ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᑦ ᑲᑎᒪᔨᖏᑦ ᐅᖃᐅᓯᖃᓚᐅᖅᐳᑦ ᒫᔾᔨ 5−ᒥ ᐃᑲᔪᖅᓱᐃᔾᔮᙱᓐᓂᖏᓐᓂ ᐹᕙᓐᓛᓐᑯᑦ ᓴᕕᕋᔭᒃᓴᒧᑦ ᐱᓕᕆᓂᖓᓂ ᒪᕐᕈᖓᓂ ᐊᖏᔨᓕᒋᐊᖅᑕᐅᓂᖓᓂ ᑐᒃᓯᕋᐅᑕᐅᔪᒥ ᓄᓘᔭᕐᓄᑦ ᐱᓕᕆᐊᒃᓴᐅᔪᒧᑦ, ᐊᒻᒪᓗ ᑕᐃᓐᓇ ᐃᓱᒪᓕᐅᕆᓂᖅ ᑕᑯᒃᓴᐅᑎᑦᑎᔪᓐᓇᕐᓂᖓᓂ ᐱᓪᓚᕆᐅᓂᖓᓂ ᖃᓄᐃᓕᖓᓂᐊᕐᓂᖓᓂ ᐅᔭᕋᖕᓂᐊᕐᕕᐅᔪᒧᑦ.
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᑦ ᐊᖓᔪᖅᑳᖓ P.J. ᐊᕿᐊᕈᖅ ᐅᖃᓚᐅᖅᐳᖅ ᐊᒃᑐᐃᓂᐅᑐᐃᓐᓇᕆᐊᓕᖕᓂ ᑐᒃᑐᓄᑦ, ᐊᓪᓚᙳᐊᓂ ᕿᓚᓗᒐᕐᓄᑦ, ᓇᑦᑎᕐᓄᑦ ᐊᒻᒪ ᐃᖃᓗᖕᓄᑦ ᐊᖏᒡᓕᒋᐊᖅᑐᒥ ᐅᓯᑲᑦᑕᕐᓂᐅᔪᒥ ᐊᒻᒪ ᐳᔪᕐᒥ ᐊᒻᒪᓗ ᐊᑦᑎᒃᑐᒥ ᐅᓄᕐᓂᐅᔪᓂ ᐃᓄᖕᓂ ᐃᖅᑲᓇᐃᔭᖅᑎᑦᑎᓂᐅᔪᒥ ᐅᔭᕋᖕᓂᐊᕐᕕᖕᒥ ᐱᔾᔪᑕᐅᕗᑦ ᐱᓪᓚᕆᐅᓗᐊᕐᓂᖏᓐᓂ ᖄᖏᑐᐃᓐᓇᕆᐊᒃᓴᖅ.
“ᑐᙵᕕᐅᔪᒥ ᐊᐱᖅᑯᑕᐅᔪᑦ ᓱᓕ ᑕᐃᑲᓃᑦᑐᑦ ᑭᐅᔭᐅᑦᑎᐊᙱᓗᐊᕐᒪᑕ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ... ᐱᑕᖃᖅᐸᒌᖅᑐᓂ ᐊᒃᑐᐃᓂᖃᖅᐸᒌᖅᐳᖅ (ᐅᔭᕋᖕᓂᐊᕐᕕᖕᒥ) ᐃᓱᒪᒋᔭᓐᓂ ᑭᐅᓗᒍᑕᐅᔪᓂ ᑐᓵᔭᐅᓂᐅᔪᓂ ᐱᔾᔪᑎᖃᖅᑐᒥ ᖃᐅᔨᓴᕈᑕᐅᓚᐅᖅᑐᓂ ᑎᑎᕋᖅᓯᒪᔪᓂᒃ ᖃᐅᔨᓴᕈᑕᐅᔪᓂ ᐊᒻᒪᓗ... ᐃᓚᓕᐅᔾᔭᐅᓂᐅᔪᒥ ᐃᓄᐃᑦ ᖃᐅᔨᒪᔭᑐᖃᖏᓐᓂ,” ᐊᕿᐊᕈᖅ ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᑐᒃᓯᕋᐅᑕᐅᔪᖅ ᒪᕐᕈᐃᓪᓗᐊᖅᑐᒥ ᓴᖅᑭᑎᑦᑎᓂᐅᔪᒥ 12 ᒥᓕᐊᓐ ᑕᓐᓄᑦ ᐊᕐᕌᒍᑕᒫᒥ 6 ᒥᓕᐊᓐ ᑕᓐᓂ ᐅᔭᕋᖕᓂᐊᕐᕕᖕᒥ ᐊᖏᒡᓕᒋᐊᖅᓯᓚᐅᖅᐳᖅ ᐃᓱᒫᓘᑕᐅᔪᓂ ᐃᖏᕐᕋᓂᖓ ᐊᖏᓗᐊᕐᒪᑦ.
ᕼᐋᒻᓚᒃᑯᑦ ᒥᑦᑎᒪᑕᓕᖕᒥ ᑐᒃᓯᕋᖅᓯᒪᕗᑦ ᐊᖏᒡᓕᒋᐊᖅᑕᐅᓂᖓ, ᐊᖏᖅᑕᐅᒍᓂ, ᑭᒡᓕᖃᖅᑎᑕᐅᓂᖓ ᐊᕐᕌᒍᑕᒫᒥ ᐊᖏᒡᓕᒋᐊᕐᓂᐅᔪᒥ 1.5 ᒥᓕᐊᓐ ᑕᓐᓄᑦ ᓴᕕᕋᔭᒃᓴᒥ ᐊᕐᕌᒍᓄᑦ ᑎᓴᒪᓄᑦ.
ᐹᕙᓐᓛᓐᑯᓐᓂ ᐱᓕᕆᔨᒻᒪᕆᐅᔪᑦ ᐃᓂᖅᑎᖅᑕᐅᓚᐅᖅᐳᑦ ᑮᓇᐅᔭᓕᐅᕐᓂᐅᔪᑦ ᐅᔭᕋᖕᓂᐊᕐᕕᖕᒥ ᐱᕙᓪᓕᐊᔪᓐᓇᕆᐊᒃᓴᖓᓂ ᑕᐃᒪᐃᑦᑐᓐᓇᙱᑐᐃᓐᓇᕆᐊᖃᖅᐳᖅ ᐊᖏᒡᓕᒋᐊᕐᓂᖃᙱᒃᑯᓂ, ᐊᕿᐊᕈᖅ ᓇᓗᓇᐃᖅᓯᓚᐅᖅᐳᖅ.
“ᑕᒪᑦᑕ ᐅᔾᔨᕈᓱᒃᑐᐃᓐᓇᐅᖅᑰᖅᐳᒍᑦ ᐱᑕᖃᑐᐃᓐᓇᕆᐊᓕᖓᓂ ᐅᓗᕆᐊᓇᕐᓂᖓᓂ. ᑕᒪᑦᑕ ᐱᓪᓚᕆᐅᒋᖅᑰᖅᑕᕗᑦ,” ᐅᖃᓚᐅᖅᐳᖅ. “ᑕᑯᔪᒪᕗᒍᑦ ᐃᓄᖕᓂ ᐱᓕᒻᒪᒃᓴᖅᑕᐅᔪᓂ. ᑕᑯᔪᒪᕗᒍᑦ ᐃᓄᖕᓂ ᐃᖅᑲᓇᐃᔭᖅᑎᑕᐅᔪᓂ. ᑭᓯᐊᓂ ᓇᓕᒧᓐᓂᐅᔪᒥ ᐱᓕᕆᔭᕆᐊᖃᕐᓂᑦᑎᓐᓂ ᐱᔾᔪᑎᖃᖅᑐᒥ ᐊᒃᑐᐃᓂᐅᑐᐃᓐᓇᕆᐊᖃᖅᑐᓂ ᐃᓄᐃᑦ ᐊᓐᓇᐅᒪᓇᓱᐊᕐᓂᖏᓐᓂ, ᐆᒪᔪᓅᖓᒍᓂ ᐅᕝᕙᓘᓐᓃᑦ ᐃᓅᓯᕆᔭᖏᓐᓂ, ᐃᓚᖃᕈᓂᓘᓐᓃᑦ ᐃᓕᖅᑯᓯᒧᑦ. ᕿᒥᕐᕈᐊᕆᐊᖃᓲᕆᕙᕗᑦ ᐅᑯᓂᖓᓗᒃᑖᖅ ᑐᒃᓯᕋᐅᑕᐅᔪᓂ ᑕᒪᒃᑭᐅᒪᔪᒥ ᐃᓱᒪᒋᔭᐅᓂᐅᔪᒥ.”
ᑕᐃᑲᓂ ᑭᖑᓪᓕᖅᐹᖑᔪᒥ ᐱᓕᕆᓂᐅᔪᒥ ᐱᖁᔭᖅᑎᒍᑦ ᐃᓄᓕᒫᓄᑦ ᑐᓵᓂᐅᔪᓂ ᒥᑦᑎᒪᑕᓕᖕᒥ ᔭᓄᐊᕆᐅᑉ ᓄᙳᐊᓂ, ᐹᕙᓐᓛᓐᑯᑦ ᒪᐃᒋᓐ ᓗᐊᑦ-ᕼᐅᐊᐃᔪᓪ, ᐊᖓᔪᖅᑳᑉ−ᑐᒡᓕᐊ ᒪᑭᒪᔾᔪᑕᐅᔪᓐᓇᖅᑐᓄᑦ, ᐅᖃᓚᐅᖅᐳᖅ ᐊᑐᕐᓂᕐᒥ ᓄᓇᓯᐅᑎᓂᑦ ᐅᓯᑲᑦᑕᕐᓂᕐᒧᑦ ᓴᕕᕋᔭᒃᓴᒥ ᐊᖏᐸᓗᒃᑐᒥ ᖁᕝᕙᖅᓯᒋᐊᕐᓂᐊᖅᐳᖅ ᐊᑭᖓᓂ ᐊᐅᓚᑕᐅᓂᐅᔪᒥ. ᑐᒃᓯᕋᖅᑕᐅᔪᒥ 110-ᑭᓛᒥᑐᒥ ᓄᓇᓯᐅᑎᑯᑖᖕᒥ ᐊᖅᑯᑎᖓᓂ ᑐᓚᒃᑕᕐᕕᖕᒧᑦ ᕿᙳᐊᓂ ᓂᕆᐅᒋᔭᐅᕗᖅ ᐊᑦᑎᒃᓯᒋᐊᕐᓂᐊᕐᓂᖓᓂ ᐹᕙᓐᓛᓐᑯᑦ ᐊᑭᓕᒐᒃᓴᖏᓐᓂ ᐊᕐᕌᒍᓄᑦ ᓯᕗᓂᑦᑎᓐᓂ.
ᐹᕙᓐᓛᓐᑯᑦ ᑭᐅᔪᒪᓚᐅᙱᓚᑦ ᐊᐱᖅᑯᑕᐅᔪᓂ ᓄᓇᕗᒻᒥ ᑐᓴᒐᒃᓴᓕᕆᔨᒃᑯᓐᓂ ᒪᓕᒃᑐᒥ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᑦ ᒫᔾᔨ 5−ᒥ ᐅᖃᐅᓯᒃᓴᓕᐊᖑᔪᒥ, ᑭᓯᐊᓂ ᑲᒻᐸᓂᐅᔪᖅ ᑐᓂᓯᓚᐅᖅᐳᑦ ᑐᓴᒐᒃᓴᓕᐊᖑᔪᒥ ᒫᔾᔨ 6−ᒥ ᑎᑎᕋᖅᓯᒪᓪᓗᑎᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᑦ ᓱᓕ ᒪᑐᐃᖓᓂᖏᓐᓂ ᐱᓂᕐᒧᑦ ᐹᕙᓐᓛᓐᑯᑦ ᑐᒃᓯᕋᐅᑎᖏᓐᓂ ᑭᐅᓂᕐᒧᑦ ᐃᓱᒫᓘᑕᐅᔪᓂ.
“ᓄᓇᓕᖕᓂ ᐃᓴᒃᓯᒪᐃᓐᓇᕐᓂᐊᖅᐳᒍᑦ ᐊᒻᒪᓗ ᕿᓂᕐᓗᑕ ᑭᐅᓂᕐᒧᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓂ ᐊᒻᒪ ᐊᓯᖏᓐᓂ ᐱᔪᓐᓇᖅᓯᑐᐊᕈᓂ ᐅᖃᐅᓯᖃᕐᓂᕐᒧᑦ ᐃᓱᒫᓘᑎᒋᔭᖏᓐᓂ ᓇᓂᓯᔪᓐᓇᕐᓂᕐᒧᑦ ᑕᒪᒃᑭᓄᑦ ᐊᖏᕈᑕᐅᓂᐅᔪᒥ ᓯᕗᒻᒧᐊᕆᓂᕐᒧᑦ,” ᐅᖃᓚᐅᖅᐳᖅ ᐳᕋᐃᔭᓐ ᐸᓂ, ᐊᐅᓚᑦᑎᔨᒻᒪᕆᒃ ᐹᕙᓐᓛᓐᑯᓐᓄᑦ.
ᐱᖁᔭᓕᕆᓂᕐᒧᑦ ᓇᓗᓇᕐᓂᐅᔪᒥ
ᐊᕿᐊᕈᖅ ᓇᓗᓇᐃᖅᓯᔪᒪᓚᐅᙱᓚᖅ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᒃᑯᖏᓐᓄᑦ (NIRB) ᐊᒻᒪ ᒐᕙᒪᑐᖃᒃᑯᑦ ᐊᖏᖅᓯᒪᓇᔭᕐᓂᖏᓐᓂ ᐹᕙᓐᓛᓐᑯᑦ ᐊᖏᒡᓕᒋᐊᖅᑕᐅᓂᖓᓂ ᑐᒃᓯᕋᐅᑕᐅᔪᒥ ᐊᖏᖅᑕᐅᓯᒪᙱᑎᓪᓗᒋᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓂᑦ.
“ᐅᖃᕈᓐᓇᙱᓚᖓ ᐊᖏᖅᑕᐅᓂᐊᕐᒪᖔᑦ ᐋᒃᑲᓘᓐᓃᑦ. ᐊᒃᓱᕈᕐᓗᑕ ᐱᓕᕇᓐᓇᕐᓂᐊᖅᐳᒍᑦ ᐃᓕᓯᓂᕐᒥ ᑕᑯᒃᓴᐅᓂᐅᔪᒥ ᐅᑯᓄᖓ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᐊᒻᒪᓗ ᐊᒃᓱᕈᕐᓗᑕ ᓇᓗᓇᐃᖅᓯᓇᓱᐊᕐᓂᐊᖅᐳᒍᑦ ᐃᓄᐃᑦ ᓂᐱᖏᑦ ᐃᒃᐱᒋᔭᐅᑦᑎᐊᕐᓂᖏᓐᓂ ᐃᓱᐊᓄᓕᒫᖅ,” ᐅᖃᓚᐅᖅᐳᖅ.
ᑭᓯᐊᓂ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᑦ ᐊᔭᐅᕆᓂᖓ ᑕᑯᒃᓴᐅᑎᑕᐅᔫᔮᓚᐅᖅᐳᖅ ᐅᒃᑐᐱᕆ 2018−ᒥ ᒐᕙᒪᑐᖃᒃᑯᑦ ᐱᔪᓐᓇᖅᑎᑦᑎᓚᐅᖅᑎᓪᓗᒋᑦ ᕿᓚᒻᒥᐅᔪᒥ ᐊᖏᒡᓕᒋᐊᕐᓂᐅᔪᒥ ᐹᕙᓐᓛᓐᑯᑦ ᓴᖅᑭᑎᑦᑎᓂᐅᔪᒥ 6 ᒥᓕᐊᓐ ᑕᓐᓄᑦ ᐊᕐᕌᒍᑕᒫᒥ 4.2 ᒥᓕᐊᓐ ᑕᓐᓂ. ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐅᖃᐅᔾᔨᓯᒪᓚᐅᖅᐳᑦ ᒐᕙᒪᑐᖃᒃᑯᓐᓂ ᐅᑭᐅᖅᑕᖅᑐᒥ ᐱᓕᕆᓂᐅᔪᒥ ᐊᑭᕋᖅᑐᕐᓂᖏᓐᓂ ᖁᑦᑎᖕᓂᖅᓴᐅᔪᒥ ᑭᒡᓕᐅᔪᒥ ᐱᔾᔪᑎᖃᖅᑐᒥ ᐊᒃᑐᐃᓂᐅᑐᐃᓐᓇᕆᐊᓕᖕᓂ ᐳᐃᔨᐅᔪᓄᑦ ᐊᒻᒪᓗ ᐳᔪᖃᕐᓂᖅᓴᐅᓂᐅᔪᒧᑦ.
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᑦ, ᐋᔩᖃᑎᖃᓵᓚᐅᖅᑎᓪᓗᒋᑦ ᐃᓄᖕᓄᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓂᓪᓗ ᐊᖏᕈᑎᒥ ᐹᕙᓐᓛᓐᑯᓐᓂ ᑕᐃᔅᓱᒪᓂ, ᑎᑎᕋᓚᐅᖅᐳᑦ ᐅᑭᐅᖅᑕᖅᑐᒥ ᐱᓕᕆᓂᕐᒧᑦ ᒥᓂᔅᑕᖓᓄᑦ ᐊᒻᒪᓗ, ᐃᓚᒋᐊᕈᑕᐅᔪᒥ ᐃᑲᔪᖅᓱᐃᓂᐅᔪᒥ ᕼᐋᒻᓚᒃᑯᓐᓂ ᒥᑦᑎᒪᑕᓕᖕᒥ ᐊᒻᒪᓗ ᒥᑦᑎᒪᑕᓕᖕᒥ ᐊᖑᓇᓱᒃᑎᓂᑦ ᒥᑭᒋᐊᕐᓂᐊᖅᑎᒃᑯᓐᓂᓪᓗ ᑲᑐᔾᔨᖃᑎᒌᖑᔪᓂ, ᒐᕙᒪᑐᖃᒃᑯᑦ ᐊᐃᕙᒡᔪᑕᐅᒋᐊᖅᑐᒥ ᓈᒻᒪᒍᓱᙱᓐᓂᖃᓚᐅᖅᐳᖅ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦᑕ ᐊᑐᖁᓇᔭᖅᑕᖓᓂ.
ᔫᓂᐅᓚᐅᖅᑐᒥ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᑦ ᐊᑎᓕᐅᕆᒃᑲᓐᓂᓚᐅᖅᐳᑦ ᐊᓯᐊᓂ ᐱᒻᒪᕆᐅᔪᒥ ᐱᓕᕆᓂᐅᔪᒥ ᐹᕙᓐᓛᓐᑯᓐᓂ ᖃᐅᔨᒪᔭᐅᔪᒥ ᐃᓄᖕᓄᑦ ᐅᒃᐱᕆᔭᐅᓂᖏᓐᓄᑦ ᐊᖏᕈᒻᒥ. ᑐᓂᓯᓇᔭᖅᐳᖅ ᖃᔅᓯᒐᓚᖕᓂ ᑕᑯᒃᓴᐅᓂᐅᔪᓂ ᐱᕚᓪᓕᕈᑎᓂᑦ ᐊᒻᒪᓗᑦᑕᐅᖅ ᑎᑭᐅᑎᔭᐅᑦᑎᐊᕈᓐᓇᖅᑐᒥ ᐊᑭᓕᐅᑎᓂᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ ᐅᔭᕋᖕᓂᐊᕐᕕᒃ ᐊᖏᒡᓕᒋᐊᖅᐸᓪᓕᐊᑎᓪᓗᒍ. ᐊᕿᐊᕈᖅ ᐅᖃᓚᐅᖅᐳᖅ ᐅᒡᒍᐊᕐᓂᖃᙱᑦᑎᐊᖅᐳᖅ ᐋᔩᖃᑎᖃᕐᓂᕐᒥ ᑕᐃᔅᓱᒥᖓ ᖃᓄᐃᓕᖓᓂᐅᔪᒥ.
ᐹᕙᓐᓛᓐᑯᑦ ᐱᖁᔭᓕᕆᓂᕐᒧᑦ ᐃᓄᓕᒫᓄᑦ ᑐᓵᓂᐅᔪᒥ ᐅᖓᕙᕆᐊᖅᑕᐅᓂᖓᓂ ᐱᒋᐊᒃᑲᓐᓂᖅᑐᒃᓴᐅᑕᐅᕗᖅ ᐃᖃᓗᖕᓂ ᐊᐃᑉᕆᓕ 12−ᒥ 21−ᒧᑦ.