑦ ᐱᖓᓱᓄᑦ ᐃᓕᑦᑎᓂᐅᔪᒧᑦ ᐊᒻᒪ ᑲᓱᖃᑎᒌᖕᓂᕐᒧᑦ ᐊᓯᖏᓐᓂ ᓴᖅᑭᑎᑦᑎᔨᐅᖃᑕᐅᔪᓂ ᓵᙵᔪᓂ ᐊᔾᔨᐸᓗᖏᓐᓂ ᐊᒃᓱᕈᕈᑕᐅᔪᓂᑦ. ᑲᑎᒃᑲᓐᓂᓛᖅᐳᒍᑦ ᒪᓐᑐᕆᐊᒥ ᔪᓚᐃᒥ, ᐊᒻᒪᓗ ᕙᐃᔅᐳᒃᑯᑦ ᓄᓇᕐᔪᐊᖓᓄᑦ ᐊᖓᔪᖅᑳᖃᕐᕕᖓᓂ ᒥᓐᓗ ᐹᒃ, ᑳᓕᕗᐊᓂᐊᒥ ᐋᒍᔅᑎᒥ.

ᑲᑎᙵᓂᕆᔭᕗᑦ ᐊᖏᕐᓚᐅᖅᐳᑦ ᑎᑎᕋᕐᕕᐅᔪᓂ ᑕᑖᖅᑐᓂ ᐃᓱᒪᓕᐊᖑᔪᓄᑦ ᐃᑲᔪᕈᑎᒃᓴᓂ ᑭᐅᓂᕐᒧᑦ ᐱᔭᐅᔭᕆᐊᓕᖕᓂ ᐊᒻᒪ ᐱᔭᐅᔪᒪᔪᓂ ᐅᖃᓕᒫᖅᑎᑦᑎᓐᓂ ᐊᒻᒪ ᐃᑲᔪᖅᓱᐃᔨᒋᔭᑦᑎᓐᓂ. ᓂᕈᐊᒍᓐᓇᖅᐳᑎᑦ ᑕᑯᓛᕐᓂᕐᒧᑦ ᐊᒥᓱᓂ ᒥᑭᓐᓂᖅᓴᐅᔪᓂ ᐊᓯᔾᔨᕐᓂᐅᔪᓂ, ᐊᒻᒪ ᐃᒻᒪᖄ ᐃᓚᖏᓐᓂ ᐊᖏᔫᑕᐅᔪᓂ, ᑎᑭᑉᐸᓪᓕᐊᔪᒧᑦ ᐊᕐᕌᒍᒥ ᐊᒻᒪ ᐅᖓᑖᓄᑦ.

ᖁᕕᐊᑉᐳᒍᑦ ᐱᒋᐊᓛᕐᓂᕐᒧᑦ ᐱᓕᕆᓂᕐᒥ ᐱᓕᕆᐊᒃᓴᐅᔪᒥ ᐱᓕᕆᓲᖑᔪᒥ ᐅᑭᐅᖅᑕᖅᑐᒥᐅᓄᑦ, ᐊᒻᒪ ᐃᓕᔅᓯᓐᓄᑦ ᐃᑲᔪᖅᓯᖅᑕᐅᔭᕆᐊᖃᖅᐳᒍᑦ. ᐊᑐᖅᑎᐅᔪᓄᑦ ᐅᖃᐅᓯᒃᓴᒥᓂᑦ ᐱᒻᒪᕆᐅᕗᖅ ᐱᓕᕆᓂᐅᔪᒧᑦ, ᐊᒻᒪᓗ ᐃᓕᖕᓂ ᐊᐱᕆᓂᐊᖅᐳᒍᑦ ᑭᓱᓂᒃ ᐱᔪᒪᖕᒪᖔᔅᓯ, ᑭᓱᓂᒃ ᐱᔭᕆᐊᖃᕐᓂᔅᓯᓐᓂ, ᖃᓄᐃᒻᒪᑦ ᐃᓚᒋᔭᐅᖃᑕᐅᓂᕐᓂ ᐃᓅᓯᑦᑎᓐᓂ, ᐊᒻᒪ ᖃᓄᐃᓕᐅᕈᓐᓇᕐᒪᖔᑦᑕ ᐱᐅᓂᖅᓴᐅᔪᒥ ᐃᓚᒋᔭᐅᓂᐅᔪᒥ ᐃᓅᓯᕐᓂᑦ.

ᑕᐃᒪᑐᖅ ᐅᕙᑦᑎᓐᓂ ᐃᓚᐅᖃᑕᐅᓂᐊᖅᐳᓯ ᐆᒥᖓ ᐃᖏᕐᕋᓂᐅᔪᒥ (ᐃᓚᐅᑎᑦᑎᔪᓐᓇᙱᒃᑲᓗᐊᖅᑎᓪᓗᑕ ᒥᓐᓗ ᐹᒃᒧᑦ), ᐊᒻᒪ ᐅᕙᑦᑎᓐᓂ ᓯᕗᒻᒧᑦ ᐊᔭᐅᕆᓗᓯ ᐱᔭᕆᐊᖃᓕᕌᖓᑦᑕ.