ᑲᕙᓐ ᑲᓕ ᓄᓇᕗᒻᒦᓚᐅᖅᐳᖅ ᑕᐃᑲᓂ ᐋᓐᓂᕐᓇᖅᑐᒥ 2008-09−ᒥ ᑮᓇᐅᔾᔭᒃᓴᓂᖃᑦᑎᐊᙱᓐᓂᐅᓚᐅᑲᒃᑐᒥ, ᑭᓯᐊᓂ ᐃᕐᙲᓐᓇᑲᐅᑎᒋ ᓱᔪᐃᓂᐅᔪᒥ ᓴᖅᑭᑕᐅᔪᒥ ᓄᕙᒡᔪᐊᕐᓇᖅ−19−ᒥ ᐱᓂᕐᓗᖕᓂᖃᕐᔪᐊᒃᑲᓐᓂᖅᐳᖅ ᓄᓇᕗᒻᒥ ᐊᐅᓪᓛᕐᓂᐅᔪᒧᑦ ᐊᒻᒪ ᐳᓚᕋᖅᑐᓕᕆᓂᕐᒧᑦ ᐱᓕᕆᓂᕐᔪᐊᖑᔪᒥ, ᐅᖃᓚᐅᖅᐳᖅ.
"ᐅᖃᕋᔭᓪᓚᕆᒃᐳᖓ ᐅᓇ ᐱᐅᙱᓐᓂᖅᓴᒻᒪᕆᒃ," ᐅᖃᓚᐅᖅᐳᖅ ᑲᓕ, ᐊᐅᓚᑦᑎᔨᒻᒪᕆᒃ ᐃᖏᕐᕋᓂᕐᒧᑦ ᓄᓇᕗᒻᒥ, ᑮᓇᐅᔭᓕᐅᕋᓱᐊᙱᑦᑐᓂ ᑲᑐᔾᔨᖃᑎᒌᖑᔪᑦ ᐃᓚᖃᖅᑐᒥ 140−ᓂ ᓇᖕᒥᓂᕆᔭᐅᔪᓂᑦ.
ᑯᕆᔅᑏᓇ ᐊᓚᕆᐊᖅ ᓇᓗᓇᐃᖅᓯᔪᓐᓇᖅᐳᖅ ᑖᔅᓱᒥᖓ. ᑭᙵᕐᓂ ᑐᔪᕐᒥᕕᖕᒥ ᑭᙵᓂᑦ (Cape Dorset), ᐱᖓᓱᐃᓐᓇᓂ ᐃᒡᓗᕈᓯᓂᑦ ᐃᓄᖃᖅᐳᑦ 39−ᖑᔪᓂ.
"ᑐᔪᕐᒥᕕᒃᐳᑦ ᐃᓄᖃᙱᑲᓴᑦᑎᐊᖅᐳᖅ ᕿᓚᒻᒥᐅᔪᓄᑦ ᑐᔪᕐᒥᕙᒃᑐᓂ... ᐊᑭᓕᒐᒃᓴᓂ ᐊᑭᓖᕙᙱᑦᑐᒥ," ᐅᖃᓚᐅᖅᐳᖅ ᐊᓚᕆᐊᖅ, ᐊᐅᓚᑎᑦᑎᓯᒪᔪᖅ ᕼᐅᐃᑦ ᕼᐅᐃᑦ ᐳᓚᕋᕐᓂᐅᔪᓄᑦ ᐊᒻᒪ ᐊᖏᒡᓕᒋᐊᖅᑎᑦᑎᓯᒪᕗᖅ ᐳᓚᕋᕐᓂᕐᒧᑦ ᐊᑐᐃᓐᓇᐅᑎᑦᑎᓂᐅᔪᒥ ᐅᐃᖓᓄ ᑎᒻᒨᓐᒥ ᑕᐃᓴᙵᓂ 1989−ᒥ. "ᑕᒪᕐᒥᑦᑎᐊᖅ ᐳᓚᕋᕐᓂᐅᔪᑦ ᓄᖅᑲᖅᑎᑕᐅᓯᒪᕗᑦ ᐊᐅᔭᒧᑦ... ᖃᐅᔨᒪᙱᓚᖓ ᖃᓄᖅ ᐊᑯᓂᐅᑎᒋᓂᐊᕐᒪᖔᑦ.”
ᓄᓇᕗᒻᒥ ᐃᓄᑭᓐᓂᖅᓴᐅᔪᓂ ᓄᓇᓕᖕᓂ, ᑲᓕ ᐅᖃᓚᐅᖅᐳᖅ ᑯᐊᐸᒃᑯᑦ ᑐᔪᕐᒥᕕᖏᑦ "ᒪᑐᓯᒪᐸᓗᑦᑎᐊᓕᖅᐳᑦ" ᐱᓕᕆᐊᒃᓴᖃᙱᓗᐊᕐᓂᖏᓐᓄᑦ.
ᐊᒃᑐᖅᑕᐅᓂᐅᔪᑦ ᐱᒋᐊᖅᐸᓪᓕᐊᓕᓚᐅᖅᐳᑦ ᒫᔾᔨᒥ ᐅᓯᑲᑦᑕᕐᓂᕐᒧᑦ ᑲᓇᑕᒥ ᓄᖅᑲᖅᑎᑦᑎᓚᐅᖅᑎᓪᓗᒋᑦ ᐊᐅᔭᒃᑯᑦ ᐳᓚᕋᕆᐊᖃᑦᑕᖅᑐᓄᑦ ᐅᒥᐊᕐᔪᐊᓂ ᐊᐅᔭᒃᑯᑦ ᐅᑭᐅᖅᑕᖅᑐᒥ 2020−ᒧᑦ.
ᑲᓕ ᐊᒻᒪ ᐊᓚᕆᐊᖅ ᐊᖏᖃᑎᒌᒃᐳᑦ ᐊᒥᐊᒃᑯᖓ 2020−ᒥ ᐃᓚᖓᒍᑦ ᓴᐳᔾᔭᐅᒐᓛᒍᓐᓇᖅᐳᑦ ᐅᓄᕆᐊᓇᕐᓂᖓ ᐊᒥᓱᓄᑦ ᖃᓂᒻᒪᓐᓇᐅᔪᖅ ᖄᖏᐅᑎᒍᓂ ᐊᒻᒪ ᒐᕙᒪᒃᑯᑦ ᖁᕝᕙᕆᐊᖅᑎᑦᑎᔪᓐᓇᖅᐸᑕ ᐊᐅᓚᑕᐅᓂᐅᔪᓂ. ᐱᓕᕆᐊᒧᑦ ᐊᐅᓪᓛᖅᐸᒃᑐᑦ ᐃᓚᖃᖅᐳᖅ ᐊᖏᐸᓗᒃᑐᒥ ᐃᓚᖓᓐᓂ ᖃᖓᑕᓲᒃᑰᖅᑎᕆᓂᐅᔪᓂ, ᑐᔪᕐᒥᓂᕐᓂ ᑐᔪᕐᒥᕕᖕᓂ, ᓂᕆᔭᖅᑐᕐᓂᕐᒥ ᓂᕆᕕᖕᓂᑦ ᐊᒻᒪ ᓂᐅᕕᕐᓂᕐᓂ ᓄᓇᓕᖕᓂ ᓴᓇᐅᒐᓂᑦ.
"ᒪᓕᖕᓂᖃᕐᓂᐊᖅᐳᖅ ᖃᓄᐃᓐᓂᐊᕐᓂᖏᓐᓂ ᐊᐅᓪᓛᕐᓂᕐᓄᑦ ᑭᒡᓕᖃᖅᑎᑕᐅᓂᐅᔪᓂ," ᐅᖃᓚᐅᖅᐳᖅ ᑲᓕ. "ᓂᕆᐅᖕᓂᖃᖅᐳᒍᑦ ᒐᕙᒪᒃᑯᑦ ᐊᒻᒪ ᐃᓄᐃᑦ ᐅᑎᕐᓂᐊᕐᓂᖏᓐᓂ ᐃᖅᑲᓇᐃᔮᒥᓄᑦ ᐊᒻᒪ ᐃᒻᒪᖄ ᓄᓇᓕᖕᓂ ᐊᐅᓪᓛᕐᓂᖃᓕᕐᓗᓂ... ᐱᓕᕆᐊᒧᑦ ᐊᐅᓪᓛᕐᓂᖅ ᐱᒋᐊᒃᑲᓐᓂᕈᓂ, ᐱᕕᒃᓴᖃᕐᓂᐊᖅᐳᖅ ᐳᓚᕋᖅᑐᓕᕆᓂᕐᒥ ᐱᓕᕆᓂᕐᔪᐊᖑᔪᒥ ᓯᕗᒻᒧᑦ ᐃᖏᕐᕋᓂᖓᓂ."
ᑲᓕ ᐅᖃᓚᐅᖅᐳᖅ ᐊᖏᓂᖓ ᑮᓇᐅᔭᒧᑦ ᐃᑲᔪᖅᓯᖅᑕᐅᓂᖓᓂ ᐱᔭᕆᐊᖃᖅᑐᒥ ᐃᑲᔪᖅᓱᐃᓂᕐᒧᑦ ᓄᓇᕗᒻᒥ $300-ᒥᓕᐊᓐᓂ ᐊᐅᓪᓛᕐᓂᕐᒧᑦ ᐊᒻᒪ ᐳᓚᕋᖅᑐᓕᕆᓂᕐᒧᑦ ᐱᓕᕆᐊᖑᔪᓂ ᓱᓕ ᐆᒃᑐᕋᖅᑕᐅᔪᓐᓇᙱᓚᖅ ᐱᔾᔪᑎᖃᖅᑐᒥ ᖃᐅᔨᒪᔭᐅᙱᑦᑐᓄᑦ ᐱᔾᔪᑕᐅᔪᓄᑦ ᓯᕗᓂᒃᓴᑦᑎᓐᓃᑦᑐᓄᑦ. ᑭᓯᐊᓂ, ᐃᓚᒐᓛᖏᑦ ᓇᖕᒥᓂᖃᖅᑎᐅᔪᓂ ᓄᓇᕗᒻᒥ ᐅᖃᖅᓯᒪᕗᑦ ᓵᙵᓂᖏᓐᓂ ᐃᓅᓯᓕᒫᒥ ᒪᑐᓯᒪᐃᓐᓇᕐᓂᐊᕐᓂᖏᓐᓂ, ᐅᖃᓚᐅᖅᐳᖅ.
ᐊᓚᕆᐊᖅ ᐅᖃᓚᐅᖅᐳᖅ ᕿᒥᕐᕈᓚᐅᕐᓂᖓᓂ ᑐᒃᓯᕋᕐᓂᕐᒧᑦ ᓄᓇᕗᒻᒥ ᒐᕙᒪᒃᑯᑦ $5,000−ᒥ ᐃᑲᔪᖅᓱᐃᓂᕐᒧᑦ ᑐᓂᕐᕈᑎᒥᒃ ᑭᓯᐊᓂ ᐊᑐᐃᓐᓇᐅᑐᐃᓐᓇᕐᒪᑦ ᓇᖕᒥᓂᖃᖅᑎᓄᑦ ᑮᓇᐅᔾᔭᒃᓴᓂᖏᑦ $500,000 ᐊᑖᓃᑦᑐᓄᑦ. ᒐᕙᒪᑐᖃᒃᑯᑦ ᐃᑲᔪᖅᓯᖅᑕᐅᓂᖓ ᐋᖅᑭᒃᓯᒪᓂᐅᔪᒥ ᑮᓇᐅᔾᔭᒃᓴᓂᕐᒧᑦ ᐃᑲᔫᓯᖅᑕᐅᓂᕐᓄᑦ ᐃᑲᔪᔾᔮᙱᓐᓂᕗᑦ ᑐᕌᖓᓂᖃᕐᒪᑦ ᓴᓇᔨᐅᕙᒌᖅᑐᓄᑦ ᓄᕙᒡᔪᐊᕐᓇᖅ−19 ᓯᕗᓂᐊᓂ ᓴᖅᑭᓚᐅᖅᑳᕋᓂ, ᐃᖅᑲᓇᐃᔭᖅᑎᑦᑎᓂᐅᙱᑦᑐᓂ ᐊᕐᕌᒎᑉ ᐃᓚᐃᓐᓇᖓᓂ ᐃᖅᑲᓇᐃᔭᖅᑎᑖᕐᓂᐅᙱᑦᑐᒧᑦ.
ᐊᑕᐅᓯᕐᒥ ᓄᓇᕗᒻᒥᐅᓂ ᐱᓕᕆᔪᓐᓇᖅᑐᑦ ᐃᑲᔪᖅᓱᐃᓂᕐᒥ ᐱᓕᕆᓂᕐᔪᐊᖑᔪᓄᑦ, ᑲᓕ ᐅᖃᖅᐳᖅ, ᓄᓇᓕᖕᓂ ᓂᕆᕙᒡᓗᓂ ᐊᒻᒪ ᐊᐅᓪᓛᖅᐸᖕᓂᕐᒧᑦ ᓄᓇᕘᑉ ᐃᓗᐊᓂ ᑕᐃᒪᐃᒐᔪᖕᓂᖓᓂ ᐅᑎᒐᓚᑐᐊᖅᐸᑦ.
"ᑕᐃᒪᓐᓇ ᐱᓕᕆᓂᕐᔪᐊᖑᔪᑦ ᐆᒪᐃᓐᓇᕐᓂᐊᖅᐳᑦ," ᐅᖃᓚᐅᖅᐳᖅ. "ᑕᐃᒪᓐᓇ ᑭᓯᐊᓂ ᕿᓱᑐᐃᓐᓇᐃᑦ ᐅᑎᕐᓂᐊᖅᐳᑦ."
ᖃᓄᐃᓕᖓᓂᖓ ᐊᕐᕌᒎᑉ ᐃᓚᐃᓐᓇᖓᓂ ᐃᖅᑲᓇᐃᔮᖑᕙᒃᑐᑦ ᐳᓚᕋᕐᕕᖕᓂ ᓄᓇᕗᓕᒫᒥ ᓱᓕ ᓇᓗᓇᐃᓐᓇᖅᐳᑦᑕᐅᖅ. ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ (ED&T) ᐊᐅᓚᑦᑎᓲᖑᕗᑦ ᑎᓴᒪᓂ ᐃᒡᓗᕐᔪᐊᖑᔪᓂ: ᐃᖃᓗᖕᓂ, ᐸᖕᓂᖅᑑᖅ, ᑲᖏᖅᖠᓂᖅ ᐊᒻᒪ ᐃᖃᓗᒃᑑᑦᑎᐊᖅ.
"ᐅᖃᐅᓯᒃᓴᖅᑕᖃᓗᐊᙱᓚᖅ ᖃᓄᐃᓐᓂᐊᕐᓂᖏᓐᓂ ᐳᓚᕋᕐᕕᐅᔪᓂᑦ ᒪᑐᐃᕐᓂᐊᕐᓂᖓᓂ ᑕᒪᑐᒪᓂ ᐊᐅᔭᐅᔪᒥ. ᐅᖃᕈᓐᓇᖅᐳᖓ ᒪᓕᖕᓂᐊᕐᓂᑦᑎᓐᓂ ᑐᕌᖅᑎᑕᐅᓂᐅᔪᓂ CPHO−ᒧᑦ (ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐊᖓᔪᖅᑳᖓᓂ) ᐱᔾᔪᑎᖃᖅᑐᒥ ᐱᓪᓚᕆᐅᙱᑦᑐᓄᑦ ᐃᓄᓕᒫᓄᑦ ᐃᒡᓗᖁᑎᖏᓐᓂ,” ᐅᖃᓚᐅᖅᐳᖅ ᒫᑦ ᐸᐅᓗᕐ, ᑐᑭᒧᐊᒃᑎᑦᑎᔨ ᐊᑐᐊᒐᓄᑦ ᐊᒻᒪ ᐸᕐᓇᐃᓂᕐᒧᑦ ᐱᕙᓪᓕᐊᔪᓕᕆᔨᒃᑯᓐᓄᑦ ᐃᖏᕐᕋᔪᓕᕆᔨᒃᑯᓐᓄᓪᓗ.