ᑰᒑᕐᔪᖕᒥᐅᑦ ᒥᔪᖓ ᓯᑏᕙᓐ ᐃᓇᒃᓴᔭᖅ ᐅᖃᓚᐅᕐᒪᑦ ᑕᕝᕙᑐᐊᖅ ᓄᓇᓕᑦᑎᓐᓂ ᐱᐅᓂᖅᐸᖑᓲᖅ ᐃᖅᑲᓇᐃᔭᖅᑕᖅᖢᓂ ᒐᕙᒪᑎᒃᑯᓐᓂ.
ᐊᒥᓱᑲᓪᓚᐅᓕᕐᒪᑕ ᓄᓇᓕᑦᑎᓐᓂ ᑐᖓᓕᖓᓂ ᐃᓕᓵᓂᒃᓯᒪᔪᑦ, ᐃᓇᒃᓴᔭᖅ ᐅᖃᕆᓪᓗᓂ, ᐊᒻᒪᓗ ᑕᒫᓂ ᐊᖏᕐᕋᒥ ᖃᓂᒋᔭᖓᓂ ᐃᖅᑲᓇᐃᔭᖅᑖᕈᒪᓪᓗᑎᒃ ᑰᒑᕐᔪᖕᒥᐅᓂ ᐊᐅᓪᓚᖃᑦᑕᕆᐊᒃᓴᖅ ᐱᓇᓱᐊᕈᓯᑕᒫᑦ ᐃᖅᑲᓇᐃᔭᕆᐊᕐᓗᑎᒃ ᐱᐅᒃᓴᖏᑦᑐᑦ.
“ᓄᓇᓕᑦᑎᓐᓂ ᐃᓱᒪᓇᖅᑐᖅ ᐃᒻᒪᖄ ᓱᓕᒃᑲᓐᓂᖅ ᒐᕙᒪᑎᒃᑯᑦ ᐱᑕᖃᓕᒃᑲᓐᓂᖅᐸᑕ ᑭᓯᐊᓂ ᑮᓇᐅᔭᒃᓴᐅᑕᐅᔪᓐᓇᕋᔭᕐᒪᑕ ᐅᕙᑦᑎᓐᓄᑦ,” ᐅᖃᕆᓪᓗᓂ. “ᑭᓯᐊᓂᓕ ᒐᕙᒪᑎᒃᑯᑦ ᐱᓕᕆᐊᖏᑦ ᓄᒃᑎᖅᑕᐅᖔᖃᑦᑕᕐᒪᑕ ᐊᖏᓂᖅᓴᓄᑦ ᓄᓇᓕᖕᓄᑦ ᐱᕚᓪᓕᐅᑕᐅᖔᖅᖢᑎᒃ.”
ᕿᑎᕐᒥᐅᑦ ᓇᖕᒥᓂᖃᖅᑐᑦ ᑲᑐᔾᔨᖃᑎᒌᖓᑦ ᑕᒪᐃᓐᓂᓕᒫᖅ ᑕᓪᓕᒪᓂ ᓄᓇᓕᖁᑎᒥᓂ ᐃᑲᔪᕋᓱᐊᕐᓂᐊᕐᒪᑕ ᐊᔾᔨᒌᖏᑦᑐᓂᒃ ᓄᓇᓕᖕᒥᐅᓄᑦ ᑮᓇᐅᔭᒃᓴᐅᑕᐅᔪᓐᓇᖅᑐᓂᒃ ᐋᕿᒃᓱᐃᓇᓱᐊᖅᑎᓪᓗᒋᑦ. ᑕᐃᒪᓐᓇ ᐋᕿᒃᓱᐃᓯᒪᓚᐅᖅᑐᑦ ᑮᓇᐅᔭᒃᓴᐅᑎᓂᒃ ᐱᕙᓪᓕᐊᑎᑦᑎᔩᑦ ᑲᑎᒪᕕᒃᔪᐊᖅᑎᑕᐅᓂᐊᖅᑐᑦ ᓄᕕᐱᕆ 21-ᒥᑦ 23-ᒧᑦ ᐃᖃᓗᒃᑑᑦᑎᐊᒥ.
“ᑐᓐᖓᕕᖃᖅᖢᑕ ᒥᐊᓕᕗᐊᓇᓂᒃ ᓂᐅᕕᐊᒃᓴᖃᖃᑦᑕᖅᑐᓂᒃ ᖃᐅᔨᓴᕋᓱᐊᕋᑦᑕ ᖃᓄᖅ ᑕᒪᓂ ᓄᓇᑦᑎᓐᓂ ᐱᕈᖅᓯᐊᖃᕈᓐᓇᕐᒪᖔᑦᑕ, ᑖᒃᑯᐊ ᓂᐅᕕᐊᒃᓴᐅᓗᑎᒃ ᑮᓇᐅᔭᒃᓴᐅᑕᐅᔪᓐᓇᖅᓯᖕᒪᑕ, ᐅᓄᕐᓂᖅᓴᓄᑦ ᓂᐅᕕᐊᒃᓴᐅᓕᖅᐸᑕ ᐊᒃᓱᑲᓪᓚᒃ ᑮᓇᐅᔭᓂᒃ ᐅᑎᖅᑎᕕᐅᔪᓐᓇᕐᒪᑕ ᓄᓇᓕᑦᑎᓐᓂ ᐱᕙᓪᓕᐊᑎᑕᐅᒃᐸᑕ,” ᓯᓐᑎᐊ ᐃᓂ, ᐅᖃᓚᐅᖅᑐᖅ ᓇᖕᒥᓂᖃᖅᑐᑦ ᑲᑐᔾᔨᖃᑎᒌᖓᓐᓂ ᐊᐅᓚᑦᑎᔨᐅᔪᖅ.
ᒎᓗᓂᒃ ᐅᔭᕋᓐᓂᐊᖅᑎ TMAC Resources-ᑯᓐᓂ, ᕼᐅᑉ ᐸᐃᒥ ᐅᔭᕋᓐᓂᐊᕐᕕᖁᑎᖃᕐᒪᑕ, ᖃᐅᔨᓴᕐᕕᖃᖅᓗᑎᒃᓗ ᓴᐲᓇᒥ ᒎᓗᓂᒃ ᓴᕕᕋᔭᒃᓴᓂᒃᓗ ᐅᔭᕋᓐᓂᐊᕐᕕᒃᓴᒥᒃ ᐊᒃᓱᕉᑎᖃᕐᒪᑕ ᑕᒫᓂ ᓴᓐᓂᖓᔫᑉ ᑰᖓᓂ ᓄᓇᒥ ᐅᔭᕋᓐᓂᐊᕐᕕᐅᔪᓐᓇᖅᑐᓂᒃ, ᑖᒃᑯᐊ ᑕᒫᓂ “ᐱᒋᐊᖓᕈᑕᐅᓪᓗᑎᒃ” ᐅᔭᕋᓐᓂᐊᖅᑎᓄᑦ ᕿᑎᕐᒥᐅᓂ ᑮᓇᐅᔭᒃᓴᐅᑕᐅᔪᓐᓇᖅᖢᑎᒃ ᐱᕙᓪᓕᐊᑎᑕᐅᔪᒪᖕᒪᑕ, ᐃᓂ ᖃᐅᔨᒪᓂᕋᖅᖢᓂ ᐅᖃᓚᐅᖅᑐᖅ, ᑭᓯᐊᓂᓕᒎᖅ ᓇᖕᒥᓂᖃᖅᑐᑦ ᑕᒫᓂ ᑲᑐᔾᔨᖃᑎᒌᖓᑦ ᕿᓂᒃᑲᓐᓂᕈᒪᖕᒪᑕ ᓄᓇᒥᑕᔭᐅᖏᑦᑐᓂᒃ ᑮᓇᐅᔭᒃᓴᐅᑕᐅᔪᓐᓇᖅᑐᓂᒃ ᓂᐅᕕᒃᓴᐅᓂᖏᑦ ᐊᐅᓚᑕᐅᓗᐊᖏᓐᓂᖅᓴᓂᒃ ᓄᓇᕐᔪᐊᒥᐅᓄᑦ.
ᒎᓗᓂᒃ ᐅᔭᕋᓐᓂᐊᖅᑎ TMAC Resources-ᑯᓐᓂ, ᕼᐅᑉ ᐸᐃᒥ ᐅᔭᕋᓐᓂᐊᕐᕕᖁᑎᖃᕐᒪᑕ, ᖃᐅᔨᓴᕐᕕᖃᖅᓗᑎᒃᓗ ᓴᐲᓇᒥ ᒎᓗᓂᒃ ᓴᕕᕋᔭᒃᓴᓂᒃᓗ ᐅᔭᕋᓐᓂᐊᕐᕕᒃᓴᒥᒃ ᐊᒃᓱᕉᑎᖃᕐᒪᑕ ᑕᒫᓂ ᓴᓐᓂᖓᔫᑉ ᑰᖓᓂ ᓄᓇᒥ ᐅᔭᕋᓐᓂᐊᕐᕕᐅᔪᓐᓇᖅᑐᓂᒃ, ᑖᒃᑯᐊ ᑕᒫᓂ “ᐱᒋᐊᖓᕈᑕᐅᓪᓗᑎᒃ” ᐅᔭᕋᓐᓂᐊᖅᑎᓄᑦ ᕿᑎᕐᒥᐅᓂ ᑮᓇᐅᔭᒃᓴᐅᑕᐅᔪᓐᓇᖅᖢᑎᒃ ᐱᕙᓪᓕᐊᑎᑕᐅᔪᒪᖕᒪᑕ, ᐃᓂ ᖃᐅᔨᒪᓂᕋᖅᖢᓂ ᐅᖃᓚᐅᖅᑐᖅ, ᑭᓯᐊᓂᓕᒎᖅ ᓇᖕᒥᓂᖃᖅᑐᑦ ᑕᒫᓂ ᑲᑐᔾᔨᖃᑎᒌᖓᑦ ᕿᓂᒃᑲᓐᓂᕈᒪᖕᒪᑕ ᓄᓇᒥᑕᔭᐅᖏᑦᑐᓂᒃ ᑮᓇᐅᔭᒃᓴᐅᑕᐅᔪᓐᓇᖅᑐᓂᒃ ᓂᐅᕕᒃᓴᐅᓂᖏᑦ ᐊᐅᓚᑕᐅᓗᐊᖏᓐᓂᖅᓴᓂᒃ ᓄᓇᕐᔪᐊᒥᐅᓄᑦ.
“ᓇᓗᓇᕈᓐᓃᕐᒪᑕ ᓄᓇᓕᑦᑎᓐᓄᑦ ᑎᑭᖃᑦᑕᖅᑐᑦ ᐱᔪᒪᔭᒥᓂᒃ ᐊᑭᓖᑦᑎᐊᕈᓐᓇᕐᒪᑕ ᓄᓇᓕᖕᓂ ᓴᓇᐅᒐᖅᑎᓄᑦ ᑮᓇᐅᔭᒃᓴᐅᑕᐅᔪᓐᓇᕐᒪᑕ,” ᐃᓇᒃᓴᔭᖅ ᐅᓂᒃᑳᕆᓪᓗᓂ. “ᑕᒪᑐᒪᓂᓴᐃᓐᓇᖅ, ᐊᑭᑐᔪᒻᒪᕆᐅᖕᒪᑕ ᓂᐅᕈᑲᑕᖃᑦᑕᖅᑐᓄᑦ ᖃᖓᑦᑕᐅᑏᑦ.”
ᐃᓂᖅ ᐅᖃᕆᓪᓗᓂ ᐅᑭᐅᓕᒫᒥ ᐳᓚᕋᑲᑕᒃᑐᓄᑦ ᑎᑭᕕᐅᓯᒪᖃᑦᑕᕈᓐᓇᖅᓯᒍᑦᑕ ᖃᓄᐃᒃᑲᔭᕐᒪᖔᑦ ᕿᒥᕈᔭᐅᓂᐊᖅᑐᖅ.
“ᑕᐃᒪᖓᓂᒃ ᔭᓗᓇᐃᕝᒧᑦ ᑎᑭᖃᑦᑕᖅᑐᑦ ᓇᓗᓇᕈᓐᓃᕐᒪᑕ ᐳᓚᕋᖅᑐᓂᒃ ᑲᒪᔨᐅᔪᑦ ᐊᒃᓱᑲᓪᓚᒃ ᐱᓕᕆᐊᒃᓴᖃᕐᒪᑕ. ᑐᔪᕐᒥᕕᖏᑦ ᓯᓂᒃᑕᕐᕕᖏᓪᓗ ᓂᐅᕈᑲᑕᒃᑐᓂᒃ ᑕᑕᑦᑐᑦ. ᐃᓂᒃᓴᖅᑖᖅᓯᒪᔪᑦ ᑐᔪᕐᒥᕕᓂ ᑕᖅᑭᓕᒫᒧᑦ ᑕᑕᑦᑐᑦ. ᓇᓗᓇᖃᑦᑕᖏᑦᑐᖅ ᓄᓇᓕᖓᓂ ᐊᒥᓱᓄᑦ ᓂᐅᕕᖅᑏᑦ ᓂᐅᕕᕐᕕᐅᖃᑦᑕᕐᓂᖏᑦ, ᓄᓇᓕᖓᓂ ᐅᓯᑲᑦᑕᖅᑏᑦ ᑖᒃᓰᑦ ᐸᓯᖏᓪᓗ ᑕᑕᑦᑐᑦ ᑕᑯᒋᐅᕆᐊᖅᑐᖅᑐᓂᒃ ᓂᕆᕝᕕᖏᓪᓗ ᑕᑕᑦᑐᑦ,” ᐅᓂᒃᑳᕆᓪᓗᓂ. “ᓄᓇᓕᕗᑦ ᒪᕐᕈᐃᓐᓈᖕᓂᒃ ᐃᑲᕐᕋᓂᒃ ᖃᖓᑕᓲᒃᑯᑦ ᐅᖓᓯᖕᓂᖃᕐᒪᑦ ᔭᓗᓇᐃᕝᒥᑦ. ᓱᖕᒪᓪᓕ ᐳᓚᕋᖅᑐᓄᑦ ᑎᑭᕝᕕᐅᖃᑦᑕᖏᑉᐱᑕ? ᖃᓄᕐᓕ ᑕᐃᒪ ᐳᓚᕋᖃᑦᑕᖅᑐᓄᑦ ᐱᒃᑯᒥᒋᔭᐅᓕᕈᓐᓇᖅᐱᑕ? ᖃᓄᕐᓗ ᐃᓕᓴᕐᓇᖅᑐᒥᒃ ᐳᓚᕋᖅᑐᓄᑦ ᑕᑯᔭᒃᓴᖃᓕᕈᓐᓇᖅᐱᑕ ᓄᓇᑦᑎᓐᓂᒃ ᐱᒃᑯᒥᒋᔭᐅᔪᑕᐅᔪᓐᓇᖅᑐᒥᒃ, ᓴᓇᖑᐊᖅᑏᑦ ᒥᖅᓱᖅᑏᓪᓗ ᐊᔾᔨᐅᖏᑦᑐᓂᒃᓗ ᐱᖅᑯᓯᖃᕐᓂᕗᑦ ᑕᕝᕙᑑᖕᒪᑕ?”
ᑕᐃᒪᑦᑕᐅᖅ ᐊᓯᕙᕆᐊᖅᓯᒪᔪᒪᖃᑦᑕᕐᒥᔪᑦ ᓄᓇᒧᑦ ᑕᑯᒋᐅᕆᐊᖅᑐᖅᑎᑕᐅᓪᓗᑎᒃ ᐅᑭᐅᒃᑯᑦ ᑎᑭᖃᑦᑕᓕᕈᓐᓇᕐᒥᔪᑦ ᑕᒪᐅᖓ, ᐅᖃᕆᓪᓗᓂ.
ᑕᐃᒪᓐᓇ ᕿᑎᕐᒥᐅᓂ ᓇᖕᒥᓂᖅ ᐱᓇᓱᐊᒐᖃᖅᑐᑦ ᑲᑐᔾᔨᖃᑎᒌᖓᓂᒥᐅᑦ ᐅᓂᒃᑳᓚᐅᖅᑐᑦ, ᑐᑭᓯᓂᐊᕈᒪᓪᓗᑎᒃ ᓄᓇᓕᖕᒥᐅᓂᑦ ᖃᓄᐃᑦᑐᓂᒃ ᑮᓇᐅᔭᒃᓴᐅᑕᐅᔪᓐᓇᖅᑐᓂᒃ ᐱᕙᓪᓕᐊᑎᑦᑎᔪᓐᓇᕐᒪᖔᑕ, ᐃᑲᔪᕈᓐᓇᖅᑐᒍᑦ ᓄᓇᓕᖕᓂ ᓴᓇᕝᕕᓕᐅᕈᒪᔪᓂᒃ, ᐅᖃᕆᓪᓗᓂ ᐃᓂ. ᐊᒥᓱᓂᒃ ᐱᔭᕆᑐᔾᔪᑎᖃᕐᒪᑕ ᓄᓇᓕᖕᓂ ᓇᖕᒥᓂᖅ ᐱᓇᓱᐊᒐᓕᐅᕈᒪᔪᑦ ᐊᒥᓱᓂᒃ ᑲᒪᔾᔪᑕᐅᓂᐊᖅᑐᓂᒃ, ᓇᖕᒥᓂᖃᖅᑐᑦ ᑲᑐᔾᔨᖃᑎᒌᖓᓂᒥᐅᑦ ᑭᒡᒐᖅᑐᖅᑎᐅᔪᓐᓇᕐᒪᑕ ᒐᕙᒪᑎᒃᑯᓐᓂᑦ ᑐᒃᓯᕋᖅᑐᓂᒃ ᖃᓄᐃᑦᑐᓂᒃ ᐊᒃᓱᕉᑎᖃᕐᓂᐊᕐᒪᖔᑕ ᐅᑭᐅᑦᑎᓐᓂ ᑐᑭᑖᕈᑎᖃᕐᓂᐊᖅᑐᑦ, ᐅᖃᕆᓪᓗᓂ.
ᐊᒻᒪᓗᑦᑕᐅᖅ ᐃᓚᐅᓂᕐᒥᔪᑦ ᓄᓇᓕᖕᒥᐅᓄᑦ ᑭᒡᒐᖅᑐᖅᑏᑦ, ᑲᑎᒪᕕᓂᒃ ᐋᕿᒃᓱᐃᔨᐅᖃᑦᑕᖅᑐᑦ ᖃᐃᖁᔨᓯᒪᓕᖅᑐᑦ ᓄᓇᓕᖕᓂ ᒐᕙᒪᑎᒃᑯᑦ ᐱᕙᓪᓕᐊᑎᑦᑎᔨᖏᓐᓂᒃ ᐅᓂᒃᑳᕆᐊᖅᑐᖅᑎᑦᑎᔪᒪᓪᓗᑎᒃ, ᐃᓚᐅᑎᓪᓗᒋᑦ Polar Knowledge Canada-ᑯᑦ, ᐃᒪᕐᒥᐅᑕᓕᕆᔨᒃᑯᓪᓗ, ᓴᓇᐅᒐᓂᒃ ᒥᖅᓱᒐᓂᒃᓗ ᓂᐅᕕᐊᒃᓴᓖᑦ, ᐊᒻᒪᓗ ᐅᖃᐅᔾᔪᐃᔨᐅᖃᑦᑕᖅᑐᓂᒃ ᓇᖕᒥᓂᖃᖅᑐᓄᑦ ᖃᐅᔨᒪᔨᒋᔭᐅᔪᓂᑦ ᐅᔭᕋᓐᓂᐊᖅᕕᓂ.